بعد المغرب دخلت ندى بيت عمها جايتهم زيارة وهذا بحكم ان ندى و زياد انتقلوا لبيتهم الجديد من فترة فـ صارت هي تجيهم شبه يوميا لأنها ما تحب تجلس في البيت بروحها وهي ماعندها شغل ... دخلت مع باب الصالة الرئيسي لكنها ماكملت خطواتها لأنها سمعت صوت عيال عمها مجتمعين بالصالة الجانبية ... فحبت تنسحب وعلى طول تصعد الدرج .. لكن استوقفتها شنطة سفر صغيرة تحت زاوية الدرج .. عقدت حواجبها وهي تحاول أنها تتصنت على الأصوات لأن فجأة قلبها فز من شافت الشنطة فـ مباشرة توقعت انه وصل اليوم من سفره ...
بعد ما دققت في الأصوات زين.. فعلا صار مشاري من ضمن الجالسين ... وشكله توه واصل من بريطانيا ... ابتسمت وهي تشوف الخدامة متوجهة للصالة وفي يدها صينية الشاهي أشرت لها علشان تجي ولما قربت سألتها إن كان مشاري جاء فعلا و إلا هي تتوهم ... وأكدت لها الشغالة إنه وصل اليوم قبل المغرب وهو جالس معهم الحين..
تركت الشغالة تروح وطلعت هي الدرج تنتظر سحر تسلم على أخوها وتشبع منه وبعدين بتتصل عليها وتقول لها إنها فوق في غرفتها تنتظرها ...
أول ما وصلت لجناح سحر تذكرت الأيام الخوالي هي و إياها وكيف كانت حياتهم مع بعض وكيف كانت ذكرياتهم و أحلامهم... كانت هي ما تتكلم إلا عن طلال.. وسحر ما تستحي إلا من سيرة زياد لكن الأقدار صارت أقوى منهم هالمرة وحرمت الثنتين من أغلى شخصين على قلوبهم أيام مراهقتهم واللي عقبها ...
دخلت الغرفة وحصلتها مظلمة والأنوار مسكرة وما فيه إلا التدفئة هي اللي تشتغل ... فتحت الأباجورة وسكرت الباب من ورآها وجلست على المكتب تحوس وتقلب لحد ما يجي الوقت المناسب علشان تبلغ سحر إنها موجودة في البيت...
لكن الأخيرة كانت اسبق منها... وفجأة إنفتحت أنوار الغرفة كلها على ندى اللي كانت جالسة على نور الأباجورة وتقرأ في الرواية اللي مسندة على الكومدينو بجنب السرير ...
رفعت ندى راسها وابتسمت لسحر اللي وجهها كان مصفر وشاحب بسبب الأنيميا الحادة وقل التغذية اللي نزلوا عليها فجأة (( طبعا فجأة بالنسبة للي حولها لكن هي عارفة ان واحد من أسباب اللي فيها هو معارضة القدر لأحلامها وأمانيها وانسداد شهيتها المفاجئ اللي جاء وكأنه يعاقب قدرها على اللي يسويه )).. ردت لها سحر الإبتسامة وقربت منها ..
سحر ::/ قالت لي روسيدا انك فوق عاد قلت اجي اشوفك واشوف علومك ؟؟
ضحكت ندى ::/ ادري كان المفروض اقولك اني جيت على طول بس والله لما دريت ان مشاري وصل قلت اتركك معه شوي وبعدين اناديك ...
ابتسمت لها سحر::/ خلاص شبعت منه حد الغثيان .. يالله عاد قومي ننزل تحت في صالتنا ونتذكر الأيام الخوالي ...
