في خضم هالأحداث كان أبو مشاري جالس على الأريكة الموجودة بجناحه وبيده أوراق وملفات منها المنشور قدامه على الطاولة ومنها اللي بالأرض واللي موجود على الكنبة يعني الأمور كلها معفوسة ... وهو لابس نظارته وبيده القلم الأحمر يكتب ويخطط وعلى يمينه جواله وكوب الشاهي .. وان كان مايكلم بالجوال فـ هو يرشف من الكوب ...
ام مشاري كانت تذرع الغرفة روحه وجية من غرفة الملابس لغرفتها الرئيسية .. تجهز ملابسها هي وابراهيم علشان روحتهم اليوم للخرج وتستعد بالأشياء الضرورية اللي راح يحتاجونها للعزيمة ... خصوصا ان اعز أصدقاء ابو مشاري ولد أخوه زواجه اليوم .. وهو طبعا مستحيل مايحضر هو وام مشاري ... والأخيرة لازم تظهر بالشكل الأرستقراطي المطلوب .. واللي تعودت عليه من أيامها كونها زوجة أهم رجل اعمال بالسعودية ..!!
تنهد وهو يسند راسه على الكنب ويمسد جبهته بيده ... خذ نفس عميق ورجع يغوص بين اوراقه مرة ثانية ... انتبهت له حصة وهزت رأسها بأسى على حاله ... هذا هو وضعه من اكثر من يومين وهو دافن نفسه بين هالأوراق والمكالمات ....
ام مشاري وهي ترتب اللي بيدها بالشنطة ::/ ريح نفسك شوي مايسوى عليك هالتعب كله ..!!
ابومشاري ::/ ما عليه قربت اخلص وبرتاح ان شاء الله ...
ام مشاري بنبرة عصبية شوي ::/ الولد مو متخرج بكره توه باقي عليه ترم كامل ... بيكون عندك وقت وزيادة ترتب له أموره ..
ابو مشاري مبتسم ::/ أصلا كانت غلطتي من البداية المفروض اني كنت منتبه للشغل من زمان ومرتب اوراقهم قبل لاتجي ساعة الصفر .. بس يالله مافات الا الشر ..!!
ام مشاري ::/ أعتقد ان اللي عطيتهم إياه يكفي وزيادة ...!!
ابو مشاري من دون مايرفع عينه ::/ حصــــة...!!
ام مشاري وهي تتنفس بعمق ::// بس صدق شي يقهر ؟؟؟ أنا مو قصدي أبداً أكبر قلبك عليهم ؟؟؟ بس الفلوس حرام عليهم ؟؟؟
ابو مشاري وهو يترك اللي بيده ويطالعها ::/ لا مو حرام ؟؟؟ أنا عارف انها كلها ملكي ... بس لاتنسين أن أبوي هو اللي كان يديرها بنفسه ولما مات وصى لسلطان اخوي بالنص ...!! اتنفذت الوصية لأني كنت تقريبا معطي ابوي كل الصلاحيات انه يتحكم في الحلال ...!! والحين بعد ما أقررت بهالشي من زمان تبيني في النهاية ارفض ؟؟؟ مستحيل ... لو انا وانت فاهمين الناس ماتفهم وبيقولون كل حلال عيال اخوه ؟؟؟ وبعدين هذا نصيبهم وانا راضي به...!!
تقدمت ام مشاري بوقارها وجلابيتها المطرزة بالفيروزي والسكري تصدر صوت خفيف يدل على انها تمشي بتوتر وجلست جنبه على الكنبة ::/ فاهمة كل شي يا ابراهيم ...!! بس حرام انت تعبت من البداية للنهاية وهم يجون يآخذونها باردة مبردة وهم ما سوو فيها مثل ماسويت انت ومشاري ؟؟؟؟؟؟؟؟؟؟ يقهرني هالتصرف ... على الأقل اكتفي باللي عطيتهم اياه وخلاص .. بيكفيهم وزيادة بعد ... وهم مو ناقصهم شي عايشين بخير الله ثم بخيرك ..!!
التفت عليها ابو مشاري وهو يبتسم بوهن ::/ يابنت الحلال صدقيني هذا كله ماراح يروح بعيد ؟؟؟ (( وبنظرة واثقة )) وكل شي بيرجع لنا ؟؟؟؟
ناظرته ام مشاري بتمعن هدفها تستشف شي من كلامها ::/ وش قصدك ؟؟؟
تسند ابو مشاري على ظهر الكنبة وحط يديه ورى رقبته ::/ الحين هم مو عيال اخوي ؟؟؟
سكتت ام مشاري تنتظره يكمل كلامه بس فاجئها لما ناظرها وقال ::/ ردي .. هم عيال أخوي والا لا ؟؟
انتبهت ام مشاري له :/ الا عيال اخوك ومايحتاج أأكد لك ؟؟
ابتسم وكمل ::/ خلاص بنت أخوي عيالي اولى فيها ... وبنتي عيال عمها اولى فيها ..!! وبكذا حلالنا ماراح ؟؟؟ صح (( وابتسم لها )) ؟؟؟ وقدام الناس اني دخلته شريك مثل ماكان أبوهم الله يرحمه ...!!
