التفتت عبير لإيمان :: وانتي عارفة بهالشي ؟؟
هزت إيمان راسها بإحراج ...
زفرت عبير النار :: ماراح أوقع لأني مو موافقة ..
شهقت أريج :: عبير لاتصيرين مجنونة ؟؟
عبير بقل صبر :: انا مجنونة لو وافقت وطاوعتكم على استغفالكم لي ...!
مشت بتطلع لكن راكان مسكها مع يدها وهو يبتسم :: طيب مافكرتي الناس وش بتقول عليك لو تكنسلت هالملكة بعد ؟؟؟
كأن مويه حارة انكبت على وجهها ... هي بين أمرين احلاهما مر ..؟ لو وقعت الناس بتظن السوء في نواف وهي أصلا مو مستعدة لزواجها منه ومافكرت فيه وفوق هذا استغفلوها ؟؟ ولو رفضت يعني الكلام واللغط بيكثر عليها وهي مو ناقصة ؟؟
وقفت مواجهه لأخوها وهي تطالعه :: حتى انت يا راكان معهم ؟؟
حزت في خاطره هالكلمة لكنه حافظ على ثباته :: لو مو في مصلحتك اللي سويته كان والله ما فكرت فيه ...
غصب عن عبير نزلت دمعتها وصرخت :: بس أنا ما ابغاه ليه تجبروني عليه ؟؟ ليه تحطوني أمام الأمر الواقع وفي موضع محرج ؟؟ ليه ماشاورتوني قبل لا تبيعوني ؟؟
حاول راكان يهديها :: عبير حنا مابعناك ولا شي ... كل اللي نبيه منك توقعين علشان تضمنين حياتك في المستقبل ..
عبير وسط دموعها :: اي توقيع واي خرابيط ؟؟ كان كملتوا لعبتكم بعد ووقعتوا عني ؟؟
ابتسمت أريج :: كان بودي اسوي هالشي لكن عاد مصخناها معك ؟؟
انقهرت عبير من ردها :: وانتي ماشاء الله ولا غلطة ولازلة ؟؟؟ كل شي ماشي معك مثل الساعة ...
نزلت أريج راسها وما ردت ...
التفتت عبير بانهيار لإيمان :: وانتي ليه اشتركتي معهم ؟؟
سكتت إيمان وماردت ..
أما راكان فنزل وجاب الدفتر من الأرض .. وتقدم لها
...:: عبير السالفة ماتستاهل ؟؟ واحنا لاتلاعبنا فيك ولا غشيناك ... وبعدين انا ماجبت لك هندي من الشارع وقلت لك تزوجيه ؟؟؟ هذا نواف ولد عمي وانتي اكثر وحده تعرفه ...
طالعته عبير بنظرات مبهمة وودها ترفع يدها وتسطره كف ...
راحت بتطلع وتسفههم لكنه وقفها :: عبير اكنسل ؟؟؟
وقفت مكانها وهي معطيتهم ظهرها ؟؟؟ مزيج من المشاعر الغريبة اجتاحتها بعد كلمة راكان ؟؟؟ معقولة تبي تكنسل كل شي ؟؟؟ لو كنسلت هالمرة معناتها بتخسر كل شي ..؟؟ سمعتها ؟؟ نواف ؟؟ وهذا هو الأهم ؟؟؟
طلبها ورفضت ... وتقدم لها ورفضت ... والحين بيتملك وهي تفشله وما توقع على الموافقة ؟؟؟
خلاص هذي بتكون النهاية لها مع نواف ...
لأنه مهما كان هو رجال وعنده كرامة ؟؟؟ ولو تغاضى عنها مرة ومرتين فـ لايمكن انه بينزل راسها للمرة الثالثة علشانها ..
تنهدت بقهر من الموقف اللي انحطت فيه بغير رضاها ...
وتقدم لها راكان ومد لها القلم ...
رفعت عينها طالعته وكأنها تعاتبه ..
وبالفعل دمعت عيونها وصاحت من قلبها ...
شخبطت كم كلمة على الدفتر وفتحت الباب تركض وراحت لغرفتها .. ملاذها الوحيد ...سمعت زغاريد بس ماهمها ... ولا فرحت اصلا ...
