مر عليهم أسبوعهم هذا بزحمة الدوامات فيه والتجهيزات القائمة على قدم وساق استعداداً لطلعتهم نهاية الأسبوع .. كانوا مقررين ينامون بالمزرعة الإربعاء والخميس وبالجمعة يرجعون إن شاء الله ..
عذا وأمها كانوا كل يوم يا إما يروحون السوبرماركت والا بالمطبخ يضبطون التجهيزات لأن هالمرة الطلعة عليهم هم ولازم يجهزون كل شي من الألف للياء خصوصا أن المزرعة فاضية تماما من كل شي .. إلا البيت وأثاثه البسيط ..
أما سارة فكانت عايشة وناستها بشكل ثاني .. كانت كل يوم هي وأبوها يطلعون للسطح علشان يجهزون مكان وبيوت لحيواناتهم اللي بيجيبونها من المزرعة .. يعني مثل باقي الأرانب وكذلك الهمسترات اللي بيطلعون بيتهم فوق .. ومكان خاص للسلاحف ... يعني باختصار كانوا مسوين حديقة حيوانات مصغرة ...
يوم الثلاثاء بالليل كانت عذا تتكلم مع ندى بخصوص الطلعة ..
عذا بحماس ::/ ندى ترى بنام هناك الى يوم الجمعة ..
ندى بفرحة ::/صـــــــــــــــــــــــــــدق ..!! ياحبي لها مزرعتكم والله انها وسيعة صدر حرام ليش أبوك باعها كنا نستانس فيها بالحيل ..
عذا بحزن ::/ ماادري عنه يقول محتاج فلوسها في شغل ..!! عاد إذا مااستفاد منها الحين متى بيستفيد ..؟؟
ندى ::/صادقة .. اهم شي عمي وشغله والا المزرعة تتعوض ان شاء الله ..
عذا باستهبال ::/ هالمرة دوركم انتم تشترون لنا مزرعة مو صرتوا من أصحاب الأملاك ..
ندى بغضب مصطنع ::/ أشوفك داخله على طمع يابنت محمد ؟؟ (( وبدلع )) وبعدين ولا يهمك أصلا حتى لو اشترينا مزرعة ماراح نشتري زي حقتكم بنشتري وحدة أفخم وأكبر وأحلى يعني زي اللي تشوفينها بأفلام كرتون ... ومع ذلك ماراح تأثر على ميزانيتنا ..
عذا تضحك ::// شوي شوي على عمرك طاح نصك وانت تتفشخرين ؟؟ المهم سحر بنت عمك بتجي معك ؟؟
ندى ::/ إيه الظاهر انها بتجي .. لأنها قامت تسألني وتستفسر عن نوعية الطلعة .. هل هي عادية والا رسمية عاد افرحي انا مدحتكم لها وقلت بس عليك الونااااااااااااااااااسة كلهم فلة وسعة صدر ..
عذا تضحك ::/ ههههه بعدي والله بنت خالي تحسن السمعة .. المهم يعني كلكم بتجون ؟؟
ندى بتشكيك::/ مرت عمي ماأظنها تجي يعني لأن مو كل مكان أو مزرعة تروح لها؟؟
عذا بغضب ::/ وش قصدها يعني مزرعتنا مش قد المقام ؟؟
ندى ::/ ياحليلك هي عندها وسواس نظافة مخيف وبعدين لاتعصبين علي ..!.! مزرعتكم مش قد المقام عندها هي ..!! بس أنا تسوى الدنيا ومافيها ..
عذا بابتسامة ::/ ياحبي لك والله .. يعني الحين من راح يجي؟؟
ندى ::/الله واكبر عليك من كثرنا بس أنا وسحر ..
عذا ::/ يعني مو كلكم بتجون ؟؟
ندى وابتسمت ::/ وش عندك انت ..!! لا حبيبتي مو كلنا انا وسحربس ويمكن يجيبنا مصعب والا مشاري لأن زياد ماراح يقدر يجي يقول انه لازم يتدرب بالشركة ويستغل الخميس والجمعة ..
عذا باندفاااع ::/ يوووووووووووه مو على كيفه ؟؟ هالخميس خليه يطلع معنا والخميس الجاي يتدرب على كيفه (( وبنبرة توسل )) تكفين ندى ؟؟
ندى ::/ عذا على بالك ما أقنعته .. أقولك حاولت معه بشتى الطرق ولا رضى يقول مالي حاجة في المزرعة والطلعة يعني انتم وهو متعود يشوفكم دائما ومافيه ناس من زمان ماشافهم والا أغراب علشان يسلم عليهم ويقول الشركة أهم لحياتي ومستقبلي من هالطلعة ..
عذا وودها تصيح من كلام زياد::/ يعني مزرعتنا والطلعة معنا مو مهمة بالنسبة له ولازم يكون فيه وجوه جديده..؟؟
ندى ترقع وتبتسم ::/ لالا مو قصده .. بس هو قال أنه مو مهتم للطلعة كثير لأنه ما أبطى رايح للمزرعة بالإضافة إلى أن عنده شغل مكلفه عمي به لازم يسويه وانت عاد تعرفين هو في فترة لازم يثبت وجوده ...
عذا والعبرة خنقتها ::/ بس جو المزرعة غير يعني بيغير مكان ويستانس ومنها نشوفه ..!!
ندى ::/ عاد ماتدرين يمكن يغير رأيه ويجي .! وبما أني ماقدرت أقنعه أبقول لسحر بنت عمي تتدلع عليه وتقوله يجيبنا عاد هو ما أظن بيرفض لها طلب ..!!
عذا وخلاص ودها تصيح::/ الله يعين .. يالله عاد ندوووش ماأطول عليك أبنزل أشوف أمي وش عندها ..
ندى وهي تضحك ::/هههههههههههه زين يالله مع السلامة وسلمي على عمتي وسارونة ..
عذا::/ إن شاء الله يوصل باي ..
سكرت عذا وهي منقهرة من تصرفات زياد .. (( السخيف .. النونو ،، والله ماتسوى علي يزعل .. هذا وهو ماصار لي شي هذي سواته أجل لو صدق صابت شكوكه وش كان بيسوي ..؟؟ بس أنه سخيف حده يعني بيستمر على زعله ؟؟لا وقال إيش ؟؟ مايرفض لها طلب .. سخيف سخيف سخيف .. لكن يشوف واللي بيعبره والا يعطيه وجه .. أنا دواه )) تنهدت عذا من كلام ندى اللي سمعته لما قالت لها أن زياد لازال عاتب عليها ومقهور من اللي سوته واللي صار لها ،،،،واللي زاد الطين بله كلمتها الأخيرة أن سحر بتتدلع عليه ...!! ومسحت دمعة قهرها ونزلت من على سريرها طالعة من غرفتها نازلة تحت ..
