و خلص الرمضان ...!
الشهر الوحيد في السنة اللي كل المسلمين يتمنون لو تزيد عدد أيامه وتصير ستين يوم بدل ماهو شهر واحد... وجاء من وراه العيد ووناسته واحتفالاته وجمعة الأهل والأحباب فيه ... لكن عيد هالسنة كان ممل وغير عن كل الأعياد الماضية ... والسبب لأن المدارس والجامعات تبدأ اختباراتها الفاينل بعده على طول ...
فكانوا الطلاب مكتأبين وخصوصا اللي بثالث ثانوي ... وكذلك أهاليهم معهم لأنهم مايقدرون يطلعون ويستانسون بينما عيالهم محجوزين بالبيت يذاكرون ...
كانوا عذا وسارة متحمسين في المذاكرة بزيادة .. عذا لأنها تطمح في نسبة عالية ... وسارة لأنها بأولى ثانوي وهالمرحلة بالذات صعبة وموادها دسمة ...
خلص أول أسبوع على خير وكان الكل راضي عن اللي قدمه في هالأسبوع ... المدارس باقي لها أسبوع ثاني على بال ما تخلص ،، لكن الجامعات كان باقي لها من يوم إلى يومين ويخلصون ...
وفي يوم السبت اللي كان أسعد يوم بالنسبة لزياد ... لأنه يوم تخرجه وانتهائه من مشواره التعليمي .. وحصوله على شهادة الهندسة ... وصار الحين يسبق اسمه كلمة المهندس زياد بن سلطان ... الدنيا مو سايعته من كثر ماهو فرحان ... بتخرجه يعني كل شي صار واضح قدامه ... مستقبله صار جلي للعيان ويقدر يعرف وش بيصير فيه ... الحين خلص الكثير ومابقى الا القليل ... والحمدلله اللي سهل عليه ...
دخلت عذا وبيدها كتاب الأحياء على سارة اللي كانت تردد تعاريف الحديث ومندمجة مع الكتاب آخر شي ...
عذا تقاطعها ::/ سارونة اسمعيني ...
سارة بعصبية ::/ هاه وش تبين بسرعة لأني بزي مرة ؟؟
ضحكت عذا وبان تقويمها ::/ احلى يا بزي ..
سارة وهي شاقه الحلق ::/ ما الحلو الا تقويمك هاللي تقولين لمبات العيد ... بالله عليك ما تستحين من البنات مركبة فيه كل هالألوان ؟؟
ضحكت عذا ::/ طيب هو تقويمي والا تقويمك ؟؟
سارة ::/ لا تقويمك بس انتي معي في نفس المدرسة وبصراحة تفشليني ؟؟
ضربتها عذا بالكتاب اللي بيدها ::/ وش رايك تتبرين مني أحسن ؟؟
سارة بنظرات شريرة ::/ ومن قال لك اصلا اني قايلت لهم انك اختي ؟؟
عذا بقهر ::/ المهم اسكتي عن هالكلام الماصخ واسمعي وش بقول لك ؟؟
سار بتملل ::/ هاه قولي اسمعك ؟؟
استحت عذا وتلونت خدودها بالأحمر ::/ ممم وش رايك ؟؟ نهدي زياد شي بمناسبة تخرجه والا لا ؟؟
نطت سارة عليها قبل لاتكمل كلامها ::/ أكيد نعطيه ... أجل تبين الأميرة النائمة تسبقنا وتعطيه هدية ؟؟؟
تنهدت عذا ::/ من جاب سيرتها الحين؟؟
سارة بتفكير ::/ أنا جبت سيرتها ... وشوفي ياعذا يابنت امي وابوي ... ترى هذا زيادوه وتخرج .. له إلى الإجازة الصيفية لو ماتقدم وخطبك رسمي.. ترى والله لأطربق الدنيا على راسه ..
عذا بخوف ::/ تتوقعين يسويها ؟؟
طالعتها سارة بنص عين ::/ يا ربي اللي متصربعين على العرس ؟؟
استحت عذا ::/ لا من جد سويرة اسألك ؟؟
سارة ::/ والله مادري عنه بس انتي حطي ببالك انه ممكن يخطب بنت عمه ...
