عرض مشاركة واحدة
قديم 16-07-2010, 02:42 AM   رقم المشاركة : 11
وتين الورد
مشرفة سابقة
 
الصورة الرمزية وتين الورد
 







افتراضي رد: رواية بشروه اني برحل من حياته (( كامله ))



يقوم فيصل على صلاة الجمعه .............ولما رجع البيت :
فيصل: يمه ...تعالي ابيك بموضوع
ام فيصل: خير انشالله
فيصل: هو خير اكيد ...بس انا بعلمك قبل لايدري أي انسان ثاني حتى فاطمه ماقلتلها
ام فيصل: هذا انا قعدت قول وشعندك....انشالله ناوي تعرس
فيصل مرتبك: يمه ارجوكي طلبتك تفهميني .......
ام فيصل: أي تكلم قول اكلت قلبي...
فيصل: انا ملكتلي على وحده ...
توقعون شنو ردة فعل ام فيصل؟؟؟؟؟؟؟

وهذا الجزء وصل:
الجزء الثامن:
ام فيصل:ههههههههههههه
فيصل: تضحكين على ايش يمه ؟ اكيد فرحانه عشاني
ام فيصل: يحليلك يافيصل....تعرف تمزح
فيصل وهو واقف: انا ماامزح يمه انا اتكلم جد ...
ام فيصل: وشتقول انت؟
فيصل: يمه انا رجال كبير عمري 24سنه ومن حقي اتخذ قراري بإيدي
ام فيصل منصدمه: تزوج وماتقولي يا....
فيصل: يمه انا عارف البنت وعارف اخلاقها و....
ام فيصل بعصبيه: انت ت***ت ومن ذي الا وحده من بنات الشارع اللي يقطن نفسهم على الرجال
فيصل: لاتقولي عنها كذا يمه ..
ام فيصل تصارخ: وتدافع عنها بعد؟؟؟؟؟؟
فيصل بقلبه"لوعرفت انها موسعوديه وشتسوي فيني"
ام فيصل: إتطلقها...
فيصل: وشقاعد تقولين انتي.....خلاص اناملكت عليها
ام فيصل: تطلقها يعني تطلقها
فيصل: لا
ام فيصل: ومن هذي اللي تعصي امك عشانها .....بنت من؟؟؟
فيصل وهو يقط قنبله ثانيه: مو سعوديه
ام فيصل: وبعد مو سعوديه اجل اكييييييد سوريه....فصول ووجع انت وين مسافر؟
فيصل: ولاسوريه.......يمه انا تزوجت كويتيه
ام فيصل: هيه انت وشقاعد تقول حسبي الله عليك من ولد رفعت ضغطي لعنبو دارك احن عليك من اربع سنين تزوج موزه ويوم طارت البنت من ايدك وتزوجت .....اه ياراسي ياويلي على حالي .
فيصل: يمه ارجوك افهميني ....كل ام تدور على راحة ولدها وانا راحتي معاها...
ام فيصل: وانت و شعرفك فيها؟؟؟
فيصل: مو مهم وشلون عرفتها المهم اني عرفتها وخلاص وجايك ابيك تساعديني .....خالها طالب مهر كبير وابيك تساعديني...يمه انا مالي غيرك
ام فيصل: اطلع بره منت بولدي ان ماطلقتها
فيصل بتوسل: لايمه ارجوك انا بحاجتك ....لاتخلين عني والله اني احب البنت واشوف ان راحتي معها لاتحرميني من فرحه انا بحاجتها ....
ام فيصل تصرخ: اقولك اطلع بره ولنت بولدي ان ماطلقتها
يطلع فيصل من البيت وهو حاس ان هموم الدنيا على راسه ويرجع بيت اخته:
فيصل: فاطمه وين ابو عبدالعزيز؟
فاطمه: اللحين يرجع تبغى غدى والا تغديت عند امي ....؟
فيصل: ايه تغديت....تغديت هم وكدر من امك.....اذا جا زوجك ناديني ابغاه بسالفه وانتي بعد معاه
عرفت فاطمه ان السالفه فيها إن واتصلت على امها اللي خبرتها بكل السالفه ....
طقطق ممكن ادخل...
فيصل: تفضلي يافاطمه.... وتدخل فاطمه ...وتقعد على السرير مقابله اخوها
فيصل: وينه سعد؟
فاطمه تطالع فيصل ومانطقت بكلمه..
