[سكون الصمت]

[ كُل المُنى أنتِ ]

[ 40 ]


(( تـابع للفصل الثاني ))

الموافق / 9 سبتمبر
اليوم / الأحد ..
الساعة / 10.00 مساءً


نفـس المكـان اللي عليـه التقينـا
صـار المكـان اللي شهـد يوم فرقـاك
اتذكـر اول لمسـةٍ فـي يدينـا
واتذكـر آخر بسمـةٍ مـن شفايـاك






(( يزوي .. - الإمارات، بيت عمـها - ))


كانت قبال الدريشة تطالع الشوارع، قالت واهي تلف على مهرة المشغولة باللابتوب: شهر رمضان قرب ..
ابتسمت مهرة: هيه، كلشي ولا شهر الخير .. اجواء روحانية عجيبة
ابتسمت لها يزوي: لاول مرة السنة، بسير وياج المسيد للمحاضرة لا رحتي
مهرة: ليش يعني ؟
قالت يزوي بسماحة: نسيتي قبل ... اماية تترجاني البس لي عباة واسير وياكم وانا ارفض ... تغير الحال الحين
قالت مهرة بصراحة: حتى الحين وانتي بالحجاب بدون العباة صايرة غير
يزوي: بس انا مرتاحة جيي
مهرة: وانا ما قلت شي ولا انتقدت، بس يعني اقول صايرة غير عنا فاهمتني؟
هزت راسها: هيه ...
التفت لمهرة بعد ما سكرت الستارة: انا برد البيت، بتنامين وياي الليلة ؟!
مهرة: خبري ابوي، اذا وافق انا ما عندي مانع ...
يزوي: زين عيل انا بنزل اسلم عليهم ... سلطان وين ؟ ما جفته من يوم ييت !
مهرة: ساير العزبة من يومين .. والليلة بيرد ..
هزت راسها: زيين يالله لبسي عباتج ونزلي انا بسير اخبر عمي
مهرة: بنسير من الحينه ؟
يزوي: شو رايج انتي يعني ؟! انا مشتاقة لـ لجين ابا اجوفها بأسرع وقت
مهرة: امتى بترجع من عيمان ؟
قالت يزوي بامتعاض: ما اعرف، أم راشد تقول باجر او اللي بعده وانا مافيني صبر
قالت مهرة: اتصلي بها وخبريها انج بالامارات
قالت يزوي: لاا ، ابا تكون مفاجأة لها ...
وطلعت من غرفة مهرة وراحت لعمها ومرت عمها .. سلمت عليهم وخبرتهم ان مهرة بتنام وياهم بالبيت، وما مانعوا ..

فتحت الباب بتطلع ودق قلبها لما طلع احد في ويها ، تنهدت ورفعت راسها ... جافته يبتسم لها، حست بشي يسري فيها، ابتسمت له وقالت بلطف: حيا الله ولد العم ... عاش من شافك !
ابتسم لها سلطان واهو يطالعها بنظرة غريبة: الله يحييج بنت العم ... منورتنا ، سمعت انج نازلة عندنا
يزوي: هيه، مافيك خير اتيي تسلم علي .. وين هايت طول النهار
ضحك: والله ويا الشباب سايرين رحلة ..
ابتسمت له: زيين تتونس ... عسى بس عندك فيديوات ؟!
سلطان: هيه اكيد
يزوي: خووش عيل، مولنا عسب نطالعهم ونشوف مغامراتكم
ضحك بحبور: ما طلبتي بنت العم .. اجوفج ظاهرة، على وين ؟!
يزوي: بسير بيتنا ... دايخة من مشاوير اليوم وبسير أناام
قال واهو يطالع ساعته: توها الناس، تقصين علي ؟!
ضحكت : والله مدري هيي جيي طلعت من ثمي، بس يعني بسير البيت من الصبح وانا هني .. وباجر عندي امتحان بالجامعة لازم اتهيأ ..
سكت سلطان ونزل راسه، واهي شتت نظراتها على المكان ..



