موضوع خفيف لطيف ( شنطتك تحت التفتيش)

[الساهرة]

السلام عليكم بنات ,,

يمكن يكون الموضوع عليه غبار بس مافي مشكله

نمسح الغبار ونعيد صياغته من جديد


الموضوع هو ان كل بنت او معظما اذا بتطلع تشيل شنطه

والشنطه بالي فيها يعبر عن ذوق صاحبتها

وحابين نعرف كل وحده شنو اهتماماتها الحقيبيه وشنو تحط بشنطتها

طبعا بالصور \\


الصور شي اساسي والي عليها الدور لها فرصة ثلاث ايام تجهز الحقيبه والصور

ولا تنسى شيء ابد

وجزدان المصاري نبيه مفتوح اذا فلوسها زايده نبي عشا ..


راح اختار لكم اول ضحية


والضحية تختار المتورطه الي بعدها


اول ضحية معنا هي





















:::: اشراقة أمل :::





يله يا اشراقة انثري الشنطه بالي فيها وصوريها خل نشوف الي داخلها...



تحياتي
الساهرة

 

 

[سُندس }]

:


وعليكم السلام ورحمة الله وبركاته ..



يعني نقدر نقول شنطتكِ تحت المجهر تقريباً .



فكره حلوه يجعلنا نتشوق لِكُل شنطه معنا


زين سويتي في بعض الناس .





يعطيك العافيه خيتي العزيزه .


مشكوره لحضورك الوضاء .









0

 

 

[تاروتية]

"

ياربي على هالمجاهر وين مانروح تلاحقنا ؟؟

الساهرة موضوع خفيف وحلو حيل خاصة انه مع الصور
وأشراقوه تستاهل الورطة ويازين الشماتة والله
عاد يالساهرة رسلي لها رسالة خاصة خبريها بالورطة .

 

 

[الساهرة]

الدانه حبيبتي حبينا نغير ونقول ان الموضوع مش مكرر بس فضحتينا يا الدوبه


اي اها يله شنطتك تحت المجهر ولا يهمك


بس اهم شي نسوي اكشن هنا ,,,



مشكورة دندوشة على المرور وعقبال ما نشوف شنطتك عن قريب ,,,

 

 

[الساهرة]

اقتباس وأشراقوه تستاهل الورطة ويازين الشماتة والله

ترى الشماته مب زينه توتو احساسي بتكوني بعدها والله يستر

اقتباس عاد يالساهرة رسلي لها رسالة خاصة خبريها بالورطة .

رسلتها بس هذي دبة نوم تقول بس تصحى من النوم بتجي تشوف السالفه ههههههه


يله ننتظر ست اشراقة امل


شرفني مرورك توتو


تحياتي
الساهرة

 

 

[مثالية]

فكره حلوه بس اللي مصعبها التقاط الصور

اقتباس عاد يالساهرة رسلي لها رسالة خاصة خبريها بالورطة

آشراقه يالله يمديها تشيك على شنطتها شنطة سفر

باانتظارك آشراقه

يعطيك العافيه الـساهره

 

 

[إشراقة أمل]

هلا والله وغلا ..

وعليكم السلام ورحمة الله وبركـاته ..,

.

شنطتي مرررة وحــدة ..!

ترى ما عندي شنــاط .. لا تطنزوا علي ..

ما عندي إلا شناط المدرســة ..

وعادة عادة .. ما أطلع بشنطــة .. عشان كذا ما اهتم كثير لأمر الشنطـة

شريت أو ما شريت .. سيان .!

<<< اشرااااقه تكفين .. الحين كلّش صدقووووك ..!
.

ما علينـــا ..

هو عندي شنطـة وعندي أغراض ..

أغراض البنات لجـاوا يطلعون وش هي يعني ؟

جوال ومفتاح وعطر ومناديل وأحياناً قلم .. بس ..

أمـا البوك ..

ما عندي بوك .. لأني عادة ما أشيل معي فلوس وقت الطلعـات ..

ولا أهتم .. مع انه امر جداً ضروري ..

وحتى إذا بآخذ معي فليسات .. مو مهم البوك .. أمره مو ضروري ..

أمـا عن الصور ..

هل هو أمر جداً جداً ضروري يعني ..؟!

لأني ما عندي كــام عشان أصورهـا لكم ..

والمشكلـة .. ولا احد في بيتنـا عنده كــام عشان يسعفني في ذا المهمـة الصعبـة ..

أبوي عنده كام في جواله .. بس مستحيل أقوله ممكن الجوال ..!

أمـا اخواني وأخواتي .. مو موجودين .. << وحيدة فريدة مع اخوان أصغر منها ..!

>>> قالت قصـة حياتهـا كـاملة ..!

يعني وش اسوي في ذي الحـالة ..؟!

ما يكفي التوصيف ..! <<< تكفين اسكتي ..

.

هاااه سوسو ..

شو صار على الصور ..؟!

