ندى بعد ما خلصت فطورها مع زياد اخوها خذت اللاب توب من عنده وراحت لغرفتها علشان تتصفح النت شوي قبل لا تبدأ تذاكر .. أول ماوصلت عند باب غرفتها شافته مفتوح واستغربت من اللي فاتحه بس يوم دخلت شافت سحر متمددة على السرير وتقرا قرآن ...
ندى وهي مبتسمة وتحط الاب توب على الطاولة ::/ وش عندك اليوم مشرفتني ؟؟
سحر وهي توقف عند نهاية الآية ::/ اشتقت لك ..
ندى وهي تضحك وتدور على سلك التليفون ::/ ايييييييييييييييييييييه .. وانا بعد .. وين السلك ما شفتيه ؟؟
سحر باستهبال ::/ الا تلاقينه بجيب مريولي حق المدرسة ..!
ندى باستغراب ::/ ووش بتسوين فيه بالمدرسة ؟؟
سحر تضحك ::/ استهبل انت ووجهك على طول صدقتي ..
ندى وهي تكشر بوجهها وترجع تدور ::/ مو وقت خفة دمك ..
تحمست سحر واعتدلت في جلستها على السرير ::/ هذا لاب توب زياد ..
ندى تستهبل ::/ لا أبو الجيران .. مستعيرته منه ..!!
ضحكت سحر::/ أي واحد ابو صالح والا أبو طلاااااااااااال (( وتغمز بعينها ))
ندى وهي تسايرها ::/ لا أبو زياد ..
سحر:: /خخخخخخخخخ بايخة .. المهم عندي لك امانة ..
ندى وتناظرها بقلة اهتمام ::/ ووش هي إن شاء الله ؟؟
سحر::/ اول شي اوعديني أنك ماتقولين لي لا ..
ندى ::/ وليه ان شاء الله ؟؟ افرضي قلتي لي شي ما يعجبني ..
سحر بحماس:/ لا والله العظيم بيعجبك ..! يعني ماتثقين بذوقي؟؟
ندى تبتسم ::/ لا وش دعوى ..!!..
قامت سحر من على السرير وبغت تطيح وتتخرطف في المفرش ::/ خلاص انتظري .. أي وجع بغيت أطيح ،،، انتظري ندوش دقيقة وراجعة ..
ندى وهي تضحك ::/ هههههههههههههه طيب طيب بس شوي شوي على عمرك .!!
طلعت سحر وهي تركض رايحة لغرفتها وقعدت ندى تفكر بالأمانة اللي عند سحر واللي متحمسة لها لهالدرجة ..
رجعت سحر وهي ماسكة علبة مكعبة نيلية صغيرة بيدها وكانت ملفوفة بشريطة فضية أنيقة تقدمت سحر لندى ومدت يدها اللي فيها العلبة لها وهي تبتسم ..
ندى باستغراب ::/ وش هذي ؟؟
سحر مبتسمة :/ الأمانة ..
ندى بحاجب مرفوع ::// أي امانة ؟؟ ومن عند مين ؟؟
سحر تغمزلها ::/ بصراحة من اللي بالي بالك ..
ندى واحمر وجهها ::/ طلال ؟؟
سحر ::/ههههههههههههههه احبك يوم تفهمينها وهي طايرة .. إيه من طلال ،،
جاء عندنا امس وعطاني إياها لك .. يقول انه ماعطاك هديتك يوم عيد الأضحى.. عاد هذي هي ولو انها متأخرة .. بس اتمنى انك تقبلينها ..
ندى وهي ودها تعبرعن فرحتها بس ماسكة نفسها عن سحر ::/ من اللي يتمنى انت والا هو ؟؟
سحر وتطير عيونها بندى ::/ اكيد هو يالغبية .. يالله عاد خذيها وافتحيها خلينا نشوف ذوقه هالمرة ...
ندى وعلى بالها تكابر ::/لالا سحر ماراح اقبلها أحس اننا مصخناها وبعدين خلاص كبرنا والمفروض ماعاد آخذ منه شي ..
سحر بعصبية ::/ ندى لايكون طلال ولد من الشارع ؟؟ تراه ولد عمك وانت عارفة أن نواياه شريفة .. عاد يالله اقبليها ..
ندى بتوسل ::/ سحر ..!!
