دخل المجلس وهو متحمس من قلبه .. عرفت عمته كيف تبث فيه هالروح القتالية .. سلم لما دخل علشان ينبههم بوجوده ... و جلس على الكنب وهو يراقب الجالسين .. كان عمه يحوس بأوراق وملفات .. اما مشاري ومصعب فكانوا يطالعون التلفزيون ويعلقون على اللي فيه ...
نزل عيونه للأرض وحاول يرتب الكلام اللي بيقوله لعمه في باله ... كان يبحث عن مقدمات علشان يدخل في الموضوع .. وكلما لقى له مدخل رجع مرة ثانية وكأنه مو مقتنع فيه ...
ولما قرر خلاص انه بيتكلم .. استجمع كل قواه لأنه الآن بيكون في مواجهه مع عمه وجها لوجه ... والموضوع بيكون مباشر ومافيه لف او دوران .. ومهما كان عمه لكن هو مايقدر يقدر ردة فعله ...
رفع راسه بيتكلم لكن انتفض بمكانه لما سمع عمه يتكلم بصوت عالي لمشاري ..
ابو مشاري ::/ لالالا .. هالأرض انا مو واثق منها .. أكيد عليها مخالفات والا شي ثاني .. لأنه مو معقولة انهم يبيعونها بهالسعر وهي بهالمساحة وفي هالحي الراقي ..
رد عليه مشاري ::/ أنا بعد قلت نفس الكلام ... ويوم سألته ان كان عرضها عليك والا لا ؟؟ تلعثم وحاول يكذب علي بس كشفته ودريت انك رفضتها ..
ابو مشاري وهو يمسح نظارته ::/ عارف حركاته .. كان يبيك توافق عليها وتوقع وبعدين نتورط ونضطر نشتريها ...
ابتسم زياد وهو يراقبهم وحس ان الله سهل أموره لما خلاهم يفتحون هالسيرة .. شكر عمته من كل قلبه لأنها أكيد دعت له من خاطرها وباب الإجابة مفتوح ...
حاول يدخل معهم في الموضوع ::/ وش سالفتها هالأرض ؟؟
التفت له مشاري وهو يشرب من بيالته ::/ واحد عارضها علينا للبيع .. لكن ماتسوى سعرها على موقعها .. وقلنا أكيد ان عليها مشكلة .. إما ان صكها مزور أو انها من ممتلكات البلدية ...
طالعه ابو مشاري من تحت نظارته ::/ عاد انت بكرة بتصير شريكنا .. وإذا ماقدروا علي انا ومشاري بيجونك على طول .. علشان كذا انتبه وانا عمك من هالغشاشين ..
ابتسم زياد يريح عمه ::/ أفا عليك ياعمي انا ما اشك خيط في ابرة الا بعد ما اشاورك .. لحد ما اصير مثلك فاهم وعندي خبرة عقبها اتصرف بروحي ..(( وغمز له ))
ابتسم له عمه برضا .. واستبشر زياد بهالرضا اللي نزل عليه اليوم .. وقرر يدق الحديد وهو حامي ويفتح الموضوع ..
زياد بارتباك ::/ عاد يا عمي بما انك فاهم وعارف ولك خبرتك في العقار .. قلت ودي اشاورك في بيت شفته من مدة ،،، صغير وعلى قدي وجاء بخاطري اشتريه لي بما انه قريب من هالحارة..
استغربوا كلهم من كلام زياد وكلهم طالعوه بنظرات تعجب .. والإستفهامات تحوم حول روسهم ...
ابو مشاري مستغرب ::/ وش اللي طرى عليك تبي بيت ؟؟ يعني بتأجره ؟؟
ابتسم زياد :/ لا يا عمي بسكن فيه انا وندى ان شاء الله ؟؟
عقد مشاري حواجبه بس ماحب يتدخل في الموضوع لأن الكلام بين ابوه وولد عمه .. اما ابو مشاري فابتسم وكأنه هو الثاني فرحان باللي قاعد يصير ..
