وبعد أيام من تجهيزهم للإحتفال جاء يوم الخميس وقام الكل على قدم وساق يجهزون لإستقبال اليوم وبمجرد دخول ساعات الليل كانوا الحضور متواجدين والكل في أبهى حلة له .... والجميع لابس أجمل ماعنده .. من لبس ومجوهرات وشنط وساعات على آخر صيحات الموضة .... كل وحدة متميزة بشي عن الثانية ... أو بالأصح كل وحدة احلى من الثانية ...
البنات كانوا خليط من اقارب وصديقات وكلهم مجتمعين بمجلس أبو مشاري الكبير الخاص بالإجتماعات والحفلات ... وكان عبارة عن مجلسين كبار مفتوحين على بعض .. بأثاث راقي جدا .. وجنبه صالة صغيرة علشان تدعم المجلس في حال لم تكفي المقاعد ...!!
كانوا الخدم مثل العاملات في خلية النحل مايمدي هذي تطلع الا الثانية تدخل وبيدها صينية مليانة بكل مالذ وطاب .....!!
الجميع منسجم بالسوالف والتعليق والضحك ... والمسجل كان يشتغل بموسيقى تساعد على الرقص ..!!
وصلوا لمقر الحفلة متأخرين شوي .. والسبب سارة اللي بالموت قدرت عذا تقنعها في آخر لحظة تروح معها للحفلة لأن ببساطة امهم بتجلس مع الحريم ... وعذا تستحي تدخل للبنات بروحها وكانت تبغى سارة معها علشان تجرأها شوي كون لمياء ماراح تروح معهم بسبب ارتباطها مع اهل زوجها .......!!
دخلوا مع الباب وكان في استقبالهم وحدة من العاملات المبتسمات ... أخذت منهم العبايات وتكفلت فيها .. ودلتهم على الطريق اللي المفروض يسلكونه ...!!
التفتت سارة على عذا اللي طايرة عيونها بالمناظر ::/أقول ما ألوم عيال عمتك يوم ما يعجبهم بيتنا ولا حياتنا ...
ابتسمت عذا باضطراب ::/ صادقة ..!! والا وش اللي جابهم لنا ؟؟
سكتوا الثنتين علشان ماتسمعهم امهم .. لكن سارة التفتت للعاملة تسألها عن مكان يقدرون يصلحون فيه أشكالهم ... ابتسمت لهم العاملة الحبشية وخذتهم للمكان اللي طلبوه .....
ام عبدالله وهي تراقب العاملة لما طلعت ::/ وش بتسوين بعمرك يا اخت سارة ؟؟؟ مو يكفي أننا تأخرنا بسببك ....
سكتت سارة وماردت على أمها .. لأنها كانت منبهرة بالمكان اللي هي فيه ... كانت غرفة متوسطة ومو كبيرة مرة ... لكن جدرانها كانت كلها مرايات .. ومحفوفة بحواف ذهبية و مزينة برسومات منحوتة... والسقف كان تتدلى منه ثرية كريستال فخمة وعليها القيمة ...
ووحدة من الزوايا كان فيه كرسيين وبينهم طاولة موضوعين بشكل كلاسيكي ... ومزخرفين بنفس رسومات الجدران ...!!
هزت عذا سارة ::/ انتي أمي تكلمك ؟؟؟
التفتت سارة وهي فاغرة فاها::/ سمي يمه ؟؟
ام عبدالله وهي عاقدة يديها ::/ خلصتي متأملة ؟؟؟
سارة بانبهار :/ الله يمه ...!! ليتني كنت بنتهم ... كان وناسة بصراحة .. بيت فخم وخدم وحشم ...!! مالت علينا ..!! (( والتفتت على امها بسرعة )) يمه ليتك تزوجتي أبوهم بدل أبوي ..!! كان طلعنا الحين كشخة مثلهم ..!! وسحر طلعت مثلنا ؟؟
عذا بغضب وخوف من افكار سارة ::/ سارة وش هالكلام ؟؟؟؟ الناس طبقات ؟؟ وحنا ماعلينا قاصر ............!!! وبعدين من قال لك اننا مستغنين عن ابوي ؟؟؟
ام عبدالله باضطراب واضح بصوتها ::/ خلوا عنكم الخرابيط ويالله نطلع نسلم على الناس ...!
امتثلوا البنتين لكلام امهم الآمر ... واتصلحوا بشكل سريع وطلعوا مع بعض متوجهين للصالة الرئيسية بالبيت واللي يجتمعون فيها الحريم ...!!
عذا وسارة ماراح نقول عنهم هم الأجمل .. لا فيه الأجمل منهم ...
لكن جاذبيتهم ونعومتهم المورثوه من امهم الجوهرة اللي لازالت تحتفظ بمميزاتها الأنثوية حتى بعد ماكبرت .. كانت هي السبب الأوحد اللي جذب الأنظار لهم على طول .. وخصوصا أنهم البنات الوحيدات بالمجلس ؟؟؟
كانت حمرة الخجل كاسية خدود عذا .. بينما نظرة الجرأة والثقة واضحة بعيون سارة ....
حتى اللبس اللي اختاروه وتسريحة الشعر كانت تبين المعالم البارزة بشخصياتهم ...
