في صبح يوم السبت .. قام وهو متوتر ومتخوف من اللي بيسويه ... لكن وش بيده علشان يقدر يسويه وهو تخاذل عنه ... تنهد وهو ينزل الدرج متوجه للغرفة علشان يفطر قبل لايطلع ...
قابلته بوجهها البشوش اللي من يتصبح عليه الواحد يتفاءل وبيدها سلة الخبز ،،، ابتسم لها بحنان وهو يجلس قرب الصينية ....
ام عبدالله وهي تجلس جنبه::/كلمتهم قبل لاتروح ؟؟؟
ابو عبدالله بتردد :/ لا ما اتصلت ؟؟؟ بروح لهم بدون موعد ؟؟؟
ام عبدالله وهي تلعب باصابعها ::/ مادري بس أخاف أنها مو حلوة تروح لهم كذا من دون موعد ؟؟؟؟
ابو عبدالله وهو قايم من دون فطور::/ يعني وش بيسوي بيطردني ؟؟؟ مستحيل أخلاقه وعلاقتنا ما تسمح له بهالشي ..!!
وقفت له ام عبدالله وواجهته ::/ الله يوفقك يارب ... وييسر لك أمرك ...
ابتسم لها ابو عبدالله ::/ يعني انتي ماتحسين انك متضايقة لأني بتسلف منه ؟؟
ام عبدالله باعتراض ::/ أبداً ...! وبعدين ابو مشاري بحسبة أخوي الله يرحمه ومكانته مثل سلطان ...!
بلع ريقه وابتسم لها ولف عنها طالع وهو منشرح البال من تواجدها ووقفتها معه ...
دخل في هالوقت مع بوابة الشركة بكل هيبة ووقار ومعه شنطته بيده ... نزل النظارة الشمسية كوتشي من على عيونه ومشى متوجه للمصعد الخاص ....
وقف له موظف الإستقبال بكل احترام .. ::/ الحمدلله على السلامة طال عمرك ..
ابتسم له مشاري بخفيف وبصوت رجولي أجش ::/ الله يسلمك ..!!
مشى تاركه وركب المصعد وضغط على الدور اللي فيه مكتب المدير العام للشركات .. واللي هو مكتبه ...
وصل المصعد للدور المطلوب وطلع منه متوجه للمكتب وتركيزه مشتت .. والهم باين بعيونه ... لكن من يتجرأ ويسأله ؟؟؟
دخل لقسمه الملكي واللي كان كله معتق باللون البيج والليموني .. والأثاث كله بني عودي ...!!
وقف السكرتير اللي كان يكلم بالتليفون ويسولف بكل خوف .. و بلع ريقه لما وقف مشاري وطالعه بنظرات بشعة ...
السكرتير ومنزل راسه ::/ الحمدلله على السلامة طال عمرك ...
مشاري وهو لازال واقف وعينه مانزلها من عليه ::/ الله يسلمك ....!! فيصل ترى احنا بشركة وشغل ... وانت مركزك اهم مركز يعني سكرتير المدير العام ... والمفروض تكون قد المسؤولية ..!!
فيصل وهو يحس بالذنب ::/ ابشر ...
سكت مشاري وماحب يطول السالفة ... بس قبل لايتحرك وهو واقف على الباب سمع احد يتنحنح وراه ... التفت مستغرب لكن لما شاف رائد مدير المالية وصديقه الأقرب لنفسه ابتسم بارتياح وتقدم يسلم عليه ...
رائد مبتسم::/ الحمدلله على السلامة ؟؟؟
مشاري وهي يصافحه ::/ الله يسلمك من الشر ؟؟ وينك الظاهر هالويكند ماكنت موجود ؟؟
رائد ::/ لا والله طالعين للمزرعة ومارجعنا الا أمس بالليل ؟؟؟
مشاري وهو متوجه لمكتبه ::/ زين الحمدلله على السلامة انت بعد (( والتفت على السكرتير )) فيصل دخل لي الأوراق المهمة واللي تعطل شغلها من سافرت ... بسرعة ....................!!
فيصل::/ ان شاء الله طال عمرك دقائق وتكون عندك ....
مشى رائد مع مشاري بيدخل معه للمكتب ومعه بيده الملفات اللي تحتاج توقيع المدير النائب عن رئيس مجلس الإدارة ...
رائد وهو يسكر الباب وراه ::/ هاه وش صار عليك هناك ؟؟
مشاري وهو يتنهد وينزل الشنطة على الأرض ::/ الله يكون بالعون ...!!والله مادري وش أسوي ؟؟؟
رائد وهو يجلس على الكنب ::/ يعني إلى متى بتستمر على هالحال ؟؟؟
مشاري وهو يجلس قدامه ::/ مايكل بيجي للسعودية خلال الشهرين الجايات .. ويقول لي خلاص لاعاد تجي لبريطانيا ،، وان شاء الله أقدراحل اموري إذا وصل ..
رائد ويقاطعه ::/ وبتقول لأهلك ؟؟؟
مشاري بعصبية ::/ لا ...!! مو وقته الحين أقول لهم ؟؟؟؟ انا مو ناقص مشاكل ؟؟؟ وامي إذا درت بتقلب الدنيا فوق تحت ... انا عارف لحركاتها ؟؟؟؟
رائد ::/ والله مادري عنك بس لاتنسى أني نصحتك انك تقول لهم قبل لايطيح الفاس بالراس ...
دخل عليهم السكرتير وقطع عليهم كلامهم والتفتوا عليه كلهم ،،، ابتسم السكرتير بارتباك وكان بيديه مجموعة ملفات ملونة .. تقدم وحطها قدام مشاري ..
فيصل ::/ أستاذ مشاري فيه واحد موجود بمكتب الوالد ويبي يقابله .. لكن مثل ما انت عارف الوالد ماراح يداوم اليوم بالشركة ؟؟؟ وطلب يقابلك أنت؟؟
مشاري وهو يلبس نظارة القراءة ::/ ومن يكون ؟؟
فيصل ::/ ما سألته بصراحة لكن اتصل فيني من دقائق حمد وقال لي انه موجود بالمكتب ؟؟
مشاري وهو يهز رأسه ::/ طيب اسأل لي عن أسمه وإذا كان له موعد مع الوالد ودخله علي ..
