بعد ماخلصوا من الغداء وقبل أذان العصر ...
حب زياد يدق الحديد وهو حامي وماينتظر لبعد الصلاة .. أصلا وش اللي ممكن يصبره لحد ماتنتهي الصلاة ...
كان كل شوي يطالع في أسامة يبغاه يقوم علشان يخلا الجو له ويصير على راحته مع ابو عبدالله ...
لكن أسامة ما فهم وش يبي منه زياد ... وبعد جهد ومضارب بالعيون ...
ابتسم أسامة وأخيرا فهم مقصد زياد واستأذن منهم وطلع بحجة أن بيتمدد ويرتاح قبل الأذان ...
تنفس زياد الصعداء وهو يراقب أسامة يطلع ... وبعدها التفت لأبو عبدالله وشافه يناظره وهو مبتسم ...
ابتسم زياد بارتباك ...
ابو عبدالله ::/ أنا فاهمك ... وعارف ليش قطعت سفرتك ورجعت ...
زياد بعتاب ::/ مادمت عارف ياعمي ليه سويت كذا وظلمتني حتى قبل لاتسمع رأيي ؟؟
تنهد ابو عبدالله ::/ زياد حط نفسك في مكاني ... وهذي هي بنتك ...؟؟ هل كنت بتتصرف مثل ما انا سويت ..؟
زياد بدفاع ::/ كنت بتصل على اللي خاطبها واشاوره ..
ضحك ابو عبدالله بخفيف ::/ هذا إذا كان اللي خاطبها معطيك كلمة ثابتة ... مو يجيك أبوه أو حتى اللي في حسبة أبوه وتتفاجأ انه مايدري عن السالفة ؟؟؟ ولاحتى هالخاطب عطاهم فكرة عن الموضوع ...
انصدم زياد ::/ بس ياعمي أنا قايل له اني ابغى عذا واني بخطبها ...
رفع ابو عبدالله حاجبه ::/ لكنه يقول انك ماقلت له شي ...
تلعثم زياد وماحب يطلع عمه كذاب ::/ يمكن نسى أو ماادري عنه وش صارله لكني متأكد اني قلت له من قبل .. وكنت قايل اني ماراح أخطبها رسمي الا لما أكوّن نفسي واكون جاهز للزواج ..
قاطعه ابو عبدالله ::/ وانت الحين شايف نفسك جاهز ؟؟
زياد بجزم ::/ مليون في المية .. أصلا قبل لاأسافر كنت مقرر أجي واخطب رسمي لكن هالسفرة جت مفاجأة وماعملت حسابي لها فـ قررت أأجل الكلام عن هالموضوع لحد ما أرجع بالسلامة ...
سكت أبو عبدالله ومارد على زياد ...
لكن زياد نفذ صبره وقال ::/ هاه يا عمي ؟؟؟ وش قلت في كلامي ؟؟
ابو عبدالله ::/والله ما ادري وش اقول لك ؟؟
زياد باندفاع ::/ خلاص ارفض ولد عمي لأن خطبته جت على خطبتي وهذا مايجوز ... وعذا تصير لي بعد موافقتك طبعا (( ونزل عينه بخجل ))
ابتسم ابو عبدالله ::/ يصير خير ان شاء الله ..
زياد ::/ لا الله يخليك أنا ماراح انتظر أكثر لأني ماعاد أضمن ..
عقد ابو عبدالله حاجبه ::/ كيف ماعاد تضمن ؟؟
ابتسم زياد متفشل ::/ لا ياعمي يعني قصدي تروح تسألها عن رأيها الحين وترد علي ..
ابو عبدالله ::/ مو المفروض انك تخطبها مني رسمي وتجيب عمك وعياله ؟؟
سكت زياد من منطقية كلام ابو عبدالله .. بس بعدين قال ..
زياد ::/ حنا أكيد بنجيكم ,, لكن الحين اضمن لي موافقة عذا ...
أذن العصر وقطع عليهم كلامهم ...
وسكت ابو عبدالله يكبر وراء الإمام ...
وبعد ماخلص الآذان .. وقف ابو عبدالله وتبعه زياد ..
ابو عبدالله ::/ يصير خير يابو سلطان .. ابشاور البنت ونشوف رايها ..
زياد بلهفة ::/ ومتى بترد علي ؟؟
ابو عبدالله وهو ماشي بيطلع ::/ قريب ان شاء الله ...
طلع ابو عبدالله ولحقه زياد وتوجهوا لمكان الوضوء علشان يتغسلون ويطلعون للمسجد
-------------------------------------------------------------------------------
على وقت العشاء من نفس اليوم ...
دخلت سحر على ندى في الغرفة وهي تبتسم وخدوها مشتعلة .......
ابتسمت لها ندى ::/ وش عندك داخلة تتبسمين ؟؟
كملت سحر مشيها ::/ انتي وين جوالك ؟؟
التفتت ندى للكومدينو وخذت جوالها من فوقه ::/ أوبس مقفل.. الظاهر خالص شحنه ..
ابتسمت سحر وهي تفتح دولابها ::/ أحسن شي سويتيه انك ماشحنتي جوالك ..
طالعتها ندى بحاجب مرفوع وكأنها تتساءل ؟؟
ضحكت سحر بخجل ::/ زياد اتصل من شوي وقال يبغاك ..
