[سكون الصمت]

لندن – بوستن
الفندق

شيخه
كنت قاعده اشوف فلم مو فاهمه منه شي من غير الترجمه .. اشوف الصور بس افلامهم اعوذ بللله ماينفهم منها شي .. يازين الافلام الهنديه من اول مشهد اعرف القصه .. ياربي .. والله اشتقت حق الكويت .. اشتقت حق ربعي .. والجامعه والطلعات والروحات .. اشتقت حق برجر كنج .. من زمان ماكليت وجبات .. اوووف ..
خذيت تلفوني ودقيت على مهاوي .. كانت الساعه عندهم 9 ونص ..
شيخه : الو
مهاوي : الوووو هلا شيخه .. هلا باللندنيه
شيخه :ابتسمت بضيقه .. ماادري ليش يتني البجيه . حسيت اني كارهه حياتي هني .. احس اني منبوذه .. عزوز مايدري عني ولاهي بحيبته .. صلاح وطول وقته مع رفيجه ولا يدري عني .. انا بروحي .. اكره اصير بروحي ..
مهاوي : شفيج شيوخ .. احس فيج متاضيقه عسى ماشر ؟
شيخه بتنهيده : ولا شي يسوى .. انتي وينج ؟
مهاوي : انا ببيت امي .. خلود عنده شغل .. من يوم سافرتوا وهو ماينشاف اربع وعشرين ساعه بالشركه
شيخه : ومنو قاله يسوي شي لعزوز .. كل واحد يجابل حلاله بروحه .. خالد مو ملزوم يسوي له شي كلش ..
مهاوي : شيخه انتي للحيـ ـ
شيخه : للحين ولي باجر .. لاتظنون بزواجي انا خلاص نسيت اللي صار .. مستحيل .. انا ابي اطلق منه ..
مهاوي بتنهيده : ينيتي !!! .. انتوا الحين متزوجين ؟؟؟
شيخه : منو قال ؟؟ احنا حالنا اهوا نفسه ماتغير .. الحمدلله
مهاوي : شييييخه .. كلامج هذا كبير..انتي بنفسج ماكنتي تبين تتطلقين يوم خلود سألج .. الناس شبتقول الحين ؟؟
شيخه : ماعلي من احد .. كلام الناس مايهمني بشي ..
مهاوي بنبرة : ..شيوخ .. عزوز يحبج
حست اني انفجرت هني بس سمعت هالكلمة من مها .. ماادري شصار فيني ..
شيخه : منو قالج انه يحبني منوو ؟؟؟ لو مثل ماتقولين .. ماهدني مثل الحمارة هني وطلع ماادري عنه .. لو يحبني .. ماعيشني بهالنكد اللي انا فيه .. عزوز بينتقم مني مهاوي .. بينتقم مني ..
تدرين انه يكلم وحده .. يدامي .. عايش حياته ولا جني موجوده .. أي حب أي خرابيط ..
عزوز مايربطني غيره الا الكره .. تكفون .. تكفوون مها .. طلقوني منه تكفوووون
وقعدت ابجي ... ماادري ليش .. ماادري شصار فيني فجأة .. ليش انفجرت يوم يابوا طاري الحب .. ليش قبل ماكان يهمني .. ليش احس اني مولعه من يوم شفت المسجات .. انا مابيه يحبني .. بس بعد مابيه يهملني .. انا ماعمره احد هملني وعاملني جني مو موجوده ..
مهاوي : شيوخ حبيبتي .. اهدي .. خلاص اليوم بس ييي خالد بقوله .. ومايصير خاطرج الا طيب ..
قعدت امسح عيوني ولا رديت عليها .. وصتني وكلمتني اكون عاديه واتحمل الين ماانشوف حل وقالت بتكلمني بس اهدى .. وسكرت منها وانفجرت بجيييييي .. غطيت راسي بالمخده وقمت اصييييح . ماادري شللي صار فيني .. ليش كل هالبجي ياشيخه .. ليييش ؟؟؟ كل هذا لانه مهتم بوحده غييرج !!! لا مستحيل .. مستحيييييل