تجهمت ملامح ام مشاري لما قال لها اقتراحه ووقفت باعتراض ::/ الا الزواج يا ابراهيم مايتم على مصلحة ؟؟؟ ولايكون تغصب بنتك والا عيالك على زواج هم مو راضين عنه بسبب فلوس ؟؟؟
والتفتت عليه وكملت ::/ ولا تنسى الألم اللي تجرعته بمثل هالسبب (( وصدت عنه بألم وهي تكمل ::/ وبعدين من البداية قل لهم ان اللي عطيتهم اياه هو حقهم من ورث أبوهم وخلاص ؟؟
وقف لها ابو مشاري وهو عارف بجرحها العميق اللي الى الآن ما اندمل ومسكها مع كتوفها بحنان ::/ متى بتنسين الماضي ؟؟؟ اللي فات مات واحنا عيال اليوم ؟؟ وانت زوجتي وام عيالي وانتي الأعرف بمكانتك عندي ؟؟؟؟ ولاعاد تسمعيني هالكلام اللي نسيته ؟؟
ابتسمت له من وراء غضبها وألمها ::/ مهما يكون لا تعيد الشريط نفسه وتعيش بنتي والا عيالي في تعاسة ...!! تراهم راس مالي بهالدنيا واذا على الفلوس اللي جابها يجيب غيرها ..!!
رجع ابو مشاري لمكانه بين اوراقه وتكلم بجدية وثقة اكبر ::/ اذا على بنتك لا تخافين بتوافق وعن رضى تام تام .. انا أبوها وفاهم لها (( وابتسم لما طرى على باله الموقف )) اما ولدك مشاري فـ مو فارقة معه اصلا هو رافض الزواج كـ مبدأ لكن اذا اقنعته ماراح يلاقي مثل بنت عمه .. متربية معه وفاهمته وعارفه اطباعه القاسية ...!!
ام مشاري وهي متوجهة للسرير تكمل شغلها ::/ لا تقول عن مشاري هالكلام .. والله انه حنون ومافيه منه ...!! وبعدين ليه وقفت عند مشاري اخطبها لمصعب ؟؟؟ والا مو ولدك ؟؟
ابو مشاري اللي مايحب هالعبارة طالعها بنظرة ثاقبة::/ لا ولدي ..!! بس ندى انا احس مشاري يناسب لها أكثر من مصعب ؟؟؟
تنهدت ام مشاري وهي عارفة ان اللي براسه لازم يسويه ::/ بكيفك هذولا عيالك وانت ادرى بمصلحتهم .... بس هاه يكون بعلمك لو غصبتهم ترى انا بوقف معهم ضدك ولا راح يسوون شي هم مو راضين عنه ..!! انا نبهتك ...
ابو مشاري يضحك::/ بنتك انا واثق منها .. بس ولدك الله يعيني عليه ......!!
سكتت عنه وبدت ترتب الشنطة وباقي أغراضها .. ورجع ابو مشاري لأوراقه علشان يسوي حساباته ويقسم الحلال بينه وبين شريكه الشاب اللي ماتجاوز عمره 24 ....
------------------------------------------------------------------------------
على الساعة 4.30 طلعت ام مشاري من غرفتها بعد ماجهزت كل شي .. وبيدها عبايتها والمدخن اللي يطلع منه ريحة بخور العود الكمبودي الفاخر ... واتصلت على الخدامة علشان تطلع للجناح تآخذ أغراضهم ....
ام مشاري وضغطت تحويلة المطبخ ::/ روسيدا ...!! اطلعي فوق خذي الشنط ونزليها تحت وركبيها في الإسكليد حق بابا... بسرعة ...!!
سكرت السماعة .. وتوجهت لغرفة سحر بنتها علشان تبلغها انهم بيمشون الحين ....
فتحت بابها وشافت بنتها منسدحة على السرير ومتلحفه بالغطاء ومو من عوايدها ؟؟؟
قربت لها ام مشاري وهي خايفة عليها لا يكون صار لها شي من الإختبارات وتوه يوضح ...
ام مشاري بنبرة خوف ::/ سحر حبيبتي وش فيك ؟؟ تحسين بشي ؟؟
قامت سحر من السرير وجلست مواجهة لأمها وتحاول تغالب دمعتها ::/ لا يمه مافيني شي ؟؟؟ انتم بتمشون الحين ؟؟؟
ام مشاري وقلبها ناغزها على بنتها ::/ ايه الحين بنروح ،،، روحي اجلسي عند بنت عمك تونسك بدل حبستك بالغرفة (( وركزت نظرها عليها ))
تلعثمت سحر من جت سيرة ندى كانت على وشك انها تقول لأمها كل شي لأن الأوجاع زادت عليها بس فضلت تسكت لأن اللي بينها وبين ندى يحتم عليها انها ماتتكلم في شي ::/ ندى طالعة مع زياد ... يعني بجلس بروحي في البيت ...!