ندى وهي تقوم ::/ ياللا مشينا .. والله اني متولهة عليها ومفتقدتها هي أكثر شي
مشت سحر بتطلع ::/ أكيد بتفتقدينها هي والا راعية الصالة ماتهمك علشان تفتقدينها
ندى وهي تلحقها ::/ أكيد هذي مايبي لها كلام ... من متى انتي اصلا شكلتي لي أهمية
التفتت لها سحر وتسوي نفسها معصبة وحاولت تضربها لكن ندى فلتت منها وراحت تركض على الدرج بتنزل ... اما سحر فلما جت تلحقها شافت النور في غرفة مشاري مفتوح فـ توقعت انه طلع لغرفته وحست انها الفرصة المناسبة لها تكلمه وتشوف وش أسبابه ... طلت براسها مع الترابزين وصوتت على ندى .. ردت عليها الأخيرة وقالت لها سحر تنتظرها في الصالة وهي شوي وبترجع ...
مشت سحر لحد ما صارت مواجهه لباب مشاري وبهدوئها المعتاد دقت دقات خفيفة على الباب ... في ثانية وصلها صوته المجلجل يسمح لها تدخل
ابتسمت سحر وهي تطل براسها من وراء الباب .. لكن مشاري كان جالس خلف مكتبه ومنهمك في قراءة الأوراق اللي بين يديه ... تنهدت سحر من اخوها اللي الشغل عنده أهم شي ودخلت وراحت تجلس قدامه على الكرسي ...
وأخيرا انتبه لها مشاري ورفع راسه يبتسم ..
بادلته سحر الإبتسام وعلى طول قالت ::/ أشوفك انشغلت بالأوراق ولا نمت ؟؟
مشاري وهو يطالع في الورق ::/ قلت اخلص كم شغله وبعدين اتمدد على السرير
هزت سحر راسها وكملت ::/ما ادري متى بتعتق نفسك
مشاري ::/ انا مرتاح كذا ..
سحر ::/ ايه بس ماشفنا هالراحة اللي تقول عنها في عيونك ..
تنفس مشاري بعمق وطالعها بنص نظرة وبعدين رجع عيونه للأوراق ::/ انتي عارفة ليه ما تشوفينها ... وحتى لو كنت مرتاح فـ ثقي أنك هالوقت هذا ماراح تلقينها ..
تنهدت سحر ::/ أنا مادري ليه محمل الموضوع أكبر من حجمه ... طيب أنت ليه رافض ندى ؟؟؟ يعني والله انها بنت تستاهلك بكل معنى الكلمة ولو انا شفت فيها أي شي ما يناسبك أو يمكن انك انت ماترتاح له او تحبه كنت والله بكون أنا اول وحده ترفض هالزواج ...
سكت مشاري دقيقتين وهو عاقد حواجبه والظاهر ان فيه شي في الأوراق مو عاجبه وبعدين كمل مع سحر ::/ انتي عارفة ان رفضي على فكرة الزواج .. مو على بنت عمك
سحر بنبرة مصدومة ::/ يعني بالله عليك بتجلس طول عمرك عزابي ؟؟؟
مشاري ::/ لحد ما اقتنع بفكرة الزواج ...
سحر بقهر ::/ ايه بس عمرك ماراح تقتنع وانت حاط في بالك انك ماتبي تتزوج
رفع مشاري عينه لها ::/ وش تقصدين ؟؟
كملت سحر بحماس ::/ أقصد انك انت عمرك ما بتقتنع في الزواج مادمت تكرر اسطوانة انك رافض الفكرة .. لكن صدقني لو سمحت لنفسك انك تفكر بشكل أعمق كان والله اقتنعت من زمان من يوم خطبت ندى
عقد مشاري حواجبه وعلى فمه نصف ابتسامة ::/ قصدك ان الموضوع يتعلق بشي نفسي ؟؟
هزت سحر راسها مبتسمة ::/ بالضبط ...