خذيت تلفوني وفتحت شعري وفتحت الدريشه وقعدت استنشق شويه هوا .. هوا غير عن حياتي الكئييبة اللي قاعده اعيشها .. سكرت زراير قميصي الابيض بس حسيت بنسمة برد .. ويا على بالي اغني .. والهوا يطير شعري ودموعي .. اغنية لمحمد عبده كنت حافظتها من زمان
يا بعيد وجابك الله .. لين عندي وصلك

ما تمنيتك لأنك .. كنت ابعد من خيالي
ما خطر في بالي مره .. اني ممكن اوصلك
كنت اشوفك مثل نجمٍ .. في السماء ساطع وعالي
يا بعيد وجابك الله .. لين عندي وصلك

جيتني مثل الشروق اللي محى عتم الليالي
جيت فرحه للحزين .. اللي من همومه هلك
جيتني وانت يحبك الف محبوب بدالي
سخرك سبحانه اللي في عيوني كملك ..
يا بعيد وجابك الله لين عندي وصلك .

هو صحيح احنا التقينا ؟ هو صحيح انت قبالي ؟
هو صحيح اني حبيبك كان لي حق اسألك ؟
كانني احلم طلبتك .. خلني هايم لحالي
بالحلم عايش فيه دامي به معك ..خلني
يا بعيد وجابك الله .. لين عندي وصلك

وبعدها رن تلفوني .. وكانت مهاوي ..
مها : الوو ... الحلو راق وهدت اعصابه ؟
هزيت راسي مع اني كنت في عالم ثاني .. صراع مع نفسي وروحي .. عنادي وكرامتي .. وانا اشوف روحي كل يوم اضعف واضعف ..
مها : شيوخ .. حبيبتي .. كلشي بيتصلح .. اهم شي لايضيق خلقج ..

شيخه : ماظل في شي يونس مها .. حياتي صايرة مثل صفحة سودا .. كئيبة وباهته .. مرات اقول ياليت انا اللي مت مو امي ..
مها : ششش لاتقولين هالكلام .. اقولج من يمي الحين ؟
شيخه : منو ؟
مها : جراااحوو .. مييت يببي يكلمج
لاشعوريا ابتسمت .. ياحلاته هالولد
شيخه : عطيني اكلمه شوي ..
مها : ههه هاج
جراح : هاي خالتي شيخه
شيخه : هلا ياروح خالتك .. كشخه العربي متحسن عندك .. عفيه عليك
جراح : ماي فاذر دايما يقولي تعلم يور لانجوج
شيخه : فديييتك انا .. ها شخبارك تسمع كلام يدتك ولالا ؟؟
جراح : ايه اسمع الكلام حتى سألي عمتي مها ؟
شيخه : خلاص دام جذيه شنو تبيني ايبلك من لندن ؟
جرااخ : مممم كارز .. ريد كارز
شيخه : ولا يهمك .. خلص مابخلي سيارة حمرا الا واييبها لك بعد شتبي
جراح : خالتي .. بابا از هير .ز هي ونت تو توك وذ يو ..
شيخه بابتسامه : عطني يله
شوي ولا ناصر
ناصر : هلا بالشيخه .. شلونج ؟
شيخه : هلا ناصر انا بخير .. طمني عنك ؟؟ شلونك .. وو شلون جراح ؟
ناصر :كلنا بخير ومشتاقيلج .. عسى مرتاحه
شيخه : الحمدلله وانت بعد لك وحشه
ناصر : ...... انا ناطرج ..
شيخه : ......... سلم على خالتي والبنات
ناصر : .... حطي بالج على روحج
شيخه : مع السلامه
الجانب الثاني
عزيز
فتحت الباب شوي شوي .. وانا اسمع شيوخ تغني .. ماقدرت اقاوم ..
ماسكرت الباب عشان ماتحس . ورديته بشويش .. قربت منها شوي شوي ..
حسيت اني يمكن احضنها او المها بيدي ..

