بيان :- وبعدين يعني
جاسم :- وش فيك وش مسوي
بيان :- جويسم والله مليت أبي أطلع
جاسم :- لا يعني لا ما فيه طلعه
بيان :- ليه
جاسم :- الصراحة ما أقدر أخلي أحد يشوف حرمي المصون
بيان :- الله يخليك نبي شوية أغراض
جاسم :- أقول وين عمتي بس
بيان :- تصريفة ها
جاسم :- لا بس أبي أكلمها عطيني إياها بسرعة
بيان :- لا ما أبي
جاسم :- أقول بلا مبزرة
بيان :- وش قصدك يعني أنا بزر
جاسم :- ويك ويك طفله صغيرة ويك ويك
بيان :- جاسم
جاسم :- ها
بيان :- هوى العدو في نار جهنم قول آمين لا تقول ها
جاسم :- وش تبيني أقول يعني
بيان :- قول لي لبيه سمي آمري تدللي
جاسم :- بعدين أقولك كل هذا الكلام
بيان :- إيه في المشمش
جاسم :- أقول لا يكثر وعطيني عمتي بسرعة
بيان :- اوف طيب
جاسم :- لحظه وش قلتي
بيان :- قلت طيب
جاسم :- لا إلي قبلها
بيان :- قلت أوف
جاسم :- اها خلاص
بيان :- ليه
جاسم :- لا ولا شي أسمعي قولي لعمتي بكره بنروح لمخيم كلنا وأنا كلمت عشان أعلمكم فاهمة ولا تكثرين الهرج
بيان :- هههههههههههههههههههه
جاسم :- خير وش يضحكك
بيان :- تذكرت يوم البر
جاسم :- ههههههههههههههه والله فله وش رأيكم نعيدها
بيان :- وش نعيد
جاسم :- كل شي
بيان :- إيه طيب
جاسم :- حلوه التسكيته
بيان :- جسومي والله ما سكتك أبد
جاسم :- لا خلاص زعلت
بيان :- جسووم
جاسم :- يا عيونه
بيان :- مووووووووووووووووووواح
جاسم :- قوية وش هذه
بيان :- حلالي زوجي وإلا عندك مانع
جاسم :- لا عندي دواس هههههههههه تدري وش يعجبني فيك
بيان :- وشو
جاسم :- جرأتك معي يعني لو وحده ثانية ما سوت كل إلي تسوينه
بيان :- وش قصدك
جاسم :- أقصد إني أحبك يا قلبي
عم سكوت بينهم
جاسم :- ألووو
بيان :- هلا معك
جاسم :- إيه واضح طيب وش قلت
بيان :-
جاسم :- ما انتي معي أبد علميني وش قلت
بيان :- جسووووم خلاص
جاسم :- من عيوني يا روح جسووم
عبد الرحمن :- بكره لا خلاص ما عندي شي
سعد :- اكيد ما عندك شي
عبد الرحمن :- إيه اكيد ما عندي شي
سعد :- أقول متى شفت أم عبد المجيد ؟
عبد الرحمن :- خالتي من زمان ما شفتها
سعد :- عندك شي ألحين
عبد الرحمن :- لا ليه
سعد :- وش رأيك نروح عندها ألحين ونتقهوى معها أكيد هي جالسه لحالها ما عندها أحد
عبد الرحمن :- اوكي طيب بس خلنا نأخذ حريمنا معنا
سعد :- خلاص طيب يله أشوفك هناك
عبد الرحمن :- إن شاء الله
الفصل الثاني والأخير من الحلقة 20
كانت جالسه في الحديقة تحت الشجره العوده في البيت شجرة الاحلام مثل ما تحب نسميها
تحت هذه الشجره قالت أول كلمة حب في حياتها لحبيبها ولزوجها وابوب عيالها وتحت هذه الشجره عرفت بخبر حملها وتحت هذه الشجره بنت احلامها معه مر شريط حياتها عليها من أول يوم جت فيه للبيت وهي عروسه توها متزوجه وبشهر العسل تذكرت خوفها من زوجها تذكرت هروبها منه تذكرت عطفه وحنانه تذكرت همساته لحبه لها تذكرت صبره تذكرت الوعد إلي وعدته فيه إنها راح تكون وافيه له لأخر يوم بحياتها تذكرت خوفه على أخر العنقود ورفضها للزواج من أي شخص يتقدم لها تذكرت خوفه على ولده الوحيد إنه يضل طول عمره بلا زواج
أم عبد المجيد :- أه يا محمد رحت وخليتني في وحدتي صح الكل ما قصر معي بس وجودك معي غير غمضت عيونها شفت يا محمد أخيرا تحقق حلمك هند وعبد المجيد تملكوا إلي كنت خايف إنه ما يتحقق شفه ألحين تحقق وبعد شهور الزواج ياليتك حاضر معنا حست بإحساس غريب أقشعر منه جسمه سمعته يكلمها مثل كل مره بس هلامره كان غير كان صوته يدل على الفرح
وجاها الصوت مثل النسمه سرت في جسمها :- شفت يا قلبي أنا معكم أحس بكل شي وأعرف كل إلي يصير لكم
أم عبد المجيد :- أنت وينك ليه ما تطلع
ومن بعيد شافت لمحه من محمد واقف في نفس المكان إلي تعود يوقف فيه تحت ظل الشجره جت أم عبد المجيد ووقفت حوله مسكت المكان إلي هو فيه وكأنها ما سكه شي وتخاف تفقده :- أشتقت لك
