قبل العصر بوقت وصله مسج على غفلة وهو يمشي في سيارته راجع من المطعم اللي تغدا فيه ومتوجه لبيته ...
طلع الجوال من جيبه وهو عند الإشارة وشافه من ندى اخته ؟؟؟
ابتسم وهو يفتحه لكن مشاعر ثانية مختلفة انخلقت في صدره واتغيرت بسببها ملامحه لما قرا محتو ى الرسالة ...
كانت تعاتبه وتنبهه ان اللي تعتبر زوجته وبنت عمه في نفس الوقت اليوم عندها موعد مستشفى ضروري .. وهو حضرته ولاداري عنها من يومين كاملات ... لا اتصل ولا سأل ..
وكأنه توه يتذكر انه قال لها ما يبي يشوفها لكنه متأكد انه ما قصد انها تطلع من البيت لكنها هي فهمتها على كيفها وطلعت .. وهو ما كذب خبر ولا عاد سأل عنها ...
تنهد وهو يحس بروحه على حبل المشنقة والخناق كل ماله ويضيق حول رقبته اكثر واكثر وكأنه قرب يقتله .. وليته يخنقه في لحظة وحدة ويكتم نفسه ويموت ويرتاح من هالموت البطئ..
قرر في لحظة تأنيب ضمير انه يغير وجهته ويتوجه للمستشفى عندها .. على الأقل يشوف وش وضعها ويوضح انه مو مطنش ... لأنه يخاف من تبعات هالكلمة ... ويخاف ان اللي حصل من قبل يتكرر ثم يصير وكأنه ما استفاد شي من زواجه من بنت عمه ...
وبالفعل اتصل على اخته وخذ منها المعلومات المهمة وسألها وين هم فيه وين موقعهم بالضبط .. وأكيد سمع له كم كملة عتاب لأنه ما يدري حتى وين تراجع فيه زوجته ؟؟؟؟
.
.
.
كانت هي في هالوقت جالسة مع مشاري اخوها في غرفة الطبيب تنتظره يقرأ لهم نتايج الفحوصات والتحاليل اللي سوتها ...
خوفوها اول مادخلت عليهم وخذوها مباشرة لغرفة الأشعة و بعدين خذوها للمختبر علشان التحاليل ..
وكل هذا لأن المشرف على حالتها هالمرة راشد ولد خالتها ... وهو اللي ما اعجبه وضعها اللي وصلت لهم فيه في موعدها الأساسي من اسبوع ...
كان يقرأ في الأوراق لكن قلبه مآكله عليها من القلق والخوف ... وفي نفسه يتحسب على زياد اللي يعتبره السبب الرئيسي في اللي قاعد يصير لها .. لأنه عمره ماشاف سحر تجي لموعدها وهي محطمة بهالشكل ... لا وفوق هذا من تزوجته ماجابها ولا مرة للمستشفى وكل مرة تجي مع مشاري او مصعب ...؟؟ وهذ يعني ان زياد لامهتم فيها ولا ينااظرها ...
يموت ويدفع نصف عمره لكن يعرف .. ليه خالته سووا في بنتهم هالسوات وزوجوها واحد متزوج وزوجته كانت حامل ؟؟؟ يعني من قلة الخطاطيب اللي كانوا يجون لسحر ؟؟؟
طيب هو كان واحد منهم ومع ذلك رفضوه علشان هالزياد اللي مايدري من وين طلع له في الخط ..
نبهه صوت مشاري :: هاه يا راشد طمنا ؟؟
ابتسم وهو يرفع عينه :: كل شي تمام ... لكن شي خطير اكتشفته في هالأوراق وما اظنه بيعجب سحر أبد ... (( ووجه نظرته لها ))
ارتعدت سحر من الخوف وتجهمت ملامح مشاري:: خير يا راشد ؟؟
ابتسم يطمنهم :: مشاري أختك ما تداوم على علاجها .. والدليل ان تحاليل الدم اللي قدامي تقول ان سحر لها ثلاثة ايام وهي ما تآكل الكبسولة المسيلة للدم ... وهذا مؤشر خطر عليها ..
التفت لها مشاري :: وليش هذا كله يا سحر ؟؟؟ يعني انتي بيبي لازم الواحد يداريك ؟؟ والا لازم انبه زياد انه كل يوم لازم يحط الحبوب في فمك ويأكلك اياهم غصب ؟؟
تنفست بعمق والغصة تخنقها ولسان حالها يقول .. مو لازم يحط لي الحبوب في فمي ... بس يسألني أنا اكلتهم أو لا ...!! بس والله ما ابي اكثر من كذا ...!