ام مشاري وهي تمسك يد سحر ::/ وش اسوي فيك حبيبتي قلت لك روحي معنا ومارضيتي ؟؟؟ وانت عارفة هالحفلة لازم نحضرها هذا ولد اخو ابو نايف ،،، ومو معقولة مانحضر واحنا واياهم مثل الأهل ؟؟؟
سحر ::/ يمه ما قلت اجلسوا لا تروحون ... بس احس الوقت بيطول وانا ماعندي احد ؟؟؟
ام مشاري تذكرها ::/ المغرب بيوصل مصعب واذا شافك بروحك ماراح يتركك بيجلس معك ... ويالله اتركي عنك الدلع ..!!((وابتسمت لها))
ابتسمت سحر لأمها وقامت تحب راسها وتودعها ::/ يالله تروحون وترجعون بالسلامة ان شاء الله ..!!
حبتها امها على خدها ::/ الله يسلمك حبيبتي ..!! عاد ما بتطلعين تسلمين على أبوك ..؟
سحر وتسبق امها للباب ::/ الا أكيد ؟؟ عاد كل شي ولا ابو مشاري ؟؟
طلعت سحر من الغرفة وهي تحاول تتناسى الكلام اللي سمعته من بنت عمها قبل دقائق ... سحبت هواء عميق لرئتيها .. ومشت لجناح امها وابوها .. بس استوقفها كلام امها اللي كانت واقفة عند باب سحر وتسكره ::/ مو هنا أبوك حبيبتي ؟؟ نزل تحت من بدري ...!!
التفتت عليها سحر وابتسمت بوجهها وغيرت وجهتها للدرج نازلة تحت تشوف أبوها وتسلم عليه ...
لما وصلت الصالة مالقت له أي أثر ... وقفت في وسطها وهي تتلفت وتحزر وين ممكن تلاقيه .. شافت روسيدا داخله مع البوابة الرئيسية وكأنها جايه من برا ...
سحر بلهفة ::/ روسيدا ما شفتي المستر ؟؟؟
ابتسمت لها روسيدا ::/ عند السيارة ...!!
شكرتها سحر على السريع وطلعت وهي تهرول لأبوها ،، ماتدري بس تحس انها ودها تحضنه ...!!
فتحت البوابة الخشبية الضخمة المنقوشة بالذهبي وكانت بوسط الصالة طالعة برا لسيارة أبوها بالموقف الرئيسي اللي داخل البيت والمخصص فقط لسيارته وسيارة السواق ..!!و لما وقفت عند الدرج اللي ينزل للساحة شافت أبوها واقف مع ندى وهي تحبه على رأسه .. ابتسمت بألم لما تخيلت ان بيوم من الأيام راح تنتقل ندى عنها وتتركها .. تجاهلت تفكيرها المتعب ونزلت بسرعة لأبوها تسلم عليه قبل لايطلع وكانت حافية مثل العادة ...
شافتها ندى وهي تركض وابتسمت ::/ شوي شوي على عمرك ؟؟؟ على الأقل كان لبستي جزمتك ؟؟
سحر وهي تقرب لأبوها ::/ مالقيت وقت ...
قربت سحر لأبوها وهي متخصرة ::/ أوكي يعني بتطلع وبتروح وما كأن لك بنت جالسة بغرفتها وكلكم بتروحون عنها وتتركونها وحيدة اليوم ؟؟؟ ولا حتى مع السلامة ؟؟؟
ابتسم لها أبوها وحضنها مع كتوفها ::/ آسفين للناس الدلوعين ؟؟؟ كنت بنادي لك ؟ وبعدين المفروض انتي اللي تجين تسلمين مو أنا اطلع لك ..
سحر وهي تتدلع وراسها على صدر ابوها ::/ لا عاد وش الفرق بيني وبينك انا وانت واحد ؟؟؟ (( ورفعت راسها له )) قول بعد كلامي غلط ؟؟؟
دخل عليهم في هاللحظة وبهجومية وكأنه مستعجل وفرحان ومايقدر يوصف مشاعره بيسلم على عمه ويخلص علشان يلحق يفرج اخته على بيت المستقبل اللي بيجمعهم ..!! ..لكن صرخة ندى وهي توقفه .. خلته يلتفت لعمه ويشوف البنت اللي بحضنه فـ استحى وطلع بسرعة ووجهه محترق من الفشيلة ... ماتوقع ولا واحد بالمية انه يشوفها ...!!
التفت ابو مشاري لسحر وحبها على جبهتها وبنبرة أمر::/ يالله عاد يبه أشوفك على خير ..!! وادخلي عاد عن الشمس ...!!
