[سكون الصمت]

بحاول أوصف احساسي تجاهك وانثر الامطار
بحاول.. بس يا الغالي شعوري صعب تفسيره

انا من يومني بنت(ن) صغيره والقلوب كبار
بلاني ربي بحبك , وعشت بعالم الحيره

أنا من يومني طفله وانا لي بالهوى تذكار
عشقتك من صغر سني , يا زين الوصف والسيره

صحيح اني صغيره حيل , ومن حولي بنات صغار
صحيح همومنا لعبه , وكل أحلامنا صغيره

طموح البنت في عمري , عروسه ولعبة استشوار
وانا كل اهتماماتي , عيونك ياضيا الديره*

* منقول ،


(( حنـين .. 10.03 مسـاءً ))

طالعت ميثا بغضب: ما ابغى اطالع توم وجيري، ودي الحلقة
ميثا: ماني، انا ابا اجوف هالحلقة
حنين: تدرين انش ياهلة وهبلة ؟ الحين انتي كبيرة، وللحين تطالعين رسوم!
ميثا: حاسبي يالكبيرة انتي!
حنين: اني صغيرة بس اعقل منش يالهبلة ..
ميثا: اوهوو سيري بيتكم انتي
حنين: بشتكي عليش عن عمتي
ميثا: اوكي سيري يالفتانة ..
قالت حنين بقهر: مالت عليش ..
طالعها ناصر: قومي نروح بررره نلعب كررة
قالت بحنق: انت بعد روح، كلكم تمللون ! كله يبغى يلعب وبس!
ناصر: انزين ليش معصبة، ما قلت شي انا !
حنين: ما ابا العب وياك زين ؟ تمللت منك! امي ما ترضى العب ويا صبيان، اني كبرت! اني البس حجاب .. يعني روح العب ويا ربعك، ما يخصك فيني زين ؟
قال ناصر بقهر: ذلفي .. يزات الخير سواد الويه، الحين انا اللي لازم اقول هالكلام مب انتي، لكن الشره علي انا اللي احاسب لج!
طالعته بدهشة: حقوي تصارخ وتحاجيني جدي ؟!
مشى عنها من دون ما يعطيها ويه، واهي انقهرت وراحت ليوسف اللي كان قاعد بره ويا اخته يزوي ...
سمعته يقول: انا قلت أكلم ابوي واجوف ..






راحت وقالت واهي زعلانة: يوسف جووف شيقولون لي ؟!
حضنها من خصرها وحطها على ريوله: حبيبتي شيقولون لها ؟
ردت بضيق: ميثا تقول لي روحي بيتكم، وناصر يقول لي دلفي !
فتح عينه: اهم قالوا جيي ؟
هزت راسها : والله والله .. وميثا تقول اني فتانة ...
ردت يزوي: واهي صادقة، لو منتي فتانة ما ييتي ونقلتي الجريدة يا السي ان ان
طالعها يوسف: حدددج عااد ... هذي الغالية انا ما ارضى عليها ..
تعلقت برقبته وطالعت يزوي واهي تحرك حاجبها على فوق، قالت يزوي: حاسبي لا ينط عرقج ام عيوون الخضران ..
ضحك يوسف: قولي لها احلى مننج ، وانا قمرر
حنين: اي احلى منج ، وقمررر بعد
يزوي: اوكي باجرر ... " ولفت لأخوها مرة ثانية " ليش ما تدرس بالجامعة ؟!
يوسف وهو يبتسم في ويه حنين : ما ادري بس ما افكر بالدراسة ...
يزوي: وشنو بتستفيد لو دشيت الشرطة !؟
طالعها واهو يتنهد: يزوي عااد ما ادري لا اتمين تنقين
يزوي: لازم تحدد شوو راح تسوي بحياتك! مو معقولة تتم على هاللوحات وهالالوان
يوسف بعد ما نزل حنين على الارض والتفت لـ لوحته مرة ثانية: شو فيهم هاللوحات ؟ ع راسج محطوطين ؟
يزوي: اجوف طالت وتشمخت، صرت تطول لسانك وتتملل منا بعد
ضحك: انتي بليس يالس في راسج، حنين جوفي رسمتي ...
طلت حنين براسها له وطالعت الصورة، كانت صورة ريال، متوسط العمر، قالت بتساؤل: هذا من ؟






