[سكون الصمت]

بعـد أسابيع ... ،،،،،

طلعت من غرفة منى بعد ما يأست منها ... وراحت غرفتها واهي تحاتي ، يـاربي متى يرد حسين بالسلامة ونرتاح من هالهم .... طول هالفترة منى صابرة، الا اليوم ميتة من لصياح مو قادرة تسكت ...
طلعت من غرفتها لما حست روحها بتختنق ... مو عارفة تنام، ووراها باجر مدرسة ...
جافت محمد واصل الطابق الثاني، قالها باستغراب: للحين ما نمتين ؟ مدرسة باجر ؟! الساعة 3.30 الحين
قالت بحزن: مو عارفة انام ... ومنى كللش تعبانة
طالع تلفونه: قالت لي هدى ... للحين على نفس الحال ؟
هزت راسها: أي، ما تم احد ما راح لها، جواد وأبوي وأني وخطيبتك وجمانة مرت حميها بعد يت تزورها، واهي على نفس الحال ...
تنهد وعلياء قالت: باجر الصبح بسوونه عملية حق الغرغرينة واهي مصررة الا تبا تروح هناك ..
قال محمد: تروح ويا من الله يهديها ؟ اكا جوااد بروح ورد اتراجع لما حلفه حسين ان يقعد بالديرة، وخطيبها مفهمها هالشي ..
عليـاء: معورة قلبي، حاولت وياها شوي وتطلع روحي واني اهدي فيها، واهي تسكت ساكتة وترد ترجع تصيح ...
محمد: بروح لها بجوفها ...





ومشى عن أخته وراح غرفة منى ودق الباب على خفيف وفتحه، جافها على فراشها وساندة راسها على ركبتينها وتصيح بطريقة تقطع القلب ... قال باستغراب: منــى ؟! خيــة صلي على النبي ...
وراح قعد جنبها واهي رمت روحها بحضنه وتمت تصيح بشكل متواصل، قال بحزن: ذكري الله يا منى، لا تسوين بروحش جدي، اللي الله كاتبه بصير ......
قالت واهي تصيح: يبون يسوونه باجر عملية ... بموووت ابا اروح هنااك، ودووني له الله يخليكم !
حب راسها: وين نوديش الله يهديش ... انتين هدي بالش وذكري الله، مو زين اللي تسوينه في روحش ياختي، هذا قضاء وقدر ما نقدر نعترض عليه، بعدين هالدموع وش بتفيدش لو بتفيده ؟ بدل ما تقعدين وتفرشين سجادتش وتدعين له ذابحة روحش من الصياح ؟ الحين طول هالشهر من راح لليوم وانتين صابرة، واجوفش متماسكة وابتسم واقول انا افتخر باختي القوية الصبورة ... ومرة وحدة تنهارين، هذا امتحان يامنى لازم تصبرين
قالت واهي تشاهق: ما اقدر اصبر اكثر يا محمد، عيوني ما ذاقت النوم هاليومين، وقلبي يقرصني على طوول ... احس اني بستخف، ابا اجووفه واتطمن عليه ... خايفة محمد انيي خايفة خايفة " وزادت في الصياح "
محمد: خايفة من شنوو منووي ؟ كلشي بيد الله ، وانتين تقولين متوكلة على الله، شلون تخافين ؟!
تأوهت: ابا اكون وياه بهاللحظة .. اخاف يسوون فيه شي والا يغلطون بالدواا مثل ما سووا يوم ضربوه الابره وصار اللي صار
تنهد وهو يمسح على راسها: حبيبتي منى، ترى اللي تسويينه ما يرضي الله ولا رسوله ولا يرضي حسين ... الحين هلصياح ابا اعرف وش بفييدش يعني ؟!
سكتت واهو تم حاضنها يصلي على النبي ويقرأ المعوذات عليها لين ما هدأت تدريجياً .... ومحمد تنهد وقال واهو لازال حاضنها: ها ارتحتي شوي ؟
سكتت وما ردت عليه، طالع ويها اللي محمرر وقال: قومي اجوف تمسحي ... وقعدي على سجادتش ... قومي خية ..
ابتعدت عنه واهي تمسح دموعها واهو مسح ويها بابتسامة وقومها، وشد على عزيمتها وبعد ما غسلت ويها وتمسحت ... لبست حرام الصلاة وقعدت على السجادة مو عارفة شتسوي ...
قال محمد واهو يقعد جنبها : سمعيني منى ... اللي انتوو فيه الحين هذا بلاء ، والصبر على البلاء مافي مثل زينه ... الله سبحانه يقول [ وبشر الصابرين الذين إذا أصابتهم مصيبة قالوا إنا لله وإنا إليهِ راجعون ]
رددت الكلام بهمس وراه، واهو كمل: باقي ساعة ونص عن الاذان، صلي صلاة الليل واقرأي ادعية وتوسلي بالله ورسوله وأمير المؤنين والزهراء وأهل البيت كللهم ... تذكري اللي صار عليهم، اللي جرى على الزهراء من ظلم، اذكري مصيبتها خية تهون مصايبنا ... ذكري كربلاء واللي جرى فيها .. اتوسلي فيهم، أئمتش هذول وشفعائش إن شاء الله ... لا تيأسين وتقنطين من رحمة الله ، ترى هذا الشيطان الي يوسوس لش ...
رمشت بعينها إشارة على الطاعة واهو كمل: تذكري السيدة زينب ، جم شاب فقدت خية ؟ ومنوو فقدت ؟ الإمام الحسين عليه السلام ... ترى السيدة زينب ما عندها أعز من الحسين، أبداً ما عندها احد اعز منه .. ومع ذلك ليلة الوحشة ما تركت صلاة الليل واهي نااافلة موو صلاة واجبة ... انا اعرفش زيين، انتين عطوفة وحساسة لكن عندش إيمان وفكر واعي وتفهمين ... انتين لو بس تحطين كللل كللل إيمانش وجوارحش وخواطرش لله وأهل بيته مستحيل تخيبين ... عندش إيمان بهالشي اولا ؟
هزت راسها وهمست: بلى ... لعن الله الشاك ..
ابتسم وحب جبينها: هذي اختي اللي اعرفها، ما بطول عليش .. ذكري الله وتعبدي، انا في غرفتي ... أي شي تبينه تعالي لي، زيين ؟
ابتسمت: إن شاء الله ...

