صحت من نومها مفزوعة والعرق يتصبب من جبهتها ... زادت عليها الكوابيس هاليومين وهي عارفة ليش ... سمت بسم الله وتلفتت حولها علشان تتعرف على المكان اللي هي فيه ... تنهدت براحة لما تذكرت أنها أمس نامت مع عبير أختها بالغرفة ... شالت اللحاف عنها وقامت للحمام تتغسل وتصلي الظهر ...
أول مادخلت وطاحت عينها على صورتها بالمراية ... ماقدرت تتحمل تشوف شكلها وعيونها الذبلانة ... دمعت عينها وحاولت ما تطالع المراية كثير ... غسلت بشكل سريع وطلعت على طول فرشت سجادتها وبدت تصلي ...
أول ماخلصت رفعت يديها تدعي ربها من خاطرها أنه ينفس عليها كربتها ... و غصب عنها صاحت وهي تدعي ...
دخلت عليها عبير وشافتها على وضعها .. تركتها براحتها وجلست على طرف السرير تنتظرها تخلص ...
أريج وهي تقوم من مكانها ::/ تغديتوا والا بتفطرون ؟؟
عبير مبتسمة ::/ لا أمي مسوية غداء ...
لفت أريج سجادتها وراحت تصلح شعرها قدام التسريحة ... وهي ساكتة من دون ما تتكلم ...
عبير ::/ بتروحين اليوم للملكة ؟؟؟
أريج ::/ مادري ..ودي أروح وما ودي ؟؟؟
عبير مبتسمة ::/ حددي موقفك .. لأن على أساسه انا يتحدد موقفي ؟؟
لفت لها أريج وهي مكتفة يديها ::/ طيب لو رحت وش ألبس؟؟
قامت عبير ومشت للدولاب ::/ البسي فستانك الأورنجي ... بيطلع عليك حلو؟
أريج بنبرة تفكير ::/ ما تحسين موديله قديم ؟؟
عبير وهي فاتحة الدولاب ::/ اممم لا عادي ... يعني ماله فترة أنتي مفصلته ؟؟
أريج ::/ خلاص طلعيه علشان أكويه وأجهزه للبس ؟؟
ابتسمت لها عبير بحب ... حاسة ان فيها شي غريب والدليل أن أمس ما تركتها تنام من كثر ما تتحرك في السرير وتتنهد وتتأوه وهي نايمة ... خايفة عليها وماتدري وش صار لها ؟؟؟
طلعت أريج من الغرفة وجلست عبير تجهز أشغالها للحفلة بالليل .. اليوم زواج نهلة صديقة عمرها وأختها الروحية ...كان كل شي جاهز الفستان والإكسسوارات حتى المكياج حنان تكفلت ترسل لها كوافيرة علشان تصلحها ...
طلت أريج براسها مع فتحة الباب ::/ عبير ترى نواف هو اللي راح يوديني أنا وأمي ؟؟
نقزت عبير من مكانها لأن أريج فاجأتها ... ومن سمعت اسم نواف حست بقلبها ينغزها وكأن الفراشات النايمة ببطنها بدت تطير من جديد ..
عبير ::/ قلتوا له ؟؟
أريج ::/ بقول لأمي تتصل عليهم الحين .. أو أنا بقول لإيمان ؟؟
ابتسمت عبير ::/ خلاص براحتكم ..
أريج باستفهام وفي عيونها نظرة غريبة ::/وانتي من راح يوصلك للقاعة ؟؟
تلعثمت عبير ::/ أنا محلولة بشوف لي أحد يمرني من البنات لا تشيلين هم ..؟
أريج بنبرة استهزاء ::/ أكيد أي وحده من البنات ؟؟
عبير بعصبية ::/ أريج ....!!اطلعي وخذي الباب معك ...
هزت أريج كتوفها بعدم مبالاة وطلعت وسكرت الباب وراها .. وخلت عبير غرقانة في دوامة تفكيرها وفي الصورة اللي تشكلت في مخيلة أختها عنها ...
---------------------
في الليل وبعد صلاة المغرب كان الكل يشتغل على قدم وساق في بيت ام عبدالله ...
كل وحدة من البنات مشغولة بنفسها .. اللي تصلح شعرها واللي تضبط فستانها ... كانوا فرحانين من اعماق قلبهم لأخوهم ... مو مصدقين أن عبادي بيتزوج وبتصير عندهم مرت أخو ؟؟؟ وأكثر فرحتهم أنهم بيكونون عمات وخالات في نفس الوقت ...
أول من خلص منهم أم عبدالله ... كانت لابسة جلابية مطرزة فخمة .. ومسوية شعرها بشكل ناعم ومكياجها كان خفيف ومو متكلف ... بنظرة عامة شكلها متناسق مع عمرها وجسمها النحيل ...