ابتسم لها: هذا مارسيل خليفة
قالت يزوي واهي تقاطعه: يساف شو رايك تخطب ..
طالعها بنظرة: وانتو ما عنكم سالفة غير هالسالفة !؟ ما نلحق نوصل العشرين قلتوا عرس وبطيخ! اماية تبا تعرس سيفان من صوب وانتي ياية منحدة علي، ابووية خلج بحالج، انا ما بعرس الا بعدج، زيين جيي ؟
يزوي: عافانا الله من هالنفس، تقول جبريت، ما الحق اقول كلمة بلعتني بقشوري ...
رد واهو يكتب اسمه تحت اللوحة: لانج ما تنعطين ويه، وتحبين الأسئلة أكثر من اللازم ...
فتحت عينها: انت بلاك علي اليوم ؟! انا ما عمري رمستك ورديت علي بهالطريقة! قلنا عايش حياتك الحين عااد لا تغتر وترفع خشمك علينا ! تراني اختك
ابتسم في ويها: انزين حقج علي، بس يزوي والله ما عندي اجوبة لأسألتج، انا بعدي ما خططت ولا فكرت شبسوي ... المهم ان امي مرتاحة ومستانسة بجوفتي، وهذا الاهم من كلشي
يزوي: ماما تبا تفتخر فيك و
قاطعها: يزوي بس عااد ... والله ترستي راسي من المغرب للحين ..
يزوي: مالت عليك، بسير لسيفان ...
همس يوسف: الله يعيينه عيل
التفت له: سمعتك .. سخيف واحد
ضحك بصوت عالي، وتم ويا حنين يسولف، ويزوي راحت لسيف اللي كان يذاكر في غرفته ... وقطعت عليه مثابرته لأن أبوها راح مجلس قرآن .....
دخلت الغرفة بدون ما تدق الباب وطالعته: مساك الله بالخير ...
طالعها بنظرة: مساء النور ...
مشيت وقعدت على الكرسي: شو تسوي ؟
سيف: انتي شو تشوفين ؟
طلت براسها على الكتاب اللي عنده: ما شـاء الله تدرس .. " وسحبت الكتاب " شوو هاا ؟
رجع سحبه من عندها: ييبيييه اجووف ، بلاااج داشة علي تقولين اعصار ؟!
يزوي: شوو سويت ؟ " ورجعت سحبت لكتاب " اجووف شوو هاا بقرأ
رجع سحبه: اقوولج رديييه ... شوو هالفضول ؟
طالعته واهي تفتح عينها: بلااك ، انا بس بقرأ !
سيف: وانا ما ابيج تقرين ...
قالت واهي تكسر حاجبها: افااا اخووي .. مالي خاطر عندك وانا اللي كنت متغربة عنكم ومتولهة عليكم ؟
سيف: لا تحاولين انج تكسرين خاطري ..
يزوي: انا بالفعل يالسة اسووي هاا الشي ... سيفااان الله يخليك، والي يسلم عمررك عطني اقرأ ..
طالعها بتردد واهي تطالعه بحنية، وعطاها الكتاب: هااج عن لا تصيحين ..
ضحكت وطالعت الكتاب واهي تقرأ بصوت عالي :