فيصل: اكيد اتصلتي على امك وقالتلك بكل القصه
فاطمه: يعني سويتها يافيصل وتزوجت مها؟؟؟
فيصل ماهو قادر يحط عينه بعينها:احبها يافاطمه واحس ان حياتي جحيم بلياها...
فاطمه: انت قد اللي سويته؟
فيصل: ماسويت شي غلط ....فاطمه انا بغيتها بالحلال
فاطمه بهدوء وبدون أي انفعالات: وليه ماقلتلنا؟
فيصل: كنت عارف انكم بتمنعوني...
فاطمه: مانمنعك الا اذا كنت عامل حاجه غلط
فيصل وصوته مخنوق: احبها والله احبها ...
فاطمه: حبك لها شي وانك تغضب امك شي ثاني..
فيصل وهو يصرخ: امي وامي وامي ترى ذبحتنا امك هذي محد عافس حياتي غيرها هي سبب حزني وقهري ..اول مره اشوف ام ماتبغى راحة ولدها..ترى انا مليت من هالعيشه سكت سنين وماني قادر اسكت اكثر ..حرام عليكم ياناس مستكثرين سعادتي ..انا ماضريت احد لما قررت اتزوج اللي حبها قلبي ليه تعاملوني كذا؟؟
انهار فيصل من كل اعماقه حبه لمها كان كبييييييير حيل قعد يبكي بصمت وهو منزل راسه
فاطمه: فيصل انت تبكي؟
مارد عليها فيصل ....
فاطمه آلمها هالموقف وصارت تبكي معه...لانها اول مره تشوف اخوها الوحيد مقهور
فيصل بأسى: بذمتك اذكريلي شي واحد سوته امي عشاني ؟ امي قاسيه يافاطمه حاولت اني اكبر بعينها بس كانت دايما تنتقدني... عمري ماحسيت انها امي عمري ماحسيت انها تحبني من قلبها ...قهرتني يافاطمه وشمتت الناس فيني ...مع اني ولدها الوحيد ...بخلت علي بمشاعرها وحنانها....ومها بعد عمري مها لمست فيها الام اللي ممكن تعوضني عن امي حسيت بحنانها وطيبة قلبها ...تحبني يافاطمه تحبني من قلبها اول مره احس ان احد يحبني ويدللني عشت معها اجمل لحظات عمري......
فاطمه ترفع راس اخوها وتمسح دموعه: مبروك يافيصل تستاهل ياخوي والله يه***
فيصل يضم اخته : الله لا يحرمني منك الله يخليكي لي انتي امي وابوي وكل هلي محد غيرك فتحتله قلبي ومحد غيرك فتحلي بيته ....
فاطمه: تستاهل ياخوي بس هذي امك غصبن عني وعنك وانك تراضيها حق ...والله سبحانه وتعالى وصانا فيها بكتابه العظيم "وبالولدين احسانا" لاتنكر فضلها ...
فيصل: ....................
فاطمه: حاول فيها ...كلمها اكثر من مره يمكن تقتنع...
فيصل: طردتني وقالت ماتكلمني الا لما اطلق مها
فاطمه: مايضر لو حاولت وانا بحاول بعد قد مااقدر ....
فيصل: اكيد بحاول ...
فاطمه: ماقلتلي شلون تزوجتها؟
قالها فيصل السالفه كلها ....
فاطمه: طيب والمهر كثير شلون تجيبه؟90الف ريال
فيصل: علشان كذا انا ابغى سعد زوجك يساعدني
فاطمه بعد تفكير: طيب انت تقول انك قدرت على12الف ريال وعامر المسكين بيعطيك 10الاف وانا بعطيك 24الف....وببيع كرسي الذهب اللي عندي
فيصل: لايافاطمه تكفين لاتبيعين شي من ذهبك
فاطمه: اصلا انا مااحتاجه اللحين ومن زمان كنت ببيعه...ويجيب تقريبا14الف ....يعني باقي 30الف
فيصل: ابيع سيارتي وتجيب اكثر من ثلاثين..
فاطمه: خل سيارتك لك لاتبيعها ولاشي....انابكلم سعد وانشالله مايقصر
فيصل: والله اني مستحي منه..
فاطمه: هذا ولد عمك وان مانفعك بوقت ضيقتك متى ينفعك..