نزلت تحت للصالة وكان ابو عبدالله وأسامة وحتى المعرس جالسين فيها يطالعون التلفزيون وينتظرون العشاء يأذن علشان يصلون وعقب يروحون للناس ويملكون ..
أسامة وهو يطالع امه ::/ وااااااااااااااااااااااو .. احلى يالحركات ؟؟ والله ماتوقعتك حلوة لهالدرجة يمه ؟؟
أبو عبدالله بنبرة حب::/ أمك طول عمرها حلوة بمكياج والا بدون مكياج ؟؟
عبدالله وهو يطالع أسامة ::/ يا ويلك تسب فيها والأخ روميو موجود ؟؟؟
جلست ام عبدالله معهم بالصالة بدون ما تعلق .. لأنها في الأساس مستحية وحمرة الخجل واضحة على وجهها ..
أسامة ::/ عاد وش دعوى عطينا نظرة على الأقل ؟؟
ام عبدالله ::/ أسامة فكني من شرك ؟؟
قام أسامة وجلس جنبها ::/ اللله .. يا زينها ريحة عطرك ؟؟؟
ام عبدالله وهي مستحية ::/ اللي يسمعك يقول ماعمرك شميتها هالريحة ؟؟
ابتسم أسامة لأمه وحبها على رأسها ::/ والله أخاف لا يحسبونك انتي العروس وتخطفين الأضواء من ريم ..؟
ابو عبدالله يضحك ::/ لاتقول هالكلام عند عبدالله لا يذبحك ؟؟
عبدالله بنبرة حنان ::/ لا أنا أذبحه في الكذب ،، لكن في الصدق ما أقدر عليه ؟؟؟ وأمي اليوم سارقة الأضواء وكأنها هي العروس ؟؟
ابو عبدالله بغيرة ::/ قومي الجوهرة وامسحي هاللي انتي حاطته ؟؟
ام عبدالله منصدمة ::/ ليش ؟؟؟
ابوعبدالله ::/ بس أخاف يخطبونك قصدي ينظلونك ؟؟
ام عبدالله بنظرة جانبية وشبه ابتسامة ::/ لا لاتخاف قريت المعوذات ..
أسامة يضحك ::/ يا ربي منك يالغيار ... قل ماتبيها تصير أحلى وحده ؟؟
ابو عبدالله ::/ نشوفك وش بتسوي بـ أم العيال بكرة ؟؟
أسامة وهو ينفخ صدره ::/ هه ومن قال لك بخليها تحط مكياج أصلا ؟؟؟ علي الطلاق لو حطت شي ؟؟
ضربته ام عبدالله على صدره ::/ أيوه يا حمش .. خل عنك الحلوف اللي مالها طعم ؟
أذن عليهم العشاء وقاموا الشباب بيروحون للمسجد ،، لكن ابو عبدالله قصد أنه يتأخر شوي لأنه ما بعد قال اللي في قلبه ... ومايقدر ينتظر لحد مايرجعون في الليل ...
بعد ماطلعوا العيال من الصالة قام ابو عبدالله ومشى في طريقه لحد ما صار قريب منها ...
وبصوت حنون للجوهرة ::/ كل يوم تزيد حلاتك بعيوني ...
رفعت الجوهرة عينها له بخجل ::/ مشكور .. ويالله اطلع معهم لاتفضحنا ؟؟
ابو عبدالله يضحك ::/ والله لو يشكنا أسامة أن مايخلينا ..؟؟
ضحكت ام عبدالله ::/ مادمت عارف يالله الحقهم قبل لايجي ...
ابتسم ابو عبدالله ونزل حبها على راسها ومشى يكمل طريقه ... غمضت الجوهرة عيونها بحب .. هذا هو محمد وهذا اللي تعرفه عنه ...
.
.
.
.
.
بعد ماخلصوا الصلاة كان الكل جاهز علشان ينطلقون ... دخلوا العيال بعد ما رجعوا من المسجد للصالة وشافوا اخواتهم وأمهم جالسين ينتظرونهم ...