توجهت للصالة على طول بس سمعت فيها أصوات غريبة ولما حاولت تتعرف على الصوت .. اكتشفت أن زياد عندهم بالبيت وجالس مع اهلها بالصالة .. علشان كذا لوت بوزها وراحت للمطبخ (( هه لا وجاي عندنا بعد وأنا آخر من يعلم ..!! قهر )).. تقابلت مع لمياء هناك وهي تصلح القهوة والشاهي لضيفهم .. عذا وهي تآخذ الكاس وتصب لها مويه ::/ وش تسوين ؟؟
لمياءوهي واقفة قدام الفرن::/ أصلح شاهي لعريس الغفلة ..
عذا وهي تكب عليها الباقي من المويه ::/ غثيثة ..
لمياء تضحك ::/هههههههههههههههههههه يعني عارفة أنه موجود وتسوين نفسك غبية .. أقول تعالي سوي له قهوة وشاهي فاضية لكم انا شغالتكم ؟؟
عذا وهي تقعد على الطاولة وتآكل من صحن التمر ::/ مو لازم تسوين له شي .. هو ماجاء يتقهوى ترى عندهم ببيتهم خير ورزق ..
لمياء وترفع حواجبها بوجه عذا ::/ صدق عاد .. على بالي جاي من الربع الخالي ..
عذا تضحك ::/ها ها هاهاهاها .. أنتي قد أحد اعترف لك أنك ثقيلة دم ؟؟
لمياء وهي تحرك السكر ::/ اللي بيعترف لك انك بيبي بيعترف لي أني ثقيلة دم..!!وادي احنا بنستنا ..
سكتوا شوي عن الكلام ورجعت عذا تقول ::/ ندى وسحر بس بيجون بكرة مرت عمهم ماراح تجي ..
لمياء ::/ كنت متوقعة ..!!!
عذا ::/ حتى زياد ماراح يجي ..
لمياء بنص عين ::/ وانت وش تبين فيه يجي و الا مايجي ؟؟؟
تجاهلت عذا كلام لمياء وكملت ::/ يقول عنده شغل .. وهو ما أبطى شايف المزرعة ..
ابتسمت لمياء ::/ حجتهم المعروفة .. عندنا شغل ..!! وانت من قال لك ؟؟
عذا وخنقتها العبرة لما تذكرت كلام ندى::/ ندى تقوله ..!!
لمياء وهي تشوف أختها متأثرة من زياد ::/ اسألي أبوي إذا كان زياد بيجي والا لا ؟؟ أكيد انهم تكلموا في الموضوع ؟؟
عذا وهي تقوم وعيونها ودها تدمع ::/ مو لازم يجي ..
طلعت عذا بسرعة من عند أختها ومشت بسرعة بتطلع فوق علشان تآخذ راحتها في التفكير والصياح ...
هذي هي عذا وهذي هي مشكلتها .. حساسة ومن أي شي ممكن تنجرح وتتأثر،، ماتتحمل أي تصرف مو حلو من الناس اللي تحبهم وعلى طول دمعتها تدل طريقها على خدها ،،، يعني يكفي أنها تعرضت لحادث بروحها وهو عاتبها وضيق خلقها وفي الأخير وضح لها رضاه وبالنهاية يصير ما رضى ولاهم يحزنون واللي سواه كله مجرد تمثلية علشان تسكت.. بشكل عام الواحد لما يشوف دموع عذا على طول يتنهد لأنها بسرعة تصيح وماتقدر تناقش والا تتكلم إذا وصلت هالمرحلة وهي الله يهديها ماتآخذ وقت وتوصل لها ،،،حتى لو أبوها وهويناقشها في أي موضوع ويرفع صوته عليها شوي تلقون عيونها على طول تمتلي دموع وتبدأ تخنقها العبرة ... ماأدري هل هذي حساسية والا دلع والا كل الثنين مجتمعين ...؟؟
-------------------------------------------------------------------------------
الإربعاء بعد الظهر الكل مدهر ومحتاس اللي يرتب الأغراض بالشناط واللي يشحنهم بالسيارة حتى مهند ولد لمياء مدّهر معهم ،، لمياء كانت نايمة عند اهلها من يوم الثلاثاء لأنها كانت بتروح معهم وفهد بيلحقهم بالليل بعد مايخلص دوامه ..
أسامة وسوراج ركبوا الونيت اللي محملين فيه أغراضهم .. أما البنات ركبوا مع أبوهم وامهم في الاند كروزر حقتهم .. ومشوا متوجهين للمكان المطلوب .. كانوا مستانسين في السيارة حدهم ،، ومهند ولد لمياء مسوي لهم جو ..و أول ماقربوا للمنطقة اللي فيها مزرعتهم استانسوا اكثر ..
سارة بلهفة وتصرخ ::/ يبه يبه تكفى وقفنا هنا وبنزل أنا وعذا نتسابق من يوصل للمزرعة قبل ؟؟
عذا بحماس ::/ ايه يبه تكفى الله يخليك .. قول تم ..
أبو عبدالله يضحك ::/ ترى باقي كثير على مانوصل .. يعني بتتكسر رجولكم
سارة باندفاااع ::/ لا والله يبه شف مزعتنا هذي هي .. يالله عاد يبه لاتصير نحيس ..
ابو عبدالله يحاول يغطي ابتسامته::/ بنت .. عيب عليك تكلميني بهالطريقة ..
سارة بتملل::/ يبه عادي خلك ديمقراطي .. هاه وش قلت ؟؟
ابو عبدالله ::/ قول الله ابرك ..
عذا وتقرب رأسها من الفتحة الأمامية ::/ يبه تكفى طلبناك لا تردنا بسرعة الله يخليك قبل لا نوصل ؟
ام عبدالله اللي اشفقت عليهم ضحكت ::/ههههههههههه حرام عليك محمد ماتسوى عليهم نزلهم وماعليهم الا العافية ان شاء الله ..
ابو عبدالله وهو يناظر زوجته ::/ حكم القوي على الضعيف ..
وقف سيارته ::/يالله انزلوا وشوي شوي على اعماركم واحنا بنسبقكم وننتظركم هناك ..
لمياء وهي متسندة وكأنها منسدحة::/ سويرة القشرى انتبهي لعصاقيلك لا تطلع وتفضحينا و ترى مالنا حاجة بكرة نشوف صورتك دعايات على سباق الثيران .. خخخخ
الكل ضحك .. ماعادا سارة ::/ على الأقل أنا سباق ثيران غيري بيحطونه واحد من ضمن مسببات زلازل تسونامي ..
