[سكون الصمت]

.... :: [ بعـد ...... سـنوات ] :: ....

[ ثالث أيام عيد الأضحى ]


.
.
.
.

رن تلفونها بموسيقى كلاسيك هادئة، باسم [ خيوتي حبيبتي ]، وتمّ يرن ويرن وإهي غاطة في نوم عميق .. وولدها في سريره الخاص يراغي ويطلع أصوات بريئة، وهو فاتح عينه العسلية على أقصاها، ويرفع ريوله فووق ويحرك أياديه، يحاول يوصل للألعاب المعلقة على فراشه وهي تدور وميننته ... طلع صوت الباب وهو يتسكر، ووصل زوجها بعد ما وقف تلفونها عن الرنين، طل على ولده وضحك لما جافه يتلاعب، حمله من بين ذراعينه وحضنه لصدره وشمّه: صباح الجمال يا جميل انتَ ..
ضحك الياهل واهو يتحرك على صدر أبوه : بابا ..
ورجع التلفون يرن ... وتفادياً لإزعاجها وإهي نايمة، راح بسرعة عشان يشوف المتصل ويرد ...
لما جاف المتصل طالع ولده وقال: هذا خالو متصلة، نرد عليها حبيبي ؟!
وابتسم ولده ابتسامة عريضة، واهو بادله بضحكة فرحانة لأنه ابتسامته عنده بالدنيا ومافيها، رمى بثقله على السرير وهو يضغط زر الرد: نعم
وصله صوتها بمرح: صباح الخير زوج أختي العزيز ..
ردّ بنفس النبرة واهو يقعد ولده على فخذه: صباح النور بنت عمي العزيزة ..
عليـاء: عيدك مبارك بو محمد ..
حسين : العايدين السعيدين، الناس تقول من أول يوم مب ثالث يوم ..
ردت بنشاط: كله عيـد × عيـد، المهم .. أين هي أختي الجميلة ؟!
ضحك بخفة على ولده اللي ماسك صبعه السبابة، وحاطها في بوزه، ويعضها بسنونه ثنينهم وبدرادره > تعرفون يعني شنو درادر ؟! هههههه ترى حلوة الكلمة، يعني المكان اللي مافيه أسنااان للحين =d <: امم أختج الجميلة إللي إهي حياتي، زوجتي الرائعة،..... نايمة !
ردت بدفاشة: زوجـة رائعة طل ! أي زوجة رائعة هذي إللي تنام إلى عشر الصبح، وتخلي ريلها قاعد بروحه، وأشكررى بدون ريووق بعد ..
رد بدفاع: طل بعينج، طول عمرها قايمة بواجبها، إلا اليوم من الأيام النادرة ... " وطالع منى بحنية " سهرانة طول الليل يعل عيني ما تبجيها ..
قالت بدهشة: طول الليل تنظف البيت ؟! لهدرجة أختي نظيفة ؟!
ضحك حسين وولده ضحك وياه وطلع صوته، وعلياء نقزت: حموووووووودي حبيبي حياة خالوو أنت، حسين عفية عطني شوي أحاجيه ..
رد واهو يطالع ولده: آسف بنت عمي، ولدي زعلان وما يبا يحاجيج لأنج تعقرين في أمه الحبيبة ..
ضحكت: ما عليه بجوفه اليوم غصب عن العذال، انزين صدق حسين، منوي وينها ؟!
قال بجدية: نايمة والله .. حمود البارح ما نام طول الليل، مصخن وحالته حالة، لأن طالع له سن يديد، ولا سكت من لصياح .. واهي تمت سهرانة لـ 7 الصبح
قالت بحماس: اللااااااي سن يديد! اهو جيي ومحنا متحملين جماله! بعد يطلع له سن يديد! جماااااااااااااله من جمااال
قال باندفاع: بسم الله وياسين على ولدي، علياء خفي شوي من هالعين! جم ضحية راحت من عينج! رجاءً حسدي اللي تبين، إلا ولي العهد ..