ضحكت ندى وهي تنزل من السرير ::/ وانا على بالي أقول وش عندها الآنسة داخلة تضحك كأني أحس انك انتي اللي راده عليه ...؟؟
حضنت سحر وجهها بكفوفها ::/ ماتشوفين هذا قلب طماطة ؟؟ يعني أكيد اني سمعت صوته ..
حست ندى بخنجر يطعن قلبها على بنت عمها ...
والله لو الموضوع بيدها كان عاقبت عذا على فعلتها في أخوها وزوجته سحر .. لكن وش تسوي بأخوها يوم انه صار عنيد ومايبي الا اللي في راسه ...
هزت ندى راسها تبتسم ..
وطلعت نازلة لأخوها ...
وأول مادخلت عليه في الملحق . شافته متمدد ومتلحف بالبطانية وفاتح التلفزيون ...
ابتسمت وهي تسكر الباب وراها ..::/ وش عندك طالبني ؟؟
التفت لها زياد ::/ الاقولي انتي اللي وش عندك مقفلة جوالك ؟؟
جلست ندى جنبه وصبت لها شاهي :/ ماكان فيه شحن ...؟ نعم آمرني وش عندك ؟؟
تعدل زياد في جلسته ونزل رجوله من على الكنبة وقابل ندى ::/ اسمعيني زين ... اليوم رحت لعمي محمد وـ ــ ـ ـ ـ ـ ـ ـ ـ ـ ـ
شرح لها كل شي بالتفصيل ...
ندى مبتسمة ::/ حلو ..يعني حليت الإشكال ؟؟
زياد بخوف ::/ أنا سويت اللي علي بس بقت عذا و ردها .. وعمي قال بيشاورها وللحين مارد علي ؟؟
ابتسمت ندى تطمنه ::/ لا ماعليك عذا أكيد بتوافق عليك ..
زياد ::/ والله مادري بس أحس ان قلبي ناغزني ...
ندى ::/ تعوذ من الشيطان ومابيكون الا كل خير ..
زياد بقل صبر ::/ طيب اسمعي .. اتصلي على سارة أو لمياء وجسي نبضهم ..
شهقت ندى ::/ انت وش قاعد تخربط ؟؟ وش تبي عمي محمد يقول عنك ؟؟
تأفف زياد ::/ اسمعي انتي الكلام وماعليك .. اتصلي على لمياء وشوفي وش عندهم ..؟؟ والله ياندى اني مااقدر اصبر ولا أظن اني بنام اليوم مرتاح لو ماسمعت ردها ؟؟
رحمته ندى وكسر خاطرها .. هزت راسها مقتنعة وقامت من عنده تجيب جوالها ..
طلعت لغرفة سحر وخذت جوالها ونزلت لزياد مرة ثانية ...
واتصلت على لمياء .. تحت مراقبة عيون زياد
ندى وهي تكلم لمياء ::/ أنتي وينك الحين في بيتك والا في بيت أهلك ؟؟
لمياء ::/ لا في بيت أهلي ..
ندى ::/ أهاا .. طيب ماسمعتي أخبار مني مناك ؟؟
ضحكت لمياء وهي قايمة بتطلع من عند جمعة اهلها ::/ إلا سمعت ... وفرحت واستانست لآخر درجة ... لكن رد عذا كسر مجاديفنا كلنا وحطمنا ..
شهقت ندى ::/ ليش وش قالت ؟؟
تنهدت لمياء ::/ رفـــضـــت ...!
سكتت ندى وهي تطالع زياد ::/ وليش الرفض طيب ؟؟ يعني وش مبرراتها ؟؟
هزت لمياء كتوفها ::/ ما ادري عنها كل اللي قالته انها مقتنعة في مصعب وماتبي كثر كلام ...
عصبت ندى ::/ وليش حضرتها ماتبي كثر كلام ؟؟
قاطعهم زياد بعصبية ::/ وش شايفه فيه علشان تتمسك في الموافقة ؟؟؟
حاولت ندى تأشر له يسكت ... وزياد حاول يمسك أعصابه علشان ما تنفلت من يده ويتهور ...
لمياء ::/ والله ياندى قولي له ان حتى احنا اهلها ماندري وش قصتها .. يعني ابوي كلمها وامي وانا واسامة وهي راسها وألف سيف ماتبي أحد يناقشها في قرارها النهائي وآخر شي طردتنا من الغرفة وسكرت على نفسها الباب ..
ندى بضعف ::/ يعني وش الحل ؟؟
لمياء ::/ أبوي يقول انه بيصبر هاليومين وماراح يرد على عمك ... وبيشوف عذا وش رايها النهائي ..
ندى ::/ ولو أصرت ...؟
لمياء ::/ ساعتها كل شي نصيب ...
انصدمت ندى من رد لمياء ...؟؟
رفعت عينها لزياد وشافته يحترق في مكانه وينتظر الرد اللي يشفى غليله ...
تنهدت ندى بألم على اخوها ورجعت تكلم لمياء ::/ زين لمياء طولت عليك .. بس تكفين أي مستجدات أو أي اسباب تقولها لكم علميني عنها علشان أقدرأقول لزياد يشوف نفسه ...
هزت لمياء راسها ::/ خلاص أبشري ..
ندى ::/ ياله في امان الله
لمياء ::/ مع السلامة ..