ضاق صدرها عذا و حزت بخاطرها هالكلمة .. معقولة زياد مايصير لها ويتزوج سحر ؟؟؟
عذا ::/ أنتي وكلامك اللي يضيق الخلق الحين وشلون تبيني اذاكر ..؟
سارة بجدية ::/ مو انتي تقولين عنه عصبي وشرس و ما ارتحتي لمستقبلك معه ...
غورقت عيون عذا بالدموع ::/ إيه قلت بس هذا لايعني إني ... إني ..
سارة بمزح ::/ إنك تحبينه وماتبين غيره ..
تنهدت عذا ومسحت دمعتها ::/ مادري سارة بس احس اني فعلا متعلقة فيه لو مهما سوّى ..
مددت سارة رجولها على السرير وحضنت الكتاب وحاولت تنسي أختها الكلام اللي قالته::/ طيب شوفي ترى انت جاية تسأليني عن الهدية وانا ماجاوبتك ...
ابتسمت عذا ::/ ايه صح .. هاه وش قلتي ؟؟
سكتت سارة شوي تفكر وبعدين قالت ::/ اسمعي أول ماتخلصين اختباراتك نروح السوق ونشوف لنا شي حلو ومناسب ونآخذه له ...
عذا ::/ مثل إيش يعني ؟؟
سكتت سارة تفكر ::/ ممكن ساعة ... وممكن نآخذ له طقم بوك وقلم ... ويصير مني ومنك ومن امي ...
سكتت عذا وبعدين قامت ::/ أوكي بفكر بهذولا ووقتها نتفاهم ...
ابتسمت سارة لأختها الصيوحة والحساسة على قولتها ::/ خلاص تم ...
طلعت عذا من سارة وقلبها ناغزها من كلامها .. موقادرة تتخيل انها ممكن تسمع خبر خطبة زياد من وحده ثانية ... أبداً ...............................................؟!
---------------------------------------------------------------------------
كان زياد محتفل مع ربعه في واحد من المقاهي بمناسبة تخرجه وخلاصه من الدراسة ... عبدالعزيز ونواف كانوا معه وهم نفس الشي كان يوم تخرجهم ... إلا أن عبدالعزيز سبقهم بيوم ..
زياد وهو يشرب من الكوب ::/ والله ما اصدق اني تخرجت ...
ضحك نواف ::/ لا صدق وانا اخوك تخرجت وما عاد فيه قومت صبح للجامعة ..
تنهد زياد ::/ لا قومت الصبح موجودة ... نسيت دوامي ؟؟
لوى عبدالعزيز بوزه ::/ إيه والله نسينا بعد انك بتكون من أصحاب الملايين اليوم والا بكرة ..
ضحك زياد بفخر مصطنع ::/ إيه اتمنى عاد انكم تقدروني وتقدرون قيمتي ..
ضحك نواف وسوا نفسه البائس المسكين ::/ لاتنسانا من الحسنات وانا اخوك ..
ضحك زياد بكبر ::/خلاص ابشوف المحاسب واللي يبقى مانبغاه ولا نحتاجه للشركة بعطيكم اياه ولا يهمكم ...
ضحكوا كلهم ،، ونواف كان باين بعيونه كلام لكن مستحي مايدري وشلون يبداه .. انتبه عليه عبدالعزيز لكنه سكت وانتظره هو يتكلم من نفسه ... وبعد مدة من قعدتهم قدر نواف يضغط على نفسه ويقول ..
نواف وهو مستحي ومرتبك ::/ هاه يا بو سلطان.. عساك بس عند وعدك ولا اخلفتنا ..
عقد زياد حواجبه ::/ أي وعد ؟؟
استحى نواف وما يدري وشلون يذكره لكن عبدالعزيز حب انه يخفف عنه ..
عبدالعزيز ::/ مو قلت بتوظفنا عندك ؟؟
ضحك زياد ::/ أنا ماقلت بوظفكم قلت بوظف نواف ...
