الساعة السادسة صباحاً وقت الذروه( وش رايكم ادوش راسكم على خفيف)

[الساهرة]

بسم الله الرحمن الرحيم

بمجرد ان الجوال يدق نغمة التنبيه معلن عن وقت الصحيان تبتدي الرحلة الشاقة مع وقت الذروة


طبعا أحاول هذا الشي ما ينعكس على عيالي واسوي نفسي نشيطه حتى هم يصحصحون معاي

واغسل وجهي وعلى طوووووول اروح افتح الماي الساخن بدورة المياه واجهزه لهم واشغل الدفايه بالصاله

واروح لغرفتهم وانا في قمة الحماس


يا عيال يلا قومو وناااسه بتروحوا المدرسه


طبعا انا اتحمس بروحي ولا هم الود ودهم ولسان حالهم يقول يمه ترى صارت الحركه قديمه


المهم ما علي منهم اضل يمكن 10 دقايق وانا

اجلس يا مصطفى


قوم يا علي


تأخرت يا عبدالمحسن


قووووووووووووووموووووووووووووووووو

مافي فايده شغل الحماس والنشاط والتدليع ما يجيب نتيجه


بعدها يطلع الفيس الثاني

شوفو والله اذا ما تقوموا بروح اكمل نومي وانتو بكيفكم


ولا في فايده محلك سر كني قاعده اقول لهم قصة ما قبل النوم


بعدها ابدا اصحيهم بشكل عملي

افتح النوافذ و اشيل البطانيات واقطهم بعيد عنهم لأني عرفت ان السر في البطانية


وأخيرا وبعد جهد جهيييد توجه الثلاثي المرح الى الصاله


وانا اتنفس الصعداء <<<<<<<حبيتها الصعداء خخخخ

الا واشوف التحطوووم بعينه



العيااال






كني اقول لهم يا عيال اسم الله عليكم روحوا كملو نوم بالصاله


وتمر الدقايق وارجع اصحي من جديد

اجلس يا مصطفى


اقعد يا علي


تأخرت يا عبدالمحسن


لكن ما الومهم في ذا البرد الدفاية بتعمل عمايل




بعدها خلاص بدا العد التنازلي الساعه 6 ونص


يلا يلا الساعة 6 ونص يا شباب والله ما اكذب عليكم

وبسسرعه الي يغسل وجهه والي توه بيصلي على فراغته والي بيفطر و


اول واحد يقوم علي


تدرون ليييش؟؟؟؟


مو لأنه شاطر ويسمع الكلام وانشط واحد من اخوانه


لا طبعا


لانه في عاااده كريهه


وخصلة سيئة جدا وهي انه ما يرتب كتبه الا الصباح





بس مشاء الله عليهم بس يقومو ويغسلوا يصحصحو لان بصراحه شبعانين نوم اي لانهم من 6 المغرب نايمين يعني فارين الساعه فررر بس هذا كله انا اسميه كسل الصباح ولا شتا بعد كملت

المهم دقايق الا كلشي جاهز



ها وش رايكم فيني انا علي أحمد





7 الا ثلث الكل جاهز للإنطلاق للمدرسة


لحظه لحظه شباب ممكن صورة جماعية







وفي هاللحظات الباص ديييد دووود دييييد



يلا يلا بسرعه شباب لا تتأخرو الله يحفظكم ويوفقكم وترجعون لي بالسلامه






وبس هذي يومياتي ويا عيالي,,


كثير فكرت اسوي حركة بحيث اني اخليهم يصحصحو على طوول بس تعبت وزهقت


يا ريت لو تساعدوني وتشوفو حل لان هالساعه الا ربع تعتبر من اصعب الساعات الي تمر علي يوميا


وكل واحد يدخل يكتب لنا يومياته في الساعه هذي يمكن نستفيد من بعض


واخيرا اعتذر على الإطالة

ولكم من ارق وأجمل تحية


لأحلى وأروع اعضاء بالدنيا



الساهرة

 

 

[هذيان أنثى]

بِسِمِـــــــــــهِ تَعَآلَىَ ..!

