الفرق بين المرأه في السنه الأولى وما فوق العاشره

[الفتى الذهبي]

المرأه في السنه الأولى:

الساعه 6:30 صباحا :

تودع زوجها وهو طالع للعمل وتقول له ( بتوحشني يا حبيبي )

الساعه 11 صباحا :

تتصل عليه في العمل وتقول له ( حبيت اسمع صوتك بس يا عمري )

الساعه 3 العصر :

تستقبله وهو متشيكه وهو داخل للبيت وتقول له ( الغدا جاهز يا حياتي ..تحب احطه لك الحين ؟ )

الساعه 5 العصر :

تصحيه من النوم وتقول له ( اعمل لك شاي يا حبي ؟ )

الساعه 6 المغرب :

تسبل عيونها وتقول بكل خجل ( يا ريت يا حبيبي .. يعني لو ما عليك كلافه .. يعني اذا تقدر توديني شوي لبيت اهلي

اذا كنت تقدر يا عمري ) وقبل ما ينطق بكلمه ( اذا ما

تقدر خلاص مو لازم ) وطبعا يضيع هو في نظره من عيونها ويوديها لاهلها ولو انهم ساكنين في السويدي وهو ساكن في العليا

الساعه 8 بالليل :

تتصل على وتقول ( اشتقت لك يا عمري .. يا ريت

تمرني ونروح للبيت ) وطبعا هو عارف وش بيجيه في البيت فيطمر ويقول للشباب ( اسف والله يا شباب راسي مصدع ولازم امشي )

الساعه 10 بالليل :

تجلس في حضنه وتقول ( الله يا حبي تتذكر ؟ تتذكر ايام

الخطوبه لما كنت تعمل المستحيل عشان تشوفني ..وانا يا ما كذبت على ابوي وقلت له اني طالعه مع امي وانا اصلا متفقه مع امي عشان اطلع معك ) وبعدها هات يا...... لمده لا تقل عن ثلث ساعه

الساعه 11 بالليل :



بعد مرور عشر سنوات

الساعه 6:30 صباحا :

هي في سابع نومه

الساعه 11 صباحا :

هي برضه في سابع نومه

الساعه 3 العصر :

تستقبله وهي نافخه خشتها وتقول ( شف لي حل مع ولدك علي هذا ..حتى الان ما حل الواجب .. وسوير الله ياخذ عمرها ان شاء الله شاقه مريولها في المدرسه …عطني فلوس لازم اروح اشتري لها واحد غيره

… وصويلح يبي علبة هندسه تو انه يقول لي يوم ان الاختبار صار بكره

… وترى موضي تكنفست مع الدرج وهي كانت في المشايه … والظاهر انها تعورت

…كله من هالشغاله الله يا خذها ….اسمع يا انا يا هالشغاله في هالبيت ….ابيك اليوم تسفرها ما ابي اشوفها وابيك بسرعه تقدم على وحده ثانيه ….وما ابيها تصير حلوه …..يا ويلك لو صارت حلوه …..وبعدين شغالتي ابيك تشرط عليها اذا سفرتها ما عاد تشتغل عند احد ….عشان ما تقول اسرار بيتنا للناس الي تشتغل عندهم ( ما تدري ان اسرار بيتهم كلها عند الجيران من لسانها هاللي وش طوله )

و …و …..و

الساعة 5 العصر :

هي تفك هوشه بين سوير واخوها ويصحى هو على صوتها وهي تهاوش وتدعي عليهم بجميع الامراض الخطيره الحديث منها والقديم ( جعلكم للطاعون …جعلكم للحمى …جعلكم للوادي المتصدع …جعلكم للحمى القلاعيه …والايدز ..الخ )

الساعه 6 المغرب :

هو جالس يشرب الشاهي وهي تقول ( نبي نروح لامي بتجيهم بنت خالة جد ولد عم ابوي ..وبعدين نبي نروح نشتري للبنت مريول ..وبعدين بنت عمي والده ولازم اروح اشتري لها هديه

من باتشي و ابي امر على المشغل ..وبعدين حطنا عند اختي في الشفا من زمان ما شفناهم …………..

وفي هاللحظه فكر هو انه يشتغل ليموزين احسن له

الساعه 8 بالليل : تتصل على الجوال ( وينك فيه ؟ وبعدين وين بتروح ؟ ومن هو الي معك هذا ؟ ووش بتسون ؟ ومتى بتجي ؟ لا ما فيه الساعه 11 تعال الساعه 10 )

الساعه 10 بالليل :

جالسين هي وياه عند التلفزيون ..اخيرا هدوء ..والعيال

نايمين ..والجو جميل ..وفجأه تطالعه وهي ماده بوزها

وتقول ( الحين امك وش عندها اليوم ما ترد يوم اني سلمت؟ هاه ؟ ) ( والله ما ادري كان سالتيها ) ( واختك وش هالحركات الي مالها سنع …ليش عازمه الجيران وكل حريم اخوانك الا انا ؟؟؟ لكن هين والله لاسوي عزيمه وما اناديها …اصلا هي ما زارتني في المستشفى يوم اني ولدت وانا فاهمه قصدها ..لكن هين ..والله لو تحب السما ما نيب زايرتها اذا ولدت ……وبعدين بنات عمك وش عندهم نافخين عمرهم ؟؟ على ايش ابي افهم ….على جمالهم الزايد اللهم لك الحمد بس )