لمياء بخفة ::/ ها ها ها نكتتك مرة حلوة ..
سارة وهي تسكر الباب وراها ::/ أدري وماطلبت رأيك ..
نزلوا البنات ومشى أبوهم رايح للمزرعة بس قبل حرك الكفرات بقوة على التراب علشان يغبرعليهم وهذا اللي حصل والغبار كله جاء بوجه سارة اللي احمر وجهها من الغيظ وهي متاكدة أن لمو لها يد في السالفة ..
عذا تهدي الوضع ::/ ريلاكس سارونة احنا جايين ننبسط مو نتضارب ..
سارة وهي تنفظ الغبار عن عبايتها ووجهها ::/ أدري بس بتشوف والله لأوريها ..
عذا تضحك ::/ هههههههه الله حط كيدكم بينكم والا من أول انتم فريق وانا وعبدالله خارج الحسبة ..
سارة تضحك ::/ ههههههههههههههههههههههه صدقتي بس ليت عبدالله يرجع والله ماعاد اسوي به شي .. (( ونزلت راسها بحزن ))
عذا تغير الجو ::/ يالله تبغينا نبدأ من هنا والا نتقدم شوي ..
سارة بحماس ::/ لا وش اللي نتقدم ..!!؟ من هنا يالله .. بسم الله بدينا ..
رفعت عذا عبايتها وربطتها على خصرها وكانت لابسة برمودا جينز أسود وصندل أسود رياضي وشالت نقابها وربطته على رقبتها وخلت الطرحة عليها .. أما سارة فلفت العباية على خصرها وربطت الطرحة معها ووقفوا استعداد للسباق ..
....// واااااااااااااحد اثنييييييييييييييييييين ثلااااااااااااااااااااااااااااااثة
وانطلقوا الثنتين متوجهات للمزرعة .. سارة بحكم انها اطول وعصاقيلها على قولة لمياء أطول من عذا وخطواتها متباعدة قدرت تتجاوز عذا من البداية بس عذا مارضت لنفسها بالخسارة وبدت تشد على عمرها وبدأو يتحمسون أكثر وكل وحدة تسرع من خطواتها علشان تسبق بس كانت الأفضلية لسارة .. أما عذا فكانت تضغط على نفسها بقوة علشان تسبق وحست ان نفسها بيوقف من كثر الركض والغبار بس قاومت كل تعبها رغبة في الفوز..
أما سارة فما كانت تشوف شي قدامها الا بوابة المزرعة اللي لازم توصلها ..
طبعا كانت الغلبة لسارة اللي قدرت تهزم عذا في آخر لحظة وعذا كانت قريبة منها ووراها على طول يعني ماكان بينهم الا بضع خطوات بس للأسف سارة سبقت ..!! وأول مادخلوا مع البوابة راحت سارة وجلست على الكرسي الموجود عند الباب بتعب ،، أما عذا فتسندت على السيارة الواقفة قدام البوابة وهي تلهث ووجهها احمر من الحر ..
سارة وهي ترفع يديها وتمد رجولها :/ الفااااااااااااااااااااااااااااااااااائزة ساااااااااااااارة محمـــــــــــــــــــــــــــــــــد .. صفقة قووووووووووووووية ..
عذا تقهرها وتسوي إشارة على تحت ::/ أوووووووووووووووووووووووو
سارة تناظرها ::/ ياحلوهم المنقهرين ..
جلست عذا على شنطة السيارة ومو منتبهة هي حقت مين ::/ اسكتي والله لو رجلي ماتعورني كان سبقتك ..
سارة تضحك ::/هههههههههههههههههه العبي علي وخذيها حجة أصلا رجلك طابت الحين لك أسبوع وانت أوكيه ..
عذا :/ مهما يكن كان المفروض أنا أفوز بس أنت السبب ..
سارة وتشيل نعالها من رجولها ::/ أيه ايه المفروض بس لاتصيحين علينا ..
نقزت عذا من السيارة ورفعت صبعها لوجه سارة::/ سوييييييييييرة لا تقعـ ـ ـ ـ
قطع عليها كلامها لما طلع من سيارته وهو لابس ثوب وعليه نظارته الشمسية المغطية عيونه وشعره المرتب على ورى وقفله اللي مرتبه بشكل خيالي وسماره البرونزي طالع ناقع تحت الشمس وكان في إيده سلة الظاهر كان راجع ياخذها من السيارة.. فضل أنه يطلع لأنهم طولوا واقفين وشكلهم ماراح يروحون وإذا على سارة فهي مابعد تغطت عنه بشكل جدي بس المشكلة عذا اللي بدت تتغطى وخاف يحرجها .. وعموماً كذا وإلا كذا هو شافها وشبع منها وفز قلبه من يوم شافها داخلة وهي طايره تركض وعلى طول جت عند سيارته شاف شكلها اللي ماتغير من سنة ..!!
عذا هي نفسها عذا بشكلها الطفولي وبرائتها الحلوة وحضورها اللي يربكه ويخليه ينسى نفسه ووجهها المحمر من الشمس كل شي كوم وغمازتها اللي تطلع لما تبتسم كوم ثاني تذوبه وتخلي قلبه يغوص بين ضلوعه من حبه لها.....
زياد ويبتسم بخفيف وهو ينزل::/ لا أصلا هي الفايزة مو انت لأني متأكد أنك مسويه لها شي خلاها تتعرقل و ما تلحقك ..
عذا منصدمة و ما عرفت وش تسوي والا وش تقول والا حتى وشلون تتغطى ماتدري مصدومة من الفرحة والا لأنه شافها في هالموقف وهي شبه لابسة حجابها أو لأنه جاء وهي ماتوقعته قالت بصوت واطي هامس وهي لا زالت على رفعة أصبعها ::/ أنت جــــــــــــااااااااااي؟؟
زياد وهو يطالعها بكل شوق وحنين باين على صوته لأن النظارة مخفيه عيونه ::/ ومن قايل لك اني ماراح أجي ؟؟
سارة وهي تقرب لأختها اللي تهورت وترمي الطرحة على وجهها علشان تتغطى ::/ وانت وش دخلك ؟؟ يالله ماعندنا عيال يشوفون بنات ..
زياد يضحك ويقفل السيارة بالريموت::/ههههههههههههههه لايكون عاده نفسك ولد وانا ماادري..