فيصل: عسى الله يقدرني واردهم
فاطمه:ماقلتلي سلفتك اللي بالبنك ماخلصت ؟
فيصل: لا بقى كثير وماتخلص مني لي 5سنين
فاطمه: لا كثير خمس....
فيصل: الله يعيني..
فاطمه: طيب انا بطلع تبغى غدى؟
فيصل: لالالا تعبان وابغى ارتاح شوي...
فاطمه:طيب على راحتك ....
فاطمه وهي طالعه:"فيصل ترى بقول لسعد القصه كامله ها؟"
فيصل: قوليله يافطوم خلاص مابقى احد اغبي عليه
وتطلع فاطمه وتقول لسعد زوجها القصه كامله ..
بعد صلاة العصر وعند باب المسجد:
سعد: اقول فيصل...تعال بغيتك بسالفه
فيصل مستحي: هلا بولد العم..
سعد: هلافيك...تركب معي والا اركب معك؟
فيصل: اركب معك انا جاي مشي مو بسياره
سعد: طيب حياك..
وفي السياره:
سعد: مبروك يالنسيب
فيصل: الله يبارك فيك...اكيد فاطمه قالتلك السالفه كامله
سعد: أي نعم ...بس انا زعلان عليك ...كيف تروح لاتقول ولاتكلم ..تصدق ماعمري شفت الكويت
فيصل: سامحني ياخوي والله كنت بدون تفكير ..
سعد: المهم لاتحاتي الثلاثين الف جاهزه متى ماتبغاها تعال اخذها....واثاث الشقه علي انا هديه مني ومن فاطمه لك..
فيصل: لا تكلف على عمرك وانا انشالله بردلك كل ريال اخذته منك بس اصبر علي
سعد: لاتحاتي...متى ماالله فتحها عليك رد الفلوس ترى ماني محتاجهم اللحين
فيصل: تسلم ياسعد انا لولاك مدري وشسوي؟
::::::::::::::::::::::::::::::::::::::::
علاقة سالم بساره تطورت وصار بينهم اتصالات ومكالمات لأنصاف الليالي ..مها ماكانت تدري بعلاقتهم ونوره حست ان زوجها تغير عليها حيل ....فيصل دبر المبلغ كامل وصرفهم بالكويتي ....كان بينه وبين مها اتصالات وامه لازالت رافضه انها تشوفه او تكلمه ......
:::::::::::::::::::::::::::::
بعد صلاة العصر:
سعد: ها يافيصل ليه مارحت تجيب عروستك؟
فيصل: والله ياابوعبدالعزيز هذا انا صارلي ثلاث اسابيع وانا كل يوم اقول الاسبوع الجاي ..
سعد: طيب تجهز الاربعا هذي واروح انا معك
فاطمه: وانت ليه تروح بعد وشعندك؟
سعد: حرام اغير جو يعني؟
فاطمه: ماتروح الا رجلي على رجلك
سعد: يابنت الحلال كلها ثلاث ايام ونرد
فيصل: سعد معه حق يافاطمه ماابغى اتعبك معي
فاطمه: تعبك راحه ياخوي....
سعد: ترانا بنروح بطياره واليوم بروح احجز
فيصل: انتظر لين مااسحب فلوس
سعد: تذكرتك علي
فيصل: لا تذكرتي انا علي ......تراني مو فقير للهدرجه
سعد: كيفك...
ويطلع سعد من البيت
فيصل: زين اللي طلع سعد بغيتك بسالفه.
فاطمه: خير يافيصل ؟
فيصل: امي !!!
فاطمه تتنهد: كلمتها بس...
فيصل: كملي بس ايش...ترى متوقع أي شي
فاطمه: امي رافضه تكلم نهائيا بالموضوع ..
فيصل: الله يسامحها...خلاص انا سويت كل اللي علي ...والايام كفيله بهالشي
فاطمه: ولو..... انت مفروض ماتيأس كل يوم روحلها ...ماقلتلي وشخبار العروسه؟
فيصل وهو يبتسم: بخير وتسلم عليك
فاطمه: فيصل ليه انت رافض تسوي عرس
فيصل: انتي عارفه بالظروف ..ومش حلوه اسوي عرس وامي ماتحضره
فاطمه: ومها شتقول؟
فيصل: مها رايها من رايي
تسكت فاطمه لما عرفت وجهة نظره .........