أسامة مبتسم ::/ أحلى عليهم الكشيخات .. بس عاد مستحيل أوديكم قبل لا تشيلون العبايات .. خلوني أشوف كشختكم ؟؟
لمياء من دون نفس ::/ أسامة لاتزيدها ... خلنا نطلع قبل لا أسوي لك شي تندم عليه ؟
ابو عبدالله باستفهام ::/ وش فيك معصبة ؟؟ الحين هذي نفسية وحده بتروح لملكة اخوها ؟؟
ردت عليه عذا مبتسمة :::/ متضايقة من شعرها ما ضبطت تسريحته ؟؟
عبدالله وهو يطالع لمياء من فوق لتحت ::/ الحين كل هذا وتقولين شكلك مو حلو ؟؟
لمياء مبتسمة ::/ مشكورين كلكم على رفع المعنويات .. بس انا مقتنعة أن شكلي مو حلو ؟؟
سارة ::/ أحسن تستاهلين هذي عقوبة مهند ... مخليته يروح مع أبوه وهو يصيح ؟؟
أسامة ::/ المهم خلونا نشوف ملابسكم ولا تكثرون الهرج علشان يمدينا نوصل هناك ..
شالوا البنات عباياتهم لأخوانهم وأبوهم اللي انبهروا وشجعوهم بكلمتين .. وبعدها طلعوا كلهم للسيارات بيتوجهون لمقر الحفلة اللي هو بيت أهل الريم ..
-----------------------------------------------------------------------------
في مقر الحفلة كان كل شي خالص وقائم على أتم مايكون ... البوفيه المفتوح جاهز وخالص في ساحة البيت الخارجية .. الأنوار كانت مغيرة الجو وقالبة الليل للنهار ..
كوشة العروس كانت أجمل كوشة ممكن يشوفونها الحاضرين .. مجهزة من أفضل الخامات وعند أفضل المصممين .. أكيد هذي هي بنتهم آخر العنقود .. لازم يسوون لها كذا وأكثر ...
بدأ المعازيم يوصولون لبيت ام راشد وهي وأختها ام مشاري وبنتها العنود واخوات زوجها الثنتين كانوا في الإستقبال ...
أما العروس ريم وسحر ومعهم ندى كانوا جالسين في الجناح الخاص بريم في الدور الثاني ... كانوا يشجعونها ويدعمونها معنوياً .. هي خالصة من تجهيز نفسها وحتى الفستان لابسته .. بس كانت تنتظرهم يوصلون ويكتب الشيخ العقد وبعدها تنزف تحت علشان يدخل عليها عبدالله ويلبسها الشبكة ... وهذا هو الشي اللي كانت خايفة منه ومو قادرة تتصوره ؟؟
ندى كانت جالسة على الكنب اللي بزاوية الغرفة والهم راكبها من دخلت .. ومن شافت صور طلال اللي بالصالة .. وصورته الكبيرة اللي مصورها يوم تخرجه معلقه على جدار الصالة العلوية وهي خلاص الدنيا ضاقت فيها وحست انها مو قادرة ترد نفسها وكأن عظم واقف عند مدخل رئتها واللي زاد مأساتها هو موقف زياد منها ,, لكن وش تسوي حاولت تتماسك علشان عمتها وولد عمتها اللي بمثابة أخوها ...
سحر بصوت عالي ::/ يا ندى ياحلوة .. جوالك مات وهو يرن ؟؟
ابتسمت ندى ::/ صدق ...؟؟ ماسمعته .
قامت ندى لشنطتها وطالعت جوالها وشافت عمتها متصلين عليها ؟؟ ابتسمت ورجعت تطالع ريم ..
ندى ::/ جاك الموت ياتارك الصلاة .. هذولا عمتي متصلين شكلهم وصلوا ؟؟
ريم وبدت ترتجف ::/ كـــــــــــــــذابـــة ..
ابتسمت ندى ::/ عاد هذا هو اللي صار ... يالله تجهزي .. انا بنزل اسلم عليهم تحت ..
تنهدت ندى وخذت طرحتها وطلعت من الغرفة نازلة تحت ..
استغلت ريم الفرصة وعلى طول التفتت لسحر ..
ريم ::/ الحين فهميني وش السالفة ؟؟؟ من متى أخوك المحترم خاطب ندى ؟؟
تنهدت سحر ::/ اسكتي الله يخليك لاتذكريني بالسالفة ؟؟ أصلا احنا ماعرفنا بهالشي إلا لما قال لنا ابوي ؟؟
نزلت ريم راسها ::/ كنت متوقعة أنكم ماتعرفون ...! لكن طلال لما رجع كان معصب و مايشوف اللي قدامه .. كان شايل عليكم في خاطره بالمرة ... وخصوصا انتي ؟؟
سكتت سحر شوي وبعدين ردت ::/ كسروا خاطري والله هو وندى ... الحين هو مو مشكلة انا بعتذر منه وافهمه .. لكن المشكلة الأكبر انه هو و ندى خلاص مستحيل يصيرون لبعض ..؟
ابتسمت ريم ::/ آخر شي كنت اتوقعه ان ندى وطلال مايتزوجون ؟
سحر ::/ كل شي بهالدنيا جايز ... حتى حالة ندى ماكنت متوقعتها ؟؟؟ شوفيها الى الحين مو قادرة تتأقلم ،، مع أنها قبل توضح لنا أنها ماتهتم له كثير ؟؟
ريم ::/ حرام عليك .. يكفي أنه يبان بعيونها الحب لما نطري اسمه ؟؟؟
سحر بنبرة حزن::/ تصدقين ....!! هذاك اليوم اللي انرفض فيه طلال . توقعت يصير شي بعقلها لكن ربي ستر .