سحر وهي تحط الهدية بيد ندى ::/ ندى أنت وعدتيني ماتقولين لي لا وبعدين لا تسوين نفسك مو فرحانة بهديته والا انك ماتحبينه ترى انا عارفة البير وغطاه عاد خذيها وفكينا ..
ابتسمت ندى من كلام سحر اللي كان كل حرف فيه يحكي الحقيقة وخذت الهدية بيد ترتجف وكانت تتخيل شكل طلال وكأنه هو اللي واقف قدامها ويعطيها الهدية.. فتحت الشريطة وهي تناظر سحر اللي ابتسمت لها وهي متحمسة وودها تشوف وش جايب اخوها.. فتحت التغليف النيلي المعرق بفضي .. وطلعت لها علبة شفاف على شكل كريستالة طلعتها وفتحتها ولقت داخلها خاتم فضي بفصين ألماس وشكله بالمرة ناعم وكيوت ..
فتحت ندى فمها لما شافت الخاتم يعني صدق أبهرها وعجبها .. رفعت نظرها لسحروهي مطيرة عيونها ..
سحر ::/ رووووووووووووووعة ،،،(( وبحماس)) يالله لا تقعدين تطالعيني البسيه خليني أشوفه على يدك ..
طلعته ندى وحطته بأصبعها البنصر وعلى يدها الناعمة وبشرتها البيضاء طلع للخاتم شكل ثاني ...
سحر بانبهار ::/ واااااااااااااااااااو تدرين ودي اصور يدك بالخاتم واوريها طلال ..
ندى تبتسم وودها تصيح من حبها لطلال ::/ ياحبي له والله العظيم ان عنده ذوق ..
سحر تضحك ::/ هههههههههههههه تدرين ليتني سجلت كلامك وصورت يدك ووريتها طلوول . كان على طووووووول راح يجي اليوم يخطبك والا وش يخطبك الا بيعرس عليك بكرة ..
ندى تستهبل ::/ لالا يوم الأحد عندي إختبار فيزياء صعب .. خليه يوم الأثنين لأن ماعندي شي ..
سحر ::/ هههههههههههههههههههههااااااااااااااااي أجل انت اللي مستعجلة مو أخوي ؟؟
ندى وهي تضربها على كتفها ::/ أقول اسكتي تكفين ..!! وروحي جيبي لي سلك من عند مشاري والا مصعب خليني اشيك على إيميلي قبل لاأبدء أذاكر ..
سحر وهي تتوجه للسرير ::// روحي انت انا بكمل قراءتي
ندى بتوسل ::/سحـــــــر ،،، استحي منهم تخيلي اروح والقى واحد منهم موجود ..؟؟
سحر وهي تجلس وتمسك المصحف ::/ لالا أكيد راحوا يصلون .. والا تدرين روحي جيبيه من غرفتي أكيد بتلقين لك واحد ..
ندى ::/ زين ابروح .. بس تشوفين والله بتتحسفين ..
سحر وترفع صوتها وعلى بالها معصبة::/ المفروض انت اللي تخدميني على اللي سويته لك مو انا اللي أخدمك ،، لا وتتشرهين علي بعد انت ووجهك ؟؟
ندى وهي ترميها بالسجادة ::/ خلاص يالرنانة اسكتي مانبغى منك شي أنا بروح اجيب السلك .. الواحد مايطلب منها شي استغفر الله ..
طلعت ندى وراحت لغرفة سحر عشان السلك وهي طول الطريق تطالع يدها والخاتم اللي في أصبعها وعلى وجهها ابتسامة حلوة تعكس المشاعر العميقة اللي بداخلها ...
أما سحر فتمددت على السرير ورجعت تقرأ لكن بالها مو معها من التفكير فوقفت القراءة وتخيلت لو أن زياد يسوي زي طلال .. (( يعني ليته على الأقل يغلط مرة وحدة ويجيب لي هدية .. مو شرط خاتم ألماس والله ما أبغى منه كل هذا تكفيني وردة حمراء ريحتها زكية ،،، بتكون أغلى عندي من كنوز الدنيا كلها يكفي انها منه ...!!مافيه إلا أني أنتظر يمكن الله يهديه ويرقق قلبه علي ويتكرم علي بهدية كتذكار منه استلذ لما أشوفها واروي بها ظمآي كلما اشتقت له)))
-------------------------------------------------------------------------------
يوم الجمعة...