ابو مشاري ::/ ندى مشتكية لك من شي ؟؟؟ والا انت تشكي من شي صاير عندنا بالبيت ؟؟
استحى زياد لأن عمه فهمه غلط ::/ لا ياعمي ما كان هذا قصدي ... انا اقصد اننا كبرنا و وندى كبرت و ماعاد له داعي نحرجكم ونضايق العيال في بيتهم .. خصوصا انهم مو محارم لندى وانا مو محرم لسحر ومرت عمي ..
طالعه مشاري بعصبية مخفية ::/ ومن قال لك اننا مو مرتاحين والا متضايقين ؟؟ حنا عادي عندنا و ما كأن شي متغير علينا ؟؟
تدخل مصعب ::/ إلا ان كانت ندى متضايقة منا فهذا شي ثاني ...
تدارك زياد الموضوع ::/ لا والله ماقالت شي ولا اشتكت انها متضايقة ولا هم يحزنون .. بس انا شفت هالبيت زين ومناسب لي فقلت خسارة افوته (( نزل عيونه) وخصوصا اني في يوم بعرس ان شاء الله وبحتاج سكن مستقل ...
ابتسم ابو مشاري بفرحة في عيونه ::/ سبقت رزقك يا ولد سلطان ...
رفع زياد عينه لعمه مستغرب من كلامه اللي مافهم منه ولا حرف .. حتى العيال طالعوا ابوهم مايدرون وش يقصد ؟؟
تسند ابو مشاري على ظهر الكنب وسند يده على المتكأ وقال ::/ ولا يهمك زوجتك إذا جتك .. بتجيك هي وبيتها معها ولا تهتم ...
زادت علامات الإستغراب في وجوههم وكأنهم ينتظرون ابوهم اللي سكت يكمل علشان يفهمون ..
فهم لهم ابو مشاري وحب يوضح لزياد السالفة أكثر وأكثر ،،، دق على صدره يمزح وقال ::/ زوجتك راعية الحلال والدلال عندي .. وبيتك عندي ولا أبيك تطلع من هالبيت ابد لا انت ولا اختك ؟؟
تبهتوا العيال في وجه ابوهم لما فهموا مقصده .. مشاري ماكانت في وجهه أي معالم لأي انفعال .. كان الجمود هو الشي الوحيد اللي بعيونه .. اما مصعب فكان يشتعل من الغضب على أبوه .. كيف يتجرأ ويعرض اخته بهالطريقة التجارية ؟؟؟ مصعب حاس وعارف ان اخته تميل لولد عمه لكن توصل انه هو يخطبه لها .. مستحيل ..!! عمره مافكر بهالطريقة ..
زياد ماكان اقل منهم وانما زاد عليهم في الإحراج .. كان في موقف لا يحسد عليه
منحرج كيف راح يرد على عمه اللي عرض عليه بنته ...
لكن لما شاف ان السالفة ممكن تنطوى ويؤخذ سكوته على انه موافق .. ماحب الفكرة وارتعدت اوصاله بمجرد ماطرت على باله انه يتزوج وحده غير عذا ... وتكون ام عياله ... نزلت عليه الجرأة مرة وحدة ورفع راسه لعمه وهو يقول ::/ ماتقصر ياعمي .. وخيرك وافضالك مغرقتني من راسي لرجليني .. لكن اللي ابيها موجودة وما تبي منا الا اروح انا وانت ونخطبها رسمي بعد ما تتخرج من الثانوية السنة الجاية بإذن الله.. والبيت وموجود بفضل ربي هو بنهاية الحارة اللي ورانا ... ويسلم راسك يابو مشاري..
تفاجأ ابو مشاري من رد زياد .. ماكان متوقع ولا واحدبالمية ان زياد يرفض عرضه ويفشله ... كان شايل هم عياله كيف يقنعهم يأخذون بنت عمهم والحين تفاجأ ان المشكلة كلها عند هالولد ؟؟؟
طالعه ابو مشاري وهو يزفر بغضب ::/ومن هذي اللي تنتظرنا ؟؟
انحرج زياد بس شد العزم وقال ::/ بنت عمتي ...!!