سكرت ندى عن لمياء وشرحت لزياد كل اللي انقال ..
وعلى عكس ماتوقعت .. شافت زياد ساكت وما أبدى أي انفعال أو ردة فعل ...
أما لمياء فـ بمجرد ما سكرت الخط شافت وراها سارة أختها والدمعة حايرة وسط عينها من تأنيب الضمير ... استغربت منها لمياء هالتصرف فقربت منها وحاولت تهديها وتفهم منها اللي يخليها تصيح .................................................. .......!
------------------------------------------------------------------------------
ماسكة الكوب بيدها وتدوره بين يديها وباين عليها السرحان وتشتت التفكير ...
ام رااكان ::/ هاه وش قلتي ياعبير ؟؟ ترى تفشلنا مع أمهم ... مرتين اتصلت علي تسألني عن رأيك وانتي لحد الآن مارديتي علي بشي ..؟
تنفست عبير بصعوبة ::/ وش قلتي لها ؟؟
ام راكان ::/ قلت لها تتصل علي بعد يومين .. وان شاء الله انتي تردين علي قبل هاليومين علشان ماتفشليني مع الحرمة ... يعني هي مايبي لها تفكير ... يا إيه يا لا ..
تنهدت عبير بحزن ::/ خلاص يمه ... قبل هاليومين بيوصلك رأيي ... بس انتي خليني اسوي اللي في بالي واصفي أموري وعقب كل شي بيكون مثل ما تبيبن ...
ابتسمت ام راكان بحب ::/ مثل ماتبين انتي ... مو مثل ما ابي انا لأن هذي حياتك أنتي وبس ...
هزت عبير راسها وهي تغتصب الإبتسامة ... وقامت من عند أمها ماشية للتليفون ...
رفعت السماعة وطلبت رقمه اللي ياما تعودت تتصل عليه للفزعات ...
رد عليها ببرود وجدية ماتعودتها ... وأول ماسمعت صوته حست بالعبرة تخنقها وبالدموع تتزاحم في عينها ..
عبير ::/ السلام عليكم ..
نواف مستغرب وفي نفس الوقت فرحان ومشاعر غريبة تزاحمت في قلبه ::/ هلا وعليكم السلام ...
بلعت عبير ريقها ::/ كيف حالك نواف ؟؟
نواف باقتضاب ::/ الحمدلله انتم كيفكم ؟؟
بلعت عبير ريقها بصعوبة ::/ احنا الحمدلله تمام ...
سكتت شوي وبعدين قالت ::/ نواف إذا أنت فاضي اليوم ليتك تمرنا البيت ..
عقد نواف حواجبه مستغرب لأنه من عقب الموقف ماعاد طلبوا منه شي ::/ خير عسى ماشر ..
منعت عبير شهقتها لاتطلع وتوصل لمسمعه وكملت ::/ إذا جيت تعرف كل شي ... بس ليتك تحصل وقت تجينا فيه اليوم ..
هز نواف راسه وهو خايف ::/ خلاص انا لو حصل لي دقائق واكون عندكم .. والا انتظروني بعد العشاء ..
عبير ::/ خلاص تم .. يالله مع السلامة ..
نواف ::/ الله معك ..
سكر نواف عن عبير وقلبه مقبوض من صوتها وطلبها المفاجئ .. يعني عقب اللي صار كان موصي عمر أخوه اللي بالثانوي يشوف لهم مشاوريهم ... وعقب ما الله كتب الهداية لراكان خلاص ماعاد صاروا بيت عمه يحتاجونه لا هو ولا اخوه إلا فيما ندر ...
تمتم بينه وبين نفسه (( الله يستر )) ...
قام نواف من مكتبه وتوجه على طول لمكتب زياد يستأذن منه بالخروج ..
دخل عليه وشافه غايص في أوراق وحوسة .. ابتسم وهو يشوفه ويتذكر أيام الجامعة والهبال اللي كانوا فيه واللي فجأة انقلب جد من أول يوم استلموا فيه اشعارات التخرج ...
تنحنح ::/ احم احم .. ترى عندك ضيوف ...
رفع زياد راسه مبتسم ::/ هلا نواف ..
تقدم نواف له بملامح جدية ::/ زياد انا جاي أستأذن منك أطلع قبل نهاية الدوام ... عندي موضوع عائلي بس شكله خطير ..
عقد زياد حواجبه ::/ خير عسى ماشر ..
تنهد نواف ::/ والله مادري وانا اخوك لكن بطلع الحين واشوف وش صاير عليهم ...
ابتسم زياد ::/ المرة هذي بتطلع سماح لأنك مابعد تثبت في الشغل .. لكن المرة الجاية اسمح لي باضطر أكتب لك تأخير ...
هز نواف راسه ::/ لا أبد غير هالمرة ماعاد بستأذن ؟
هز زياد رأسه واستأذن منه نواف وطلع ...
ما كانت إلا دقائق بسيطة و رن التليفون بتحويل من مكتب السكرتارية على زياد ...
كان ياسر السكرتير المؤقت الملزم بتدريب نواف يبلغ زياد ان عنده ضيف يبي يقابله ..
زياد مستغرب ::/ من هو ؟؟
ياسر برسمية ::/ مؤيد عبدالكريم بن نايف
زالت معالم الإستغراب لما قدر زياد يتذكر الإسم زين ... وبصوت ترحيبي رد على ياسر ::/ زين خله يتفضل ...