سارة تضحك ::/ هههههههههههاااااااي لا وانت الصادق بنت بس مستولده حاليا إلى أجل غير مسمى ..
غطت عذا وجهها وضبطت نفسها وربكتها و راحت تاركتهم وهي تحس قلبها بيطير من الوناسة لأنه جاء وشافته .. بس تنكدت لما ذكرت كلام ندى (( يعني وش اللي ممكن يكون غير رأيه عقب أمس وخلاه يجي معقولة أبوي حلف عليه ؟؟ والااااااااا أكيد سحر قالت له ؟؟ يعني تدلعت عليه وتغنجت ؟؟ معقووولة ...!!)) تشجنت أعصابها بسبب الفكرة بس مشت ودخلت البيت وهي تفصخ عبايتها ووراها سارة اللي تناظرها بنص عين وملاحظة حمرة خدودها وارتباكها .. شافتها عذا بعيون مهددة عشان ماتقول لأحد باللي صار ..
فسخوا البنات عباياتهم ودخلوا للصالة شافوا أمهم وندى وسحر جالسين وشكلهم توهم واصلين دخلت عذا قبل سارة وحطت عينها بعين ندى وكانها تقول يالكذاااابة ضحكت ندى لأنها فهمتها وعرفت انها درت أن زياد جاي وسلموا على بعض
ندى ::/ يمه يخوف شكلك ؟؟
عذا وهي تضغط على يد ندى ::/ لأنك كذابة وقلتي مو جاي بس أكيد أنها هي قالت له صح ؟؟
ندى وما قدرت تتحمل وضحكت ::// هههههههههههههههههه بعلمك كل شي بس اول أنت قولي لي صح صحتي امس لما سكرتي مني ؟؟
عذا وهي تتلعثم وماودها تقول ::/ لا من قال ؟؟
ندى :/ ههههههههه أرجوك لاتكذبين علي ،،، وبعدين انا أقول ..
عذا بغضب بس بصوت واطي::/ أكيد بصيح ؟؟ يعني تتوقعين شي سهل اللي قلتيه لي ؟؟
ندى ::/ طيب آسفة ..! وترى كل اللي قلته كذبة .. ويكون في علمك ترى زياد هو اللي معلمني عن الروحة قبل لاتقولين لي أنت ..!! يعني كان متحمس أكثر منا كلنا ... ههههههه
عذا ضربتها على بطنها بكس ::/ صدق من قال انك خبيثة ..
تركتها وراها تضحك و راحت تسلم على سحر اللي ابتسمت في وجهها..
سحر تبتسم ::/ أهلين عذا كيفك ؟؟
عذا تبتسم ::/تمام .. وانتي علومك ؟؟
سحر::/ الحمدلله .... ياحليلك عذا ماتغيرتي ..
عذا تلوي بوزها ::/ حتى انتي ؟؟
ندى تضحك ::/ههههههههههههههههههه سحــــــــــــــر حطمتيها ..
سحر مستحية حست انها احرجت عذا ::/ لا والله موقصدي شي .. بس أنا أتذكر شكلك يوم كنتي بالمتوسط هو نفسه ماتغير بس شعرك طال عن قبل ...
عذا وهي تجلس بينهم ::/كذا وحده قالت لي .. مو بس أنت يعني لاتنحرجين عادي ..
اجتمعوا البنات كلهم وجو بيت عمهم وصارت الهيصة والزنبليطة واستغلوا كل ساعة يقضونها علشان ينبسطون ويملون عيونهم من المزرعة ..
بالليل وقت العشاء كانت ام عبدالله و ام تركي يجهزون الأكل بالمطبخ والبنات يقلطونه بالغرفة .. دخلوا الرجال يتعشون وراحوا الحريم علشان يتعشون هم بعد .. بس أم عبدالله استفقدت عذا وماشافتها مع البنات على السفرة ..
على هالأساس تركت لقمتها وراحت تدور بنتها وين اختفت ؟؟ لقتها في وحدة من غرف الدور الثاني منسدحة على السرير ومتلوية عليه وضامة المفرش وشكلها معفوس ..
ام عبدالله باستغراب ::/ عذا نايمة ؟؟
عذا وصوتها كأنها تصيح ::/ لا يمه صاحية ..
تركت ام عبدالله مقبض الباب وتقدمت للسرير بقلق::/وش فيك ؟؟ وراك مسوية هالحرب كلها ..؟؟
عذا وهي تشهق وتصيح ::/ بطني يعورني ؟؟
جلست ام عبدالله على طرف السرير ::/ ماكلة شي غريب ؟؟ والا وش فيك ؟؟
عذا وهي تشد ضغطتها على بطنها وتقرب رجولها لصدرها ::/ لا بس زي كل مرة ؟؟
ام عبدالله تنهدت ::/ هذا وقته .. طيب كلتي بنادول أو أي مسكن ؟؟
عذا ::/ أيه كلت بس انتظر مفعوله ..
ام عبدالله ::/يعني ماتبغين عشاء ؟؟
عذا ::/ لا ماأبغى شي بس أبغى أنام ..
ام عبدالله ::/زين .. إذا بغيتي شي ناديني والا نادي وحده من اخواتك..
وقامت ام عبدالله من عندها وطفت الأنوار وطلعت وخلتها تحارب الألم لحالها .. نزلت تحت وشافت البنات يتعشون واول ماشافوها سألوها عن عذا وقالت لهم أنها تعبانة وبتنام وماتبغى عشى ..
تعشى الجميع هذيك الليلة ومن دقت الساعة 12 الكل كان نايم لأنهم كانوا اليوم مداومين ومو ماخذين قيلولتهم فـ هدّهم التعب وارتاحوا من اسدل الليل ستاره ...
------------------------------------------------------------------------------
الساعة 5 صباحا
صحت عذا وفتحت عيونها بكسل كانت تحلم حلم مزعج وكأن شي منغص عليها ويوم قامت عرفت أن احلامها المزعجة بسبب بطنها اللي رجع يمغصها مرة ثانية .. تجاهلته وقررت تقوم وتغسل وتطلع لأن أكيد جدتها بتقوم بدري فـ بتفطر معها وتآكل لها بنادول مرة ثانية لأنها مو فاظية يروح عليها يومها وهي تتألم ..
فعلا قامت وراحت للحمام تغسلت ولبست شيال جينز كحلي وتحته تي شيرت احمر من دون أكمام وفوق الشيال قميص أبيض نص كم وخلت شعرها منثور على أكتافها وطلعت لصالة تشوف من اللي قام ..