فيصل ::/ إن شاء الله ..!!
مشى عنهم متوجه للباب .. وانتظر رائد لما طلع فيصل والتفت على طول لمشاري ::/ عسى ما شر الوالد اليوم ماداوم ؟؟
مشاري وهو ضايع بين الأوراق ::/ الشر مايجيك .. عنده موعد مستشفى وبيداوم مسائي اليوم بس ؟؟؟
وقف رائد وكأنه بيمشي ::/ زين شكلك مشغول .. أنا بروح الحين واذا خلصت اوراقي أرسلها لي ضروري ...
طالعه مشاري ::/ وش عندك مستعجل ؟؟؟
رائد وهو بيطلع ::/سلامتك بس قابل ضيفك .. وحنا بيكون لنا جلسة بعد الدوام ....
رن التليفون تحويلة من السكرتارية رفع مشاري السماعة وهو يقول ::/ خلاص اجل نتقابل على الغداء ...
وصله صوت فيصل ::/ أستاذ حمد أبو عبدالله موجود عندي الحين ... أدخله ؟؟؟
مشاري بنبرة امر ::/ أكيد وش تنتظر ؟؟؟
نزل مشاري نظارته ووقف طالع من مكتبه ومتوجه لغرفة الإجتماعات علشان يقابل ابوعبدالله ... وبالفعل انفتح الباب ودخل منه ابوعبدالله بوجه سمح ومبتسم ..
بادله مشاري الإبتسامة بأحسن منها ورحب فيه ::/ هلا والله بـ أبو عبدالله .. زارتنا البركة ...!!
ابو عبدالله وهو يصافحه بتوتر ::/ الله يسلمك ... كيف حالك وحال الوالد ؟؟
مشاري برحابة صدر وانشراح ::/ بخير الله يسلمك بصحة وعافية ... تفضل الله يحييك ...!!
ابو عبدالله وهو يجلس ::/ الله يزيد فضلك ... سلامة الوالد يقولون ماداوم ؟؟
مشاري وهو يجلس قدامه ::/ مراجعة هالمستشفيات .. وتعرف انت الصحة على قدها ..
ابو عبدالله نزل راسه بتوتر ::/ الله يخليه لكم ان شاء الله ..
مشاري :::/الله يسلمك
سكت ابو عبدالله وهو متوتر .. مايدري يكلم مشاري بالموضوع والا ينتظر لما يرجع ابوه ؟؟؟ رفع عيونه لمشاري وشافه مبتسم له .. بادله الإبتسام وبلع رقه واتكل على الله انه يكلمه ..
لكن سبقه مشاري ::/ وش تشرب ابو عبدالله ؟؟
ابو عبدالله ::/ شاهي لاهنت ؟؟
مشاري وهو يرفع السماعة ::/ ابشر ... الا وش اخبارهم العيال والعمة ؟؟
ابو عبدالله وتوتره يزيد كل دقيقة ::/ بخير الحمدلله وابشرك عبدالله جاينا زيارة هالشهرين ...!!
مشاري بفرحة حقيقية ::/ زيــــن الله يبشرك بالخير .. والحمدلله على سلامته ...
ابو عبدالله ::/ الله يسلمك ...!!
سكتوا اثنينهم برهة من الزمن .. ابو عبدالله مايعرف وشلون يبدء الموضوع .. ومشاري مايدري وش يتكلم فيه وواضح على أبو عبدالله ان في قلبه حاجة دعته يزورهم اليوم ...
بعد مدة قدر ابو عبدالله يغلب توتره وبدء الموضوع من الوسط وبدون مقدمات شبك أصابعه وطالع مشاري وهو يقول ::/ والله وانا عمك انا اليوم جايك قاصدك بخدمة .. وان شاء الله القى حاجتي عندكم ....!!
مشاري اخذته الشهامة ::/ ابشر يا أبو عبدالله باللي يرضيك ...!! وان كان لي قدرة وطاقة على طلبك فـ تأكد انك ماراح تطلع الا وانت خاطرك طيب ...
ابو عبدالله وحس بالراحة من رد مشاري ::/ الله يسلمك .. مادري وشلون أبدء لكن بصراحة أنا ودي أبدأ مشروع صغير وعلى قدي .. لكن ان شاء الله يفيدني اذا احالوني بكرة للتقاعد .. ومثلك عارف بهالدنيا ومصاريفها والعيال وحاجاتهم .. لكن بصراحة قصرت علي الفلوس .. وانا جايك اطلب منك تديني إلى ان ابتدي مشروعي ان شاء الله واسددها لكم بالتقسيط ؟؟
مشاري وبنبرة تفكير ::/ وكم المبلغ المطلوب طال عمرك ؟؟؟
ابو عبدالله ورجع له التوتر ويده بدت تعرق وبصوت واطي قال ::/ مليونين ؟؟
انصدم مشاري من المبلغ ::/ مليونين ؟؟؟
ابو عبدالله بعزة نفس ::/ انا قلت لك وانا عمك ان قدرت عليه والا مسموح ...؟
مشاري اللي انحرج من تصرفه ::/ لا ياعمي طلبك موجود ... بس قبل لازم تعرف شروطنا .. يعني صدق انت عزيز وغالي .. لكن انا بسلفك من حساب الشركة يعني لازم نكتب وصل ... وهالوصل يندرج تحته بنود ....!! فـ انا الحين ماادري هل انت ممكن ترضى بالشروط والا بيكون عندك اعتراض ؟؟
ابو عبدالله ::/ طيب وش هالبنود اللي تطلبونها ؟؟؟
مشاري وبسعة بال أكبر ::/ الله يسلمك بما انك قريبنا وبحسبة الوالد ... بنتنازل عن بند انه يكون لك كفيل ... لكن انك ترهن شي للشركة هذا ما أقدر اتنازل عنه ...؟
ابو عبدالله بصدمة ::/ وانا وش عندي ارهنه .. يا مشاري اللي تقوله صعب اجل كان رحت للبنك ورهنت بيتي عندهم و يسلفوني وانتهينا ...؟
ابتسم مشاري ::/ ايه يا ابو عبدالله بس البنك ماراح يسلفك مليونين .. وبيطلب كفيل .. وبيقتطع من راتبك .. بالإضافة أنك ممكن ترهن ...!! وزد الفوائد اللي بياخذونها عليك ...!!لكن حنا بس كـ شكليات بنكتب ان بيتك مرهون واذا ماسددت بنطردك منه ونآخذه .. وانت دبر عمرك ...