سكر زياد السماعة وقام من مكتبه متوجه للباب ..
لكن مؤيد سبقه ودخل عليه ... ابتسم له زياد وتقرب منه وتصافحوا بحرارة ..
زياد ::/ زارتنا البركة واالله ..
مؤيد ::/ الله يبارك فيك ويسلمك .. مع اني عارف انك مو متوقع هالزيارة أبدا ..
ابتسم زياد بخجل ::/ والله ان كنت تبي الصراحة ايه .. يعني ماكنت متوقعك بتزورني في يوم من الأيام ...
جلسوا الأثنين في الجزء الخاص بالإستقبال وكمل مؤيد ::/ توقع اي شي مني انا خصوصا .. وبعدين يا أخي والله انك دخلت قلبي من يوم العزيمة وقررت أزورك عقبها بس يالله ماحصل لي غير هالحين ..
زياد ::/ تسلم والله ... والله يحيك في أي وقت ..
سكتوا شوي .. وبعدها ضحك مؤيد وهويقول ::/ كيف يعني ماراح تشربنا شي ..؟
ضحك زياد ::/ الله يقلع بليس وما أنسانيه الا الشيطان أن أذكره ..
ضحك مؤيد بصوت عالي ::/ لا وطلعت مثقف بعد ... والله انك شي
ابتسم زياد ::/ أعجبك .. إلا ماقلت لي وش تشرب ؟
مؤيد ::/ شاهي وماعليك أمر ..
زياد وهو يرفع السماعة للتحويل ::/ ابشر ..
طلب لهم شاهي ورجع يسكر السماعة وعيونه مركزة على مؤيد ..حاس ان عنده كلام لكنه محتار كيف ينطق .. وفاجأه مؤيد لما بدأ كلامه ؟..
مؤيد ::/ زياد انت الحين شريك عمك الرسمي ؟؟
هز زياد راسه ::/ الله الله .. أنا شريكه الرسمي لكن مابعد تم هالقرار ...
مؤيد ::/أهاا .. يعني مسموح لك بالتصرف في الأملاك والتوقيعات
ابتسم زياد ::/ مو كل شي بالضبط ... لكن لي بعض المستحقات اللي انا مسؤول عنها
مؤيد بنبرة سخرية مخفية ::/ بس طبعا تحت اشراف عمك ...
زياد ::/ أكيد لأنه هو رئيس مجلس الإدارة وحسابات الشركة كلها تحت يده ..
مؤيد ::/ وانت ؟؟
زياد ::/ انا ما أدخل في حساب الشركة العام لكن لي حسابي الخاص اللي أقدر أحول عليه ارباحي ...
ابتسم مؤيد ::/ حلو .. يعني انت الحين تملك المال اللي تقدر تساهم فيه او تسوي مشاريع ؟؟
ضحك زياد ::/ مشاريع مرة وحده لا ما اقدر .. لكن مساهمات أشياء بسيطة ممكن حسابي يقدر عليها ..
هز مؤيد راسه بتفكير ::/ هممم ...
رفع حاجبه وبنص ابتسامة قال لزياد ::/ طيب واللي يقول لك انه بيدخل معك في مشروع يضمن لك انه بـ يدر عليك أضعاف اللي تربحه سنويا ... وبكذا تقدر تزيد حساب أرباحك وتسوي لك مشاريعك الخاصة باسم الشركة وارباح هالمشاريع كاملة بتكون لك ..
استغرب زياد هالكلام ::/ ومن هالللي بيسوي لي هالمعجزة (( وابتسم ))
ابتسم مؤيد ::/ لايكون حاقر اللي قدامك ..؟
زياد ::/ لا أبدا .. (( وباستغراب )) يعني انت اللي بتشاركني ؟؟
انتبه مؤيد وتحمس وتعدل في جلسته ::/ ايووووه عليك نور ... الحين انت شريك عمك بالإسم بس .. وانا واخواني شركاء لأبوي في أملاكه .. واللي يجمعنا مع بعض اننا مانقدر نتحكم بأشياء خاصة ولا لنا مشاريعنا الخاصة .. فعلشان كذا أنا اقول نتشارك انا وانت في مشروع واحد .. ومن هالمشروع نجمع الأرباح .. وبهالأرباح كل واحد يسوي المشروع اللي يعجبه بفلوسه هو بروحه لكن تحت اسم الشركة ويكون للشركة نصيب لايزيد على 10% وبكذا تزيد أرباحك انت ويزيد رصيدك ؟؟
زياد باستفهام ::/ ووش نوعية هالمشروع ..؟؟.
مؤيد ::/ أول شي انت لازم تثق فيني وثانيا لازم عمك مايعرف بالسالفة والا خرب كل شي ..والثالث و اللي هو الأهم .. انك توافق وعقبها اقول وش نوعية المشروع ..
وبعد هالكلمتين أطال النظر في وجه زياد اللي تغير وكأنه يفكر ...
زياد ::/ والله انت فاجأتني وانا بصراحة يلزمني وقت علشان أفكر ...
مؤيد بقلة صبر ::/ مايبي لها تفكير .. يعني احد تجيه نعمة ويرفسها ؟؟
ابتسم زياد ::/ مو مسألة ارفسها .. بس اني ما أقول لعمي شي عن هالكلام صعبة بصراحة ..