رمت نفسها على السرير بعد ماقفلت الباب وبدت تصيح ...
سمعت توسلات امها بعد ساعة علشان تنزل تسلم على المعازيم لكنها رفضت بتاتا انها تفتح أو تطلع ...
اليوم انصدمت وماتوقعت كل اللي يصير ...والله يستر من اللي بيجي بعد ؟؟
------------------------------------------------------
في اليوم الثاني ...
كانت عذا تطلع الدرج بهدوء وخفة وروية متمسكة في الترابزين وتعد خطواتها خوفا منها لا يرجع الضباب الأسود أو حتى ينخفض ضغطها فجأة وهي تطلع الدرج وتطيح وتكون العواقب وخيمة ...
أول ما وصلت بالسلامة للدور الثاني شافت ندى طالعة من دورة المياه اللي في الصالة وهي تمسح عيونها بالمنديل ...
ما اعطت الموقف بال وابتسمت وراحت لها ..
لكنها شهقت لما شافت ندى تصيح ... ومسكتها مع يديها :: خير ندى وش فيك تصيحين ؟؟
شهقت ندى وزاد نحيبها ... وخافت عذا عليها لايكون صاير لهم شي وهي ماتدري ..
عذا بصوت عالي :: ندى لا تصيرين سخيفة ،،، خوفتيني تراك قولي وش صاير ؟؟؟
رفعت ندى عينها وهي تمسح دموعها :: صار اللي توقعته يا عذا.. وياليتني ماكشفت؟
طالعتها عذا بنظرات وهي مو فاهمة شي من الخرابيط اللي تتكلمها ندى ...
وحست ندى ان عذا مو فاهمة شي :: طلعت حامل ؟؟
سكتت عذا متفاجأة وثواني بعدها ابتسمت :: مبرووووووووووك ندوش ألف مبروك ؟؟ بس عاد ليش تصيحين ؟؟ بالعكس المفروض تستانسين ؟؟يعني وحده يحصل لها تصير أم وتصيح بهالقوة ؟
ندى وهي تدمع :: إذا كانت هالأم علاقتها مع زوجها سوية من حقها تفرح لكن وحده مثلي المفروض تندب حظها الشين اللي رماها مع واحد مثل مشاري لا وفوق هذا تحمل منه ؟؟؟..
عذا : استغفري ربك ندى لايبلاك بالشين ... وبعدين بالعكس يمكن الحمل هذا يكون فاتحة خير عليك ؟؟ يمكن أول ما يدري مشاري عنه يغير رايه ويحس بالمسؤولية أكثر ...
تنهدت ندى وطالعت في عذا ::: لكن مشاري مايرضيه الا شي واحد .. وحتى لو قلت له اني حامل يمكن مايهتم كثير ...؟؟
عقدت عذا حواجبها :: مستحيل ما أتوقع ان فيه أب ما يبي عياله ..؟
رجعت ندى تصيح مرة ثانية وهي عارفة ان هالموضوع ممكن مايكون له تأثير على مشاري كثر ما الموضوع الأساسي ممكن يأثر عليه ... لكن وش تقول لعذا ؟؟ والله مشاري ماراح يقتنع ويحس بحبه ناحيتي الا اذا انتي تخليتي عن زياد ؟؟؟ والا وشلون بتشرح لها موقف مشاري وسبب مخاصمتهم ...
انكسر خاطر عذا على بنت خالها وابتسمت له :: اسمعي ترى شريط التحليل ممكن مايكون صادق ... انا اليوم عندي موعد روحي معي وخلي الدكتورة تكشف عليك أضمن ؟؟
رفعت ندى عينها لعذا متشككة من الموضوع وخايفة من التأكيد ... خايفة لا تروح وتقول لها الدكتورة ايه انتي حامل ..
اصرت عليها عذا :: لازم تروحين .. كذا والا كذا لازم تتأكدين ؟؟ يا فعلا تصيرين حامل وتهتمين من نفسك وتتركين عنك الخرابيط ... أو ما تصيرين حامل وساعتها دموعك وفريها لوقتها .. ( وابتسمت ))
تنهدت ندى وهزت راسها :: متى بتروحين انتي ؟؟
عذا وهي تطالع الساعة :: بعد المغرب ان شاء الله بياخذنا زياد ..