الكثير منَّا يُعآني ماتُعآنيه في أزمَة الصَبَآح , وطُرقْ جلوس الابنآء المُتعبه والروتينيه والاعتيآديَّه طوآل السنه ..,
لآني أرى تعب الوالده الله يحفظها يوميا مع إخوآني << وحتى أختهم بس كبرت وعقلت
لكن ممكن توفرين جُهدك بوسآئل ثآنيه ..
مثل: لو توعدينهم من الليل قبل النوم بـهدية حتى لو كآنت بسيطه لآول وأحد يصحى من النوم ..
أتوقع راح يتحمسون وينافسون بعض لانه كل واحد وده بالهديه ..
أو تكون طلعه بـ نهاية الاسبوع أو حتى بنهاية الشهر لمكان يحبونه ..


تقريبا هذا اللي عندي , ولو خطرت على بالي اي فكره راح تكون لي رجعه
ويمكن بعد استفتاءات من قِبل أصحاب الازمه


ربي يعطيك العآفيه ..
وربي يسآعدك ~

 

 

[الفجر الجديد]

السلام عليكم

فيما أظن أنّ هذه اليوميات في كثير من البيوت هي صورة طبق الأصل فالمعاناة واحدة , والهمُّ واحد , خصوصاً في برد الشتاء , قد يكون وضعي مختلفاً قليلاً , فأنتِ تتعاملين مع ثلاثة أولاد , وأنا أتعامل مع ثلاث بنات , ومن المعروف أنّ البنات يحتجن وقتاً أطول للتهيأ مقارنةً بالأولاد , لذا كان لزاماً علينا أن نبدأ المسيرة منذ الساعة 5:30 صباحاً , ويا دوب نطلع من البيت 6:40 أو أكثر , أنا أتحمل الدور الأكبر في الموضوع فعليَّ أن أوقظ الكبرى ( أم علي ) , والوسطى ( أم حسن ) في البداية , وأظل متابعاً لهما حتى تستيقظا تماماً , وأحيانا يستغرق ذلك قرابة نصف ساعة أو أكثر , ويتمّ تسليمهما لمّدة نصف ساعة أخرى إلى ( أم البنات ) - يحفظها الله - لتتولى أمر تمشيط الشعر , والتأكد من لياقة المراييل , وتقديم وجبة سريعة , والأمر جدّاً هيّنٌ مع ( أم علي ) لأنــّها نشيطة وحريصة على الالتزام بالوقت , وإن كانت تتأخر قليلاً عن الاستيقاظ , أمــّا المعاناة الحقيقة فهي مع ( أم حسن ) , والمعاناة تبدأ من وقت النوم ليلاً فالتأخر عن النوم أصبح عادةً لديها والاستيقاظ أيضا متأخراً
, ورغم التذكير منذ الليل لتجهيز كل احتياجاتها قبل النوم , ولكن كم نفاجئ
صباحاً أنــّها تبحث عن أشياء لا تجدها , وتبدأ ( الحوسة ) معها , والتوتر والعتاب , والتوبيخ في ظل ضيق الوقت , فأنا بين توصيلهن لمدرستين مختلفتين , وبين المرور على المنزل الجديد لمتابعة آخر التطورات في العمل , وكل ذلك يجب أن ينجز قبل الساعة 7 صباحاً للذهاب فوراً إلى العمل , وفي أحيانٍ أخرى أضطر أن أوصل ( أم علي ) لمدرستها ثم أعود مرّة أخرى لتوصيل - الأميرة - ( أم حسن )

رغم أنّ لوائح وأنظمة عائلة الفجر الجديد تنص على أنّ من يتأخر عن ركوب السيارة بعد تشغيلها يسقط حقه في الركوب , ويبقى دور المعاناة الأخير تتحمله كاملاً ( أم البنات ) مع البنت الصغرى ( أم حسين ) - أول سنة روضة- والذي لا ينتهي قبل الساعة 7:40 صباحاً حيث موعد وصول باص الروضة .