ردت لفت له لما قال: اروحج بالبيت ؟ ليش ما تيين تسكنين عندنا ؟!
قالت بحيا: تسلم سلطان ... بس انا ببيتي مرتاحة
قال بعتب: ويعني هاا مب بيتج ؟! وراسج الغالي جان وجودي يضايج بج انا مستعد من الحينه اشل ملابسي كللهم واسكن بفندق بس انتي ترتاحين
طالعته بامتنان وتمت صاخة واهو يطالعها، قال بهمس: يزوي بلاج ؟!
حست بنغزة بقلبها: شو بلاني ؟!
ابتعد شوي عن الباب وسكرره ووقف قبالها: بتخبين عني ؟ سلطان ربيع الطفولة؟! ما اعررفج انا ... شو اللي خلاج تييين الامارات ؟
قالت بدهشة: شو سلطان اظاهر انت متضايج من شوفتي وما تبي....
قاطعها: يزوي ، تعرفين ان هالكلام ابداً مب صحيح! افا عليج بس ... بس انتي تركتي كلشي وراج ... وييتي هني ؟!
قالت بابتسامة مجروحة: الظروف ...
سلطان: تبين ترمسين بالموضوع ؟
بلعت ريقها وعيونها دمعت: ما اعرف سلطان ... انا لازم اسير محتاجة ارتاح
تدارك بسرعة: آسف اذا ضايقتج ..
هز راسها: ابداً لا، بس انا شوي تعبانة وتعرف اممم صرت اتوله على البيت وباباتي من الحينه
ابتسم لها بنغزة: عااد كلشي ولا مدللة حمدان ...
ضحكت غصب عنها، واهو طالعها بنظرة واستحت .. قالت: انا بسير، مهرة بتنام وياية، خبرها تيي وراي لاني سايرة
قال: زين نطريها، شوي وتظهر ... انا ما جفتج من ييتي ابا اسولف وياج شوي
قالت واهي تطالع سيارته الموقفة: شووو وين سارت الرنج ؟
ابتسم: بعتها من شهر ..
يزوي: وشو حدك على البورش ؟!
هز كتفه: والله ما اعرف، جيي صار خاطري فيها واخذتها ....
يزوي: تشتغل ويا عمي بالشركة اولا ؟!
تنهد: أكيييد ... شو عمج بيوردني فحالي لو ما اشتغلت عنده؟!
ضحكت وقالت: اناا اسوق سيارة الحين
طالعها بنظرة: والله ؟ تطووور حلووو! يعني اخذتي الليسن ؟
هزت راسها: هيه ، ابوية شرالي لكزس ... بعد 3 أيام بتوصل هنيه
سلطان: زيين عليج بالعافية
يزوي: يعافيك، عااد اباك تبادلني جيي اسبوع او حتى يومين، اسوق سيارتك وانت تاخذ سيارتي
سلطان: لاالا هذي ما تنفع لج ... هذي حصري على الشباب
مشيت تجاهها واهي تتفحصها: لاا ولد عمي ما حزرت، ماشي يصعب على يزوي بنت حمدان ... دامي قلت بسوقها يعني بسوقها
ابتسم واهو يطالعها: وانا ما اقدر ارفض لج طلب .. بس عااد وانا وياج!
طالعته بنظرة: لااا .. شو يعني لو ابا اطلع فيا ربيعاتي بتم لي انت عصعص بالسيارة ؟
سلطان: افااااا !
طالعته وعضت ع شفتها بخجل: ههههه سوري ما كان قصدي
ابتسم: لا عاادي .. بس عااد تحملي اي شي يصير بسيارتج، انا سياقتي مينونة
