[أنين الشوق]

اقتباس المشاركة الأصلية كتبت بواسطة ~ غصــ الروح ــن ~ 1- اوصف لنا طفولتك؟

..أقسم طفولتي قسمين ..

_طفولة عشتها ببيت جدي بالديره وهي احلى شي..كانوا عمامي وخواني يتفاوتون بعمري ..فعشتها بدجه وعربجه .. وكل بالشارع ألعب معهم..
_وطفوله لما انتقلنا لبيتنا الجديد بالراشديه ..عشت الوحده والعزله...لاني كنت ممنوعه من الطلعه..

اقتباس المشاركة الأصلية كتبت بواسطة ~ غصــ الروح ــن ~ 2-هل تتمنى ان تعود طفلا؟ ولماذا؟

أترك الجواب هنا..
ليتني طفـلٍ وأكبر همـي لعبتـي..كان صار الهم صغير ابدنيتي
دنيتي همي مطرهـا دمعتـي..ليتني انسى سبايـب لوعتـي

لوعتي دنيا غدرنـي وقتهـا..انتظر لحظة وفا من عطفهـا
اتركتني غارق ٍفـي بحرهـا..قاسيا تشبه قساوة صخرهـا

اقتباس المشاركة الأصلية كتبت بواسطة ~ غصــ الروح ــن ~ 3-هل كنت طفلا مدللا؟

يب .. مدللـــــه عند ابوي اكثر..لاني كنت البنت الوحيده له بين 3 اولاااد..وإلى الان ماتغيرت مكانتي ..فديت راسه جعلني ما ابكيه..

اقتباس المشاركة الأصلية كتبت بواسطة ~ غصــ الروح ــن ~ 4-هل ممرت بصعوبات خلال فترة طفولتك؟

ياليل الشقى ..اكثر صعوبه عشتها لاني كنت البنت الوحيده وسط اولاد حسيت بمعناة الوحده والعزله جد أثرت على نفسيتي ..
لان الاولاد مو كل وقت يبون يلعبون معهم البنات فكنت منبوذه من اخواني..
لاني ما اعرف العب كوره ولا اتصارع معهم ..كنت أكثير أصيح وأشتكي..لانهم مايبوني..ودايما" يطردوني..
فظطريت إني أنعزل ألعب لحالي ...بس كنت دايما"
أصيح على امي تجيب لي خوات عشان ألعب معهم..و للاسف جاو بوقت بدل الضايع لما كبرت..مامنهم فايده...

اقتباس المشاركة الأصلية كتبت بواسطة ~ غصــ الروح ــن ~ 5-هل كنت طفلا هادئا ام خجولا ام مشاغبا؟

كوكتيل ..من هذا وذاك..على حسب الموقف..

اقتباس المشاركة الأصلية كتبت بواسطة ~ غصــ الروح ــن ~ 6-اذكر لنا حادثا مر بك خلال طفولتك ولم تنساه للآن

وهـ حوادث مو حادث بس اكثر شي ..
لما ضعت بسوريا كان عمري 6 سنين..كنت مع امي بالحضره الزينبيه ..من كثر الزحمه ضيعتها..هنا اشتغل الفلم الهندي صياح ونياح..وكنت خايفه حيل..
ظليت تقريبا" نص ساعه ..ادور بالحضره لحالي وكل حين احد مسكني..وانا كنت أفلت منهم..وسبحان الله الله حماني..
و دليت طريق الشقه لحالي..رحت هناك وجلست عالباب انتظرهم..و ماصار دقايق قليله الا هلي جايين وحالتهم حاله كلهم منهارين يدورون علي..
بس من شافوني اكلت علقه ساخنه..حرام عليهم بدل مايخففون من روعتي..قاموا يضربوني.ماكنهم هم الي مضيعيني..بس .يالله اهم شي لقيت هلي..

اقتباس المشاركة الأصلية كتبت بواسطة ~ غصــ الروح ــن ~ 7-لعبتك المفضلة؟

ياكثر ألعابي كانت امي اكثر شي تشتري لي صور بنات تعويضا" عن الخوات..تقص علي..هع
بس اكثر شي دخل قلبي ..لعبة العروسه أسمها ديانا كنت احبها حيل وعندي لها بيت و ملابس كثيره..
وكنت محتفظه فيها 10 سنين .. إلى ان جاو خواتي الأفه وخربوها..ائتلوها وهي بعز شبابها..منهم لله

اقتباس المشاركة الأصلية كتبت بواسطة ~ غصــ الروح ــن ~ 8-هل كنت طفلا اجتماعيا ام انطوائي ولا تحب اللعب والمخالطة؟

اجتماعيه بحكم اني ما كان عندي خوات ومنعزله فكنت احب جمعات الاهل والجيران عشان العب مع بناتهم..