[ إلهـــــــــــي ، مَـــن لــي غيــــرك ؟ ]






طلع محمد من عندها بعد ما حس إنها هدأت، وقامت بروحها تصلي .... وتنهد من قلبه، يالله انك تسهل الامور ، جاف ليت غرفة علياء مولع، راح بطل عليها الباب ... وجافها تدرس قرآن، طالعته ابتسم لها واهي ابتسمت، قال بهمس: غفر الله لكم، ولا تنسينا من الدعاء ...
وطلع من حجرتها، واهي تمت تدرس ... لين ما أذن وصلت، وجهزت روحها للمدرسة ولبست ثيابها وتمددت شوي وغفت عينها بعد سهر طويل ....
وفزت من النوم فجأة وجافت الساعة وتخرعت لانها متأخرة ... قامت بسرعة غسلت ويها، وشالت شنطتها وطلعت واهي تركض وتعدل شيلتها .... وأول ما وصلت محطة الباص ... جافته ماشي عنها ... واهي انقهرت وضربت بريولها على الارض وتخصرت: صدق فاضي !
والتفت لوراها لما سمعت احد يقول : أي والله فاضي
جافت انوار صديقتها الي ضحكت: انتي بعد هرب عنش ؟
ضحكت علياء: سكتي ياية ركيض من بيتنا لهني واني حالتي حالة ولو احد جافني بيسويني مطنزة ... واول ما وصلت الا اهو راح ...
أنوار: ههههههه امشي نجووف اخووي الاهبل يوصلنا اولا ..
علياء: اوكي يلاا ...
رجعوا ثنتينهم، واهم بالطريق وقفت لهم سيارة ..... كان سيف اللي قال: صباح الخير ...
طالعته علياء بابتسامة: هلا صباح النور ..
سيف: شوو ما سرتي المدرسة ؟
طالعت محطة الباص وقالت بقهر: هرب عني في اللحظة الاخيرة ..
قال سيف واهو يحرك راسه: ركبوا أوصلكم على طريقي ...
طالعتها انوار منصدمة وعلياء قالت: لالا ما يحتاج، بنروح لأخوو صديقتي وبيودينا
قال سيف واهو يشيل الملفات اللي ورا ويرميهم تحت: ركبوا اوصلكم معاي، اكا ميثا وياي بعد ... يلاا لاتتأخرون
طالعوا بعض بتردد ، وبعدها كل وحدة فتحت باب وركبوا ، قالت ميثا اللي قاعدة جنب اخوها واهي تبتسم: هاي علاية !
ابتسمت علياء واهي تمد يدها: هلاا ميثاا ، شلونش ؟
هزت راسها: اوكي ، وانتي ؟
علياء: تمام ... ها شخبار الدراسة ؟
ابتسمت: اووكي ... منى بنت خالي شلونها ؟
ابتسمت علياء ابتسامة حزينة: الحمدلله ...
قال سيف واهو يطالعها من المنظرة : حسين متى يرجع ؟
علياء: ما ادري ...
رد سيف: يزوي احتمال هالاسبوع تنزل البحرين .. ومعاها لجين
قالت علياء بأسف: ايي قالت لي البارح ان لجين يمكن تنزل معاها، عشان تغير جو ... عورني قلبي يوم قالت إن امها توفت قبل لا توصل لها وما جافتها !
سيف: الحمدلله على كل حال، جفتي أخوي يوسف أمس يوم يحطونه في التلفزيون ؟
قالت علياء بحماس: ايييه جفته، وحطوا المعرض بعد، وصورة حنين ... عجييب كان اللقاء، ويوسف كاان رززة صراحة
طالعتها انوار بفشلة وهمست: يالهبلة، تحجي عدل ...
ضحكت علياء بعفوية وقالت بصوت عالي لسيف: مو قصدي بس صراحة كان انيق ومرتب ... الله يوفقه إن شاء الله