..........:: سحر وين رحتي ؟؟
رفعت عينها لأخوها مبتسمة :: معك وين بروح ؟؟
تنهد :: وش ردك على كلام راشد ..؟
هزت كتوفها بألم :: اللي كاتبه ربي بيصير سواء كلت الدواء والا ما كلته ؟؟
رفع راشد حاجبه في غضب :: بس ربي يقول اسعى يا عبدي وانا اسعى معك ؟؟ ما قال اتكلوا على الأقدار ولا تجتهدون ولا تعملون بالأ سباب ؟؟
طالعها مشاري بقلق وهو اللي مو عاجبه وضع اخته مطلقا :: سحر فيه شي مضايقك ومخليك تنسين مواعيد علاجك ؟؟؟
توها بترد وتدافع عن زياد لا يتهمونه بشي .. لكن دقات الباب الخفيفة خلتها تسكت ..
والأنظار كلها توجهت للباب ...
عقد راشد حاجبه :: تفضل ...!!
انفتح الباب بهدوء وطل منه زياد بهيبته وطوله و طلته الوسيمة اللي خلت قلب سحر يتراقص بين ضلوعها ...
أول ما طاحت عينها عليه واستوعبت انه هو ... خنقتها العبرة وهي تتذكر الكلام اللي قاله لها .... لكنها لما شافته واصل لها للمستشفى ما قدرت تشيل في خاطرها اكثر وما تقدر تنكر فرحتها او تخفيها بجيته لها ...
ابتسم زياد لهم :: فاتني شي مهم ؟؟؟
ابتسم مشاري :: داخل سينما ؟؟؟
ضحك زياد وهو يسكر الباب وراه :: لا بس علشان أتأكد انكم ماتخبون علي شي عن حالة سحر ..
اول ما قال هالكلمة تسمرت نظرات سحر عليه وعلى عيونه بالتحديد ...
يعني مهتم فيها ويخاف عليها ؟؟؟
يعني أكيد تعني له شي ؟؟
ما قدرت تصدق أبدا وحست ودها تصيح من الفرحة ...
ابتسم راشد له :: سلامتك لكن تو حنا مكتشفين ان سحر ما تآكل ادويتها بشكل منتظم والأسباب مجهولة ؟؟؟
ونظره مركز على زياد ...!!
رفع الأخير حاجبه وطالع في سحر :: و ليه ماتآكلينهم ؟؟؟
ضحك مشاري :: وانت توك انتبهت ؟؟
هز زياد كتفه :: انا اللي اعرفه انها كبيرة كفاية علشان تعرف مواعيد ادويتها وماتحتاج احد يشيك عليها ... لكن الظاهر من هاللحظة لازم اراقبها ...!!
خلاص ما يحتاح تراقبني ... جيتك هاللحظة وكلامك اللي قاعد تقوله لي الحين كافي علشان اتحمس آكلهم واعيش باقي حياتي معك ... كان هذا الكلام اللي يدور في راسها ...
خلص راشد كاتب كلمتين على الورق اللي في يديه وبعدها طلع روشتة الأدوية وكتب كم كلمة وعقبها طالعهم :: ما فيه شي جديد الا ان سحر لازم تهتم بنفسها أكثر .. وهذي أسماء ادويتها الأولى في حال خلصت قبل الموعد الجاي علشان تقدرون تصرفونها من المستشفى بسهولة .. (( وابتسم ))
تقدم مشاري لكن زياد سبقه وخذ الورقة وهو يبتسم :: مشكور يا راشد وما قصرت ...
طالعه راشد بنظرة لها هدف :: المهم صحة سحر ... مو مهم المجهود اللي نبذله ؟؟!!
ما فهم زياد نظرة راشد لكنه عرف انه يقصد شي ..
اخذ الورقة وطالع في سحر :: يالله نمشي ...
وقامت سحر وراه على طول ومعهم مشاري وراحوا كلهم للباب بيطلعون ...
ولما ما بقى غير زياد وقبل لايطلع التفت لراشد بحاجب مرفوع :: كل مواعيد سحر عندك ؟؟
طالعه راشد من وراء النظارة :: ليه ..؟؟ أخاف ما عاجبك شغلي وتشخيصي كطبيب ؟؟
زياد :: لا العفو ... لكن أسأل بس ..
ابتسم راشد باستهزء وتهكم واضحين في ملامحه وجلس وهو يقول :: للأسف لا ... لكن هالمرة لأن موعدها طارئ حولته لعيادتي والا هي تراجع عند الدكتور إياد ..
هز زياد راسه و ابتسم على مضض واستأذن منه وسلم عليه وطلع يلحقهم ..
ويشوف حياته وش مخبيت له بعد ...؟؟!!
---------------------------------