ريم وهي قايمة متوجهه للشباك ::/ الله لايلومها يا سحر... أتخيل لو أنا ينفصل عني عبادي ؟؟
ضحكت سحر من قلبها ::/ ههههههههههههههههههههههه من الحين حبيته وصرتي تسمينه عبادي ؟؟ لا وتخافين من فراقه بعد ؟؟
انحرجت ريم من زلة لسانها ::/ سحــــــــــر ... يالله عاد لاتحرجيني ..؟؟
ابتسمت سحر ::/ قولي لي الصدق عاد ؟؟؟ حبيتيه؟؟
ريم وهي مستحية ::/ امممم تصدقين سحورة ... !والله حبيته من شفته هذاك اليوم بعد الخطبة ومن قالوا لي انه خلاص بيصير زوجي وانا احس روحي تعلقت فيه ؟؟ كذا مادري وشلون سبحان الله ..
ابتسمت سحر وقامت لها وحضنتها ::/ الله يديم عليكم المحبة و يوفقكم يارب ...
.
.
.
.
نزلت ندى للدور الأرضي وعلى طول طلعت للمجلس الخارجي علشان تشوف عمتها .. وأول مالمحت سارة راحت لهم وهي مبتسمة ...
ندى ::/ هلا والله بأهل المعرس .. تو مانور البيت ..
ام عبدالله ::/ بوجودكم حبيبتي ..
سلمت ندى على عمتها وحبتها على راسها ::/ مبروك عمه الله يوفقهم يارب ..
ام عبدالله ::/ آمين الله يسمع منك وعقبالكم ...
حاولت ندى تتجاهل كلمة عمتها الأخيرة اللي ركزت عليها وكأنها بتقول لها ان الحياة ماوقفت على رفض زياد لطلال وان العجلة لازم بتمشي ..
لفت للبنات وسلمت عليهم وحده وحده ... وبعدها جلست جنب عذا ..
عقبت لمياء ::/ فستانك روعة يا ندى ..
ابتسمت ندى ::/ تسلمين يا بعدهم عيونك الحلوة ...
سكتوا شوي .. وبعدين لفت ندى على عذا اللي جالسة جنبها وهمست بأذنها ..
ندى ::/ وش رايك تملكون انتم بعد الحين مرة وحدة قبل لايصير لكم شي مثل اللي صار لي ؟؟
سكتت عذا لما حست بنبرة الحزن في صوت ندى وبعدين لفت لها ::/ ندوش لو لي نصيب مع اخوك بآخذه .. ولو نصيبي معه زيك انتي وطلال فمن المستحيلات اني بآخذه حتى لوقررنا نملك الحين ..
نطت لهم سارة اللي قدرت تسمع كلامهم ::/ يعني ممكن يموت الشيخ إذا جاء دور زياد وعذا وبكذا ماراح يملكون !!
ضحكت ندى وضربتها على كتفها ::/ لاتفاولين على الرجال .. الله يخليه لعياله ..
سارة ::/بس عاد خلي عنك الخرابيط و قولي لي مو عذا اليوم شكلها روعة ؟؟
ابتسمت ندى ::/ عذا برائتها تحليها ..؟
نزلت عذا راسها تبتسم ::/ مشكورة ندى بس خلاص لاتحرجيني ؟؟
نطت سارة ::/ يعني هي أحلى من سحر بنت عمك ؟؟
استغربت ندى ::/ والحين من جاب سيرة سحر ؟؟
بلعت عذا ريقها وأشرت لسارة تسكت ::/ لا بس كنت أقول لها ان سحر بنت عمك ماشاء الله حلوة وهي تقول اننا احلى منها ؟؟
ابتسمت ندى لسارة ::/ والله من الغيرة اللي فيك ..؟
----------------------------------------------------------------------------
نزلت أريج تركض من الدرج وعبايتها في يدها وتحوس في شنطتها علشان تدخل الجوال فيها ... مشت على طول للصالة ولقت امها وعبير جالسين ..
أريج وهي تلهث ::/يالله يمه خلصتي ؟؟
ام راكان ::/ شوي شوي على عمرك لايوقف نفسك ؟؟؟ إيه خلصت وانتي ؟
أريج وهي تلبس عبايتها ::/ زين يالله نواف عند الباب ..