أول ما طلعت تفاجئت بالهدوء السائد بس سمعت صوت المويه بحمام الصالة وكأن أحد قايم .. جلست بالصالة اللي فوق بتشوف من اللي صاحي .. ولما انفتح الباب شافت جدتها طالعه وهي متغسلة وخالصه .. ابتسمت عذا وقامت لها ..
حبتها على راسها ::/ صبحها بالخير أم الشباب ..
ام عبدالرحمن تضربها على كتفها ::/ اسمي ام عبدالرحمن مو الشباب ؟؟
عذا تلعب معها ::/ يمـه يعني تحبين عمي أكثر من أبوي ؟؟ أنا قلت أنك أم الشباب يعني أبوي وعمي ؟؟
ام عبدالرحمن تبتسم ::/ ايه مادام هذا قصدك معليش..مسامحتك ..
عذا وتحضن جدتها مع كتوفها ::/ بتنزلين علشان نفطر ..
ام عبدالرحمن ::/ ان شاء الله دقايق اغير ملابسي وأنزل لك ..
عذا وجتها نوبة مغص وعقدت حواجبها :/ خلاص بنتظرك تحت ..
تركت جدتها ونزلت للصالة التحتية بس اول ما وصلتها شافت سحر جالسة على الكنب وماسكة معها الريموت وتطالع التلفزيون ..
سحر كان شكلها مو شكل وحده جايه لمزرعه وغبار يعني لبسها وكشختها وجلستها الأميرية كأنها رايحة لحفلة غداء .. بس كل شي كان على نعومه لأنها ماتحب البهرجة كثير ....!!
سحر وهي تلتفت لها وتبتسم ::/ صباح الخير ..
عذا وهي تقرب للكنب علشان تجلس::/ صباح النور ..!! أشوفك صاحيه ؟؟
سحر::/ ايه ما طاع يجيني النوم يمكن متغير علي المكان .. إلا أنت وش أخبارك الحين ..
ضغطت عذا على بطنها اللي رجع لحالته ::/ الحمدلله من شوي كنت اوكيه بس الحين رجع ،، عاد ابفطر وآكل بنادول مرة ثانية...
طالعتها سحر برحمه وحاسه بمعاناتها ::/ اسمعي والله فيه خلطة طبيعية أحسن من المسكنات اللي بتأذيك .. امي تسويها لي كل مرة وما تخلي الخدم يسوونها لأنهم ما يضبطونها ،، وانا بصراحه مااشوف العافية الا اذا شربتها ..
عذا بلهفة ::/ انقذيني بها تكفين تعرفين مقاديرها و وشلون تتصلح ؟؟
سحر بابتسامة حلوة ::/ ولا يهمك ابروح المطبخ واشوف ان كانت مقاديرها فيه سويتها لك .. بس عاد ترى أنا مو زي امي ؟؟
عذا تبتسم ::/ لا ماعليك زود .. بس اصبري بروح معك علشان اعلمك اماكن الأشياء ..
قاموا الثنتين رايحات المطبخ وسحر كانت تسولف على عذا بكل شي وتخربط عليها وعذا ماكانت معها لأنها تتألم بصمت وماودها تفشل سحر ...
دخلوا المطبخ و تساعدوا على تطليع الأغراض ..
سحر وهي تصب المويه بالإبريق ::/ خلاص عذا روحي ارتاحي بالصالة وإذا خلص اجيبه لك ..
حست عذا بلإفراج وودها تنسدح ::/ أوكي انتظرك ...
طلعت عذا وهي تحارب دمعتها ورمت نفسها على طول على الكنب وحطت على بطنها خدديه صغيرة .. شافت لميس بنت عمها تطلع من الغرفة لأنها هي وسارة ناموا بغرفة النوم اللي تحت .. كانت طايرة كشتها ومعها فوطتها وبالحسرة فاتحه عيونها ..
عذا ماقدرت تقاوم وضحكـــــــــــــــــــــــــت ..::/هههههههههههههههههه لميس شكلك يصلح فتاة الغلاف على هالكشة..
لميس وهي توها تنتبه لعذا وترتب شعرها :/ الله ياخذك خوفتيني .. أشوى أنها فيك مو في غيرك..
عذا عاقده حواجبها ::/ من تقصدين ؟؟
لميس بحيرة ::/ اقصد بنت عمكم مادري خالكم مادري وش تصير ؟؟
عذا::/ ندى ؟؟
لميس::/ لالا اللي معها .. والله كشخه وانتيكه الواحد يتفشل منها ..
عذا تبتسم ::/أهاااااااا قصدك سحر ..
لميس::/ايوه اللي هي بس والله تفشلت منها أمس ..!! وعاد انت تعرفيني في المزرعة عساني البس شي نظيف ..
عذا تضحك ::/ ههههههههههه عساك جايبه معك شي زين ..
لميس تضحك أكثر وتتوجه للحمام ::/ هههههههههههههههههه لا سلفتني أمس سارة ..!! الظاهر انها حست اني بفشلكم ..
دخلت لميس الحمام وكانت الجده تدخل الصالة .. شافتها عذا بحب وانتبهت لها جدتها انها منسدحه وتذكرت انها امس تعبانه ..
ام عبدالرحمن وهي تجلس ::/ وش فيك يمه عسى ماشر ..؟؟
عذا بدلع ::/ ولا شي بس بطني يعورني شوي ؟؟
ام عبدالرحمن ::/ ما خف عنك عقب البارح ؟؟
عذا ::/ الا والله ونمت مرتاحة بس رجع مره ثانية ..
ام عبدالرحمن ::/ طيب كلتي شي مسكن والا فطور ؟؟
عذا تبتسم ::/ لالا سحر تسوي لي خلطه تقول عنها زينه وابنفطر سوى انا وانت وهي ولميس توها قايمة ..
ابتسمت ام عبدالرحمن لبنت ولدها::/ ماشاء الله عليها سحر مزيونه وسنعه بعد ..
عذا اللي غارت ::/ يعني انا ماعجبتك ؟؟
ضحكت ام عبدالرحمن وهي تعدل شيلتها ::/ انا شهادتي فيك مجروحة .. لأنك تعرفين غلاتك..!!
ضحكت عذا وسكتت ام عبدالرحمن يوم شافت سحر متوجهه لهم وهي شايلة الكاس معها وتبتسم بحلاوة ...
سحر كان جمالها حاد شوي بيضاء وخشمها طويل وعيونها وساع وحادة لكن هذا مايمنع وجود النعومة والرقة.. أما عذا فكانت تغلب على ملامحها البراءة والملح الطفولي يعني غمازاتها وفمها الصغير وبشرتها الناعمة وعيونها اللي ترمش بها يوم تجي تسولف .. وحركاتها على بعض تحليها وتخليها أحلى بكثير من سحر اللي شكلها رزة وجمالها فرعوني ... كانوا شبه متساويات في الطول بس سحر أطول شوي وهذا يوضح لما يوقفون قريب من بعض..