<<< ارحمـوا حالهـا .. ما بقى إلا تروح بيت الجيران تطلبهم كام ..!

.

ننتظــر الفـــرج ..!

.
.

 

 

[إشراقة أمل]

اقتباس زين سويتي في بعض الناس .

دندوووووووووون ..

ما توقعتك شايله علي هالكثـــر ..!

وش دعووووووووووة

بس يللا .. يوم لك ويوم عليك ..

.

مرور عســل ..

وأتمنى تسلفيني كاميرتك << إذا عندك .. عشان أصور لكم شنطتي

.
.

 

 

[إشراقة أمل]

اقتباس وأشراقوه تستاهل الورطة ويازين الشماتة والله

أشووووف صرت مطنــــزة لكم على آخر العمــر <<< مسويه معصبــة هع

.

بس مو مشكلــة ..

عقبى ما تتورطين انتِ .. وابشري .. الدور جايك إن شاء الله << يعني تهديد ..؟

.

من تشمت بأخيــه يوماً .. شمّت الله به العباد يوماً آخر

<<< لا يفوتكم القــول .. ما ادري من وين جــا ..!

.

.

 

 

[إشراقة أمل]

اقتباس ترى الشماته مب زينه توتو احساسي بتكوني بعدها والله يستر

اصبري بس يتم الافراج عني .. مع هالصور البلشــة .. << مدري الصور وإلا الكام البلشـة ..!

ولا أختــار إلا توتــة المفتوتــة

وأنـا أدري إنها بدورهـا .. بتختار دندون بعدهـا

.

اقتباس رسلتها بس هذي دبة نوم تقول بس تصحى من النوم بتجي تشوف السالفه ههههههه

حرااام عليك .. وراي دوام من الصبح إلى العصــر

وش تبي مني .. و وش تعدي حـالي ..

لازم أنام بكير .. عشان أصحى بكير .. وأشوف الصحة كيف بتصير

آآه يا سوسو ..

تعالي نامي بدالي بس

.
.

 

 

[إشراقة أمل]

اقتباس آشراقه يالله يمديها تشيك على شنطتها شنطة سفر

هههههههههههههههه

فطستيني ضحك مثمث ..

الله يقطع سوالفك ..

شككتيني ان عندك كــاشف ..

.

مرورك أسعدني كثيراً ..

وتعليقك أكثر ..

لا عدمتك حبيبتي ..

.
.

 

 

[الساهرة]

خلاص اشراقة امل برحم حالش

وانتي اختاري الضحية وابيك تنتقمي من الشامتين بنفسك هههههههه


ولازلنا ننتظر


على الفكر الصورة شيء اساسي بالعبه ,,,,


تحياتي

الساهرة

 

 

[إشراقة أمل]

تسلمبن يا قلبي سوسو على الإفــراج ..

وأعتذر منك ومن الكل ..

تمنيت يكون الموضوع أحلى .. بالصور

بحكم إني أول مستضافة ..

بس الأمر مو بيدي

.

أشكرك سوسو على الإعفــاء .. وطيبة القلب يا قلبي ..

وأكيد أكيد ..

أختـار بعدي ..

توتة المفتوتــة

.

<<< دانــة .. استعدي من الحين .. لأني أدري إن توتة بتختارك بعدهـا

.
.

 

 

[تاروتية]

اقتباس توتة المفتوتــة

وش سالفتك عليً يا أشراقوه ؟
مرة بخيلة ومرة بطنك تحت المجهر!
والحين شنطتي وجوالي في وقت واحد مو حرام عليك؟

شرأيك تصيري طيبة مثل الساهرة وتعفيني ؟

عاد صبروا عليً أنتي وإللى متفقة معاها عليً أصور الأغراض
وإلا تدروا ماعندنا كاميرا .

 

 

[سُندس }]

:



هاااي .


اشلونكم ؟ طيبين ؟!




- اشراقه كل هذا مقابل يعنو .



أقوول :


اشراقه طيب ماقلتي شفيها شنطة المدرسه ؟!

مو شرط حق الطلعه اي شي قوليه يعني الحين

اذا رحتي دوامك ماعندك ولاشي تاخذيه معك ؟!

حتى لو كيسه الحين بتصير كيسه تحت المجاهر لحقووو .


اذا تبي كاميرة فديو عندي بعد افداك .



المهم ننتظرك .




/



مسكينه توته تورطونها اثنين في واحد


يا الله مو مشكله نُسعد بجاري فحص مجاهركم

غفلو عني اشوي .












بـ التوفيق .






:













اللهم لاشماته يعني

 

 

[إشراقة أمل]

اقتباس والحين شنطتي وجوالي في وقت واحد مو حرام عليك؟

كمــا تدين تــدان ..

ويا زين الشمـاته والله .. هااا ..

.

اقتباس شرأيك تصيري طيبة مثل الساهرة وتعفيني ؟

تصدقي ..