عذا كانت بفستان حرير مشجر باللون الخربزي والليموني والسكري وقصير شوي... بقصة صدر من الأعلى وسيور عريضة على الكتف ... وبصندل ذهبي رايق ملفوف على الساق ومو عالي ...! وكانت ناثرة شعرها البني الفاتح اللي يوصل لنهاية اكتافها وماسكة الطرفين اللي خلف الأذن بفراشة كريستال تلمع في وسط شعرها من الخلف ...ومكياجها هادئ جداً موضح عيونها اللوزية السوداء ... والمملؤة ببراءة الطفولة الصعب وجودها في هالوقت ؟؟؟؟ وابتسامتها مبينه غمازاتها اللي بخدها اليسار ..
أما سارة فـ حتى وقفتها وطولها اللي تعدى طول عذا كان يوضح جرأتها واندفاعيتها ... كانت ببنطلون بني حرير وببلوزة حرير سكرية مشجرة بالموف والوردي والبني وطويلة لحد ركبتها ... وتسريحة شعرها الكيرلي وابتسامتها الحادة ونظراتها القوية اللي ورثتها من أبوها وضح للحضور أنها مو قليلة شر أبد .. وانها وحدة قوية وجريئة ....
أول ما دخلوا الصالة استقبلتهم ام مشاري واختها ام راشد عند المدخل ....
ابتسمت لهم ام عبدالله لكن لما شافت التجهم في وجه ام مشاري خفتت ابتسامتها نوعا ما وحست بالضيق ؟؟؟
ابتسمت أم راشد تغطي على أختها وهلّت فيهم ::/ هلا ومرحبا ام عبدالله زارتنا البركة ..!!
ام عبدالله وهي تتحامل على نفسها بالإبتسام ::/ هلا والله ام راشد .. الله يسلمك يارب ..
تصافحوا بحرارة .. واضطرت ام مشاري كونها صاحبة البيت انها تتقدم وتسلم عليهم وترحب فيهم .. وحاولت قد ماتقدر انها تبعد شبح الماضي من بالها ...
ام راشد بنظرة إعجاب ::/ ماعرفتيني يا ام عبدالله على هالعروسات ؟؟؟
ضحكت ام عبدالله بفخر ::/ ههههههه الله يخليك يارب ... (( أشرت على سارة )) هذي سارة وهذي عذا .. بناتي ... وبقت لمياء ما جت معنا هالمرة ..
ام مشاري برسمية ::/ حرام والله ليتها حضرت وخلتنا نشوفها ؟؟
ام عبدالله ::/ إن شاء الله مرة ثانية .. يوم تزورونا ببيتنا ...
ام مشاري :/ إن شاء الله ..
استأذنت ام عبدالله منهم ودخلت هي والبنات للصالة ....
و التفتت ام راشد على ام مشاري السرحانة .. وعقدت حواجبها وهي تهزها ::/ حصة ..؟ وش صار لك رجعتي للمراهقة ؟؟
ابتسمت ام مشاري ::/ ماعليك مني هواجيس وبتروح..؟
ام راشد بابتسامة ذات مغزى ::/ ماشاء الله عليها الجوهرة جذبت بناتها في نعومتها وجمالها ؟؟؟
بلعت غصتها ام مشاري وهي ترد ::/ إيه ماشاء الله ماعليهم كلام ...!
مسكتها ام راشد مع كتفها ::/ الصغيرة احلى من الكبيرة ؟؟ صح ؟
التفتت عليها ام مشاري مبتسمة لمغزى اختها ::/ لا في هذي ما صدقتي ؟؟ عذا ماشاء الله عليها أحلى من اختها مع انهم كلهم مزايين ؟؟
ام راشد عاقدة حواجبها ::/ إيه انا أقصد اللي لابسة فستان ؟؟
ضحكت ام مشاري ::/ إيـــه .. هذي اكبر من سارة اللي ببنطلون ؟؟
انفرجت أساريرها أم راشد ::/ صدق ..!! الله يبشرك بالخير ...!! والظاهر ان لمياء الكبيرة متزوجة ؟؟
ابتسمت لها ام مشاري وهي تمسكها يمشون للصالة ::/ إيه الله يسلمك .. يعني جاهزة لكم .. بس انتم تحركوا .............................!!!
أما هم فأول ما دخلوا قابلتهم ريم بنت خالة سحر وهي بتطلع فـ استغربت ان البنات موجودين بصالة الحريم ... وخمنت انهم مايعرفون الأماكن ببيت خالتها ..!
ريم وهي تسلم عليهم في البداية ::/ مرحبا يا خالة ..
وقفت ام عبدالله والتفتت لها مستحية انها تجاهلتها ::/ هلا هلا يمه .. معليش ماشفتك حبيبتي ؟؟
ريم بحياء وتصافحها ::/ لا عادي .. كيف حالك وش اخبارك ؟؟
ام عبدالله ::/ بخير ياعيوني انتي كيف حالك ؟؟
ريم ::/ الحمدلله تمام ..
شافت ام عبدالله التعجب في عيون ريم وكأنها ما تعرفهم فابتسمت لها :: أنا عمة ندى وهذولا بناتي عذا وسارة ...
ابتسمت لهم ريم :: وانا ريم بنت خالة سحر ...
وقربت للبنات وسلمت عليهم .. وبعدين سألتهم ::/ امممم ما رحتوا لصالة الإحتفال ؟؟
عذا ::/ لا ما أدري صراحة احنا جينا ووصلتنا الخدامة للصالة هنا ..؟
مسكتها ريم مع يدها والتفتت لسارة ::/ كنت متوقعة .. تعالوا معي ،،، هنا بس الحريم والبنات من الجهة الثانية ..