في مدرستي عجزت أفهم دروسي والبلا أفكار
أفكر فيك يا خلي .. وزاد الشوق تفكيره ...
أنا ما همني درسي .. ولا هموني الشطار
تجاهلت الفصل كله .. عباراته .. طباشيره ..
كتبت اسمك على هاك الدفاتر يالغلا تكرار
رسمت قلوب ورديه , سكنها انت , من غيره ؟
الا ياليتني رجل(ن) , يعرف ينظم الاشعار
يمين الله لأكتب لك قصايد تفضح الغيره ..
كبرت اليوم يا الغالي وزاد بقلبي الاصرار
على حبك , وحب اللي يحبك فاق تعبيره !
جذبت عيوني الثنتين , الا يا ملفت الانظار
سكنت حدود نبضاتي , بدون اجراء تأشيره ..
فداك اللي تبي آمر , تمنّى يالغلا واختار
لو انك تطلب عيوني , لأقول ان العمى خيره !
جميع اللي تبي حاصل , حشى ما أنطق الاعذار
ولو يتعذر قليبي , حشى مااقبل معاذيره ..
تأشرّ باصبعك للشيء , تلقى مطلبك قد صار
فخوره لو أجيبه لك يا سيد القلب يا أميره ..
تبعثرني هموم البعد , وتبحر بي كما البحار
غزاني موج بُعد الخل , ولا وضح لي تبريره ..
متى ألقى مراسي اليم , وتلطف فيني الاقدار
الا يا بختي بشوفه , الا ياليتنا جيره
انا من لامني بحبك , عساه لقصرة الاعمار
تلوموني على شخص(ن) , حلاه احلى من الشيره ؟
قالوا لي تحبهــا ؟ وقلت ان الحروف كثار
أحبه واعشقه واهواه, ولا أرضى بتغييره
شجاع , بس لا شفتك , كياني يا بعدي ينهار
قوي , لكن قبالك , شعوري صعب تظهيره
عيونك يا بعد كلي , تهز الفارس المغوار
شموخك مفخره للعز , يذكرني بأساطيره !
الى مني تباطيتك , تولّع في حشاي النار
تزوّد جرعة الاحزان , تزيد القلب تخديره !
واذا يا عيني لاقيتك , يثور بداخلي اعصار
أطير بعالم الفرحه , تقيّدني اساويره
لو انك تدري بحبك , كم له داخلي مقدار
يطير العقل يا خلي , كأنك شاربن بيره !*

* منقول ..


طالعته بعين مفتوحة: الله الله الله ، اقنعني انك انت الكاتب ؟
طالعها بلامبالاة: مب لازم تقتنعين ..
ردت بدهشة: يعني انت كاتب ؟
قال بتوتر: امممم يلوع الجبد ؟
هزت راسها: أكثـر من فضيع !! احلف انت كاتب ؟
طالعها بنظرة وما رد، قالت بتبرير: اووه والله مصدقة بس يعني مدري!! من متى وانت تكتب ؟
سيف: ما اكتب .. بس الحين ياا على بالي وتميت اخربش
يزوي: ههههههههههه حلوة هاي ، اذا جييي وتخربش، لا كتبت صدق شوو يصير ؟
سيف: عن جد حلوو
طالعت لكتاب: هيه والله سيفان ، رووووعة ... شاعررري حدك اخوي ، من سعيدة الحظ ؟
توتر: محد .. مجرد قصيدة
طالعته بنظرة: اهااا اهني عاااد وصلنـا وعينا خير ... يالله طلع المستخبي حبيبي ... لمنووو هالكلمات الحلوة ؟
سيف: قلت لج !
يزوي: يعني بتقنعني انك تركت الدراسة ، وع قولتك " وكملت وإهي تقرأ "
كتبت اسمك على هاك الدفاتر يالغلا تكرار
رسمت قلوب ورديه , سكنها انت , من غيره ؟
وكل هذااا ومجرد قصيدة ؟
سحب الكتاب من عندها: انا قايل ما اباج تقرأينها لانج بتسوين لي سالفة وبتألفين قصص ..
يزوي: واللهِ وبكسر الهاااااءِ ... انتو يا عيال حمداان منتو بـ هينين، كل وااحد منكم مخبي بقلبه وساكت ... لكن وين تروحون مني ؟ انا بعرف يعني بعرف!
سيف: ظهري بره ..
فتحت عينها: شوووو ؟
سيف: قلت ظهري بره ! go out ! اطلعي ! بـــ رّ ة !! تفهمين ؟
طالعته واهي مبرطمة: افاااا ... عن جد بشيل في خاطري وبسير .. " وقامت "
واهو قال: يزووي انا بعد تولهت عليج، بس عن جد وراي دراسة ما اقدر أأجل أكثر عسب لا يتراكم علي
هزت راسها: آهااا ... لأختك ما عندك مجال، بس لهذي اللي ما ادري منوو ، عندك وقت تنظم لها اشعار ؟ اوووكي اخووي ! معليش .. خذ راحتك حبيبي والله يوفقك ... يلاا سلااام ..
وطلعت عنه ... واهي شايلة بخاطرها من قلب .... وراحت الصالة وتمت قاعدة تتأفف ، تنطر ابوها لين ما يرد علشان تقعد وياه ويسولف وياها ...