بعد المغرب ...
كان نواف يصلي في المسجد القريب من حارة بيت عمه علشان اول مايخلص من الفرض والسنة يروح لهم ولا يتأخر عليهم ...
أول ما سلم الإمام منتهي من صلاة المغرب قام نواف على طول وصلى السنة وقرأ قرآن يمكن وجه واحد وبعد كذا لبس عقاله وصلح تشخيصته وطلع متوجه لبيت عمه ..
كانت يديه تعرق على المقود من الإحراج أو يمكن من الفرحة أو يمكن هذا طبعه لما يحتم عليه الأمر أنه يجتمع مع عبير في مكان واحد ...!واليوم بالذات بيتواجد معها بصورة قريبة أكثر من قبل خصوصا لأنه بيوديهم المستشفى وبيكون قريب منهم لما يدخلون عند الدكتور يعني تقريبا طول الوقت بتكون هي جنبه وكأنها فعلا زوجته .. ابتسم لما وصل تفكيره عند هالنقطة ...
لف نواف مع الملف اللي يطلعه على طول لبيت عمه بس لما قرب بسيارته تفاجأ بجاكوار فضية آخر موديل واقفة قدام باب بيتهم .. في البداية استغرب من تواجدها لكن بعدين توقع انها وحدة من صديقاتهم أو احد جاي يزورهم .. قرب سيارته للباب اكثر وأكثر ووقفها على جنب وارتجل منها .. بس لما التفت على الباب طارت عيونه لأنه شاف شاب وسيم جداً وكاااااشخ يعني الثوب يلمع وباين أنه توه مفصل والشماغ حمرته تكسر العين .. يعني الولد ماينعاب من ناحية الكشخة والرزة ويكفي سيارته ...
قرب منه نواف وهو مصدوم من تواجده عند باب بيت عمه بس مع ذلك ابتسم وكأنه يرحب فيه ..
نواف ::/ حي الله اللحية الغانمة ..
....::/ الله يحيك ويبقيك ...
نواف ::/ ماأدري تنتظر أحد هنا ..!!
مؤيد بنظرة تكبر ::/ وأنت وش لك ؟؟
نواف وهو مستغرب غروره ورده ::/ عجيب ..!! واقف عند باب أهلي وتقول لي هالكلام ؟؟
مؤيد وهو يرجع من عند الباب ويوقف جنب سيارته ::/ ماسمعت ان راكان له أخوان ؟؟ علمي به أن عنده أخوات بس .. (( وابتسم باستهزاء ))
نواف وهو مقهور من غرور هالشاب ::/ هذا بيت عمي وبحسبة أهلي ...!! ووقفتك قدام بابهم ما عجبتني ؟؟ يعني لك شي نقدر نخدمك فيه آمر واحنا حاظرين ..؟؟
مؤيد بتهكم::/هههههههههههههه ما يبغى لها كلام لو أبغى شي منك اكيد بآمرك وما فيها شك ؟؟
نواف اللي فعلا تضايق وكان شاد على قبضة يده ::/ المطلوب ؟؟
مؤيد وهو يتسند على باب السيارة ومواجه لباب البيت ::/ انا انتظر راكان يجي ..!! يعني ما أبغى منك شي ؟؟
نواف باستغراب ::/بس راكان شكله مو هنا لأن سيارته مو موجودة ..!!
مؤيد وهو متملل ::/ عارف مو أنت اللي تجي تعلمني ..!! هو الحين بيجي قايل لي انتظره ببيتهم بس انا ولد أجاويد ولا دخلت على الحريم بالبيت لحالهم .. (( ورفع حاجبه لنواف ))
نواف يتطنز ::/ حي الله ولد الأجاويد ...
سفهه نواف وتقرب للجرس علشان يدقه ويطلعون له بنت عمه وامها وفي نفس الوقت كان منقهر من تصرفات ولد عمه العديمة المسؤولية والغيرة (( الحين قايل للرجال يجي ينتظره ببيتهم وهو عارف انه مو موجود وأن مافيه رجال بالبيت غيره ،، وما في البيت الا أمه واخواته البنات عرضه وشرفه ..!! صدق انه يبغى له تأديب هالمستهتر بس مو منه من هالسم اللي يآخذه ويشربه نساه دينه وعاداته وتقاليده ..!!))
