[سكون الصمت]

هزت راسها واهو طلع من الغرفة، شالت شنطته وحطتها عند الباب، رن تلفونها وردت: هلا يزوي
يزوي: هلا منووي، وينج انتي ؟
منى: اني في بيت عمي، ليش ؟!
يزوي: شووو يالخااااااينة ما بتييين تسلمين علي قبل لا اسافر ؟
ابتسمت: بيي ويا ويهش، بلاقيش بالمطار، انتي طائرتش بعد حسين بساعة، يعني اكيد بلاقيش
يزوي: اوكي بنطرج انا، يالله باي حبي
وسكرته، تنهدت منى ... الله يعيين من هالفترة اللي بتيي، حسين ويزوي !!! حبيبي وصديقتي وبنت عمتي! شاللي يصبرني ؟ عاد يزوي هذي اللي بفتقدها .. شلون بتروح عنا ؟! يـاارربي!
وتغرقت عينها بلدموع كالعادة، تذكرت كلام حسين .. على طول دخلت الحمام، ما اباه يشوفني اصيح، بس والله ما اتحمل .. شلون بودعه واني خانقة عبرتي!
طالعت نفسها بالمنظرة بعد ما رشحت ويها بالماي: شلون بتحمل 3 أسابيع ؟! والله وايد ! وايد وايد! 21 يوم! آآه يـارب انك تصبرني .. يـارب انك تحفظه وتعطيه العافية ويروح ويرد لي بالسلامة
سمعت صوت دق الباب، قالت واهي تمسح دمعتها: ها حبيبي بطلع الحين، بس اغسل ويهي ..
حسين: مناي سرعي شوي، جواد وصل واقف برره، انا بنزل الشنط ..
بلعت ريقها: ماشي عيوني، ياية الحين .. انت اسبقني
واخذت نفس لما سمعت خطواته، طلعت من الحمام بعد ما نشفت ويها واياديها، بندت مكيف الغرفة ولبست عباتها وشيلتها، وشالت شنطتها وحطت تلفونها .. تذكرت الخيط الاسود اللي اخذته من عمتها، مال الراية في محرم اللي فات .. ونزلت رايحة للسيارة واهي مارة سلمت على اهل البيت ودشت السيارة ..
وراحوا المطار ...
ووقفوا في زاوية بعيدة عن الناس شوي، المطار كان خفييييف ومافيه ناس وايد، قال حسين واهو يطالع منى: جواد، روح اشتر ريوق لمنى ما اكلت
واهي نزلت راسها وقلبها يدق بقوة، ضحك جواد ونزل راسه بمستحى: اووكي
وراح يشتري لها واهو يمشي بدون ما يلتفت ويتبسم لا ارادياً على الافكار اللي تدور براسه، أحلى شي سويته بحياتي وجاهدت عشانه، اهو اقناعي للبيت ولكل شخص بحسين عشان ياخذ منى، هذا الشي مستحيل اندم عليه طـول ما انا حيّ ..