طالعته بنص عين: مراهق
سلطان بابتسامة: قولي اللي تقولينه .. ما اقدر اغير حقيقتي وازور، انا جييه
تنهدت: وين مهرروو هالقطوة ؟! شو تسوي طول هالوقت داخل .. تزرع بطاطا وطماط !
التفت وراه وقال: لا طريت القط اجا ينط ... وصلت
طالعته مهرة : مرحبا الساع بالشيوخ " وتوايهت وياه " وين طاس ؟
سلطان: شو رايج اكتب لج تقرير عن ظهراتي اليومية واعطيج اياه ؟
قالت : بسم الله! بلاااك ما قلت شي ..
سلطان: سيري احسن سيري
مشيت عنه: فمان الله
وطلعوا رايحين بيت حمدان اللي صاير بظهر بيت أبو سلطان بالضبط، وسلطان وقف يطالعها ... ويبتسم ابتسامة غريبة، لابسة شيلة ؟! يزووي تحجبت ، آآه وأخيــراً ... وضحك بخفة، نظرتها غير .. إحساسي هالمرة غير، عن كل مرة .. توكلت عليك يارب !
دخل البيت، واهم كملوا طريقهم .. قالت مهرة: ها يزووي .. اجوفج طاقة سالفة ويا سلطان، شو كنتو تقولون انتي وياه ؟
يزوي وذهنها شارد: سوالف عادية شو بنقول يعني، نخطط ان نغتالج آنسة مهرة ؟!
مهرة: حن قلبج على اخووية واخيراً ؟!
التفت لها يزوي بنظرة حادة: وربي يسلمج طبي لي هالسالفة قبل لا ترمسين فيها، لان مالي بارض اتناجر ويا بزارين شراتج
مهرة: انا بزر ؟! شوو صكيتي العشرين وصرتي تشوفيني بزر ... اقول نسينا ما كلينا يا يزوي
تنهدت وقالت: تذكرين شقايل كنا نيلس قبال هالمسبح بالبيت ؟! ونرمس انا وياج ؟! شو كنت اقولج وانتي تردين علي .. يـارربي ايااام ، كيف تحملت بعدي عن هالمكان ما ادري ..
ابتسموا ودخلو البيت ومهرة طالعت البيت زاوية زاوية وقالت: انا مدري شقايل بتتعودين على الوحدة بهذا المكان .. آخر شي كنت اتوقعه ان يزوي تودر عمي حمداان اللي تعشقه، وتيي تعيش اروحها
طالعتها يزوي بنص عين: وانا آخر شي كنت اتوقعه ان البزارين صاروا يحبون من ورانا وما يرمسون .. وعليهم حركات من تحت لا تحت
دق قلب مهرررة بخوووف وتصنمت، صخت فترة طويلة ويزوي ضحكت عليها ... قالت بخوف: شو قصدج ؟!
قالت يزوي واهي تركب الدرج: قصدي الا قصدي .. انتي عارفة
ركضت مهرة وراها: يزوووي شو تقصدين ؟!
وقفت يزوي وطالعتها بتحدي: اقصد شوو ؟! انتي عارفة ما يحتاي تلفين وتدورين .. انكشفتي
دمعت مهرة بخوف: يزوي طيحتي قلبي من الخوف ، الله يخليج الله يخلييج قولي لي .. شو تقصدين ؟! انتي تعرفين شوو ؟!
مشيت عنها يزوي ومهرة ركضت وراها، قالت يزوي واهي تطالع مهرة بعطف: مهررة بلاج خايفة؟!
مهرة واهي ترجف: انتي ارمسي قولي لي اول شو تقصدين
