[سكون الصمت]

شخباركم عساكم بخير ؟؟


مأجورين إن شاء الله بمصاب ابي عبدالله الحسين "سلام الله عليه"





بصراحه اليوم صار لي موقف مادري بشنو أوصفه أتركه لكم وانتوا احكموا عليه ..




اليوم الصبح كنا متفقين انا وزوجي نروح اليحيى نشتري مقاضي للبيت ..


وعاد توه راجع من الدوام ودايخ بقوه بس مافي غير هالوقت عشان باقي اليوم ورانا حسينيات وشغل ..


المهم رحنا الهفوف في وسط الهفوف بنشرت علينا السياره .. وهي قبل بيوم كانت مبنشره عليه هو وصديقه .. يعني السبير هو اللي بنشر



المهم صار زوجي يتصل على ربعه عشان يشوف احد يساعده .. واللي مايرد واللي في الشغل واللي جواله مقفل .. صار وضعنا يرثى له الصراحه ..

وأنا على أعصابي أخاف يعصب علي مع اني مالي شغل في السالفه بس بما انه راجع من العمل يعني شي طبيعي تعبان .. وبيعصب في اي وقت ..


المهم .. قالي انا عادي اروح ادوّر ورشة او محطه اشوف اي عامل يرضى يجي يصلحه بس عليش انتي .. قلت له لا عادي خلاص روح ..


راح هو يدوّر الورشات وانا فتحت درج السياره وأخذت القرآن وقعدت أقرأ سورة يس وصليت على محمد وآل محمد 100 مره وقلت من كل قلبي يااااامهدي أدركني ..

وقعدت أستغفر الله إلين رجع وقالي ماحد رضى يجي معاي .. << كملـــــــــت


وقعدنا في السياره ننتظر رحمة الله .. واتصل صديقه وقال بيجي له وشوي الا اتصل عمي وقال بعد بيجي .. الحمدالله ..

وجا صديقه وأخذ التاير (( الكَفَرْ )) وراح بيوديه يرقعوه .. وبس راح وقفت لنا سيارة ونزل منها اثنين لابسين لبس مكنيكي وصاروا يسلموا على زوجي انا قلت شكلهم اللي من الورشه غيروا رايهم وجوا ,,


نزلت انا من السياره وانا بعدني استغفر الله لأني اخاف ابقى دخل السياره وهم يصلحوا البنشر .. المهم شوي الا رجع صديق زوجي وجاب معه التاير وركبه المكنيكي وراحوا ..


وركبنا السياره .. سألت زوجي منهم ذيلي اللي سلمت عليهم قال هذا واحد كان يجي في الشغل ويعرفني .. قلت يعني اتصلت عليه .. قال لا مار بالصدفه وشافني ونزل لي .. قلت وااااااال سبحان الله شدراه ..

قال بعد شلون ربش اذا وفّق .. قلت اي والله هذا كله من الصلاة على محمد وآل محمد .. لا وصلّحه ببلاش بعد ..



المهم بعد هالحوسه كلها قلت اكيد بيغيّر رايه وبيرجعني البيت .. الا اشوفه يقولي بنروح اليحيى بس قلت ماعليه ..

ورحنا اليحيى ورجعنا وصار الوقت متأخر وانا خايفه اني ما ألحق أخلص طبخ .. وصرت أجهز فطور زوجي وأطبخ الغدا وأرتب الاغراض بسرعه بسرعه ..

وماصارت الساعه وحده الا وانا مخلصه كل شي ..



سبحان الله صج حسيت ربي موفقني اليوم ..



كل هذا من فضل الصلاة على محمد وآل محمد صج من إلتجأ لهم ماخاب ..



شرايكم بهالموقف ..