قالت بدفاشة: أقول أخلص أخلص، لا قعدت الأميرة النائمة من نومها، قولها إني ما بنطر سيادتها لين ما تتفرغ، الفساتين جهزوا، وبنروح نسوي بروفا .. وأني بروح بسيارتي الساعة 11
التفت لمنى وابتسم لانها مب واعية للي حولها: انتي روحي والله لا يعوزنا لج، أنا بنفسي بوصلها، عساني أحطها على أكتافي وأمشي فيها ..
ردت بانقراف: أرجوووك لا تغازلها قدامي، تعقدوني يالشياب برومانسياتكم
ضحك حسين واهو يرفع ولده على كتفه لما زادت حركته: شياب في عينج يالعيوز .. روحي فكينا من ويهج وحسدج
علياء: مقبولة هالمرة مقبولة .. سلامي وقبلاتي إلى إبن اختي الجميل حموودي
حسين: لا تحاتين وصلت قبل لا تقولين ..
ضحكت بعذوبة: هههههههه أوكي بو محمد، سوري على الازعاج من صباح الله خير .. يلا فمان الله
حسين: أفا عليج، كله واحد .. بحفظ الله
وسكر التلفون، ونزل ولده على السرير بعد ما باس خده: حبيبي لا تسوي شطانة، عشان ماما نايمة .. بروح أجوف لا وصلني الفاكس أولا وبرد لك، زيين ؟
ضحك محمد وحسين مشى واهو يلتفت له: فديييت ضحكة ولدي، خلك رياال ولا تتشيطن .. ياينك!
طلع حسين من الغرفة، ومحمد [ البيبي ] تم يحبي على الفراش لين ما وصل لمنى، حط يده في شعرها وشدّه، وتم يسحب فيه ومنى إنزعجت وقالت بقهر: يالله صباح خير .. حرام عليكم، خلوني أنام شوي كفاية ازعااج
ابتسم بحبور وتقرب منها وتم يبوسها: ماما







ردت واهي مغمضة وحاطة يدها على رقبته: حبيبي محمد خلني أنام شوي
حط يده على شعرها وباس خدها بقوة: ماااامااا اععي ..
فتحت عينها وطالعته بيأس وإهي شوي وتصيح: حموود ذبحتني يا روح ماما أنت، يصير تخليني أنام ساعة وحدة بس؟! تحس فيني ماما موو ؟! تحس في ماماتك انت .. " وحطت يدها على جبينه وخده ورقبته ولمست يده " خفت عنك الصخونة، وصرت بطل مو حبيبي .. يلاا خلني ارتااح بس ساعة ياعمري، وبابا بيتم وياك .. " ودمعت عينها "
باعد ويهه وطالع امه ببراءة ما يفصل بين ويهه و ويهها شبر واحد وقال: ماما حبة ..
باست عيونه: عيوني وروحي وقلبي انت، ارحمني شوي ..
قال بحزن واهو يبرطم : ماااااااامااا !
قالت بتعب: يـاربي .. " وصرخت " حسيييييييييييييييين ! حسييييييييين !
وصله صوتها واهو يضحك: نعــم !
قالت بضيق وهي تمسح على شعر ولدها: الله يخليك تعال شيل ولدك .. هلكني السهر هاليومين، أبا ارتاح شوي حسوو فيني!
دخل حسين الحجرة وطالعهم، ومحمد كاتم على نفس منى ومتشبث فيها ويبوسها، تقدم حسين بابتسامة: صباح المنى يا منى ..
طالعته بابتسامة: صباح الحسن يا حسين ...
ضحك وقعد جنبهم وباس ولده وجبينها: نوم العوافي ...
ردت بكسل: يعافيك، بس ما شبعت .. بعد أبا انام، الله يخليك حساني خذ حمود ساعة أفتر فيه، أبا ارتاح شوي ..
مسك يدها: آسف حبيبتي .. كنت دايخ البارح من رحلتنا ويا الشباب، والا كنت سهررت بدالج على حمود
طالعته بنص عين: أي انت ما تقصر، طول عمرك تسهر عليه .. ممكن الحين تشيله وتطلع وياه بره ؟!
غمض عينه بقوة وقال: آخخ جرحتيني !