سحر اللي كنت متفشله من زياد بس في نفس الوقت حاسة بوناسة على الأقل هالمرة شافها بلبس حلو نوعاًما مو بملابس البيت ..::/ ان شاء الله يبه تروحون وترجعون بالسلامة .. (( وحبته على راسه وأشرت لـ ندى باي باي ))
بس ما أمداها تبعد مسافة الا ورجعت تركض لأبوها لما توجست شي بقلبها وهالشي ماتحب تشوفه ولا تحب تفكر فيه حتى ... خافت من ان المواقف اللي فاتت ترجع وتتكرر ... ركضت لأبوها اللي كان بيطلع ::/ يبـــــــــــــــــه ..
وقف أبوها مستغرب ::/ هلا ..!!
قربت له سحر ووجهها زادت حمرته عن قبل ورجفة يديها موجودة ::/ يبه بطلب منك طلب قول تم ؟؟
ابتسم ابو مشاري لها ::/ آمري يا كامري ؟؟
ضحكت ندى وابتسمت سحر على روح ابوها الشبابية قربت منه اكثر ووقفت على أطراف أصابعها وحطت شفايفها بأذنه وهي تهمس ::/ تكفى لو كان عندك لي خاطر لاتعصب ولا تكدر عليهـ ـ ـ ـ م..!!
ورجعت لوضعها الطبيعي وانتظرت ان ابوها يعقد حواجبه ويناظرها بعصبية لأنها تدخلت في أشياء ماتعنيها ... بس لما مرت ثواني تجرأت وحطت عينها بعين أبوها اللي ابتسم لها .. وهو يقول ::/ كم عندي من سحر ؟؟؟
والتفت وطلع تاركها هي وندى ... قربت لها ندى ومسكتها مع يدها ::/ وش قلتي له ؟؟؟
ابتسمت سحر ولا زال موقف ابوها من تدخلها مشوش تفكيرها ومستغربته ::/ ولا شي ؟؟؟ ابو وبنته تحشرين نفسك بينهم ليش ؟؟
ضربت كلمة سحر ندى في الصميم ... تحشرج حلقها بالغصة وهي تسمع هالكلمة واصفرت ملامحها وبهتت ابتسامتها .. حاولت ان ملامحها ماتتغير بس ما قدرت الكلمة أثرت فيها ...!! مهما يكون هي تحس ان سحر اختها وعمها ابوها ..!! ليش تجي هي بكلمة تحطم كل شي وتحط بينهم حواجز وتذكرها انها لازالت بنت عمها ومو اختها ..!!
انتبهت سحر للألم اللي سببته بكلمتها اللي ماقصدتها لبنت عمها واختها وحبيتها،،، قربت منها و عيونها تلمع وحضنتها..
سحر ::/ والله مو قصدي ؟؟ قسم بالله اني كنت امزح ؟؟ كنت بقلدك لما قلتي لي اليوم أخو وأخت انتي وش حشرك بينهم ؟؟؟ بس والله هذا اللي كنت اعنيه ..(( وواجهتها وهي ماسكتها مع لحيتها ))
ندى اللي تغيرت ملامحها بسبب كلمات سحر::/ عادي سحورة ماصار شي وانا اصلا ما أقدر ازعل عليك تعرفيني (( وضحكت ))...
سحر وهي تبي تصلح اللي خربته ::/ وبعدين وش هالأسرارالخطيرة اللي بيني وبين أبوي أنا كل علومي عندك .. وإذا كان على اللي قلته تو .. (( و وردت خدودها )) فـــ عادي قلت له لا تعصب ؟؟؟
ضحكت ندى على بنت عمها الحنونة وودعتها وطلعت رايحة لأخوها ... ورجعت سحر للمكان اللي جت منه ...
طلع ابو مشاري علشان يسلم على زياد ،،، ضحك عليه بقلبه لما شافه متلخبط ومنحرج من الموقف ،، لكن مثل العادة ما وضح هالضحكة و الجمود هو اللي كان مرسوم على ملامحه الخارجية ...
قرب زياد لعمه وهو مستحي منه لأنه دخل عليهم من دون احم ولادستور ...
زياد وهو يصافح عمه ::/ هلا والله عمي كيف حالك ؟؟؟
صافحه ابو مشاري ::/ نحمد الله على نعمته وعافيته ...!! أشوفكم طالعين وين العزم ان شاء الله ؟؟
تلخبط زياد وتلعثم وماعرف وش يقول ،، مايقدر يكذب لأن عمره ماكذب على عمه في شي ودائما مايقول له الا الحقيقة ...!! ولا يقدر يقول الحقيقة لأنه مابعد استعد لها ..!!
زياد وهو متلعثم ::/ أبد مشوار صغير بوصل له انا وكنت بآخذ ندى أشاورها عليه ؟؟ تعرف الحريم أدرى بهالأمور ...
ابتسم له عمه بجدية :::/على حسب مشوارك نعرف من الأصلح للمشاورة ...
ابتسم زياد برهبة من عمه وحب يغير الموضوع علشان مايضغط عليه أكثر ::/ أجل ماشين للخرج ان شاء الله ..!!