صوتها مثل الجو الحلو .. مثل المطر لالامس القلب والروح ..
ماحسيت الا بتلفونها يرن .. تميت واقف بمكاني .. وانا اسمعها تكلم مها ..
كانت تشتكي .. حياتها سودا معاي !! ..!!
وبعدها كلمت جراح .. تسأل عنه ؟؟ ولا عن ابوه ؟؟
بس يوم سمعتها تقول .. هلا ناصر .. حسيت ان الدم بعروقي كله نشف .. حسيت روحي متيبس بمكاني .. كنت اسمع حتى انفاسها .. ماقدرت اتمالك روحي .. ليش سكتت ..شقالها ؟؟؟؟
التفت عقب ماسكرت التلفون وهي تلم شعرها بايدها اليسار .. وماحسيت بروحي الا وايدي تنمد على خدها .. وتعلم عليه طراق ماادري شلون كان ..
كنت اشوفها والشرار يطلع من عيوني .. وانا اقولها .. وبيديني ماسك شعرها
عزوز : خسارة ان امج رضيه .. خسارة هالقلب والعفه والطهاره تطلع بنت مثلج ..
كانت عيونها العسليه مبطله عالاخر وهي تشوفني بصدمه .. وانا كنت احس ان النار تطلع من عيوني .. كانت قبضة ايدي قويه .. لدرجه اني كنت احس باعصابي بتطلع .. وكملت
عزوز : ماتستحين .. هذا وانتي متزوجه .. قاعده تكلمين ريال غريب وحب ورومانسيه ياجليله التربيه .. انا اللي اعرف شلون اربيج .. ولاتفكرين انج بتطولين نصور ولا بيطولج .. والله والله دامي عايش .. نصور مراح يتهنى فيج .. سمعتي
ودزيتها بيدي على السرير بكره وحقد ونفور .. اكررررررهج .. اكرررررهج
سمعت شيوخ تصارخ بعد مالفيت ويهي كنت بطلع
شيخه : انا مو متربيه !! .. انا ولا انت ..!! اللي مسجاتك ومكالماتك على مسمع من الكل .. انا الحين اللي صرت غلطانه !! .. رضيت فيك غصب مع انك سبب موت اغلى شخص بحياتي .. رضيت فيك وانت تخوني .. رضيت اتغرب واهد ديرتي واهلي وانت هادني بين اربع طوف ..
والحين ياي تحاسبني ليش اكلم ناصر ؟؟؟ !!!!
ناصر هذا اشرف منك ومن امثالك .. ناصر حبني وعزني وليومك يتمناني .. وانا لو كنت جليلة حيا .. جان هديتك ولا رديت على احد .. بس مو انا اللي ادفن روس اخواني وابوي بالتراب ..
ليتك سمعت شقالي ناصر ؟؟

تدري شقالي ؟؟ قالي شلونج ؟؟؟

انت عمرك وحياتك ماسألتني شلونج ؟؟ .. شبغيتي مابغيتي ؟؟ محتاجه شي ؟؟
ايه .. احب ناصر .. احب ناصر واكرهك .. تعال طقني .. اذبحني .. خلاص تعبت منك
فجرتني .. يوم قالت احب ناصر .. حسيت اني ينيت يمكن .. او طار عقلي
مسكتها من شعرها وانا اطقها : جـــــــــب ولا كلمة ... جـــــــــــــــــب
بس اهي كانت تصارخ بهستيريا : اذبحني .. اذبحني مثل ماذبحت امي .. اذبحني
جابلت ويهها وانا اصرخ فيه وامسكها من جتوفها
عزيز : انا ماذبحت امي ..... تفهميين .. انا ماكنت موجود .. كنت مع خلود بالمعسكر .. مادريت بشي الا يوم قالولي امي توفت .. انا حالي حالكم .. ماعرف شي ولا ادري عن شي ..
ولا شعوريا صوتي خف .. حسيت بنبرة حزن .. غصه يمكن .. كان الحجي مايطلع مني وانا اقول
عزوز : امج هي امي .. انا فقدت امي مرتين .. انا ماعندي احد .. امي رضيه كانت كل شي بحياني .. والحين ماعندي شي .. ماعندي شي ..
هديت شيووخ وطلعت .. طلعت بروه روحي .. ونفسي وعذاباتي ..
نزلت تحت وانا مخنووووووووق .. دخلت البار اللي تابع للفندق من غير وعي ..
طلبت لي شي يفقدني احساسي .. ابي شي يخليني بره حياتي وواقعي .. ابي انسى ان شيوخ قالت احب ناصر .. ابي انسى الجرح اللي كل ماله ويزيد يزيد ..
شربت وشربت وشربت .. لما حسيت اني خلاص .. مراح اقدر اوقف على ريولي .. تميت ساعتين .. بين اصوات الموسيقى والحريم والناس والزحمه .. وانا والقلاس اللي يمي ..
ودموعي اللي تنزل مني غصب ..
الساعه 3 ونص الفير
عزوز
صعدت الغرفه وانا احس بدووخه احس اني مو طبيعي ..
قعدت احاول احط المفتاح بس مو قادر اركز .. وبس دخل فتحت الباب ..
وفتحت الليت اللي بالممر .. وانا اشوف شيخه قاعده عالسرير ولامه ريولها بيدينها ومسنده راسها على ريولها ..
قربت شوي شوي وقعدت على الكنب وانا اسند راسي لين ورى .. وماحسيت الا بايد شيخه على ريولي
قبل لاتتحجى بشي .. قلتلها
عزيز : باجر بس نرد لندن .. بحجزلج على الكويت .. ورقه طلاقج بتوصلج قريب ..
ورديت سندت راسي وماحسيت بشي ..
__________________
عزوز