قامت ام راكان تلبس عبايتها علشان يطلعون ... لكنها لفت على عبير اللي تحوس بجوالها .. تأملتها لبرهة وابتسمت حزن على هالبنت الوردة اللي حملوها مسؤولية فوق طاقتها ...
أم راكان ::/ عبير متى بتطلعين انتي ؟؟
عبير ::/ مادري يمه يمكن بعد شوي ؟؟
أم راكان ::/ بتتأخرين في الليل ؟؟
عبير بتفكير ::/ مادري يمه لكن الأكيد اني بحضر الزفة وبسلم عليها وبجلس لحد ماتروح ؟؟ عاد متى هي بتنزف ومتى بتطلع مادري ؟؟
أم راكان مبتسمة ::/طيب حاولي ما تتأخرين في الليل وترجعين مبكرة ... زين ؟
ابتسمت عبير لأمها وهزت رأسها بالإيجاب ...
طالعتها أريج بنظرة تصغير انقهرت منها عبير وبعدها مشت مع أمها طالعين لنواف اللي صار عند الباب له ساعة ...
ركبوا أريج وام راكان السيارة .. ونواف احتارت نظرته بينهم وبين الباب ؟؟ وشلون سكروا الباب ؟؟يعني عبير ماراح تجي و بتجلس بروحها في البيت ؟؟؟ ياسلام عليهم يعني يقولون لها العبي بذيلك مادام مافيه أحد ؟؟؟ وبعدين ليش أرسلوا أنوار ونورة لبيتنا ؟؟ كان تركوهم معها على الأقل يمسكون على يدها شوي وماتقدر تسوي شي ؟؟
قطعت عليه ام راكان ::/ كيف حالك نواف ؟؟وش أخبارك ؟؟
انتبه نواف وابتسم ::/ بخير الله يسلمك .. انتي بشريني عن صحتك ؟؟
ام راكان بتعب::/ الحمدلله على كل حال ؟؟
حاول نواف يلقى الفرصة المناسبة واستغلها ::/ خلاص هذا انتم اللي بتروحون ؟؟ والا باقي؟
ردت عليه أريج::/ ايه خلصنا ..
ام راكان ::/ بقت عبير وبتروح لزواج صديقتها ..
نواف بتشكيك ::/ ومن صديقتها هذي ؟؟ ومن بيوديها ؟؟
أريج :/ بتمرها وحده من البنات وبتروح معها ؟؟
نواف بقهر ::/ لاو الله .. على كيفها هو ؟؟وليش ماقالت لي أنا أوديها ؟؟
استغربت ام راكان اسلوب نواف الدفش تجاه عبير ::/ عادي يمه ماحبينا نكلف عليك ونخليك تتمشور في شوارع الرياض .. وصديقتها رايحة رايحة للزواج قالت لها تمرها
تنهد نواف بعصبية وكأنه فهم اللي تبي تسويه عبير من وراء أمها واختها .. واستغفر بصوت مسموع ...
مشى نواف متوجه لبيت الريم وكانت أريج هي اللي توصف له .. بس هو طول الطريق وباله مو معه ؟؟ يفكر باللي ممكن قاعد يصير عند بيت عمه ؟؟ تخيل الوضع اللي ممكن تكون عليه عبير وهي في السيارة ؟؟أول مابدت هالأفكار تغزيه حس بقلبه شاب ضو ...ماصدق خبر يوصلهم وينزلون إلا وهو شاخط بالسيارة ومطلع جواله واتصل عليها بدون شعور .. ...
أول ماشافت عبير رقمه وهي بتطلع استغربت اتصاله ؟؟ وعلى طول ردت عليه خافت لايكون صار لهم شي ..
عبير بصوت خايف ::/ مرحبا ؟؟
نواف وهو مايشوف قدامه ::/ السلام عليكم ..
عبير ::/ هلا نواف وعليكم السلام ..
حس نواف بقلبه يتقطع من قالت اسمه بصوتها الناعم ::/ طلعتي والا بعدك ؟؟
عبير وهي مبتسمة براحة::/ ايه الحين بطلع ..