يزوي: دامج ترجفين جيي وخايفة من قلب ومتوترة يعني انتي عارفة شو اقصد ... مهرة انا اقصد يوسف!
فتحت عينها وتحنطت مكانها، ونشف الدم بويها كلله .. قالت يزوي: حق شوو خبيتي عني؟! ليش ما رمستي وقلتي لي؟!
ومهرة ما تغير موقفها، وكملت يزوي: لمتى كنتي بتكتمين ؟!
تغرقت عيونها بدموعها: انتي شقايل عرفتي ؟
قالت يزوي بعتب: يعني كنتي بتميين ساكتة وما بترمسين لي موو ؟
صرخت مهررة بصوت عالي واهي تهز يزوي من كتفها: اسـالج انا شقـايل عرفتي جاوبيني ؟!
قالت يزوي باستغراب: بلاااج مهرة ؟ ما قلت شي انا
صرخت بشكل هستيري: يزووووي رددي علي انتي شو عرفج ؟ او انتي بالاصل شو تقصدين
قالت بهدوء: اقصد الملفات والصور والرسومات والاشياء الثانية
رصت على ذراع يزوي: انتي فتشتي في لابتوبي ؟
سكتت وما ردت صرخت مهرة: ردددي
يزوي ببرود: هيه
دفرتها بقووة: انتي بأي حق تفتشين بخصوصياتي ؟ كيف عرفتي ؟ ومتى ؟ يزوووي متى عرفتي وانتي ما وحالج من وصلتي ولا لمستي الابتوب بهالفترة اصلا
مشيت لغرفتها : يوم زارتج شوقان ويلست ع اللاب ترمسني قلت الها تدش الملفات وعطيتها الباسوورد وعررفت
قعدت على الارض وويها عليه علامة [ استفهام ] ويزوي نزلت لها بخوف: مهررة بلاج ؟ .. مهروو لا تسوين لي جيي الله يخليج، عن التمثيل الماصخ .. بلااج
مهرة بخيبة امل: يزوي ليش فتشتوا بجهازي ؟ انا ما سمحت لكم .. حرااام عليج! ليش سويتي جي، انتي تخليني اخسر ثقتي فيج!
قالت يزوي بتوتر: مهرة قومي نسير الغرفة ونرمس، الله يخلييج قومي
وقومتها ومهرة تمشي بدون استيعاب، قعدوا وقالت يزوي: ما اتوقعت انج بتتضايقين بهالطريقة، بس والله انا كنت خايفة عليج ، بعدين انا مب أي احد واذا ما تبين احد يعرف ما راح ارمس بولا حرف
مهرة: شو الفايدة دام شوقان عرفت ؟! وانتي ؟ من بقا بعد ؟
يزوي: انتي ما قلتي لاحد ؟
مهرة: انا ما ابا أي احد يعررف هالشي
يزوي بابتسامة: ولا يوسف؟
صرخت مهرة: الا يوووووسف ما ابااه يعرف عن أي شي والله والله يزوي لو وصله خبر او أي شي ما راح اسامحج طول عمري .. حرام عليج " وحضنت ويها بيدها وصاااحت !! "
ويزوي مستغربة: مهررة خلااص ليش هالبجي الحين
مهرة: لييش عرررفتي ليييش انا ما ابا احد يعررف
يزوي: زيين ليش؟
مهرة: هذا شي خاص فيني اناااااااا وما ابا أي احد يعررفه لا انتي ولا غيرج ..
يزوي: مهروو عن المصاخة عااد، ما ادري شو عرفنا، مكتشفة الذررة انتي ... حرام نحب يعني؟! انتي ما سويتي شي غلط