عبدالعزيز بنظرة شريرة ::/ ليه وانا ؟؟؟ لايكون مغني في المسجد ؟؟
زياد ::/ بصراحة مانحتاج محامين في الشركة ..لكن بشوف المكتب اللي نتعامل معه يمكن يلقون لك شي ..
ضحك عبدالعزيز ::/ ايه خلك كذا انضبط معي .. مو (( ويقلده )) ماقلت ابوظفك
ضحك زياد ::/ المهم نواف شف وانا اخوك هالفترة هذي انا اضبط نفسي ومكتبي ومركزي بالشركة لأني خلاص بكون دائما مداوم فيها ... يعني يبي لي اسبوعين أو أقل وأشوف لك شغل إما سكرتيري أو أي شي مشابه ..
انفرجت أسارير نواف من الفرحة .. هذي هي دعوات امه ومرت عمه له بالخير والتيسير ...
نواف وهو مبسوط ::/ مشكور زياد والله يعطيك ألف عافية ...
زياد بعتاب ::/ ما فيه بينا شكر يابن الحلال وبعدين الى الحين انت مااستلمت شغلك علشان تشكرني ...
نط عبدالعزيز::/ والا ناوي تخون فيه ؟؟؟
طالعه زياد بنظرات ::/ أنا أقول انت ورى ماتركد وتخلي عنك المهايط ؟؟
ضحكوا كلهم وكملوا سهرتهم بعد ما قرر زياد يعزمهم في مطعم لا يقل رقي عن اللي قبله احتفالا بتخرجه ...
------------------------------------------------------------------------------
يوم الأحد الصباح وبعد ماطلعوا البنات من قاعة الإختبار وكان هذا آخر يوم لهم وأخيرا ماصدقوا ...
جلست ندى وأريج مع بعض لأن سحر ورحاب كانوا مو معهم في نفس القاعة لكن متفقين انهم دائما بعد مايطلعون من قاعتهم يلتقون في مكانهم المعتاد ...
جابوا لهم فطور وجلسوا ينتظرون البنات ... علشان يتوادعون بما انه آخر يوم ..
أريج وهي تفك العصير ::/ وخلاص يا ندى وافقتي ؟؟؟
ابتسمت ندى بألم ::/ ما عندي سبب ولا لي حجة أرفض هذا فوق ان زياد موافق ومقرر قبلي ... وبعدين خلاص اللي أبغاه مستحيل بيرجع لي مرة ثانية وأصلا مستحيل زياد بيوافق عليه عقب هذاك الإتصال ...
أريج بحزن ::/ طيب قلتي لزياد وسحر ؟؟
ندى بإبتسامة::/ لا .. اليوم بقول لهم ... خلاص ماتوا العالم وهم ينتظروني ...
ضحكت أريج ::/ يالله ماتدرين وين الخيرة فيه ؟؟
تنهدت ندى ::/ الله لايوفقه اللي كان السبب ... أنا بس أموت وأعرف من هاللي متصل على زياد ولاعب عليه .. لاوفوق كل هذا يقول له عندي صور لها ...؟
أريج بنبرة جافة جدية ::/ طيب شفتوا الصور اللي معه ؟؟
ندى وهي تشرب من العلبة ::/ لا .. لما ارسل له زياد يقول له خلني اشوفهم مارد عليه وقال له اللي يهمني انك رفضت طلال وماله داعي أخرب بينك وبين اختك ..؟
بس نفسي أدري من وين جابها ؟؟
أريج ::/ يمكن احد تعرفينه ومعطيته صورك ؟؟
ندى ::/ مستحيل أنا صوري ما اعطيها أي أحد ... لكن والله اني ادعي عليه ليل ونهار وكلما طرت السالفة على بالي ,,,
أريج ::/ لا ندى حرام لاتدعين عليه ... ادعي له بالهداية يمكن هو الحين متحسف .
ندى بعصبية ::/ وانا وش يفيدني ندمه الحين بالله عليك .. وإذا الدعاء عليه فأنا بدعي كل وقت ان الله يذوّقه مثل ماذوقني ولايهنيه ويرد له الصاع صاعين ويآخذ لي حقي منه قادر على كل شي ...