ندى :: خلاص اجل اروح معك ..
ابتسمت لها عذا تواسيها وهي حاسة بالألم اللي في قلبها ... ومشت ندى رايحة لغرفتها وتاركة عذا وراها تطالعها بنظرات ألم وعذاب على بنت خالها ...
ماتحب تشوف مثل هالمشاهد المأساوية أبد .. تكره الحزن والمضاربات وتحب السلام والهدوء والحب ...
تنهدت ولفت رايحة لجناحها ترتب عمرها واوراقها علشان الموعد .. وتوها داخلة غرفتها سمعت التليفون يرن ..
راحت تركض ترد عليه وبغت تموت من الوناسة من شافته رقم خارجي يعني أهلها اكيد ومن غيرهم ؟؟
رفعت السماعة بلهفة :: هلا وغلا بأحلى ناس في قارة أوروبا كلها ..
ضحكت سارة :: عارفين عارفين انك اكبر منافقة في الجزيرة العربية ..
ضحكت عذا :: لو ادري ان انتي المتصلة كان ماقلت هالكلام على بالي أمي ...
سارة :: لا أمك عندها اليوم عزيمة من الصبح وهي تتعدل ..
عذا :: صرتوا تنعزمون بعد ؟؟
سارة بتأكيد :: اجل ... اصلا الكومبلكس اللي احنا فيه اغلبه خليجين وعرب يعني وناسة ماكأننا في ديرة غير السعودية ..
ابتسمت عذا :: الحمدلله ربي عوضكم .. المهم كيف حالكم وش اخباركم ..؟
سارة :: عم نشقح وننطح ... نسأل عنك وعن البيبي ؟؟ وش اخباره ؟
نزلت يد عذا لبطنها :: ماعليه مشتاق لجدته وخواله ... واليوم عندي موعد علشانه
شهقت سارة :: ياويلك ان علموك وش جنسه وماتقولين لي ترى والله ماجيب لك هدية ؟
ضحكت عذا :: مابعد صار وقت الكشف وبعدين انا ما ودي اعرف عنه ابخليها مفاجأة .. المهم ماقررتوا ترجعون ؟؟
تنهدت سارة :: قسم بالله مليت ودي ارجع لكن وش اسوي بـ أبوك ؟؟ لكن أسامة ياحظه بيرجع هاليومين علشان يضبط اموره للترم الجاي ..
شهقت عذا مبسوطة :: من جدك والا مقلب وخرابيطك اللي ماتخلص ..؟
سارة بنقمة :: أشوفك مستانسة برجعته .. يا حرام وحنا عندنا هنا وحده لو تدري انه بيرجع كان انجلطت وماتت .. مسكينة ..
عقدت عذا حواجبها :: مين ؟؟ أمي ؟؟
ضحكت سارة :: لا أي أمي انتي بعد ؟؟ هذي وحده جت نتيجة لبطولات اخوك ومغامراته العاطفية ؟؟ والله أسامة طلع مو سهل ياعذا وصار عنده معجبات ؟
ضحكت عذا موت :: والله ؟؟ لاتقولين ألمانية ؟؟
ضحكت سارة : لالا .. هذي وحده إنما ايه تحفة ؟؟ خليجية طال عمرك وهم جيرانا ..
صرخ أسامة علشان تسمعه عذا :: عذا لا تصدقينها تراها أكبر نصابة على وجه البسيطة
عذا :: سويرة تنصبين ؟؟
شهقت سارة :: الحين انا متصلة عليك من آخر الدنيا ومخسرة ابوي علشان أكذب؟؟ بس هو اخوك صاير ستبنه ويستحي ؟؟
عقدت عذا حواجبها :: صاير ايش ؟؟
سارة :: استبنة ؟؟
عذا :: وش هذي بعد ؟؟ يعني انا ماظن ان عيال المانيا يعرفونها ؟؟
ضحكت سارة :: لا هذي تربية المعهد اللي نروح له ؟؟ خليطي كله عيال وبنات ... خليجيين أغلبهم بس لايفوتك كلامهم تحفة وانا عاد تعرفيني ما يعوقني شي واتعلم .. وآخر كلمتين ستبنة و سبال ...