مهرة: ما ابا ارمس وياااج ... انا بسير البيت
وحطت شيلتها على راسها ومشيت لكن يزوي مسكتها من ذراعها: مهررة لا تكبرين الموضوع
طالعتها بعيونها الحمرا: ما راح اكبره بس انتي لا تصغرينه زيادة عن اللزوم، انتي ترضين احد يفتش بخصوصياتج ؟! انا بسير بس بقولج شي واحد يايزوي وحطيه ببالج، إذا أي احد عرف عن هالشي لو من يكون .. لو من يكون، صدقيني ساعتها ما راح ارمسج طووووووووووول عمري .. سامعة !؟
ومشيت ويزوي صرخت: انزيين وانا منوو بينام وياي ! شقايل تسيرين بهالليل البيت اروحج! مهروووووووو! مهروووووو يالخبلة تعالي ! اففففففففففف
وقفت مكانها واهي تتأفف بعد ما راحت مهرة، انا شو لي اكلمها من الحين! صدق اني غبية .. بس والله ردة فعلها مبالغة !! ... عاد انا كان لازم افكر الف مرة قبل لا ارمس وياها، هذي مهروو مب أي احد ... ما راح افهمها طول عمري ...
مهرة عمرها 18 سنة ، من النوع الكتوم جداً جداً جداً ، ما شفت احد شراتها، اللي يجوفها كله تضحك وتبتسم يقول هذي ما عندها شي مميز، يعني اللي ما يعرفها ما يثمنها مثل ما يقولون، لازم تدخل حياتها وتتعمق فيها عسب تعرفون شكثر اهي شخصية حلوة ومثقفة ! تحب الثقافة واايد خصوصاً التاريخ! ما اعرف ليش .. عكسي انا يعني! مهروو حلووة واايد ، بس مو احلى عنية ههههههههه
اممم اهي متوسطة الطول ، بس ضعييييفة وااااااااااايد ، جسمها ضئيييل ، وطفووولية حددها! اللي يشوف صورها لما كانت بالاعدادي يقول هذي اهي ما تغيرت وايد !
بشرتها مب بيضة ولا سمرا، يعني حنطاوية بدرجة خفيفة وايد، وحواجبها خفاااف حددهم .. بس ابتسامتها تخبـل وعذااااب ... تحسون بعفوية العالم كلها فيها ! فديييتها القطوة! هههههه ايه احنا نسميها القطوة لانها تحب القطاوة واايد ! وما لها قلب تجوف قطو بالشارع مضيع وما تسير وتمسح عليه او تعطيه شوية اكل! حنييينة حددهاا
وقفت وطلعت من الغرفة رايحة المطبخ تشرب ماي ... وحست بالخوف لوهلة! البيت وايد وايد عووود!! مب شوووي ! طابقين ... لكنه كبيرر وايد! وشخص واحد يعيش فيه ... تعتبر فكرة مخيفة! خصوصاً اذا كانت بنت مثل يزوي !
تمت تطالع البيوت برره من الشباك، ما حست بالغربة لان هذا بيتها اصلاً، بس افتقدت الناس اللي تحبهم !
لجين مسافرة عيمان من يومين، وبتررد باجر .. لاشافتها بتستانس لان مسوية لها مفاجأة ولا قالت لها ان اهي رايحة الامارات عشان تدرس!
يـاربي شو قاعد يصير الحين بالبحرين ؟! شو من نيران انا شعللتها من وراي، اتصل بـ جواد ؟!
لا مستحيل، لي عيين اصلاً اكلمه بعد اللي صار ؟!
وينج يا لجين، ما اقدر اتكلم عن هالموضوع براحة الا معاج انتي ..
رفعت التلفون واتصلت بلجين اللي ردت: الووو ؟
يزوي بابتسامة: مرحبا لولو
لجين: يززووي ؟ هلا حبيبتي شحالج ؟ سوري ما بقدر ارمسج الحين لان يالسة انزل اغراضي
يزوي: أي اغراض ؟
لجين واهي تعدل حجابها: رادة من عيمان من ربع ساعة، واساعد ابوية في تنزيل الاغراض
فتحت يزوي عينها وقلبها يدق بقوة: يعني انتي رديتي ابو ظبي ؟ اقصد انتي عند بيتكم الحين ؟!
قالت لجين باستغراب: هيه ؟ بلاج ؟!
يزوي بفرح: خلاص اوكي برمسج اخلاف حبيبتي
لجين بسرعة: يزوي سووري لا تحطين بخاطرج انا بتصل بج اول ما اخلص
يزوي وقلبها يرقص: عاادي حبيبتي خذي راحتج
وسكرته في ويها، ولجين مستغربة، تحس ان في سر في الموضوع ..
ركضت يزوي لغرفتها ولبست شيلتها بسرعة ونزلت واهي تركض،لبست صندلها وطلعت من البيت رايحة لـ لجين ... واهي تتناسى موقف مهرة وحاطة ببالها انها بتكلمها لين ما تهدى ...