سيف: آمين يـارب ... يلاا عقبال ما يحطوني انا بعد بالجرايد بعدين تقولين عني رززة
قالت أنوار بهمس: طاحت الميانة خلاص
ضحكت علياء: ههههههههه الله يالثقة، وشنوو سالفتك انت تنحط بالجريدة ؟
ضحك سيف واهو يلف على الدوار : عشاني ولد التاجر حمدان، وقريباً رجل الأعمال المميز بعد
علياء: ههههههههههههههه آهاا ! زيين زين ... لا نادوك لا تنسى تخبرني، بييي اطخطخ معاك صوور ... بصفتي الانسانة اللي ساعدت على نجاحك
سيف: ههههههه ابد لا توصين بنت خالي ... اول وحدة .. " والتفت لأنوار ورجع نظره لعلياء " إلا ما تعرفنا على الاخت ؟
طالعته انوار بصدمة وقالت بخاطرها [ ويي !! بنت خالك وطيح الميانة وياها لين ما تشبع، اني وش لي خص ؟! ]
قالت علياء واهي تضحك على انوار الخجولة: صديقتي أنوار ..
هز سيف راسه: تشرفنا ... " والتفت لأخته ميثا واهو يوقف السيارة " يلاا انزلي .. ولا تركضين بسرعة ... ما نسيتي شي ؟
ميثا: لاا ... شكراً يلاا مع السلامة
هز راسه: الله يحفظج ...
قال سيف: الحين دليني عاد الطريق ما ادري وين مدرستج ...
علياء: اوكي انت اخذ يسار الحين وبعدين على طول كلله سيدة ...
سيف: اوكي ، سمعت خالي يقول إن محمد بيتزوج صدق ؟
علياء: ايي ... بسوي حفلة عائلية الشهر الياي إن شاء الله ..
سيف: الله يوفقه إن شاء الله، وحوراء بنت خالتج متى خطبتها ؟
علياء: ما ادري مو متأكدة ، بس كأنها قالت بالصيف ....
سكت سيف شوي وبعدها قال: بصراحة استغربت إن اهلها وافقوا ..
قالت علياء : كلنا استغربنا، بس هذا نصيبها، واهم شي السعادة ... الله له حكمة في الامور
قال سيف: صح .. أكمل بعد سيدة ؟
علياء: ايي بتييك لفة يمين اخذها بعد ...
طالع عيونها وقال: ما تيين بيتنا هالايام ... ليش ؟
قالت: من رجعت يزوي الامارات ما رحت بيت عمتي، وخبرك شهر رمضان وطبخ وشغل بالبيت، وأختي منى والدراسة ... كله متراكم على بعضه ...
سيف: ايييه افتقدنااج ... حتى ابوي يسأل عنج
ضحكت أنوار بخفة وعلياء طالعتها بنظرة استفهام، والاولى ما ردت عليها وصدت للدريشة وسكتت، وسيف قال: هذي المدرسة ؟
قالت علياء واهي تحط شنطتها على كتفها: ايي ... بس وقف هني ...
سيف: ما ادخل داخل الباركات ؟
علياء: لالا ما يحتاج، احنا ننزل هني .... ثانكس سيف
ابتسم: حاضرين ... جان تبين كل يوم اوصلج ويا ميثا ما عندي مانع
ضحكت أنوار بصوت عالي وطلعت من السيارة وعلياء قالت: هههههه تسلم ما تقصر ... يلاا باي
وسكرت الباب واهو تم يطالعها مبتسم .... هالعفوية والعنااد والجرأة اهو اللي عاجبني ..... !
مشى بالسيارة وطق لها هرن ورفع يده لها واهي لوحت له واهو مشى واهو يضحـــك : يييييييييييييييييييييس ! يسسسسسس يسسسسس يسسسسسس ! أحلى صباااااااااااااااااااااح وربي!