مؤيد ::/ وعمك وش له يعرف .. إذا أنت ماراح تستخدم شي من فلوس الشركة وكل شي بتآخذه من حسابك انت ... يعني خلاص هذا يصير مشروع لك انت ..
زياد ::/ بس انت تقول اني أقدر اسوي مشاريع باسم الشركة ؟؟
مؤيد ::/ ايه .. ساعتها قول لعمك عن هالمشاريع لكن مشروعي انا وانت لازم تتحفظ عليه ويتم بسرية ...
سكت زياد وسكت مؤيد بعد لما دخل عليهم المراسل وبيده صينية الشاهي ...
نزلها لهم على الطاولة تحت أنظار زياد .. بينما مؤيد تعلو وجهه ابتسامة نصر .. وان زياد لآن عقله وبيوافق على هالمشروع ...
---------------------------------------------
طلع نواف من الشركة وهو متوتر وخايف ومو قادر يتوقع الشي اللي ممكن يبغونه فيه بيت عمه ...
ركب سيارته وانطلق لطريقه ... وكله خوف وأمل ورهبة ... صعب عليه يرجع لنفس المكان ويدخله بعد ما شاف قلبه يتقطع هناك ويعلن وفاته ..
الدرب تحول لمسافات ومسافات صار بعيد وبعيد وبعيد بدرجة هو مايقدر يتحملها أو يتصورها ...
وماصدق خبر يوصل لباب بيتهم .. وقف سيارته عند الباب ونزل ورن الجرس والفضول بيقتله ...
فتح راكان الباب وابتسم لما شاف نواف ..
رحب فيه بحرارة ودخله للمجلس وطلع راكان علشان يجيب له الضيافة ...
ونواف على توتره .. ساعة يتلفت وساعة يرفع رجل على رجل وساعة يتأفف ويطالع الساعة .. يعني تصرفاته كانت تبين توتره واضطرابه ...
دخل عليه راكان وبيده صينية القهوة ...
راكان مبتسم ::/ حيا الله نواف اللي مادري من متى ماشفناه ...
ابتسم نواف ::/ الله يحييك .. وش اسوي بالدنيا وانا اخوك لهتنا حتى عن طاعة ربي ..
حط راكان الصينية وصب القهوة ::/ الله يعينك .. (( ومد له الفنجال ))
نواف ::/ وانت لحد الآن ماحصلت على شغل ؟؟
هز راكان رأسه بيأس ::/ لا والله إلى الحين ... لكن شركة الإتصالات مواعديني بعد اسبوع أراجعهم وإن شاء الله ربي بيفرجها ...
نواف ::/ الله يكون في عونك ...
سكتوا الأثنين عن الكلام وكل واحد يرتشف من فنجاله وفي قلبه شقى اللي له ..
دقائق ودخلت عليهم ام راكان بجلالها وسلمت على نواف وجلست في طرف المجلس من دون ماتتكلم ... بس الضيقة واضحة من صوتها ومن تفريك يديها ...
توتر نواف من سكوت ام راكان .. خاف لايكون حاصل لهم شي ومخبين عليه ...
وبمجرد مافكر هالتفكير على طول تكلم ..
نواف ::/ عسى ماشر يا خالة ؟؟؟ محتاجين شي والا صاير لكم شي ؟؟؟
تنهدت ام ركان بهدوء ::/ سلامتك يا ابوي ... لكن عبير بنت عمك في خاطرها كلمتين تبي تقولهم لك ...
عقد نواف حواجبه وطالع في راكان ::/ أفاااا ... عساه خير بس ..
هز راكان راسه ::/ ان شاء الله خير ... وانت بتسمع اللي عندها ...
طلع راكان جواله وعطى رنه لجوال عبير وبعدين قطع الخط ...
.
.
أول ما سمعت عبير جوالها نقزت من على السرير وهي تحضن وجهها بيديها من التوتر ...
مسكتها أريج الحزينة تهون عليها ... وتحاول تثبتها بكلمتين ..
أريج ::/ اذكري الله عبير .. وبعدين انتي معك الحق في كل شي بتقولينه ... والدليل أن راكان ماعارض لما شرحتي له كل شي ووضحتي له وقلتي له الكلام اللي رماك به نواف .......؟
تنهدت عبير وهي تلبس عبايتها ::/ الله يستر .. خايفة لا أصيح والا يغمى علي ..؟؟
ابتسمت أريج ومسكتها من كتوفها ::/ أنتي تحبينه بس تكابرين ... وترى ماراح يخسر إلا انتي ؟؟ عبير راجعي نفسك قبل لاتتهورين ؟؟
التفتت لها عبير ::/ أريج هذا هو القرار الصح اللي لازم آخذه ...
هزت أريج راسها موافقة لكلام اختها وعموما تعبت من كثر ماتحاول إقناعها... ومسكتها ونزلت هي واياها مع بعض ..
.
.
.
زاد قلق نواف لما تأخرت عبير وما جت ولا تكلمت ؟؟؟
وكان توه بيسأل ولد عمه لأن صبره انتهى ... لكن عبير كانت أسبق منه ...