وأهمّ ملاحظة في الأمر : هو أنّ عدم الحزم , والتراخي في تطبيق بعض الاتفاقيات التي يجتمع عليها أفراد العائلة مما يترك في نفوس الأبناء انطباعاً بعدم الجدّية لدى المربين في تنفيذ تهديداتهم أو إصدار عقوباتهم لمن يخلّ بنظام الأسرة أو حتى فيما يخصّ إهدائهم بإهداءات بسيطة تشجيعاً ودعماً .

هذا مشهد من مشاهدي الصباحية نثرته بين يديك بما يحمله أحياناً من مواقف متوترة , ومواقف طريفة في أحيانٍ أخرى تضفي البسمة على جبين الصباح .

تحياتي

 

 

[إحسآإس قآإتل]

اللهم صل وسلم على محمد وآل محمد

الساهره يعطيك العافيه على اللحظات الرائعه من حياتك
والله يخليهم لك ذخر أن شاء الله

جلسة الصباح الكثير يعاني منها والسبب التعاطف مع النظام
لان النظام يمشي على الكل فلا تحاول التعاطف معه أو أعطاه مهله أبدا
خليك ملتزم وألزم الاخرين معك والنظام يمشي على الكل

جميع محاولاتك حلوه وكذالك الي ذكرته خيتو هذيان أنثى
ولكن هالاشياء ماتنفع اذا وجدت طفلك عنيد أو يماطل معك وماينفع مع الكل الا النظام الصارم

حيث تضعي جدول منتظم مع أطفالك وتنظيم يومهم الدراسي من الرجوع من المدرسه
وساعات المذاكره وساعات الفسحه واللعب وبدء ساعة النوم المبكر فيك نوم مافيك نوم
يلا على سريرك هذا الروتين في البدايه يصعب ولكن مع التعود يكون شي طبيعي
ولازم تكوني حازمه معهم وربما تستخدمي القوة ولكن قبلها النصيحه وتوضيح ماهو ملزم عليه
وأستخدام القوه في تنفيذ النظام معه حتى يكون بشكل رسمي

وماينفع تجلسهم ويقوموا ومايعرفوا وين الله حاشرهم
تحصلينهم في فلم وأنتي تجين وتخربين عليه حلمه ومايقدر يصحصح بسهوله
أول شي صحيه بأسمه بهدوء لين يحس بوجودك تكلمينه
ويفضل وقت الصلاة مره وحده يصلي و يتروش و يجهز نفسه ويفطر ويكون جاهز
في حالة أنتظار موعد الذهاب لـ المدرسة

نظـآم عسكـري تنظف مكانك تنام تصحى ترتب سريرك

رغم أنه قاسي ولكن نستطيع ترميمه بكلمات جميله وربما ندخل كلمات التدليع والحماس فيه
وتعليمهم وتوضيح كل النقاط حتى يلتزموا فيه ونوضح لهم شكثر نحن نتعب ولا نريد التعب
نريد كل شي سهل ومحبب لـ القيام به والاتفاق عليه معآ

ضعي جدول لهم مثل الحصص المدرسيه يلتزمون به وأن رفض أحدهم أمنعي منه مايحبه

مـثـلآ هذه نقاط أنتي رتبيها على مايناسبك بوضع الساعات المناسبه لكل نقطه
وأضيفي مايناسبك لـ بيتك