وقفت بعيد ببيت لجين تطالعها وعينها تدمع، يارربي شكثر تولهت عليييج ... ضعفتي وايد يالسبالة، انا اراويج ...
وقفت ورا السيارة وجافت ابو لجين وابتسمت له: مساك الله بالخير عمو أبو راشد
طالعها أبو لجين باستغراب: مساج الله بالنور، اليازية ؟! انتي بالامارات ابوية!؟
ضحكت: هيه عمي، توني امس واصلة .. بتم عندك شهور يسلم لي عمرك، ياية ادرس بجامعة بلادي
ابتسم لها: خير ما سويتي، تفضلي يابنتي حيااج، سمحيلنا رادين من عيمان وعفستنا عفسة
يزوي: اساعدك بشي عمو ؟!
أبو راشد: لاا ربي يحفظج، هذحنا خلصنا ..
التفت للباب وجافت لجين اللي لافة ويها للبيت وتكلم أم راشد: اماااية استريحي انا وابوية بنشل الاغراض لا تحاتين ..
راحت لها يزوي وقالت لها بغفلة: هيه ام راشد لا تحاتين انا بعد بشل وياهم الاغراض ..
لفت لجين لها بصدمة وصرخت: يمممممممممممه
صرخت يزوي بنفس المستوى: يمممممممممه
وضحكت وحضنت لجيين اللي كانت واقفة متصنمة: تولهــت عليييييييييج يالدبة وقسم بالله وحشتيني
حضنتها لجين بعدم تصديق: يزوي هاي انتي؟! يالسبالة شو يابج هني؟
ضحكت يزوي وباستها على خدها: ييت من امس مسوية لج سبرايز بس انتي حضرتج سايرة لي عيمان، ما قدرت اصبر يوم اتصلت بج الحين وقلتي لي انج رديتي
حضنتها لجين مرة ثانية: يزوي ما اصدق هاي انتي، اشتقت لج وااايد
تمسكت فيها يزوي وغمضت عينها: وانا اكثر .. لولو احبج وايد، وايد مب شوي .. بتم وياج وقت طويل " صديقتي "
طالعتها لجين واهي ماسكة اياديها الثنتين: عموو حمدان بعد ياا هني ؟!
ابتسمت لها: لاا بس اناا
طالعتها لجين بضحكة: الله يعني ياية بس عشاني اناا
ضحكت يزوي: تقدرين تقولين جيي ، الحين لا يلسنا بقوولج كلشي صار
طالعتها لجين بويه مخطوف: شو صار ؟ استوى شي يديد ؟
اخذت يزوي نفس: قولي شو ما استوى، لا يلسنا بخبرج .. بتيين معاي بيتنا ؟!
لجين: بيلس شوي ويا أماية، وبسلم على اخوااني ..
يزوي: راشد هني ؟ وحشني الدب
لجين: لاا ، تم في عيمان ببيت عمووه .. تفضلي حياج ليش واقفين عند الباب
طالعتها يزوي بحب: لا انا بسير البيت، لا قعدتي مع اهلج كفاية رمسيني
لجين: شوو هالرمسة بعد، تعالي لا اخلي اماية تراويج الحين ...
ضحكت يزوي: زيين يلاا خشّيي