عبير وقفت عند جدار المجلس ومتوارية خلفه ومعها أريج أختها ... ماحبت تواجهه وجه لوجه علشان ما تضعف أو يمكن لأنها تستحي تطالع فيه وهي تتكلم في موضوع مثل هذا ...
عبير ::/ السلام عليكم ...
انتبه نواف لصوتها و رد ::/ هلاوعليكم السلام ... كيف حالك عبير إن شاء الله بخير..؟
عبير ::/ الحمدلله تمام ... أنت كيفك و كيفهم عمي والوالدة ؟؟
نواف ::/ بخير ونعمة الله يخليك ...
سكتوا بعد هالكلمتين وعبير مو عارفة كيف تبدأ الموضوع...
شجعها نواف لما قال ::/ خير عبير ...؟ محتاجة شي ؟؟
تنهدت عبير وهي تمسك في يد أريج اختها الواقفة جنبها ..::/ نواف .... (( وسكتت شوي وبعدين كملت )) نواف أنااااااا ... كنت أبغاك اليوم ضروري لأن فيه موضوع مهم لازم اليوم ننهيه ؟؟ وأنا قبل لا أنهيه حبيت أوضح لك الخصلتين اللي رميتني فيهم بالزور ...
انصدم نواف من كلامها وقاطعها ::/ أنا رميتك بالزور ؟؟؟
بلعت عبير ريقها ::/ للأسف إيه .. رميتني وانت ماتدري ... قلت كلمتين هزوني من راسي لرجليني لكني ساعتها سكت ومارديت عليك لأني كنت مصدومة فيك ؟؟ يعني معقولة أهلي وعزوتي يقولون عني هالكلام ؟؟ أجل وش تركوا للأغراب ؟؟
وإن كنت نسيت أنا أذكرك ... بعد الحادث جيت لبيتنا وطلبت تقابلني ... ساعتها أنا وافقت ونزلت لك على مضض لأني ماكنت أبغى أقابل أحد عقب الحادث ... مو لأني خايفة من العار أو الفضيحة .. أبدا ولكن لأني كنت مصدومة وعقلي مو راضي يتقبل اللي صار ... المهم ... أنا أبي أقول لك في البداية إني إنسانة أشرف من الطهارة نفسها ... وعمري ما نزلت نفسي لمثل هالأمور اللي أنت رميتني بها واتهمتني فيها ... وأحب أقول لك بعد اني انا عبير تربية سعد وفوزية ... صدق أن ظروفنا صعبة لكن حنا مرينا بالأصعب منها وتجاوزناها من دون ما تعترض طريقنا الشبهات ...
قاطعها نواف بقلة صبر ::/ عبير لاتفهميني غلط ... انـ ـ ـ
ابتسمت عبير والدموع وسط عينها وقاطعته ::/ للأسف نواف انت ماتركت فيها مجال للشكوك وتأويل الحديث ... لأنك قلتها لي بالصريح ... من اللي تطلعين معهم نص الليل ؟؟ بالله عليك هذا كلام ينقال لوحده تصير بنت عمك ؟؟ وانت عارفها وعارف أخلاقهم كلهم ؟؟؟
سكت نواف ونزل راسه منحرج من بنت عمه وامها واخوها ...
كملت عبير ::/ اسمعني زين نواف أنا مبسوطة منك ومن خوفك علينا .. وأنا ما أنكر اني كنت أطلع نص الليل .. لكن السيارة اللي كنت أركب معها ماكانت مثل ما أنت تعتقد ... والسيارة للأسف كانت لحنان ...
انصدم نواف وباندفاعية رد يدافع عن نفسه ::/ عبير السيارة شفتها أكثر من مرة .. وكانت لمؤيد صديق راكان ......................
تكلم راكان بصوت عالي ::/ نــــــــــــــــــــــــــواف ...؟
سكت نواف مفتشل وكان يسمع صوت خفيف حس من خلاله ان عبير نزلت دموعها ..
كملت عبير ::/ أنا مو محتاجة أثبت لك انها كانت سيارة حنان ومو سيارة اللي مايتسمى ... لكن بثبت لك هالشي بس علشان ترتاح ... نواف أنت لو مو مصدقني انا مستعدة أعطيك رقم لوحة السيارة ومواصفاتها وانت رح للشرطة واسأل عن صاحبها ... وبتحصله سالم بن سعيد ... أبو حنان صديقتي وأخوها عبدالإله ... وما أظن هالأسم غاب عن بالك ولا لحظة ... ولا أظن انك نسيت اللي سوته فينا امهم .. وكيف كانت تذلنا على هالقرشين اللي كانت تعطينا إياهم ... ولما جت لقعر دارنا وعطتنا كم كلمة في الصميم ومنعت بنتها تدخل بيتنا بسبب وضعنا المادي المخزي و راكان والسمعة اللي طلعت عنه ؟؟؟ ولا أظنك نسيت عبدالإله لما جاء لك وقال ابعد أهلك عن أهلي لايصير لكم شي مو طيب ؟؟؟؟ تذكرت والا أذكرك ... تبيني أذكرك بأننا صبرنا على كلامهم السم بس علشان حاجتنا ؟؟؟ وعلشان حنان اللي كانت تترجى أمي ماترفض مساعدتهم علشان أقدر أنا أكمل الثانوية ؟؟؟ أسمعني أنا ما أنكر فضلك علينا بعد الله لما جيت هذاك اليوم معصب وطلبت منا نرفض منهم أي مساعدة وانك انت بتتكفل بالمصاريف .. انا مانسيت أنك أنجرحت في كرامتك بسبب أخوها وابوها واللي سووه لك ... واضطريت تشتغل وتدرس علشان تقدر تصرف على بيتنا ... أنا الحين أشكرك وأقول لك ان انا واخواتي مقدرين لك كل شي سويته لنا ولمصلحتنا ... وهذا السبب اللي خلاني أخبي عليك أنت وإيمان أن حنان هذي هي اللي توديني وتجيبني معها علشان نتجهز لزواج صديقتنا نهلة ...
