الخباز ورونالدينيو

[صريح جدا]

السلام عليكم ورحمة الله وبركاته
تحية طيبة وبعد ...
طبعا الموضوع عجيب وغريب شوي والكل يفكر ان رونالدينيو رايح يشتري خبز اوفي قصة مع الخباز .
ابدا .. لكن حبيت اسوي مباراة بين رونالدينيو والخباز في المهارات والفنيات بس مو في الكوره لالا في المجتمع وخدمة المجتمع ... والحين خلونا ندخل الملعب بفكرنا ونصور المباراة بعقلنا ....
خلونا نبدأ اول شي برونالدينيو الكوره الحين في ملعبه ونشوف شراح يسوي وشلون راح يعدي من الخباز اللي جدامه .. طبعا انتوا عارفين اللاعب ومهاراته وملايينه وشعبيته في كل انحاء العالم هذا شي اكيد وما يختلف عليه عميان ههههههه ، لكن انا اقصد المهارات الفنيه في المجتمع وذوبان الفرد وانخراطه لخدمة وطنه ومجتمعه .. يا ترى هل نشوف رونالدينيو يخدم المجتمع بشكل لائق ؟؟ اقصد هل انا ولا امي ولا ابوي ولا خالي راح يستفيد من مهارات وفنيات واهداف رونالدينيو ؟؟ النتيجه : لا شيء يعني صفر ..
طيب والحين الكوره انقطعت من رونالدينيو وراحت للخباز تعالوا نشوف الخباز شراح يسوي جدام لاعب ضخم جدا جدا مثل رونالدينيو خلونا نشوف وبعدين نحكم ...
الخباز الكل عارف انه ما احد يستغني عنه لا في الليل ولا في النهار ولا الصغير ولا الكبير ولا الغني ولا الفقير يعني الكل محتاج له من صباح الله خير لييييييييييييييييييين ليل الله خير ههههههه ..
وطبعا ما احد يقدر ينكر هالشي حتى رونالدينيو نفسه ، يعني النتيجه في النهايه هي فوز الخباز على رونالدينيو فوز ساحق كون هذا الاخير ليس له دورا فعالا مثل الخباز فعلى رونالدينيو ان يصفق مدى العمر لهذا الكيان للخباز وان يضع ( بوستر ) كبير في غرفة نومه ..
الخلاصة .. لو شفنا صورة الخباز بنص ريال وصورة رونالدينيو بخمسين ريال راح نشتري صورة رونالدينيو مهما كلف الامر وراح نفتخر فيها في مجلسنا وغرف نومنا وغرفة الطعام بعد ...
الزبده من كل هالكلام .. ان حنا صرنا ما نفكر الا في الاسم والشهرة وبس ومتناسيين الدور الاكبر والامثل للصورة الحقيقيه اللي تعجبنا وطبعا مو لازم يكون صاحب الصوره صاحب فكره او مبدأ ابدا المهم انه معروف ومشهور وبطل وبس وصرنا مثل الطفل اللي ما يفرق بين الجمره والتمره ..
اخيرا ابي اقول ان الجوهر في الصنعة لا في الشهرة وعمر الكوره ما سوت من الانسان انسان ولا نفتخر ان حنا في يوم من الايام شفنا اللاعب رونالدينيو او زيدان او رمزي العصيمي او صمدو او غيره او غيره ..
عموما احب اقول لكم ان الجوهر الحقيقي للانسان هو مبدأه وصنعته وخدمته للناس كل الناس ..
واخيرا اتمنى ان موضوعي قد نال على رضاكم ..
واشوفكم في مواضيع جايه ان شا الله
والسلام عليكم ورحمة الله وبركاته
اخوكم / صريح جدا

 

 

[ولدي الخالد]

السلام عليكم

كلام عين العقل فالجوهر هو المهم ولكننا مهما قال صريح جداً أو غير صريح فنحن لن نأخذ صورة الخباز وسنشتري صورة رونالدينيو بأي ثمن رغم أن الجميع يخدم المجتمع كما يحب .


لكم كل التحايا ،،،،