ماهو برنامجك مع مطبخك ؟

[سُندس }]

:



سلام عليكم ..


مبارك عليكم الشهر , كل عام وانتم بخير ..



حبينا نغير شوي عن الطبخ وشغلات الطبخ ومقادير وطرق


ماهو برنامجكِ مع مطبخكِ ؟


يعني وشـ نظامك مع ترتيبه وتنظيفه ؟


في رمضان ماذا تعملين مع زحمة المواعين في المطبخ ؟


اكيد صارت لك مواقف وتراكمت عليك الماعين وصارت فوق بعض ؟







يا الله تجاربكم وحياتكم عيشوها هُنا مع مطبخ رمضان .





/

 

 

[وردة الأحلام]

بس حبيت أتليقف وأحجز لي أول مقعد . .

*_^

لي عودة بإذن الله . .


تشكراتي وتحاياي لكِ . .

 

 

[ولد البلد]

بعض النساء يبالغون في المطبخ يعني يتسخدم مواعين كثيره لحاجات قليله وتتراكم المواعين في المغسله
المفروض كل شء خلت منه تغسله وتضعه في مكان حتى لاتتراكم واذا كانت لديها بنات يساعدوها يكون افضل

 

 

[تاروتية]

::



أنا ماحب تجمع الصحون ( المواعين أبد ) أحب الغسيل أول بأول
بس بعد الفطور إجباري تجمع , غير تنظيف الفرن والأرضية وووو .

بصراحة كل شئ أمشيه تنظيف ترتيب إلا شئ واحد ,
وهو تخترب عندي طبخة أو تحترق أحس بخيبة أمل مو طبيعية .

 

 

[سُندس }]

/



هلا والله وردة الأحلام .


مقعد ولا شفناك تاني خلاص كنسل حجز



انتظرك عسوله .










/

 

 

[سُندس }]

/



كلام في عين الصواب يا ولد البلد .


لابد نبدأ لِـ أمور أكثر من غيرها , يعني نغسل الماعين

أول بـ أول ومانراكمها ونسوي الطبخات وحتى الطبخه

مالها مكان بينا .


وعشان يكون في راحه شوي اذا طبخ ورى بعض مشكله

واذا غسيل ورى بعض مشكلتين .



بس شسوي المرأه الوحيده في المطبخ ؟

أكيد مسكينه مشكلتها عويصه , بس الله يكون في عونها وعون

الجميع .






شكراً لحضورك .





/

 

 

[الساهرة]

اما عن برنامجي انا فهو كالتالي

اول ما ادخل المطبخ ارتبه واغسل وارتب بقايا عفسة العيال لاني بجد ما احب اطبخ وفي ملعقة وحده وسخه

وبالتالي ما ابتدي بطبخه الا مخلصه تغسيل مواعين الطبخه الي قبلها

انا فطوري مو متعب حيل زوجي وعيالي ما يحبون الطبخات المعقده يعني معجنات ومحاشي وحلى ثقيل محطوط فيه مليون صنف وصنف لا كلشي سهل ومواعينه قليله

واحمد ربي لان انا الانثى الوحيده بالبيت وكلشي على راسي بروحي

احاول ما تجي 6 الا مخلصه كلشي طبعا لان العيال وابوهم ما يحبون الاكل ساخن حييل فعادي لو بكرت في طبخ الاكل والقلي وغيره

المهم 6 وربع الا وانا حاطه السفره بعدها اتروش واصلي وما اخلص الا بجية العيال وابوهم من المسجد نقعد نفطر نخلص اغسل الكم صحن وبعدها اجلس مع زوجي والعيال نشوف طاش ماطاش تخلص هم يروحون المزرعه وانا الحسينيه او السوق او بيت اهلي او انام خخخخ\\


وبسسسسس هذا جدولي



على فكره انا احب غسيل المواعين والتنظيف له متعه ولذه غريبه عندي واكره حييييييييييييييييل الطبخ مدري ليش مع ان طبخي ما علامه يمدحونه


يعطيكم العافيه بنات

ويسلمو دندوشه على الموضوع

وننظر البقيه

تحياتي
الساهرة

 

 

[تاروتية]

اقتباس على فكره انا احب غسيل المواعين والتنظيف له متعه ولذه غريبه عندي واكره حييييييييييييييييل الطبخ مدري ليش مع ان طبخي ما علامه يمدحونه

هههه سبحان الله , أنا مثلك عادي أغسل , أنظف إلا الطباخ أكرهه بجد بجد وأطبخ مجبره رغم أني شاطرة في الطباخ .
وفي شئ ثانية أكرهه كره العمى وهو ترجيع الصحون مكانها في الدواليب أكره شئ عندي .