ابتسمت ريم لأم عبدالله وودعتها وخذت البنات بيدها توديهم للمكان المخصص...
أول ما وصلتهم للباب تركتهم يدخلون بروحهم واستأذنت منهم انها بتروح تتأكد من شكلها..
ابتسمت لها سارة ::/ شكلك حلو حتى لو كنتي حوسة ..؟
ضحكت لها ريم ::/ آآخ كلامك عسل ليتك ولد كنت على الأقل بفرح اكثر اني أعجبته ..؟
شجعتها عذا ::/ صدقيني حتى لو يشوفك بن أفليك بيترك جينيفر ويجيك يركض ؟
ضحكت ريم وهي تمشي ::/ يا سلااااااااااااام على كلامكم الروعة ...!
تركتهم وراها وهي تلزم عليهم يدخلون وبيلقون البنات موجودين باستقبالهم ...
تقدمت سارة ووراها عذا علشان يدخلون للمدخل اللي يوصل للمجلس ...
عذا لسارة ::/ ماشاء الله عليها شكلها روعة ؟؟؟ استحيت انا من شكلي ؟؟
سارة وهي تلتفت لها ::/ الله يعين ان دخلنا الحين ؟؟؟ اكيد أشكالهم مثل ريم ؟؟ وش زودها عنهم ؟؟؟
تنهدت عذا ::/ صدق احس اني متفشلة من شكلي .. تلاقينهم بالألماسات والأشياء الشيك .. واحنا عاديين ..
سارة وترفع من معنوياتها المحطمة ::/ ما عليك يا بنت الحلال يمكن هم ينعجبون بشكلنا مثل ما انعجبنا احنا ...
هزت عذا راسها وهم داخلين للصالة المكتظة بالبنات من مختلف الأشكال والأجناس ؟؟؟ اللي ببنطلون واللي بفستان سواريه والقصات الغريبة والتسريحات المجنونة والمكياجات المتكلفة .. والأصوات والرقص ..
يعني فعلا كان مكان احتفال ..... تقربت عذا من سارة وهي منزعجة من صوت المسجل العالي .... وحطت يدها على أذنها تخفف من كمية الصوت اللي بتفجر طبلتها .. أما سارة فدخلت بحاجب مرفوع وكأنها هي نجمة الحفلة ..................!!
لمحتهم سحر من بعيد وكانت واقفة مع عبير ورحاب وأريج ويسولفون ومندمجين ..
ابتسمت وتوجهت لهم ترحب فيهم وتعاتبهم على التأخير ...
انتبهوا لها وهي مقبلة عليهم بفستانها الأسود الكلاسيكي وشعرها المسدول على ظهرها المكشوف ومكياجها السموكي وعقد الألماس الثمين اللي كان يزين رقبتها ..
ابتسمت لهم ::/ أهليـــــــــــــن .. مابغيتوا توصلون ؟؟
مدت يدها عذا بحب ::/ هلا فيك ... مبروك النجاح ... يالله عاد متى بتبلغونا بنسبكم ؟؟
سحر وهي تصافحهم بنعومة ::/ لما نقص الكيك .. نعلن المفاجئة ؟؟
سارة باندفاعية ::/ أوكي بس احنا من الأهل عادي قولوا لنا والله مانقول لهم ؟؟
ضحكت لها سحر بدلع طبيعي ::/ لالا المفاجئة مفاجئة .. للكل والجميع ..!!
تقدموا لهم البنات الباقين ودخلت عليهم ندى ووراها الخدامات معهم الصواني والعصيرات .. وابتسمت لما عرفت ان عمتها وصلت ... وتذكرت اخوها اللي كان بيموت بس توافق انها تسولف له عنها وعن لبسها .. كان كل شوي يوصيها على شي .. مرة انتبهي لها خليها تآكل من كل الأصناف .. ومرة انتبهي لا أحد يزعجها بسوالفه .. والمرة الأخيرة انتبهي لها لا تكون تحتاج شي وانت مو موجوده عندها ...!!
تنهدت ندى وهي تقرب لهم ووصرخت ::/ أسفرت وانورت واستهلت وامطرت ...
هلا والله ببنات عمتي عذوه وسارونة ...!! هلا وغلا ...
ضحكوا كلهم وقربت ندى لهم وخذتهم بالأحضان وبوستهم بطريقة كوميدية ...
سارة وتستغل الوضع ::/ يالله يوم انك تحبينا قولي لنا كم جبتي ؟؟
ندى وهي تدفها عنها ::/ تستغليني يالوقحة ؟؟ لا مابقول لك شي خلوها مفاجئة ؟؟؟
سارة بتوسل::/ بليز ندوش علشان نشوف من احسن انتم والا سام اخوي ؟؟
ندى بخيبة ::/ أووووه إذا بتقارنينا في أخوك أكيد هو بيغلب ..؟ لأنه ماشاء الله دحيح ماينخاف عليه ..؟
ضحكوا كلهم على تعليقات البنات .. لكن ندى استغلت الفرصة وقربت لعذا وهمست لها :::/ شكلك جنان لو يشوفك بهالفستان والله ماتروحين لبيتكم والا وهو معرس عليك ...
