عائلة قطرية تقيم حفل زفاف بهيج لخادمتهم

[الصحفي]

فاطمة ، أو فطوم فلبينية كما يطلقون عليها ، عملت لدى عائلة قطرية كخادمة مدة 11 سنة متوالية وبدون إجازات ، أحبتهم وأحبوها ، وأصبحت مثل بنتهم وأختهم ، ففي يوم من الايام جاءت فاطمة الى معزبتها ربة الأسرة وقالت : ماما ! أنا في رجال يسوي كلام بابا مال أنا داخل فلبين ، يبي أنا عروس ( الترجمة: خطبني رجال من أبوي في الفلبين )
المعزبة : مبرووووك فطوم ، بس انتي ليش زعلانة؟؟
فاطمة : أنا لو في عروس كيف أنا بعدين ترشي فلوس ألشان بابا مال أنا؟ ( الترجمة : لو أنا تزوجت اشلون بعدين اطرش فلوس حق ابوي؟)
المعزبة : ولايهمج فطوم ، انا ازوجج أحسن زواج وأجيب خطيبج هني الدوحة وأزوجكم
وطارت المسكينه الفلبينية من الفرحة ، ومن فرحتها بغت اتخم وتنظف الفريج كله.

من هنا بدأت قصة الزواج ، التي تكفل بها مخدومي فطوم ، وأنا كنت شاهدا وحاضرا في هذا الزواج الرائع وبإيجاز بوصف لكم العرس:-
أولاً طبعا العائلة تكريما وعرفانا لفطوم والعشرة اللي بينهم جابوا المعرس من الفلبين وعلى حسابهم وسكنوه في بيتهم وعدلوا لهم الغرفة ، صبغ جديد وغرفة نوم وزل على كيفكم ، والمعرس جايب معاه المسكين البدلة السودة ولكن المعزبة قالت حق عيالها فصلوله ثياب وجيبو له بشت ، وبالفعل تم ما أرادت الأم
اما يوم الزواج الرجال والمعازيم من القطريين والفلبينيين المسلمين وحديثي الإسلام ، والعشا : ذبايح ما شاء الله.
وفطوم جابوا لها كوشة ، ودي جي اسلامي (dj) ، و بوفيه من أحد المطاعم الفاخرة ، والمعازيم من القطريات والفلبينيات وصديقات فطوم من خادمات الفريج ، وكل هذا على حساب عائلة المرحوم / احمد بن عبدالله العبيدلي وأقيم الحفل في منزلهم العامر في منطقة معيذر بتاريخ 19/4/2007

 

 

[شهرزاد]

عادي مافي شيء جديد على القطريين


فلوسهم زايده..

قامو يزوجون الخدم..

 

 

[زهرة اللوتس]

زين والله ماقصروا .. إذا بيعرسوا عيالهم مايسووون كذا ..!!

بس مثل ماقالت شهرزاد قطريين مو غريبة عليهم ..

الله يوفقهم ويسعدهم ومبارك عليك يافطوووم

شكرا يالصحفي

 

 

[البطل]

ما قصرو

مبروك للعروس

 

 

[صمت الألم]

الف مبروك للعروس
وبالرفاه والبنين
تحياتي لكم
صمت الألم

 

 

[علي مع الحق]

هههههههههههههه

والله فيهم الخير والبركه

مانكروا الجميل ..

وأكيد خادمتهم تستاهل نشيطه ومطيعه ,,, فوفائاً لها عملوا مها كذا ,,,,,,,,<<<< مو شغالتنا الكسوله


الشغالات هالايام قام عزهم ...