ابو مشاري وهو عارف لولد اخوه ::/ ايه بأذن الله بنمشي الآن ... وراجعين بالليل ان الله أراد.. يعني ماراح نتأخر ... (( وطالعه بنظرة مخيفة )) وانتم ان شاء الله ماراح تتأخرون عقبي ؟؟؟
قرب زياد وحب راس عمه ::/ اكيد طال عمرك ماراح نتأخر ...!!
سلم عليه وودعه واستأذن منه لما شاف ندى اخته طلعت وركبت السيارة ... دار على نفسه وترك عمه وراه .. وأول ماختفى طيف عمه عن نظره تنفس الصعداء ورجع الدم لوجهه بعد ما كان متجمد في عروقه ؟؟؟؟
---------------------------------
اليوم على الغداء كان معهم جدهم وجدتهم اللي ماصدقوا خبر يجي حفيدهم علشان يشوفونه ويشبعون نظرهم منه ... تغدوا معهم وبعد الصلاة تركهم ابو عبد الرحمن لأنه في هالوقت يجتمع مع شياب الحارة ويتخذون لهم مجلس ويجيبون لهم قهوة وشاهي ويجلسون هناك لحد ما يقرب المغرب ....
نزل ابو عبدالله من السطح وعلى ظهره شايل مهند وكانوا طالعين للسطح يأكلون الأرانب ويلعبون معها شوي ... لما وصل لاخر درجة وقف وهو يضحك لمهند علشان ينزل من ظهره بس لما رفع راسه تقابلت عينه بعين أسامة اللي كان شايل بيده صينية الكيك ويمشي ورى أمه اللي بيدها صينية الشاهي ... أول ماجت عين أسامة بعين أبوه شالها بسرعة ومشى وكأنه ماسوى شي... مستغرب تعامل أبوه معه من قام الصبح ... مو بالعادة ابوه يعامله بهالجفاء والقسوة ؟؟؟ يعني لو على الأقل طلعت النتائج كان قال مو مشكلة يمكن انه نتيجتي ما راقت له ... ؟؟ بس عاد ماطلعت ؟؟؟
قرب للطاولة ونزل الصينية من يده وجلس على الكنبة جنب أمه ... رفع رجوله وتربع وطلع جواله من جيبه وبدأ يحوس فيه ويلعب ويفرج امه على البلوتوثات اللي معه .. كان تقريبا شبه منسدح على كتفها وهو ماسك جواله قدامها ....!!
الكل كان متواجد بالصالة .. عذا وسارة كانوا جالسين مع عبدالله ويطالعون في الكاميرا وام عبدالرحمن تطالع التلفزيون وبيدها بيالة الشاهي .. ام لمياء فـ كانت جالسة جنب أسامة اخوها .. والكل منسجم بشغله وسوالفه ....
لحد مادخل عليهم ابوهم وهو ماسك مهند مع يده كان مبتسم ويسمع كلام مهند عن الأرانب وتخطيطاته بكل سعة صدر ... لكن لما رفع عينه وشاف أسامة تجهم وجهه من جديد ورفع حاجبه بمعنى الإزدراء والتقليل من الشأن ... وقرب وجلس جنب امه يعني على يمين الصوفا اللي جالسين عليها أسامة وامه وقدام عبدالله والبنات ...
تنهد واخذ البيالة من يد لمياء وحطها قدامه ...
التفتت عليه الجوهرة وهي متضايقة من وضعه اليوم ؟؟؟؟ من صحى الصبح وهو مو طايق يحط عينه بعين أسامة ولا حتى يكلمه ،، ولما جاء أسامة يصبح عليه رده عنه... هي ممكن تتحمل أي شي الا ان علاقة عيالها بأبوهم تكون بهالصورة ؟؟؟ وخصوصا انها ماتعودت منهم هالتعامل الجاف والقاسي ؟؟؟لكن لما شافت ابو عبدالله ارتاح بجلسته وهدت ملامحه لفت عنه ورفعت بيالتها ...
أسامة وهو يكلم عبدالله ::/ الحين الى الآن وانتم تشوفون الشريط اللي أمس ؟؟؟ والا خلونا نشوف معكم ؟؟
عبدالله وهو يشرح لأخواته ويعلمهم وش الأشياء اللي صورها ::/ إيه حق أمس ما بعد خلصنا (( والتفت على سارة )) شوفوا هذي شقتنا هناك ... وهذا المطبخ حقنا ؟؟
أسامة وهو يحوس بجواله ::/ طيب عطني جوالك شوي وافتح قفله ؟؟؟
رمى له عبدالله الجوال بعد مافتح القفل لكن للأسف ماكان حريف في التصويب و ضرب الجوال بكتف لمياء وطاح على الطاولة اللي قدامها وانسكبت محتويات البيالة على الطاولة .. لكن لمياء تداركت الموقف وسحبت مناديل من العلبة اللي جنبها ومسحت اللي انسكب ...