عذا :: طيب وش سالفة اخوك بعد ؟؟
تحمست سارة :: ايه والله ذكرتيني .. من جد انا ماقلت لكم عنها ؟؟
عذا بقل صبر :: لا ماقلتي .. ويالله عاد تكلمي ..
تنحنحت سارة :: ترجيني طيب ..
تنهدت عذا بقهر :: سويــــــــــــــــرة ..!!
ابتسمت سارة :: ايوه شوي بعد ..؟
ضحكت عذا غصب عنها :: زين يالله سارة يا حلوة بليز تكلمي ...!
تربعت سارة :: زين اسمعي اللي يجيك ... الله يسلمك هذي وحده خليجية هي واختها يدرسون معنا في نفس المعهد اللي اروح له انا واسامة وابوهم تعرف على ابوي في مسجد اللي في نهاية الكومبلكس المهم باختصار صرنا ربع ..
عذا بحماس :: طيب كملي ..
سارة :: ادري اني بكمل لاتقاطعيني ؟؟ شوفي البنت مو شينة يعني مملوحة وشكلها مقبول ومرتب .. بس أخوك زياد أسر لبها من أول نظرة ......
ضحكت عذا :: وش اسر لبها ذي بعد ؟؟ شكلك تروحين بارات يا سويرة
شهقت سارة :: أنا اروح بارات آخر عمري .. بس شوفي هو ودي لكن سي العمدة يقول لا..
صرخ أسامة :: انتي ما تحملناك ومارحتي لبار بعد تبينا نتحملك وانتي بتروحين
سارة :: اقول اسكت انت .. اسمعيني عذا اكمل لك ..
عذا وهي تجلس على السرير بتعب :: هاه كملي ..
سارة بحماس :: عاد اقولك أسامة طالع شي .... مو هو ابيض وشعره شوي أشقر ومسوي لحية خفيفة ولايفوتك قصة شعره ؟؟ خلاص عذا اخونا انحرف عن الطريق السوي وصار بدعة زمانه ..
ضحكت عذا :: انا مادري من وين تجيبين اسلوبك ؟؟
سارة :: أقولك سام طالع حلو بس انه نحيف لكن والله نحفه صار يتلاعب فيه مرة يلبس جنزات وتي شيرتات كأنها برميل زبالة عليه لكن مايخالف المهم ان شكله آآسر يعني لو هو مو اخوي كان حبيته .. تدرين الأستاذة حقت اللغة تقول له انت وسيم ؟؟
وصلها صوت أسامة :: حبيبتي معك أسامة بن محمد مو حيا الله ؟؟
عذا :: ماقلتي لي بعد انه صار شايف روحه ؟؟
سارة : ياحليلك من زمان ... المهم أكمل لك .. البنت ذي غرقانة لشوشتها معه ...
عذا :: وش اسمها ؟؟
سارة :: شوفي هم اختين وحده كبرك وكأنها انتي نلعب في حسبتها غبية وساذجة
صرخت عذا :: سويررةةةةة ترى بتهور واسكر السماعة في وجهك ..
كملت سارة :: طيب آسفة ... المهم اللي كبرك هي اللي تحب سام اسمها عفراء واختها مريم كبري ..
عذ :: وااو كشخة بعد أسمائهم ..
سارة :: مو شي .. المهم مرة مريم غابت عن المعهد هي واختها وكان عندنا حفل ختامي للأنشطة عاد استغربت غيابهم والله وهم كانوا متأكدين انهم بيجون .. عاد يوم وصلت العصر قلت لأمي بروح أشوف وش فيهم ما حضروا .. ويوم جيت بطلع وقف في وجهي روميو زمانه وقال أبد انا بوصلك .. عاد انتي عارفة هو ليش بيوصلني علشان يقعد يتدلع عندها ...
ضحكت عذا موت وصرخ أسامة :: عذا لاتصدقينها تراها تقول أشياء خياليه من عقلها ..
سارة :: لاوالله مسكين تنكر اني اشوفك تستحي منها ..