سكت ابو عبدالله متفاجئ ولا رد .. حس انه في موقف صعب ...
ابتسم له مشاري ::/ ابو عبدالله انت في حاجة هالفلوس بالحيل ؟؟؟
ابو عبدالله والهم بعيونه ::/ تبي الصدق .. إيــه ...!! بس حكاية البيت خلتني أتردد .. يعني يكفي اني بعت المزرعة .. وشلون أرهن البيت وعيالي فيه ؟؟
مشاري ::/ ماهقيتك بتتخيلنا في يوم نطرد العمة وعيالها من بيتهم ؟؟؟
ابو عبدالله بحدة ::/ لكن هذا حقكم وانا بكون موافق عليه ؟؟
مشاري ::/ يعني ماراح تسدد لنا بانتظام ؟؟
ابو عبدالله ::/ اخاف تحدني الظروف ؟؟
مشاري ::/ لكنك ما بتظلمنا ؟؟؟ ولا راح تآكل حقنا ؟؟؟
ابو عبدالله بعصبية ::/ مستحيل ..........!!! حد الله بيني وبين الحرام ..؟
مشاري باتفاق رجال ::/ خلاص اجل اتفقنا انت بتوقع على العقد شكليات بس .. والا في الحقيقة ماراح ان شاء الله نضطر اننا نطردكم من البيت ؟؟؟ وحتى لو حدتك الظروف حنا بنصبر .. وفي الأخير حنا أهل وثقتنا فيك كبيرة ؟؟؟
ارتاح ابو عبدالله من كلام مشاري اللي يطمن وناظره بنظرة رضى وكأنه خايف أو بيقول شي .....................!!
------------------------------------------------------------------------------
وقفت معتدلة قدام الطاولة اللي بالمطبخ تنهدت وهي تطالع الصينية بكل فخر ...
وأخيراً انتهيت من هالبهذلة ... كان بالنسبة لها عمل شاق ...!! كونها تصلح صينية معكرونة فـ هذا بحد ذاته إنجاز وتقدم في مسيرة حياتها ...
رفعت خصلة من شعرها الأسود ولمتها مع باقي شعرها المعقوف على رأسها ... وراحت للثلاجة علشان تسوي اللمسات الأخيرة للصينية ....
لالالالالالالالالالا .. لايكون مافيه قشطة ترى انتحر ...!!
قلبت عيونها بين الأدراج لكن الحقيقة المرة انه فعلا مافيه قشطة .... تأففت بقهر وضربت باب الثلاجة بكل قوتها علشان يتسكر ....
طلعت لهم بالصالة ووجهها احمر من العصبية ..! يعني وشلون مافيه قشطة ؟؟؟
وقفت عند باب الصالة وتسندت عليه .. وتأففت مرة ثانية لكن بصوت أقوى هالمرة ...
ام راكان ::/ وش فيك هالمرة ؟؟؟ ماصارت صينية مكرونة اللي سويتيها ؟؟
عبير وهي تلعب بجوالها ::/ ذلتنا وكأنها تكد علينا من شهر ...!!
طالعتها أريج بقهر :::/ أنت اسكتي والتهي بجوالك هاللي أربعة وعشرين ساعة بيدك ورسايل رايحة ورسايل جاية ؟؟؟ (( وناظرتها بنص عين ))
عبير واصطبغ وجهها باللون الأحمر وبعصبية ::/ وش قصدك ؟؟؟؟
أريج وهي تتقدم للتليفون ::/ اللي على رأسه بطحاء يحسس عليها ...
عبير بعصبية او خجل او شي ثاني لكن مو واضحه تعابيره :::/ أريـــــــــــــــــــــج..!!
أريج ببرود تكلم امها ::/ يمه معك فلوس أكلم البقالة تجيب قشطة والا اخليها على الحساب ؟؟
ام راكان ::/ ما ادري شوفي البوك بالغرفة ...!
قامت أريج بتروح لغرفة امها تتأكد لكن وقفتها صرخة عبير ::/ لاترمين كلامك وبعدين تروحين ؟؟
التفتت لها أريج مستغربة ::/ يعني تنكرين اني اسمع الرسايل اللي توصلك في الساعة أكثر من مليون وحدة ؟؟؟ والا الرنات اللي كل شوي اسمعها ؟؟ وحتى لو سويتيه صايلنت ترى أسمع الهزاز ؟؟؟؟؟
مشت وتركتها وراها وهي تتنفس بصوت مسموع وكأنها قلقة ... لكن ردت بصوت واهن ::/ عادي بما انه عندي جوال فأكيد بتوصلني رسايل ....!!
سفهتها أريج وماردت لها الصوت .. وراحت لغرفة امها تفتش في البوك عن قيمة القشطة ....
رفعت سماعة التليفون اللي بغرفة أمها وطلبت غرضها وسكرت ... وطلعت لهم في الصالة .. اريج ::/ يمه وين البنات ؟؟
ام راكان ::/ يمكن بالساحة برا .. اطلعي وشوفي
طالعت أريج عبير اختها وهي حاسة بتأنيب الضمير لأنها من دقائق كانت مبتسمة وتسولف ... لكن الحين انقلب وجهها أسود وضاعت الإبتسامة الوردية اللي كانت محلية فمها الصغير ...!!
