حدثنا عن شخصيتك الصحية بإختصار ؟
بخير ولله الحمد والمنّه
كم طولك و كم وزنك؟ و هل أنت راضٍ عن هذا ؟
بصراحه مو متأكده كم طولي بس تقدري تقولي 160 او 165 .. مقارنة بطول زوجي 190 ماشاء الله ,, يعني انا اصير جنبه رقم 10 .. ووزني حدّث ولا حرج .. خليها مستوره .. واكيد مو راضيه .. وزيادة وزني مو من الاكل من العلاج اللي آخذه عشان الحمل .. شوية زاد من وزني بس حاليا تركت العلاج ووكلت أمري الى الله والحمدالله بدأ يرجع وزني مثل قبل وان شاء الله ينزل أكثر ..
جسمك من الناحية الظاهرية في حالة(ممتازهـ – جيدهـ – متوسطة- مقبولة)
مقبوله .. شوي ..
هل تعاني من ضعف في البصر
لا الحمدالله ..
كم عدد العمليات التي قمت بها في حياتك ؟
امممم .. ولا عمليه ولله الحمد .. وان شاء الله ما احتاج
مـــاهي فصيلة دمك؟
اممممم o-
هذي هي .. اذكر اول مره اخذت تحليل عشان المدرسه طالبينه عشان اعرف نوع فصيلة دمي .. انا رحت اخذته بس مارجعت اخذ النتيجه طلبت من صديقتي تروح تاخذها لأن بيتهم قريب حيل من المستوصف .. ولما اخذتها قالت لها الدكتوره لازم تخليها تراجعنا .. مادري ليش استغربت ,, بس طنشت ومارحت ..
هل تحمل مرضاً مزمناً السكري (الضغط – الربو - ..... ) ؟
لا ولله الحمد ..
هل تحمل مرضاً و راثياً ( الثلاسيميا – نقص الخميرهـ – فقر الدم المنجلي )
أحمل تكسر الدم المنجلي .. والحمدالله على كل حال .. احيانا يأثر فيني لما آكل بليله او فلافل ,, بس شسوي المزاج .. وبعد ما أكثّر منهم يعني احيانا
مـــاهي علاقتك بالرياضة
يعني علاقه متوسطه .. بس حسب الطناقير على قولتهم .. يعني مره سويت رياضه شهر كامل اسوي كل اللي تعلمته من النادي واخذ شوي من النت .. وبس بعدها صرت اتعب بقوه ,, والممرضه قالت لي اذا بتسوي رياضه مشي بس .. بس مافي مكان امشي واصلا ما احب امشي في الشارع الا اذا بيسووا لنا ممشى خاص بالحريم .. يمكن أغيّر رايي .. 
كم مره تمارس الرياضه إسبوعياً و ماهي الرياضة التي تمارسها
مو على طول .. الجو وشغل البيت بحد ذاته رياضه .. بالنسبه لي طبعا .. واكيد مو على طول شغل.. 
حدثنا عن أكلك الصحي علاقتك بالفواكة و الخضروات؟
اممممممم جينا للسؤال المحرج .. شبه معدومه .. يعني نادر تشوفيني اكل فواكه .. والخضروات نادر نادر البطاطس .. والسلطه .. واحيانا الفجل نادر يعني ..
مـــاهي فاكهتك المفضلة ! و ماهي الفاكهة التي لا تحبها
المشمش .. التفاح .. الفندي اللي بدون نوى ,, اللي ما احبها الكيوي والتين والفراوله ,,
مـــاهي الخضار المفضلة و ماهي الخضار التي لا تحبها ؟
مثل ماقلت البطاطس .. وأحيانا الفجل .. والباقي الحمدالله على النعمه .. ما أحبهم .. وهذا اللي مسبب لي هذره من أهلي أنا في غنى عنها .. 
علاقتك بالمأكولات السريعة حدثنا عنها ؟
متوسطه .. يعني حسب المزاج .. احيانا نطلب من المطعم احيانا اشرب حليب فراوله واشبع واحمد ربي وانام .. يعني مو اساسي العشا ..
هــل تشرب المشروبات الغازية ؟ كم مرهـ تقريباً
من قبل كنت اشرب شبه يومي .. بس هالفتره نادر يمكن في الشهر مره او في الشهرين مره ..
هــل تتناول الحليب و منتجاته
الحمدالله .. ايه .. وبالذات حليب الفراوله عشقــــــــــــــــــــي .. أحسن شي سوته السعوديه .. 
(شعرك – أظافرك - بشرتك ) مرآآة صحتك !! كيف ترى صحتك من خلا هذهـ الأشيااء
شعري والله من 6 شهور تقريبا او اكثر وهو في تساقط فضيع .. امي تقول من قلة الاكل المفيد .. بس حاولت اني اعالجه قصيته عشان يخف والحمدالله خف شوي ..
أظافري ما احب اربيهم ابد حتى في عرسي ما ربيتهم .. اللي اذكر ماربيتهم الا في عرس اخوي ,, ولا أفكر اربيهم ,, يعني عدوي اشوف اظافري طويله لو ربع سانتي على طول اقصهم .. يعني ما احب اقعد انظفهم لكل صلاه ويمكن انسى ,, يعني اقصهم احسن .. 
بشرتي الحمدالله بس اعاني من الجفاف والتشققات على فترات وبالذات في الشتاء وعندي اكزيميا في رجولي ,, الى الآن لسى ماحصلت لي فرصه اعالجها .. 
مــــاهي العادات الغير صحية التي تحاول التخلص منها
احاول اني انقص من وزني قد ما اقدر .. واتمنى اني اترك الشيبسات والشوكولاته مع اني مو حيل معها .. وأتمنى أترك عادة التمدد (( التمقّط )) اللي اسويه اول ما اقعد من النوم مره من المرات سويته وجاني شد عضلي في رجلي فضيييع ضل يمكن 10 دقايق وراح بس صح عذاب الالم .. << محد قالج تسوي كذا .. 
بـــإخـــتــصــار ,,,هل أنت إنسان صحي
بصراحه انا اشوف نفسي مقبوله حالتي الصحيه .. يعني الحمدالله على كل حال ,,
ومشكوره حبيبتي زهوروا .. ومشكور أخوي أول الغيث عقبال ما أشوفك في ورطه 
.. وآسفه اذا طولت عليكم ..