الحلقـــ7ـــة
سامية :- ألو
هدى :- هلا والله بسامية
سامية :- هلا بالغالية وش لونك
هدى بحزن :- الحمد لله على كل حال
سامية :- إيه والله الحمد لله على كل حال عمي شخباره وأمك وأخوانك
هدى :- كلهم طيبين ويسألون عنكم
سامية :- والله أدري إنا مقصرين في حق عمي بس أنتي أدرى بالظروف
هدى :- الله يعين
سامية :- إيه والله الله يعين إلا تعالي أنتي بكرة فاضيه
هدى :- إيه إن شاء الله بتجونا
سامية :- ياليت بس بكرة نبي نروح للملاهي ونبيك تجين معنا
هدى :- صعبة أجي معكم تعرفين البير وغطاه
سامية :- أدري وعارفه بس لأجل عين المفاجأة لازم تجيين
هدى :- أي مفاجأة ؟
سامية :- لو قلت لك وش المفاجأة وش الفائدة أجل
هدى :- إيه والله صدقتي بس لمحي على الأقل
سامية :- سوري ما أقدر بس حاولي تجيين بكرة لأنها فرصتنا الوحيدة وهي فرصتك الوحيدة أنتي بالذات
هدى :- الله يكتب إلي فيه الخير
سامية :- يله أجل سلمي على عمي وأمك والأهل كلهم
هدى :- كان أختصرتي بس ولا يهمك ابشري ولا يهمك
سكرت من سامية التليفون وراحت تقول لأمها وأبوها في البداية رفضوا وفي الأخير أقتنعوا عشان هدى وعشان بنات سارة بعد من زمان ما طلعوا
:
في بريطانيا
هيفاء وعادل وسماح وراكان كانوا طالعين للحديقة
سماح :- هيفاء خلاص يعني عزمتوا تروحون
هيفاء :- وش نسوي بس أشتقت لأهلي تدرين من زمان ما كلمت أمي ولا كلمت ولا وحدة من أخواتي وأنا خايفه عليهم
سماح :- تعودنا عليكم
هيفاء :- وأنا بعد بجد بتوحشونا بس أنتم متى بترجعون للسعودية بعد
سماح :- مدري والله متى جاسم ما بعد قال شي
هيفاء :- بس أسمعي الله لا يهينك إذا جيتوا للرياض لازم تمرونا
سماح :- إن شاء الله
هيفاء :- عادل يا عادل وين راحوا
سماح :- والله ما أدري عنهم يويلي خلينا ندورهم
هيفاء :- عادل راكان عادل راكان عادل راكان
سماح :- راكان يا راكان عادل وينكم عادل
عادل :- أسكت خلهم يدورونا
راكان :- خايف أبوي يعصب علي
عادل :- أوص قلت ولا كلمة
هيفاء :- وين راحوا "بدأ القلق والإضطراب يبين على ملامحها "خلينا نكلم الرجال
سماح :- وش نقولهم العيال ما ندري وينهم والله جاسم لايسوي فينا شي
هيفاء :- والحل
سماح :- نرجع ندور عليهم
هيفاء :- بس أنتي تعبانه
سماح :- ما عليك مني بس أنتي دوري من هنا وأنا بدور من هنا
هيفاء :- أوكي
انقسموا وكل وحده منهم راحت في جهة
راكان :- عادل ما علي منك أنا بطلع لهم لا نضيعهم صدق
عادل :- صدق أنك بزر
راكان :- عادي خلني بزر ولا يصير لأمي شي أنت أبوك حليل ما يسوي لكم شي بس أبوي عصبي والله ليجلدني ويجلد أمي بعد
عادل :- بكيفك أجل أطلع بس لا تقولهم عن مكاني فاهم
راكان:- إيه طيب
طلع راكان وراح لأمه وكان هو وراها وأول ما طق ظهرها فزت سماح من الخوف وألتفت لورا :- راكان يا دب وينك فيه
راكان وهو يبتسم :- كنت ألعب بس وش فيك خفتي
سماح ضمت ولدها :- حرام عليك والله خفت عليك
راكان :- تحبيني
سماح طقته على رأسه :- يا دب وش لون ما أحبك وأنا أمك
راكان :- خخخخخخخ أعرف بس لحظة وين خالتي هيفاء
سماح :- إيه والله ما شفت عادل .. عادل ما كان معك
راكان :- إلا كان معي وترا هو متوزي عن خالتي هيفاء يبي يخوفها عليه
سماح :- بجد ذا الدب خلنا نمسكه بنوريك فيه
راكان يضحك في نفسه :- خخخخخخخ أحسن عشان ثاني مرة تتأدب ما تسويها
سماح :- هذه هيفاء خلنا نروح لها
راحت سماح وراكان لهيفاء
هيفاء :- سماح وين لقيتي راكان فيه وين رحتوا ووين عادل ما هو معك
راكان :- خالتي خليني أتكلم ترى هذه كلها من خطط ولدك عادل هو إلي طلب مني نسوي ذا الحركة نتوزى ونخليكم تدورون علينا أنا قلت له بروح ما أقدر أشوف أمي وهي كذا