تفاجئوا كلهم وأولهم مصعب .اللي كان مأمل انهم يرفضون راشد ويوافقون عليه هو .. لكن الحين لما طلع زياد بالصورة فهالبنت شكلها مكتوب على جبينها انها مو من نصيبه ..
وقف ابو مشاري بغضب (( هالجوهرة مادري متى برتاح من سيرتها ،، اول حياتي حطمتني ونهايتها بتكسر قلب بنتي وفوق هذا بتآخذ نص حلالي ))) حاول يكتم كل شي بنفسه لأن كبريائه مايسمح له وقال بعين ضيقة ::/ انت ماجيت تشاورني يا ولد سلطان .. انت جاي تعلمني بعد ما خلصت من كل شي ... والظاهر حتى الخطبة شكلك مالي يدك من عمتك وزوجها علشان كذا ما ظنتي انك بتحتاجني أروح معك ..
طلع ابو مشاري تارك اللي وراه غايصين في غضبهم .. غضب من ابوهم وعرضه وغضب من جرأة زياد ورفضه لعمه .. اما زياد فما حط بباله وحس ان كلام عمه يعني الموافقة ... وإذا على خطبة عذا فأكيد عمه ماراح يرفض هالشي وهو بدوره بيحاول يوضح لعمته انه يبيها علشان يرفضون اللي يتقدم لهم لحد ماهو يكون نفسه ويتقدم لها رسمي .....................................!!
------
بعد ما يقارب الأسبوع
اجتمعوا البنات مع بعض عقب ماخلصوا مصلين العصر وطلعوا يجلسون في الحديقة الخارجية
كانت رشاشات الزرع تشتغل وملطفة الجو ... جلسوا على مقاعد الحديقة اللي كانت مغطاة بمظلة وبدوا يسولفون .. وانتم عاد ادرى بسوالف البنات ...
ريم وهي تشرب من البيبسي ::/ تعالوا صديقتكم غادة هذي متى قررت تتزوج ... الله يقلع بليسها كانت عندنا في الحفلة ولا سمعتها جابت طاري ؟؟؟
ضحكت ندى ::/ من بكرة على طول اتصلت علينا وعلمتنا .. قالت انها استحت تقول لنا وجهاً لوجه وخصوصا ان فيه بنات كثار ..
ريم ::/ طيب متى تملكت ؟؟
سحر وهي تربط شعرها ::/ بعد الحفلة بيوم .. .. وزواجها الخميس الجاي .! لا تنسين تراها عازمتك ...
ريم ::/ ايه على طاري زواجها وينه فيه ومن بيجي وعندكم فساتين والا لا ؟؟
ندى ::/ شوي شوي .. الحين حددي اي سؤال تبينا نجاوبك عليه ؟؟
ريم بحماس ::/ كلهم .. اول شي وين زواجها فيه ؟؟
سحر ::/ في الشيراتون ..
ريم ::/ ومن بيجي من اللي تعرفونهم ؟؟
ندى ::/ رحاب أكيد بتجي لأنها بنت عمها .. وأريج قلنا بنمر عليها يوم الزواج وماعارضت يعني شكلها بتروح ...؟؟ ويمكن عمتي وبناتها .. وباقي الشلة عاد مادري من عزمت منهم ؟؟
نطت سحر وكانها توصلت لشي ::/ إلا ريم ماقلتي لي .. وش صار بشريني عن راشد وخطبته ؟؟
طالعتها ريم بنظرات مبهمة بالنسبة لسحر ... لكن تقول (( كيف تتجرأين وتسأليني مثل هالسؤال القاسي عن راشد ))
ابتسمت بخفيف وكأن فيها شي ::/ ما صار شي ... هو رفض انه يتزوج الحين ؟؟ (( وطالعتها بنظرة ثانية تبي تفهمها شي لكن سحر للأسف ماتقدر تفهم لغة العيون ))
سحر بحزن ::/ قهر .. سخيف راشد كان ودي عذا تصير وحده من الأقارب لنا مرة .. والله انها حبيبه وجلستها ما تمل ..
وجهت ندى نظرتها لسحر متفاجأة من كلامها وفي خاطرها تقول ان عذا بتكون من المقربين لكن بطريقة انتي مستحيل تقبلين فيها ...