يمك ندق الروح يا بلسم الجروح فينا العشق مفضوح مثل المجانين
فيك القلب ذايب فوق الضلع كاتب ناسيني يالغايب لو تذكر شصار
محبوبي سميتك وبروحي ضميتك وبدمي خطيتك بضلوعي تذكار
من قلب مجمور ما يطفى لهيبه من محب ما نشف دموعه حبيبه

وانوار كانت تضحك وعلياء تفلص فيها: يالله على السخافة! حقوووي تضحكين انوار ؟
قالت انوار واهي مستمرة بالضحك: ههههههههههه اول مرة احسش بريئة علياء، شعوور حلوو لما تتحجين ويا واحد بكثل ثقة وبراءة وطهارة، واهو قصده شي غير ويطالعش بنظرات يـــــــــــــــا الله
فتحت علياء عينها: هيييييي وش تخرطين انتين ؟! شنو قصده غير ونظرات
أنوار: هههههههههه مو عشان جيي اقولش كنتي بريئة، عليــاء تعرفين حسيت ولد خالش واهو شاق حلقه شيبى يسوي ؟! حسيت ان من خاطره يطلع راسه من السيارة ويصارخ انه مستانس
علياء: روحي مناااك .... بتاااع روايات أحلام انتي
أنوار: اني بتاع روايات أحلاام ، اوكي ياعمري اوكي ...
سكتوا ، وبعدها قالت علياء بوجل وهمس: صدق يعني كان قصده مو شريف ؟
قالت أنوار بصدمة: شنو مو شريف انتي ؟
صححت علياء: اقصد يعني ان قصده غير عن قصدي ... ان مو عادي
قالت أنوار: بصراحة اني حسيت جيي والله ... ولا عااد يوم عدل المنظرة وحط عينه في عينش وقال : ما تييين الحين بيتنا ... ليش ؟
قالت علياء : وييع انتين بعد ... زرقاء اليمامة، راقبتين كل تحركاته
أنوار: هههههههه لاا والله بس هالحركة ركزت عليها بشكل لا ارادي ..
علياء: اغبياء احنا يوم نركب وياه، افففففف
أنوار: انزين الحين انتين شفيش متضايقة ؟
علياء: ما ادري بس اني قبل ما اتقبله، والحين يوم استحسنت شخصيته ما ابا يفكر فيني بشكل يتعدى اني بنت خاله، اني حابة علاقتي فيهم اهو واخووه .. يعني ان صايرين مثل اخواني ، ما ابا هالشي يتغير وتصير مشاكل وحزازيات
أنوار: أي مشاكل ؟! طنشي حبوبة طنشي
طالعتها بنص عين: اطنش وانتين مشغلة عينش ...
أنوار: هههههههههه لاتهتمين باللي قلته ...
علياء: افففففف أنوار ليش تقولين لي، اني اروح بيت عمتي واتونس بالسوالف وياهم من دون ما احط بالي لهشغلات، والحين انتي دخلتي الفكرة براسي عااد
أنوار: اوهوو لا تحسسيني بتأنيب الضمير ...
علياء: بس خلاص سكري السالفة، امشي بروح الحمام ..
ومشوا مع بعض للحمام، وعلياء فصخت شالها وسدلت شعرها على اكتافها وغسلت ويها وحطت لها كحل وطلعوا ... قالت أنوار: حقوي ساكتة ؟
علياء: ما عندي شي اقوله
قالت أنوار بضيق: ياربي علياء الحين بتمين اتفكرين بالسالفة !؟
عليـاء: لا والله ... بس افكر بمنى ، شاغلة بالي واايد ....
أنوار: الله يفرجها إن شاء الله ... أخوش جواد سافر اولا ؟
علياء: لاا ...
أنوار: صدق كأن عين وصابتكم، بيتكم كلله مصايب هدوويش
علياء: ههههههههه حال علينا النحس استغفر الله ...
وكملوا طريقهم للصف ، وحضروا الحصص كللها .... لين ما خلص الدوام .....
وعليـاء رجعت البيت، وجافت سيارة غريبة عند باب بيتهم ....
واقف جواد وياهم، ويطالعهم بصدمة ...
وقفت وقلبها يدق، وجافت ريال لابس ثوب ومتغطر ... ودققت في ملامحه، وحست انه يشبه [ حسين خطيب أختها ] ..
لكنه اقصر منه بشوي ، وبشرته حنطاوية ...