خذت عذا الكأس من سحر وهي تبتسم لها وشربته كله وهي مسكره خشمها لأنها ماتطيق ريحة الكمون .. وسلمت سحر على الجدة وحبت راسها وجلسوامع بعض ينتظرون الفطور يجهز علشان يجتمعون عليه ...
------------------------------------------------------------------------------
بعد العصر
الساعة حول خمس كانوا الحريم فارشين لهم عند الزرع ومطلعين شاهيهم وقهوتهم وقاعدين يتقهوون في الهواء الطلق .. البنات كانوا مسوين حلقة ويسولفون بكل شي ممكن يخطر على بالكم .. أما سارة فما كان عندها شغله الا قطوتها السوداء اللي منومتها جنبها وكل شوي تمسح عليها .. وعذا كان تركيزها عليها مع انها أوكي مع الحيوانات وتحبهم بس مشكلتها تكره شي أسمه قطاوه والا كلاب و يشكلون فلم مرعب بالنسبة لها ..
فكت ساره شعرها اللي انحاس وراحت لأمها علشان تسويلها الجديلة بشكل مرتب ..
بس انتبهت لها سحر وعلى طول نادتها ..
سحر ::/ سارونه تعالي أنا بسوي لك شعرك ..
سارة وهي تمشي راجعه لسحر ::/ أكيد تعرفين مو تخربطين علي ؟؟
سحر وهي تأشر لها علشان تجلس قدامها ::/ ابداً اضمن لك شغلي ..
جلست سارة قدام سحر وعطتها ظهرها ..وبدت سحر تلمس شعر سارة ضاق صدرها عليه لأنه حلو ولونه حلو وناااعم بالحيل ومع ذلك سارة دائما مسويته جديله وماتهتم فيه ..
سحر ::/ سارة معليش اسوي بشعرك تسريحة ثانية ..؟
عقدت سارة حواجبها ولمت شعرها::/ لا تكفيين لا تحوسينه انا بسويه جديله علشان أفتك منه وما يقعد كل شوي يبهذلني ..!!
سحر بتوسل ::/ والله بيطلع شكلك حلو ..!! صدقيني شكلك بالجديلة كأنك عجوز أم 100 سنة ..
سارة وهي تتنهد وتفك شعرها ::/ يالله أمري لله ..
وبدت تشتغل سحر فيه بس قاطعتها سارة ::/ بس هاه شوي شوي وخليه ملموم كله مالي خلق ترى كل شوي أرفعه ..
ضحكت سحر ::/ ههههههههههههههههههههه طيب بسم الله منك ..
عذا ::/ ههههههههههههههههههههه والله اني مستغربة انها راضية عليك تسوين لها تسريحة بس عارفتها سارة مستحيل ماتعلق والا تمن على الواحد ..
سارة بنص عين ::/ انا ما امن على أحد .. بس اعطيها تعليماتي علشان ما تتعب عليه وعقب أفكه ..
قامت سحر بسرعة وطلبت من سارة ماتتحرك من مكانها بتروح تجيب أغراض وترجع لها .. ركضت سحر للبيت علشان تجيب صندوق ربطاتها اللي جايبته معها .. طلعت الدرجة بسرعة وتوجهت على طول للغرفة قامت تفتش في اغراضها بحركات سريعة علشان تلحق على سارة قبل لاتغير رأيها .. خذت صندوقها العودي المذهب وطلعت من الغرفة نازلة تحت .. ولما وصلت نهاية الدرج وقفت فجأة وشهقت لما سمعت أصوات شباب جاية من المطبخ الداخلي .. لفت وما عرفت وش تسوي والا وين تروح فركضت بسرعة وتوزت تحت الدرج مع أنه ماكان فيه مكان وممكن لو واحد بس التفت يشوفها وينتبه لها ،،، لكن هي ضغطت نفسها على الجدار وصلبت طولها علشان ماحد ينتبه وطلت براسها شوي تشوف من اللي جاي .. شافت واحد نحيف وطويل ولابس بنطلون أسود وتي شيرت رصاصي ومعاه شي بيده ياكله ومتوجه للمجلس الخارجي .. اول ماطلع هالشاب حسبتهم خلصوا وحطت رجلها بتطلع من مخبأها بس تفاجأت لما شافت اثنين ثانيين يطلعون من المطبخ وهم يضحكون وياكلون ،،، رجعت رجلها بهدوء علشان مايحسون بها وفز قلبها لما عرفت واحد منهم .. بغى الصندوق يطيح من يدها بسبة الرجفة لكن سيطرت على نفسها في اللحظة الأخيرة وركزت عليهم تبغى تسمع وش يقولون .. سمعت زياد يضحك للي معه ويقول ::// أحبها وبس ياعزيز إلا...قالوا تحبها قلت ماهو بالحيل *** بس هي أغلى شوي من نور عيني ..
وطلعوا لاحقين الشاب الأول للمجلس ... حطت سحر يدها على قلبها وتنهدت براحة لأنهم ما شافوها بس رجع قلبها وفز لما تذكرت كلام زياد ؟؟ (( من ياترى اللي يحبها ويعشقها ؟؟ ))
مشت سحر وراحت للبنات برا علشان تشوف شغلها وكلهم عصبوا عليها لأنها تأخرت .. رجعت سحر لمكانها وبدت تحوس في شعر سارة لما ضبط .. وطلع شكلها جنااااااااااااان تغيرت 180 درجة .. ورجعت كأنها بنت بالإبتدائي .. طبعا سحر بعد مشادات من سارة ومضاربات لأنها تبغى جديلة اضطرت تفرق لها من النص وتحط لها جديلتين بشكل حلو وكانت قصتها منتثرة على الجنبين وبعض شعرها طايح لأنه مدرج وماقدرت سحر تلمه مع الجديلة.. لكن شعرها الناعم والأسود على بياضها وخدودها الحمراء ولبسها المتواضع واللي كان برمودا جينز سماوي وقميص أبيض بأكمام معكوفة خلى التسريحة تطلع بشكل ثاني وحلو بقوة ..
انبهرت سارة لما شافت شكلها وعجبها وجهها بالحيل وقعدت كل شوي تطالع المراية مو متعودة تشوف نفسها بهالصورة ..