حسين: بتتحملين بنفسج صح ؟!
قالت بابتسامة واهي تخفي عبرتها: اكيد، وانت بعد تحمل بنفسك وايد، لا تاكل أشياء وايد حارة عشان لا تبتلي بمعدتك، ترى محد بيسهر عليك بعدين " وسكتت "
مسك يدها: ما راح انساج
قالت بسرعة: اباك تذكرني كل لحظة!
هز راسه: أكيد
قالت له: عطني ذراعك اليمين
استجاب لها واهي لفت الخيط على معصمه: هذا خيط الراية، من عند عمتي، كلما تطيح عينك عليه، اذكر امك واذكرني .. ولا تشيله طول من انت هناك، زين ؟
هز راسه، واهي استمرت بالكلام واهي منزلة راسها عشان ما تطالعه: الجو هناك الحين بارد شوي، البس الجاكيتات، واشتر لك زوود اذا حسيت ان هلثياب ما تكفيك .. " وقالت بصوت هادئ ممزوج بغيرة " ولا تطالع احد هنااك .. مو تجوف الفرنسيات وتنسى منااتك، ترررى صدقني اني ما اجذب ها ... صدقني، اذا شميت بس ريحة انك تطالع احد غيري او تفكر بوحدة، بقتلها وبقتلك وياها ..
ضحك غصب عنه، واهي رفعت راسها بعد ما خلصت من عقدة الخيط: اتكلم جد، لا تقعد تضحك لي
قال بهمس: بتقتليني هاا؟! يعني اهوون عندج ؟!
منى: أي، بقتلها وبقتلك وبقتل روحي وراكم
ضحك: ههههههه يالله خير وخاتمة خير ...
تحولت ابتسامتها لدمعة بنفس الوقت، رفعت راسها تكابر ويدها ارتجفت، قال بسرعة: توني اقولج في البيت، شقلنا ؟!
ارتجف قلبها وكل خلية ببدنها، وقالت بصوت يرتجف: والله مب بيدي .. بفتقد ضحكتك، كلشي كلشي! بفتقدك
ورمت راسها على صدره وصاحت: لا تنساني الله يخليك، لا تقطع عاادتك انك تصبح عليي كل يوم، حتى لو توقيتكم بفرنسا غير عنااا اهم شي تكلمني كل صبح .. ابا احسك ويااييي بكل لحظة .. حسين والله والله أحبـك
نزل جبينه على راسها: يا شيطونة، من متى وانا انطر هالكلمة، قلتييها واخيراً .. بس بدمووع وبدون ما اشووف عينج، يالبخيييلة
قالت واهي تضحك وتصيح بنفس الوقت: أحبك واايد ، واايد وايد أحبك كثر السما والبحر، والنجوم اللي في السما اللي تحبها، وكثر دموعي وكبرر الكوون كلله أحبك
قال بابتسامة حنونة بعد ما رفعت راسها: وانا اكثر ، بكلمج على طول لا تخافين
اخذت نفس طويل: جواد وصل .. احم
قال بابتسامة واهو يعدل وقفته: مسحي دموعج
قال جواد واهي يعطي منى الجيس: عسى بس جييت بوقتي
قال حسين: لو تاخذ فررة بعد احسن
جواد: اقوول عطيتكم ويه واييد
ضحكوا وكلهم، وحسين قال: يالله أكا هذا النداء الثاني لطيارتي .. لازم اروح
ابتسمت له منى وجواد مد يده: على خير، تروح وترد بالسلامة حبيبي
حضنه حسين بقوة: يسلمك ربي، تحمل بنفسك ... اختك أمانة طول فترة غيابي هاا
جواد: لا توصي حريص، انت روح ولا تهتم
حسين: الله يخليك، واذا صار شي ويا ريل عمتك كلمني
تنهد جواد: يصير خير ..
حسين: يالله فمان الله ..
وتوايه ويا جواد، وسلم على منى بيده واهو يبتسم، رص على كفها ومشى ..
كانت عنده شنطة كبيرة لثيابه واغراضه، والثانية اللي فيها اغراض الشغل ..
وأول ما تجاوز التفتيش ودخل داخل، طالعهم من الحاجز الزجاج ..
جافهم ميودين ايد بعض ويطالعونه .. رمش بعينه وشاح بويهه واهو يكمل طريقه وبقلبه حجي: حتى انا بفتقدج وبشتاق لج، فراقج على قلبي صعب .. ولوتعرفين شكثر كرهت الاسفار والغربة، كنتي عذرتيني واشفقتي علي، لكني ما ابا اخسر وظيفتي .. لازم اصبر عشان أحافظ عليها .. ولا نصير انا وياج بمتاهة لا ضاقت فينا الدنيا بيوم !