وفي المغرب يتصل فيصل على مها:
مها: تأخرت يافيصل قلت اسبوع او اسبوعين بالكثير ...اشوف صارلك ثلاث اسابيع
فيصل: ميخالف ياقلبي اصبري علي شهر بعد..
مها وهو منصدمه: شهر!!!! ليش ؟ شصاير؟
فيصل: علي منع سفر
مها: بذمتك ...تكلم من صجك
فيصل وهو يقلد اللهجه الكويتيه: من صجي يابعد جبدي
مها: .........
فيصل: انتي صدقتي؟
مها استانست: وتعرف تمثل بعد؟
فيصل:اعرف ليه مااعرف؟
مها: فيصل ممكن سؤال؟
فيصل: ايه تفضلي
مها: قولي بصراحه شنو ردة فعل امك ؟
فيصل: ...........
مها: ادري عصبت صح؟
فيصل: احنا لازم نوقف بوجه الظروف
مها: اخاف يافيصل تدعي عليك ....هذي امك ترى ماتلحق جزاها
فيصل: انا عارف....بس وشطالع في يدي
مها: متى راح تجي؟
فيصل: عقب بكره انشالله ...
مها: فيصل ترى انا عندي كورس صيفي لاني تأخرت كورس كامل ...ومايخلص الا شهر ثمانيه
فيصل: الله عليك استنى اربع شهور بعد؟؟لالالا مستحيل
مها: فيصل الله يخليك ماابيهم يفصلوني
فيصل: وانتي وشلك بالدراسه ...خلاص مادمتي تعرفين تكتبين وتقرين ...وشتبين اكثر؟
مها: لازم ياعمري ادرس واشتغل واعينك وتعاوني...
يقاطعها فيصل: خلاص خلاص
مها: شنو اللي خلاص
فيصل: كملي دراستك على كيفك مادام قلتي كلمه حلوه
ضحكت مها وعرفت ان فيصل سهل وماهو من الرجاجيل اللي بدون تفكير ....
:::::::::::::::::::::::::::
بالنسبه لساره تمادت علاقتها بسالم وتطورت ...لدرجة انها صارت تطلع معاه بس اماكن عامه ...كل هذا ومها ماتدري بشي بالسالفه..............
فيصل وصل الكويت مع ولد عمه ودفع المهر واتفقواانه يجي ياخذها بعطلة الصيف ....شاف مها وسلم عليها ...ورجع السعوديه بسرعه لان وراه دوام .....
مر اسبوعين والاتصالات بينهم قليله نظرا للحاله الماديه لكليهما .....
سالم عطى مها ثلاثةالاف وخمسميه واخذ الباقي .....حاولت مها انها تقتصد قد ماتقدر ...وكانت تقريبا كل يوم تروح السوق وتجهز لعرسها....وبعض المرات كانت ساره توديها ....
سالم كان كل يوم يبعد عن زوجته الف يوم ....ونصيبه من مهر مها كان يصرفه هدايا على ساره عشان يكبر بعينها ....مها ماقدرت تكلمه على سالفة المهر لانها تدري انه بيده الف شي وممكن يوقف زواجها
ام فيصل الى الان مو راضيه على فيصل ....وهو مثل عادته كل يومين يروحله بس مايسمع منها الا الكلام الجارح والطرد بالاخير ........
فيصل: يمه انا خلاص متزوجها متزوجها وبجيبها اخر ثمانيه انشالله ومحد يقدر يوقف هالزواج انشالله غير موتي او موتها الله لايقوله
ام فيصل: موتها انشالله ونفتك منها ....يالعاصي تفضل الغريبه على بنت خالتك؟
فيصل: بنت خالتي تزوجت والله يهنيها
ام فيصل: قم اطلع عن بيتي انت الهرج معاك مايفيد......
فيصل: يمه الله يخليكي لي افهميني ترى انا مالي غيرك وانتي مالك غيري
ام فيصل: تخسي الا انت احتاجك ...احتاجك انت يالعاصي...اقولك قم اطلع عن بيتي
:::::::::::::::::::::
وتجي عطلة الصيف وتسافر نوره مع عيالها واخوها للامارات ....سالم كان رافض انه يسافر بحجة ان وراه شغل....ومها عليها كورس صيفي وصار السواق هو اللي يوديها ويجيبها.....