وماحبيتكم تعرفون بهالشي لأني خفت إنكم تنظرون لي نفس نظرة أريج اختي لي هذاك الوقت ...وتقارنون بيني وبينها وكيف هي رفضت أي شي يجي من عند صديقتها الوحيدة ندى بعد اللي صار من ولدهم وأني انا بعت كرامتي ورجعت لهم مرة ثانية علشان فلوسهم .. لكن أبدا هذا ماصار .. وبعدين انا وحنان متفاهمين وأمها مالها أي دخل في الموضوع ... ومسألة اني أطلع نص الليل فهذي لها حكاية ... أولها أن ظروفي ماتسمح لي أطلع وقت مبكر .. لأني كنت اخاف انك انت تكون موجود أو راكان اخوي يصير فيه ويشوفني وهذا غير حنان اللي كانت تخاف من أن امها تعرف عن شي من علاقتها فيني و تخاف بعد من تواجد راكان في البيت ... وانا ما اقدر ألومها ؟؟
نواف باصرار ::/ لكني شفتهم مرة طالعين من الحارة وهم مطفين الأنوار ..؟؟ تقدرين تفسرين هالشي غير التفسير اللي ممكن يطرى على بال أي أحد ؟؟
انصدمت عبير من اصرارنواف على انها غلطانة لكنها حبت تهدي اعصابها وتتكلم ببرود مثل ما وعدت نفسها ::/ هذا الشي أنا مادري عنه لكن انا قلت لك لو حبيت تسأل من وراي عن صحة كلامي أسأل انا ماعندي مانع .
قاطعها نواف وحاول يثبت صدقها ::/ يعني أنتي كنتي محتاجة شي ؟؟ طيب ليه ماقلتي لي ؟؟
تنهدت عبير بألم ::/ لأني مقدرة ظروفكم كلكم ... وبعدين حنان عرضت علي المساعدة وانا مارفضت ...
عصب نواف ::/ يعني هي اللي جهزتك ؟؟
انحرجت عبير وهي تشوف نظرات اريج اللوامة::/ ساعدتني باللي تقدر ... وانا سويت اللي أقدر عليه ..
نواف بألم ::/والبيت اللي رحتي له ؟؟ لاتقولين انه بيت ابو عبدالإله ؟؟ لأني متأكد انه مو هو ...
قاطعته عبير :/ بيت ابو ناصر ...
تفاجأ نواف انها معترفة بأنه مو بيت صديقتها .. لا وفوق هذا تعرف لمن ؟؟؟ لكن سرعان ماتلاشى تعجبه بعد ما كملت عبير ::/ بيت عمة حنان اللي ماقصرت معي وساعدتني بكل شي .. هي اللي وفرت علي مصاريف الخياطة لأن الفلبينية اللي عندها هي اللي فصلت لنا الفساتين وفصلت لي الشنطة والإكسسورات ... ولما جيت بعطيها حتى نص المبلغ رفضت وقالت لي يمكن يجي يوم وانا احتاج منك شي وساعتها لازم تساعديني ..
استغرب نواف وبسخرية خفيفة ::/ الحين ام ناصر بتحتاج منك انتي ؟؟؟؟يمكنها قالت هالكلمتين علشان تتصدق عليك وانتي مقتنعة ...
بلعت عبير ريقها وتزاحمت الدموع بعيونها وحست الدنيا تدور من قدامها ... أريج ماقدرت ماتمسك دموعها لكن وقفت جنب اختها وضغطت على يدها .. لفت لها عبير فـ هزت راسها أريج تشجعها وكأنها تقول (( خلاص كل شي انتهى تكلمي وانهي الموضوع ))
تنهدت عبير وقالت ::/ إيه احتاجتني و ماكان تفكيرها سقيم مثل ماقلت وهذا انا ماراح أردها ....
سكت نواف عاقد حواجبه ويطالع في الجدار وكأنه يشوف عبير من وراه .. التفت على راكان وشافه منزل راسه وأم راكان متغطية بجلالها ومايدري هي وش قاعده تقول او تسوي ...
نواف مستغرب ::/ وش حاجتها ؟؟؟
عبير مستحية وخايفة ومقهورة ومنجرحة وكل المشاعر المؤلمة تجسدت فيها ::/ طلبتني لولدها ... و وو .. وو
وقف نواف على حيله بقوة وعنف ::/ ورفضتوا ... صح ؟؟؟؟
صاحت عبير وماقدرت تمسك نفسها ::/ لا مو صح .............؟
نواف بصوت مصدوم ::/ وافـــقـــتي ؟؟؟؟؟
ماقدرت عبير تجاوبه لأن صوتها غاب في زحمة عبراتها ...