===========

(( يـــزوي ... 10.08 صباحاً ))

قالت بصراخ: علاية وقسم بالله اذا ما طلعتي الحين بيي لج من كشتج
قالت بصراخ: انتين ما تحسين؟! اقولش بطني .. والله ما اجدب
يزوي: مالي خص يعني مالي خص، ع كيفج هوو ؟! يالسبالة كيف اهون عليج ما تسلمين علي ولا تودعيني
قالت بملل واهي تشيل لفراش عنها بدفاشة: اللي يقول بتروحين القطب الشمالي انتين! في الويكند بتيين بترزيين فيسش ويانا! يعني ما بفتقدش
يزوي بحنق: تفوووه عليج يا مسودة الويه يالـ خااااامة ياناااااكرة الجميل ياللي ما تستحين ع ويهج، لكن تعرفين شوو ؟! الشره علي انا اللي يالسة ارمسج وعاطتنج اعتبار ومسوية لج مكاانة، والا انتي حددددددج توصلين لنعالي .. ووووووع عليج
ضحك سيف: آبوو السبّ والقرادة، هوني شوي يايزوي كليتي البنت .. عطيني التيلفون اجوف برمسها
يزوي: خلها تولي الجلبة انا براويها
علياء: انا جلبة ؟! والله اذا طلعت الحين من البيت ودشيت السيارة محد بفكش مني، بمشع شعرش يالهندية
يزوي: اذا خالي يصير ابوووج وانتي مررة وفيج خير، تعالي
علياء: وقسم بالله هذاني ياية، سكري بلبس الشيلة مالت على ويهش
سكرته يزوي واهي تضحك، وسيف طالعها باستغراب: ينيتي ؟!
يزوي: تتحداني ويا ويها، عبالها ما اعرف شقايل اخليها تظهر من البيت ..
التفت سيف لباب بيت خاله: يالله خير ، سوبر علياء وصلت
ضحكت يزوي والتفت لورا لما دخلت علياء واهي تلهث: سلااام .. هاا يالسبالة، اني مرة وبنت ابوي لو لا ؟!
التفت لسيف: وعليكم السلام ..
قالت يزوي: سيفان حررك " وقالت لعلياء " وانتي تتغلين ع شوو ؟! ترااج صج بنت خالي مافيج خيررر ها ، اقولج بسافر تعالي ودعيني تقولين لي انتي ما بتسيرين القطب الشمالي! ترراج حددج مب خووش
علياء بصوت منخفض: انتي ما تحسين اني مريضة، والله بطني!
قالت بصوت عالي: قايلين لج ألف مرة سيري المستشفى! ما تطاوعين ويا عنادج
قال سيف: عسى ما شر ؟!
قالت علياء بطوالة لسان: ماشر، خلك في حالك ... يزوي أبوش وأمش وينهم؟!
يزوي: في سيارة أبويية، أماية وميثا وناصر ويوسف ... ووياهم شنطي
علياء: وهذي شنطة منو عيل ؟!
يزوي: شنطتي بعد، عبالج انا بسافر يومين وبرد، بهاجررر هجرررة!
علياء: والله تفكينا من ويهش ... طول ما انتي في البحرين مسببة لي ازعاج، ومنى بعد الله يبعث لها يارب سفرة وتروح عني! لا نوم انام عدل، ولا قعدة عادلة، يا داشة يا طالعة علي!
رن تلفون يزوي ونطت: يـاربي لو طارييييييييين مليوون، اكا اتصلت
سحبته علياء: ييبي برد علييها .. الووو
وصلها صوت منى هادئ: علياء ، وينكم ؟! عمتي وصلت المطار ويا عيالها ويزوي للحين ما يت
علياء واهي تطالع الطريق: اكا احنا قريب، سافر حسين ؟!
ردت بهمس: اي
سكتت علياء مدة، ومنى سكتت .. بعدها قالت: زين اكا احنا يايين، 10 دقايق واحنا عندكم