نواف ::/ وين بتروحين ؟؟
عبير مستغربة::/ زواج صديقتي ؟؟
نواف::/من هي بنته ؟؟ وفي أي قاعة ؟؟
عصبت عبير عليه ::/ وانت ليه تسأل ؟؟
نواف واعصابه فلتانة ::/ وانتي ليه ماتبغين تجاوبين ؟؟
تعوذت عبير من الشيطان لما حسته معصب ::/ مو مسألة ما ابي أجاوب لكن ماتعودت أحد يحقق معي بهالصورة وكأني في مخفر شرطة ؟؟
نواف باستهزاء::/ موهذا اللي خلاك توصلين مواصليك ؟؟ أنك ماعمرك حسيتي بأنك في مخفر شرطة؟؟
عبير باستفهام ومستغربة ::/وش تقصد ؟؟
نواف::/ ما اقصد شي .. بس متى بترجعين للبيت ؟؟ ومن بيرجعك ؟؟
عند هالسؤال فقدت عبير قدرتها على التحكم في اعصابها .. أول شي كلامه الماصخ اللي قاله من شوي واللي ماله طعم .. وسؤاله الأخير ونبرة صوته وهو يسألها جرحتها وحسستها أنها وحده وسخة وحده ماتربت ولا هي أهل للثقة ..
وانفجرت عليه ::/ اسمعني زين نواف ... انت ماتدخل في أمورنا الخاصة مهما كانت .. أنت تخدمنا بعيونك ويعطيك ألف عافية على اللي تسويه واللي سويته ... لكن انك تجي تحقق معي وين رايحة ووين جاية .. فأحب أقولك أنت مالك أي وجه حق .. امي وعارفة أني بطلع .. وهي اللي اعتبرها مسؤولة مباشرة عني ...
عصب عليها نواف ومن طريقتها وقاطعها ::/ وهذا اللي ضيعكم أنها هي اللي مسؤولة عنكم ...؟ وما وراكم رجال ؟؟
شهقت عبير من الصدمة وما قدرت تتمالك نفسه ::/.. الحين انت مكلمني علشان تسمني بهالكلام ؟؟؟؟؟؟ وتقول عن أمي هالألفاظ ؟؟؟
تعوذ نواف من الشيطان ::/ عبير .. اسمعيني أنا آسف ماكان قـ ـ ـ ـ
قاطعته عبير وصوت شهقاتها تسبقها ::/وقـ ـ ـ ح ...
سكرت عنه السماعة ورمت نفسها على الكرسي ... ونزلت دمعاتها غصب عنها من كلامه القوي الجارح ؟؟؟ هزتها كلماته وضربتها في الصميم ..خلتها تندم على اللي سوته واللي قاعده تسويه للحين ......!! قبل لاتتخذ أي قرار رن جوالها وأول ما سمعته وقفت على حيلها وحاولت تمسح دموعه وتصلح مكياجها اللي اخترب .. ولبست عبايتها وطلعت ....
------------------------------------------------------------------------------
دخلت أريج وأمها البيت وكانت منحرجة ومتفشلة بقوة .. لأنها ماتعرف أحد أبد ..
مشت هي وأمها ودخلوا للمجلس واستقبلتهم ام مشاري اللي تعرفت على أريج وامها...
ندى كانت جالسة مع عمتها والبنات .. وأول مالمحت أريج واصلة ابتسمت من خاطرها لهالبنت اللي ترتاح لها أكثر وحده بعد سحر والتفتت لعمتها على طول ..
ندى ::/ عمه عن أذنك هذي أريج وصلت بروح استقبلهم ..
ام عبدالله ::/ اذنك معك حبيبتي ..
مشت ندى لكن رجعت فجأة مرة ثانية ::/ ايه عمه ترى بجيب خالتي ام راكان تجلس معك زين ؟
ابتسمت لها عمتها وهزت راسها انه عادي ومافيها شي ..
مشت ندى متوجهه لأريج وأمها اللي كانوا واقفين في اول المجلس ... انتبهت أريج عليها وافتشلت أكثر من شكلها لما شافت ندى مقبلة عليهم بفستانها الأحمر الحرير وحلقات الأذن الألماس والياقوت اللي كانت لابستها ... لكن خنقتها العبرة وحست بالدموع تتزاحم عند عينها لما تذكرت اللي صار لها وانها انفصلت عن طلال اللي كانت تهاذي به عندها دائما ...
حاولت تمسك نفسها ولاتصيح .. وتقدمت هي وأمها يمشون علشان يتقابلون مع ندى ..
وصلتهم ندى وهي مبتسمة ::/ هلا والله ... واخيرا جيتوا مابغيتوا توصلون ..
ام راكان :/ وش نسوي بالزحمات وانا خالتك ...
قربت ندى لأم راكان و حبتها على راسها ::/ هلا والله خالة وش اخبارك .؟
ام راكان ::/ الحمدلله بخير ونعمة ... انت وش اخبارك (( وطالعتها بنظرتها الحنونة المعتادة ))
تنهدت ندى ورجعت تبتسم من ورى خاطرها ::/ نحمد الله ..