الساعه 10 ونص

قمت وانا احس بصداع عججييب .. مسحت شعري بايدي وقمت وانا احس بضيق .. قمت وكنت متجهه للحمام .. ولاشعوريا شدتني المنظرة المعلقه على الكبت .. وقفت عندها شوي .. وشفت روحي .. حسيت اني قاعد اصير نسخه من ابوي ... اشرب واطق مرتي .. وعديم المشاعر والاحساس .. حسيت وجنه صوت يقولي راح تصير مثل ابوك .. راح تعيش حياته وتقضي عمرك مثله .. غمضت عيوني احاول امحي هالصورة من بالي واعاندها .. ولفيت صوب سرير شيخه .. وعلى حبيبتي اللي على السرير نايمه بكل هدوء وبراءة ..
... على حبيتي .. ايه حبيبتي .. لاتستغربون .. شيوخ مهما تسوي .. بتظل حبيبتي وروحي .. شيوخ اهي قلب عزوز .. حتى لو ماكانت تحبني .. حتى لو كان قلبها مع ناصر .... ناااصر !! ااااااخ ياناصر .. ماظن تحبها كثر ماانا احبها ..

قربت صوب سريرها .. كانت نايمه ولامه ايدها المسكورة بحضنها .. وشويه من كحلها سايح على خدها بمكان الدموع .. عورني شكلها .. كانت نايمه وهي تبجي . .. مديت ايدي ومسجت على خدها وبستها .. اييه بستها .. يمكن تكون اخر مرة اكون بقربها جذيه .. كنت ابي اشبع منها .. ولو كانت نايمه ..
تمنيت اشوفها وانا محتار .. احس اني بشتات .. احبها بس خلاص .. ماقدر اتم معاها اكثر .. لان الحب مو بالغصب .. واذا كان قلبها لواحد ثاني مستحيل يكون لي بيوم ..
حسيت بدمعه نزلت من عيوني واستغربتها ..
خلاص عزوز .. كلشي انتهى .. غير مشاعرك ودوس على قلبك .. وكلن يروح بطريجه ..
قمت ببعد ماتنفست عطرها وبست عيونها وجني اودعها .. رحت الحمام وعقب ماطلعت قربت منها وانا اقول
عزوز : شيخه ... شيخه ..
شيخه فتحت عيونها مدها وعقب قالت: هلا .. ؟
عزوز ببرود وبجمود متصنع : يله جهزي روحج بنمشي بعد شوي ..
وهديتها .. اخذت الهداند باك مالتي وزهبتها وغيرت ملابسي ولبست جاكيتي مع بلوفر رمادي وشال اسود وجينز ..
خذيت نظارتي الشمسيه لان اليوم الشمس طالعه شوي .. ودقيت على الرسبشن اسوي تشيك اوت ..
وسكرت التلفون وشيخه كانت طالعه من الحمام .. كنت احاول اني امنع روحي حتى من لمحها .. كنت احس جني بحرب مع قلبي .. يمكن هذا اصعب شي سويته بحياتي .. وقلت لها وانا اخذ اغراضي واطلع ..
عزوز : انطرج باللوبي .. بس تخلصين نزلي ..
وسكرت الباب ومشيت ..