قالت باستدراك واهي تمثل: سلامتك سلامتك ...
قال محمد وأهو ضايع بالطوشة: بابا
رفعه أبوه وحضنه: يا عيون بابا، آمرني ..
قال بحزن: اعععي !
ضحكت منى ولفت للجانب الثاني وغطت روحها باللحاف: تصرف انت وولدك!
قال حسين بصدمة: حموود يالدب !! " والتفت لمنى وسحب اللحاف " منووي قومي .. لو شيصير ما اسبحه اناا
تغطت واهي تضحك: ولا انا ...
قال باستعطاف: منااااي حبيبي
قالت واهي تغمض عينها بقوة: لااااا تحاااول
قال بجدية: منووي ترى الوقت تأخر، أهلج بيجتمعون على الغدا، على الاقل تقومين الحين تجهزين نفسج وبعد الصلاة على طول نمشي .. مب عدلة نتأخر عليهم ...
قالت بيأس: انت مو حاس ... والله أحس راسي ثقيل وجسمي أثقل، مو قادرة أشيل روحي تعبانة وما ودي أقوم من لفراش ..
حط يده على جبينها: الله يعطيج العافية، بس يلاا عيوني اتحملي شوي .. هالايام مناسبات والتعب يزيد
قالت واهي شايلة بخاطرها: الله يرحم أيام اول، يوم حملت بحموود حطيتني بعيونك! ما تخليني اقوم امشي شبرين الا وانت ساندني! وهالفقير اللي ببطني الحين ماله رب! أسهر وأكرف وأمشي مسافات طويلة وأنت ولا على بالك! يرحم أيام الدلال والتدلع في الخطوبة! ايييه نسيينااااااهاا!
قال بابتسامة : افاا منااي شهالحجي ...
نزلت دمعة من زاوية عينها وابتسمت: احجي الصدق آناا يابة!
قال وويهه تجهم: يعني أنا تغيرت ؟!
طالعت عيونه بنظرة، وابتسمت له ابتسامة صادقة ... وقعدت وسحبت ولدها من عنده بلطف: يالله حمودي سبااحة
وقامت من مكانها، واهو مشى وراها لين ما وصلت الحمام .. شغلت الماي الساخن والبارد عشان يكون دافي، ولبين ما ينشحن الحوض غسلت ويها على عجل ...
قال حسين بهدوء: متى موعدج الياي ويا الدكتورة ؟
قالت واهي تفتح ازرة ثياب محمد: تاريخ 7 .. بيسمعوني دقات قلب الياهل ..
سكت واهو يحسب وبعدها قال: اممم اكون بالشغل .. بس بحاول أطلع عشان ايي معاج
ابتسمت في ويهه: مو مشكلة حبيبي، بروح مع علياء أختي ..
قال واهو يطالعها بانزعاج: انا قلت بييي معااج يعني بييي !
سكتت وراحت للماي واهي تتحسس برودته، قال وهو يتنهد: منى ..
قاطعته بهدوء: حسين خلني أسبح الياهل اول، لا تشغلني ...
سكت وابتسم بهدوء وما علق، واهي تدري انها غزّته بالحجي بس ما حبت تعتذر ... ابتسمت في ويه ولدها اللي يضحك ويحرك اياديه لها، قالت: بطل ولدي بطل .. نسوي ببح الحين، عشان تصير نظيف وحلو وقمر! ونروح لخيلانك .. اشتاقوا لك وانت اشتقت لهم صح ؟!
ابتسـم ابتسامة عريضة : يبببيي






وقفته واهي تسد اذاينه بأصابعها وتفرك الشامبو في شعره باليد الثانية واهي تغني عليه: صباحك ياعيوني صباحين، صباح الكحل بالعين .. صباح يطرد الفقر، صباحٍ يوفي الدين ... صباحك الصباحي، والورد والتفاحي ... وعوييينتك هالزيييينة سلاااابة الأرواحي، واللي ما يقولك مرحباااا .. ما عاش في بيته ربااا
" وقلبته على بطنه واهي تفرك رقبته: واللي ما يقولك عيني، يعمى بالـ 2 ثنتيني ، ويطلق أم عياله .. ويكثر عليه الدينِ !