شوق كانت قاعدة في غرفة أمها ومتمددة وراسها على ريول أمها، ونرجس تلعب بشعرها وتمسح على جبينها بحنية، قالت شوق بهمس: شلون بربيه ماما ؟ شلون بقدر اوفق بين كل مسؤولياتي ؟
ابتسمت نرجس: انا بساعدج ..
شوق: بتساعدني اول شهر ؟ شهرين ؟! وبعدين .. شلون بسهر معاه بالليل، شلون بعلمه وبفهمه الحياة، شلون بتصرف معاه وبربيه ! انا خايفة وايد
نرجس: حبيبتي بتم وياج على طول، ما بودرج ... حتى بربيه أكثر من ما أنتي تربينه، يقولون ما اعز من الولد، إلا ولد الولد ...
ابتسمت شوق ورصت على يدها وباستها: الله يحفظج لي ... أنا بدونج ما أسوي شي ماما، أحبج وايد ...
ابتسمت نرجس: انا يوم عرفت ان عندي توأم، خفت أكثر منج، واستوت عندي منااحة شكبرها ... لكن الله سهل علي الأمور، وأبوكم ما تركني ... ساعدني في تربيتكم وهذا الشي اللي ريحني ..
شوق: اخاف أسامة ما يكون قد المسؤولية، اخاف يفرح الحين ولا ياا الولد يتضايق منه ..
نرجس: ماشي حد يتضايق من عياله
شوق: ماما التربية صعبة، انا يوم كنت أجوفج تربين أخوي ناصر كنت أحسج شلون تعانين معاه ....
ابتسمت امها: حبيبتي مافي شي ايي بسهولة، وانتي لا اتمين تفكرين وايد وتوسوسين، توكلي على الله واهو بييسر أمورج ... لا تميتي تحللين وتفكرين وايد بتتعبين ...
شوق: ما ابا انصدم بعدين بالمسؤولية، انا لازم اتهيأ ..
نرجس: تهيأي بطريقة صح ... انتي الحين لازم تتقربين من ربج، تقرأين قرآن على طول، وتحافظين على بيتج زين، وتكون علاقتج بريلج أحسن عن قبل .. لازم تتهيئون للطفل ...
سكتت وما تكلمت، سألت نرجس: حبيبتي أسامة يقصر معاج ؟
قالت شوق : لا ماما، بالعكس ... رغم كل شي ورغم ضغوطه آخر فترة كان وايد زين وياي، اللي يزعجني بس سهره بره البيت ويا الشباب ..
نرجس: بعد هو ريال يابنتي، لازم يبا يستانس
شوق: ادري، بس انا اخاف اتم بالشقة اروحي، واهو ما يخليني ايي هني على كيفي، بس ان من عرف نتيجة الحمل واهو مستانس وما يبا يرد لي طلب ...
نرجس: وعمج وعمتج شلونهم ؟
تنهدت شوق: شقول ماما .. عمتي زينة وياي، وساعات احسها احسن من قبل، بس عمي يقهر ...
نرجس: ليش يضايقج ؟
شوق: مب بشكل مباشر، بس ان وايد يضايق اسامة وهالشي يضايقني، على طول احسه يبا يستصغره ويبا يحسسه انه تافه وماعنده شي مميز بحياته ... يقهرني اذا يصارخ عليه كانه ياهل، وأسامة ما يحب يرد لأبوه طلب! لو يقوله ارمى نفسك بالنار يرمي نفسه، احس شخصيته ضعيفة قدام أبوه ..
نرجس: هذا مب ضعف، هذا احترام وتقدير ...
شوق: ولو، بعد مب من حقه ان يسويي جيي، أسامة ريال ومافي على اخلاقه ورزته، والكل ما يتكلم عنه الا بالخير، والحين اهو متزوجني وعنده بيت وأسرة، مو عدلة من أبوه إن يتحكم فيه على كيفه ..
نرجس: كيف يعني يتحكم فيه ؟
شوق: وايد اوقات بنطلع انا وياه فيها السوق، يقوله لاا روح اشتر اغراض جيي ! او ان هالمنطقة فيها شغب او شيي ولا تسير لها!