أبو عبد المجيد :- أخيرا قلتيها
أم عبد المجيد :- أجلس ليه واقف تبي شي اجيب لك شي محمد أنت زعلان مني
أبو عبد المجيد :- وليه ازعل يا نظر هالكون
أم عبد المجيد :- مدري خفت إنك زعلان علي
أبو عبد المجيد :- لا أنا موب زعلان ولا راح ازعل
أم عبد المجيد :- فضى البيت من دونك صفيت لحالي ألحين
أبو عبد المجيد :- ومن قال إنك لحالك
أم عبد المجيد :- الكل تزوج وراح لبيته لحياته صفيت انا لحالي في البيت
أبو عبد المجيد :- وانا وين رحت
أم عبد المجيد :- بس
أبو عبد المجيد :- لا تقولين شي شفتي هذي الشجره طول ما هي موجوده وانتي فيه انا راح اكون فيه
نزلت رأسها ودمعت عيونها قطع عليها سرحانها في ذيك اللحظه صوت هند وهو فرحان ومبسوط ويشع بالنشاط
هند :- يمه أنتي هنا وأنا أدور عليك
قربت هند من امها وشافت طيف حزن على ملامح وجهها خافت هند على أمها ومسكت وجهها ورفعته لها
هند بخوف :- يمه حبيبتي وش فيك
أم عبد المجيد تصيح بصمت شكلها يعور القلب
هند :- حياتي يمه وش فيك ليه وجهك كذا وش صاير
أم عبد المجيد :- ما فيه شي وش فيك يا قلبي وش صاير ليه تدوريني
هند :- راشد بيجي بكره
أم عبد المجيد :- الله يحييه ها جهزتي له المكان إلي بينام فيه
هند :- إيه يمه كل شي جاهز
أم عبد المجيد :- الله يستر عليك ويوفقك وياه إن شاء الله
هند بفرح :- آمين يا عسل
أم عبد المجيد :- يله بس جهزي القهوة والشاهي بيجون سعد وعبد الرحمن والعيال معهم
هند :- والله وناسه بس محد قالي
أم عبد المجيد :- وانا قلت لك الحين يله يمديك تجهزينها
هند :- اوكي يمه بس
أم عبد المجيد :- بس وشو
هند بعد تفكير :- لا ولا شي يله بروح أجهزهم تبين شي ثاني
أم عبد المجيد :- تعالي وين بتروحين
هند :- بسوي إلي قلتي عليه
أم عبد المجيد :- ما تروحين إلا لما تقولين لي وش كنتي تبين
هند :- لا خلاص بروح
ناظرتها ام عبد المجيد وتوها بتتكلم إلا يرن التيلفون وتروح تركض لها جاها الفرج برنة تليفون البيت
وأول ما شافت الرقم أستانست من الخاطر وبصوت كله دلع وغنج :- ألوو
فيصل :- هلا وغلا براعية أحلى ألوو بالرياض كلها لا لا وش الرياض إلا الكون كله بمافيه
هند :- تسلم أحرجتمونا
فيصل :- بالله أخبارك حياتي
هند :- نسأل عنك
فيصل :- إيه واضح أنا تكسرت أصابعي من الجوال وإنتي ولا هنا
هند :- سوري حبيبي كنت عند أمي
فيصل :- أها خالتي وشلونها
هند :- ما عليها طيبه بس
فيصل :- وش فيك تغير صوتك بس وشو
هند :- موب عاجبتني بالمره احس فيها شي
فيصل :- مثل وشو قولي يا قلبي
هند :- خايفه عليها
فيصل :- من وشو
هند :- من الوحده
فيصل :- وش ذا الكلام لا تنسين إنها ما بتكون لحالها مي بتكون معها وإلا عندك شك بمي
هند :- لا والله ما عندي شك وانت اخوها
فيصل :- فديتك يالغلا والله أحبك
هند :- وأنا أحبك بعد
فيصل :- لا موب كثري
هند :- فيصل
فيصل :- عيونه السود
هند :- خلصت تأثيث البيت
فيصل :- وأنا مكلمك عشان كذا بس الله يهديك نسيتيني
هند :- خير أمرني
فيصل :- روحي شوفي جوالك أنا أرسلتلك صورة السراميك تبينه هذا اللون وإلا لا
هند :- إن شاء الله
فيصل :- وباقي الغرفه عاد هذه روحي انتي وعبد المجيد وإختاروها وأنا بجي أشوفها وأدفع حسابها
هند :- طيب عندي حل يريحنا إثنينا
فيصل :- آمري وش الحل
هند :- أنت بتودي مي تختار الغرفه صح وعبد المجيد بيوديني وش رأيك نروح كلنا مع بعض
فيصل :- والله جبتيها خلاص بكلم عبد المجيد وبقوله وبكذا يختارون غرفتهم وإحنا بعد نختار غرفتنا
هند :- أوكي حبي اخليك ألحين بيجونا خواتي ألحين قلبي تعال زورنا اليوم مع رجال خواتي
فيصل :- بشوف يالغالية
هند :- اوكي حبي بحفظ الرحمن
فيصل :- يؤ مليتي مني
هند :- أفا يالغالي لا يا قلبي مستحيل امل منك
فيصل :- أجل
هند :- حياتي أنت شكلك مشغول وانا بعد مشغوله ألحين بس والله وعد في الليل اكلمك
فيصل :- إيه مثل كل مره
هند :- لا والله بجد بكلمك