توردت خدود عذا بخجل واضح ... وتبعثرت نظراتها بين البنات تشوفهم لايكونون سمعوا شي .. وبعدين التفت لندى تضربها على كتفها ::/ سخيفة انتي وكلامك ..؟
ندى تضحك ::/ لا والله جد ... لو سمعتيه قبل لايطلع وتجون ؟؟؟ ياااااااااااااي على قلبي هالولد .. الا مادري وش سووا لها الا مادري وش حطوا لها ؟؟؟ ذبحنا فيك ترى .. ياخي تزوجوا وخلصونا ..!
قامت عذا من عندها وهي خلاص تحس ان أذانها تتبخر ويديها تعرق ونفسها يضطرب من جت سيرة زواجها منه ... معقولة تخاف من هالطاري ..!!
وقفت وراها ندى وهي تزيدها ::/ والله حتى البيت بيشتريه خلاص ومن متى وهو مزعجنا علشان تملكون وتبدون تختارون الأثاث سوا ... يعني يقدر يزوركم ويشاورك ؟؟
التفتت عليها عذا بعيون مغرقة بالدموع ::/ ندى الله يخليك اسكتي لا تجيبن هالسيرة ؟؟
انقبض قلبها ندى ::/ عذا وش فيك ؟؟ قلت شي يزعلك ؟؟
عذا وهي تمسح دموعها اللي مالها داعي ::/ لا والله بس هالسيرة تخوفني ؟؟
ندى باستهبال ::/ لهالدرجة اخوي يخوف ؟
عذا بدفاع ::/ لا موقصدي هو ..! قصدي السيرة اللي انطرى فيها ؟؟
ندى تفتعل الصدمة ويدها على صدرها::/ عذا يعني ماتحبينه كزوج ؟؟
عذا باندفاع ::/ لا موقصدي كذا .. انا ـ ـــ ــــ ــ ــ بـ ـ س
ندى بتجرها بالحكي وتطلع منها كلمتين تفرح اخوها بهم ::/ عذا لا ماأصدق ..!! مستحيل بعد حب زياد لك كله .. تجين انتي تقابلينه بالجحود والإنكار ولا تحبين حتى طاريه وتخافين منه ؟؟؟ معقولة ما تحبين زياد ؟؟ مستحيل لو أقوله أكيد بيموت ؟؟ والا تدرين ممكن تنهض عنده روح الإنتقام ويتزوج على طول بأي وحده في طريقه علشان يضمد جرحه من بعدك ......!! والا ممكن يعزف عن الزواج ويبقى طول عمره عازب وتتزوجين انتي وتتركينه وراك حطام انسان .. شاب متحطم وقلبه مكسور وما احد يقدر يجبره له ....(( وطالعتها بعيون حزينة))
بلعت عذا غصتها وهي تتخيل كل هالأشياء اللي ممكن تحصل لزياد حبها الطفولي ::/ ندى انتي وش تخربطين ؟ لاتقوليني كلام ماقلته ؟؟ انا ماقلت اني ما احبه .؟؟
ندى بخبث ::/ لمحتي انك ماتحبينه .. لكن ما اثبتي انك تحبينه ..!!
عذا بدون شعور ::/ لا احبه .. من قالك ما أحبه ؟؟
ندى وهي تقرصها ::/ ترى مانقص منك شي لما قلتيها ..؟ الا بتفرحين قلبه إذا قلت له ؟؟
عذا بتوسل ::/ لا بليز لاتتهورين و تقولين له ندى؟؟؟ ترى بعدين مستحيل احط عيني بعينه ...!!
ندى بحزن::/ معليش عذا كان ودي أخدمك بس ما أقدر هو اللي موصيني أستخلص منك هالكلمة ؟؟؟؟؟
ضحكت ندى على شكل بنت عمتها المتأزم ... ياربي وش كثر هالبنت خجولة وتستحي حتى من ظلها ....!!!
اندمجت سارة مع كل الحضور ترقص مع هالمجموعة شوي ،، والمجموعة الثانية توقف معهم وتآخذ اخبارهم وتسولف لهم شوي علشان تروح عن نفسها ... يعني تقريبا كل اللي بالصالة صاروا يعرفونها ...!! ويبتسمون لها كل ماشافوها مارة من جهتهم ...
وقفت عذا مع رحاب وغادة بنت عمها .. بينما سحر وندى مختفين تماما من القاعة ... كانت تسولف معهم لكن بالها مشغول .. لها ساعة واقفة وما لمحت عينها سارة ؟؟؟ معقولة تكون طالعة مع البنات وماقالت لي ؟؟؟
استأذنت عذا من اللي معها و مشت تشوف وين اختفت سارة ... كانت مرتبكة شوي وما تحب تطالع احد بعينها فـ كانت تجول بنظرها على القاعة كلها ... لكن لمحت بنت بفستان نيلي ومسوية حركات بديعة بشعرها ومكياج آخر صرعة وكلها تلمع من رأسها لجزماتها ... الساعة كانت آخر موديل وطقم الألماس اللي لابسته مغطي صدرها كله ... لكن شكلها مريب بصراحة .. يعني بالفصيح ما ارتاحت لها مطلقاً ..
بلعت ريقها وكملت طريقها .. لكنها تختلس النظرات لها كل شوي لأنها خافت منها ومن تركيزها عليها ..!!