نطت عليهم أريج ::/ يا اختي عبريني سلمي علي على الأقل ..
لفت لها ندى وخذتها في حضنها ::/ ياربي عليهم اللي يغارون من أمهم .. طيب اصبري لحد مانسلم على خالتنا أولى منك ..
ضربتها أريج على كتفها ::/ وش اخبارك بس يالدوبا ..
ابتسمت ندى وهي تطالع عمرها من تحت لفوق ::/ هذا احنا عايشين ...
ابتسمت لها أريج تخفف عنها وقرصتها مع يدها ..
التفتت ندى على ام راكان وسفهت أريج ::/ خالة تعالي أوديك عند عمتي والبنات ..
أريج ::/ احلى يا ام ركان بتجلسين مع اهل المعرس ..
ابتسمت ام راكان وهي تمشي مع ندى ::/ الله يوفقهم ويسعدهم ..
مشت ندى وهي ماسكة يد أم راكان لحد ما وصلوا لمكان عمتها سلموا البنات على بعض وجلست ام راكان جنب ام عبدالله وخذتهم السوالف ...
اما اريج فلفت على ندى ::/ ندى ماودك توديني لريم ؟؟ تراها قايلة أول ما أوصل أطلع لها
ابتسمت ندى وهي توقف ::/ طيب قومي نروح ..
طالعتهم سارة بقهر ::/ ودي أروح معكم ..
ندى وهي تغايضها ::/ مافيه اجلسي هنا لحد مايزفونها لكم ...
طلعت سارة لسانها في وجه ندى .. وسفهتها الأخيرة تغايضها وخذت يد أريج علشان تقهر سارة أكثر ..
صرخت عليها سارة من القهر::/ تشوفين إذا مالحقتكم ؟؟؟
ما ردت عليها ندى ومشت مع أريج طالعين لغرفة ريم ..
.
.
.
.
....................../ الله عليكم .. الحين من العروس فيكم ؟؟ (( وطالعت في الثلاث كلهم ))
ضحكوا كلهم عليها .. وردت سحر تنكت ::/ انتي من دون منافس ..
ابتسمت أريج بحالمية ::/ ياليته صدق ... وانا عروس والبس فستان العرس .. ويجي الفارس الملثم ويشيلني بين ذراعيه ـ ـ ـ
قاطعتها ندى ::/ هيه هيه انتي .. وقفي خيالاتك شوي ... وباركي للبنت
ابتسمت اريج ::/ اي والله نسيت ابارك لك ريمو ..
و قربت منها وسلمت عليها ::/ ألف مبروك ياحلوة .. منك المال ومنه العيال ؟؟
ندى::/ لو سمحتي العكس ..
اريج باصرار ::/ لا ... هي منها المال لأنها ماعليها قصور وهو عليه العيال ؟؟ بعد مو عدل ان كل شي يصير عليها هي بس ..
ضحكت عليها ريم ::/ وش رايك نخليها المال والعيال كلهم عليه هو ؟؟
سكتت أريج وكأنها تفكر ::/ كلام منطقي ... وانتي ماعليك الا تتمشين وترفهين عن نفسك ؟؟
سحر ::/ ايه والله حركة .. وهو خليه يكرف في البيت ويروح الدوام ويجيب لكم العيال ويربيهم وكل شي ..
أريج ::/ ايه واذا شفتيه قصر في شي ماعليك الا تجيبين هذيك العصا وتخلينها تسوي علامات على ظهره ... وان ماقدرتي عليه بروحك اتصلي علينا نجي نساعدك ..
ريم وهي تضحك ::/ ايوه يا سلاحف النينجا ..
قاطعتهم ندى وهي تصرخ ::/ هي انتي واياها ترى ما اسمح لكم هذا عبدالله .. وانتي يالغبية (( تطالع ريم )) تاركتهم يتكلمون عنه بهالطريقة و ساكتة ؟؟
سوت ريم نفسها مكتأبة وانه ضاق صدرها ::/ الله يقلع بليسكم بنات خليتوني اغتابه ويآخذ حسناتي ؟؟
ضربتها ندى على كتفها ::/ بس هذا اللي همك ... لكن شي اسمه رومانسية ماتعرفين ؟؟
ضحكت ريم ::/ هههههههههه ارجوك ترى هالمصطلح انا متبرية منه ليوم الدين ..
ندى ::/ عاد انتبهي لنفسك ترى ولد عمتي هذا بزيادة رومانسي وحساس وخجول ,, فانتبهي لتعاملك معه ؟؟
سكتت ريم وماردت عليه لأنها فعلا حست بالخجل يسيطر عليها ... وعلاماته بانت على خدودها من انذكر اسمه..