دق نواف الجرس وردت عليه نورة بنت عمه الصغيرة وقال لها تنبه عبير انه جاء ..
رجع نواف من عند الباب وراح يركب سيارته ويقربها للباب اكثر علشان يريح مرت عمه وكان مؤيد لا زال واقف قدام الباب .. ونواف منقهر منه وده لو يروح ويعطيه كم بكس على كم طراق علشان يستحي على دمه ويرجع لسيارته .. طلعت عبير من البيت وكانت ماسكة امها واول ماشافهم نواف نزل على طول حتى يساعد مرت عمه وغصبا عن نواف التفت لمؤيد بيشوف هل هو فعلا ولد اجاويد وصاد عن الحريم والا فاتح عيونه ..؟؟؟
بس للأسف شافه رافع واحد من حواجبه ومركز عيونه على عبير اللي كانت ماسكة امها وتحاول تنزلها من الدرج .. هنا انقهر نواف من جد وبعصبية قال لعبير وهو يمسك يد مرت عمه ::/ عبير روحي اركبي السيارة وانا بجيب امك ..
استغربت عبير من تصرفه بس نزلت عند رغبته ونفذت له اللي يبغى .. وراحت وركبت السيارة وهي مستغربة تواجد هالشاب الى هاللحظة قدام بيتهم ..
نواف ركب مرت عمه وراح هو يركب في مقعده بس اول ماركب قالت له مرت عمه ::/ هذا الى الآن موجود ؟؟ ماراح ؟؟
نواف وهو عاقد حواجبه ::/ ليه ؟؟ ومن متى أصلا هو جايكم ؟؟
ام راكان ::/ قبل نصف ساعة دق علينا الجرس يبغى راكان وقلنا له أنه مو موجود بس أصر أنه يدخل وينتظره داخل البيت لكن لولا الله ثم لسان عبير والا ان كان هو الحين بالمجلس (( وضحكت ))
نواف يبتسم بعذوبة ::/ بنت رجال والله ..
وحرك نواف سيارته بيمشي لكن وقفته عبير ..
عبيربصوت واثق ::// نواف معليش نوقف لحد مايجي راكان ويروح معه ..
نواف مستغرب ::/ ليش عاد ؟؟
عبير وهي تفرك يدها من التوتر ::/ لا بس اخاف على أريج ونورة وانوار تراهم بالبيت لحالهم وودي اتطمن عليهم وانه راح ..
نواف وصار أسنانه من القهر ::/ أنتم متأكدين انه يبغى راكان وماسوى لكم شي ؟؟
ام راكان ::/ لا والله ياولدي ماسوى شي بس لأنه أصر علينا يدخل المجلس مع اننا قايلين له مافيه رجال بالبيت وأنه لازم ينتظر راكان بسيارته .. وبس هذا اللي مخوفنا يعني أخاف يدق على أريج ويقول لها انه من طرف راكان .. عاد أريج انت عارفها تخاف من طاريه اخافها تروح تفتح له علشان تفتك من لسان اخوها ولا يضربها ..
تنهد نواف ووقف سيارته ينتظرون راكان يشرف .. وفعلا ما مر 10 دقايق الا وهو جاي دخل البيت وبدل ملابسه وطلع مع هالصديق اللي مبين انه ولد نعمه بسيارته ..
وبعدها تحرك نواف متوجه للمستشفى وشعور السعادة بدأ يغمره من جديد لأن هواه اللي يتنفسه راكب وراه ..!!
----------------------------------------------------------------------------
يوم السبت
الصباح
في مدرسة الثانوية للبنات
كانت الحصتين الأخيرات حصة نشاط والأستاذة جمعت الطالبات وراحت معهم للمرسم وخلتهم يشتغلون معها في ترتيب اللوحات وتنظميها استعداداً للمعرض اللي راح يسوونه نهاية السنة في حفل تخريج الصف الثالث ثانوي ..
خلصوا البنات شغلهم بسرعة لأنهم كانوا كثيرين ومتقاسمين الشغل فيما بينهم ..
جلسوا البنات بعد ما انتهوا وكل وحدة التمت مع شلتها وبدوا يسولفون ..