سكتت أريج شوي لحد ماتهدى ندى اللي بدت وكأنها بتصيح ..
أريج بعد فترة ::/ طيب ومشاري يعني ماتحبينه ؟؟؟ ماتبينه ؟؟
تنهدت ندى ::/ ادعي ربي انه يوفقني معه وبس .. أما مشاعر أحملها ناحيته فحاليا مافيه شي بس يمكن يصيرفيه بعدين وهذا اللي اتمناه ...
ابتسمت اريج بحزن ::/ الله يوفقك معه و يعوضك عن طلال .. وبعدين ماتدرين يمكن يكون هو أحسن منه ...
وكزتها ندى مع خصرها وهي تقول ::/ خلاص قفلي على السالفة هذي هي سحر ورحاب وصلوا ...
وسكتت أريج عن الكلام في هالموضوع لما وصلوا البنات وجلسوا معهم ..
رحاب وهي ترمي نفسها ::/ أنا اليوم بنام الى ان يشاء الله ...
ضحكت سحر ::/ وانا بحتفل الى ان أطفش
أريج ::/ حلوة أطفش ... لكن انا بصير اسنع منكم و اليوم سوف أرتب غرفتي لأنه ما فيها مكان أنام فيه ..
ندى بتنغيز ::/ أما انا فسأصنع مستقبلي اليوم ...
صفقت لها أريج بقوة ..::/ أحسنتي يا أخت العرب ...
طالعوا رحاب وسحر بعض بغباء ..
رحاب بعباطة ::/ اصنعي لي معك ...
ضحكت ندى ::/ خلاص .. والله يارحاب لو أصنع لك اليوم مستقبلك انتي بعد كان بتموتين علينا قبل يومك ...
ضحكت اريج وندى بينما سحر ورحاب ساكتين ومايدرون وش صار على ندى وقامت تقط خيط وخيط لكنهم حاولوا يعذرونها بما انه اليوم آخر يوم والفيوزات ضاربة...
----------------------------------------------------------------------------
بعد العشاء بمدة من نفس اليوم ... كانت عبير قالبة البيت فوق تحت ترتيب وتنظيف بما انها خلصت اختباراتها اليوم وطول الفترة الماضية كانت ماتناظر البيت وترتيبه وأخواتها الحلوات مايفكرون ولا واحد بالمية انهم ينظفون اللي بعدهم ...
كانت حايسة بالمطبخ تنظفه من البداية للنهاية بما ان أمها واخواتها في بيت عمهم ،، لكن قطع عليها صوت التليفون وكانت تحويله من الدور الثاني أكيد ...
طلعت للصالة ترد على التليفون ::/ نعم وش تبيين ؟؟؟
أريج ::/ تكفين عبير بقول لك شي الحين بس لاتعصبين علي ؟؟
عبير بقل صبر ::/ وش مسويه أريجوه ؟؟
بلعت اريج ريقها بصعوبة ::/ شوفي اتصل تو راكان وقال قولي لعبير تجهز القهوة والشاهي في الملحق بيجي هو وزملاؤه ...
سكتت عبير شوي وبعدين قالت ::/ وانتي وش قلتي له ان شاء الله ؟؟
أريج وهي شوي وبتصيح ::/ عبير انتي عارفتني ما اقدر أقول لراكان لا ولا أعارضه .. قلت له طيب ..
صرخت عبير بانفلات اعصاب ::/ أريج انتي من جدك ؟؟ تبينه يجي هو وزملاؤه عندنا في البيت ؟؟؟ مهبولة انتي والا تستهبلين ...
صاحت أريج ::/ والله عبير انربط لساني وماقدرت أقول له لا .. تدرين خلاص انا بنزل اسوي له كل اللي يبي ... خلاص انتي لاتقطعين شغلك ..
استغفرت عبير ::/ استغفر الله العظيم .. خلاص اجلسي رتبي غرفتك وخليني انا اتصرف ..