- ترجع من المدرسة تتروش وتلبس ملابس نظيفه وتجهز نفسك للغداء
- عندك ساعه إلي ساعاتين لـ أخذ الغفوه أو ترتيب كتبك لـ اليوم الثاني والمذاكره
- ساعة لـ اللعب تحدد قبل ساعه 9 مساء يعني من رجعته إلي 8 المساء بلكثير
هو حر يختار أي ساعه يلعب فيها او حسب مايجده من فراغ بعد تجهيز نفسه
- بعد المغرب مثلا جهز كل شي مابقى الا المذاكره لـ الاختبار يذاكر إلى وقت النوم
وكل بين ساعه يريح نفسه يتمشي ياكل شي أهم شي يواصل مذاكرته إلي موعد النوم
- تجلس وقت صلاة الفجر تصلي وتتروش وتجهز نفسك وتفطر وتجلس تنتظر


الامر يحتاج فقط إلي النظام وبحزم لاتعاطف ولا عوار راس وراح تجدي طفلك يتعلم النظام
بشكل صارم ومنظم ويريحك كثير من جميع النواحي

وكذالك الاصدقاء لـ طفلك مهم جدآ معرفتهم عن قرب ومن هم
حتى لايطبق أي شي من الخارج عليك أو على اخوانه في البيت

أنا أشوف النظام كذا أفضل شي وفن في التعامل مع كل شي
أنا أطبقه مع أخواني أحيانا ولكن الاهل يرفضونه ويتعاطفون مثلك

عـآد أسمعي صيحات الجهاد إلي المدرسة وياليت في بيتك فقط حتى صراخ الجيران

تجدي هذا الامر لدى الاكثريه الي مايطبق النظام وجدولته

ومشاركة الاخ الفجر الجديد التي سبقتني جميله

وضع جدول نظامي متفق مع أطفالك مؤضح ومحبب

تحيـآإتي لك

 

 

[الساهرة]

العزيزة هذيان انثى ..

جميل ما ذكرت وقد تنفع لكن ليس مع اولادي ..

ولو نفعت ممكن اسبووع او شهر لكن مو دايم

اتذكر اني مرة من المرات حطيت لهم قرار وعجبهم

لما كانت باب الحارة تجي الساعه 8 وتنتهي 9 كانو مستعدين يسون اي شي عشان اقبل اني اخليهم يتأخروا بالنوم اشوي عشان يتابعوها وانا استغليت هالشي وقلت لهم الي يجلس الصباح بسرعه وبدون مشاكل
بيشوف المسلسل والي ما يقوم يحلم يشوفه ومن 7 المغرب هو في سريره
وفعلا مجرد ما اذكهم الصباح في باب الحارة على طوووول شخط للحمام

بس للأسف المسلسل له فتره ويخلص وفعلا خلص ورجعت حليمه لعادتها القديمه

ومرة بعد اتبعت طريقة ثانية وهي اني قلت لهم الي يقوم من فراشه اول واحد بزيد فسحته ريال
وما اقول لكم هالحركه فعلا نجحت نجاح صاروخي بس للأسف انا ما قدرت اتحمل لأن صارت مشاكل بينهم
ليش هذا تعطيه وانا قمت قبله وهاااكذا ما خلصنا يعني ..

وهذا احنا كل يوم نشوف طريقة جديدة لعل وعسى


يسلمووو عزيزتي على الإضافة الرائعة


تحياتي
الساهرة

 

 

[الساهرة]

الفجر الجديد ,,,

يوميات ممتعة مع البنات وتسلم على الإضافة الممتعه مع أم علي وام حسن

وشكلها ام حسن مثل علي ولدي والله يعينا عليهم

فعلا انا ارتحت من التمشيط وصحيح اشوف الي عندهم بنات يحتاجون وقت على ما يجهزون

ولا تنى للمرايه حق ووقت عند البنات

مو الاولاد احيانا ينسوا ما يمشطو شعرهم والحقهم الى باب الشارع بالمشط والعطر ولا هنا خلاف مشطتين وحنا خالصين

بس مشكلة الاولاد نومهم ثقيييل احيانا توصل عندي اني اسحبهم سحب الى الحمام وانتو بكرامه وعلى ما اجيب الثاني الا الأول اشوفه منسدح على المغسله ولا عند باب الحمام والله مب حاله ذي

 

 

[الساهرة]

احساس قاتل ..