ضحكت سحر وقالت ::/ عاد تصدقون مصعب سألني عنها وقلت له انكم ناوين تخطبونها لراشد .. عاد لو أقول له الحين ان كل شي تكنسل بيستانس ,,
طيرت ريم عيونها بنقمة ::/ والله العظيم هالعيال خربوا ... الكبار مقاطعين الزواج .. والصغار متشفقين عليه ...
استحت ندى لما سألتها ::/ ليش وش صاير خلاك تقولين كذا ؟؟
أشرت عليها ريم باستهزاء ::/ اسمعوا وش تقول ؟؟؟ يعني انها ماتدري وش السالفة ؟؟
غمزت سحر لريم ::/ لا هي فاهمة بس تبغاك تنطقين اسمه علشان تتلذذ ؟؟
ارتبكت ندى واستحت غصب عنها ونزلت عينها تتلهى بجوالها ... لكن الثنتين ما تركوها في حالها ...
ريم بخبث ::/ ايه من سمع طاري العرس وهو ناشب بحلق أمي .. إلا انا بتزوج مع راشد ؟؟
ركزت سحر نظرها على ندى ::/ طيب وش رايها خالتي في الفكرة ..؟
ابتسمت ريم ::/ قالت بكيفك مادام اخوك ما يفكر بالزواج بنخطبها لك انت ..
طالعتها سحر خايفة بس غمزت لها ريم .. رفعت ندى عيونها وسألت ::/ وش رد عليها هو ؟؟
مسكت ريم ضحكتها :/ قال لا أنا ابي وحده وما ابي غيرها ؟؟؟ اخطبوا لي ندى ..
بلعت ندى ريقها بصعوبة ومستحية من هالتصريح المباشر وقالت::/ وش ردت امك ؟؟
ضحكت سحر ::/ ياحبي لك يا ندوش ليتك تشوفين شكلك وانتي متحمسة ؟؟
ضربتها ندى على كتفها وهي خجلانة .. وردت عليها ريم ::/ امي انصدمت .. وقالت مستحيل تفكر اني اخطبها لك ؟؟ لأنها مو من نوعية البنات اللي افضلهم ...
طالعوها الثنتين بصدمة .. ندى كانت دقيقتين وتصيح .. لكن سحر عصبت على مزحة ريم اللي تعدت حدودها ..
سحر ::/ ريــــــــــــم ..!! خلاص عاد حرام عليك ؟؟؟ اوقفي هنا
ضحكت ريم وهي تصفق كف على كف ::/ والله حالة ..! مشكلة الناس اللي تحب ؟؟
لا تخافين أمي قالت ماراح نلقى أحسن منها .. بس بينتظرون شوي وبعدين بيتقدمون لكم رسمي ؟؟
سحر بفرحة ::/ والله ... ياااااااااااااااااااااااااااااااااي واخيرا بشوفكم معاريس ؟؟؟ اخوي واختي ؟؟ وناااااااااااااااااسة ؟
ريم ::/ الحمدلله والشكر اللي يسمعك يقول انتي اللي بتتزوجين ؟؟ المهم اتركونا من هالسالفة وقولوا لي عندكم فساتين تحضرون فيها زواج البنت ؟؟
سحر ::/ الحمدلله انا مفتكة عندي واحد مفصلته من فترة ..
لوت ريم فمها ::/ ماشاء الله عليك .. وانتي ندوش ؟؟
وعت ندى من سرحانها وتفكيرها اللي شغلها وابتسمت والفرح يشع من عيونها ::/ لا انا ماعندي ..رحنا امس للسوق ادور لي واحد ومالقيت شي ؟؟
صفقت ريم بفرحة ::/ يس .. أشوى فيه احد مثلي ... زين وش رايكم نطلع اليوم ندور لنا فساتين وبالمرة نتمشى ؟؟؟
التفتت سحر على ندى ::/ انا ماعندي مانع بس الأخت اللي هنا لازم تقول لأخوها ...!
ابتسمت لهم ندى ::/ ماعليكم ماراح يرفض .. بروح معكم بس طبعا بيوديني هو ...