كتف حسين ذراعينه عند صدره وسند راسه على الباب واهو مستانس يسمعها ويطالعهم، قالت منى: حمووود لا اتم ترشحني بالماي يالعفطي ..
واهو ولا على باله، يضرب باياديييه في الماي ويتطفر على ويها ... شالته من الماي بعد ما نظفته عن الصابون، وأخذت فوطته ونشفته ولملمته زيين و حضنته عندها: احح لا تبرررد حبيبي وتمرض لي مرة ثانية، " وباسته وسحبت خشمه " يسعد لي الصباح ياروحه انت، فديتك خوفتني عليك البارح ..
ابتسم حسين وهو يمد يده: عنج .. ييبيه أنا بلبسه، وانتي اسبحي ...
قالت بحنية واهي تربت على ظهر محمد: يلا عيوني، ألبس ثياب عشان تصير معرس " ومطت خده لما ضحك " معرس وليدي فديته معرررس ...
قال حسين واهو يطالعها بنظرة: بس محمد معرس ... حساني مو معرس
قالت بسخرية: ناوي على الثانية ؟
حسين: امممم افكر ..
هزت راسها : آهـا .. اووكي فكر فكر، لا خلصت تفكير خبرني ...
فتح عينه: شلة ؟
ابتسمت ابتسامة عريضة: عشان I will kill u
لمعت عينه: أهووون ؟
رفعت اكتافها: لا فكرت بوحدة غير مناتك، تهوون ليش ما تهووون .. " وطردته " يلاا لا يبرد ولدي روح لبسه بسرعة
طلع بولده وتم يلبسه ثيابه، قال محمد: بابا .. وين خالوو محمد
ابتسم : في بيتهم، بنروح لهم بعد شوي ...
محمد: ومريم بعد ويااه ؟!
عدل كلره: أي حبيبي .. مريم معاه .. وكرار الصغير بعد ..
ابتسم، وحمله على كتفه: يالله اوووبااا .. نروح لبابا عوود ويا عوودة، تعطييهم بووسة ماشي ؟
ابتسم: اووكي
طلع وياه من البيت، ودش في بيت أبوه اللي صاير في ظهر بيتهم، ومنى لما سبحت وطلعت ما لقت أحد ... قالت: اكييد راح بيت عمي ..
لبست ثياب يوم ثالث العيد، وقعدت تمشط شعرها ... ودخل حسين، التفت له وقالت: وين محمد ؟
حسين: اخذته أسيل ...
هزت راسها ورفعت شعرها بالكلبسة، واخذت السلسلة ولبستها ... تقرب منها وابتسم واهو يطالعها بالمنظرة، واهي ابتسمت ابتسامة خفيفة وكتمت نظراتها ... لمها وحط ذقنه على كتفها: حبيبي زعلاان مني ..
ابتسمت: من قال ؟
غمض عينه: ما اعرف، جيي حسيت اناا .. " وفتح عينه مرة ثانية " منااي تدرين اني احبج وما اقدر استغني عنج ؟
سكتت، قال بهمس: شفيج ؟ تشكين بكلامي ؟
ردت: لا .. بس أكره إبتعادك بهالطريقة عنا ..
طالع القرط اللي في اذنها وثبته أكثر: اممم مافي شي يبعدني عنكم، بس الشغل كان ضغط آخر الأيام، وانا ما اشتغل الا لكم ...
قالت باستدراك: لا تقول هالكلام لي لأن ما احبه، انا افضل انك تهتم بعايلتك ونتم نحرص على الفلوس أحسن من انك تريحنا من هالجانب .. وتتعبنا بالاحساس
طالع عيونها بالمنظرة: انا اتعبكم ؟ كبيرة هذي منااي .. ما ارضى بهالشي ...