منى: اوكي ، باي
سكرته علياء وهمست ليزوي: الله يستر ما تسوي لنا مناحة الحين
التفت لها يزوي بهدوء غريب: انا مدري شقايل انتو ثنتينكم بتتحملون تعيشيون بدوني! يعني الحياة بدوني صراحة مو حياة، كيف بتتحملون بنفسكم
قاطعها سيف: اقووول يزوي، ربي يرحم والديج، ما اتحمل سيارتي يصير فيها شي منج، رجاءً يعني .. بدون هالصواريخ
يزوي: فشلتني سيف!
علياء: هههههههههههههههههههههههههههههههههههههههههههههه !
وسكتت فجأة وكتمت باقي ضحكتها، وسيف قال: ما عليه اختي، آخر ذكرى امبينا
يزوي: حق ليش ما احس انكم بتفتقدوني ؟! ليش محد محسسني اني صدق بسافر ؟! سيفان ما بتشتاق لي!
سيف: اخاف ارمس تقولين فشلتج
قالت بحماس: لا فديتك قوول ، يعني لهدرجة انا ولاشي بالنسبة لكم!
سيف: حراام يزوي شوو ولاشي ؟! انتي اقل من هاا والله
ضربته بالكلينكس: يالسباااال
ضحك: ههههههههه انتي اللي مسوية لعمرج أكبر من حجمج، يزوي تراج رايحة الامارات لا تصدقين عمرج وايد، الا هي فلتة حصا، وانتي بتنزلين كل ويكند ..
يزوي: لكني عنااد بتم هنااك 3 شهور ما بنزل البحرين، غصب عنكم بتشتاقون لي
علياء: تفكينا من ويهش اصلاً
يزوي: انتي سكتي يالحقودة، اصلاً ماشي حارنج الا الغيرة، تغارين مني ومن جمالي وفتنتي
راحت علياء في الوسطة وطالعت ويها: اشوف ويهش اشوفه ؟! للحين ما غسلتينه من النوم ؟! اي جمال واي فتنة ! مسكينة ياحليليش انتي ما جفتين ويهش بالمنظرة ؟! محد
سيف: هههههههههههه بس عااد بس! انتو بلاكن، كل وحدة كانها بالعة راديو! تخلص وحدة وتبتدي الثانية، وقسم راسي بدى يصدع .. شو هاا ! وايد تهذرن انتوو
علياء: لاتعقدني انت زيادة عن معلمة الحيا ، كفااية كله ساكتين بحصتها! احس روحي مسجونة في سجن بوغريب! تعذيب نفسي شديد!
وقف في البارك وقال: انزلوا يالله عن الجذب الزايد
نزلوا من السيارة وتقدموا عن سيف اللي بند السيارة وشال الشنطة، وراح حمدان ويا بنته عشان يمررون الشنط ويجوفون الوزن، وبعد ما خلصوا الاجراءات تقريباً، اقترب وقت الوداع ..
حضنت يوسف برفق اللي كان واقف بعكازه: تحملي بعمررج هاا
ابتسمت له: من عيوني وانت بعد، شد على نفسك واترك هالعكاز
يوسف بابتسامة تجنننن: أكيـد ..
باست ميثا: بفتقدج يالسبالة، صيري كشيخ ولا تفررين الحجاب، والبسي كلله كشخة بالمدرسة وصيري احلى وحدة وحريييهم
ضحكت ميثا: لا توصين، ماني مقصرة
ضربت ناصر على ويهه: وانت يالدب، بسك من هالحلاوة اللي تاكله، ترى ان تنفخت زيادة ... احلم بحنين ! ما راح ترضى فيك بعدين
ناصر: يعني انتي مو دبة ؟!
وقفت وطالعته بسخرية: احلف انت بس؟! الحين هالرشاقة كلهااا وانا دبة؟! مسكيين والله
ضحكت امها وحضنتها، سكتت يزوي واهي مطوقة رقبة امها بذراعها: بتوله عليج ماما