[ ضـروري ترفعونها وتسمعونهــا من هاللحظــة قبـل لا تقرأون المتبقي ]

=========


طالعته منصدمة ووقفت عيونها عليه .... واهو شتت نظراته على المكان اللي حوله، وخت راسها لأنها ما تقدر تتحمل تجوفه ... يعني الأمل ضاع !!
بتـرو .... !!! ما قدرت تكمل غصتها ..
واهو طالعها بخيبة، حطت يدها على ويها وصاحت ... ونظرته أنكسرت ، سمعت صوت أختها تهمس لها: منـى !
التفت لها جافتها وراها وعلياء علامات الإنكسار مثلها على ويها، ...
عليـاء: منـى !!
لفت مرة ثانية لوراها، وما جافت حسين ... انفجع قلبها، وين رااح ؟!
صرخت عليـاء: منـــى !!

فـــزززززززت مفزووووووووعة واهي تنتفض وعليـاء ماسكتنها ... قالت عليـاء بخوف: منى شفيش ؟ انتي تحلمين ... تسمعيني ؟!
كانت تتنفس بسرعة واهي تصيح خايفة وعلياء تهديها: منى اهدي انتين كنتي تحلمين ... طالعيني
طالعت حواليها بخوف، كانت في صالة بيتهم، متمددة على الكنبة ، وعليها لحاف ... متى نامت هني ما تدري ... شهقت لما حست بـيد علياء تمسح على ويها وفيها ماي بارد واهي تقول: اصحي شوي!
طالعت اختها واهي تقول: بسم الله الرحمن الرحيم، اللهم صلّ على محمد وآل محمد ... علياء كنت احلم؟! يعني مو صدق ؟
قالت علياء بحيرة: لاا منى مو صدق ... ارتاحي شوي ... اخذي نفس ...
تمت فترة قاعدة منزلة عينها وتفكر وتنفسها يهدأ تدريجيا، قالت بهمس: جفت كابوس ... قلبي عورني
علياء: بسم الله عليش .. اهدي، ما صار الا الخير ...
تمت ساكتة تفكر في الحلم، وعلياء قالت : شفيش ؟
وقفت واهي تنتفض: أبا أروح بيت عمي أجوف ... يمكن اهوو هنااك وما قال لي
يودتها علياء: منى ...






ومنى صاحت: عليـاء بمووت خلااص تعبت واني انطررر مو قادرة اصبررر ... " وقعدت على الكنبة وتمت تصيح " أحس قوتي خاررت ... مو قادرة اشيل نفسي
يودتها علياء: منووي استهدي بالله .. لا تصيحين، ما تعبتين وانتين من 3 أيام على هالحال، ترى والله بتموتين ...
ومنى ما ردت، حضنتها عليـاء ودمعت عينها، يـاربي صبرك ولطفك، ألطف في اختي وطلعنـا كللنا من هالمحنة ...
حست عليـاء بدخول أحد عند الباب، ولفت جافت جواد وويهه أحمر ، وشكله كان يصيح ... جمد جسمها وخافت، طالعت منى اللي مو دارية بالدنيا واهي تصيح ... خافت، يـارب !
قال جواد وصوته بايح: علياء دشي داخل ... في ضيوف يايين لمنى
رفعت منى راسها وطالعته بدهشة ... وعليـاء طالعته باستغراب وقامت بدون نقاش، ودخلت المطبخ اللي اهو اقرب مكان لها ...