=========


- الأثنين -

(( حنيـن ... 1.00 مساءً ))


طالعت يدتها بملل: اففف اماه عودة بس له
طالعتها اليدة بحنق: بعد دورين .. لا الوتش بالخيزران، اقري
حنين: ما ابغي، جوعاانة اني ، عااد خليني اروح
اليدة وهي تنطشها وتملي عليها : ‏عم يتساءلون، عن النبأ العظيم، الذي هم فيه مختلفون، كلا سيعلمون، ثم كلا سيعلمون‏ ..
طالعتها حنين بعيون دامعة: انتين ما تحسين، جوعاانة اني
اليدة: تبغين تيي لش الحياييى ؟
طالعتها بخوف: لااا
اليدة: عيل درسي القرآن احسن لش ... ترى في واحد ماات ودفنوه، واهو حافظ القرآن بس ما كان يداوم على قراءته، دشوا له الحيات والثعابين في قبره، انتين بعد بيصير لش جدي ..
طالعتها بخوف ونزلت راسها وتمت تقرأ، واليدة تعلمها وتصحح اخطائها .. وبعد ما خلصت قالت حنين: بعد اقرأ سورة زيادة ؟ ما ابغا الحيّايى ايوون ليي
اليدة: بس لباجر بعد ..
حنين: عااد عمليني سورة يديدة، اني حفظتها هادي .. ما يصير جدي كله تخليني متأخرة، اني بسرعة احفظ جان الحين وصلت نص الجزء الثاني لكن انتين تقصين عليي
طالعتها بنظرة: اني ما اقص عليش، اني ابغاش تحفظين عدل عشان ما تنسين، وبعد عشان تحفظين صح، هذا قرآن ما يصير تغلطين فيه .. ويالله قومي روحي برره قولي ليهم يجيبون ليي غدا
قامت حنين وردت لفت لما نادتها اليدة: وتعالي باقولش ... قولي لأمش تلبسش ثياب مستررة عدلة، مو لابسة لي هالخلاقين اللي ما تستر كثر ما تفضح .. كبرتين وبتتكلفين
حنين: انزين ويش فيهم ثيابي ؟ اني لبست بروحي ...
اليدة: عصاقيلش طالعة ، جيفة تتعلمين قرآن وانتين جدي ؟
اشرت حنين على الحرام اللي شالته : وهدا ويش ؟! اني ما اقرأ قرآن بدون حجاب .. انتين كله تتعلفين، جي اني مالت اول البس صروال نفسش
وطلعت حمقانة وراحت الصالة، جافت خالتها أم أسامة وحوراء قاعدين ..
قالت حوراء: بل بل، الا نافخة الويه .. تعالي سلمي عااد
راحت لهم وسلمت عليهم وقعدت، قالت أم أسامة: وش فيش ؟!
حنين: يوعاانة، متى بتاكلون انتون، اني ياية من المدرسة تعبانة محد يحس فيني
ضحكت حوراء: جيي ما تاكلين في الفرصة
قالت حنين بتمرد: الله والاكل، سألي خالتش ويش تحط لي! سندويشة على جبن وحليب فروالة وجبس مدبل! واايد عليها عااد
ضحكوا عليها، والتفتوا للدرج لما نزلت منى .. ابتسمت وسلمت على خالتها، وباست حوراء: عاش من شافش
ابتسمت حوراء: عاشت ايامش ..
قعدوا كللهم يسولفون، لين ما وصلت علياء من المدرسة .. وتغدوا كللهم مع بعض .. وبعدها قعدوا في الميلس ياكلون فواكه ..
وعلياء قاعدة ويا حنين مقهورة وتصرخ عليها: أقووولش كتبي سيددة حقوي تكتبين اعوج
رمت حنين القلم: ما بكتب زيييييين باروح بيت عمتي
التفت لها أمها: قعدي محلش لا راويتش
قالت حنين: عااااااااااد من اول امس ما رحت ابغى اجوف اولاد عمتي بروح بروح
أم صادق: مافي روحة ... هالمرة باحط راسي براسش، يا اني يا انتين!
حنين: بقول لأبوويي