اضافة قيمه اخوي والله يعطيك الف عافية

وبالنسبة للنظام انا متبعة مع اولادي نظام صارم لكن بالرغم هذا كله تبقى هذه الساعه ساعة الشد والتوتر

وانا معك النظام والنوم المبكر يساعد على قيام الطالب بأعماله اليوميه في راحة ونشاط وهذا الي مريحين ان الأولاد مجرد ان تذهب غشاوة االجلوس من النوم يروح كلشي ويبدؤ يومهم بنشاط

 

 

[تاروتية]

::

الغالية الساهرة انا ماعندي إضافة لأني لا توجد لدي هذه المعاناة
ولكن أستمتعت كثيراً بيوميات أولادك الصباحية >> متفرغة صج .

عندي فكرة قولي لهم بسوي لكم جدول وإللى يجلس أول واحد لمدة أسبوع بعطيه شئ يتمناه يمكن يتحمسوا !
ولو سمحتي طفي الدفاية يمكن ينفع شوي , وعلى فكرة خلاص غيرت رأيً عن علي عجبني غيره

 

 

[أنثى مخملية]

معانااه قبل النوم وبعد النوم

انا واحد واحس روحي تطلع على مايوصل لباب الشارع

لما اجي اصحيه من النوم مايبقى مرض مايطلع
ههههههههه يوم مزكم ويوم رجلي تعورني ويوم راسي
ويلا عاد انواع التدلع فيه قوم اسوي لك واعطيك وانت شاطر وانت تهبل مافيه مثلك
والاستاذ يقول والمدير يقول وباالموووت يستجيب لي
واذا نام بدري وشبع عدل يقوم ويتروش ويخلص كل شغله
بس من يشوف المداااااام اللي هي الدفايه يخق جنبها وينسى نفسه وينسى الدوام
ولو اتكلم من اليوم الي بكره مايحس فيني يسررررح والدفايه اشوي وتلزق فيه
وبعدها خلاص ينفذ الصبر وانفجر فيه ويتحرك بسررعه وارتاح من اللبس

يجي على سالفة الفطور
باالموت الفطور يفطر وقلت لازم اسوي شي موحاله كل يوم لازم اصرخ واعصب من صباحية ربنا وياكل وعيونه مغمضه ولايدري شنو حتى فطوره

قلت له لو اكلت بسرعه عندي لك مفاجاء وباالفعل خلص الفطور بسرعه وشرب الحليب وطلعت الهديه له
وفرح بس كم يوم وتنتهي السالفه

وارجع من جديد افكر بااشياء تغير نظام اليومي


والحمدلله وقت المذاكر والنوم واللعب كله مافيه تعب
بس الجلوس من النوم
هذا اللي ماله حل اتوقع الا طشت ماي بارد على الراس


الله يعطيك العافيه

والله يخليهم لك يارب وتبلغين فيهم

 

 

[الساهرة]

اقتباس الغالية الساهرة انا ماعندي إضافة لأني لا توجد لدي هذه المعاناة ولكن أستمتعت كثيراً بيوميات أولادك الصباحية >> متفرغة صج

وجودك يكفي توتو وخلاص انا عازمتج يوم تشوفي اليوميات على الطبيعه بس نصيحه جيبي حبوب للصداع هههه

اقتباس عندي فكرة قولي لهم بسوي لكم جدول وإللى يجلس أول واحد لمدة أسبوع بعطيه شئ يتمناه يمكن يتحمسوا

والله فكره اتوقع اكثر واحد بيتحمس عبووود

اقتباس ولو سمحتي طفي الدفاية يمكن ينفع شوي , وعلى فكرة خلاص غيرت رأيً عن علي عجبني غيره