بدوا البنات يسولفون في مواضيع عامة وينتظرون هالدفتر يجي علشان توقع عليه ويزفونها ويرتاحون ...
بعد دقائق سمعوا دق خفيف على الباب ...
نقزت ندى ::/ احلف لكم انها سارة ؟؟
ريم باستفهام ::/ من سارة ؟؟
ندى بقل صبر ::/ من غيرها بنت عمتي ؟
شهقت ريم ::/ لا لا تقولين ... وش بيطلعها ؟؟
سحر ::/ لا ندى ماتوصل لهالدرجة انها تطلع فوق من دون مايكون أحد معها ...
سكتت ندى وكأنها اقتنعت ... وقامت سحر تشوف من عند الباب ...
سحر تستهبل ::/ من الطارق ..؟
طلال يستهبل ::/ انا اللص السارق ؟؟
كملت سحر ::/ الا تخجل من نفسك يا فاسق ؟؟
ضحك عليها طلال ::/ افتحي الباب الله يخليك ..
ضحكت سحر وفتحت له الباب .. وشافت في يده الدفتر ... وعلى طول التفتت لهم ..
سحر ::/ كلولولولولوش .. ابشركم جاء الفرج ... والدفتر هذا هو وصل .. يالله تغطوا علشان يزفه اخونا الكريم ..
ضحكوا البنات كلهم الا هي ... صوته الرجولي العميق قلب عليها المواجع .. ورجع لها الغصة اللي بحلقها ... ليه مااختار الا هالوقت اللي بتنزف فيه ريم علشان يخليني اشوفه واسمع صوته ...؟
دخل طلال وهو منزل عيونه والدفتر بيده .. وأريج وندى تغطوا وجلسوا في زاوية الغرفة بعيدين شوي ..
مد طلال الدفتر لريم اخته ينتظرها توقع .. لكن ريم رفعت راسها له والدمعة تأذن بالنزول ::/ لازم اوقع طلال ؟؟
ابتسم لها بحنان قطع قلب ندى اللي تطالعه من وراء الحجاب ::/ هذي حال الدنيا وانا اخوك... لكن وقعي وما جاك علي ..
تنفست ريم بعمق وضربات قلبها زادت والعرق ملى يدها .. وقربت للدفتر وعطاها طلال القلم ... وأخيرا وقعت ...
وصارت في هالساعة وهالدقيقة وهاللحظة حرم عبدالله بن محمد ... لكن هل ياترى بتتوفق وبتقدر هي واياه يكونون اسرة ؟؟ والا ممكن كل شي ينهد وما تصير فيه عائلة وهالتوقيع يلتغي بورقة او ظرف من ظروف الدنيا ؟؟
زغرطت سحر ::/ كلووووووووووووووووووووووووولووووووش
وتقدمت وحضنت ريم وبدت تبوسها ::/ مبروك ألف ألف مبروك يالغالية ..
حضنتها ريم ::/ الله يبارك فيك وعقبالك ..
والتفتت على البنات وبحركة مضحكة ::/ عقباااااااااااااااالكم كلكم واحضر ملكاتكم كلكم .. وياويلكم لو ماعزمتوني ؟؟
ضحكوا عليها الجميع .. وتقرب منها طلال ::/ واخوك ماله عقبالك ؟؟
انصدمت سحر لما سمعته وزادت غصتها على ندى بنت عمها .. تخيلت لو انها سمعت هالكلمة اللي قالها بهمس في أذن ريم .. وما قدرت تتوقع وش ممكن يصير ؟؟
حضنت ريم طلال وهو لف يديه عليها ..
ريم ::/ عقبالك يالغالي .. وارقص ان شاء الله في عرسك ..
ضحك طلال ::/ انتي وبنتك ..
استحت ريم وبعدت شوي عن اخوها ... قرب لها طلال وحبها مع جبهتها ومشى طالع من الغرفة ... والألم والحسرة يملون قلبه ..لكن مكابرته ورجولته اللي يحس انها ممكن تنقص خلته ما يوضح اي شي او اي تعبير على ملامحه واكتفي انه يختزن هالحزن في قلبه هو وبس ... لأن في اعتقاده ان هي اللي اختارت ... ومو من حقه يعترض عليها ولا من حقها تشوف تأثير انفصالها عنه ...!!
أكيد انها وحده من المتغطين ... مو أكيد الا هي ندى اللي جالسة على اليسار ...
الله يالدنيا .. كان المفروض نكون انا وانتي معهم اليوم وينعقد قراننا .. لكن يالله انتي اخترتي مشاري يكون زوجك .. والله يوفقك ... ويوفقني بعدك ...؟
-------------------------------