وقفت ريم ::/ خلاص .. وانا بروح الحين لبيتنا علشان اجهز عمري للطلعة والوعد ان شاء الله بعد المغرب ... اتفقنا ...
كلهم مع بعض ::/ خلاص اتفقنا ...
مشت عنهم ريم وهي تركض بتدخل البيت .. ووقفت وراها ندى وطالعت سحر وقالت ::/ بروح لغرفته أشوفه وش حايس .. وبالمرة بقوله عن الطلعة .. انتي بتدخلين ؟؟
وقفت سحر ::/ ايه بروح عند خالتي والا بطلع لغرفتي ؟؟
ابتسمت لها ندى وهي تعطيها ظهرها ::/ خلاص اجل اشوفك فوق ...
راحت ندى لأخوها .. ومشت سحر داخلة للبيت وهي تهوجس ...،،،"" حظك يا ندى والله من السماء ...الظاهر ان أمك ماتت وهي راضية عليك .. لأن ربي رزقك بطلال اللي مخليك ملكة وانتي مو حاسة .. والحين يفكر يخطبك ويرتبط فيك ... وانا ياحسرة علي حتى النظرة ما القاها ؟؟؟ هي هدية التخرج الي حسستني باهتمامه وتفكيره فيني .. لكن انا داعية ربي انه يكون من نصيبي .. وعساه يكون يحبني بس مايوضح هالشي علشان ماينحرج ويحرجني معه ..""
انتبهت لنفسها لما سمعت اللي يدندن بألحان مختلفة .. لفت وجهها لجهة المغاسل ولقت مصعب وهو يتكشخ قدام المراية ويضبط عمره .. ابتسمت بفرح لما تذكرت سالفة راشد ..
سحر وهي فرحانة ::/ اووه أوه وش عليك ... وين بتروح على هالكشخة كلها ؟؟
التفت لها مصعب يبتسم ::/ سلامتك بس بخاوي الوالد للشركة ...
تقدمت له سحر ::/ الحمدلله ان ماعندنا اختلاط .. والا كان انفتنوا فيك البنات على طول وضعت من يدين عذا ...
طالعها مصعب مستغرب كلمتها الأخيرة::/ وش دخل عذا عاد ؟؟
ناظرته سحر وغمزت له ::/ دخلها ان راشد رفض الزواج .. يعني الحين خلت لك الساحة ..
ابتسم مصعب ابتسامة باهتة صفراء وطالع اخته بنظرات حزن لما تذكر كلام زياد ولد عمه ... الحين كلهم انكتب ان مالهم نصيب مع اللي ارتاحوا لهم لا هو ولا اخته ... ربت على كتفها وهو يقول ::/ لا خلاص كنسلت الفكرة .. ماعاد ابيها بشوف لي وحدة ثانية وتكون على ذوقك ...
استغربت سحر من رده ونظرته اللي مافهمتها .. لكن ما قدرت تقول له شي لأنه تركها لأفكارها وطلع عنها للساحة الخارجية........ !!
------------------------------------------------------------------------------
للمرة الألف قاعده تقلب في جوالها وتشوف صور الحفلة ،،، عاجبها شكل سحر في المقام الأول وبعدها شكل ندى ... قامت تتأمل الصور وتتخيل لو انها كانت مكان وحده منهم ،،، وعليها عقد الماس والساعة الشوبار آخر موديل .. والا خاتم السوليتير ؟؟؟
ابتسمت بسخرية على حالها وحالهم ،، المفروض ماتفكر هالتفكير ولا تترك له مجال انه يستحوذ على تفكيرها ... وعت على نفسها لما سمعت صوت مسج واصل ..طالعت الجوال بس مالقت شي .. رفعت راسها لعبير وشافتها مبتسمة وتقرأ اللي وصلها ..
أريج ::/ هذي العلاقات والا بلاش ؟؟؟ كل خمس دقائق مسج ؟؟؟؟
عبير من دون ماترفع راسها من الجوال ::/ اذكري الله لا ينقطعون ..