نرجس: ما ادري شقايل بتغفى عيني وانتي مب في غرفتج الليلة
ابتسمت غصب عنها، ونرجس دمعت عينها وقالت بابتسامة: اباج ترفعين راسي بين الكل، راوي عمومج منوو يزوي اللي سارت البحرين سنة، وردت الامارات بشكل ثاني
قالت يزوي بابتسامة: من عيوني، راسج بيتم مرفوع على طووول
نرجس: فديتج، الله يحفظج
مسكت يد امها: لا تنسيني من دعائج، ترى توفيقي من بعد الله عليج
نرجس: إن شاء الله
ابتسمت لأبوها اللي قال بهدوء: لا انا آخر واحد، سيري لبنات خالج وسيفان بعدين انا
ضحكت وراحت لسيف وحضنته، قال: خنقتيني
يزوي: انت بفتقدك بشكل خااص صدقني، شكراً وايد على كلشي ... سيفان فكر زيين لا تضيع شي ثمين عندك
طالعها باستفسار، قالت: علياء
هز راسه بسرعة: لاااا .. شيلوا هالسالفة من بالكم! انا عفتها خلاص
قالت بسرعة: اووش قصر حسك لا تسمعك، بعد فكّر سيفان، شركة ابوي برقبتك، لا تودر أبوي ولا لحظة حتى لو انشغلت بالجامعة بس لا تودره اهو شادّ الظهر فيك
ابتسم: لاتحاتين
سيف: سلّم على شوقاان وايد لا ردت من السفر ..
سيف: يوصل .. تحملي بنفسج
ابتسمت وابتعدت عنه وراحت لعلياء اللي واقفة جنب منى وجواد، ابتسمت في ويها وسلمت عليها بيدها، قالت علياء: يعني كلهم حضنتينهم الا اني لا ؟! مالت عليش
ضحكت يزوي وحضنتها: بتجوفييين يوم اليمعة الساعة 6 الصبح بتلاقيني ناطة ع فراشج وشايلة اللحاف عنج
قالت علياء واهي تمثل دور لصياح: اهيء يـارربي ساعدني واعني ..
ضحكت وتركتها، ونزلت شنطتها اللي على كتفها وعلى طول لمّت منى اللي بانت صغيرة عندها بفارق الطول ولانها لابسة كعب: منوووي
ردت بصوت متهدج: بتسافرين عني هاا ... بفتقدش يزوي، بسولف ويا منو بفترة غيابش
شدت على ضلوعها: بكلمج ع طول، في المسن وبالتلفون ... كان خاطري ايي وياج أول يوم جامعي بس الله مب كاتب ... لا اتعبين نفسيتج وايد ؟ ترى الحبيب ما يسترجي يفكر بحد غيرج وبيرد لج بسرعة هههههه
ضحكت واهي تحبس دموعها، ويزوي باعدتها وطالعت ويها بابتسامة متألمة: علمتيني اشياء وايد منووي .. شكراً على كلشي
منى: ما بينا شكر، ما سويت شي ...
يزوي: امبلى سويتي اشياء وايد ... كفاية انج صرتي اخت وبنت خال وصديقة لي
منى: احبش وايد
يزوي: وانا اكثر .. يالله فمان الله
والتفت لأبوها اللي كان يطالع جواد، التفت له بتوتر ولما جافت ويهه ابتسمت: يالله جواد، السموحة منكم على كلشي، ابروا ذمتي .. وتحمل بخالي ومرت خالي واخواتك ..
ابتسم لها: توصلين بالسلامة .. ما سويتي شي، ما جفنا منش الا الخير
وخت راسها وردت: تسلم .. مع السلامة
ومشيت عنهم وراحت لابوها اللي حضنها من جنبها اليمين وطوق خصرها ومشى وياها لآخر الطريق، التفت وراها وأشرت بـ " باااااااي " لهم كللهم واهم ردوا لها الحركة، ولما قربت توصل ابتسمت: بس بابا لهني ..