قالت بحزن واهي تعقد حواجبها: ادري حسين .. عشان جيي انا انبهك، حتى محمد محتاج لك وايد هالفترة، انت حنون معاااه، وتحببه وما عندي شك بهالشي، بس ابيك تقعد معااه شوي، تلعب معاه تسولف وياه ... احس ان في فجوة كبيرة بينكم، وما ابا هالشي يستمر، اباه يتعلم من صغره يمشي مع أبوه مب مع أمه ... ما أبا يكبر ويصير عمره 4 سنين وأنا آخذه وياي في قعدات النسوان، أبيه يصير مع أبوه، يختلط في بيئة أبوه ومجتمعه، ويتعلم من الرياييل ..
ابتسم: حياتي الأمهات الجميلات اللي يفكرون بمصلحة عيالهم، بعد شنو ملاحظاتج علي ؟
قالت باحباط: تتمصخر ؟
قال بجد: والله ما اتمصخر ...
أخذت نفس: أبا أدور لي شغل ..
قال بسرعة: أنـسي " وغير الموضوع على طول " لا شرفت فطااامي إن شاء الله بالسلامة ... بنسافر كللنا انا وانتي وحمود
قالت بسخرية واهي تقاطعه: ما بنييب بنات
قال باصرار: البيبي الياي بنت! لاتحاولين!
ابتعدت عنه وطالعته: وانا اقول ولد .. وبنسميه علي بعد!
رد بنفس الاصرار: وانا اقول بنت! وبنسميها فاطِمة ..
منى: لا تحاول ...
قال باسلوب بارد: اممم تغارين ؟ تاخذ مكانتج بعدين
ضحكت بخفة: هيهيهي ما تنكت حبيبي! انت جرب تحبهم اكثر مني ... وجوف شبصير ..
قال بعناد: انا ابا اجوف شبصير ...
تأففت: انا اقول ولد يعني ولد!
حسين: لا حول! وانا قلت بنوتة يابنت الحلال وخلاص
قالت بضيق: اووه حسين .. الحين انا اللي بتعب وبسهر لو انت! انا قلت ولد!
ضحك عليها: هههههههههههههه جوفي جم سنة لنا واحنا ويا بعض ؟! قولي 7 سنين تقريباً ؟! في كل مرة تعصبين وتتنرفزين أحبج أكثر .. حسبيها !
ضحكت غصب عنها ورمت عليه المشط: سخيف حسين
ابتسم: مو أكثر سخافة منج حياتي
منى: ههههههه انزين شنو بتلبس اليوم ؟ عشان اطلع لك
هز كتفه: ما اعرف انتي اختاري لي
منى: ثوب اوكي ؟
حسين: اممم جينز احسن ! يمكن نلعب كررة
تأففت: ياحبكم لهسوالف! كانكم يهال، اسمدوا هالثياب والغسال على ظهري انا
فتح عينه: أي غسال الله يهديج! كله في جبد الغسالة!
طالعته بنظرة وضحك، واهي قالت: اكرهك اوكي ؟!
حسين: احبج اوكي ؟!
منى: مو اوكي .. متى بنمشي ؟!
طالع الساعة ورد: 12.30 احنا طالعين، ما تصير وحدة الا احنا بالمزرعة ... على فكرة علياء اتصلت
التفت له باهتمام: شقالت ؟
حسين: عن فساتين وبروفات ما ادري شنوو!
شهقت: امبيييه شلون راح عن بالي !
حسين: إلى زواج يزوي ؟!
هزت راسها واهي تروح للميز : ايي لازم نروح اليوم
قال بمكر: أي لوون
منى: ما اعلم هههههههههه
ضحك وياها، قال: مناي بتسوين لحموود عيد ميلاد؟
منى: في شهر ربيع عمتي بتسوي له ميلاد في الماتم لما يكمل سنتين بالهجرية، وعلياء تقول تبا اهي تتكفل بميلاده اللي بالميلادي
حسين: بعد ولدي محبوب من قده ...



=========







مسحت ويها بالكريم، وتكحلت وتأكدت من شكلها زين، ولبست عباتها، وشيلتها .. شالت تلفونها، وضغطت زر الاتصال على [ الحسناء ] ..
وتم يرن، واهي واقفة وتلبس نعلها الكعب والمبخر صوبها، وصلها صوت بنت عمتها: هلاااا علاية ..