شيخه

فتحت عيوني على ويه عزوز .. صح كنت نايمه بس يعني اول شي شفته كان ويه عزوز .. قربه وعطره .. اول مرة احس ان عزوز حلو .. كانت عيونه الوساع الناعسه تشوفني وخشمه الطويل المسلول ورجولة ويهه وشعره الاسود اللي احاول كثر مااقدر اني مااشوفه .. او المحه ..
حسيت برعشه غريبه تمشي بجسمي كله .. وقلت
شيخه : هلا ..
قعد يكلمني ببرود .. شيوخ شفيج نسيتلي ليلة امس .. وفجأة اتذكرت شصار امس .. حسيت اني ببجي .. عزوز بيطلقني ..!! .. مو هذا اللي ابيه ليش انا مو مستانسه .. ليييش ؟؟؟؟
شيوخ .. انتي كنت تبين تتطلقين .. خلص هذا اللي تبينه وبيصير ..
صرت اصرخ من داخلي .. مابي .. ماحب عزوز صح . .بس مابي اطلق منه ..
شيخه .. انتي تحبين عزوز !!! مستحيييل .. انا اكرهه ...
قمت من سريري وانا ارفع شعري بكلبس .. دخلت الحمام وغسلت ويهي وفرشت وتوضيت لاني ماقمت لصلاة الفير .. وبس طلعت قالي كلمتين ومشى ..
كانت الغرفه للحين شايله عطره اللي تعطر فيه عالسريع قبل لايطلع .. غمضت عيوني بعد ماسكر الباب وقعدت على السرير .. ابجي .. ماادري ليش .. اهوا سبب موت امي .. شيخه اصحي .. خلااص .. مستحييل اهوا سبب موتها .. اهوا كان بيده يسوي شي .. حتى لو كان محجوز .. اكيد كان يقدر يمنعها ..
لميت اغراضي وقعدت افتح الادراج اتأكد اني مانسيت شي او عزوز مانسى قبل لا اطلع .. ولقيت كل ملابسي بواحد من الادراج .. فهمت ان عزوز اهوا اللي مسوي جذيه .. ضحكت بس تلاشت ضحكتي بسرعه .. وشفت الادراج اللي يم الكنبه ولقيت مشط عزوز موجود .. شلته مع اغراضي ولبست جينز يديد مع بلوزة تفاحيه وجاكيت او وايت بزراير ومخصر شوي ولفيت شيلتي .. صليت قضاء الصبح وطلعت نازله اللوبي ..

عزوز

كنت قاعد اكلم خالد واسأله عن ابوي وعن الشركه وعن الدوام .. قعد يقولي بعض المشاكل اللي قاعده تواجهه مع النظام اليديد ويبيني اكلم المهندس افهم منه .. لكن مخي ماكان معاي .. ماادري شقول حق خالد .. اقوله اني بطلق شيخه .. لا .. نرد الكويت وبعدها اكلم خالد واقوله بكل شي ..
خذيت نفس طويل بس شفت شيخه طالعه من الاصنصيل ..و خليت لعيوني الفرصه انها تتأمل هالجمال من غير لا امنعها .. ابتسمت لما تذكرت هالذكرى العتيجه .. مشية شيوخ ذكرتني بسالفه قبل 10 سنين ..
كنا انا وعزوز ونصور وجاسم ... يوم الزواره .. الريال فينا اللي يبوس وحده من البنات >> كنا شايفين فلم امس بالتهريب وقلنا منو فينا الريال اللي يسويها .. واليوم التطبيق .. واللي يسويها لازم كل واحد فينا يعطيها ربع دينار >> كان عمرنا وقتها 10 سنين .. جاسم اكبر منا بسنتين .. فكان خايف ومستحي .. بس احنا ماندري شسالفه .. خلود خاف خواته يعلمون عليه .. بس انا ونصور كنا متشجعين ..
مع اني كنت صغير بس اول وحده قعدت يمها عشان ابوسها كانت شيوخ .. كنت ابي اخذ الفلوس بسرعه .. وابيهم يقولون اني ريال > قعدت يمها وشفتها كانت تلعب بسيارتي .. قلت لها
عزوز : هذي سيارتي منو قالج تاخذينها ؟؟
شيخه : خلود عطاني .. مابي هذي مالتي
عزوز : هيي البنات مايلعبون بالسيارات ..بس الصبيان
شيخه اللي صدقت : امبلا يصير !!
عزوز : اذا لعبتي بالسيارات راح تصيرين صبي ..
شيخه اللي بتبجي : لا لا جذاب ..
عزوز : والله كيفج لاتصدقين .. جسوم كان بنيه وبس لعب بالسيارات شوفي صار صبي .. حتى روحي سألينه
شيخه وهي فاتحه عيونها ومصدقه
عزوز : بس في طريقة وحده .. لازم ابوسج على خدج وعادي لو تلعبين مايصير فيج شي ..
شيخه اللي كانت صغيره ماتدري شسالفه : امي تقول عيب ..
عزوز : كيفج عيل .. راح تصيرين صبي .. ونسميج يوسف
شيخه اللي قامت تبجي : مابي مابي اهي اهي اهييييييييييي
عزوز : خلاص خليني ابوسج وبس خلاص بتمين بنيه ..
شيخه وهي تمسح دموعها : زين ..
وبس قربت صوب خدها ولا يشوفني عمي بوخالد ويطقني ذاك الطق اللي ماانساه .. والصبيان يضحكون وانا اتوعد فيهم .. وشيوخ يتها بعد زفة محترمه
ضحكت يوم تذكرت شكثر كلت هالبنت زف وطق من وراي ..
ناظرت مشيتها .. أهي نفسها مشية شيوخ قبل عشر سنين .. نفس النظرات البريئة وشموخ الانف ..
نفسه الغرور اللي تشهد له حوايبها ..
بعدت عيوني عنها احاول اني استرد بعض من قوتي اللي تنهار يدامها لاشعوريا .. وقمت وقفت وهي تبعتني

