[الساهرة]

هي قصة حدثت لي وليست منقوله ولا احد قالي حصلت لي انا شخصيا (يعني انا الساهرة بنت أم الساهرة )

وهذا هو الموقف بالتفصيل,,,,,,

في يوم من أيام الأسبوع الماضي كنت اتكلم مع أحدى صديقاتي على الماسنجر

وهي كانت من العراق وتسكن في الشمال في كرد ستان المهم قالت لي برسل

صورة لكن اتخوف وإذا كان قلبك ضعيف وما يتحمل بلا منها,,,قلت لها بعد ما

طلعوا عيوني من الفظول لا ارسيلها اللحين اشدعوه هي صورة لا طلعت ولا نزلت

المهم أرسلت الصورة وقالت لي هاي صورة جني وهي صوره حقيقية حية المهم

لما قالت كذا انا من قرارة نفسي بصراحة لا أصدق في مثل هذه الأشياء

خصوصا التي تاتي من الأنتر نت حفظت الصورة ولم أفكر حتى ان أراها كنت

مزحومه ومستعجله قلت أشوفها وقت ثاني المهم حفظتها في المستندات

وطلعت ,,,

في اليوم الثاني رجعت أشغل الجهاز وبعد ما شغلته دخلت على برنامج عندي

أشتغل وفجأه توقف الجهاز عن العمل (هنق) حاولت فيه طفيته وشغلته ومافي

فايده الماوس يتحرك دقيقه او خمس بالكثير وبعدين يتوقف الجهاز بالكامل المهم

طبعا انا فك عقلي وجن جنوني خصوصا لأني كنت أشتغل بالبرنامج

ومتحمسه المهم في المره الأخيرة وبعد ما توقف ما طفيته على طول جلست

أناظر الشاشه وأفكر واخيرا قلت أودي الجهاز للمهندس يشوفه طبعا الي

بيصلحه ولد خالتي كلمته وقلت له السالفه قالي جيبيه وانا احاول قالي بس

يمكن يحتاج فرمات قلت ما يخالف بس المهم يشتغل المهم وديت الجهاز وشغله

عنده واشتغلوقالي جهازش سليم واحسن جهاز بالعالم,,,(ايه يراشيني)

:Dقلت له زين زين خلاص جيبه اللحين اللحين وكانت الساعه أثنعش بالليل المهم

وركبته وانا طايره من الفرح لكن لما شغلته

طلع نفس الشي ما يشتغل ورجعته لهيوم ثاني وقالي يشتغل ,,,,

المهم مع كل الياس والتعجب شغلت الجهاز وخليته بس امشغل من غير

احرك شي وفجأه وبعد خمس دقائق,,,,, طلعت على الشاشة صورة بشعة

وكأنها صورة وحش ما تتصورون بشاعتها واستغربت شالي جابها واشلون

الجهاز امهنق منين طلعت وانا صارلي خمس دقايق ما حركت شي ؟؟

والله مت من الخوف صرخت صرخه سمعوها الجيران المهم شلعت الواير وطلعت بره

وكان هذا تقريبا وحده بالليل وقعدت افكر في كلام صديقتي عن الجني

المهم دخلت الغرفه وتمالكت نفسي وشغلت الجهاز واشتغل وتحرك الماوس لعدة

دقائق قلت أدخل النت يمكن أشوف أحد من أخواني أو صديقاتي اسئلهم عن

المشكله وشفت أحد الأخوان وسئلته قال يمكن فايرس ولما قال كذا

تاكدت انه الجني هو السبب وبس طلعت من النت توقف فجأه وقعدت أناظر

الشاشه الا وتطلع نفس الصوره المهم شلعت الواير وطلعت من الخوف

وجلست افكر وافكرقلت يا سهوره ما يصير وين احنا

فكري بواقعيه اكثر ,,معقوله فيه جني داخل الجهازلالا ما يصير ,,,,,

قلت في نفسي اللحين المشكله تبداء بان الماوس ما

يتحرك وبعدين الجهاز يهنق,,والهاردسك اشتغل هناك وعندي ما اشتغل

معناه ان الخلل مو في الجهاز او فايرس او غيره يمكن الخلل يكون في الماوس

واول ما خطرت الفكره وكانت الساعه 2 بالليل أتصلت على عمي هو اصغر مني

وقلت له ابيك اتجيب الماوس حقك اللحين اللحين المهم العم ما قصر جابه وركبته,,,

واشتغل الجهاز,,, طبعا صار في وجهي خطوط مثل الي تطلع

في وجهه ماروكو,,,,

طيب وسالفة الجني والصورة؟؟ تذكرت بعدين اني حاطه شاشة توقف عرض لأخر

صورة بالجهاز,,وصورة الجني كانت أخر صوره ,,المهم قعدت أظحك على

روحي أسبوع كامل,, :D:D

بس بصراحه اخذته درس ما انساه طول عمري,,,,

تحياتي للجميع

الساهرة