تسكت شوي بعدين تقول ( وبعدين اختك نوره يوم

انها تقول ان علي ولدي يشبهني ما يشبه ابوه وش قصدها

هاه ( ملاحظه : علي هو اشين اخوانه) ( انا فاهمه قصدها

وتراها اذا ما بطلت هالحركات والغمز واللمز تراني

ابسمعها كلمتين واخليها تحترم نفسها …..لا وذاك اليوم

تقول اخوي محمد ( الي هو الزوج ) حلو مره و3 من حريم الجيران قد خطبوه لبناتهم ….من زينك بس ما ادري وش لاقين فيك ) . يسكت وما يرد , تسكت هي ثم تقول ( وبعدين اخوك شاري لحرمته ساعه قيمتها عشرين الف ريال ) يرد ( طيب وش المشكله ؟ ) ( وانا ليش ما تشتري لي ..والا انا ما استاهل ..ولو هي يعني احسن مني … بلاك ما شفتها ..شينه وطبايعها شينه وحتى طبخ ما تعرف تطبخ ) ( خلاص اشتري لك ساعه ) تعصب وتقول ( ايه تسكتني بهالكلام ….والله لانت شاري ولا شي ) ( وش تبيني اقول يا بنت الحلال ؟ ) تقوم وهي تبكي ( خلاص ما ابي منك شي )

الساعه 11 بالليل :

هي زعلانه ونايمه مع العيال

وهو يلعن اليوم الي تزوج فيه

 

 

[هارب من العدالة]

هههههههههههههههههههههههه


هههههههههههههههههههههههه


هههههههههههههههههههههههه




وتسلم يابوعبدالرحمن بس خف أشوي عليهم لايزعلون علينا

 

 

[هارب من العدالة]

طيب شوف بوعبدالرحمن






ها وألا أنا غلطان

 

 

[الجرح العارف]

آنا أنصح اللي يشوف من زوجته كل ذا الفعايل بعد العشر سنوات كما يقول بو عبد الرحمن انه يتزوج عليها لأن حرمه مثل كذا مايكسر عينها الا الثانيه.........

 

 

[moroj]

اخواني اللي عنده ورده لازم يعتني فيها حتى تدوم نضارتها مو يهملها وتفقد الاحساس

وبعدين يحط اللوم على الزمن

اخوي انت اتقول كانت وكانت وكانت هذا في السنه الاولى ايش اللى صار حتى صارت

هي كذا

المرأه مثل الارض اذا تبي تاخذ منها لازم تعطيها اهتمام حنان احساس

معنى كلامي انتم السبب في شقاء انفسكم وشقاء زوجاتكم

هذي نصيحه من اخت لكم حبيتوا تاخذوا بها ام لم تاخذا هذا شأنكم

 

 

[هارب من العدالة]

يا أخت مروج ليس كل مايكتب هو على أرض الواقع حقيقة وأنما للأعتبار أو لتقديم النصيحة حتى لاتقع بالخطأ مستقبلا .......

وأحيانا للتسلية والمزاح لاغير ...

وهذا حسب وجهة نظري الشخصية

 

 

[moroj]

ياخوي انا مازعلت منكم لان الكلام مو موجه لي شخصياً
ولكني اعطيتكم نصيحه وهي 0 دعوا مشاعركم تتكلم ولاتخمدوها بسسب الكرامه او بحجة انه كلام فارغ يمكن يكون كلام فارغ بس سيكون ممتلئاً بالامل والحب من جهتنا نحن وستعطيك المرأه اكثر مما هو متوقع لانها تجد الدافع لها للاستمرار في تدليلكم
وهذا ماتريدونه ولن يكلفكم الكثير وهذه نصيحتي فمن اراد السعاده فليجربها

 

 

[هارب من العدالة]

للأسف .... لم تفهمي ما أقصد

ولكن لأختصار الردود ..... شكرا جزيلا على النصيحة ....

 

 

[الفتى الذهبي]

أهلا بالأخت على مداخلاتها في هذا الموضوع. وهذا ان دل على التجاوب مع الموضوع في موضوعيته.
هذا الموضوع مجرد دعابه على الطريق ولكن لايمكن أن نتجاهله فهو من واقع الحياه في هذا الزمن. وبعض الأصدقاء أيدوا الموضوع من حيث قربه الى الواقع ومدى امساسه الى بعض الأشخاص. بل أضافوا اضافات أعتبرها بهارات الى الموضوع.

فأرجوا يأخت أن نأخذ كل موضوع بعين الأعتبار للمستقبل القريب.

ومره ثانيه أشكركم على الموضوع.

يابو عبدالله خل على الطريق؟؟؟؟؟؟؟؟؟؟؟؟؟؟؟؟؟؟؟؟