التفت عليه ابوه والعصبية واضحة بعيونه ::/ من الأدب أنك تقوم وتجيب شغلك بيدك ؟؟ مو تتأمر على أخوك ؟؟؟ والنتيجة شوف ؟؟؟(( وأشر على الوساخة )) بالإضافة لأن أختك تعور كتفها ؟؟؟
ابتسمت لمياء بحنان وهي تطالع أسامة ::/ لا يبه عاد مو لهاالدرجة ماتعورت بالحيل ؟؟؟
التفت أسامة على أبوه وهو فاض به الكيل ::/ عاد أنت ليه تلقي اللوم علي الحين من رمى الجوال انا والا هو ؟؟؟
صر محمد على أسنانه ::/ لا ترفع صوتك بوجهي ؟؟؟؟ وبعدين لو انت ماطلبت منه كان ما رماه لك ؟؟؟؟
التفتت عليهم ام عبدالرحمن وهي متكأة على عصاتها ::/ يعني بتتهاوشون قدامي ؟؟؟ هو يرفع صوته بوجهك وانت ترفع صوتك بحضوري ؟؟؟؟
التفت لها محمد وهو يتنهد ::/ السموحة يمه بس هو صاير مو طبيعي ؟؟؟ يبي من يأدبه من اول وجديد ؟؟؟
ضحك أسامة باستهزاء وقهر ::/ هه وش سويت انا علشان هذا كله ؟؟؟
التفتت له امه وضغطت على يده يعني اسكت ....
سفهه ابوه ومارد عليه .. وبعد دقيقة صمت رجع كل واحد لوضعه الطبيعي اللي كان عليه من قبل بس أسامة كانت الغصة خانقته مايدري وش غير ابوه عليه ؟؟ ولا يدري وش الذنب والجرم اللي اقترفه ودفع أبوه انه يعامله بتمييز عن أخوانه ؟؟؟؟
مد ابو عبدالله بيالته الفاضية للمياء علشان تصب له .. لكن تلقفها اسامة قبلها عل وعسى ان افكاره عن ابوه خاطئة ... لكن انصدم لما سحب ابوه البيالة من يده وحطها بيد لمياء وهو يطالعه باشمئزاز ....!!
بلعت لمياء ريقها ومسكت البيالة وعينها على اخوها اللي أثرت فيه هالحركة الغير متوقعة من ابوهم ؟؟؟
أسامة بصوت مبحوح ::/ طيب قل وش سويت علشان هذا كله ؟؟؟؟؟؟
التفت له ابوه ::/ انت ادرى باللي سويته ومايحتاج اقوله ؟؟؟؟
أخذ أسامة نفس عميق ::/ لا ما اعرفه قل لي انت انا وش سويت ؟؟
تكلم ابوه بعصبية خفيفة ::/ لو سمحت لا تكثر الكلام معي ؟؟؟ لأني الآن ما أتحمل أي كلمة وممكن أعصب ؟؟؟؟
ام عبدالله ماقدرت تتحمل الوضع أكثر لأنها مو فاهمة شي ::/ هو صادق يا محمد وش سوى علشان هذا كله ؟؟؟ طيب قل لنا احنا اللي مانعرف ؟؟؟
طالعها ابو عبدالله ::/ الجوهرة خلك بعيدة عن الموضوع ؟؟؟
طالعته ام عبدالله باصرار ::/ لا ماراح أبعد عن الموضوع ؟؟؟ ولازم تشرح لي اللي قاعد يصير .. علشان نتفاهم ؟؟؟
ابو عبدالله بنظرة ازدراء ::/ أكيد ..!! مو أسامة الطرف الثاني بالقصة يعني لازم توقفين معه ؟؟؟ هو الحق واحنا الباطل ؟؟؟؟
تكلمت سارة بعفوية ::/ وأخيــــــــــــــــــــــــــــراً يبه حسيت ان أسامة خاطف امي منك ؟؟؟
التفت عليها أبو عبدالله وطالعها بنظرات نارية....
تنهدت ام عبدالله بهدوء والتفتت على أسامة ::/ انت وش مسوي ؟؟؟
أسامة بنبرة انكسار بس يقاوم ::/ والله ماادري وش سويت ؟؟؟ قسم بالله ......
قطع عليه ابوه بعصبية ::/ لا تحلف ولا تقسم ولاتجعل الله عرضة لأيمانك ؟؟؟
التفتت له ام عبدالله وبصوت عالي وعصبية اول مرة تستعملها قدام عيالها::/ اذا ماتبغاه يقول ،،، قل أنت طيب وريحني ؟؟ ترى هاللي يصير مايعجبني ؟؟ ومن اليوم لا فطوري فطور ولا غدائي غداء كأني أتجرع علقم والسبب أنت وإياه ؟؟؟ ريحوني وتكلموا ؟؟؟
ضغط ابو عبدالله على فكه لحد ما ابيضت عظامه وطالعها بنظرات شزرة ::/ وترفعين صوتك علي والسبب هو ؟؟؟؟؟ الله يالدنيا ........!!