رحاب وسحر وغادة وأريج وندى راحوا وجلسوا في نهاية المرسم وقعدوا يسولفون ويستهبلون ،، لكن ندى انتبهت أن عين أريج متورمة بشكل خفيف يعني ما يلاحظها الواحد الا إذا دقق النظر .. عقدت حواجبها ندى لما شافت الزراق اللي في اعلى جبهة أريج وكانت مغطيته بشعرها ..
ندى باستنكار::/ أريج وش صاير فيك ؟؟
قطعت أريج سالفتها ::/ وش فيني ؟؟
ندى وهي تأشر على عينها ::/ وش فيها عينك منتفخة ؟؟
ارتبكت أريج وحطت يدها على عينها::/ مافيها شي ؟؟
غادة وهي تدقق النظر ::/ الا أريج كأنها منتفخة ؟؟
أريج عرفت انه مالها بد من انها تفسر لهم ::/ أجل يمكن بعوضة قرصتني ؟؟ غريبة مانتبهت لها انها منتفخة ؟؟
سكتوا البنات عنها وصدقوا اللي قالته بس ندى وبحكم أن صداقتها بأريج اقوى وفاهمة أريج أكثر من البنات حست انه فيه شي صاير بس أريج متحفظة عليه علشان كذا ماحبت تحرجها اكثر وتستفسر عن الزراق ..
بعد فترة ولما ملوا البنات السوالف او بالأحرى خلصت ،، قرروا يلعبون لعبة إنسان حيوان وقاموا جابوا أقلام وأوراق وبدوا اللعبة ..
رحاب أول ماخلصت صرخت على البنات علشان يوقفون وكانت ندى جنبها فمسكت يدها على طول بقوة علشان توقفها وصرخت ندى من الألم ..
::/ آآآآآآآآآآه رحى عورتيني ..
رحاب وهي تناظر يد ندى وتشوف آثار مسكتها ::// ههههههههه معليش آسفة هذا كله مع الحماس ..
غادة ::/ ههههههههههه رحى وتحمست ..!! زين اللي ما ضربتك بجزمتها ..
رحاب وانتبهت للخاتم اللي في أصبع ندى ::/ وااااو وااااااااااااااااااااااااو ... وش هالزين وش هالزين ؟؟ متى شريتيه ؟؟ يوم الخميس من الفيصلية لما تركناكم ؟؟
سحر وهي تبتسم بخبث لأن ندى مازالت لابسته::/ لا وش فيصليته وش خرابيطه ؟؟ ترى يوم تروحون للفيصلية أنا مارحت معكم وكان السبب أن طلال أخوي بيجي لبيتنا (( وضحكت))
شهقت غادة ::/ هيييييييييييييييي لا تقولين من طلاااالوه .. ياعيني عليكم وعلى هداياكم ..
رحاب بألم ::/ ماشاء الله عليك ندوش حبيبك مفتكر فيك مالت علي انا ومصعب جعله للي منيب قايله الظاهر انه حتى مايعرف اسمي ؟؟
غادة ::/ أنت صدق مآخذه مقلب بعمرك وانك انت ومصعب حبايب..!! والله حالتك مستعصية تكذبين الكذبة وتصدقينها هههههههه..!!
اطرقت سحر رأسها وهي تبتسم وحست ان معانتها وتفكيرها اللي أمس رجع لها .
أريج باستنكار ::/ ندى الى الحين تآخذين منه هدايا ؟؟ ماتخافين زياد يقول لك شي ؟؟
ندى مستحية ::/ وش أسوي ما أقدر أرده ودي اتغلى عليه بس أعجز قدامه .. وبعدين زياد وشلون بيعرف ولو سأل أقوله اني أنا شاريته ..
غادة ::/ طيب والهدايا القديمة وش سويتي فيها ؟؟ رميتيها ؟؟
ندى باندفااع ::/ لالالالالالالالالا وش اللي رميتها محتفظة فيها عندي ومسكرة عليها في ردفة الدولاب ومحتفظة بالمفتاح عندي بالكومدينو علشان إذا الله كتب لي نصيب معه ابحطهم تذكارات منه بغرفة النوم ..