قالت واهي ترفع المبخر عن الارض: مررحبا يزووي
يزوي: مراحب، شخباار
فتحت الباب بصعوبة واهي ميودة المبخر وطلعت: تمام الحمدلله، انتي شخبارش ؟
يزوي: اووكي ماشي .. وينج انتي ؟
سكرت باب غرفتها: انا في البيت، تجهزت وعلى وشك اني اطلع، انتي جاهزة ؟
يزوي: هيه وانطرج ..
علياء: عيل سكري واذا وصلت بطق هرن وطلعي ...
وسكرته، ونزلت الطابق الارضي، جافت جوااد قاعد بالصالة يشرب عصير، وعنده أوراق ويكتب فيهم، قالت: سلاام
رفع عينه ونزلها: عليكم السلام، على وين ؟
ردت واهي ترفع شنطتها على كتفها بعد ما نزلت المبخر على الطاولة: بطلع ويا يزوي، بنروح نجوف فستانها وانا بروح لفستاني، وبندخل جم محل ..
طالعها باهتمام وقال: اممم قولي ليزوي ابا اكلمها اذا تقدر تتصل فيني ...
رفعت حاجبها: وليش انت ما تتصل فيها ؟!
قال بضيق: اخاف اتصل لها واهي مشغولة بشي .. المهم انتي قولي لها وخلها تحاجيني .. ضروري سامعة
علياء: انزين اوكي، وبتروح المزرعة اولا ؟
طالعها واهو حاط القلم على شفته: اكييد بروح .. بس عاد ارمي علي سويج سيارتش
تخصرت: نعـم ؟ اقولك بروح اجوف فساتيني تقول سيارتي، لا حبيبي
رمى القلم عليها: اوقفي عدل لا اقوم لش، ناقصش انا تتخصرين لي، اطر من عندش انا !! الله لا يحوجني لش ... انقلعي
تقدمت له: اووف جوواد لا تخلي ضميري يأنبني، بس والله عندي مشاوير ضرورية ..
جواد: انزين روحي روحي!
علياء: انزيين قول لحسن وحسين اخذ سيارتهم، وخلهم يروحون وياك ...
قال بضيق واهو يرجع نظره للأوراق: الله لا يحوجني لكم، ييبي القلم لو سمحتين ؟
شالت القلم من على الارض، وراحت له وعطته اياه وقعدت جنبه وحطت يدها على كتفه: جواااد
قال بقهر: الله يحرق قلبه هاللي حرق السيارة مثل ما حرق قلبي ..
تنهدت: اففف خلاص انسى، في الحديد ولا في العبيد .. زين انت طلعت سالم بعد، ان شاء الله تتعوض !
صرخ: شنوو اتعوض !! والسيارة مب مأمنة وانا خسرت كلشي ! والقرض اللي ماخذه على ظهري! انتي بتسددينه حضرتش ؟! انا احاتي اقساط لو جمعيات لو اخطط ان اشتري سيارة يديدة!
قالت واهي محتارة: انزين جوااد .. صادق قال بيساعدك انت ما رضيت
طالعها بنظرة حارة: انتي ما تعرفين اخوش هذا، اذا اخذت من عنده، بيتم يمن علي ليييين ما يصير ويهي في حفرة قبر! انا اعرف صادق ... شقتي يوم بنيتها واهو ما طلع من مخباه شي ، بس طرشني لواحد من معارفه عشان يخفضني في الرخاام وللحين يذلني ... بعد تبين اتسلف من عنده !!
قالت بهدوء: انزين اني بحاول اخلص اشغالي بسرعة وبيي وبعطيك سيارتي .. وبكمل مشاويري مع يزوي بسيارتها!
جواد: وليش حضراتكم ما تروحون الحين بسيارتها ؟!
علياء: لان مو عندها ياجواد والله مو عندها! مدري من أخذها .. المهم اني بقوم عشان لا اتأخر عليها ... " وقبل لا تكمل رن تلفونها "
قالت علياء: هذي عمتي متصلة .. اني بحاول ارجع من وقت، وانت لا تبند تلفونك عشان اكلمك اوكي ؟
قال بهمس: اوكي " والتفت مرة ثانية " لا تنسين تقولين ليزوي تتصل فيني ..
