!! إنسراق رقم مميز !! من موبايلي ..

[قاهر المستحيل]

بسم الله الرحمن الرحيم

السلام عليكم ورحمة الله وبركاته

** المتحدث / أبووائل **


موضوعي باختصار ان أحد الأصدقاء راح واشترى رقم مميز( موبايلي شحن) من محلات الجوالات.. واليكم القصة كاملة :
حصل هذا يوم الجمعة الثانية من الاختبارات.. وطبعا بحكم وجودنا بأيام الاختبارات كل عصر اتصل على خويي هذا لكي نناقش اختبار اليوم ونستعد لاختبار الغد ونضحك ونرفه عن انفسنا شوي ..
المهم يوم الجمعة 15/6/2007 اتصلت العصر على خويي و لقيت جواله مقفل !! غريبة ماهي من عاداته انه يقفل وقلت يمكن الرجال نايم .. اتصلت المغرب حصلته مقفل !! واتصلت على رقمه الثاني و رد ..
قلت هلا والله ابوفلان ليش مقفل؟
قال: قسم بالله ماقفلت جوالي وهذا هو شغال عندي ولا جتني لا رسالة ولا اتصال!! اخذ جواله وحاول يدق بس ما قدر لأنه مكتوب بالجوال (ادخل بطاقة Sim ), أنا أنهيت المكالمة وهو اتصل على 1100 وقالهم اللي صار معه قالوا رح للفرع بكرة . الكلام هذا المغرب ... وبعد صلاة العشاء ركب شريحته بثلاث جوالات ونفس الحكاية يقول ادخل بطاقة Sim ,
اتصل خويي على رقمه من جوال ثاني ورد واحد !!!!!!!! انهبل خويي وشلون يرد واحد والشريحة موجودة عنده المهم قال خويي للي رد : سلام عليكم من الأخ ؟
قال اللي رد : أنت مين أنا توي شاري الرقم !!!!
قال خويي : وشوووو صاحي انت ؟؟ الشريحة عندي..وبعدين مين اللي باعك الرقم ووينه؟
قال اللي رد : اللي باعني الرقم واحد اعرفه ,
انقهر خويي واتصل علي وقال لي السالفة كذا و كذا . قلت : بسيطة يمكن صاحب الرقم الأول سوى تحديث بيانات ؟
قال خويي : على كيفه يبيعه وبعدين يسوي تحديث بيانات ؟
قلت : متى آخر مرة كلمت بالرقم ؟
قال خويي : الجمعة الساعة ثلاث الفجر آخر مكالمة سويتها
قلت : طيب وشلون سوى تحديث بيانات والخميس والجمعة مافيه دوام ؟؟
قال : يمكن من محل جوالات معتمد ولا يمكن فيه فرع يفتح الجمعة .
قلت : مالك إلا هيفاء... اقصد مالك معاذ ... يوووه ... اقصد مالك إلا تروح بكرة لفرع موبايلي وتشرح لهم السالفة.. لكن المشكلة اختبارنا الساعة 10 الصباح .
قال : اوكي بعد الامتحان نروح لهم ..
وفعلا بعد الاختبار رحنا لفرع موبايلي وقلنا نبي نسوي تحديث بيانات وهذي الشريحة وهذا الكرت اللي يجي معها.
اخذ الموظف الشريحة وصورة البطاقة وصور الشريحة وعبينا الأوراق وكل شي تمام.. قال الموظف خلاص كملوا أوراقكم عند المشرف بالدور الثاني , جينا للمشرف وقال تفضلوا وجلسنا وقعد هو يدخل المعلومات وقال الرقم هذا باسم شخص سعودي وبياناته كاملة .قال خويي الشريحة معي من شهر.. قال المشرف : طيب عطني آخر رقم اتصلت عليه عشان أتأكد من صحة كلامك؟؟
قال خويي : اخر مكالمة متأكد منها هي الجمعة الساعة 3 الفجر والرقم كذا وكذا .
قال المشرف : صح .. لكن على العموم أنا راح اتصل على الشخص اللي موجودة بياناته بالكمبيوتر إذا هو فعلا بايعها فراح يصير الرقم باسمك اليوم ومر علي العصر , مشينا وكل واحد راح لبيتهم .
ويوم جاء العصر راح لهم خويي وسأل عن المشرف قالوا المشرف يداوم بفرع ثاني ومايجي الا 9.30 رجع خويي لبيتهم وعنده إحساس إن الرقم بيروح عليه ,
رجع لهم بعد صلاة المغرب وحصل المشرف ودخل عليه وحصل عنده باكستاني.. قال المشرف انتظر برا شوي لمين انتهي من اللي عندي.