وجواد قـال بهمس واهو يطالع الباب: حياك بو محمد ...
وقفت منى لا ارادياً واهي تطالع ناحية الباب وقلبهــــا يددددددددددق بعنـــفففف .....
وطل ويهه الصبوح قبالها ... بشعره الخفيف، وعينه الشهلاوية .. وإبتسامته العذبة .... وأهو لابس نفس الثياب اللي لبسهم صباحية العقد ، بـ نفس الوردة بيـده ... وريـوله [ السليمة ] !!! وإبتسـامته ونظرته اللي تلمس شي بداخلها ...

حبك ذبحني بسيف والحب فرض مو كيف، صرت أنت أول ضيف ، دلالي لقااك
يا شوقي وأحلامي ، يا جرحي وآلامي ، يا فرحة أيامي ، يا قرة العين ..
يالساكن أنفاسي، تذكرني لو ناسي، ما شيبت راسي .. شيبت لسنين
من غريب وعايش بدنيا غريبة، من محب ما نشف دموعه حبيبه ....

قال بصوت مخملي واهو يبتسم : قرت عينج بـ رجعتي ...
وعليـاء اللي كانت تطل من باب المطبخ شهقت وضحكت ودموع الفرح بعيونها ومنى واقفة منصدمة وتتنفس واهي تشهق وتحس روحها بتطلع من ضلوعها وبتفقد وعيها ومب قادرة تتوازن ...
تمت تحرك يدينها مرة على قلبها مرة على عينها مرة تمسح دمعتها مرة تبييي هوااا واهي تشهق ومب قادرة تصدق ...






مد يده لها واهو مختنق بدمعته: تعالي ..
حركت راسهـا بـ " لا " واهي مو مصدقة ... وركضت له وحضنته من رقبته واهي تصيح واهو حضنها ورفعها وداررر فيهـا واهو يضحك: وحشتيني يا أغلى ما عندي ... وحشتيني يا روح روحـي
وجواد تحررك من جنبهم واهو كاتم دموعه، ولما جاف علياء تطل من الباب راح لها واهو يضحك .. وحضنها واهي صاحت وياه .... أيـام وأسابيع مررررت صعبــة علييييييهم واهم يجوفون حالتها الصعبة ...

حــشى ، مـافي أحـد [ غيــرك ] ،،
يـردّ بـ صدري [ أنفــاسه ] ... !*

* منقـول ..

ومنى كانت تصيح وتصيح وتصيييح ومب قادرررة تسكت ومتشبثة فيه بأقوى قوتها واهو لامنها: بس حبيبتي لا تبجيين ... دمووعج غالية، الله يخليج لا تبجين ...


قالت واهي تصيح: قول انه مو حلم الله يخلييك قول انه مو حلم
حسين: وراسج الغالي هذا اناا ... بس منى لا تصيحين ...
ردت وقلبها يررقع: تعبــت من دوونك .. تعبـــت واايد
شد عليها واهو مبتسم: خلاص إنتهى كل التعب ... أرتاااحي
انخفض صوتها ودموعها لازالت تطيح واهي مب راضية تتركه: لا تخليني بروحي مرة ثانية ... صدقني أمووت ... جان لقيتني هالمرة انطرك، المرة الياية بتلقاني في تابوتي
رد بحب: بسم الله عليج، خلااص بعد مافي سفر إن شاء الله من يوم ورايح، الله لايحوجنا ...
ابتعدت عنه واهو ماسك يدينها، قالت: انت الحين بخير ؟
حسين: بألف ألف خير ، ولأني جفتج بمليون خير .....
استندت عليه: آآآه آآه
حسين: سلامتج من الآه ... لا تتأوهين جيي ، تعورين قلبي ...
ابتسمت: ماني مصدقة والله ...
ابتسم: اقرصج عشان تصدقين ؟! " وقرص يدها بقووة واهي تألمت وضحكت من بين دموعها : هههههههههههههه يعوور
مسح دموعها: خلاص صحتي بمافيه الكفاية، ما ابا اجووف دموع فاهمة؟
منى: إن شاء الله .... " وإبتسـمت بمحبة الحمدلله على سلامتك ....
حسين: الله يسلمج يالغلا ..
تلفتت حوالينها تدور جواد وعليـاء مالقتهم، قال حسين واهو يطالعها بنظرة: هااا ؟! تدورين على غيري وانا هني ؟!
ابتسمت له بحب وضحكت بخفة: لااا .. بس اتأكد إن محد يسمعني غيرك لما أقول [ أحبـك ] !

" أصلاً اني سمعت ! "


[ ~ كُـل المُنى أنـتم ~ ] !






** التصميم منقول ،

==========


[ و النهـائيـات قــادمة ]