هزت راسها واهي ترد: هلا عموو
وصلها صوت ريال: قلب ولد العمة انتي ... شحالج فديتج ؟
فتحت عينها على اقصاها، ولفت على جواد .. وطلعت بسرعة من البيت واهي تركض على العتبات، ووصلها صوته بسرعة: وييينج ؟
قالت بسرعة: سيف انت استخفيت !؟
سيف: شحالج ؟
علياء: مو زيينة من سمعت صوتك !! ليش متصل من تلفون عمتي ؟!
سيف: لان حضرتج اذا اتصل لج من رقمي ما تردين، يعني شتبيني اسوي !
علياء: سكر سكر !
سيف: علياء ابا اكلمج شوي ! حتى ما عايدت بج مثل الناس !
علياء: بتجوفني اليوم بالمزرعة وبتمل بعد ... " وضربت سلف بعد ما سخنت سيارتها "
سيف: انتي طالعة ؟
ردت واهي تريوس: ايي .. بطلع ويا يزوي بنروح نجوف الفساتين!
سيف: انزيين نزلي البيت ابا اجوفج
علياء: سيف لا يعني لا! انت تفهم الحجي اولا ؟!
سيف: ما افهم ...
علياء: لا تخليني اصير قليلة ذوق واسكره في ويهك ..
تنهد: انزين اوكي، بس طمنيني انتي بخير اولا ؟
ابتسمت: اني بخير وبعافية .. ارتحت الحين؟
سيف: شوي .. خالي اتصل اولا ؟
علياء: من اول امس وبس للحين ما اتصلوا، يمكن اليوم يتصلون
سيف: آهاا .. اوكي حبيبتي، تحملي بروحج لا تسوقين بسرعة !
علياء: ان شاء الله، فمان الله ..
سكرته وسوت مسكول ليزوي ودقت هرن، اللي طلعت واهي تركض، ولابسة بنفسجي، وشيلة بنفسجية فيها فصوص تلمع، ونظارة شمسية ..
دشت السيارة واهي تنافخ: السلام عليج
باستها علياء: عليكم السلام ... شفيش تنافخين ؟
ردت واهي ترمي شنطتها ورا : يوسف العيار لاحق وراي، يبا اشتري له الوان .. وانا مالي بارض لسوالفه، اقوله انت سير اشتر قال اهو متعاير .. وانا ماني فايجة
حركت علياء واهي تطالع الطريق: انزين الحين وين نروح اول ؟!
يزوي: محل الباقة ... ابا اضيف الخيوط الكريستالية فيها
قالت علياء بقهر: اففف انتي كل شي حزة الحزة! في وحدة عاقلة عرسها بعد كم يوم! توها تجهز باقتها!
قالت يزوي بنرفزة: علااية بلاج! اقوولج حاجزة من قبل بس بضيف فيها شي .. وبعدين وين منى ؟
علياء: نايمة حضرتها، قلت لريلها ان بمشي !
حطت يزوي يدها على فمها: امبييييه! جان مريتي عليها نجوف
علياء: آسفة ما اقدر انطر ! وراي حفاف، وراي حجز صالون، وراي اكسسوارات ما شريتها ..
يزوي: اففف عيل انا شسوي !
التفت لها: صحي نسيت اقولش، جوااد يقول اتصلي فيه يبيش ..
دق قلبها: شصاير ؟
رفعت كتفها: شدراني ! اتصلي فيه وجوفي ...
طلعت تلفونها واتصلت به، ورد بعد كم رنة: مرحبا ..
سكرت الدريشة: هلا جواد، شلونك ؟
وصله صوتها بانتباه: اهلا .. الحمدلله اوكي، وانتي ؟
يزوي: تمام .. مباركن عيدك
ابتسم: العايدين السعيدين ...
قالت بتساؤل: خير جواد ؟ علاية تقول تباني ؟!