كسرتي خـاطري

ودي أعفيك .. بس أنـا عارفة إني لو بعفيك ..

راح أعفيك من شنطتك .. وبأختار حبيبتي [ الدانـــة ] ..

وهي بعد ما تخلص الورطة بتختارك بعدهـا ..

يعني الدور جايك جايك .. آجلاً أو عاجلاً ..

فخليك تفتكي من البدايـة أحسن ..

عشان ما تظلي تحاتي متى راح يورطوك

<<< ضبطتهـا لك توتـــة ..

.

اقتباس عاد صبروا عليً أنتي وإللى متفقة معاها عليً أصور الأغراض

هو بصراحـة .. ما فيه اتفــاق ..

بس ..

من تشمت بأخيــه يوماً .. شمّت الله به العباد يوماً آخر

هذي الســالفة ..

.

اقتباس وإلا تدروا ماعندنا كاميرا .

كل شي بنصدقه .. إلا هالتصريفـــة <<< ما انكسر خـاطرهـا هع ..!

.

غاليتي ..

نحن في الإنتظـــار ..

لا تتأخري كثير ..

ولا تنسي تصوري شناط بنات الجيران معك

.
.

 

 

[إشراقة أمل]

اقتباس اشراقه طيب ماقلتي شفيها شنطة المدرسه ؟! مو شرط حق الطلعه اي شي قوليه يعني الحين اذا رحتي دوامك ماعندك ولاشي تاخذيه معك ؟!

شنطـة المدرســة فيهـا :

كتب المدرسـة
دفـاتر
مقلمة فيها الأقلام ( أزرق - أحمر - أخضر - أسود ) بنسل - مزيل - مسطرة - مساحة - برايه
بطـاقة التعريف بأني طالبة أدرس في مدرسة الطرف الأولى [ اللي مال أمها داعي ] مع بنت السالم ..
والعلكــة تتخشش في جيوب الشنطــة ..
أحياناً .. آخذ معي فطوري من البيت .. سندويتشه أو فطيرة .. أو خربوطـة ..
وبث على ما أعتقد

.

اقتباس حتى لو كيسه الحين بتصير كيسه تحت المجاهر لحقووو

اسكتي الدانــة لا تفتنين لأحد ..!

بالنسبـة للكيسـة .. آخذهـا أحياناً .. إذا صار عندنا كشتة بنات ..
يعني لزوم الخرابيط اللي نوديهـا ونبسط فيها انا وربيعاتي ..
أو إذا كانت شنطتي زحمـة .. آخذ كيسة أخفف على الشنطـة

.

وبعد دندون وش حـابه تعرفين ..؟

.

اقتباس اذا تبي كاميرة فديو عندي بعد افداك .

تسلمين لي يا قلبي أنتِ ..

أدري بك .. حساوية وأم الكرم

خلاص .. أنتظرك تطرشينهـا لي .. ولا يصير خاطركم إلا طيب ..

اسوي لكم تقرير مفصـل

.

اقتباس غفلو عني اشوي .

مو احنا اللي غافلين عنك ..

انتِ اللي غافلـة عن عمرك ..

روحي شيكي على صندوقك .. و فضييييييييييييييه ..

برسل لك رسالة بس صندوقك مليااااااااان .. و ما وصلتك الرسالة ..

.

حبيبتي الدانـة ..

لا تنسي تروحي تشيكي على غرفتك تحت المجهــر

.
.

 

 

[الساهرة]

يعني ام التصريفات اشووف صارت بالموضوع


صج بنات اي شيء ما يتكل عليكم


اي توتو ما عندك كاميرا ما عاد يمشيني علينا هالحكي تسلفي بوقي هذا مو شغلنا شنطتك تحطيها يعني تحطيها والاغرض تنثرينهم

واحنا نشوف بعيونا البلاوي ههههههه



ولا زلنا بالانتظار ...


حياكم الله

 

 

[تاروتية]

أشراقوه
أنا وش سويت لك كان كما تدين تدان مو كأنك أنتِ إللى مسويه فيني سواة ؟
وأصلاً من قالك بختار الدانة بعدي ؟ مفجأة ترى .




الساهرة
أي أدبيهم هالبنات ماصدقوا خبر عفسوا الموضوع كله .

 

 

[تاروتية]

بسم الله الرحمن الرحيم
اولاً وقبل كل شئ اخر مرة تورطوني والله تعبت !

هذه شنطي جميعهم .

وهذه جوزداناتي لا تقولوا بعد تحت المجهر .

وهذه اغراضي إللى في الشنطة > شريت لي شنطة واسعه .
( عطر فرنسي / عطر عود / معقم / جوالين / كحل / كريم مرطب / كريم أساس / علبة عدساتي / نظارتي / جوزداني ) .

المهم إللى تعجبها شنطة حلالها وتأمر عليها
وكنت أبي شنطة اليوم رحت السوق ماعجبوني .