هيفاء :- وهو وينه ألحين
راكان :- في نفس مكانا تعالوا معي بس ولا نفس خلينا نخوفه
هيفاء :- يله طيب والله أوريك يا عديل الدب
مشى راكان ومشوا وراءه هيفاء وسماح بدون ولا نفس ولا همس كانوا يمشون على أطراف أصابعهم
راحوا ورى عادل وراء الشجرة أشر راكان لمكان عادل
مشت سماح بخطوات واسعه وهادية في نفس الوقت عشان ما يحس عليها عادل وجت خلفه مباشرة ومسكت بلوزته ورفعته لفوق
عادل خاف من إلي سوى فيه كذا :- من ؟ من أنت
هيفاء وكانت معصبة عليه :- وين كنت يا دب متوزي هنا ها
عادل وفيه الضحك :- هههههه من علمكم مكاني أكيد الدب راكان
هيفاء :- مالك شغل
عادل :- مالك وش فيه مالك الصراحة ما أعرفه
هيفاء وهي عارفة استهبالات ولدها إلي ما تخلص طقته مع رأسه بس مو بقوة
عادل :- أي يمه ضربتيني
هيفاء :- وبكسر رأسك مير يله بنرجع للبيت ما أنتم كفوا من يوسع صدوركم
رجعوا للبيت وهم يضحكون على عيالهم وعلى الهبل إلي هم فيه
:
اليوم كان يوم غير على الكل من أوله كان يوم فرح وسرور أمس جت رنا لبيت عمها سعد والكل فرح فيها وبحضورها عندهم وكان أشدهم فرح هاني ولد عمها
هيا:- يله أبرار ألبسي أنتي ورنا عطيها من ألبس اللي شريته لها
أبرار :- إن شاء الله يله رنا ما سمعتي أمي وش قالت
رنا نزلت رأسها ودمعة بدت تنزل من عيونها
أبرار :- رنو وش فيك يله قومي
جت هيا وجلست جنبها :- رنو حبيبتي أرفعي رأسك مسكت دقنها ورفعت رأسها وشافت دموعها نازله مسحتهم لها وابتسمت في وجهها:- هذه الدموع لا تنزل من هالعيون الحلوة أمسحيهم وأنتي عندي عند أمك وأخوانك وعمك طيب حبيبتي
ضمتها رنا :- خاله أنا أحبك
هيا :- وأنا بعد أحبك وكلنا نحبك يله بسرعة لا يروح الوقت علينا
رنا ببتسامتها العذبة الطفوليه
:- إن شاء الله بس خاله وين بنروح
هيا :- للملاهي بسرعة وبتجي معنا عمتك سامية
رنا وأبرار :- بجد
هيا :- إيه يله بسرعة خلصوا علينا وإلا بهون
رنا :- لا خاله تكفين لا تهونين بنروح نلبس بس أنا ما عندي
أبرار :- من قال ما عندك تعالي أنا شارية لك هديه تعالي خذيها هذا وقتها
رنا :- أبرار
أبرار سحبتها :- يله بس تعالي يله يمه روحي إلبسي بعد أنتي
ضحكت هيا على بنتها و روحها المرحة
سعد :- السلام عليكم
هيا :- هلا وغلا وعليكم السلام
سعد :- أشوف الابتسامة شاقه الوجه خير إن شاء الله
هيا:- أبد سلامتك بس بنتك عذبت ذا المسكينة
سعد وبدأ يعصب :- وش سوت لها ؟
هيا :- لا يروح فكرك بعيد أنت تعرف أبرار وتعلقها الشديد برنا كأنهم أخوات ولا يمكن أكثر بعد سعد ودي أقولك شي بخصوص رنا
سعد :- أمري خير وش فيها
هيا :- سلامتك بس اليوم بنروح للملاهي وقلنا لهدى تجي أنت تعرف أربع سنين ما شافت أمها ولا
سعد :- إيه أدري الله يهدي أخوي ويرحم أمي هم إلي سوو كذا وزين يوم كلمتوها
هيا :- يعني أنت موب زعلان
سعد :- لا وليه أزعل
هيا :- هذا أهم شي وفيه موضوع ثاني ودي أقوله لك
سعد :- اليوم شكلنا ما راح نخلص وش عندك بعد ؟
هيا :- يا ليت تكلم سعد وتخلي رنا تجلس عندنا للأبد يعني نتكفل بكل شي يخصها ولا تروح لأبوها
سعد :- وش قاعدة تقولين أنتي
هيا :- أفهمني أنت ما شفت حالتها يوم جت والله تكسر الخاطر شكل عبد الرحمن زاد بتعذيبه لها
سعد سرحان ويفكر بكلام زوجته :- بس أنتي عارفة عبد الرحمن ما راح يرضى
هيا :- حاول فيه الله يخليك عشان ذا المسكينة والله تكسر الخاطر
سعد :- الله يكتب إلي فيه الخير يله ما بتروحين تلبسين
هيا :- إيه إلا بروح ألبس بس فكر في كلامي زين
سعد :- إن شاء الله يله خلصوا
هيا :- طيب دقايق ونكون جاهزين
سعد :- نشوف ذا الدقائق كم بتكون
ضحكت هيا وراحت لغرفتها تبدل لبسها وهو راح يجهز لهم السيارة