نرجس: يا يمة هذا من خوفه عليه، وبعدين الريال اذا مافيه خير ويا هله مافيه خير ويا الناس ... ودامه متحمل اهله اكيد بيتحملج انتي بعد، بالعكس لازم تستانسين، ولا تتذمرين
شوق: ما اعرف اشرح ماما، بس صدقيني يمكن انتي اشياء تحسينها عادية، انا اتضايق منها ...
نرجس: لا تستوين نزرة وما تحبين الخير للناس، سألي أبوج كيف كنت أحاول اقرربه من اهله، أبوج كاانت علاقته سيئة ويا عمومج قبل لا اخذه ... ومن يوم استقرينا بالامارات والاوضاع تحسنت بوايد، كنت اتزاور وياهم، واختلط في مناسباتهم، وانا بغربة وعاداتهم كانت مختلفة شوي عن عاداتي وتقاليدي، وكلامهم، وأساليبهم ونظرتهم للأمور، ومع ذلك كنت على طول وياهم، واللي ذمني قبل لا يعرفني واللي عارض زواجنا انا وابوج، كللهم غيروا رايهم بعدين ... واشهدوا ان حمدان عرف يختار، انا ما اقولج هالكلام عسب اني افتخر بنفسي، بس الريال ألزم ما عليه اهله، لا تقولين هالكلام قباله وتبعدينه عن اهله .. تكسبين ذنوب
شوق: لا ماما والله ما ارمس قباله، ولا أطلع اللي بخاطري، بس عشاني معااج اقولج، وانا ما اخبي عنج شي ... حتى لو تصبرت يمة، لازم احس ان ابا افضفض ... يمكن كلامج اللي قلتيه صح، وانا بحاول إن اجوفهم بنظرة إيجابية أكثر ... أنا الحين ارتبط فيهم أكثر من قبل ، " وسكتت وتنفست " ولدي اللي بداخلي اهو ولدهم ..!
التفت نرجس للباب لما سمعته يدق، وجافت يزوي اللي طلت: هااي سوري قطعت عليكم
ابتسمت امها: لا حبيبتي كنا نسولف عن ولد اختج، تعالي ..
قالت يزوي بحماس: يايييي ! شعور جميل وانا اسمع كلمة ولد اختج، يلا شوقااان خل الشهور بسرعة تمر وييبيه في السابع
فتحت امها عينها: فال الله ولا فالج، عن الخبال شو هالرمسة
ضحكت يزوي: امزح، انزين ياحلوة يا امورة انتي يا جميلة يا ام الطفل الجميل ... ريلج برره
ضحكت شوق وقعدت: اسامة هني ؟
يزوي: مثلاً عندج ريل غيره ؟
شوق: ههههههه سخيفة يزوي !
يزوي: شو دراني فيج، اقولج ريلج بره تسأليني اسامة هني ؟! يعني سخافة صراحة ..
التفت لأمها وقالت بزعل: جفتي ماما ؟! انا سخيفة ؟!
ابتسمت نرجس: لا ، ما عليج منها .. سيري حبيبتي جوفي زوجج
قالت يزوي: يـا الله! وين الحنية ؟! ناس وناس ... " وراحت حطت راسها في حضن أمها " تراني انا بعد كنت بعييدة وتوني يايتكم، صبي علي شوي من هالحنان اللي تعطينها اياه
نرجس: هههههههه صرتي تغارين بعد ؟
رمشت بعينها واهي تبتسم: تربيتج ماماتي ...
ابتسمت: قولي لي عن اخبارج، شتسوين بالامارات ؟
أخذت نفس: من وين أبدأ يـاربي ؟ أسير بيت عمومي، كل يوم بيت عم، ويتيمعون بنات اعمامي كلهم شرات قبل، لجين كل يوم تمرني البيت، ونسير ونرد من الجامعة سواا ، ونسير السوق مع بعض، اهي الحين تتدرب سياقة، واممم تحاول توصل لأمها في بريطانيا!
نرجس: أمها ؟
يزوي: هيه ... ووصلت لعنوان بيتها ، لكن اظاهر انها انتقلت، والحين تحاول توصل لها مرة ثانية !
