[سكون الصمت]

(( عليـاء .. 6.00 مساءً ))

ابتسمت: وش صاير ؟ مجتمعين عندي اليوم
ابتسمت يزوي ابتسامة باهتة، ومنى ابتسمت ابتسامة حزينة! وعلياء طالعتهم وتنهدت
كانو قاعدين على شكل حلقة دائرية، وكل وحدة تدري ان الثانية فيها شي، بس مب قادرة تواسيها لأن اللي بداخلها تحسه كبير ، سندت يزوي راسها على كتف منى، ومنى رمت راسها على كتف علياء، وعلياء طالعتهم بحزن ومسكت اياديهم: وش صاير فينا ؟! كل وحدة حاملة هم الدنيا على راسها
قالت يزوي: احس على صدري ياثوم لو يبل ما ينهدم ...
رفعت منى راسها وطالعتها: شصاير ؟
قالت بهمس حزين: ابا اسافر الإمارات، وبابا مب مقتنع
علياء: تسافرين ؟ ليش ؟
طالعت علياء بانكسار: ابا ادرس بالجامعة
علياء: ليش ما تدرسين هني ؟ انتي تدرين ان ابوش ما يقدر يصبر عنش وانتي ما تقدرين تصبرين عنه
طالعتها منى ويزوي ردت بصوت مبحوح: تتصورون بيوم من الأيام إن بنت تكن مشاعر لريال، وأبوها يعرف عن هالشي ؟ ويعرف منو هالشخص ؟!
طالعتها منى بصدمة، وعلياء هدأت أكثر، واسترسلت يزوي: كنت واعدة أماية إن هالشي يتم امبينا، شقايل انتشر جيي
وصاحت وخبت ويها بين يدينها، طالعتها منى بحزن وعلياء قالت بهدوء: انتي سمحتي بهالشي
التفت لها منى باندهاش، وعلياء كملت: عطيتي الكل فرصة ان يتحجى عليش، وكشفتي لهم مشاعرش بطيشش وتهورش اللي ما حطيتي له حدود بيوم، ولا فكرتي بعادات ولا بغيره
طالعت يزوي علياء بنظرة انكسار: علياء مب ناقصة لوم زيادة، انا ندمانة على كل لحظة مرت من عمري ! كل لحظة راحت .. كنت غبية غبية
مسكتها منى: اهدي شوي، ليش الندم ؟
علياء ببرود: صح، ليش الندم ؟ لاتندمين على شي رااح وما راح يرجع، فكري باليوم وبكرة لا تفكرين بالامس
زفرت من عمق: ابا اسافر .. محتاجة لبلادي، ولصديقتي، ولريحة كل شبر وكل شي يخصني بالإمارات .. في دافع قوي يخليني اروح، إحساس قوي
علياء: مب دائماً نتبع أحاسيسنا
طالعتها منى: بلى، الإحساس دليل
قالت علياء: العاطفة دمار ... العقل سلاح
منى: العاطفة نور وسط الظلام
يزوي: بين العقل والعاطفة، انا لازم اسافر في كل الحالات
قالت علياء بجرأة: أنتي وجواد شمس وقمر ، ما يتلاقون بـ لحظة وحدة .. فلا تخلين أمل
طالعتها يزوي بألم: علياء اعرف كل هالشي، ما يحتاي التجريح والقسوة
سكتت علياء ونزلت راسها، ومنى قالت لعلياء: تصالحتي انتي وياه ؟
حركت كتفها: مافي زعل عشان نتصالح
ابتسمت منى، ويزوي طالعتها باستغراب، قالت علياء بتنهيدة: يبقى اخوي لو شنو صار، واللي راح راح .. الله يرحم علي، ويرحم كل المؤمنين والمؤمنات
قالوا كلهم: آميين
قالت يزوي: وانتي منوي، بلاج ؟
طالعتهم بحزن: حسين ...!
علياء: شفيه ؟
وجهت عينها لعين اختها: بيسافر!
يزوي: يسافر وين ؟
بلعت ريقها: يقول فرنسا او مصر، عشان الشغل .. وما يدري عن المدة، ما اتخيل يمر يومين! ما اسمع صوته او يمر أسبوع وما أشوفه " وتدلت شفتها ونزلت دموعها "
علياء: اويييه ، البنت عشقانة ودايخة من الحب وخالصة
ضحكت يزوي ومنى ابتسمت بين دموعها: يالسخيفات، اني وين وانتي وين
حضنتها يزوي من جنب: فدييتج، كبرتي وصرتي تحبين هاا
منى: اهو علمني
قالت علياء بنظرة: اوييه، جوفيها يزوي شلون تتحجى، بريئة يازعم، اهو علمها تقوول!
ابتسمت منى وقالت يزوي: انتي ما قلتي لنا وش صار بالسفرة ! ولا عن التطورات، يالبخيلة، اللهم بس عن ليلة الملجة ويوم الخطوبة قعدنا معاج!
علياء: تخاف نحسدها
طالعتهم بعتب: لا تتسيخفون عااد، ما صار جانس يعني شسوي
علياء: علينا هالسوالف؟! الحين اكا صار جانس، انزين وين رحتي البارحة وياه ؟