ام عبدالله بألم ::/ مارفعت صوتــــــ ــ ـ ـ
قاطعها ابو عبدالله بصراخ ::/ لا رفعتيه يا ام عبدالله ...!! رفعتي صوتك بوجهي علشان أسامة ؟؟؟؟ ولدك اهم من أبو عيالك ؟؟؟؟؟ ودلعك هذا كله شوفي وش طلعت نتيجته ؟؟؟
و صمت الجميع .................................................. ......!!
لكن عذا ماقدرت تشوف الوضع المتوتر بين أمها وأبوها واخوها .. دمعت عيونها غصب وهي تشوف امها منكسرة وتتألم.. قامت من غير وعي وجلست جنبه وحطت عينها بعين أبوها وهي غرقانة دموع بس تنتظر الأذن علشان تنزل :::/ يبه حرام أمي وش ذنبها ؟؟؟؟ وبعدين تكفى لا تتكلم بهالطريقة البشعة ترى مااحبها ؟؟؟؟ خلاص اهدأ وخلنا نتكلم بصوت هادي ؟؟؟؟ تكفى ؟؟؟(( ومسكت يده بتوسل ))
سندت ام عبدالله ظهرها على الكنبة والتزمت الصمت ولا فتحت فمها بكلمة ...
أما ابو عبدالله فـ قام من عندهم وتركهم وراه مصدومين وطلع للساحة الخارجية ... كان داخلياً متألم من اللي صار من دقائق .. بس كان لازم يصير علشان مصلحته ..!!
لبس شبشبه وطلع للزراعة اللي ببيتهم واحواض النخل علشان يسقيها ... توجه خلف البيت وسحب الخرطوم من مكانه ومشى فيه للموقع المطلوب .. نزله على الأرض ورجع مرة ثانية لنفس المكان علشان يفتح المويه .... كان الخرطوم وخزان الموية مقابلين مباشرة لباب المطبخ الخارجي ....
فـ لما تقرب سمع صوتهم وهم يتناقشون بحدة .... ما حب يفوت على نفسه هالفرصة فتقرب شوي من الباب علشان يتضح له الصوت والصورة ...
شاف أسامة واقف ومتسند على الثلاجة ورافع رجل والثانية متكأ عليها وعاقد يدينه على صدره .. وكأن فيه غصة بس رجولته ماتسمح له ينزل الدموع ويريح خاطره ..
أما ام عبدالله فـ كانت تشغل نفسها وتفرغ عصبيتها بالمواعين اللي بيدها .. كانت تشيل الكيك وتحطه بعلبة للثلاجة والبيالات توديهم للحوض ....
أسامة بتوسل أخيرر:::/ يمه وانا وش علاقتي ؟؟؟
ام عبدالله بصوت مبحوح ::/ الحين ابوك معصب علينا كلنا والسبب انت ؟؟؟ وحضرتك لا راضي تقول لي شي وأبوك مو راضي يتكلم ؟؟؟ وانا اللي ضعت بينكم ؟؟
أسامة وهو يلحقها ::/ اقسم لك بالله اني ماادري وش سويت وخليته يعصب ؟؟ يعني حتى نتيجتي ماطلعت كان أقول النسبة مااعجبته ؟؟
التفتت له ام عبدالله وواجهته وجها لوجه :::/ الحين ماادري من أصدق ؟؟؟
أسامة ::/ صدقيني أنا ؟؟؟
ام عبدالله بعصبية ::/ يعني أكذب أبوك ؟؟؟ ماهقيتها منك ؟؟؟
أسامة بعصبية أكبر ومسك يدها ::/ خلاص تعالي نطلع له يا قاتل يا مقتول ؟؟؟ لا زم يقول لي أنا وش سويت علشان ماتزعلين مني بدون سبب ؟؟
ومشوا طالعين من المطبخ ....
انتبه ابوعبدالله لنفسه وانهم الحين بيطلعون له .. بس هو مايبغاهم يجون له برى يبي يواجههم قدام الكل أحسن وخصوصا انه اشتاق لأيام اول ...
علشان كذا مشى متوجه للصالة .. راح وهو يسرع خطواته علشان يسبقهم .. واجه باب الصالة وفتحه ودخل .. ومشى بخطوات رزينة بعد ماخذ نفس عميق وتوكل على الله،،
انتبه ابوعبدالله لنفسه وانهم الحين بيطلعون له .. بس هو مايبغاهم يجون له برى يبي يواجههم قدام الكل أحسن وخصوصا انه اشتاق لأيام اول ...
علشان كذا مشى متوجه للصالة .. راح وهو يسرع خطواته علشان يسبقهم .. واجه باب الصالة وفتحه ودخل .. ومشى بخطوات رزينة بعد ماخذ نفس عميق وتوكل على الله،،،،،
تقابلوا مع بعض وكانوا اسامة وام عبدالله طالعين من الممر اللي يودي للمطبخ وابو عبدالله واقف عند الدرج يعني عند مدخل الصالة مباشرة والجلسة قدامه وجالسين فيها باقي العيال ...