أريج ::/ تكفين عطيهم رقمي وادهني سيري علشان يرسلون لي ؟؟
طالعتها عبير بنظرة غضب ::/ وش تبين فيهم ؟؟ خليك مع صديقاتك أصرف لك ؟؟
استغربت اريج غضبها ::/ لا قومي اضربيني ؟؟
ام راكان ::/ اذكروا الله وش صار لكم ؟؟
التفتت أريج ::/ اسأليها هي يمه .. مدري عنها على طول هبت بوجهي ...!
عبير باستفهام::/بعد هبيت بوجهك ؟؟؟؟ والله ماهبيت ولا شي انتي تشوفين اشياء غريبة هاليومين حنا مانشوفها ؟؟
رفعت اريج حاجبها ::/ حتى الرسايل اليومية والإتصالات أشوفها وانتم ما تشوفونها ؟؟
وقفت عبير بغضب ::/ أريج ... ترى ما اسمح لك ؟؟ وبعدين وش فيها لا صاروا صديقاتي أحسن من صديقاتك ويراسلوني ويكلموني .؟ تغارين يعني ؟؟
أم راكان ::/ خلاص انتي واياها . وانتي بعد اجلسي وتعوذي من الشيطان .. هاليومين صايرة كبريت .. مايمدي الواحد يكلمك كلمتين الا وعصبتي ؟؟
رمت عبير نفسها على الكرسي وبدت تصيح ... استغربت أريج تصرفها وفي نفس الوقت حست ان فيه شي غريب قاعد يصير لعبير بس هي مو راضية تتكلم عنه ...
قربت لها ام راكان وخذتها في حضنها وطبطبت على ظهرها ..
ام راكان بصوت حنون ::/ وش فيك حبيبتي ؟؟؟ هاليومين انتي مو عاجبتني ؟ وش صاير ؟
دفنت عبير وجهها بصدر امها ::/ يمه والله احس اني مضغوطة من كل جهة .. احس اني في يوم بقوم الصبح وانا مجلوطة ... تعبت والله تعبت ...
ورجعت تصيح بهدوء ...
تنهدت ام راكان ::/ وش اللي متعبك طيب ؟؟
عبير ::/ كل شي يمه .. مو شي معين ؟؟
أم راكان ::/ قصدك تكاليف فستانك وتكميلاته ؟؟
رفعت راسها عبير ،، وقلبت نظراتها بين أريج وأمها ،، مسحت على شعرها وهي منزلة راسها .. ورجعت طالعت أريج وكأنها خايفة او مرتبكة ..
عبير ::/ لا يمه .. الفستان ومحلولة مشكلته .. ( ابتسمت ) خلاص عاد يمه لازم اقول ان ودي اتدلع عليك ..؟ (( وراحت تمسح دمعتها بظهر كفها ))
ضحكت ام راكان ::/ تدلعي مثل ما تبين بس عاد مو تخوفيني وتجلسين تصيحين ؟؟
ضحكت أريج لأختها لكنها في نفس الوقت مستنكرة تصرفاتها ::/ مسكينة تغار وماتعرف وشلون تجذب الأنظار .. حبيبتي ترى انا امي تدلعني بدون ما اصيح ... يعني انتي افهمي سر المهنة قبل كل شي ...
ابتسمت لهم امهم ::/ المهم ترى بيت عمكم اليوم بيجون عندنا على العشاء ... جهزوا شي حلو ويواجه ... زين ..
هزت عبير راسها بالإيجاب وهي مبتسمة .. ووقفت اريج بسرعة وهي تركض للتيلفون ..
ام راكان ::/ شوي شوي .. وش فيك ؟؟
أريج وهي تشيل السماعة ::/ ابتصل على إيمان تجيب لي واحد من فساتينها علشان أحضر به زواج غادة ...
قامت عبير رايحة للمطبخ تشوف وش الناقص علشان العشاء .. تنهدت وقلبها شايل هموم كثيرة .. تحس ان اللي تسويه غلط في غلط لأن عمرها ماسوته حتى لما كانت في الثانوي وفي أشد الحاجة للفلوس قبل لا تدخل الجامعة وتنصرف لها المكافئة ...!
-----------------------------------