شافت سارة أختها جالسة مع أريج قريب من عند الباب .. وكانوا منضمين لمجموعة ثانية وسوالفهم شايلة المكان ... تقدمت منهم عذا مبتسمة بس في نفس الوقت مستحية ..!!
انتبهت لها سارة اختها وانتبهت لإحمرار وجهها لكن ماكانت تدري هل هي من العصبية والا من الحياء ... ابتسمت لها من بعيد وأشرت لها علشان تجرأها شوي ...
تقدمت منهم عذا وسلمت على الجالسين .. ومباشرة تقربت من سارة وقرصتها توبخها على اختفائها من قدام عيونها ... سحبتها سارة وجلست هي واياها مع البنات ...
وبعد دقائق معدودة ... اتسكرت كل الأنوار بعد مانبهت الريم على الجميع علشان مايخافون .. وفجأة انفتح باب جانبي كان مغطى بالستار .. ودخلت معه ندى وسحر .. وكان بينهم خدامتين يدفعون طاولة ذهبية كبيرة جدا بعجلات مزخرفة.. وعليها كيكة النجاح اللي مغطاة بالشوكولاتة ....
أصوات التصفيق والتصفير كانت تعج في المكان .. والتصوير كان قائم .. وبنظرة خيبة التفتت سارة على عذا اللي قابلتها بنفس النظرة وكأنهم يتذكرون كيكتهم اللي احتفلوا بأسامة عليها ...
وقف الجميع بوسط الصالة ... واتحلقوا على الكيكة .. الكل كان متحمس يعرف نسب البنات ...
سارة كانت تزاحم علشان تصير هي الاولى وتحضر قص الكيك .. و أول مااستقرت في مكانها شهقت من الصدمة لما شافت البنات كاتبين نسبهم على الكيكة ...
ندى 91% وسحر 93% ... اطلقت زغروطة لج لها المكان .. وراحت تركض لندى تحضنها وتبارك لها .. وكذلك سوت مع سحر ... البنات كانوا مبسوطين عليها وعلى إنفعالاتها العشوائية ...
بارك الجميع لندى وسحر وهنئوهم على النجاح المميز والتفوق ... لكن سارة كان لسانها يحكها والا بتقول ..
سارة بفخر ::/ مبروك لكم .. مع ان نسبكم حلوة لكن (( وتلتفت على ندى)) سام اخوي طلع اكشخ منكم ....
ندى بحماس ::/ وكم نسبته ؟؟؟
سارة بتقهرها :::/ خليها مفاجئة .. يوم الحفلة نعلنها ؟؟
ندى ::/ ومتى الحفلة ؟؟
سارة ::/ ومن قال لك بنسوي حفلة ؟؟؟
ندى باستغراب ::/ انتي توك تقولين ؟؟؟
سارة ::/ لا والله مو مسوين حفلة ولا شي ؟؟؟
ندى صارة على أسنانها ::/ اجل قولي الحين ؟؟؟
سارة بابتسامة ::/ 96% ..................!! وش رايك ؟؟
شهقت ندى باستغراب ::/ يمه منه أخوك ...!! شكله يبلع الكتب ..؟
ضربتها سارة على كتفها وتهاوشت معها شوي علشان تقول ماشاء الله لكن ندى والعناد ...!! ركبت راسها ورفضت تقول ماشاء الله الى آخر لحظة يوم حست ان سارة ممكن تفلعها بالكأس اللي بيدها ضحكت وقالتها وبردت قلبها ....
قصوا البنات الكيك ... ووزعوا على الحضور نصيبهم من الفرحة ... تطوعوا نجمات الحفل الثلاثة .. سحر وندى وريم بتوزيع الكيك .. احتراما منهم لضيوفهم اللي شرفوهم بالحضور ... وبعد ما انتهوا تقريبا اجتمعوا البنات مع بعض مرة ثانية يسولفون وينكتون... ندى ماكانت حاضرة معهم يعني قصت معهم الكيك ووزعته وطلعت ...
ومع الزحمة ما افتقد الجميع حضورها .. لكن لما رجعت لهم نبهتهم انها كانت مو موجودة معهم من دقائق ...!! واللي شد انتباههم اكثر انها داخله وبيدها كيسين هدايا صغار .. واحد باللون القرمزي والثاني باللون التفاحي الفاتح وممزوج بالأحمر القاني ..!! كل الشلة عقدت حواجبها وتآكلوا من الفضول اللي ينهشهم ويبون يعرفون وش اللي مع ندى ؟؟؟
وقفت معهم وهي متجاهلة نظراتهم وتبي تحرقهم زود ... وعلى وجهها ابتسامة خبث تقهرهم ...
سحر بفضول ::/ وش هالأكياس الحلوة ؟؟؟ وش داخلها ؟؟
ندى وتحك طرف خشمها ::/ اممممم ... هدايا ...!!
سارة باستهتار::/ ارحميني يا ديانا سبنسر ..!! ومن الي مرسل لك اياهم ؟؟؟ لا تقولين لي معجبين ؟؟؟ لأني مليت من هالسيرة ..!