عذا وسط ضحكاتها :: من جد يستحي ؟؟
سارة : ايه ابشرك انه للحين مؤدب مايطالع فيها ولا يقول لها شي عاقل ..
عذا :: الحمدلله ماراحت االتربية ؟؟
سارة :: عاد أقول لك .. يوم طلعنا ومشينا لبيتهم لمحناها هي الحبيبة عفراء جالسة في الحديقة اللي في نهاية الكومبلكس ومعها اخوانها الصغار يلعبون .. عاد والعفاريت قامت تتنطط من قدامنا ... وتذكرناك وتذكرنا أيامنا الخوالي وحسينا اننا من زمان مالعبنا على أحد .. المهم وبعد التخطيطات الجهنمية ... تلفعت انا بالحجاب وحطيته لثمة وأخوك الكريم وقف بعيد شوي .. وتقدمت انا وحطيت يدي على فمها والقلم قربته لرقبتها يقال انه مسدس ... وصرخ عليها أسامة بالإنجليزي قال لها لاتتحركين
عذا منصدمة :: يا حيوانات يا مجرمين ؟؟
ضحكت سارة :: اصبري شوفي وش صار لها ؟؟ مسكينة بغت تموت مكانها حاولت تقوم وتتحرك بس هيهات وانا ماسكتها لكن اخوانها الصعاليك الصغار ماعرفوني وراحوا ينادون ابوهم ... ويا فشيلتاه .. المهم حسينا ان البنت ممكن تنهار وعلى بالها بنخطفها فتقدم سام وقال خلاص اتركيها عاد هي من قامت جت بتنحاش بس مسكتها وحاولت افهمها انه انا اللي كنت من شوي ؟؟؟ مسكينة كفرت فيني وبس تضربني ونست تواجد سام ..
تنهدت عذا :: حسبي الله عليكم طيرتوا عقلها ؟؟
سارة بصوت حزين :: بس جاء من هو أقوى منا وطلع لنا اخوها يركض والله يخوف اول مرة نشوفه اثاريه جايهم زيارة ؟؟ تقدم لسام وبغى يطحن عظامه بس اشوى تقدمت هي وقالت له اننا جيرانهم ونلعب معها والحمدلله طلع ابوهم وعرفنا والا كان الحين حنا في عداد الموتى ..
عذا :: اعتذرتوا لها ؟؟
سارة : لا هي رضت من نفسها ؟؟ بس ماهانت على سام واعتذر لها وقال انا آسف ماقصدت يا روح قلب أسامة انتي ..
ضحكت عذا وسمعت اسامة يتهاوش مع سارة على التليفون وعقبها وصلها صوته
عذا وسط الضحك :: اجل روح قلبك ؟؟
أسامة بصوت يصارخ :: اختك هذي مادري من وين تجيب كلامها ؟؟ المهم كيفك وكيفه زياد ؟
عذا :: الحمدلله تمام انت كيفك مع هالمغامرات اللي ماندري عنها ؟؟
أسامة :: لاتصدقين كلام سارة ...!! كل مافي الموضوع ان البنت احسها تميل لي بس انا هالشي مايرضيني علشان كذا مااعطيها وجه ..
عذا مبتسمة بحب :: بعدي والله الثقيل ؟؟
أسامة :: تعرفين اخوك وتربيته ... بس احاول اوضح لها اني مو مهتم ؟؟ مرة ارسلت لنا هدايا لعيد الكرسمس بس رحت انا وسارة ورجعناها لهم ؟؟ استحت وقالت انه مو قصدها الكرسمس بس قلنا خليها عندك لمناسبتها ؟؟
عذا :: هذولا اخواني اللي اعرفهم ؟؟
ضحك اسامة :: اسكتي والله سارة فضحتني عند الكل حتى امي صرت استحي من نظراتها ؟؟ كأن مافي الحياة الا هالبنت وانا ..