عضت شفتها ومنعت نفسها عن الكلام .. وعطتهم ظهرها بتطلع ..
عبير بصوت عالي لكن عيونها على التلفزيون ::/ الجرس عطلان ؟؟؟ انتظرو البقالة عند الباب ...
سفهتها أريج وما ردت .. طلعت للساحة وما لقت اخواتها بس باب الشارع كان مفتوح شوي مما يعني انهم ممكن يكونون واقفين عنده ...!!
اريج وهي واقفة قدام مدخل البيت ::/ انواروه .....!! أنواااااااااااااااار ؟؟
لكن ماحد رد عليها استغربت الوضع وخافت عليهم ...
أريج وهي تتقرب للباب ::/ نورة ؟؟؟ أنوااااااااار ؟؟
لكن مافية إجابة ... مشت تدور على البيت وهي تصوت لهم بصوت عالي لكن ما احد رد عليها ... خافت من قلبها عليهم ....
ركضت لباب الشارع اللي شافته مفتوح وقالت يمكن انهم يلعبون بالشارع ولا سمعوها .. سرعت خطواتها لحد ماوصلت مرحلة الركض ..وهي تجر نفسها بصعوبة ..
وصلت للباب وعقدت حواجبها لما شافت فيه كيس جنبه .. توقعت ان البقالة وصلت وهذا طلبها .. ركضت للباب بتسكره شوي علشان تعطي الهندي فلوسه قبل لايمشي .. لكن لما صارت خلف الباب وكانت بتسكره شوي الا وبأحد يدفه بقوة بيفتحه..
صرخت بخوف ودفت الباب بكل قوتها ..
صرخت بخوف ودفت الباب بكل قوتها ..
.....::/ لحظة لحظة ...!! ما خلصت باقي شوي ؟؟
طلعت لها انوار تركض جاية من داخل البيت وبيدها كأس ماء ::/ لالالالا أريج افتحيه حرام عليك ...!!
صرخت اريج لما شافتها ونست الباب وتركته ومشت لها ::/ انتم وين كنتم؟؟؟
دورتكم مالقيتكم وحضراتكم فاتحين الباب وما عنده احد ؟؟
أنوار بضيقة ومتخصرة بقهر::/ وش تبين منا ؟؟؟ مو على أساس نطلع وما تحتاجين خدماتنا ؟؟
أريج بغرور ::/ و من قال ان أريج بنت سعد تحتاج خدماتك ؟؟؟ (( ومدت لها الفلوس )) افتحي للبقالة إذا جت ؟؟
دخلت نورة وهي تنافح ::/ أنت ليه سكرتي الباب ؟؟ مسكين سكرتي بوجهه وطاح الكرتون على رجله ؟؟؟
التفت لها أريج ::/ ومن هو اللي سكرت الباب بوجهه ؟؟
أنوار وهي تمد لها الفلوس::/ مصعب ...!! وبعدين البقالة جت وهو حاسب والكيس شوفيه (( وأشرت لها على الكيس نفسه ))
أريج ورافعة حواجبها ::/ لا والله ؟؟؟
انوار ::/ إيه والله ...
ضربتها اريج على فمها ::/ ألف مرة أقولك لاتقلديني ؟؟
لوت أنوار بوزها ::/ كل العالم تقولها ؟؟ مو بس أنتي ؟
سكتت أريج وما حبت تناقشها لكن مدت لها الفلوس ::/ طيب خذي روحي عطيه إياهم وقولي له هذولا اللي دفعتهم ..
خذت انوار اللي بيد اختها وراحت تركض لمصعب تعطيه إياهم ...
اما أريج فـ ماتدري ليه لكن وقفت علشان تشوف وش بتكون ردة فعله ...
ومثل ماتوقعت رجعت لها أنوار وهي تنافح وبيدها الفلوس ..
انوار ::/ يقول لك ماراح آخذ شي ؟؟
أريج ::/ لا قولي له تقولك اريج خذهم غصب لأنك حاسبت عنا وحنا متعودين نحاسب عن أنفسنا ؟؟ والا خذ الكيس معك ؟؟
راحت انوار برسالة اختها لمصعب .. لكن للمرة الثانية رجعت ومعها الفلوس ..
انوار ::/ يقول لك ما راح آخذها ولا راح آخذ الكيس ؟؟ لأنه على هالحالة بضطر آخذ هالأغراض كلها .. وماراح تشوفون وجهي عقب اليوم ...!!
فهمت اريج مقصده من هالكلام وعصبت من قلبها ... أول مرة أحد يمنّ عليهم بشي ؟؟؟ حتى نواف اللي ما أحد يسوي سواته عمره ماجرحهم بكلمة وهو يمون ؟؟ يجي هذا الغريب ويجرحهم ؟؟؟
شبت ضلوعها من القهر .. وبتهور راحت تركض داخل بعد ما فتحت الباب بعصبية واضحة .. طلعت وعليها عبايتها .. ومرت على انوار وسحبت من يدها الفلوس ومشت للباب فتحته على مصراعيه ووقفت بوسطه ... شافته واقف عند شنطة السيارة ويضحك من أنوار ونورة اللي يخربطون عليه بسوالفهم ..
رفع عينه وشافها قدامه ... استحى منها وحس انه فعلا كان المفروض مايقول اللي قاله ...
رمت أريج الفلوس بوجهه .. وبنبرة جامدة ::/ أغراضك لاتنزلها .. واللي نزلته أرجع خذه ...!!
مصعب متفاجئ ::/ ايه بـــ ـ ـ ـ
أريج وعيونها بدت تدمع من القهر ::/ لو ما اخذتها برميهم في الزبالة للكلاب ..
والتفتت لأختها نورة وبنبرة أمر ::/ تعالي ساعديني نطلعهم ...