سكت شوي ... بعدها قال بتردد: اممم سلطان نزل البحرين ؟
قالت باستغراب: هيه! من أمس اهو بالبحرين ...
سكت فترة قالت يزوي: جواد خير ؟
بلع ريقه وقال بتشجع: أبا أسألج .. لجين ما بتحضر زواجج ؟!
ردت بثقة: أكيد بتحضر !! مستحيل تخليني في فرحي اروحي
جواد: اممم متى بتنزل ؟!
قالت بحيرة: ما اعرف جواد !! انا قلت لها تتصل بسلطان واهو بيسير لها المطار ...
قال بخيبة: آهاا !!
قالت بهدوء: جواد انسى .. اعرفها زين انا !
جواد: ما كلمتيها موو ؟ وعدتيني انج تكلمينها
قالت بصدق: حاولت اكلمها جواد ما عطتني فرصة، اهي من تسمع اسمك تتركني وتمشي!! شقايل تباني اتفاهم وياها .. جوااد اهي ما تكن لك أي مشاعر ! لازم تفهم هالشي !
جواد: انزين على الاقل تعطيني فرصة!!
يزوي: فرصة شنو ؟ جواااد شبتسوي اكثر من اللي سويته ؟! انت سرت الإمارات بنفسك لأبوها واهي رفضت رفض قطعي ! يعني السالفة مو لعب مراهقات ولا قصة زعل! اهي فعلاً ما تفكر فيك ابداً !
تنهد وسكت ... قالت يزوي بهدوء: آسفة جواد بس حاولت اسوي شي يفيدك وما قدرت، وانا ما اقدر اجبرها، هذي حياتها ..
قال بهمس: خلاص اوكي .. يلا مع السلامة

[ دمعي على الخدّين من حرّتي يسـيل ، ما دمت رافض رغم حبّي سمـاعي
كـم قد سهرت لين ملّني الليل ، وأنت مصرّ تــكون سبّة ضيـــاعي ]

وسكره واهي التفت لعلياء بحيرة ! قالت علياء: عن لجين ؟
هزت يزوي راسها واهي تاخذ نفس وتدخل تلفونها بالشنطة، قالت علياء: مسكين جواد ...
يزوي: والله حاولت معاها! ماشي فايدة .. لجين اذا تصر على شي يعني مستحييييييل تغير رايها!! اهي من يوم يومها ما تشتهي جواد! شلون تتقبل فكرة انه يخطبها!
ضحكت علياء: الفضل يرجع لش الشيخة اليازية، محد زرع في قلبها الكره تجاه اخوي غيرش
قالت يزوي بضيق: وانا شدراني ان بيصير كل هاا !!
ربتت علياء على ركبتها: لا تحاتين .. كل واحد ما ياخذ الا نصيبه بهالدنيا ... بعدين جواد غلط، انا لو منها سويت أكثر !
سكتت يزوي، وعلياء قالت بتساؤل: اهي اكتشفت لعبته لو اهو قالها ؟!
قالت يزوي: مو اهي لما اكتشفت ان عازف الجيتار اهو جواد سوته بلوك ودليت بدون ما تخبره انها عرفته، اهو رجع ضافها وتهاوشت وياه!! عرف ان السالفة فيها ان .. سوّ لها خديعة وتعرف عليها على أساس انه بنت يعني واسمها زينب، وصاروا صديقات !! واهي تعلقت بهالصديقة واايد! وانا اكثر من مرة اقولها يا لولو لا توثقين بأي كاان! وانتي ما رمستي ويا هالبنت لا بالتيلفون ولا جفتيها ولاشي!! خصوصاً إن الشي كان بعد وفاة أمها الله يرحمها بمدة قصيرة، يعني اهي مب مركزة في الي يدور حواليها زيين .. وانا احذرها واهي ابد تسمع من اذن وتطلع من الثانية ... بعد سنة كاملة تصوري، يفاجئها ويقولها انا جذبت عليج وانا جوواد مب زينب ! وانا احبج وتم يخربط لها !!
ضحكت علياء: طوول عمرره جوواد يخبص يخبص ويخرب امووره بيده!


=========


[ يتبــع ]