بدوا البنات يعلقون عليها ويستهبلون ورجعوا يكملون لعبتهم .. بس أريج كان بالها مو معها ووتفكيراتها خرجت عن النطاق المحدود (( هه وتتغلين عليه بعد..!! يا قلبي عليك ياعبير انت راميه وجهك على نواف 24 ساعة الظاهر بيمل منك بسببنا وبسبب طلبتنا وبيهج ويروح يدور على وحده تريحه مو تزيده هموم ..!! ))
----------------------------------------------------------------------------
بعد العصر وبعد ماتغدوا كانت أم عبدالله وبناتها جالسين بالصالة يتقهوون شاهي ويسولفون ..
أم عبدالله ::/ لمياء مارحتي اليوم لموعدك ؟؟
لمياء بحزن ::/ إلا رحت ..
عذا بحماس ::/ بشري وش قالت لك ؟؟
لمياء وتلعب بالبيالة ::/ تقول خلي أملك بالله كبير .. لأن العقم اللي فيني بسبب الحبوب ..
أم عبدالله::/ كنت قايلة لك بما أنك ماحملتي المرة الأولى إلا بمنشطات لا تآكلين حبوب لأنها بتأثر عليك ..
لمياء وبدت تدمع عيونها ::/ اللي صار صار يمه ومانقدر نغير شي الحين .. بس انت ادعي لي تكفين ..
عذا وبدت تحرقها عيونها ودها تصيح على أختها ::/ طيب فهد وش ردت فعله ؟؟
لمياء وهي تنزل البيالة وتمسح عيونها ::/ ماقال شي .. بس أكيد متضايق هو يبغى بنت ويبغى عيال يعني مايكفيه واحد ..
سارة وهي تلعب مع مهند والآرانب ::/ طيب وأطفال الأنابيب .. ما سألتي عنها ؟؟
لمياء تتنهد ::/ تقول ماتصلح لي الحين في هالفترة لأني اعالج يعني اذا يأسو من العلاج بيشوفون احتمالات طفل الأنابيب ..
عذا ::/ طيب ليش ماتغيرين هالدكتورة يمكن يكون الخير عند غيرها ..
لمياء ::/ أفكر أغيرها بس اخلص برنامج العلاج اللي عندها أول لأني دفعت لها خلاص وبعدين أشوف ..
أم عبدالله تهون على بنتها ::/ الله كريم حبيبتي .. وبعدين انتم توكم صغار والعمر قدامكم ومهند توه مكمل الأربع سنين وان شاء الله ماراح يخيب رجاكم ..
لمياء وبدت عيونها تلمع من الدموع ::/ تصدقون امس كنا بمطعم طالعين نتغدى .. و مهند طالع يتمشى زي العادة ويستكشف مطعمهم .. عاد بعدين رجع لنا ومعه بنوته حلوة وتجنن جابها ودخل هو وإياها علينا .. لو تشوفون فهد وش وسوى ؟؟ بغى يموت من الوناسة عليها جلسها في حضنه وبدأ يسولف معها ويلعب هو وإياها ومهند ،،، يعني كأنه ماعنده عيال .. عاد حز بخاطري والله وصحت من دون شعور ...
عذا بحزن::/لمياء بس فهد يحبك وماكان قصده يزعلك او أنه متضايق من أنك ماجبتي له الا مهند ؟؟
لمياء وهي توضح لأختها ::/ عارفة ياعذا بس أنا لأني أحب فهد ودي أقدم له اللي يبغاه لأني ما أبغى أخسره ..
ساره تتنهد ::/ يعني وش بتسوين ؟؟ بتعترضين على قضاء الله ؟؟ هذا نصيبك ولازم ترضين فيه والله يرزقكم من حيث لاتعلمون ..
لمياء بألم ::/ أنا ماعترضت .. أنا خايفة على فهد خايفة لا أخسره هذا هو بس .. وخايفة من امه احس أنها بدت تنغز بالكلام هاليومين ..
ام عبدالله تبتسم باستهزاء وهي تصب لها شاهي ::/ عاد هي من الأول مو هاضمتك ؟؟
وش لون الحين والفرصة جت لعندها ..
عذا ::/ يمه حرام لاتظلمونها ؟؟
لمياء رافعة حاجب ::/ وش اللي لا نظلمها ؟؟ تدرين ان من البداية من أيام الخطبة ماكانت تبغاني .. يعني ماخطبني إلا خالته اللي هي أخته من الرضاع وبنتها اللي هي صديقتي خوله ...