راحت لها نورة وهي متفاجئة ودخلت معها يطلعون الأغراض ويرجعوها للسيارة ... ومصعب واقف ويطالعهم .. ولما انتبه لنفسه وقفها ::/ لحظة بس انا خلاص اشتريت الأغراض ؟؟؟ وين أوديها ؟؟؟ أنتي هالمرة خذيها والمرة الجاية ماراح أجيب لك شي ؟؟
أريج بإصرارا ::/ قلت لك لو بغيت ارمها بالزبالة ؟؟؟ اغراضك مانبغاها .. مشكور ولا عاد تجي هنا مرة ثانية ..
لما شافها مصعب معصبة استحى من اللي سواه ... وابتسم في نفس الوقت لما شاف عصبيتها في نقل الأغراض للشارع .. وحرطمتها بينها وبين نفسها.....!
تنهد بعمق وقرب بيدخل البيت بس تنحنح علشان ينبهها انه قريب لاتطلع بعصبية و تضرب فيه ....
------------------------------------------------------------------------------
على نهاية العصر وبعد ما مالت الشمس للغروب ... كانوا ندى وسحر جالسين في العريش اللي بنهاية الحديقة ومستمتعين بمنظر الغروب .. ورائحة الندى منتشرة حولهم بفاعل الماء اللي سقى الأرض الخضراء وانتشرت رائحة الورد والياسمين ...
كان مكانهم شاعري ورائع جدا ...
تنهدت سحر وهي تتسند على الطاولة الخشبية بأكواعها ::/ مكان ولا أروع بصراحة ..!!
طالعتها ندى بعد ماشالت الهيدفونز من أذنها ::/ مريح للعين والنفس ..!!
سحر ::/ تدرين نصف هالمنطقة بتكون من أملاك مشاري بمجرد مايتزوج ؟؟
رفعت ندى حاجبها بقهر::/ ليش إن شاء الله ؟؟
سحر وهي تأشر ::/ هذا البيت له ... وهذي الحديقة مواجهه له ؟؟ يعني بتصير من أملاكه ؟؟
ندى بقهر ::/ وهو مايآخذ الا كل شي زين ؟؟ كان أخذ الجزءالخلفي ؟؟
سحر مبتسمة بخوف ::/امممممممم .. حتى الجزء الخلفي له ؟؟
ندى وعيونها طايرة ومتخصرة ::/ لا ااااا ..... اشوفه استحوذ على الساحة كلها وماترك لنا شئ؟؟
سحر تضحك ::/ هههههههههه مو هو الكبير لازم يدلعونه ؟؟؟ الجزء الخلفي بيسويه موقف لسيارته علشان ما تتعب ام العيال وتضرب مشوار للمواقف الخارجية كلما بغوا يطلعون ؟؟
ندى بعدم اهتمام :::/ مآخذين مقلب في اخوكم ؟؟ وانتي الصادقة قولي علشان مايبيها تمشي بالشارع يبي على طول من البيت للسيارة ومن السيارة للبيت ؟؟؟
سحر وحبت تغير الموضوع لأنها ماترضى على مشاري ولا ودها تتهاوش مع ندى ::/ إلا خلينا في المهم ..! الحين حفلتنا بنسويها يوم الخميس ولا بعد استعدينا بشي غير البوفيه ؟؟
ندى وتلوي بوزها ::/ صدقتي ...؟؟ بقت الحلويات والمعجنات ؟؟؟ وباقي اشتري لي لبس مناسب ؟؟
سحر تتنهد ::/ ياخوفي تطلع نتائجنا تفشل وتروح حفلتنا خرابيط ؟؟
ندى ::/ المهم اننا ننجح ونجمع البنات في البيت ...!! وبعدين لاتأخذينها على انها حفلة نجاح ؟؟؟ خذيها على انها جمعة بنات ...
سكتت سحر شوي وبعدين تكلمت بحماس والبسمة شاقه وجهها ::/ وش رأيك نطلع الحين .. نروح السوق تدورين لك لبس وعقب ندور شوي في محلات الحلويات ؟؟
عقدت ندى حواجبها ::/ فكرة ...............!!
تجهمت سحر ::/ بس المشكلة اخوك اللي بيطلع لنا في الخط ؟؟؟
ضربتها ندى على يدها ::/ حرام عليك خليه نايم ولا تأكلين في لحمه ؟؟
سحر بخوف ::/ وش فيه نايم لهالوقت ؟؟
ندى ::/ مافيه الا العافية بس اليوم مارجع الا قريب العصر صلى وتغدى ونام ... عاد بيصحى المغرب أكيد ..!!
تنهدت سحر بارتياح ::/ خلاص اجل اتركي له ورقة قولي له فيها اننا بنطلع سوى وما أظن يعارض ..!!
ندى بنبرة تفكير ::/ تتوقعين ؟؟
سحر وهي تسحبها علشان يقومون ::/ ايه اتوقع بس يالله قبل لا يلحقنا المغرب وترفض أمي نطلع في الليل بروحنا ..!!
ابتسمت لها ندى وقامت معها متوجهين للباب الرئيسي .. لكن وقفت سحر وهي تتمتم
::/ لالا خلينا نروح مع درج غرفتك ..؟ أبوي و مصعب جالسين بالصالة عاد اخاف يقابلنا مصعب ..!
اكتشفت ندى عند هالنقطة حاجتهم الملحة للبيت .. فـ ابتسمت لسحر وهي تقودها لخلفية البيت علشان يطلعون مع درج غرفتها ....
لبسوا البنات ملابس الطلعة وتجهزوا بالكامل بعد مابلغوا ام مشاري انهم يمكن يتأخرون شوي لأن ندى بتدور لها على لبس .. يعني محتمل انهم يتعشون في المطاعم اللي بالسوق ..
لبسوا عباياتهم ونزلوا هالمرة مع الدرج الرئيسي في البيت .. سمعوا ابوهم وامهم ومعهم مصعب يسولفون ومبسوطين ... ابتسمت سحر لندى وهي تقول ليت من يدري وش يسولفون فيه ...! بادلتها ندى الإبتسامة وغبطتها على شعور الأسرة اللي تحس فيه سحر بين امها وابوها واخوانها ... يعني أسرة متكاملة ..!!