يعني رايش اني اطفيها ؟؟؟

وبعدين احب اهنيش على قرار ترك علي بصراحه هالولد ماله امااان

اسعدني مرورك خيتوووو


تحياتي

الساهرة

 

 

[زهرة اللوتس]

،

يا زين البيت بدون جهّال ،... مفتكين منهم من ثلطعشر سنة ،

شوفي الساهرة مالش إلا نظامي ، أطبقه على وخيتي الصغيرة ( سنة أولى جامعة )

خبرش باللي عندنا تموت في النوم ، ( قلت لها بغتابش في المنتدى )

فما لي إلا أجلسها قبل الصلاة بأربع ساعات و ست دقايق ، علشان شسمه وذاك الهباب

فأنتي جلسي العوال قبل الصلاة بساعتين أو فلاف ساعات، علشان هبابهم يقوموا ،..

وخيتي تقول صحوني الساعة سبع المغرب ، نظل على راسها ما تصحى إلا الساعة أفنعش نص الليل ..

علشان كُوذيه .. ما يفيد معها إلاّ نصحيها قبل الصلاة بساعة أو ساعتين .علشان الصلاة والقامعة بردّه ...


على طاري الوقت / العوال يخافوا من الساعة ست ونص في الصيف ...

ومن سبع إلا ربع في الشتا ... انتبهي لهذي النقطة


ما يستفاد /

من زمان ما شفت محسن ...

يتروالي آخر مرّة شفته فيها بعد الجماعي ،، فجأة التوقيت موول



الله يوفقهم ويوفّق جيرانهم ...

 

 

[الساهرة]

اقتباس فأنتي جلسي العوال قبل الصلاة بساعتين أو فلاف ساعات، علشان هبابهم يقوموا ،

اجل اذا كذا هبابي بس لهم

على قومو وقعدوو

انا بالصيف اجلسهم يصلوا ويكملو نوم بالصاله بس في الشتا خلاص مره وحده اجلسهم

اما عاد اختش ذي يبي لها موضوع بروحها

الله يعين بس


ما يستفاد /

اقتباس من زمان ما شفت محسن ...

اقتباس يتروالي آخر مرّة شفته فيها بعد الجماعي ،، فجأة التوقيت موول

ايي فاتش كبر وصار رجال بنعرسه خلاص ههههه


تسلمي يا زهرة اللوتس كل يوم تعالي


تحياتي

الساهرة

 

 

[حامل المسك]

[يقول شيخنا المرحوم الوائلي رضوان الله عليه (البيت بدون أطفال كنه مقبرة)وهذا المقال عين الصواب
اصغر ابنائي سيدخل سنته العاشرة واتمنى ان يبقى طفلا
نعود لمحور حديث الساحرة او اقصد الساهرة والساحرة ساحرة الكلمة لدي ولد وبنت لايزالان بالمدرسة اجلس الجميع للصلاة وبعدها أكون كم يسعى في مسعى بيتي بين غرفتي وغرفة ابنتي خلصي بسرعة السيارة التي ستنقلك ستصل بعض الأحيان تكون أعصابي مشدودة عليها لكونها تأخرت عن الوقت المحدد وهذا نادر ويأتي دور احمد علي الولد تجلس ام العيال رعاها الله لتكمل له لباسه ويوم يبي ينام يقول توا لناس ويوم يقول انا تعبان هذا كان في بداية الفصل الأول والأن الأمر عادي والحمد لله لكن ما يز عجني عدم افطارهما بالبيت .
أختنا ام مصطفى
أعانك الله على شقاوة العيال المحببة الى القلب بس عندي وصية الله الله بالسمي ( علي ) تراه أسمه احم احم احم
موضوع شيق لأنه يعبر عن واقع وفيه أسلوب قصصي

 

 

[رمايل شوق]

ههههههههههههههههههههههههههههههههه اعجبتنى مواقف الابناء في الصباح تذكرت ايامى مشكوره خيتو على الموضوع المميز

 

 

[الساهرة]

حامل المسك ..