بعد ماخلصوا البنات متقهوين اقترحت عليهم لمياء يقومون يتمشون ويفرجون سحر على مزرعتهم الكبيرة .. وتحمست سارة معها علشان تشوف سحر حيواناتها او عيالها على قولتها ..
البنات قاموا ولمياء تقوم سحر ::/ يالله سحورة ماراح تجين ؟؟
سحر اللي انتبهت من سرحانها ::/ هاه .. الا يالله انا معكم ..
وقاموا كلهم خذوا معهم طرحهم وراحو يتمشون وسبقتهم سارة لعيالها علشان ترتبهم وتوريهم سحر وتعرفهم عليها ..
كان فيه نسمة هواء قوية شوي هذاك اليوم .. وكانت سحر متضايقة منها لأن تنورتها وسيعة مرة والهواء يطيرها مما يضطرها انها تمسكها بيدها ..
عذا وهي تبتسم ويبين تقويمها الملون ::/ شكلك مو مرتاحة على هاللبس ؟؟؟
سحر وهي تبتسم برحابة صدر :::/ شكلي كذا بس بعدنا عن البيت وإلا كنت رجعت وغيرت ..
عذا وهي تمسك يدها ::/ يالله خلينا نرجع غيري لبسك وعقب نرجع لهم ؟؟
سحر ::/ لا مو لازم يعني عادي ..!!
عذا بحزم ::/ إلا يالله خلينا نرجع والله بتتضايقين وماراح تعرفين تتصرفين بحرية ؟؟
سحر تتنهد ::/ ياحبي لك والله يالله مشينا ..
راحت سحر وعذا بس وقفتهم ندى وهي تصارخ ::/ على وين النية ان شاء الله ؟؟
عذا وتبعد شعرها عن وجهها ::/ بنروح تغير سحر وبنرجع ماراح نطول بس انتم لا تبعدون ..
لمياء ترفع صوتها :/ بتلاقونا عند الحيوانات زين ؟؟
عذا تأشر لهم بيدها باي ::/ خلاص زين ..
راحوا الثنتين متوجهين للبيت وعذا قاعده تشوت الحصى اللي تحت رجولها .. قطعت عليها سحر::/ عذا انت ثاني ثانوي صح ؟؟
عذا وهي تلتفت مبتسمة ::/ ايه .. علمي بعد ..
سحر ::/ حلو يعني زيي .. معناتها بعطيك كتبي وأوراقي تستفيدين منها ..
عذا ::/ الله يعطيك العافية .. خلاص وتريحيني من الهم اللي عايشته ..
ضحكت سحر وهي تمسك تنورتها ::/ هالتنورة ناوية على فضيحتي اليوم
ضحكت عذا على تعليق سحر ::/ ههههههه ماتدرين يمكن تكون سبب في نصيبك يعني يمكن يمر أحد الحين وينفتن فيك...
سحر::/ ههههههههههههههههه مسوية فلم مصري .. بس يابنت الحلال ليته يمر ويعجب في سيقاني كان والله كل يوم أطلعها له بس هو خل تعجبه ..
ضحكت عذا بس ماتدري ليه رجع لها كلام ندى اللي أمس عن سحر ودلعها ...
نزلت راسها وهي تشتت تفكيرها عن النقطة الأساسية .. لكن نبهتها سحر لما سحبت الكاب من يدها ولبستها إياه ..
سحر وهي تبتسم ::/ كذا شكلك أحلى ..
عذا وهي تعدله وتوقف وقفة كاوبوي ويدها على طرف الكاب ورافعة حاجب::/ أنا دائما حلوة ..!!
سحر وهي تناظرها وبتمعن ::/ تدرين يبغى لك صورة على هالحركة .. بتطلعين تحفة .. ((وهي تلف على وراء )) اممممم ووراك هذاك الشجر بتصير الصورة مغرية .. وش رأيك ؟؟
عذا وهي تتعدل بوقفتها وتضحك ::/ لا تكفين أنا شكلي بالصور يطلع خاايس ..
سحر متحمسة ::/ وش دعوى انا تصويري يطلع القرد غزال وشلون و انت زي القمر ؟؟ بتصير احلى صورة صورتها .. هاه وش رأيك ؟؟(( وناظرتها بتوسل ))
عذا وهي تناظرها بشك ::/ طيب صوررة وحدة بس ؟؟ زين
سحر تهز رأسها برضى ::/زين ..
مشوا الثنتين داخلين للبيت .. وعلى طول طلعوا للدور الثاني علشان تبدل سحر .. جلست عذا بالصالة تنتظرها تطلع من غرفتها .. ويوم طلعت تفاجأت عذا من لبسها وكأنها مو بمزرعة .. كانت لابسة بنطلون أسود حرير وبلوزة حرير أبيض بطبعات ورود أسود وحولها شك خفيف .. ولابسة صندل واطي فضي ومنزلة شعرها على كتوفها وحاطة مشبك كريستال على قصتها .. وإكسسواراتها كلها أسود يعني من دقايق كان كل شي أورنج والحين أسود .. وماسكة الكاميرا بيدها ..
سحر وهي منحرجة من نظرات عذا وتناظر لبسها ::/ قلت الحين بيدخل الليل عاد نحتاج نلبس ليلي ..
عذا وهي عاجبها شكل سحر ::/ همممممممم . ايه صح مابقى الاساعة على المغرب .. يالله علشان نلحقهم قبل لاتظلم الدنيا ..
سحر تبتسم ::/ يالله ..
راحو بينزلون مع الدرج وعذا كل شوي معطيه سحر نظرة .. وسحر تحس بالإعجاب لأنها قدرت تلفت أنتباهها بأناقتها عاد انتم تعرفون البنات ومجاكرتهم باللبس والأناقة ..
نزلوا بخطوات سريعة ولما وصلوا الباب وقفت عذا فجأة وقالت بسرعة ::/ لالالا تعالي نطلع مع الباب الثاني أقرب لحظيرة الحيوانات اللي ينتظرونا البنات عندها ..
سحر باستفهام ::/ اخاف فيه واحد من العيال يقابلنا والا شي ..
عذا وهي تسحبها مع يدها ::/ اول شي بنلقي نظرة وبعدين نطلع ..
سحر وهي توقفها ::/ طيب والشجر والتصوير ؟؟
عذا وتضرب جبهتها ::/ أاوه نسيت
سحر تبتسم ::/ هاه وش تختارين ؟؟
عذا وهي ترجع على وراء ::/ خلاص يالله اول شي نروح نصور وبعدين نرجع لهم ..
سحر وهي تهز رأسها برضى وتجهز كاميرتها ::/ أوكيه مشينا ..