طلعوا ماشين للباب الخارجي بعد ماتعدوا حديقة المدخل والمواقف ... كانوا ناويين يطلعون هالمرة باللكزس الجديدة بدل سيارة العائلة المعتادة ...
توقفوا عن المشي والتخطيط للحفلة لما شافوا باب الشارع ينفتح ويدخل عليهم مشاري وبيده شنطته وملفاته وشكله مرهق ...
لف عليهم بعد ما سكر الباب ورفع نظارته يطالعهم باستغراب وحاجبه مرفوع ...
نزلت ندى رأسها وهي تتأفف وتهمس لسحر ::/ الله يعينا..!!
ضحكت لها سحر من وراء الغطى ... وهمست لها تسكت ..
قرب لهم مشاري ::/ السلام عليكم ....!!
سحر بصوت مرح ::/ وعليكم السلام ..!! وينك ماشفناك على الغداء اليوم ؟؟؟ (( وغمزت له )) مكانك فاضي وماتعودنا ..
ضربتها ندى على خصرها علشان ماتنفخ رأسه بكلامها ...
لكن هو ابتسم ::/كنت معزوم على الغداء ..!!
سحر بسرعة وتسحب يد ندى وراها ::/ طيب نشوفك وقت ثاني الحين مستعجلين ..!!(( ومشت ))
لكنه وقف بوجهها وهو عينه بعينها ::/ وين رايحين ؟؟؟
سحر بخوف خفيف::/ للسوق بنتجهز لحفلتنا يوم الخميس ..!!
مشاري ويزم شفايفه بغضب مكتوم ::/ وبتطلعون بهالشكل ؟؟؟ ترى اليوم مو يوم حفلتكم علشان تطلعون بكل البهرجة هذي ؟؟
سحر بدلع ::/ مشـــــــــــــــــــــاري ..!! وش فينا والله عادي كل العالم كذا الحين .. يالله عاد خلنا نطلع ؟؟
مشاري باستفهام ويأشر على الفورد اكسبلورر الموقف بالمواقف ::/ هذي السيارة من هنا ..!!
سحر وحست ان اليوم ماراح يعدي على خير ::/ لا بنطلع باللكزس ..!!
مشاري ونفذ صبره ::/ طيب افتحي عبايتك ..؟
وقف سحر قلب من الخوف ::/ ليش ؟؟ يعني ما تبغانا نروح ؟؟
رفع مشاري يده وبدء يمسد صدره لأنه تعب من الوقفة وحس ان الألم رجع له ::/ لا ...!! بس بشوف لبسك ؟؟
انقهرت ندى من تسلطه عليهم .. كان ودها تفسخ صندلها وتضربه على وجهه .. لكنها تخاف وتستحي ... ولا تقدر حتى تكلمه..
بلعت سحر غصتها وجهزت نفسها للكلام اللي بيقوله لها وفتحت عبايتها بأصابع مرتجفة ... ومارفعت عينها بعينه لأنها عارفة وش بيقول ؟؟
مشاري بعد ماشافها لابسة بنطلون جينز ضيق law west وتي شيرت أبيض قصير شوي ... مسح على لحيته بيده علشان يخفف عصبية الألم ولا يطلعها على اخته الوحيدة ..!!
لكن صرخ بغضب عارم وبأصبع تهديد::/ كم مرة قلت لك ما احبك تطلعين بمثل هاللبس برا البيت ........!! ومليون مرة أقولك فرقي بين لبس البيت ولبس الطلعات ؟؟؟ وعبايتك هذي خليها للمناسبات مو للسوق ؟؟؟؟؟؟؟
وبصوت آمر ::/ قدامي بدلوا عباياتكم الحين .. وانتي (( أشر على سحر )) غيري لبسك ما يعجبني تطلعون فيه ؟؟؟ ولو مصرين على رأيكم بقول لكم مافيه روحة واجلسوا بالبيت .!! (( وكان يقصد بكلامه ندى بعد ))
مشى عنهم وتركهم خلفه وندى خلاص مو قادرة تمسك اعصابها اكثر ....
اخته وبكيفه هو إياها ..!! لكن هي وش دخله هو في خصوصياتها .. عندها اخوها وأصلا هي كبيرة كفاية علشان تعرف وش الصح من الغلط ..!
صرت أسنانها بقوووة والتفتت على سحر بهجوم ..::/ ماراح أبدل واللي عنده خل يطلعه ..!!
مسكت سحر يد ندى ::/ ندوش الله يخليــ ـ ــ
قاطعها مشاري من دون مايلتفت ::/ واللكزس لاتطلعون فيها لأنها ماتظللت ... اطلعو بالفورد المخفي لحد ماتجهز اللكزس وتصير قابلة للإستعمال والطلعات...!!((وبنبرة تهديد التفت على خفيف)) و لا تقولون لي انكم بتتأخرون لوقت العشاء ...!!(( ابتسم بخبث وكمل طريقه))
التفتت سحر على ندى وهي مبتسمة علشان تخفف عنها الغضب .. لكن ندى انفجرت مرة وحدة في وجهها ::/ بذبحه .......!! والله لأذبحه وبتكون نهايته على يدي وبتشوفين ...!! يا قاتل يامقتول ؟؟؟ اااااااااااااه يقهر يقهر ..
سحبتها سحر بقوة وهي تحاول تهديها::/ معليش اذا رجعنا اذبحيه على كيفك بس الحين خلينا نروح نخلص أشغالنا ..!!
ابتسم مشاري وهو يمشي للبيت لما سمع كلامهم عنه .. حس انه ضغط عليهم لكن في النهاية كل اللي يسويه لمصلحتهم وبيكتشفون هالشي عاجلاً أو آجلاً وأكيد ساعتها بيتذكرون مواقفهم هذي وحركاتهم المراهقة وبيضحكون ...!!