ركبت السيارة بعد ماحطيت اغراضنا ورى .. وشغلت اغنية لمحمد عبده احبها .. ومشينا ..

اعتـــــــرفــــــلك)...

لاهي نار ولاهي ما
ولاهي غيمة ولاسما

ان حكت .. غنت سنابل من رضا
والسكوت .. إن صار نيران الغضا

يارضاها ..وقف وناظر شوي
شف غلاها .. كيف سوى بشخص حي

وكيف حي ولا لقاها.... وان لقاها
. ما بقى في يدينه.....شي غير انه يحتريها

سولفي للناس عني
سولفي للناس عني
قولي اني .. ما عرفت اختار من
قلبي يحبــــــــــــــــه

سولفي للناس عني
ماعرفت .. اقرأ وجوه
الحاضرين من الاحبه

اعترفلك .. اني فعلاً ما عرفتك
ما قدرت اوصل لحل وما فهمتك
تجمعين الضد في كل الامور
غامضة مرة .. ومرة مثل نور

تشبهين ايام .. اوقات الخريف
وتمطرين احيان.. احساسك زهور

آه .. من قلبي نصحته
بس عيا ينتصح نبضه يبيها
آه .. منه ليه عيا

ليه عزم يترك الكون ويجيها
ماقدرت القى لهذا القلب حل
الجواب اقفى بظله وارتحل

ما بقالي .. غير انتي ياغريبه
يارحيل .. العمر فيني يا حبيبه

صدقيني صرت من بعدك اخاف
واعترف ان الخلاف واسع طريقه

واننا ما نلتقي .. في أي شي
فينا اختلاف .. فينا اختلاف
وللأسف هذي الحقيقة


الجانب الثاني

المستشفى
صلاح
كنت قاعد يم محمد بعد ماصحى صالها مده قصيرة .. عرفني وعرف علي .. سألني اشيا وايد لكن ماعرفت اجاوبه على ولا شي .. واكثر شي تعبني يوم قالي
محمد : صلاح .. كلمت الدكاترة وقلت لهم اني المستشفى .. لا يحرموني هالكورس .. قولهم اني مراح اطول ..
حسيت وجنه غصه بقلبي .. شي عورني هني .. ماقدرت اتحمل وطلعت بره .. اخذ نفس .. الايام اليايه اصعب واصعب .. ياترى شلون بقول لمحمد عن حالته .. شلون بنواجهه .. شلون بيتقبل الموضوع ؟؟
سندت راسي على الطوفه وغمضت عيوني . . ثواني الين ماحسيت بصوت يناديني ..