ضحكت ندى والبنات ::/ لا ما راح اقول من معجبيني لأنهم أصلاً مو لي ؟؟؟ (( وطالعت أريج بنظرة))
سارة بلقافة ::/ أجل لمين ؟؟؟
تنرفزت عذا من لقافة اختها اللي احرجت ندى ::/ خلاص سارة ....!! وش فيك صرتي لحوحة ؟؟؟
سارة باصرار ::/ طيب مادامت ما تبغانا نعرف لمين ؟؟ ليش تجيبهم قدامنا ؟؟ كان وزتهم بمكان ثاني ؟
ابتسمت ندى لبنت خالتها ::/ ومن قال لك اني ما بقول ؟؟؟ لا حبيبتي لا تتنرفزين بعلمكم لمين هالأكياس ....
التفتت على أريج اللي كانت تطالعهم ومبتسمة ... وابتسمت لها وهي تقول ::/ أوكي بنات الظاهر انا كلكم عطيتكم الهدايا حقتكم ... صح ؟؟
.......................::/ صح ؟؟؟
سارة باعتراض ::/ لا أنا ماعطيتني شي ؟؟؟
وأريج معها بنفس الصوت ومتخصرة ::/ ولا انا ؟؟
التفتت ندى على سارة ::/ أنتي مالك عندي شي غير الكيكة اللي جبتها لكم هذاك اليوم .... واذا تخرجتي من الثانوي ساعتها تعالي حاسبيني ؟؟( والتفتت على أريج )) أما انتي فهديتك عندي ...
مدت لها الكيس القرمزي وهي مبتسمة ... وخذت اريج الكيس بلهفة وودها تشوف وش هالهدية اللي ميزتها بها ندى ولا عطتها اياها مع البنات ...
سارة ::/ يالله افتحيها نشوف وش فيها ...؟؟
طالعتها عذا بنظرات تسكتها .. لكنها سفهتها وركزت نظرها على يدين اريج اللي طالعتها بنفس نظرة الحماس ... فتحت الكيس وطلعت منه صندوق خشبي صغير ملفوف بشريطة قرمزية .. تنفست بعمق وفتحت الشريطة .. وبعدين غطاء الصندوق ..
و شهقت لما شافت جوال داخل العلبة ... !!!
رفعت راسها لندى وكأنها تستفهم ... طالعتها ندى وابتسمت ::/ قلت بكرة بتدخلين الجامعة وأكيد راح تحتاجينه ؟؟؟
اغرورقت عيون أريج بالدموع ... وحست انها بحلم سعيد جدا ... عمرها ماحطت ببالها يكون عندها جوال .. على بالها ان تليفون البيت يكفي وجوال عبير يؤدي الغرض إذا كانوا برا البيت ...
قطعت عليها ندى تفكيرها ::/ افتحيه ؟؟؟
طالعتها أريج ::/ كيف افتحه ؟؟ ما فيه بطاقة ؟
ابتسمت ندى وهي تتقدم ::/ لا حبيبتي فيه بطاقة (( ومدت يدها للصندوق )) وهذي الورقة فيها رقمك السري والتعليمات الضرورية ؟؟
ما قدرت أريج تقاوم دمعتها أكثر من الفرحة تقدمت لندى وحضنتها بقوة ... وندى بدورها لفت ذراعينها على كتوف صديقتها واللي تحس ناحيتها بمشاعرالأخوة ... او أكثر حتى ؟؟؟ وصاحوا ..!
نزلت دموع عذا وهي تشوف المشهد الدرامي اللي يتمثل قدامها .. وحست انهم فعلا صديقات ...! انتبهت عليها سحر وضحكت بوجهها على تأثرها السريع ..
سحر ::/ خلاص عاد .. بلا تراجيديا سخيفة ..؟؟ مو وقت صياح وخرابيط ؟
مسحت ندى دموعها من عيونها وهي تبعد عن أريج شوي ::/ وش أسوي من زمان ماصحت ؟؟
ابتسمت أريج من بين دموعها ::/ مشكورة ندوش ...!! الف الف شكر ..
ندى وهي تنشج ::/ لا ماعليك ... وبعدين ما احبك تكونين رسمية ؟؟
مسح الجميع دموعهم وعلامات التأثر اللي بانت على ملامحهم ...
سارة بصوت متأثر ::/ طيب والكيس الثاني ؟؟؟
ضحك الكل على سارة ولقافتها اللي مانستها بعد هالموقف ...
ندى وهي تضحك ::/ هههههههههههههههههه سويرة مدري متى بتكبرين ؟؟ وبعدين هالكيس مايخصني (( ورفعت الكيس )) يخص سحر ؟؟؟ عاد هي حرة تقولكم وش داخله والا تسكت ؟؟
سحر مستغربة ::/ لي أنا ؟؟؟ من مين ؟؟
ندى مبتسمة ::/ مفاجئة ..!! يوم تفتحينه بالليل وتسهرين على الكرت .. بتعرفين من مين ؟؟
سارة باستهزاء ::/ لا يكون من دون جوان حقك ؟؟
عذا ::/ وانتي ماعندك غير الإستهزاء والتطنز ؟؟؟
خذت سحر الكيس من يد ندى والفضول بيآكلها ؟ من باقي ما عطاها هدية .. تقريبا كل اللي تعرفهم وممكن يهدونها اهدوها من قبل ؟؟؟ إما اول ما وصلوا او قبل الحفلة ؟؟
قلبت الكيس بيدها وهي تحاول تحزر من اللي ممكن يكون هذا ذوقه ؟؟؟
غادة بحماس ::/ يالله افتحيه ؟؟؟ شكله كيوت بقوة ؟؟
سحر وهي تبتسم ::/ رايك افتحه الحين ؟؟ اممممممممم والا اخلي بصلتكم تحترق ؟؟
سارة بتوسل::/ لا تكفين افتحيه الحين ؟؟
سحر وهي تلف على عذا ::/ وش رايك عذا ؟؟
ابتسمت عذا بخجل ::/ على راحتك ؟؟ مع اني ما اتوقع انك بتأجلين فتحها ؟؟ لأنك لو تحركتي شبر من هنا قبل لاتفتحينها بينقضون عليك هالمتشردات ؟؟
ضحكوا البنات .. وقالت سحر ::/ اوكي بفتحها علشان خاطر عذا ورحاب اللي ماتلقفوا ؟؟
ندى بارتباك ::/ انا أقول اتركيها لبعدين ؟؟ مو وقتها الحين ؟؟
سحر وهي تفتحها ::/ لا بفتحها الحين خلينا نتفرج عليها سوى احسن ..!!