دخل مع باب الصالة وهو يتنهد بألم ... لف بيطلع الدرج على طول لأنه مو قادر يصلب طوله .. بيروح يآخذ له حمام بارد عالسريع ويتمدد على سريره .. ويريح نفسه ..
أول ما حط رجله على الدرج .. غمض عيونه وهو يتذكر انه ماشاف امه اليوم أبداً .. وخصوصا انه طالع بدري الصباح قبل لا تقوم هي من النوم ...
رجع خطوتين للخلف ونزل شنطته على الكرسي اللي على يمينه ..ونزل شماغه ومشى للصالة الثانية اللي تطلع منها أصوات اهله مجتمعين ...
دخل عليهم مبتسم علشان يزيل عن وجهه آثار الإرهاق ولا تحرجه امه بالأسئلة فـ يضطر انه يقول لها كل شي .. ويقع في شر اعماله .. وعقبها وش بيفكه من اهله ..!
مو وقت انه يقول لهم الآن أبدا ً ....!
زالت الإبتسامة عن وجهه لما شاف أبوه معصب وكأنه يلقي محاضرة على رأس مصعب اللي كان هادئ ومنزل يديه بحجره ...
سلم عليهم وهو يحب امه على رأسها وفي عيونه نظرات التعجب ...
جلس مشاري جنب امه ومد يده يصب له شاهي ::/ وش فيكم وش صاير ؟؟
ابو مشاري بصوت عالي ::/ تعال شف أخوك وش مسوي ؟؟؟ سود وجهي الله يسـ ـ ـ استغفر الله العظيم ..؟
التفت مشاري على مصعب ::/ وش فيك ؟؟ وش انت مسوي هالمرة ؟؟
مصعب ببرود ::/ ولا شي .. قلت لبنتهم كلمتين عاد اتصلوا يعلمون ابوي علي ؟؟
زاد تعصيب ابو مشاري من برود مصعب ::/ الحين كل اللي قلته لها ولا تبغاهم يتصلون علي ؟؟؟ وبعدين هم ما اتصلوا يشبون الفتنة بيننا .. طلعوا اجاويد وكل الي قالوه انهم ماعاد يبغون منا شي ؟؟؟؟؟ والسبب حضرتك وكلامك اللي يسم ؟؟
مشاري وهو ضايع ولا فاهم شي ::/ الحين من هم اللي تتكلمون عنهم ؟؟
ام مشاري بأناة ::/ بيت أبو راكان ... اخوك اليوم وصل لهم الأغراض وقال لبنتهم كلمتين مالهم داعي (( ركزت على الكلمتين وطالعته بنص عين )) عاد اتصلت علينا ام راكان تعتذر انه ماراح تستقبل شي ثاني من عندنا بعد اليوم...!
ابو مشاري ::/ اخوك الحبيب رايح يمنّ عليهم بكيس السكر والرز الي نرسله لهم كل شهر ؟؟ لا ويقول لهم ادفعوا حقهم ؟؟
مصعب ::/ يبه لا تكبر السالفة وهي صغيرة .؟ وبعدين انا ماقلت لهم ادفعوا ؟؟
ابو مشاري ::/ المهم لمحت لهم ومنيت عليهم ؟؟ بعدين وش اللي لا تكبرها ؟؟ اصلا هي كبيرة من زمان ؟؟ ماتقول وش بيكون موقف أختك وبنت عمك من صديقتهم القريبة ؟؟ والا موقفهم منك إذا قالت لهم عن سواتك ؟؟؟
تنهد ابو مشاري والتفت على زوجته::/ كلميها واعتذري منها ؟؟ وحاولي تقنعينها يآخذون اللي نرسله ؟؟
ام مشاري باعتراض ::/ لا ماعليش يا ابراهيم ؟؟ تبغاني اترجاهم للمرة الثانية ؟؟يكفي المرة الأولى كل يوم ناطة عندهم بالبيت اقنعهم ..!!(( وبنبرة قهر)) قالوا له خذ خير قال ما معي ماعون ؟؟؟ من قال لهم يصيرون حساسين لهالدرجة وهم محتاجين ؟؟
ابو مشاري بعصبية ::/ هذي مو حساسية هذي قلة ادب من ولدك وتعدي لحدوده وقلة احترام ؟؟؟
حب مشاري يهدي الموضوع ::/ خلاص يبه بعد المغرب انا بآخذ لهم الأغراض وأكلم ام راكان وآخذ بخاطرها ...
مصعب باستهزاء ::/ بيسكرون الباب في وجهك ؟؟؟ و إن كان بنتهم اللي طلعت لي موجودة فـ توقع ان الشرطة بتقبض عليك من لسانها ..
ابتسم مشاري::/ يصير خير ...!!
ابو مشاري بيأس ::/ لا لاتروح ... مستحيل انها بترضى عقب اللي صار اليوم .. وبعدين هي مكلمتني ومصرة هالمرة على رأيها ... وما ظنتي بنقدر نقنعها ..!!
مشاري وهو يقوم ::/ إذا خلاص بنساعدهم لكن من بعيد لبعيد عن طريق سحر وندى و من دون مايحسون بالإهانة ...
سكت الجميع وهم يشوفون مشاري يطلع وارتاحت ملامحهم وكانهم اقتنعوا بإقتراح مشاري ..................!!
---------------------------------------
عند منتصف الليل وبحدود الساعة 12 وصل لبيتهم بناءً على اتصال من امه تبلغه ان بيت عمه قرروا يرجعون لبيتهم ..!! وهو بما أنه تقريبا سائق العائلة رجع للبيت علشان يآخذهم ...وقف سيارته عند الباب ودخل للبيت وتوجه لباب المطبخ اللي على الفناء الخارجي ..
شاف إيمان أخته واقفة عند الفرن وبيدها صحون بلاستيك وكأنها تصفف فيهم شي ...
رفع كتوفه بعدم اهتمام ..ومشى نواف للثلاجة وهو يسلم ::/ السلام عليكم ..!!