أريج ::/ وبعدين أحسن اني وافقت له تبينه أجل يجي يسوي فيك اللي سوى لك هذاك اليوم ؟؟؟
عبير ::/ خلاص قلت انا بشوف وش صرفته هالرجال .. الله يفكنا منه
سكرت عبير السماعة معصبة وهي تفكر في كلام أريج أختها .. فعلا لو كانوا رفضوا طلبه هالمرة كان ممكن يجي يكسر البيت على روسهم ... تنهدت بتعب ورمت الفوطة اللي بيدها على الكنب .. ورجعت للمطبخ تسوي له اللي يبي قبل لايوصل ويحوسهم ..
سوت القهوة والشاهي ،،، ورتبتهم في صينية كبيرة علشان توديهم مرة وحده ولا تقعد تتردد على الملحق الخارجي ...
وبعدها تنهدت وشالتها وطلعت للملحق ... كان قلبها مقبوض من جيت هالراكان وربعه لكن المهم اتصلت على أمها علشان ترجع للبيت مبكرة و علشان تكون معهم لايصير شي ..
وصلت للملحق ولقته ظلام ويخوف .. من زمان ما رتبته او نظفته وفي خاطرها قررت ترجع له بعد ماتخلص ترتيب البيت علشان تنظفه ...
لفت على جنب علشان تفتح الباب بكتفها بما ان يديها مشغولة ... تقدمت للطاولة من دون ماتفتح الأنوار ونزلت الصينية ولفت على وراء بتطلع ...
شهقت و زادت ضربات قلبها .. ويدها على فمها ... ظله واقف قدامها والأنوار مسكرة .. حاولت تصرخ تستنجد بأي أحد بس ماقدرت .. الصوت مو راضي يطلع من حلقها .. ركبها مو راضيه تشيلها إلا تبيها تطيح ضعيفة قدامه ...
خطواته تتقدم منها أكثر ... هي تشوف ظله من النور الجاي من الشباك ... حاولت بمجهود مضني تحرك رجولها .. ركضت بسرعة للباب .. لكن هيهات كان هو أسبق منها ... سكره وقفله ... وكل هذا هي ماتعرفت عليه ... متلثم بشماغه ... لكنها متأكدة ان اللي عليه ثوب ...
صرخت بأعلى صوتها تنادي أريج لكن هيهات تسمعك وانتي بآخر البيت وهي بأوله ..
ركضت لأفياش الكهرب حاولت تشغلهم لكنه مسك يدها ... وابعدها عنها ..
صرخت بأقوى صوتها ::/ أريــــــــــــــــــــــــج الحقي علي ... فكني ياحيوان فكني ...
..... ::/ والله ...؟؟ متى .؟؟؟ الحين والا بعد شوي ؟؟؟
صرخت بأعلى صوتها تنادي أريج لكن هيهات تسمعك وانتي بآخر البيت وهي بأوله ..
ركضت لأفياش الكهرب حاولت تشغلهم لكنه مسك يدها ... وابعدها عنها ..
صرخت بأقوى صوتها ::/ أريــــــــــــــــــــــــج الحقي علي ... فكني ياحيوان فكني ...
..... ::/ والله ...؟؟ متى .؟؟؟ الحين والا بعد شوي ؟؟؟
صاحت عبير وهي تقاومه بكل يديها الثنتين تحاول تبعده عنها ... لكن هو لازق فيها وما يبعد ... صاحت بشهاق وقلبها يتقطع ... تعرفت على الشخص ومستعدة تحلف انه هو .. الحيوان النذل سوا اللي يقوله ...
عبير بصراخ ::/ يمـــــــــــــه ,, أريج ...
لكن هو سد فمها بيده ومنع عنها التنفس .. ماقدرت عبير الا انها تعضه ولما التهى هو بيده راحت تركض للباب ... حاولت تفتحه بالمفتاح لكن الحيوان صار مطلعه من مكانه وحاطه في جيبه .. راحت تضرب في الباب بيديها .. وبرجولها وبكل جسمها وهي تصرخ على أهلها ودموعها مغرقة وجهها ... حست به جاء من وراها ... وش تسوي وش الحيلة .. حتى الشباك مايسعفها تطلع معه لأنه بعيد وشلون بتقدر توصل له بيديها بدون مساعده ؟؟؟ كل السبل تقطعت قدامها وما عاد عندها حيلة الا انها تدعي ربها يفرج عنها وتصارخ علّ أحد يمر ويسمعها ...