التفتت ندى على عذا وبلعت ريقها وهي تبتسم ::/ براحتك ؟؟
فتحت سحر العلبة بسرعة ولهفتها تسبقها .. طلعت علبة متوسطة لونها احمر ... رفعت عيونها للبنات وهي تفتح العلبة بشوي شوي ...
طلع لها عقد ألماس أسود و أبيض راقي جداً ...
رحاب بانبهار ::/ وااااااااااااااااااااااااااااااااااااااااااااااااا ااااااااااااااااو .. مثير بصراحة ؟؟
فغرت سحر فاها ::/ روعة مو مثير وبس ..!! بس من مين ..؟؟
عذا مبتسمة ::/ أكيد أحد ذوقه راقي ؟؟ من تعرفين ممكن يكون ذوقه بهالطريقة ..
نقزت ندى في الكلام ::/ انا أقول ماعليك من اللي اهداها المهم انها حلوة ...! صح (( والتفتت للبنات علشان احد ينقذها ))
سحر وهي تحوس بالكيس ::/ مهما تكون حلوة بس بعد بشوف من مين ؟؟
طلعت كرت تفاحي صغير وشكله رسمي جدا .. فتحته وقرت المكتوب بصوت عالي للبنات ..
(( ألف ألف مبروك التخرج ،،، و عقبال ما نشوفك دكتورة،، تقبلي تحياتي وتهاني
زيــــــــــــــــــــــاد ..!! ))
انفرجت أسارير سحر لما قرت الأسم .. وأخيرا أرسل لها شي وعبرها ... كانت هذي أمنيتها والحمد لله تحققت ... قرت الكلام المكتوب عشرين مرة ...
وبعدين قالت بعفوية وهي تحضن الطقم والكرت::/ والله كنت قايلة محد عنده هالذوق الرومانسي الا هو ؟؟
غمضت ندى عيونها ماتبي تشوف شي .. أصلا هو محرصها تعطيها الهدية قبل الحفلة بس هي الغبية نست وماذكرت الا لما جت بتعطي أريج هديتها ،، اما سارة التفتت على أختها اللي تغيرت الوان وجهها وصارت شاحبة كأنها الوان الميت ...!!
أريج وهي تنغز سحر مع جنبها ::/ أيوه من قدك ياعم ؟؟ والله ووصلتك هدية منه ؟
احمر لون سحر من الخجل ::/ ههههههههه مشكورة .. هذي بركات دعواتك ؟؟
غادة وهي تحاكي ندى ::/ ندوش وش عنده اخوك ؟؟؟ لا يكون غار من حركات طلال ؟؟
ابتسمت ندى ببهاتة ::/ ههههه مادري عنه وش طرى عليه ؟؟
سحر بحماس ::/ ماشفتوا هدية طلال لها ؟؟ تجنن صراحة .. وندى تستاهل بعد ..
جتهم ريم وهي تركض ..::/ يالله بنات العشاء جاهز (( والتفتت على ندى )) يالله ندى قولي لهم يتفضلون ووصليهم للساحة ؟؟؟
امتثلت ندى للأمر وراحت تنفذه بسرعة هروبا من الموقف .. اما سحر فاستأذنت من البنات علشان تطلع بهديتها .. وتوجه الجميع لصالة العشاء ...........!!
في نفس اليوم والوقت كانوا اهل زوجها مسوين عزيمة كبيرة بمناسبة رجعت ولدهم من السفر ،،، كان في رحلة علاج بسبب حادث سيارة ...كل اهلهم وقرايبهم حاضرين هالعزيمة .. والمجالس مليانة حريم كبار وبنات ومن كل نوع ...!!
لمياء بحكم انها مرت ولدهم الكبير وبما أن خالتها ام زوجها ماعندها بنات ؟؟ ولاعندها حريم عيال الا لمياء وسمية اللي جاية من السفر مع زوجها .. اضطرت لمياء انها تقوم تقريبا بكل العزيمة .. جهزت لها كل شي .. واستعدت لها من فترة أسبوع ...
واليوم كانت مشمرة عن ساعديها في البيت وتسوي كل المهام المتطلبة في عزيمة مثل كذا ... كانوا بنات خالة فهد وبنات عمومته يساعدونها وماتركوها .. لكن القسط الأكبر من الشغل والترتيب كان على عاتقها هي ...!!