قالت نرجس بقلب صافي: الله يجمعهم إن شاء الله، الله يهديه بو راشد، اكبر غلط إنه بعد البنت عن أمها
قالت يزوي: ماما لو لجين ما عاشت ويا عمو بو راشد جاان الحين اهي مب بهالحال! ولاهي مسلمة ولاشي
قالت نرجس بهداوة: يابنتي ما قصدت ان يترك لها الحضانة، بس انا اقول جان ما منع الزيارة عنها، تراها امها وقطعة منها، ومحد يحس باحساس الام اللا اللي عاشه ...
يزوي وقلبها يدق: اتمنى ان تلتقي فيها، لولو واايد متحمسة، وانا شايلة همها واايد ... " وكتمت غصتها "
نرجس: هالبنت والله ماشي شراتها، أخلاق وطيب وذرابة ... الله يحفظها
ابتسمت يزوي: آمين، ماماتي
نرجس: نعم حبيبتي
ردت بحذر: باباتي تكلم عن شي ؟ اقصد عن سيرتنا بيت خالي ؟
نرجس: اهو كلمج ؟
ردت بسرعة: لاا ، بس اقصد معاج ؟
قالت بهدوء: لاا ... بس حسيته يبا يفتح الموضوع
ردت يزوي بهمس: ماما خايفة، ما ابا تصير مشاكل بسببي، والله ما رحت بيت خالي الا عشان بنات خالي !
ابتسمت نرجس: انا وابوج نعرف هالشي .... وما اعتقد ان عنده شك ..
تنهدت: بالعكس، احسسه تحسس وااااااااايد لما رحنا، وخصوصاً لما جفنا اولاد خالي عند الباب قبل ما ندش " قالتها باسلوب جمع عشان لا تذكر اسمه "
ردت نرجس: شقولج يابنتي، انا ما اباج تدخلين براسج افكار، انا اقدر اتفاهم ويا ابوج عن هالسالفة
يزوي: بس اهي تخصني انا، اقصد يعني لولاي ما فكر فيها، ماما اقولها لج بصراحة انا شلت ولد خالي من راسي، خلاص ما ابا افكر زوود ولا ابا اذكر شي ولاشي! السفر وااايد يريحني ... وخلاني أنسى اشياء كنت أتمنى أمحيها، او خلني اكون مصداقية اكثر، مب انساها، بس على الاقل اتعايش بدون ما افكر فيها وايد ....
ابتسمت نرجس: ريحتيني يوم قلتي هالكلام
ابتسمت براحة: عن جد ماما ؟
قالت واهي تحرك اصابعها في شعرها اللي منسدل على الفراش بطوووله ونعومته: أي حبيبتي، ما اباج تفكرين بشي ثاني غير دراستج الحين .... ترفعين راسنا
يزوي: إن شاء الله يمة ، أحاول أسوي قد اللي اقدر عليه ...
ابتسمت: متى بتردين الامارات مرة ثانية ؟
قالت باحباط: شو ماما مليتي مني ؟
ضحكت بخفة: لا حبيبتي، شوو امل منج ؟ بس انا احاتي دراستج بعد
يزوي: ليلة الاحد برجع .. طيارتي 1 بالليل
قالت بوجل: ليش مختارة هالوقت يمة، صعب عليج نص الليل
يزوي: عادي مب صعب، بابا يقول يمكن يسير وياي اذا لقى حجز ..
قالت أمها بحنين: والله بيني وبينج يابنتي، انا بعد تولهت على الامارات، وودي أسير وأسلم على الأهل كللهم وصديقاتي .... بس دام شوقان حامل، ما اقدر اترك الديرة شبر وهيه هني ... قلبي ما يطاوعني ..
يزوي: اللااااااااي كل ما اذكر هالسالفة اتونس ماما ! اطير اطير من الفرح ... شعور حدده حلوو ! بيصير عندي ولد اخت ويناديني خالة! يـــــــــــــــــــــــــالله
نرجس: ههههههه عيل انا شووو اللي عيّزت وبصير يدّة !؟ بس ادعي إن الله يثبته لها ويعطيهم الصحة والعافية وتتيسر الأمور ....