وطلعت تصيح، قالت علياء: وييه مر مر! هدي ويش مو بنية
أم صادق: الله يغربل بليسها، مطفشتني متعلقة في اولاد عمتها ولا تقعد في البيت ...
أشرت أم أسامة على حوراء: اكي عندش هدي، يوم هي صغيرة ما طفشتنا له
ضحكت حوراء ومنى اللي قاعدين صوب بعض ويتساسرون، قالت حوراء: وخطيبش بيطول ؟!
قالت منى بحزن: ان شاء الله ما يطول، بعد باقي اسبوعين ..
ابتسمت حوراء: شكلش كللش ذابلة ...
ابتسمت منى بألم: الله كريم ...
حوراء: ما تنامين عدل ؟!
تنهدت منى: قومي نروح فوق، ما برتاح اتكلم واني هني ...
هزت حوراء راسها وقاموا، قالت منى لعلياء: علاية بتيين ؟
علياء واهي بالها مشغول بفيصل وشلون تفتح الموضوع ويا منى : لا بتابع المسلسل الحين بيحطونه
هزت منى راسها وراحوا غرفتها وقعدوا، قالت منى: ما اعرف انام زين، وايد اوتعي بالليل ما كنت جدي قبل ...
حوراء: ما كلمتيه يعني؟!
منى: امبلى، بس يعني مكالمات لا تذكر ... " وتأففت " شغله ضغط وما يلقى وقت عدل عشان يكلمني
حطت يدها على يد منى: ما عليه الله يرده سالم، انتي لا تهتمين اهي فترة وتعدي، حتى الغدا ما تغديتي زين .. ما يصير تسوين في نفسش جدي، ما اعتقد انه بكون راضي اذا جافش بهالحال
ابتسمت منى بتفاؤل وقالت: ما علينا، قولي لي شخبار دراستش انتي ؟
حوراء: الحمدلله ماشية على خط مستقيم ومستانسة
منى: والله ؟ خبريني زوود
حوراء: القروب اللي وياي وايد اوكي، بنات فرفوشيات وزينين حددهم، من الاخلاق ومن ناحية الشخصيات، يشجعون على الدراسة وايد .. واني مرتاحة وياهم
منى: الحمدلله .. سمعت أسامة يقول ان في مشروع خطبة
تنهدت حوراء: كل مرة نسولف اني وياش يكون في مشروع، وبالنهاية يفشل ..
قالت منى بعتب: عااد تفائلي شووي ...
حوراء: اني مو مهتمة صدقيني، عاادي الوضع عندي ... وما افكر في هالشي بعد، يعني خاطري استمر بدراستي بلا عوار راس ولا ارتباطات، بس البيت .. خبررش تعرفين بعد خالتش
ابتسمت منى: الله كريم ... وهالمرة وش رأيش ؟!
حوراء: ما ادري، انطر اسامة يرد بالسلامة وبعدها يصير خير ...
وسكتوا وقعدوا فترة، قالت منى بحذر: مافي اخبار عن عباس؟!
دق قلب حوراء وتنهدت، طالعتها منى بنظرة: بخاطرش حجي والله يبان من عينش؟!
حوراء: خطب ..
صخت منى، وحوراء استدركت: بس ما تأثرت، اني شايلته من بالي من زماان ..
منى: شدراش عيل ؟
حوراء: دريت وبس ...
وقالت واهي تغير الموضوع: علياء شخبارها الحين ؟ شخبار نفسيتها واحوالها؟
قالت منى بحيرة: انتي شنو تجوفين ؟!
ردت: ما ادري
قالت منى: تتظاهر بالقوة وانها تتناسى ... بس يبين عليها انها تتألم من داخل، لها قدرة على التكتم والصمت بشكل مو طبيعي، عمري ما تخيلت ان اختي علياء بتكون جدي او بينرسم لها قدر مثل هذا ...
حوراء: الحمدلله على كل حال، يمكن يكون فيه صلاح لها ...
منى: أكيد، كلشي من الله فيه صلاح ... الله يرزقها ويعوضها بالاحسن ..
حوراء: آمين ..

=========

[ يتبـع ]