أول ماوقفوا أسامة وامه قدام ابو عبدالله اللي كان عاقد حواجبه .. تلعثم أسامة وماعرف وشلون يتكلم مع أبوه وهو معصب فـ مباشرة حول نظره لأمه وكأنه يستنجد بها ...
ام عبدالله اللي تلقت الرسالة من ولدها خذت نفس عميق وبصوت هش بس عالي شوي وكأنها تأمره::/ محمد هي وحدة من الثنتين ؟؟؟ يا تقول لنا اللي صاير ؟؟؟؟ يا إما لا تعامل ولدك بهالطريقة على الأقل قدامي ؟؟؟
طالعها ابو عبدالله وبنبرة استهزاء ::/ لا ليش ما حضرتك تتقدمين وتضربيني ؟؟؟
سكتت ام عبدالله ومانطقت بـ ولا كلمة الجمتها الصدمة ؟؟؟ وخنقتها العبرة ..
لكن ابو عبدالله تدارك الموقف وقال بصوت رجولي عميق ::/ أنت مصدقتني والا لا ؟؟
رفعت ام عبدالله عينها بعينه ::/ مصدقتك .؟؟؟ بس انت قل ..!!
ابو عبدالله ::/ واذا قلت اني ماراح أقول بس ولدك أسامة غلطان والسبب دلعك له وانا الحين أأمرك بأنك ماعاد تكلمينه لحد مايحس بغلطه ويعتذر ؟؟؟
اسامة باعتراض ::/ ماسكين علي تدلعه وتدلعه ؟؟؟ والله انها تعاملنا كلنا سواسية بس سارة السوسة هي اللي مدخلة ببالكم هالفكرة ؟؟؟ وبعدين هذا أنت تدلع سارة اكثر منا وواضح عليك هالشي ومع ذلك ما ناقشناك ؟؟؟؟؟
ابو عبدالله بصوت عالي ::/ انا ماادلع احد وانتم كلكم عيالي ؟؟؟؟ وبعدين مليون الف مرة اقول لك لا ترفع صوتك بوجهي ؟؟؟
ام عبدالرحمن بصوتها الرخيم ::/ محمد اكسر الشر ...!!واذكروا الله........!!
ابو عبدالله بعد تنهيدة ::/ لاحول ولاقوة الا بالله ،،،، هاه وش قلتي مصدقتني والا لا ؟؟؟ بتكلمينه عقب اليوم والا لا ؟؟؟
سكتت ام عبدالله .... أسامة بتوسل ::/ يمه تكفين قولي لا ؟؟؟ وشلون ماتكلميني يعني من أسولف معه ؟؟ وبعدين انا ماسويت شي غلط أستاهل عليه هالعقاب القاسي؟؟؟
ام عبدالله وعينها بعين زوجها ::/ أبوك يقول انك غلطان وكله بسبب دلالي اللي ماأشوفه ؟؟؟ فـ إما انه يقول لي السبب ؟؟؟ و الا ذنبك برقبته بنسمع كلامه ونقاطعك ونشوف هل بيتكلم والالا ؟؟؟
انصدم أسامة من أمه وردة فعلها الضعيفة وانقهر من ابوه وتصرفه الطفولي السخيف ....
تركهم من دون ما ينطق بحرف وركب الدرج طالع لغرفته وهو يتحرطم والعبرة خانقته على الظلم اللي شافه ....
ابتسم ابو عبدالله براحة ومشى علشان يجلس مع الباقين ومشت وراه ام عبدالله على أمل انها تسحبه في الكلام لحد ماينطق ....
لكن عذا اللي ماقدرت تتحمل اللي يصير مشت لأبوها ودموعها على خدها ؟؟؟ مهما كانت فعايل أسامة فيها بس تحبه وتدري انه يحبها وماترضى يصير له كل هذا ؟؟؟ وهي تعرف وش كثر هو متعلق في امها ... مسكت أبوها مع يده وهو يجلس وترجته ::/ يبه الله يخليك علشاني تكلم قول وش سوا ؟؟؟ والله حرام عليك ؟؟؟
ابو عبدالله بجزم ::/ خلااااص انتهى الموضوع ....!!
جلست ام عبدالله في مكانها الأول وهي ساكتة وما تهمس .....
وبعد دقائق فاجئها محمد لما سألها ::/ متأكدة أنك ماراح تكلمينه علشاني ؟؟
أم عبدالله بصوت متألم ::/ إيه متاكدة ؟؟؟
أبو عبدالله ابتسم والتفت على سارة::/ روحي نادي أخوك من فوق ؟؟؟
سارة وهي تشهق ::/ مجنونة أنا أروح ... كان تصلوّن علي اليوم وتقبروني ؟؟؟؟ وأنا مابعد تمتعت بحياتي شف أحد غيري ؟؟
ابو عبدالله بعصبية ::/ ســــــــــــــــــــــــــارة ...!!
انتفضت سارة بمكانها ::/ والله أنا صادقة يبه ...
قامت عذا بسرعة علشان ما تصير هوشه ثانية ::/ خلاص أنا بروح ...!!
--------------------------------