حلو برنامجك أم مصطوف ومرتب .

 

 

[سُندس }]

اقتباس وهو تخترب عندي طبخة أو تحترق أحس بخيبة أمل مو طبيعية .

اي والله با الذات لما تتحمسين لطبختها وتكوون أول مره تسوينها

لا وبعد اذا مدحوك في طبخه معينه , تحبي ع طول تسوينها

واذا سوتيها واختربت هذا خيبة أمل عدله لأنك متعوده كل مره

تظبط معك يا الله مو مشكله ما أحزن واجد لأن الغلط نتعلم منه

الصح للمرات الجايه وهكذا وتكون عندي الخبره فمن التجربه تأتي

الخبره والمهاره في الطبخ .


عاد القهر اذا احترق الشي او صار فيه شي وتغسلين مواعينه يعني ما استفدتي منه نهائي .


يسلمو توته ع تواجدك العطر .

منوره .


:

 

 

[زهرة اللوتس]

السلام عليكم ورحمة الله ...

بالنسبة لي المطبخ هالسنة غير شكل متسهّل أمره ,,,

ما أدري أكود توني أعرف أطبخ

البرنامج يبتدي الساعة ثنتين ونص ثلاثة ونص أربع ونص

باختصار وقت ما أخلّص اللي عندي أدخل المطبخ ، بس لازم أدخل ..

وأرتبه وأنظفه قبل ما اشتغل في الطبيخ....

أحب تغسيل المواعين حيل وهو اللي يخليني أتأخر للمغرب ،

وخبركم اللوتس وحدتن منظمّة و مرتبة ، فما أحب أشوف الوضع

مكركب مواعين واطباق وهذي بتقلي وذيك بتلف ووو ،

فكل ما سوينا شي رحت غسلت مواعينه ( إيه شبيصالي هالمطبخ ) >>> قدييييمة

اقتباس اكيد صارت لك مواقف وتراكمت عليك الماعين وصارت فوق بعض ؟

قبل أمس بسبب الزحمة والتفهية ..

كنت أقلي و أحاتي بالمواعين ووقت المغرب و بكل ثقة

حطيت أصابعي في المقلى وحرقتهم فواته عليهم بس

( خسرت الأربعة ، تغسيل المواعين والقلي والفطور و أصابعي )

اقتباس وفي شئ ثانية أكرهه كره العمى وهو ترجيع الصحون مكانها في الدواليب أكره شئ عندي .

هههههههههه هذا يهون

أنا كل شي ولا يخلّوا لي دلة الشاي أو القوري و الملاس

ما أحب أغسلهم يا علي عندي كارثة .,,,


يعطيش العافية دانتُو ...

 

 

[تاروتية]

اقتباس ( خسرت الأربعة ، تغسيل المواعين والقلي والفطور و أصابعي )

صراحة غسيل المواعين والقلي مافيه خسارة , بس الخسارة في الفطور وأصابع اللوتس ( طبخة أصابع زينب تعرفيها ؟ )

اقتباس أنا كل شي ولا يخلّوا لي دلة الشاي أو القوري و الملاس ما أحب أغسلهم يا علي عندي كارثة .,,,

صحيح ؟ ليش مايناسب أبد .!
صحيح الناس أجناس !

 

 

[سُندس }]

اقتباس على فكره انا احب غسيل المواعين والتنظيف له متعه ولذه غريبه عندي واكره حييييييييييييييييل الطبخ مدري .

