[سكون الصمت]

دنيا غريبه والبشر مثلها أغراب
لو هي صفتلك ماصفولك بشرها
تعطيك من لذتها كل ماطاب
تغريك ثم تغرك في بحرها
وانا عطتني دنيتي زين الاحباب
اللي بنى دنياي ثم دمرها
لكن حسافه من عشقناه لعاب
لعب باحاسيسي وقطع وترها ...!!!







بعـد شهـرين ...

الموافق/ 3 مـارس
اليوم/ السـبت

(( أســيل .. 6.00 صباحاً ))

فتحت عيونها بصعوبة .. خلاص ما تقدر تصبر اكثر، ولا تقدر تتحمل وتفتح عيونها .. كتبت بالمسن : لولو آنة بطلع بروح أنام .. خلاص دخت ما أقدر أسهر أكثر !
ردت صديقتها: وصلني إيميله !
أسيل: آنة طلعت من الشات من دقايق .. بروح أنام ما أقدر أواصل سهر!
لولو: مضاوي كان يسأل عنج ليش ما رديتي على مكالمته ؟
أسيل: واللي يرحم والديج مالي بارض، أنا هذا ملوع جبدي! انتهت مدته
واهو ما خذ مقلب في نفسه زيادة عن اللزوم، يحن ليل ونهار يبي يجوفني! ما ادري عباله انا شاشة سينما لو شسالفة !
لولو: بل بل! شفيج انتي قبيتي بويهي جذي! اني وش لي خص فيه بعد!
أسيل: عندي بكرة أختبار ولازم اذاكر ! بقـوم انام يالله باي !

============

(( العمة نـرجس .. 8.30 صباحاً ))

قالت بابتسامة: ها اميّة شو رايج ؟
نزلت راسها بخجل: ما عرف اماية .. الشور شورج انتي وابوية!
نرجس: لا حبيبتي، هذي حياتج انتي ... ولازم تقررين بنفسج !
شوق: أبوية شو رايه ؟
نرجس: أبوج مرتاح ومستانس منه .. يقول إنه ريال ويعتمد عليه، وأسامة سمعته وايد طيبة وشخصية مرحة وينشهد له بالخير
شوق: وانتي شو رايج ؟
نرجس: أنا رايي من راي أبوج من بعد شورج طبعاً .. أنا سألت مرت أخوي عنه ولما رمست عن اخلاقه ارتحت .. ما باجي إلا انتي فديتج، انتي يلستي وياه بالنظرة الشرعية ورمستي وياه، شو رايج فيه ؟
شوق: ما ادري امية
نرجس: ما يصير ياشوقاني ما تدرين .. هاي حياتج انتي، لا تستحين فديتج انا امج!
قالت بابتسامة: خلاص عيل الشور شوركم !
نرجس: يعني نقول مبروك ؟
هزت راسها بحيا وسكتت .. زغردت نرجس بصوت عالي: أفضــل الصـلاة والسـلام عليك يا حبيب الله محمـد !
شوق بخجل: أماااااااية! عن الفضايح!
نرجس: خليني استانس فديتج .. انتي اول بجر من عيالي بتزوج .. يا عظم فرحتي! عسى الله يوفقج يا حبيبتي ويفتح عليج أبواب السعادة بإذن الله
باست امها على خدها: تسلمين ماما .. الحين لازم اتجهز عسب نسير الصالون الساعة 11
نرجس: يزوي وعت من رقادها ؟
شوق: لاا للحين نايمة .. البارحة كانت سهرانة لين 3 الفير
نرجس: وكالعادة بدون صلاة صح!
هزت راسها وسكتت، تنهدت امها ..!

يزوي كانت واعية بغرفتها ... مرّ شهرين بتقلبات وأوضاع غريبة .. أبوها قليل الكلام وياها، ويطالعها بنظرات واهي صاخة وساكتة .. كله بسبب سالفة الحجاب!! آآخ عليج يا أماية! كودتي باباتي علي وترستي مخه .. وهذا اهو صاير جاف معاي، وانا نفسيتي زفـت وأمرر من الزفت، كلشي أتحمله إلا جفا أبوية .. والله ما أروم أصبر عنه .. شقايل مرر هالشهرين بهالهدوء ! يـاربي شكثر تولهت عليه ! حتى موضوع الشركة ما فتحه معاي مرة ثانية ولا رمس معاي بشي!
خل اليوم يمر على خيرر وبعدهـا نشوف !

رن تلفونها، طالعت الشاشة بانزعاج لما شافت اسم علياء يولع بالشاشة .. صايرة ما تتقبلها وتتنرفز من ينذكر اسمها .. كله بسببها صار بسيفان جذه! والله مو هاين علي اخوي!
ردت بجفاف: هلا علياء
علياء بصوت عالي: ما كووو وقت .. يزووي اسعفيني .. فستاني فيه بقعة تحت الخصر ما ادري شنوو اسويي!
يزوي: علياء توني فاتحة عييني من النوم وانتي يالسة تصرخين وتباغمين جنج بقرة ع راسي
علياء بغصة: يزويي ما عرف اتصرف! ومنوي طالعة مع محمد اخوي ماكو احد بالبيت غيري .. قعدت من النوم والكل طالع! بلييييز دبريني!
يزوي: خلاص خلاص ... ساعة إلا ربع بالكثير وانا اكون عندج بعد ما اضبط أموري وشكلي .. عندي خط ثاني لازم اسكر، يالله باي !

طالعت الشاشة [ قلبي الحائـر يتصـل بك ] !
دق قلبها .. جـــــواد ؟!!؟

=============

" نهـايـة الفصل الأول من الجـزء الـ 34 "