[ اسمعوهـا لنهـاية الجـزء ]

ابتسم لها: توصلين بالسلامة حبيبتي، عمج سالم بيستقبلج بالمطار، ومفتاح البيت عندج، اول ما توصلين رمسيني عسب اطمن
هزت راسها: من عيوني، تحمل بماماتي وبنفسك
حمدان: لا توصين، انتي بس لا تفكرين بـ حد
ابتسمت: ما بتعب نفسك بسببي صح ؟!
حمدان: اذا تعبت نفسي انتي بترتاحين ؟!
هزت راسها: ooh لا لا !
رد بابتسامة: خلاص عيل
باست جبينه وخده: احبك يبة .. انت اغلى شي عندي
حمدان: وانتي روح أبوج، يالله حبيبتي ... تيسري، ولا تنسين وصيتي .. رمسيني اول ما توصلين
هزت راسها: إن شاء الله .. فمان الله
ترك يدها: الله يحفظج يالغالية .... يزووي
التفت له: يالبيه
ابتسم لها: أبا افتخر فيج ..
طالعته بنظرة امتنان واخذت نفس ومشيت بعد ما طرشت له بوسة في الهوا واهو ابتسم لها ... ورجع وقلبه يدق ..

.
.

جواد كان واقف جنب منى الي قالت له: ليش ؟!
قال واهو يطالع جهة يزوي اللي راحت فيها: ابا اقولها شي .. بلييز !
قالت علياء: انطر شوي جواد
جواد: اكا راحت! شنطر بعد ؟
علياء: اذا جافك ابوها بتصير لنا سالفة ويا بيت عمتي ... لحظة بتصل فيها
رفعت علياء التلفون واتصلت في يزوي اللي ردت: شو صاير ؟!
علياء: نسيتي شي .. نطري ولا تتحركين، بنيي لش
يزوي: نسيت شوو ؟!
علياء: انتي ما عليش، اوقفي بس
يزوي: ما يصير تدخلون المكان اللي انا فيه
سمعها جواد وقال بصوت منخفض: قولي لها ما عليش بنتصرف
علياء: انتي نطري ولا عليش، احنا يايين لش ..
سكرته علياء وجواد قال: قعدوا هني واطلبوا لكم اللي تبون لا تتحركون، انا بروح وبرجع لكم ..
قالت منى: جوااد ... هالله هالله!
ابتسم لها ومشى بسرررعة ... وصل عند الموظفين وحاول يتكلم وياهم، ووصل لنتيجة وياهم بعد ما قاله الموظف: اوكي، بس مو أكثر من 10 دقايق، تفضل انا برافقك
دخل جوااد ودور عليها بعيونه .. كانت واقفة وتطالع اللي رايح واللي جاي واهي تتأفف، لابسة جينز طووييل لونه كحلي، مع بلوزة طويلة للركبة .. لونها أخضر وفيها دوائر بيضا، وشيلتها بيضة وشنطتها بعد بنفس اللون .. تصنمت لما جافت جوااد يمشي بسررعة ...
كانت خطواته سريعة، ببنطلونه الأسود وقميصه الأسود المقلم بخيوط بيضاء ضعيفة .. وكعادته رافع أكمامه للكوع ... وكلره مبهدل ! شعره الطويل !
وقف قبالها واهو يتنفس بسرعة: شكراً لانش وقفتي
طالعته بعدم استيعاب، قال: يزوي .. ممكن فرصة ؟!
قالت واهو تحرك بؤبؤ عينها: شنوو ؟!
حط يده على صدره واهو يتنفس وفاتح بوزه ياخذ نفس بعد ما اجهد نفسه وغمض عينه وفتحها، قال: فكررت وايد، وايد وايد .. يمكن انتي قدري .. انتي الحياة الثانية من بعد حياتي الاولى .. لا تسافرين !
قالت ودمعتها تعلقت برمشها: ما أسـافر ؟!
هز راسه بـ " لا " : لااا لا تسافرين، اذا جذبتي على الكل واقنعتيهم بفكرة الدراسة انا ما راح اقتنع، يزوي انا اعرف انتي شكثر تحبيني، واعررف اكثر شكثر انا عذبتش وأذيتش بتصرفاتي وطيشي وتهوري وعدم وعيي، سويت أشياء مالازم أسويها .. بس صدقيني انا تغيرررت، تغيرررت بشكل ما تتصورينه .. يزوي انا عشت حب من قبل، ما كان حب عادي، كان عشق محد يقدر يتصوره، انا بنفسي ما اقدر اتصوره وبجذب عليش لو قلت اني ممكن انساها بيوم من الايام، تحرررم علي الجنة اذا نسيتها بيوم .. بس في الحياة احنا نعيش كل يوم بيومه، ويمكن بكرة يخبي لي يوم يديد وحياة يديدة ... انا عانيت في حبي لاني كنت مينون وسويت اشياء ما يقبلها الحب الصادق في عالمه، انا خنتها ودمرت شي حلوو في علاقتنا .. يزوي انا احس فيش، والله احس باللي بداخلش لاني بيووم كنت فيه .. ما اتمنى انش تعانين مثل ما انا عانييت، مثل ما كان حبي لزينب من طرف واحد وخليته يصير من طرفين، انتي بعد ممكن تخلينه من طرفين ... حتى لو ما كان بنفس قوة وعنف الحب الأول
مسحت دمعتها اللي نزلت، واهو طالعها بندم وقال بهمس: يزوي انا ما استحق ان ...
قاطعته: لا تكمـل ... انا رايحة عشان نفسي مب عشانك، صدقني انا رايحة عشان نفسي، عشان طمووحي وعشان دراستي ومستقبلي ...
وسكتت، وطالعته بقوة وجرأة: صدقني مهما كان حجم حبك في قلبي، ما بيكون اهو الاكبر من كل كبير في حياتي، مستحيل اودر أهلي وحبايبي وأبوي ودنيتي كلها عشان حب شاب ممكن استبدله بيوم ... انت ممكن تكون واحد ثاني ... لكن
" والتفت وراها واهي تشوف " المغادررون " ..
وكملت: الأم والوطن واحد .. ما يتبدل، لو شوو ما صار ... " وطالعته مرة ثانية " وانا يزوي، ما اراح اتبدل ..
جواد: يعني ما بتعطيني فرصة ؟!
سكتت وما ردت، مد يده بظرف: هذي الرسالة سهرت عليها ليلتين عشان اكتبها لش، اقرأيها لا استقريتي بين السماء والارض ...
يزوي: ليش ؟!
جواد: شنو ليش ؟!
يزوي: ليش الحين ؟ بهاللحظة ؟! في هذي الدقيقة بالذات ؟
تنهد: في الحياة .. الوقت يقطعنا قبل لا نسبقه، يمكن تكون هذي اللحظة الاخيرة ... واتمنى انها تكون اللحظة الاخيرة وما تكون اللحظة اللي فات الفوت فيها!