اي والله غسيل المواعين لهم طعم لايقاووم

انا اغسل مو مشكله بس اهم شي مو كثار المواعين حتى

مانعرف شنو نغسل شنو نخلي يعني مثل ماقلنا ماتتجمع المفروض

بس اللي ماحبيته في رمضان اني اغسل وبعده اكنس كل ليله الغالبيه يعنو

في ليله خلاص زهقت وودي اني ماكنست

يعني الظاهر مايجي 2 في واحد صح ؟

بقولك الساهره يقولون المرأه أذكى من الرجل لأن المرأه تقوم بترتيب البيت

لذا فهي اذكى منه ويمكن داخله سالفة غسيل المواعين تعتقدين ذلك ؟!


جدول مرتب وهذا ماينبغي ان نكون في شهر رمضان حتى لايضيع الوقت هباءً منثوراً .

لكن مو مشكله لنا اجر نفطر صائمين ونعمل بخدمتهم مافي شي ضايع .





مرورك عســــل عزيزتي الساهره

ماننح ــرم ,.


وردات .





/

 

 

[مثالية]

اقتباس ماهو برنامجكِ مع مطبخكِ ؟

بما ان حنا اكثر من وحده فالشغل موزع بس عادة نبدأ بالساعه 3 العصر
وكل وحده تكفل في طبقين اوثلاثة بحد اقصى , وانا ممكن اساعدهم في التقطيع والطبخ
بس غسيل صحون مابطيق التغسيل بس حدي اغسل الصحون اللي باكل فيهم ,
واعوضهم بشئ آخر اميل له هو الترتيب والنظافه خاصة الكنس ..

الدانه / يعطيك العافيه ولآعدمنا افكارك

 

 

[سُندس }]

اقتباس وفي شئ ثانية أكرهه كره العمى وهو ترجيع الصحون مكانها في الدواليب أكره شئ عندي .

في هاذي جبتيها صراحه بس شكلك ازيد مني

با الذات اذا كان المكان غير مرتب ومواعين يبي لها غسيل ودك تاخذين

سلة المواعين تودينها في المخزن

بس عندي لك حل ! انك ماتغسلي وفي السله ماعين يعني :

خلي لك وقت خاص حق انك ترجعينهم محلهم عشان مايصير

غسيل وترتيب هيك يعني يمكن اخف .,

يعني مايجتمعون مع بعض نهائي سالفه سويناها .


واذا كان ماتحبينهم فمعناها خلي الوضع ع ماهو عليه




يسلموو لمتابعتك .




:

 

 

[سُندس }]

::



أيوااا يا اللوتس وعليكم السلام ..

اقتباس وخبركم اللوتس وحدتن منظمّة و مرتبة ، فما أحب أشوف الوضع مكركب .

أها هيك يعني ..

عليك كلمات يا اللوتس حلوه تكتبينها + تذكرني وحدة قياس مدري شسمها نيوتن = وحدتن .

اقتباس أنا كل شي ولا يخلّوا لي دلة الشاي أو القوري و الملاس ما أحب أغسلهم يا علي عندي كارثة .,,,

يؤ صحيح ؟

أجل قدر المعكرونه والشوربه شمسويه معاهم ؟

يبي لنا السنه الجايه نجيب لك كل ملاليس بيتنا نذاله .





يعطيك العافيه عزيزتي ومن عواده .




/

 

 

[شهرزاد]

سلام ياطبخات ..

طافني طبعاً المشاركه في عز وقته لكن بقول لكم عن نظامي ..

طبعاً أحنا بيت عايله بس كل وحده منا في شقه

وكل يوم أم زوجي تسوي الأشياء الرئيسيه وأحنا الأطباق الباقيه بس يكون كل وحده لحالها

يعني في شقتها أطبخ وأرتب وأغسل كل شيء وأنزل بالأطباق تحت وبعد الفطور طبعاً الله يسلم الشغالات

لأنو بصراحه المواااااااااااااااااااعين واجد بس وقت العزايم ندخل ونشارك بس هههههه

بس بالنسبه لي كل شيء متعه الطبخ الغسيل وترتيب الصحون في الدواليب كل شيء هههههه

يعطيكم العافيه يابنات ..