يبدوا ان هذا الجهاد الصباحي في كل بيت

الله يبلغك في الأولاد ان شاء الله..

اقتباس أعانك الله على شقاوة العيال المحببة الى القلب بس عندي وصية الله الله بالسمي ( علي ) تراه أسمه احم احم احم

لا تخاف عليه هو ثابت وجوده ما يباله توصيه

اشكرك على هذا المرور المحمل برائحة المسك الفواحة

تحياتي

الساهرة

 

 

[الساهرة]

رمايل شوق ..

دوم هالضحكة خيتووو واسعدني مرورك


تحياتي

الساهرة

 

 

[J.COLE]

.

.



والله ذكرتيني يأيام الابتدائي والمتوسط ,,,, وحتى الثانوي


ماتقصر الوالدة ــ الله يعطيها الصحة والعافية ــ

كنت أعذبها وهي تجلسني حق المدرسة


وهي ماشاءالله عليها قمة في الحلم والصبر ... > يلا محمد ,, يلا حبيبي ,, شاطر ,, شطوري ,, يلا عاد حبيبي ,, يلا اجلس ,, علشان تروح المدرسة ,, ونجيب لنا الشهادة ,, يلا حمودي ,, يلا عاااد ترى أزعل عليك ,, ومن هالكلام الزين > ...

واذا خلاص مافيه فايده تشيل البطانية ,,,, وأجلس كأني غزااااااال


وهذي شغلتنا كل يوم


الله يخليلي الغالية الماما

ويخلي لكم امهاتكم كلكم




.

.




> الساهرة < <<< يعطيـ(ش) الله الف عافية ويخلي لـ(ش) عيالـ(ش)

 

 

[الساهرة]

اقتباس وهي ماشاءالله عليها قمة في الحلم والصبر ... > يلا محمد ,, يلا حبيبي ,, شاطر ,, شطوري ,, يلا عاد حبيبي ,, يلا اجلس ,, علشان تروح المدرسة ,, ونجيب لنا الشهادة ,, يلا حمودي ,, يلا عاااد ترى أزعل عليك ,, ومن هالكلام الزين > ...

غلطانه الوالده انا اكتشفت ان التليع ما يجيب نتيجه ابد

الله يخليها لك ان شاء الله


وتسسسلم على المرور


تحياتي

الساهرة

 

 

[جناح الملائكة]

بسم الله الرحمن الرحيم ؛؛؛

طبعاً بالنسبة لهذه المشكلة تكمن في نوعية اسلوب الشخص ، فهذا يعتمد على حسب اسلوبك ، وربما لا يتؤاخذيني بهذه العبارة تعتد على الشخصية فـ بشكل طبيعي الرجل له شخصيته في البيت على الأولاد بشكل أكبر وأقوى حيث يحسب له ألف حساب في حال شخصيته قوية .

من هذا الباب يتوجب على الأب أن يجرب طريقته في التعامل مع هذه المشكلة وفي تصوري سوف يفلح بطريقته واسلوبه .

نشكر لك انضمامك على واحتنا وتنويرها . تحياتي ،،،

 

 

[الساهرة]

اقتباس من هذا الباب يتوجب على الأب أن يجرب طريقته في التعامل مع هذه المشكلة وفي تصوري سوف يفلح بطريقته واسلوبه

ممتاز جدا وفي ايام اجازة الأب يكفيه كلمة وحده ما يثنيها


يلا قوموا صلاة


بعدها لا ترى الا غبارا


لكن للأسف هو يطلع لدوامه قبلهم بساعه يعني مافي فايده

يعطيك العافية اخوي جناح الملائكة على مرورة العطر


تحياتي

الساهرة