نزل مشاري عينه للأوراق ::/ لكن صعبة أتأقلم نفسيا وانا واقعيا ما أبغى أتزوج
سحر مستغربة ::/ المعنى ؟؟
مشاري ::/ خلاصة الحديث اني انا مستحيل أرغب بفكرة الزواج وانا مو قتنع فيها وموافقتي هذي كلها علشان عناد أبوي وتعصب أمي لنا ... والا لو كانت أضرار الرفض بتكون علي انا بس كنت رفضت وانا مغمض عيوني ومن دون ما أناقش أحد لكن لما شفت موقف امي وابوي من الرفض ماحبيت السالفة تكبر وقلت يا ولد كلها ورقة توقعها وتتزوج وانتهينا ولا تصير مشاكل لأمي بسببي ..
انصدمت سحر من كلامه::/ مشاري حرام عليك اللي انت تقوله ... هذا أول زواج لك .. يعني ليلة عمرك المفروض كلامك يكون مشرق ومليان تفاؤل ... مو تتكلم بهالصورة الميئوس منها والله العظيم ما كأنك معرس جديد توهم خاطبين له وابوه قايل له عن الملكة من دقيقتين ......
رد مشاري بكل برود ::/ إلا ابوي متى قال يبي الملكة ؟؟
انقهرت سحر منه ووقفت بعصبية ::/ مشاري وش هالبرود ؟؟
مشاري بعصبية مكتومة ::/ اللي بوصله لك اننا انتهينا ... الملكة والزواج وابوك حددهم في نهاية شهر ثلاثة ... وانا رافض الفكرة وموافق عليها بالغصب فـ مايحتاج تجين تناقشيني في شي انا منتهي منه من زمان ...
سكتت سحر ومشت معطيته ظهرها بتطلع من الغرفة ... وأول مامسكت مقبض الباب نادها مشاري يسألها ....::/ الا متى موعدك إن شاء الله ؟؟
تنفست سحر بعمق وانقبض قلبها بمجرد ذكر هالخبر .. :::/ أول خميس بعد العيد
هز مشاري راسه ::/ تمام .. بس اعملي حسابك هالمرة بتكون مراجعتنا عند راشد ولد خالتي..
جمد الدم في عروق سحر ::/ ليه ؟؟؟ والدكتور إياد وين راح ؟؟
مشاري ::/ طالع في إجازة يعني كل مواعيد عيادته تحولت لراشد .. وعموما الدكتور إياد يمكن ينتدبونه لمستشفى حكومي فـ اعملي حسابك انه ممكن بعض مواعيدك تكون على عيادة راشد ...
سحر بتوسل ::/ طيب خلنا نغير المستشفى ونروح لواحد ثاني
ضحك مشاري عليها ::/ انا اللي بوديك لمواعيد المستشفى الأهلي علشان ما تستحين من راشد وبالنسبة لتغيير المستشفى فـ انسي ،،،، لأن هذا المستشفى عارفك وعارف طبيعة حالتك فلا تحاولين تناقشيني ..
سكتت سحر وماردت على مشاري أصلا هي عارفة سواء عارضت والا ماعارضت مشاري هو اللي بيمشي كلمته ... طلعت من الغرفة وسكرت الباب وراها من القهر والضيقة بسبب هالأخبار اللي صعقوها فيها اليوم ... اول شي خبر تقديم زواج مشاري وندى وطلب أبوها لها انها تبلغ ندى علشان تأجل الكورس الجاي وتتزوج .. وثاني شي معارضة مشاري وعدم تقبله للفكرة من البداية .. وآخر شي ان موعدها هالمرة عند راشد .. يعني حالة التوتر بتزيد من كونه موعد قلب إلى انه موعد وعند راشد بعد..
وكلت امرها لربها ونزلت تحت لبنت عمها على أمل انها تحاول تنسى هالأخبار الصواعق اللي صارت تنزل عليها كل شوي .. ومازالت غير متأكدة هل هي بتقدر تقاوم للنهاية والا بتضعف وتنهزم .................................................؟
----------------------------------------------------------------------------