اخذت الظرف من يده: شكراً لانك عطيتني من وقتك وفكرت فيني .. مع السلامة !
لفت راسها ومشيت واهو طالعها بصدمــة !!!
راحــت ؟!
غمض عينه بقوووة وشد على قبضة يده لحتى ما غرس اظافره في جلده ...
واهي تمت تمشي ودموعها تنزل، يقول لي لا اسافر ؟! جوااد يايني لعندي يبي فرصة ! وانا اللي كنت اطلبه بفرصة ، ياي لي لعندي!! وقفت واهي تشهق ونزلت ذقنها لآخر حد برقبتها واهي تصيح ... فتحت الظرف والرسالة ...
ووقفت فجأة، التفت وراها ... وقبل لا تجوف جواد جافت أبوها من ورا الزجاج يمشي للموظفين واهو يطالعها ... وجواد توه بيخطي خطوته راجع ...
قالت بصوت يرجف: جوواااد !


طًلي على قدري, يا فتنة القدرِ
أشرعتً نافذتي ,للنورِ والمطرِ
رعدَ تفجر في آهات أوردتي
والقلب كابدهُ توق ٌالى الخطرِ
والروح تحملني, ناراَ وأجنحةَ
شوقٌ يؤججُ أحلامي الى السفرِ
رُؤياك يا فرحة الآمال , لي أملٌ
عيناكِ,أم همسةُ الأحلام في القمرِ
طُلي على زمني,كم خانني زمني
حلم يراودُني في هدأةِ السحرِ



===========

[ نهاية الفصل الأول من الجزء الـ 40 ]