سالم: ياساره ياحياتي طيعيني هالمره بس
ساره: لالالالالا مااقدر امي ماراح ترضى
سالم: تعالي خلينا نعيش حياتنا بعيد عن عيون الحساد
ساره: سالم مااقدر امي شقولها؟
سالم: قولي انج بتزورين مها
ساره: ماراح تقتنع توني رايحه معاها السوق امس
سالم: الفرصه ماتنتطوف تكفين لاتحرميني من شوفتج
ساره: احاول....
سالم: ارجوج ياساره حاولي قد ماتقدرين
ساره: خلاص قلتلك احاول
تحايلت ساره على امها ....ووافقت...راحت لبيت سالم ولكن.....الشيطان كان شاطر.وخصوصا النفوس الضعيفه اللي ماتخاف من الله........"لايخلو رجل بإمرأه الا كان الشيطان ثالثهما".


الجزء التاسع:
ساره وهي تبجي: سالم شسووويت؟
سالم: ياحبيبتي عادي...
تقاطعه ساره وهي وتصرخ: لا تقول حبيبتي....اللي كنت خايفه منه صار....صار
سالم معصب: كله برضاج وانا ماغصبتج على شي.....
ساره تطالعه بنظرات حقد: ياويلك ...ياويلك اذا ماصلحت غلطتك..
وتطلع ساره من عند سالم.....وترد بيتها وهي في قمة احزانها ...
ندمت ساره على اللي سوته بس عقب شنو؟ خلاص فات الاوان ...واذا فات الفوت ترى ماينفع الصوت
::::::::::::::::
بعد مرور شهرين ...وسالم يتهرب من ساره ...
ام ساره: ساره ياثقل نومج....شفيج خابرتج تفزين بسرعه لو احد بطل الليت ؟هالايام يابنتي متغيره مو ساره اللي تحب الضحك....شفيج؟؟؟؟؟؟؟
ساره: يمه مدري شفيني؟ حاسه راسي يعورني وارجع....وجبدي تقلب..
ام ساره: خلاص قومي اوديج الطبيب...يمكن الجو متغير عليج؟
ساره: أي صح لازم اروح الطبيب....
في الطبيب اللي كانت ساره خايفه منه صار.....وقع الفاس بالراس ....
الام وهي تبكي: ليش ياساره...شلون ؟؟انا شقصرت معاج فيه ربيتج احسن تربيه وصرتلج ام وابو بنفس الوقت .....الله ياخذج من بنت ياليت الله ذبحني قبل اشوف هاليوم
ساره ماتكلمت ولاكلمه وكانت منصدمه من اللي صار....في البيت ضربتها امها وصارت ماتكلمها...واخذت منها السياره ومنعتها من الطلعه .......بس عقب شنو ياام ساره ووووووينج من زمان
مها كانت تتصل بساره بس ماكانت ترد عليها مووووووووووووليه
ام ساره: انا لازم اعلم ابوج ....لازم فيه رجال يوقفج عند حدج انتي تمردتي ....وتماديتي
وابو ساره بدوره اكيد عطاها نصيب من الضرب اللي ماكان له داعي ....كان لازم يتخذون وسيله غير الضرب ....اجبرها ان علم عن اللي كانت تطلع معاه.....ورفع عليه قضيه ....ورفض انه يتنازل عنها الا لما يتزوج سالم بنته ويدفع 20 الف دينار ....وحط عليه مؤخر 20الف عشان مايطلق بنته
سالم ....يبي يتجنب الفضيحه ووافق ....بس اكيد لازم يكون فيه تنازلات ...وموافقته كان لها سلبيات...
نوره ام علي اخذت العيال ...وطلبت الطلاق....
تزوج سالم "ساره" وعاملها انذل معامله ....وكان الاثنين يكرهون بعض ولايتكلمون مع بعض ..
ابو ساره تبرى منها وامها قاطعتها.....ومها....ماتخلت عن صديقة عمرها
::::::::::::
في بيت سالم:
ساره وهي تبجي: يامها ماكان عندي احد يعلمني الصح من الغلط ...كنت ضايعه...امي دللتني ودلعتني ...وكانت تعطيني اللي ابيه...اطلع وادخل ولااحد يسألني وين رايحه والا منوين جايه...حملوني مسئولية نفس وكان الحمل ثقيل علي...فقدت الاب من كنت صغيره وكنت محتاجه لحنانه...كنت ماسكه نفسي ومتحمله لين ماجا خالج بحياتي وعفسها ..اوهمني انه يحبني ...وحسيت بهالشي من كلامها...قبل انام كان يقولي تصبحين على خير واذا صحيت يقولي صباح الخير كان اول واخر واحد يكلمني باليوم...لعب بعقلي الصغير...آه ياليت الزمن يرجع ياليت ..