طلعوا رايحين لمنطقة الزراعة اللي كانت مليانة شجر تين ورمان والأرض كلها مزروعة بالفلفل الحار وكل مالذ وطاب .. عموما المنطقة كانت ريفية وخضرااااء بشكل يريح العين .. وكأنها صورة من حدائق بابل..
دخلوا البنات وتوغلوا في المنطقة شوي .. لحد ماوصلوا للساقي وكان صوته المنعش يتغلغل في الأعماق .. وقفت عذا وابتسمت ::/ صوريني هنا ..
وقفت سحر وراها تعاين الموقع ::/ مو احلى لو تقدمنا شوي ؟؟
عذا بإصرار ::/ لالا بليز سحر بنتصور هنا .. ماتدرين وش كثر تعبت انا وأبوي على هالمنطقة و في زراعتها وسقيها .. كنا كلما جينا هنا لازم نروح لها
نتطمن عليها والحين بنفتقدها ... (( وتأشر على شجرة ليمون وتضحك )) هذي مسميها على سارة لأن طعمها مر ومهمها حاول يسمدها والا يجيب لها مزارع مايفيد طعمها مايتغير هو هو .. مثل سارة اللي لحمها مر وياويل أحد يتنقرش فيها .. (( ابتسمت سحر وهي تشوف عذا وشلون متحمسة ))
(( وتأشر على شجرة تين وتبتسم ودمعتها متحجرة عند عينها)) وهذي سميتي .. امي نورة مسميتها علي تقول طعمها حلو وينسيك أوجاعك .. مثلي (( وترفع حواجبها بفخر بس عيونها مهزومة ودمعتها نزلت بس على طول مسحتها ))
قربت سحر وهي تتنهد بس مبتسمة وحطت يدها على كتف عذا ::/ الله بيعوضكم باللي أحسن منها .. (( وتضربها على كتفها )) يالله عاد لاتقلبين السالفة تراجيديا .. خلينا مستانسين ..
وقفت عذا بين شجرة التين وشجرة الليمون ووقفت وقفتها الأولانية وابتسمت بكل عذوبة وبراءة ..
سحر وهي تشوف شكل عذا من وراء عدستها وكانت عاجبتها بأنوثتها الطفولية .. أبتسمت وهي تشوف تقويمها الأحمر اللي على بلوزتها وضغطت على الزر واشتغل الفلاش معلن التقاط الصورة ..
شالت سحر الكاميرا وهي تبتسم ::/ done
عذا وهي تتقدم لها ::/ يالله متى بتوريني إياها ..؟؟
سحر وهي تمشي ::/ لما نرجع البيت أضبطها وأعطيها ندى توصلها لك ..
عذا وهي تلحقها ::/ زين ..
ومشوا رايحين للبنات عند حظيرة الحيوانات ...
في بيت أبو فارس ..
كانوا حصة وابراهيم جالسين على الطاولة ويتغدون .. كان الجو هادي وهم مو متعودين عليه .. متعودين عيالهم يكونون معهم على الوجبة بحسهم وحركتهم ..بس هالمرة كلهم رايحين للمزرعة مع عيال عمهم ،،، تنهد ابراهيم على دخلة مشاري اللي ماراح معهم وكان جاي ومعه شنطته ولاب توبه والتذاكر بيده.. رماهم على الكرسي وقرب لأمه وحبها على رأسها وحب أبوه ..
مشاري وهو يرفع أكمام ثوبه ::/ أجل ناوين تتغدون وتخلوني ؟؟
حصة وهي مستانسة بوجوده ::/ توقعتك ماراح تجي ؟؟ يعني بالعادة الخميس ماتتغدى معنا ؟؟
مشاري وبدء يغرف في صحنه ::/ لا ماهنتوا علي هالمرة أخليكم تتغدون لحالكم .. عاد قلت أخاويكم ..
ابو مشاري::/ فيك الخير ،، بس والله افتقدنا حسهم بالبيت ..
مشاري وهو يبتسم ::/ يعني يامشاري ماعاد لك كرت عندنا .. الظاهر أني ابروح اعرس عسى تجيني وحده تفرح بوجودي معها ..
ام مشاري فرحانة ::/ صدق يمه بتعرس .. تبيني أدور لك ؟؟
مشاري يقهقه ::/ هههههههههههههههههههههههههه يمه الله يهديك وانت بس على الريحة .. ماصارت زلة لسان . أمزح يالغالية والا أنا وين والعرس وين ؟؟
ابو مشاري ورافع حاجبه ::/ ليش وش ناقصك ؟؟ رجال كامل ولله الحمد ومقتدر ماديا ؟؟ إذاً وش المانع ؟؟
مشاري اللي هزته كلمات ابوه ونزل ملعقته :/ سلامتك ماناقصني شي (( وابتسم )) بس ناقصني الإستعداد النفسي وانا ماأحس اني استعديت نفسيا علشان أكوّن أسرة وأكون مسؤول عنها ..
ام مشاري::/ إذا تزوجت حسيت بالمسؤولية بس بما أنك عازب فـ مستحيل أنك بتحس ..
ابو مشاري ::/ أذكر يوم كنا نتزوج ماعندنا هالخرابيط وأشوفنا الحمدلله مستقرين وعندنا عيال ..
مشاري وهو يضيع السالفة لأنها تعبته ::/ المهم تراني بسافر لبريطانيا الأسبوع الجاي ..!!
حصة ويدها على قلبها ::/ ياربي منك يامشاري اذا عورت قلبي ؟؟ الحين وش لك بهالديرة ؟؟ مايكفي اللي نسمعه عنها ؟؟ تبيهم يمسكونك بكرة ويلزقون فيك أي شي ؟؟
مشاري يضحك على أمه ::/ وش نسوي ياأم مشاري عندي شغل ؟؟
ابراهيم وهو يشرب مويه ::/ وشو من شغل ؟؟
مشاري اللي تلعثم ::/ هاه..!! ااااالشركة الجديدة ،، ماغيرها اللي بنعقد معها صفقة المواد الغذائية .. أبروح أتأكد من شغلهم وأخلص لي كم من مشوار .. ولا تنسون أن ربعي اللي هناك من زمان عنهم .. أبمر عليهم بالمرة ..
ام مشاري وهي تدعي لولدها ::/ الله يوفقك يا مشاري .. ويبعدك عنك كل شر ... وتروح وترجع لي بالسلامة والعافية ..
ابتسم مشاري وهو يقوم عن الغداء وكلام أبوه لازال عالق في باله .... ومشى رايح لغرفته بهمومه وأفكاره ...
------------------------------