.
.
.
.
.
أريج كانت مشغولة في ترتيب غرفتها وغايصة في حوستها ومو دارية باللي قاعد يصير حولها ... وهي ترتب ملابسها في الدولاب سمعت صوت ضرب باب أو صراخ أو شي من هالقبيل ... حاولت تتجاهله وتوقعت انه جاي من الجيران ... لكن الصوت يتكرر والصراخ ماوقف ...
خافت أريج لايكون احد من الجيران عندهم حرامي والا مشكلة صايرة عندهم إما حريق والا شي فتركت اللي بيدها وطلعت تشوف عبير وتسألها ان كانت تسمع نفس الشي والالا ؟؟
نزلت للدور الأول وهي تصوت على عبير لكن لاحياة لمن تنادي ...
أريج وهي تفكر بصوت عالي ::/ وين راحت هذي بعد ؟؟ لايكون هي اللي تصرخ وانا مادري ..
ضحكت على نفسها وهي تفتش في الغرف على اختها ... وصلت للمطبخ وكان آخر مكان ممكن تلقى فيه عبير .. بس بعد مالقت أحد ...
لكن لحظة ... في المطبخ صوت الصراخ يزيد ... مشت على أطراف أصابعها بخوف وعظامها ترتجف ..
فتحت الباب اللي يطلع على الساحة الخلفية في بيتهم وحست ان الصوت هنا يزيد أكثر ويجي من منطقة تعرفها ... من مكان هي قالت لأختها تروح تحط فيه الشاهي والقهوة ؟؟
شهقت أريج وهي تغطي يدها بفمها ونزلت تركض من على الدرج رايحة للملحق .. وفعلا اللي هي خايفة منه صار الصوت صوت عبير وجاي من الملحق ... يعني أكيد هذا راكانوه الحيوان يبي يذبحها ...
وصلت أريج لباب الملحق حاولت تفتحه لكنه مقفل ...
أريج وهي تصرخ ::/ عبير تسمعيني ...؟؟ افتحي الباب عبير ..
صرخت عبير بصوت ضعيف ::/ أريج روحي من عند الباب كلميـ ـ ـ ـ وانقطع صوتها وصارت أريج ماتسمع الا صوت صراخ أختها المكتوم
صاحت أريج وصرخت ::/ راكانوه افتح يالحيوان لاتذبحها ...
وراحت تضرب الباب بيديها ورجولها ... لكن مع ذلك صوت عبير أختها ماعاد سمعته ..
خافت لايكون سوى فيها شي ...
أريج ::/ عبير هذا نواف وصل صدقيني بيجي يكسر الباب عليه اصبري شوي انتي وانت ياراكان يالتبن بتشوف ...
كانت أريج تهدد علشان لو كان راكان ناوي على شي في هاللحظة يخاف ومايقدر يسويه لأنه مكشوف ...
اما أريج فراحت تركض بترجع للبيت تتصل على نواف والا الشرطة المهم أحد يجي يفك اختها ... وفي لحظة جنون قررت تلبس عبايتها وتطلع تنادي أبو علي ابو جيرانهم ويمونون عليه ومربيهم مثل بناته ...
خذت لها جلال صلاة من الصالة على عجل ماعندها وقت تلبس عباية وتوها بتطلع مع باب الشارع الا وهذي امها تدخل ...
ماصدقت أريج اللي تشوفه قدام عيونها . ركضت لأمها وتعدتها وطلت براسها مع باب الشارع وامها تناظرها مستغربة وخايفة وعيونها تتسائل وش اللي صاير ...
أريج وهي تصيح وتكلم نواف اللي مابعد مشى بسيارته ::/ نواف لاتروح تعال الحق علينا بسرعة الله يخليك قبل لايذبحها راكان ...
------------------------------------------------------------------------------