التفتت عليه إيمان مبتسمة ومتفاجئة من دخلته ::/ هلا وعليكم السلام ..!! وصلت ..!!
نواف ويشرب مويه ::/ إيه من دقائق ...!! وش قاعده تسوين ؟؟
إيمان وهي مشغولة ::/ أجهز عشاء لعبير علشان يآخذونه معهم لها ..!!
جلس نواف بحزن على الكرسي ::/ وهي ليش ما جت ؟؟؟؟
إيمان ::/ مادري عنها يقولون تعبانة شوي ومنسدحة ؟؟
حس نواف ان قلبه انتفض من قالت له إيمان انها تعبانة .. خاف لايكون هو السبب في هالشئ لأنه ماراح يسامح نفسه ::/ وانتي ماكلمتيها ؟؟؟ ماشفتي وش اللي متعبها ؟؟
إيمان وهي تغلف الصحون ::/ كلمتها لكن ما ردت لا على البيت ولا على الجوال .. أتوقع انها نايمة ..!
سكت نواف وما حب يعلق على كلام اخته ...!! يعني معقولة تكون ماجت لبيتهم اليوم لأنها زعلانة منه ؟؟ ايه بس هو ماسوى شي غلط ؟؟؟ يعني كل اللي سواه انه وقفها عن التهور اللي كانت بتسويه وبس ... لكن مهما كان انا تدخلت فيها والمفروض ما اتدخل ...!! يعني بالعقل أتركها على راحتها تروح وتتهاوش مع الشباب وانا اوقف اتفرج عليها ؟؟ مستحيـــــــــل ...!! وإن كان هذا اللي مزعلها فأنا زعلتي عليها أكبر لأنها تلفظت علي بألفاظ جرحتني وواجهتني بموقف حطم كل ذرة قوة في جسمي ...!!
تنهد بتعب من التفكير ،،، وانتبهت له إيمان وهي تجهز الأغراض بكيس ... حاولت تقتحم سرحانه لما قالت ::/ اقول لهم يجهزون ؟؟
نواف وهو يقوم ::/ ايه انا انتظرهم بالسيارة..!!
طلع وهو يسحب رجوله على الأرض مهما يكون يستانس لما يدري انها ببيتهم . ويحس بشعور السعادة لأنها مو زعلانة .........!!
ركبوا السيارة بعد ما ودعوا اهل البيت .. وانطلق بهم نواف متوجه لبيتهم اللي بالطرف الثاني من الحارة ... كان بخاطره يسأل امها ليش ما جت معهم .. لكن ماسمح لمشاعره هالمرة انها تسيره ... لأنه مهما كان أكيد بيقولون لها هالشي مما يأكد لها أنه مو زعلان وهذا لايمت للحقيقة بصلة أبداً،، ولا يعبر عن مشاعر الحزن والإنكسار اللي عبير ماقدرت تجبرها له بكلمة اعتذار ..... وانه يهتم بوجودها وهذي الحقيقة اللي للمرة الثانية عبير تتدخل ولا تسمح له يوضحها لها بسبب تصرفاتها الغير مبالية ....
التزم الصمت وهو يسوق بهدوء لحد ما شارفوا على الوصول للبيت ...
وقفوا عند المدخل الرئيسي لبيت عمه ونزلوا جميعا .. هو راح لشنطة السيارة ينزل العشاء ... و مد الكيس لنورة اللي وقفت تنتظره بينما الباقين على طول دخلوا ...!!
ابتسم لها وانتظرها تدخل وتسكر الباب وراها على الأقل يتطمن انهم داخل البيت ...
ركب سيارته وحركها ،،، و أملت عليه غيرته انه يلف بيتهم ويتطمن ان كل شي اوكيه قبل لايبتعد اكثر ....
أول ما انعطف يسار تفاجأ بسيارة مطفيه أنوارها واقفة عند باب بيت عمه الخلفي واللي قلما يستخدمونه ...
ولما دقق نظره شاف وحده تنزل من السيارة وودعت الراكب ومشت بسرعة للبيت وهي تتلفت يمين وشمال ....!!
انصدم من اللي شافه ؟؟ واستفهم بخاطره من تكون ؟؟؟ ووش تسوي عند السيارة مثل هالوقت ؟؟ ماوده يظلم احد ولا يقذف احد ؟؟
بلع ريقه بصعوبة .. لما مرت السيارة من عنده لأنها بتطلع .. التفت لها نواف بلا وعي منه .. وحس بهزة عنيفة حطمت آخر شي بقلبه ... سيارة جاكوار فضية ؟؟؟؟ وكلها مخفي ؟؟؟ عقد حواجبه وفغر فاه بأوسع ما يكون وهو يحاول يوضح الصورة اللي تراءت قدام عيونه من شاف السيارة ...!! انتهت حياته بمجرد ما اتضحت الصورة ..!! لكن في النهاية مايبي يصدق أفكاره الغبية ..!!
مرت ربع ساعة ونواف ماسك المقود بيدينه وعصبيته تجاوزت الحد المسموح .. قرر في لحظة ضعف انه ينزل ويكسر رأسها لأنها هي الوحيدة اللي ماجت لبيتهم اليوم وتعذرت بعذر واهي ؟؟ وبعدين لو شافوها الجيران وش بتكون سمعتهم ؟؟؟
لكن قدر يسيطر على أعصابه بكل قوته وحرك سيارته بسرعة جنونية وهو مو قادر يتنفس بشكل طبيعي ... والشهيق عنده أصعب من الزفير ....
عزم انه ماينقاد ورى أفكاره المجنونة ... وبدأ يفسر الموضوع على حسن ظن منه ... هو قدر يحسن ظنه في اللي صار من شوي لكن اللي ما قدر عليه انه يقتنع بالشي اللي فكر فيه .. وهذا اللي صعب عليه المسألة .. وخلته غصب عنه يفكر بخطط تبين له اللي صار بوضوح اكبر ..!!
----------------------------------------------