ابتسمت: ما رحنا مكان، رحنا بيت عمي وقعدنا
علياء: أشك
طالعت اختها باندفاع: يالله عااد، بجدب اني يعني، انتي لو تدرين وش صار، والله انقهرت وتمنيت اني ما رحت
يزوي: شو استوى ؟
منى: جفت معصومة هناك، وتهاوشت وياها، وبغيت افغصها، وشمخت ويها
طالعتها علياء: لحظة شوي، بالهون بالهون .. انتين تتحجين عن روحش؟ اختي منى يعني لو وحدة ثانية
منى: كنت بقتلها لو ما يودني حسين، رفعت ضغطي بشكل مو طبيعي
طالعتها يزوي باندهاش وعلياء قالت: هههههه اني للحين مب مستوعبة
يزوي واهي تكلم علياء: حسيتها نوع اللي متوحشة
علياء: من صدقش ؟
قالت بعصبية: يعني اجدب، شفيكم انتو اليوم
علياء: ويي! قمتي تعصبين بعد، تطور منووي ... هههههههههه شمختينها ؟
قالت بانتقام: أي، وما بردت النار اللي بخاطري، اكرررررررههها لأنها ما تستحي على ويها
علياء: احم، الغيررة وما تسوي
قالت بسرعة: تخسسيي، اني اغار منها؟ حبيبتي اني احلى منها، واصغر، وأحسن بالاخلاق بعد، وبعدين اهي ماضي وانتهى، اني الحاضر والمستقبل، وحسين يحبني اكثر من أي شي بهالدنيا
يزوي: وبعد مغرورة ؟! لا بالله هالحسين سوا اشياءات وايد فيج واحنا مب دارين عنج
علياء: طاعيها بس واهي تتحجى شلون واثقة من روحها
منى: وليش ما اثق حبيبتي؟ قبل لا يتعشون فيني بتغدى فيهم
علياء: مثل غلط في مكانه ... بس زين سويتين، حبيبتي خيووتي صيري قوية، ولاحد ياكل حلالش ولا تخلينها تاخذ ريلش عنش، حاربي بأقوى ما عندش
يزوي: هييه، ولا رمست بكلمة ردي عليها بعشر، وسيري لخطيبج وتدللي عليه وتمي صيحي وظهري دموع التماسيح عسب يوقفها عن حدها
علياء: ههههههههههه صايرين سووس اني وانتي يزوي
ضربوا بكف بعض ومنى ضحكت: لا عن جد، حتى حسين حسيته طالعني بنظررة مب مستوعب ان اني اللي شمختها ويودتها جييه، لان عن جد نرفزتني
علياء: لاا انتي جدي تثبتين انش اختي منوي، سيري على هذا النهج ونحن لكِ من الداعين
ضحكت منى، وقالت يزوي: تأقلمتي وياه بسرعة، شنو كنتي تسولفين وياه؟
منى: كله اسولف عنكم، وعن البيت وعن ربعي، ساعات اندمج، واوتعي انه مو وحدة منكم وارد اصخ
علياء ويزوي: ههههههههههههههههههههههههههههه
منى: ومرة كان يتكلم في التلفون ويا امه، وسكره ورد اتصل بجواد اخوي، واني كنت صاخة لان كنت آكل سندويشة، يوم وصلنا الفندق يقول لأخوي جواد، انت وش عاطني؟ اختك بطنها بطن عصفور، من طلعتنا من الحرم شاري لها سندويشة وهذحنا وصلنا الفندق واهي للحين تنقد فيها، امبييه شنوو استحييت وسبيت روحي
علياء: ههههههه ما هكذا الظن خيوو، فشلتينا ويا الريال
قالت يزوي: احممم بس باين عليه جيي جنـتل
قالت منى بخجل: فدييته ..
يزوي: قمنا نتفدى بعد ههههههه
منى: والله غصب عني حبيته، الاسبوعين اللي عشتهم وياه في سفرنا وبأيام خطبتنا، حسيت فيهم بمشاعر ما قط حسيتها من قبل بيوم واحد
تنهدت يزوي: يا عيني ع الايموشن
ابتسمت: احنا رجعنا البحرين، وتمينا يومين في مكاان بعدين ييت هني
علياء: هااااااااا ؟ وقسم كنت شاكة! يزوي تذكرين يوم اقولش سويت مسكوول وطلع الرنة بحرينية؟ وبعدين يوم جربنا طلع مسكر
ضحكت منى: كنا هني بالبحرين
يزوي: يالاجرام، وشقايل ما خبرتينا، جيي وين سرتوا ؟
منى: رحنا مكاان جميييل، وشريينا جاتوو ولبست ثياب كشييخ ويديدة وسويت له عيد ميلاد
يزوي باندفاع: انزيين وين رحتووا ؟ يالله قوولي!
منى: والله اخاف اقولكم وتاكلوني! شوي شوي علي هاا
علياء: حبيبتي، ايام الوداعة ومسوية روحش نملة صوبنا، رااحت .. انكشفتي عن حقيقتش ويالله قوولي