سارة تضحك::/ ههههههههه أحلى ياللي كنت عاجبهم ؟؟
عذا ::/ المهم أن فهد يحبك صح ..
لمياء ::/ هههههههه من هذي واثقة ،، بس تصدقون اول ماكانت خولة تلمح لي انها بتخطبني كنت متحمسة ودي أشوف خالها هاللي أزعجتنا فيه .. عاد اول ماجابت صورته ماكان وسيم لهذيك الدرجة يعني انا كانت أحلامي آخذ واحد يشبه جمال سليمان والا حسين فهمي والا شاروخ .. فأول ماشفت صورته انصدمت قلت ماعاد باقي الا هي آخذه هو ..
سارة ::/ههههههههههااااااااي طلعتي مو سهلة والله ؟؟
لمياء وبدت تتحمس وتتربع بجلستها وتحرك يدها ::/ أووووه أفا عليك بس عاد ماحبيت أجرح خولة وبديت أسايرها واقول ايه بآخذه وبنتزوج .. عاد انا كنت امزح بس هي الله يهديها كانت جادة ..
عاد مرة كنا ببيتهم وهذي هي المرة اللي انخطبت عقبها ..كنا جالسين نذاكر بغرفة خوله وهي كانت نازلة تجيب لنا عصير وتأخرت .. وعقب ما طلعت لنا فوق قالت انها راحت تسلم على خالها في الملحق وهذ اللي أخرها .. عااد سعااد بغت تموت وقامت تحبب خولة علشان تودينا نشوفه على الطبيعة .. المهم خولة ماعارضت ورحنا كلنا معها الى الملحق ووقفتنا عند الشباك حقه بس للأسف كان مسكر ...
سعاد ::/ لالالالالالالالالالا مسكر .. والحين لو فتحناه بينتبه ؟؟
خولة تبتسم ::/ لا ،،!! الخطة عندي وانا ام هندي شوفوا يابنات انا الحين بدخل الملحق كأني بسولف معه وبفتح لكم الدريشة زين ..
سعاد ::/ وكيف بنعرفه ياشاطرة ؟؟
خولة ::/ أصلا مافيه إلا هو .. ومع ذلك بأشر لكم عليه بحركة وأنتم أفهموها ..
لمياء بخوف ::/ لا خولة أحس اننا تهورنا تكفين مو لازم خلاص خلونا نطلع فوق نذاكر بس..
سعاد ::/ يالخوافة المفروض أنت اللي تحرصين على هالشئ ...
المهم راحت خولة وتركتنا عند الدريشة ولفت متوجهة لباب الملحق بس فجأة سمعنا صوت تنحنح ويوم التفتنا لقيناه فهد بضخامته طالع من باب الفلة وجاي للملحق .. يعني الملحق مافيه احد ..!! فتحت خولة الشباك وهي تضحك::/ هههههههههههههههه واحد صفر ماطلع موجود . معليش لمووووووي خيرها بغيرها ..
بس لما التفتت شافت خالها واقف ومنزل راسه وشافت سعاد متغطية بجلال الصلاة أما انا فكنت قاعدة على ركبي من الحياء ومغطيه وجهي بيديني ..
طلعت لنا خولة تركض ودبرت امر خالها اللي توهق وماعرف وشلون يتحرك ومسكتنا وطلعنا مع بعض فوق ..
عاد هو يومها كانوا قايلين له انهم بيخطبوني له لأنهم كانوا مصدقين وعقب ماشافني هذاك اليوم بعدها بأسبوع تقدموا لي ،، طبعا خالته هي اللي اتصلت بالبداية اما أمه اتصلت بعدين .. وكانت معارضة فكرة زواجي منه ...
سارة ::/ وكيف وافقتي عليه وهو ماكان عاجبك ؟؟
لمياء ::/ أممممم عادي جاء لبيتنا وشفته مع الشباك يعني كان ضخم طول بعرض وكان شكله مهيب .. لكن قال أبوي أهم شي الأخلاق اقتنعت بفكرة أبوي وفعلا من ملكنا وهو بصراحة رجال بمعنى الكلمة ويحبني ويداريني وهذا أهم شي ..!!