تولت ام راكان المهمة لما قالت ::/ نواف يابوي أذكر الله واقعد وانا بفهمك السالفة ..
لف نواف لأم راكان وببرود مفروض عليه من الصدمة::/ وش سالفته يا خالة ...؟؟ وش تفسرين لي ؟؟ بتقولين بعتوا عبير لهم ولفلوسهم ؟؟؟ لأنهم خدموكم بهالقرشين استغلوكم وخطبوا بنتكم وانتم وافقتوا ؟؟ ..
قدرت عبير في هاللحظة تمسك عمرها وتقول ::/ نواف لو سمحت ... احنا عمرنا ماكان هذا تفكيرنا .. وعمر ام ناصر ماكانت تفكر بهالبشاعة ؟؟ وبعدين أنت ماتدري يمكن هالشي صار بس علشان ربي يثبت لك ويثبت لغيرك أني عمري ماصرت وحده مبتذلة والا هالعلاقات الخربانة تهمها .. وعلشان أثبت لك بعد ولغيرك أني إنسانة واثقة من نفسي وعارفة إني مستحيل أقع في الغلط ولا حتى بالقوة .. وهذا كله بفضل ربي ثم بفضـ ــ ـ ـ ـ ((غمضت عينها وهي تعض على لسانها لا يزل )) ثم إرادتي ونفسي المؤمنة ...
سفهها نواف يكلم ام راكان ::/ ياخالة قولي وش صار لكم وغيرتوا رايكم ...؟ انا من كم شهر قلت لكم نبي نملك ورفضتوا ؟؟؟ والحين بتزوجونها خلاص ؟؟؟
تنهدت ام راكان ::/ هذي إرادة ربك ... هم خطبوا من عندنا وعبير وافقت وانا مالي يد في الموضوع ...
نواف بعصبية ::/ كيف مالك يد عليها ... ليه ما رفضتي وذكرتيها انها مخطوبة ومايصلح تتزوج واحد ثاني ؟؟ والا ماعاد صرنا قد المقام يوم خطبوها هالعائلة وصرنا مانملى عيونكم بعدهم ؟؟؟
ردت عبير بقهر ::/ ومن اللي خاطنبي ؟؟
نواف برد سريع ::/ أنا ............
عبير بصوت حازم وقوي ::/ وأنا أرفضك .............
سكت نواف من تأثير الصدمة عليه ....؟؟
تقدم بعنف والغضب معمي عيونه على كلمتها ...!!
كان بيتهور ويطلع عليها يكسر راسها على الجرح والسهم اللي صوبته ناحية صدره بدون رحمة !!!!!
لكن يد راكان وقفته لما مسكت كتفه ..
التفت له نواف بجنون وشاف في عيونه نظرة تعجب واستنكار ..؟؟
كانه يقول " وين بتروح ووش بتسوي ؟؟؟؟ "
تنفس بعمق وهو يحس بتسارع ضربات قلبه المجنونة ...!!
يحس بالبخار الساخن يتبخر من آذانه اللي ماعاد تسمع غير الطنين المؤلم وصدى كلماتها القاتلة ...!!
كيف يعني ترفضه بهالسهولة وهو اللي خطط مستقبله عليها علشان توافق على واحد يادوب لأن أمه ساعدتها ؟؟؟ ليه بالساهل كذا تجي تقول له في وجهه انها ترفض تواجده في حياتها بعد اليوم كزوج وخطيب وتقبل فيه فقط كابن عم ....؟؟ ليش تصدمه في حياته في آخر لحظة ؟؟؟ ليش ما رفضته من البداية وريحته ؟؟؟ معقولة غرتها الفلوس والحلال ؟؟
وقف نواف والألم كاسر قلبه وعيونه بان فيها الحزن ::/ بــس ... بهالسهولة ترفضين وتوافقين ؟؟؟ وما همك العواقب اللي تتبع قراراتك المزعزعة ؟؟؟
رد راكان ::/ نواف ... هذا رأيها وحياتها واحنا مانتدخل في شؤونها .. لكن في النهاية هالموضوع كله نصيب وما احد يأخذ غير نصيبه ...
شهقت عبير ووضح أنها كانت تصيح ..
اما نواف فـ حاول قد مايقدر أنه يتماسك ويرسم شبح ابتسامة وقال ::/ انت صادق هذا كله نصيب ... والله يوفق الجميع ... أنا استأذن
مشى عنهم حتى قبل لايسمع وداعهم ... وحتى لو كان موجود بينهم ماكان راح يسمعه لأنه ببساطة ماعاد يرن في أذنه غير كلمتها المؤلمة (( وانا رفضتك )) ...
الدنيا ضباب أسود مخيف ... وهو في وسط نفق مايسمع فيه غير صوت الريح وصريرها المرعب ... وصدى كلامها الجريح وصوتها المبحوح وتبريراتها وجرأتها اللي تحلت بها مؤقتا بس علشان تسمعه هالكلمتين هم الشي البعيد اللي يشوفه ويسمعه بوضوح .....!!
كيف تجرأت تتخلى عنها وترفضه وهو اللي كان متمسك فيها حتى عقب اللي صار ...! معقولة ما تقدر الحب اللي يحمله نواف في قلبه لها ؟؟؟ غريبــة ..!
-----------------------------------------------------------------------------