اتصل علي خويي وقال انا الان عند مكتب المشرف, قلت الله يوفقك اذا طلعت اتصل علي وقل لي وش سويت.. قال ان شاء الله.

أنا بالنسبة لي صليت العشاء ويوم طلعت لقيت مكالمة لم يرد عليها.. واذا هو رقم خويي المسروق قلت هذي والله البلشة, شكلي بتهاوش معاه هالحرامي,
واتصلت عليه وقلت: سلام عليكم هذا رقم فلان ؟
قال منهو فلان ؟
قلت فلان خويي صاحب الرقم..
ضحك ضحكة كلها استهزاء وقال: صاحي يابوالشباب هذا رقمي من زمان.
قلت : نصاب <<< ما يعرف يتفاهم ..
قال : وش فيك انت ؟
قلت : انت اللي وش فيك هذا رقم خويي وآخر مرة كلمته أمس الجمعة..
قعد يضحك مرة ثانية بسخرية ... واسكر الجوال بوجهه واتصل على خويي (خويي معاه رقمين رقم موبايلي اللي ضاع ورقم ثاني غير موبايلي ) اتصلت على جوال خويي الثاني وقلت : بشر وش سويت؟
قال خويي: ما سويت شي المشرف اتصل على الشخص اللي رقمي باسمه ولا رد ؟
قلت : طيب تراي لقيت له مكالمة قبل شوي واتصلت عليه وقعد يستهبل وقفلت الجوال بوجهه بعدين اتصل علي هو وقال اتصل ابيك .
قال خويي : صدق والله .. يمون ابوالشباب؟؟
قلت : إي والله توي متصل عليه .
قال : تكفى اتصل عليه شوف وش عنده.
اتصلت عليه أنا ورد اللي سارق ..
قلت : سلام عليكم أنت قلت اتصل علي ابيك سم آمر وش تبي؟
قال اللي سارق الرقم : كنت قبل شوي ابيك ... الحين ما ابيك .
قلت : تستهبل انت؟؟ الرقم هذا كان مع خويي له شهر .. ياخي حرام عليك تاخذ الرقم بهالطريقة بعدين هو يدور وظيفة ومقدم على شركات وحاط الرقم هذا .. (خويي اصلا ما قدم على شركات ولا يحزنون بس تعرفون خويي وانا مسوي فزعة) وانت تجي تحدث بياناتك وتاخذه بكل سهولة يا خي حرام عليك الرجال شاريه بالشئ الفلاني وانت تاخذه ببلاش وشوله تبيعه من الاصل؟؟

يوم انتهيت من كلامي هذااك قعد يضحك من قلب ويقول الله يلعن ابليسك يا (ابووائل) انا فلان خويك ...
<<< التعبان طلع خويي رجع له رقمه ويبي يستهبل معاي ... المهم يوم عرفت انه خويي وان جواله رجع وعلى طول اسكر بوجهه واطفي الجوال .... وما سألته وشلون رجع جواله ... لانه رفع ضغطي .. من اليوم احاول ارجع جواله وبالاخير اكتشف اني اكلم خويي...

وانتهت القصة واتمنى تستفيدون من القصة واللي معاه رقم مميز شحن يروح يحدث البيانات قبل يروح عليه وترى القصة حقيقية .



م ن ق و ل ..: من أيميلي :.. للفائده فقط









والله ولي التوفيق

 

 

[أبو إلياس]

هاهاهاها

مسكين والرجال شاد حليه

الله يقطع شر إبليس سعادتك


هاهاهاهاهاها



الله يعطيك العافيه عزيزي على المواضيع الأكثر من رائعه


تحياتي

 

 

[قاهر المستحيل]

الله يسلمك

البسمه هي اهم حاجه

شاكر لك مرورك عزيزي

وماسوينا شيء والله









والله ولي التوفيق

 

 

[لحن الروح]

مسكين الرجال هذا جزاه يفزع له وبالاخير يكمل المشوار عليه اهههه

تسلم اخوي سعودي على البسمه المرسومه ..

ولابد من اخذ الحذر اكثر من الارقام المميزة


لحن الروح

 

 

[قاهر المستحيل]

يالله يمزح معاه بس مزحه ثقيييييل

الله يسلمك عزيزي

أيه والله الناس ماتفكر في حق ولا باطل

شاكر لك مرورك عزيزي لحن الروح









والله ولي التوفيق

 

 

[كايدهم]

يامزحك عااااااااااااااد

يعطيك العافيه

كايد

 

 

[أميرة القمر]

هههههههههههههههههي
يالله يمزح معاه بس مزحه ثقيييييل