اقتباس المشاركة الأصلية كتبت بواسطة ~ غصــ الروح ــن ~ 10-هل كنت تحب افلام الكارتون ؟ وما هو كارتونك المفضل؟

يب يب كثير..الله على ايام القناة الاولى..ههه
احلى شي توم وجيري طبعا" وسالي..وهايدي..
وكنت اكره شي الكابتن ماجد ما احبه وخواني الاولاد يعشقونه..كنت مظطره اتابع معهم..>>مسببين لي عقده بحياتي..

اقتباس المشاركة الأصلية كتبت بواسطة ~ غصــ الروح ــن ~ 11-كيف كانت علاقتك باخوانك واخواتك؟

انتوا خلوا تركيزكم على اخواني... تراني اموت فيهم وعلاقتي حلوه فيهم الان...
بس اول طلعوا روحي وسببوا لي عقد نفسيه صج الاولاد شريرين..كنت كبش الفداء لهم..ماعندهم الا انا بنت يستقوون علي..
كانوا دايما" يتحرشون فيني ويضربوني وينحاشون الشارع عشان ابوي مايكلمهم..
وألفوا علي اغنيه اذا قالوها أقعد افك حلقي وش كبره من الصياح..>> إلى الان حفظتها بس ماراح اقولها.

اقتباس المشاركة الأصلية كتبت بواسطة ~ غصــ الروح ــن ~ 12-ما هو اصعب موقف حدث لك في طفولتك ولم تستطع نسيانه؟

لما شفت حادث عمي...كنت انا معاه نركض ونتسابق عشان نروح البقاله..ونشتري علكة باباي..كان توه طالع جديد وحنا فرحانين ..نروح ونجي على هالبقاله نشتريه....
لما مرينا على الطريق العام.. طلع لنا فجأ راعي ماطور توجه لعمي وطيره وجرحه بعينه مادري كيف صار كل شي بغمضت عين..
انا هنا انهرت صياح..وتجمعوا علينا وكانوا يصرخون علي يقولون لي روحي نادي هلك والله
انطلقت مثل الصاروخ والغبره وراي .. ناديت خواني وعمامي وجات الفزعه ونقلوه المستشفى
بس الحمد الله طلع منها سليم بس خياط بحاجب العين وسكروها له فتره..
ومن ذاك اللحظه وانا اكره علكة باباي وباباي بكبره..

اقتباس المشاركة الأصلية كتبت بواسطة ~ غصــ الروح ــن ~ -صف لنا موقفك اول يوم دخولك للمدرسة ؟

والله ما أذكر حيل بس اذكر اني كنت خايفه وصحت شوي بس الي شد من أازري شوي ..
إن كانت معي بنت عمي..فكانت كل واحده اذا صاحت تسكت الثانيه..

اقتباس المشاركة الأصلية كتبت بواسطة ~ غصــ الروح ــن ~ 14-شيء كنت تتمناه بطفولتك ولم تحصل عليه؟

كنت أتمنى سيكل حالي حال خواني..بس انا بنت مايصلح..والله كسروا بخاطري >> على الاقل كان أشترولي واحد ألعب بتهوية البيت..هع

اقتباس المشاركة الأصلية كتبت بواسطة ~ غصــ الروح ــن ~ 15-حلم الطفولة ما هو؟ وهل حققته؟

طبعا" لا ماتحقق..كنت اتمنى أدخل مجال الصحافه..دايما" أقول حق ابوي
اذا كبرت بصير صحفيه وهو دايما" يضحك علي..وانا استغرب على ايش يضحك..
وعرفت السبب الحين يعني بالمشمش..

اقتباس المشاركة الأصلية كتبت بواسطة ~ غصــ الروح ــن ~ 16-ما هي الكلمات التي كنت ترددها في طفولتك؟

جيبوا لي اخت ..ليش سميتوني هالاسم..

اقتباس المشاركة الأصلية كتبت بواسطة ~ غصــ الروح ــن ~ 17-هل كنت مطيع لوالديك؟

اي كنت مطيعه ومؤدبه يالبى قلبي ....>>> كذابه
كنت عنيده نوعا"ما..احب امشي بمزاجي..فكنت اعاندهم واجد ..بس اكيد في طاعه..

..
صراحة" أستمتعت جدا"وانا اجاوب على الاسئله..خصوصا" لما أستعدت شريط ذكرياتي..
الطفوله ..أحلى مرحله ..فيها برأه وشقاوة.. مرت علي..وان شاء الله كنت ضيفه خفيفه معكم..
واشكر (فنون ..المجروح ..غصن الروح)..على الطرح المميز المعتاد منه و الأستضافه الرائعه..
ومبروك النيك الجديد ..
.
.
أختار بعدي حبيبة قلبي غلوي..