قصيدة لشاب فقير بيخطب بنت عمه المليونير.......؟

[kaha]

قصيدة لشاب فقير بيخطب بنت عمه المليونير .. حلووة (القصيدة)

قصيده رهيبه

سبحان من يرزق بتوع الملاييـن*** الرازق اللي ما يخيب الرجـا بـه
لي عم عنده معـرضٍ للصواليـن ***أموت واعرف بس من وين جابـه
وإذا سألته قـال بعـت الدكاكيـن***ما يدري إني ما هضمت الإجابـة
الشاهد إني رحت له قبـل يوميـن***في قصره العامـر ودقيـت بابـه
قال أرحب أرحب عدّد ورد البساتين***يا مرحبا باللـي لفـا يـا هلا بـه
قلت البقا عـدّ النفـل والرياحيـن ***يا شيخ شمل أهل الكرم والذرابـه
قال اسلم الله يحفظك لي من العين***وآمر أوامر حضرتـك مستجابـة
قلت الصراحة طالبٍ قرب غاليـن*** ودي تزوجنـي كريمتـك يـابـه
ثنّى وقال أهليـن والله وسهليـن***والكون ترخص لجل عينك رقابـه
لكن ترا عندي شـروط وقوانيـن***قلت اشرط اشرط يا حبيب الغلابـة
قال أولاً مهر العروسـة ثمانيـن***غير الرسوم وغير حق العصابـة
والثانية عمك يبي منـك سبعيـن***رسم الأبـوّة والنسـب والقرابـة
وأم العروسة حقها منـك ستيـن***عشانها ست الحسـن والمهابـة
وإخوانها كلن يبي منـك خمسيـن***عداً ونقـداً تنـدرج فـي حسابـه
وخواتها الخمس عطهن من ثلاثين***عشان تتوثـق عـروق النسابـة
وتجيب طقم عيار واحد وعشرين***وخاتم من الماس المصفى ترابـه
وأكياس متروسة كعوب وفساتيـن***ألوانهـا وأشكالهـا مـا تشابـه
وموتر بسواقـه وفيـلا بدوريـن***أثاثهـا مـن بطرتـه ينحكـى بـه
واحجز لنا قاعة بقصر السلاطيـن***واحجز بهـا رقاصتيـن وربابـه
هذي الشروط اللي على بالي الحين***وذكرني اللي ما حسبنـا حسابـه
قلت اذكر الله يا عـدو المساكيـن***واستغفـره لا يبتلـيـك بعـذابـه
الظاهر إنك منت عارف أنا ميـن ***أنا لو أرقى فـوق متـن السحابـه
ما جبت حتى نص درزن مواعيـن***واضحك بكيفك واعتبرهـا دعابـة
شروطكم هذي شـروط المجانيـن***شروطكم شغـل ابتـزاز ونهابـه
شروطكم تقصم ظهـور البعاريـن***شروطكـم همّـن وغـم وكآبـه
شروطكم والله سيوف وسكاكيـن***تذبح بنات المجتمع مـع شبابـه
وين الرضا والعطف واليسر والليـن***اللي ذكرهـا الله بمحكـم كتابـه
وين الصفات اللي أمرنا بها الديـن **وين اختفى نهج النبي والصحابـة
يا عم جعل اللي خلقنا من الطيـن**يرد عقلك مـن خطـاه لصوابـه
ويجعل نصيبي عند غيرك قل آمين**ويحسن عزا الصابر ويجزل ثوابه
قال أنت لو فكرت تفكير صاحيـن***ما شفت في مجمل شروطي غرابه
حنا بعصـر العولمـة والمزاييـن *** ماهوب عصر الفلسفة والخطابـة
الناس تسعى للرتـب والنياشيـن***وأنت اهتمامك بالشعـر والكتابـة
والشعر ما ينفعك لو هو دواويـن***ما دام جيبك مثـل بيـت الخرابـة
يا بوك لا تسمع كلام المصاخيـن***واسأل مجرب عاش في وسط غابه
قلت الله أكبر يا محـرر فلسطيـن ***من يسمعك يحسبك ذيـب الذيابـه
تراك شايب رأس مالـك رياليـن ***والبنت ما تسوى جنـاح الذبابـة<<< خربت الأخلاق
قال انقلع مالت على وجهك الشين****لا عاد أشوفـك عندنـا يالزلابـه
قلت ابشر أبشر لكن الباب من وين**وأقفيت من عنده على صوت بابـه
هههههههههههههههههههههههههههههههههههههه
وسلامــتــكـــم ، ،

 

 

[طيف العمر]

ههههههههههههههههه


صح لسانك واعتلا شانك

ويسلم إحساسك العذب دائما ع هالرائعة

ابدعت يعطيك العافية

ودام إبداعك وعطر حروفك

 

 

[غلا روحي]

ههههههههههههههههههههههههههههههه
مسكين من قلب شكله يشعر .. تسلم يمناك

 

 

[kaha]

يسلمو على المرور المتوقع منكم تشرفنا ...

kaha

 

 

[رياض]

شعر لطيف في معانيه ودعاباته والله يرزقه بنت الاحلال اللي تستره وتعيش معاه اخلى الايام والليالي ويسمعها من شعره الزين

 

 

[ابن الشهيد]

اللهم صل على محمد وآل محمد وعجل فرجهم وألعن أعدائهم

جميييييييييييييييل رائع والله رائع نقلك سلمت يمينك ويسراك .

 

 

[kaha]

لكم مني أرقى تحية وتقدير .
يسلمو على المرور ..
kaha

 

 

[ورده خجوله]

هههههههههههههههههههههه
والله مسكين صج صارعند الناس في ذالوقت الفقر شين بس الحمدالله على كل حاااااااال
يسلموووو ع الطرح الرائع..

 

 

[kaha]

اقتباس المشاركة الأصلية كتبت بواسطة ورده خجوله هههههههههههههههههههههه والله مسكين صج صارعند الناس في ذالوقت الفقر شين بس الحمدالله على كل حاااااااال يسلموووو ع الطرح الرائع..

والله هالاياام انا عن نفسي يشترون الرجال با اخلاقه وبدينه


اما انا عن نفسي انا يهمني الاخلاق وان تكوون متدينه

ولا بتخرب الاخلاق


يسلمو على المرور نورتي صفحتي .