مها: بس ياساره اللي سويتيه ذنب وانتي لازم تتوبين لله سبحانه...وكان المفروض تقوليلي عن علاقتج مع خالي جان حذرتج منه ...
تقاطعها ساره: هذا انتي حبيتي وتزوجتي اللي حبيته....اشمعنى انا اللي يصير فيني جذي؟
زعلت مها من كلامها وعصبت بس حاولت انها ماتبين لها لان اللي فيها كافيها: ساره حبيبتي وضعي غير عن وضعج وفيصل غير عن سالم
في هاللحظه يدخل سالم وهو ماط بوزه شبرين ونفسه بخشمه...
سالم بدون نفس: اسمعي انتي من بكره الساعه 9 الصبح جهزي عمرج بوديج مصر ...
ساره: ليش؟
سالم: جب ولا كلمه لج تسألين بعد....بوديج تحذفين هالفضيحه اللي ببطنج...وياليت تموتين معاه
ساره تبجي وتقوم للغرفه....
مها: خالي ترى مايجوز اللي تسويه فيها ...اثنينكم مشتركين بالخطأ
سالم: خل تولي هذي ماعليج منها....وبعدين مابيج تقعدين معاها فاهمه ....
مها وهي قايمه بتروح غرفتها....
سالم: اقول....متى يجي زوجج ياخذج بعد انتي؟
مها: مابقى شي وتفتك مني
سالم: أي خل يعجل ببيع البيت انا ....افقرتني حسبي الله عليها
انصدمت مها من كلام خالها اللي سمعته وعرفت قيمة فيصل...يعني لو ماتزوجته جان ضاعت بالسالفه وماعرفت وين تروح....
:::::::::::::::::::::::::::::::::::::::::::::::::: ::::::::::::::::
كانت مها تشتري كروت دوليه بخمس دنانير ...وتتصل على فيصل على تلفون البيت بالاوقات اللي يكون فيها موجود لانها ماتحب تخسره فوق ماهو متخسر عشانها...
مها: هلا فيصل شلونك؟
فيصل: هلا بعمري هلا بقلبي ...وينك يالظالمه 3 ايام ماتتصلي لاحس ولاخبر ؟
مها: شسوي اشغال...
فيصل: وشعندك من الاشغال انتي؟
مها: اجهز لعرسي....
فيصل: ياويلي على حالي من اللي تجهز لعرسها....بس اقولك.
مها: هلا ..
فيصل: هالله هالله بالملابس اللي ....
مها: أي خلاص بس بس فهمناك...تصدق هذا الشي الوحيد اللي ماشريته
فيصل: ولييييييييييييييييييييه؟
مها: قصرت الفلوس...
فيصل: وشتقولين انتي؟ قوليلي كم يلزمك وارسلهم لك؟
مها: وانت سيدا صدقت ؟؟اضحك معاك
فيصل: أي شي تقوله مهاوي حبيبتي اصدقه ....
مها: فيصل شخبار الاهل؟
فيصل: يسلمون عليكي...
مها: وال....
فيصل: الوالده ..الله يهداها
مها: الله يهداك انت ...كلمها يافيصل كلمها ارجوك مابي اكون سبب في خراب علاقتك مع امك
فيصل: هي خاربه خاربه ....
مها: ميخالف هذي امك ولازم تجرب مره ومرتين وعشر..
فيصل: طيب بجرب ...صدقيني بجرب ...بسك حنه مليت من هالسالفه خلينا نستانس مع بعض من زمان ماكلمتك..ولاسولفت معك ..
مها: كلها جم اسبوع وبتمل مني ..
فيصل: مستحيل امل منك...انتي حياتي احد يمل من حياته؟
مها: ياخوفي يافيصل!!!!!!!
فيصل: ياخوفك من ايش؟
مها: مدري؟ خايفه وبس
فيصل: اطردي هالافكار السودا من راسك ...ومدامك معي لاتخافين
مها: اخاف تكرهني....كثر ماحبيتني اخاف تكرهني
فيصل: والله هذا الشي يعتمد عليكي
مها: يعني شنو؟
فيصل: شوفي ياحبيبتي...كره انسي اني اكرهك انتي ليه تفكري كذا؟
مها: مجرد خوف...