في نفس الوقت كانت تحس بالفرحة والإنشراح لسبب بسيط وهو رجعة سلفتها بالسلامة .. واللي بتسكن مع ام فهد بنفس البيت يعني اذا جت تزورهم بتلقى أحد على الأقل يرادها الصوت غير خالتها ....!!
دخلت عليها سمية المطبخ شايلة ولدها الصغير بيدها ::/ يا حياتي يا لمياء تعبناك اليوم ؟؟؟
التفتت عليها لمياء وبيدها الفناجيل ::/ وش دعوى سمية .. اهم شي انكم رجعتوا بالسلامة والباقي يهون ...!!
قربت سمية لها تساعدها ::/ إلا وين مهند ما أشوفه ؟؟
لمياء ::/ تلاقينه يلعب برا و الا عند ابوه ؟؟؟
مسكت سمية يد لمياء ::/ طيب خلي من يدك وقولي للخدامة تسوي عنك .. وتعالي نتقهوى معهم شاهي ونسولف ... اشتقت لجلساتك بصراحة ...!!
ابتسمت لها لمياء ::/ يالله مشينا ..!
طلعوا الثنتين من المطبخ الخارجي ومشوا للبيت .. كانت سمية تلعب مع ولدها اللي كان بين يديها . وهو ميت من الضحك على حركات امه ..
ابتسمت لهم لمياء وسألتها ::/ كم عمره الحين ؟؟
سمية ::/ سنة ونص ..!!
سادت لحظة صمت شوي قبل لاتسأل سمية بخجل ::/ وانتي ما كتب لك الله شي ؟؟
التفتت لها لمياء بحزن ::/ لا والله الى الآن وانا أعالج ...!!
سمية ::/ إن شاء الله ربي بيكرمك ..!!
لمياء ::/ الله كريم ...!!
دخلوا للمجلس وشافوا مهند قاعد جنب جدته ويشرب معها شاهي ويآكل من المكسرات .. نادتها خالتها ::/ لمياء ...!! تعالي خذي عنه الصحن لا يغص ؟؟؟
قربت لمياء لولدها ::/ إن شاء الله ..
مسكت مهند مع يده لكن ما رضى يتحرك وبدء يصيح ويبي يقعد يآكل ... رحمته لمياء وماهان عليها تكسر خاطره .. جلست عنده ومسكت الصحن وبدت تكسر له الفستق والفصفص ... وسمية تناظرها مبتسمة وكأنها راحمتها دعت لها من قلبها ان الله ييسر امرها ويرزقها الذرية الصالحة لأنها تستاهل كل خير ...
صحت من تفكيرها لما شافت لمياء تضرب في ظهر مهند .. والولد وجهه ازرق ومو قادر يآخذ نفس ... نقزت من مكانها وحاولت تطلع القشرة اللي نشبت بحلقه .. والحمدلله جت سليمة وطلعت قشرة الفستق اللي كلها مهند على باله انها حبة فستق مقشرة ..
تنهدت لمياء وهي تحضن ولدها بخوف .. اول مرة حست أنها ممكن تفقده ويضيع من يدها ...!
تنهدت ام فهد وانفعلت على لمياء قدام المجلس كله ::/ قايلت لك انا من البداية ابعدي عنه الصحن لكن انتي سفهتيني وكأني ما احكي ...؟ الحين هذا حيلة ولدي بعد تبينه يروح ؟؟؟ ويقعد ولدي بلا ضنى ؟؟؟
ارتخت قبضة لمياء على ولدها من الصدمة .. ومن كلام خالتها الجارح واللي جرحها قدام الحضور كلهم ... وكأنها تقول ما منك فايدة ؟؟؟ وماراح تقدرين في يوم تحققين حلم فهد ؟؟؟
قامت ام فهد من مكانها وراحت لمهند تحضنه ... لكن سمية ماسكتت لما شافت وجه لمياء المنصدم ::/ وش دعوى يا خالة ولدها وولده .. يخافون عليه أكثر من أرواحهم ؟؟
ام فهد باعتراض ودمعتها متجمدة على طرف عينها ::/ بس فهد غير لو يروح مهند يمكن هو يلحقه ...؟؟
بلعت لمياء تجريح خالتها وانربط لسانها عن الرد والكلام .. تفاجأت وماتوقعت ان خالتها ممكن تقول لها هالكلام بوجهها ؟؟ يعني وشلون هي ماعندها إحساس الأمومة اللي يسمح لها تخاف على ولدها ؟؟؟
طلعت وما خذت مهند معها لأنها مو حاسة أصلا بنفسها .. كل اللي نفسها فيه الحين انها ترمي روحها على السرير وتصيح وتطلع كل اللي بقلبها ؟؟ ليه العالم ماتحس بشعوري ؟؟ ليه كلهم يرمون علي كلام قبل لايحسبون حسابه ؟؟ يعني أنا مو بنت وأم تتمنى يكون عندها عيال ؟؟ يعني معقولة ما احب فهد ولا أحب يكون بيننا عيال وبنات يحملون اسمنا ؟؟؟ والا هالناس كل همهم الكلام وبس وما يهتمون اذا كان يجرحني في الصميم والا لا ؟؟؟
راحت للصالة وطلعت جوالها من الشنطة وهي خلاص وصلت لمرحلة ما عاد تقدر تمسك دموعها وتمنعها تنزل؟؟؟
----------------------