عذا تصفر ::/ يهووووووووووووووووووووووووه من قدك ياعم ؟؟ والله وطلعتوا حبايب ..
سارة تتنهد ويدها على خدها ::/ يعني كلكم تزوجتوا عن حب إلا أنا .. آآآآآآه متى بس أحد يحبني ..
عذا ::/ وش قصدك كلنا متزوجين عن حب ؟؟ تراني مازلت عزباء يا أخت سارة ؟؟((وتتنهد زي سارة )) آآآآآآآآآآآآه يعني ممكن يجي اليوم اللي راح انحب فيه واتزوج ..!!
ام عبدالله وهي ترميهم بالمخدة وتضحك::/ عيب عليك انت وهي ..
سارة تشخر باستهزاء ::/ أرجووووووووووووووووك لاتضحكيني عذاوه .. حضرتك من تلعبين عليه ؟؟ ترانا فاهمين ..
لمياء وهي تزيد النار حطب ::/ أصلا عذا مانسمح لها تحب أحد لازم تآخذ زياد ولد خالي لأنه يناسبها ..
عذا تضحك بحياء ::/هاهاهاهاها سخيفين مايضحك ...
دخل عليهم أبوهم في هاللحظة ومعه أسامة وكان معه اوراق وملفات وخرابيط لها اول مالها تالي ..
أبو عبدالله وهو يفك أزرار ثوبه من فوق::/السلام عليكم ..
الجميع ::/ وعليكم السلام ..
قامت سارة عن أبوها علشان يجلس مكانها وجلست هي جنب عذا ..
أم عبدالله ::/ هاه خلصتتوا كل شي ..
أبو عبدالله وهو يجلس براحة ::/ الحمدلله بنسلم له المزرعة بعد أسبوعين ..
سارة بحزن ::/ خسارة .. راحت علينا المزرعة
ابو عبدالله بابتسامة حب ::/ نهاية هذا الأسبوع بنروح لها كلنا كتوديع لها .. وبنآخذ الأرانب والقطاوة منها وبنحطهم ببيتنا وعقبها بسلم المفاتيح لراعيها ..
عذا بوناسة ::/ يعني صدق هالخميس بنروح ..
ابو عبدالله ::/ ايه صدق .. راح ننادي أخوي وإن كان عيال خالكم واللي تبغون وبنجتمع كلنا ...
عذا وسارة قاموا لأبوهم يحبونه على راسه ويتدلعون عليه من الفرحة ..
أما أسامة انسدح على رجل أمه ولف يدها على رقبته وقال لها تلعب بشعره ولمياء تعلق عليه وعلى دلعه ..
لمياء وترجفه مع رجله ::/ أنت لو سمحت ترى أمي حقتنا كلنا انت تبغى أحد يدلعك بروحك ياأخي تزوج وفكنا ..
أسامة وهو يقهرها ويحط يد أمه على صدره ::/ ياشين الغيرة ياناس .. حبيبتي تبغين أحد يدلعك كان ماجيتي لبيتنا وقعدتي عند جدارك .. هههههههههههه
لمياء وهي تضربه بالمخدة ::/ جدار بعينك يالماصورة .. وبعدين ترى جداري يسواك ويبيعك وتراك ماتسوى ظفر منه ..
سارة بسخرية ::/ مو قلنا ماتحبينه وش عندك تدافعين عنه الحين ؟؟ وين حسين فهمي وماادري مين والا طاروا في مهب الريح ..
عذا تضحك ::/ههههههههههههههههههههه لا وانت الصادقة جت الدبابة وسحقتهم ..
لمياء بنقمة ::/ نشوفكم بكرة من بتاخذون ؟؟ وحدة برميل زيت والثانية فيل افريقي مهجن ..
ضحك الجميع على مناقرهم وهبالهم ... أما أم عبدالله وأبو عبدالله فكانوا يناظرون عيالهم اللي اجتمعوا على الحب والأخوة وفرحانين لأنهم قدروا يزرعون فيهم أنهم عبارة عن شخص واحد ويد وحدة وكل واحد يحس بالثاني ويخاف عليه مثل نفسه بالضبط واكثر وتذكرت أم عبدالله في هالوقت ولدها المتغرب ولمعت عيونها بالحزن وتمنته فعلا يكون معهم ...
----------------------------------------------