=========


(( مـنى ... 7.30 مسـاءً ))






تبعته واهو يمشي رايح ياخذ بوكه وقالت برجاء: الله يخليك خذني معااك ... ما راح اضايقك ولا اصيح ولا
قاطعها واهو قلبه يعوره: منى قلت لااااااا يعني لاا! بعدين خلااص انا بعد دقايق بمشي، هالكلام ما يفيد
طالعته بانكسار واهي تمسك ذراعه: حسين ما اقدر اقعد هني، الله يخليك افهمني
حسين: وانا ما اقدر اخذج معاي، بتميين هني وبتحافظين على دراستج وتكونين قوية
صرخت واهي تبتعد عنه والعناد ركب راسها: ما اباااا ادرس ولا بروح الجامعة وما راح اكل ولا اشرب ولاااااشي زييييييين ؟
طالعها بقلة حيلة: مناي سمعي الكلام
قعدت على فراشها واهي تكتم كل مشاعرها: مو على كيفكم
قاطعها بهمس: تكسرين اللي اقوله يعني ؟ تكسرين كلامي ؟!
صدت بويها وسكتت، قال واهو يتنهد ويمشي لها بعكازه: منوي تدرين انج اتعبيني اكثر من اللازم لما اتناقش معاج واقنعج ؟
منى: لانك تحاول تفرض رايك علي وانا ما اتقبل هالشي
قال بحزم: مب لازم تتقبلينه ..... انا قلت هالكلمة وقلت لج ستين ألف مرة ما راح اتراجع عنها، وبتمين في البحرين، وتروحين الجامعة وتيسيرين امورج .... وراويني شلون بتخلفين هالكلام وبتعصينه !
قالت واهي تطالعه بألم: لا تقسى جدي، لو كنت انا مكانك يعني بـ
قاطعها: منى طيارتي بعد ساعة، ما اقدر اتأخر اكثر ... انتي فاهمة وواعية، ولازم تفهمين هالشي
قالت واهي تأشر على نفسها: حسين شلون افهم ؟ شنوو افهم وانت من ثلاث ايام يايب لي اكبر مصيبة!! وتخبرني فيها وبعدها تقول لي بسافر بعد يومين وانتي بتمين هني وتملي علي أوامرك وانا بس اقول أي أي ؟! شلون افهم ؟!
حسين: يعني الشي بيدي انا ؟؟! انا يبت المرض حق روحي ؟ انا اللي عوقت ريلي و
رصت على يده: لا تكمل حبيبي .... ادري مو بيدك، ولا أقول انك غلطان بشي، بس شلون اتحمل انت هنااك واني هني؟ واختنق بحسرتي ما ادري شيصير فيك هناك
تنهد وتم ساكت يطالعها .... واهي باست يده: عطني الشور وانا بحجز لي تذكرة بأقرب فرصة وأيي ..
هز راسه : لا منى .. لا يعني لااا !
نزلت راسها بهضيمة، واهو وقف ولازالت كفه بحضن يدها ... رفعت راسها طالعته، واهو وقفها ولمها بحب: أدري إني راح أفتقدج ... راح اكلمج كل يوم، واقولج الاخبار وما اخبي شي وعد ... تحملي بروحج ، وانتبهي لدراستج عشاني
تمت ساكتة وقلبها يدق بقوة، واهو همس: لا تصيحين زيين ؟
تشبثت بثيابه واهي ماسكة دموعها لا تطيح وتعض على شفتها تمنع مشاعرها .. قالت بهمس: أحبك واايد
باس راسها: روحي انتي .... لاتنسين وصيتي، هالله هالله بذكر الله
وباعدها عنه واهي طالعته وابتسمت: بدعي لك على طول، رد لي سالم بس
ابتسم: بعد افكر فيج كل يوم ؟
ضحكت: لاا مو لازم حبيبي، اهم شي تكون سالم ...
رد بمرح: انا حسين مب سالم ...
حضنته : انت حياتي كلها .... ما اقدر اكمل طريقي بدونك
ضمها واهو مغمض عينه ... واهي بلعت غصتها وهمست: اوعدني انك ترجع ؟
مسك كتوفها وطالع ويها ... واهو عاقد حواجبه بانكسار، واهي لما جافت الحزن بويهه غمضت عينها لانها ما تقدر تجوفه ، حضن ويها بكفينه وقال بهمس: إن شاء الله ... إن شاء الله
حب جبينها: في أمان الله ..
ورص على يدها واهي فتحت عينها تطالعه، واهو جافها بنظرة وداع ومشـى عنها طالع من الغرفة بسرعة قبل لا تخونه مشاعره ويضعف .... واهو على الدرج متكأ على عصاه ويخطي خطواته بـهداوة لف ورااا لباب غرفته جافها واقفة تطالعه بابتسامة مليانة دموع، ياترى ارجع لهني اولا؟!




