الله يعينكم على حلطمه هالمرّه .. واقع اشوفه بحياتي ودايم أتسائل ولا القى إجابه يمكن القاها عندكم ..! اكتشفت إني مو بس أنا لحالي اللي تجي على بالي هالأسئلة .. وسبق وشفت نفس حلطمتي وما أخفيكم لو قلتلكم إني انبسط اذا شفت أحد يتحلطم بنفس حلطمتي لاني بذيك اللحظه ما حس اني لحالي مستنكرووضعي طبيعي ..!
- ليش بعض الناس ما يعرفون ينبسطون و ياخذون الامور ببساطه وسعة صدر ..ليش يحبون النكد وماغير عابسين وجييههم طول الوقت ..! مع إنهم بصحّه وعافية ولا جيت تسولف معهم ماغير يتشكّون ..
و بعض الحريم إذا اجتمعن وقامت وحده تشكّى من شغالتها انها ماتعرف تشتغل تقوم الثانيه تشكى من نفس المشكله والثالثه والرابعه مع العلم إنهم كلهم نصّابات ! وإلا يشتكون من معاملة ازواجهم خاصة لاصارت جالسه بينهم وحده عزباء مثلي – الظاهر يبون يكرهوني بالعرس- !
- ليش الشاب اذا جا يكلّم خويّه لازم يستخدم مُصطلحات – ( كل تبن . انقلع .الله يخسّك . حيوان . الله يلعنك . جعلك السّلال ! ) وإذا كان حوله خواته يسولفون بالمجلس قالهم اسكتوا لين يسكّر خويي !
- ليش البنات الحين اغلبهم يكشفون واذا جلسوا بالكوفي قاموا يسولفون بالبلاك بيري أجل وشوله طالعات مع بعض ؟ – وحاطين رجل على رجل وحركات برستيج واذا جت تسولف تقول ترى انا ماسوي شي وتفتخر انها ماتعرف تطبخ بيض .!
- ليش المسلسلات التركية تطول وحلقاتها أكثر من ميه مع ان كل يوم يصير نفس الحدث ومافي شي جديد الا ان بآخر حلقة يعرسون اللي حابين بعض ومع ذالك فيه ناس تتابعهم .!
- ليش الواحد يكون حريص على اللي يحبّه بس يستحي يعبّر عن مشاعره و يقول كلمة ( أحبّك ) ..ويستحي يملّح كلامه ببعض الكلمات مثل – كيفك يا عٌمري – اخبارك يا عسل – حبيبتي – شكرن يا حبّوبة - يالبّي ! ، ترى مهوب عيب نعبّر .. ليش ما يبيّن مشاعره وتعامله دايم يكون جاف مع العلم إنه ما يقدر يعيش من غير الشخص اللي يحبه سواء كان قريبه أو رفيقه أو زوجته .. !
- ليش بعض البنات تدخل المسن وتحط ( بالخارج ) و لما تجلس تتكلم معها ينبح صوتك ماترد وبعد عشر ساعات تجيك تقولك والله كانت نايمه والا طالعه اجل وشوله داخله المسن ومسوي زحمه علينا وعلى شركة الكهربا !
- ليش بعض الشباب يتأثرون باخوياهم و يدخّنون مع إنّ مكتوب على علبة السجاير – ( تحذير : الدخان سبب رئيسي لأمراض السرطان ) . !
- ليش الحياة في بداية الزواج ( وناسه ) وفي النهاية ( تعاسة ) !
- ليش بعض الناس يدّخلون بحياتك الخاصّة .. زي فلانه تزوجت ولا حملت من اول شهر .. قاموا يسألونها ليش ماحملتي ؟ طيب هي ورجلها مايبون يجيبون عيال بأول حياتهم تدخلون وتسألون ليش ! وإلا واحد ما أعرس قاموا يسالون ليش فلان لين الحين مااعرس .. ! طيّب هالفلان متعقّد من الحريم وكارههن تسألون ليش !
- ليش الواحد كل ماكثرت فلوسه يفسق ويصير (( فري)) بشكل مبالغ لدرجه إنك ما تصدق إنهم مسلمين !
- ليش بعض الناس تحب تتفاخر باللي عندها قدّام الضعوف مع إنّ معروف ما يتفاخر إلا اللي توّه طايح بالنّعمه من تالي ! وبعض الحريم إذا شافوا عليك شي حلو يحسبونه ماركه وإذا قلتي لهم إنه من محل أبو عشرة طاح من عيونهم واستحقروك ! ترى الاشياء الحلوه تعتمد على ذوق الشخص ومش على المكان اللي تشتري منه !
- ليش ( الهندي ) طايح من عيون الناس ! .. يفتشون الحريم عنه اذا كان موجود بالمطعم أما لو إنه في المطعم واحد سعودي تغطوا عنه .. يعني السعودي رجّال وذاك مهوب رجّال !
12-09-2010, 08:26 PM
الحلطمه ....