=========

(( يـوسف ... 7.30 مساءً ))

رفع راسه: حنيــن، زقرري ناصر وتعالوا داخل البيت
حمل عكازه وحاول يمشي ببطئ، تهجمت ملامحه لمّا حس بصعوبة، ورماهم على جنب وقعد على الكرسي مرة ثانية ودخل البيت ....
التفت لأمه اللي دخلت البيت وابتسم لها: السلام عليك
يوسف: وعليج السلام، الله يعطيج العافية أماية
قعدت جنبه وحطت قباله ظرف كبير: الله يعافيك، هذول بطاقات الدعوة حبيبي
ابتسمت ومد يده وفتح الظرف وطلع بطاقة يطالعها .. وابتسم : شغل نظيف، تسلمي لي أماية، ذووقج وايد حلوو
ابتسمت له: يسلمك حبيبي، اهم شي عجبوك، وبرتاح لي شوي بريح ارويلاتي، وبشلهم وبسير بيت خالك وبوزعهم كللهم
يوسف: أماية شلّي بس بطاقات البنات، بطاقات الشباب أنا بوزعهم
رفعت يدها للسماء: عساني أوزع بطاقات عرسك قول آمين يا ولدية
رمش بعينه: آميـــــــن
ضحكت، ودخلت حنين وناصر وميثا، قالت حنين واهي تقعد جنب يوسف: يويو شنو ذاا
ابتسم لها: حبيبتي هذي بطاقات دعوة إلى المرسم حقي
ابتسمت: الله .. بيحطون فيه رسماتك موو ؟ انت قلت
يوسف: اي، وبحط صورتج في بعد
قالت بفخر: اني ابا تحط صورتي أول وحدة
ضحكت نرجس: إن شاء الله بنحطج أول وحدة
قالت ميثا: ماما الشرطة طايفين عند بيت خالووه
طالعتها باستغراب: أي خال؟
ميثا: خالووه أبو صادق، وواقف وياهم إبراهيم ولدخالي، هاك الريال اللي فيه لحية وما نجوفه وايد!
نرجس: تخرطين بالرمسة ولاني فاهمة شو تقولين
قالت حنين: هذي هرارة، اني اقولها هذا مرور هي تقول شرطة
قالت ميثا: لاا شرطة، عليهم ثياب خضرا ماما!
حنين: اصلاً اخو حسين ريل اختي مرور! اني جايفتنه ذيك المرة
يوسف: حنين، اللي عند بيتكم الحين سيارتهم أي لون ؟
حنين: ما ادري! اهم مو عند بيتنا، اصلاً عند بيت ام علي جارتنا
ميثا: لاا واقفين عند بيت خالي
نرجس: كل وحدة حجيها غير عن الثانية! اني بقوم اجوف شصاير!

=========

[ نهاية الفصل الـ 3 من الجزء الـ 39 ]