لملمت إحســاسك / شعــوك / وقلبـــك ؟!
خـــلاص بتســـــــافر ؟!!
زيـــن ،، [ إلتفـت لحظــة ] ..
عطـني جروحـك بس ، خلهـا تسليني بـ [ غيابك ] الكافـر ..
وإخذ النظر منّي ، وخبـّــه مع أشـيـائك ..
مابـي أشوف النـــاس ...
وشلـون أشوف النــــاس ؟!!!
وشــوفي ،
[ معــك ]
- ســافر - !!*

* منقول ...






لوح لها بيده وطلع لأخوانه وأمه وأبوه رايح المطار ... واهي تمت بروحها في غرفتهم وساندة راسها على الباب وكاتمة ألمهـا .. لازم أصبر ... !
تمت في غرفتهم لين 10 الليل، وبعدها نزلت ويا ميساء وجمانة وأسيل ولما مر عليها أبوها رجعت البيت واهي تخفي حزنها وتبتسم .. لازم أكون قوية !
دشت البيت وجافت علياء اللي طالعتها بنظرة متفحصة، ولما جافتها بخير ابتسـمت لها ابتسامة عريضة، قالت منى : وش تطالعين ؟
التفت علياء للتلفزيون: مسلسل سوري .. تعالي ؟
منى: بروح افصخ عباتي وشيلتي وابدل ثيابي وارد أطالع وياش ...
علياء: اوكوو اني بسخن الشوربة عشان ناكلها ...
راحت منى فوق، وبعد ما رتبت أمورها وقررت تنزل اندق الباب ... ردت: من ؟ تفضل الباب مفتوح
طل جواد بويهه وقال: منى أبي اللاب توب ..
هزت راسها وفتحت الخزانة وطلعت الشنطة: يوّد ..
اخذه: شكراً ، توش راجعة ؟
هزت راسها: ايي .. انت رحت المطار ويا حسين ؟
جواد: أي رحت ...
سكتت وما تكلمت، قال بصدق: انا متفائل وعندي احساس إن بيرجع بالسلامة ..
ابتسمت: إن شاء الله ربي يسمع منك ...
مشى وطلع من الغرفة، واهي تنهدت .. أكيد حسين كلمه عشان جذي غير معاملته وياي، آه يا جواد .. أنا مجروحة بـ نغزاتك وإلا بدونها ... ما أقول إلا الله يصبرنا كللنا ..
نزلت تحت لأختها، ورن تلفونها بمسج ودق قلبها .... فتحته بس كان من عند [ سهى ]

من / سهـى ،
السلام عليكم ، شخبارش منوي ؟! شخبار صحتش ؟!
وحشتيني خيوو ، بعد بكرة الصبح بيي لش بزورش اذا ما في ازعاج، على الساعة 10 بكون عندش ..


========


[ يتــبع ]