|
|
|
22-11-2009, 06:17 AM
|
رقم المشاركة : 1 |
|
مشرف سابق
|
][ جروح تحت المطر ][ قصة مكونة من أجزاء ][
// بسم الله الرحمن الرحيم // // السلام عليكم ورحمة الله وبركاته // ، ، ((((((((( جروح تحت المطر )))))))))) ، ، 1 - بتكون قصة أجتماعية درامية هادفة ، وأقصد بهادفة يعني فيها بعض المشاكل إلي مجتمعنا يواجهها ، فـ ياريت تركزون في القراءة علشان تستمتعون وتستفيدون من القصة. 2 - بتكون القصة بـ اللغة العربية الفصحى على شوية لهجة عامية ، لأن إلي لاحظته أن بعض القراء يستوعبون أكثر مع اللهجة العامية أكثر من الفصحى ، عشان الكل يستمتع بالقراءة خلطت الأسلوبين. 3 - راوي القصة هو الشخصية الرئيسية ، يعني كأنكم تقرون واحد يتكلم عن نفسه وعن إلي صار معاه. 4 - سوف أضع القصة على أجزاء ، هي ماراح تكون طويلة إن شاءالله ولكن عشان ماتملون بخليها على أجزاء متعددة. ، ، ][ نصيحة للقراء ][ ، ، قعدوا في مكان هادي ومريح ، وجيبوا لكم فشار ( نفيش). وإن شاءالله تقرونها كاملة وتفيدوني برأيكم اعزائي. ، ، - الجزء الأول - ، ، في وسط أحلامي وفي شهوة نومي العميق يأتيني صوتاً صارخاً بإسمي من بعيد قاسم .. قاسم .. أستيقظ .. هيا بسرعة أحمد : قووووووم قووووووم قاسم يا يبا قوووووووم قاسم : أفففففففف ... خلني ما شبعت نوم شفيك أنت هذرة؟ أحمد : أمي ها ها ... أمي تقول لك ها .. إي تقوول ... قاسم : وعمى ... قول شتبي أمي و فكني؟ أحمد : تقول لك قوم تغدا الساعة 4 العصر الحين .. وأبوي يقول لك ها ها .. أبوي يقول .. قاسم : أفففففففف ياصبر أيوب على بلواه! أحمد : أبوي يقول لك تغدا بسرعة وروح الجامعة قبل الليل قاسم : إن شاءالله ... إن شاءالله ( إنصرف أخي الوحيد والصغير أحمد ، صحوت من النوم بتثاقل تثائبت بكسل وإذا بدخول أمي للغرفة ، حملت لحافي الملقى على الأرض ، وبدأت في ترتيب السرير و لملمة رسوماتي المبعثرة على الأرض ودفاتر الرسم والألوان فأنا أهوى الرسم ، رسوماتي تملأ جدران غرفتي وحاجياتي مبعثرة تائهة في الغرفة ، فأنا شاب في العشرين من عمري ، أعزب غرفتي كحال غرف الشباب مُهمله والفوضى تعم أرجائها ، قالت لي أمي وهي منهمكة في ترتيب حاجياتي ) الأم : قوم ياوليدي تأخرت على الجامعة وراك مشوار للدمام! قاسم : يما بعد شسوي خذتني نومه ... الحين اتغدا وأمشي للدمام. الأم : الله يهداك أنت لو جايب نسبة عدله كان دخلت فرع الجامعة إلي في الأحساء. قاسم : يما كم مرة أقول لج مو سالفة نسبة ، السالفة أن هم في المقابلة رسبوني إلي قابلني من شكلي ماعجبته ورسبني غصب! الأم : ماعلينا .. قوم أنت الحين تغدا هذا غداك مغطى في المطبخ. قاسم : إن شااااااااااءالله. ( مررت بالصالة فإذا بي أرى أبي جالس يقرأ الجريدة والتلفاز مفتوح على إحدى القنوات الإخبارية وكان بجانبة طبق من الفاكهة ، أقتربت نحوه ) قاسم : هلا يبا ... وأنت طول اليوم تقرا أخبار وتشوف أخبار! الأب : شسوي بعد ... الدنيا تقهر الواحد وتعال أنت الحين كم مرة أنا موصيك تمشي الدمام من العصر ها ؟ لا تمشي في الليل مو زين. قاسم : يبا شنو مو زين يعني بيجيني برص إذا مشيت في الليل!! الأب : تنكت يا ولد ؟ إلي أقصده أن هالأيام شتا برد .. وفي الليل يصادفكم مطر وإلا يصير ضباب ... وخط الدمام يابوك خطر الناس يسوقون بجنون. ( هنا جات أمي وقالت ) الأم : إي والله صادق يابو قاسم ... أنا اليوم الصباح ماقدرت أنشر الملابس من المطر! قاسم : إكملت ... وطاح اليوم مطر. الأب : مو طاح الصباح وبعدين وقف ... فأبيك تمشي من الحين قبل لا يطيح في الليل! ( أخذت كم حبة عنب وقلت لهم المطر يمر علينا في اليوم مرة وحدة بس هههههههه ) الأم : إنا لله وإنا إليه راجعون .. طول عمرك راسك يابس ... روح غداك في المطبخ وجهزت لك شنطت ثيابك. قاسم : مشكورة يالغالية ما أدري أنا شبسوي بدونك ِ... يبا لا تخاف بتغدا وبمشي. ( ذهبت إلى المطبخ ، الغداء على الأرض جلست أكل فنحن عائلة بسيطة ، أبي موظف ميسور الحال في أحدى الدوائر الحكومية وأمي تخيط ملابس النساء ، بيتنا متواضع ووالدي يعتمدون علي في الدراسة والعمل ، ولدينا أخي أحمد ذو العشر سنوات ) ( هنا جاء إلي أحمد وصعد على ظهري ) قاسم : هاااااي ياولد وخر أنا مالي شده أشيلك .. وخر. أحمد : ههههههه يوهوووو .. زين خلاص خلاص ... بنزل. ( نزل وقعد يمي ، هنا دق جوالي ) قاسم : أوهوووووو هذي نوال. أحمد : زين رد عليها! قاسم : الله يعيني عليها ... نعم نوال : هلاااااااا قاسم ... شلونك ؟؟ قاسم : بخير ... الحمدلله. نوال: بتمشي اليوم صح ؟ شوف قبل لا تمشي أبغي أعطيك حاجه. قاسم : شنهي بعد ؟؟ نوال : مفاجأة ... عاد أنت لا تخرب على روحك. قاسم : إن شاءالله إذا ذكرت مريت عليج ... باي نوال : قاسم شفيك ؟ كأن مالك خلق تكلمني ؟ شصاير؟؟ قاسم : أوهووووووو مو صاير شيء بس توني جالس من النوم وبتغدا ! نوال : أوكي ... أخليك تتغدا ... باي. ( وأسكر من عندها إلا يطالعني أحمد بنظرة خبث ) قاسم : ها .. شفيك أنت بعد ؟ أحمد : لمتى أنت تعامل نوال بهالطريقة ! يا أخي تدري إنها معجبه فيك. قاسم : إي أدري ... بس يا يبا هي معجبة فيني هذا ما يخليني غصب أصير أنا معجب فيها ... أدري إنها هي أحلى بنت من بنات خوالي وحتى بنات عمامي مافي وحده تضاهي جمال نوال ... بس يا عزيزي أنت توك صغير على هالشغلات وما تفهمها ... إذا كبرت بتعرف أن مو أي بنت تخش قلبك بمجرد كلمة حلوه. أحمد : زين أنت يالملعون .. كل بنات العايلة عندهم إيميلك وبعضهم يكلمونك عالجوال ... شتستفيد من هالشيء ؟ قاسم : أخذ عاد !! إلي يسمعك يقول أن أنا إلي أعطيهم إيميلي ولا رقمي ... هم إلي ياخذونه وما أدري من إلي يعطيهم ! .. عموما شوف أنا كل هذيل أعاملهم مثل خواتي وهم بعد .. يعاملوني نفس الشيء ويدرون إني مو راعي حركات ماصخه ! أحمد : إلا نوال هذي تموووت فيك ... يا أخي هي أحسن وحده تصلح لك ... هي أصغر منك بسنة وحدة بس وتفكيرها نفس تفكيرك وإثنينكم ترسمون. قاسم : أحمد مالي خلقك تقعد تتكلم لي عن نوال ... أنا أعرفها زين. أحمد : شوف بصراحة أنت واحد مغرور ياخوي. قاسم : خير ... شقلت ؟ أحمد : إي هذي الحقيقة ... بس لأنك أوسم واحد من شباب العايلة ، كل البنات يكلمونك ولأنك ألبق واحد في التعامل مع البنات هم معجبين فيك ! قاسم : مو ذنبي إني حلو هههههههههه ... يا أحمد شوف ... أخوك ما تستهويه أي بنت ... أنا أبغي وحده أعطيها قلبي كله ... أبغي أرهن عمري لها ... وكل إلي شفتهم لين الحين ما يستاهلون بصراحة ... البنت إلي بس تقول لها كم كلمة حلوه ذابت عليك هذي ماتقدر تأمن قلبك عندها ... تدري ليش ؟ أحمد بنظرة مندهشه : ها ... ليش ؟؟؟ قاسم : لأن يمكن تسمع كلمة أحلى من واحد ثاني وتعجب فيه وبعدين بتحبه ... أو واحد يتغزل فيها وهي بعد تنجر خلف هالكلمات المعسوله ولا تدري بنية الرجال ، أنا ما اقول كلهم لكن هذا حال أغلب البنات الحين. احمد : أهااااااااااااااااااا. قاسم : زين يالشاطر ... فارج الحين وخلني أتغدا. ( بعدما أنتهيت من غدائي ذهبت لغرفتي كانت نظيفة ومرتبة جلست على المكتب ... فتحت الإنترنت و طبعاً لم أفتحه لبحث علمي أو لقرائة خبر عالمي ... صفحة للدردشة وصفحة للإيميل وأكيد الماسنجر مفتوح حالي كحال معظم الشباب (( بنات من مختلف الدول مضافين عندي وأغلبهم يعيشون معي قصة حب مزيفه )) يالهم من حمقى بكلمة غرام تهب نفسها و وقتها وعرضها ، وبعض أصدقائي يتفاخرون فيما بينهم بعدد البنات اللاتي يكلمهن و البعض يخرج معهن ... حياتي كانت على نسق لا يتغير ، أشعر وكأنني لعبة في يد الزمن وينبغي لي أن أسير على سكة الحديد نفسها وأن أقف في نفس المحطة ... مللت منهم فأطفئت الإنترنت على مسمع من أذان صلاة المغرب ... نهضت لأصلي وبعد أن أنتهيت سلمت على أمي وأبي و ودعت أحمد و خرجت من المنزل لأذهب إلى الدمام .. كانت الساعة 8:20 مساء ً ، وأنا في الطريق وقبل أن أخرج من الأحساء إتصلت علي نوال ) نوال : قاسم ! وينك ماجيت ليكون مشيت ؟ قاسم : أوووووووو نسيتك والله .. آسف. نوال : لا والله !! أنا تنساني لكن الغدا ما تنساه ؟ قاسم : نوال ليكون أنتي أمي وأنا ما أدري !! نوال : آسفه ... زين قاسم مر علي الحين تكفى أبغي أعطيك هالهدية. قاسم : زين زين هذاني جاي الحين. نوال : يالله أستناك. ( ذهبت إلى بيت خالي حسين ... وقفت عند الباب و إتصلت عليها لتخرج ... خرجت و فتحَت الباب قليلا ً ... مددت يدي لتمد لي كيسه أخذتها فقالت لي من وراء الباب ) نوال : أتمنى تعجبك الهدية ... تعبت علشانك. قاسم : إن شاءالله ... زين تبين شيء ثاني ؟ نوال على إستحياء : سلامتك .. وإنتبه على روحك. قاسم : زين زين ... مع السلامة. ( في هذه الأثناء مرة أخوها سامي ... أبتسم بوجهي وقال ) سامي : ها يبا ... شعندنا ؟ قاسم : ولا شيء هذي أختك كعادتها سامي : والله حظك أنت الوحيد إلي نوال تعطيه وجه ... حتى أنا أخوها ما تعاملني مثلك قاسم : شوف يا ولد خالي أنا مستعجل الحين وبمشي الدمام تبي شيء ؟ سامي : لا بس خل نشوفك عالماسنجر ... وتوصل بالسلامة. ( أرى ساعة السيارة 9:03 مساء ً ، الطريق مظلم منذ أن وضعوه , الجو بارد مع رياح قوية ، السائقين يُسرعون وكأن الموت يلاحقهم وما علموا أنهم يسرعون للموت ، الشاحنات على طول الطريق والبعض منها بدون أنوار ... ليتفاجئ بها السائق حال وصوله أمتاراً قليلة منها ، صوت الأغاني تملأ أرجاء سيارتي ... فأنا إذا سافرت وحدي ولم أستمع للأغاني يغلبني النعاس ، وماهي إلا دقائق على سيري إذ يرن جوالي ) قاسم : الو نعم. نوال : ها شرايك ؟ قاسم : هلا نوال .. رأيي بشنو ؟؟ نوال : عسى لين الحين ما فتحت الكيس؟؟ قاسم : يوووو لا نوال ... لين الحين مافتحته ... و نوال : أنت كذا دايماً ... ماتهتم بمشاعر غيرك ومتكبر ... على شنو ها على شنو؟ ( وبدأت تبكي ... أنا هنا أحسست بموقفي السخيف ومعاملتي الجافة لها ... سكت قليلاً ثم قلت ) قاسم : آسف يا نوال ... والله كان بالي مشغول مع الطريق وخصوصاً إني تأخرت بالمشية ... تبيني أفتح الكيس الحين ... حااااااااااضر .. ها الحين أجيب الكيس من المقعد الخلفي صبري. ( هدأت قليلاً ومازالت ساكته ... بيدي اليسرى أتحكم بالمقود والأخرى ممسك بها الجوال وأبحث عن الكيس في المقعد الخلفي ... كان بعيداً على أرضية السيارة ... للحظه إلتفت للوراء لأطاول يدي للكيس وإذا بي أخل بتوازن السيارة ... أفاجئ شاحنه أمامي ... تركت الجوال .. أستدرت بسرعة للسيطرة على الوضع ... صوت الفرامل دوى ... رأيت نفسي وكأني سأدخل في الشاحنه ... إنه المووووت ... في تلك اللحظة كنت اسمع صوت الأغاني وصوت نوال تصرخ قاااااسم قاااااسم ... ) ، ، نكمل معكم بقية القصة في الجزء الثاني ، ، فكونو معنا ، ،
التعديل الأخير تم بواسطة M.ǾŻĬļ ; 22-11-2009 الساعة 06:32 AM. |
|
|
|
22-11-2009, 12:36 PM
|
رقم المشاركة : 2 |
|
طرفاوي نشيط جداً
|
رد: ][ جروح تحت المطر ][ قصة مكونة من أجزاء ][
قصــة جميــلة مــن جزئهــا الأول ! ., !, !!,!
|
|
|
|
|
22-11-2009, 09:01 PM
|
رقم المشاركة : 3 | |||||||||||||||||||||||
|
مشرف سابق
|
رد: ][ جروح تحت المطر ][ قصة مكونة من أجزاء ][
// بسم الله الرحمن الرحيم //
، ، يعطيك العافية اخي مقدركم وإن شاء الله راح نكمل القصة في اقرب وقت ، ،
|
|||||||||||||||||||||||
|
|
|
 |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