فيصل: انتي وينك اللحين؟
مها: عليك ذكاااااء...يعني وين؟؟... اكيد البيت
فيصل: اوووووه نسيت.......اشتقتلك يامها صارلي شهور ماشفتك..
مها: ..............
فيصل: طيب جاملي.....قولي حتى انا اشتقتلك....انا بعرف انتي ليه ناشفه كذا
مها: كيفي..
فيصل: وش كيفي هاذي؟حبيبتي انا ماعندي حريم يقولن كيفي
مها: انزين...
فيصل: كملي ...قولي انزين ياقلبي خليني احس بمكانتي عندك ...
مها: المكانه بالقلب مو بالكلام
فيصل: شوفي انا ساكتلك بس لانك بعيده عني...والله لو انك يمي...
مها: بس خلاص عرفنا ..يالله تصبح على خير
فيصل يضحك: وانتي من اهله ....احرصي على نفسك
::::::::::::::::::::::::::::::::
خلص الكورس الصيفي على خير ونجحت مها وتقديرها امتياز....
فيصل جا الكويت مع فاطمه وزوجها...علشان ياخذ عروووووووووووووووووووسته.
وفي الكويت ....خلص فيصل اوراق مها علشان يحولها للجامعه في السعوديه ...
فاطمه سلمت على مها وسولفت معاها ....وتعرفون حرمتين عند بعض شنو بيسولفون غير سوالف العرس
كان كرسي مها عند فيصل بالطياره............
:::::::::::::::::
في الطياره :
فيصل يتأمل مها....
فيصل: يحليلك ...هذا النقاب ماتلبسينه اذا وصلنا انشالله ..خلي فاطمه تدورلك غشوه ..
مها:انزين خلينا نوصل الاول بعدين قول اللي تبيه..
فيصل: احس اني بحلم....مها عندي وانا قاعد كذا مابيدي شي
مها تضحك: يعني شنو بتسوي...
فيصل: اشيا كثيره في بالي...
مها: فيصل...امك تدري ان..
فيصل يتنهد: ايه تدري....ارجوكي يامها لاتحملين ذنب ولاتفكرين كثير ترى انا علاقتي مع امي من زمان ماكانت طيبه ...وانتي شي مو جديد في سوء علاقتنا ...
مها: ياليت اكون شي يصلح بينكم
فيصل: خليني كذا مرتاح
مها: ترى اللي مافيه خير لوالديه مافيه خير لأحد
فيصل معصب: وشقصدك ...؟ انا مافيني خير لأمي ...وشهالاسلوب الجديد ..انا خابر البنت تستحي ماتكلم في اول ايام زواجها وانتي من البدايه تهاوشين ...
انصدمت مها من كلامه وخافت منه نزلت راسها تحت...وقامت من مكانها..
فيصل بنبره حاده: وين رايحه؟
مها ماردت عليه وكملت طريقها للحمام الله يعزكم ....وبجت لين ماقالت بس وردت ...
فيصل لاحظ انها باكيه وعيونها الحمر تدل على ذلك ندم على كلامه وتم يقول في نفسه: بنت يتيمه ومسكينه ...ليه ازيد عليها...بس هي بعد غلطانه مفروض تسكت ...........لازم اراضيها ..
فيصل: مها حبيبتي سامحيني ....ترى ماكان قصدي ...والله زلة لسان
سكتت مها وماردت عليه...
فيصل: مها تكلمي قولي أي شي ...
مها: الله يسامحك
فيصل: وانتي....سامحتيني
مها:.....انت ماغلطت
فيصل: طيب ليه تبكي؟
مها: جذي ...تذكرت اهلي ....تذكرت امي وابوي
فيصل: الله يرحمهم
حط فيصل ايده على ايدها ...بس مها سحبت ايدها منه..
فيصل: انتي لسه زعلانه
مها: قلتلك مو زعلانه ...
فيصل: الا زعلانه ....قوليلي وشلون اراضيكي
مها: فيصل خلاص والله مو زعلان
سكت فيصل وصد صوب اخته اللي كانت لاهيه بالسوالف مع زوجها ......

 

 

 توقيع وتين الورد :

كَمَآ آنّ بَعضَ الَأكِلْ لَآ يؤُكلِ ,
......... هُنآك عقليَآت لَآ تُنآقَشُ إطلَآقَـاً !
وتين الورد غير متصل   رد مع اقتباس