عذا :: زين خل امي تخطبها لك ؟؟
أسامة باندفاعية :: مستحيـــــــــــــــــــل ... أنا غير السعودية ما اقبل ؟؟
صرخت سارة :: قصده لميس ؟؟
رماها اسامة بالمخده وطالعها بعيونه الغاضبة ... وسفهها
ضحكت عذا :: أخافها تنجرح اذا رجعت سام ؟؟
ضحك اسامة :: انا اللي قايل لها حبي سعودي متعصب ؟؟ هي حبتني من نفسها فـ تتحمل ؟؟؟ ماعلينا وأنا متأكد اني من اسافر اكيد بتنسى ؟
تنهدت عذا :: اتمنى ..
اسامة :: مع ان امها قريبة لأمي بقوة وخذت العنوان من امي ،، وامي كذلك لكن الله يستر ..
عذا :: ياخوفي تخرب عليك يوم عرسك ؟؟
أسامة يضحك بعنف :: انتي مأثر عليك اللي تقرينه ... المهم انا ان شاء الله برجع عما قريب يعني اسبوعين ثلاثة بالكثير وان شاء الله أهلي مايبطون عقبي .. وسلمي على زياد ولمياء و تكفين تحفظي على السالفة تراني مو ناقص فضايح ؟؟
ضحكت عذا :: والا تخاف يسمعون عنك ناس ؟؟
مارد اسامة على سؤالها :: وعلى فكرة ابرسل لك صوري الجديدة بالإيميل شوفي وشلون صاير حلو ووسيم ؟؟
عذا :: زين انتظرك ..
تنهد اسامة :: يالله عاد نسمع صوتكم بخير ..
ابتسمت عذا بحزن وودعته وسكرت منه ...
تنهدت بألم وانرسمت على شفايفها ابتسامة حلوة ؟؟ ليتها كانت عندهم هناك كان حضرت هالمغامرات الأنتيكة اللي يسوونها اخوانها وكان جلست مع هالعفراء وشافت وش مشاعرها تجاه سام ؟؟؟ من تذكرت سام ضحكت صدق اخوها مملوح من قبل بس ياترى وش مسوي بشكله وطلع بهالجمال اللي حتى سارة الغيارة مدحته عليه ؟؟؟
خافت لما هز كتفها والتفتت بعد ماشهقت ... غمضت عيونها مرتاحة لما عرفت انه زياد ..
زياد :: وش عندك تضحكين مع نفسك ؟؟
ابتسمت له :: اهلي تو مكلميني ويعلموني عن مغامراتهم ؟؟
عطاه زياد ظهره :: اكيد سام و السوري صح ؟؟
هزت عذا راسها وهي تقوم .. :: ومن غيرهم ؟؟ المهم متذكر ان عندي موعد اليوم والا نسيت ؟؟
زياد من الحمام :: لا مانسيت بعد الصلاة خلك جاهزة ؟؟
فتحت عذا الدولاب تجهز لها لبس :: ان شاء الله وترى ندى بتروح معنا ؟؟
طلع زياد من الحمام وهو يمسح بالفوطة :: وش عندها ؟؟ يعني مايكفيك تواجدي ؟
ابتسمت له :: لا وش دعوى ؟؟ بس هي بتروح تتأكد من نفسها ؟؟
وقف زياد مصدوم ومتفاجأ ؟؟ ورفع حاجبه وعيونه طارت في وجه عذا :: تتأكد من ايش ؟؟
عذا :: من انها حامل ؟؟
سكت زياد وفي وجهه مرسومة معالم الصدمة والمفاجأة .. كان بـ ندى وتأنيب الضمير عليها ,,؟؟ والحين صرنا بـ ندى وولدها ؟؟؟ أي كارثة يا زياد قاعده تطاردك وتقض مضجعك ؟؟؟ ليه الأيام عيت تزين معك ؟؟ ليه الأقدرا أقسمت انها تكون ضدك ؟؟ يعني ذنب هالولد في رقبتك لو ماعاش مع ابوه وحرمته منه ؟؟؟ بكره لو قالوا له الحقيقة قال خالي زياد المذنب الأول ؟؟؟؟
غمض عيونه وسحب شماغه ومن دون ما ينطق بأي حرف طلع من الغرفة وعذا تطالعه مستغربته ومستغربة صدمته ؟؟ وش قصته هالزياد كلما قلنا له أحد حامل سبل عيونه و انصدم ؟؟؟ معقولة عنده حساسية من الحمل ؟؟
------------------------------------