سناء بتردد : صلاح .. !!
رفعت راسي وانا اشوفها مستغرب .. تمقلت بويهها شوي وعقب قلت ..
صلاح : هلا والله ..
سناء منحرجه وبس عيونها كانت غير .. كان سؤالها فيه اهتمام خوف .. رغبه .. ماادري
قالت لي
سناء : انا اسفه .. ادري يت من غير لا اقولكم .. بس ابي اطمن على محمد .. شلونه الحين ؟
صلاح : الحمدلله .. قبل فترة قصيرة فتح عيونه وقام يتحجى .. وعرفنا يعني .. بس للحين ننطر الدكاترة شيقولون ..
سناء : صج .. يقولون انه مراح يرد الكليه ؟
غمضت عيوني وابتسمت ورديت عليها : كل شي بامرالله ..
سناء : لا تقولون جذيه .. ان شالله بيرد الكليه ويمشي ..
كانت تكلمني وعيونها متروسه دموع . كلامها فيه غصه .. حسيتها كانت مرتبكه .. وقلت بتردد
صلاح : حياج ..
سناء : يصير ادخل . ! .. اقصد مايضايق .. بس بشوفه من بعيد ..
ابتسمت : لا مايضايقه .. اصلا اهوا يمل بروحه .. وجود الناس حوالينه يونسه
قلت هالكلمة ومشيت وهي تبعتني داخل الغرفه .. وكان محمد منسدح ويكلمه علي ..
قلت اول مادخلت : شوف شكثر الناس ماتستغنى عنك .. وهذي سناء .. يايه تزورك ..

الجانب الثاني

محمد

رفعت راسي بصعوبه وانا اشوف ويه مو غريب علي .. شايفه بس مو ذاكر وين ..صغرت عيوني بتركيز اكثر .. وبعدين وجهت عيوني صوب صلاح ووجني ابيه يقولي منو .. !
ابتسم بويهي وقال
صلاح : هذي سناء .. اللي معانا بماده الدكتور ريتشارد ..
محمد اللي ذكر الويه بس بعده كان يتمقل بويها : ... هلا .. هلا سناء ...
سناء بارتباك اهتمام وخوف : .. شلونك محمد ؟؟ ان شالله الحين احسن ؟؟
محمد اللي كان يحس بدوار : الحمدلله .. احسن .. ليش متعبه روحج ويايه !!
سناء وهي تشوفه : لا .. كنت ابي اتطمن عليك .. شلونك الحين ؟ احسن ..
محمد بابتسامه : الحمدلله ..
ويكلم صلاح : صلوح .. اذن ولا بعد ؟؟
صلاح : لا باجي دقيقتين على الاذان .. خلني اقوم اوضيك حق الصلاة ..
رفعت جمومي ورفعت فراشي بمساعده اخوي علي .. بوضع الجلوس .. ويه صلاح ووضالي وصليت وانا ثاعد

سناء

دخلت غرفة صلاح بتردد .. حسيت روحي متطفله ومالي معنى .. بس ماقدرت امسك روحي .. ولا ارد فضولي بشوفته .. حادث محمد هزني .. وكلام الطلبه عنه بالكليه يخوف .. بيوم وليله صار مايقدر يمشي .. ولا يقدر يكمل دراسته .. ياترى لو درى شبيسوي ؟؟ ويمكن يدري وصابر ..

دخت عقب صلاح .. وانا مترددة .. كنت اشوف محمد باستغراب .. توقعت اشوفه منهار .. مصدوم .. لكن صدمني انه كان يضحك ويبتسم .. واحد بنفس حالته يمكن كان ين ..
واللي الجمني اكثر .. لما قال لصلاح انه يبيه يوضيه .. يبي يصلي ؟؟؟؟

وهو في هالحاله يحاتي الصلاة ؟؟؟؟ .... وانا بصحتي وعافيتي ولا مرة فكرت اسجد لربي ..!!
استحيت من روحي .. ونزلت البلوزتي القصيرة اللي يدوب تغطي شي .. وكتفت ايدي العاريه بخجل ..
حسيت اني ببجي .. شفت اخوه سلم علي بتحفظ ورسميه ومن غير لا يشوفني .. وكلم صلاح ومشى ..
وعقب قالي صلاح

صلاح : انا رايح ايبلكم شي تشربونه .. ماني مطول ان شالله .. شتامرين علي
وقلت بسرعه : لا لا .. ولا شي .. انا ماشيه الحين ..
صلاح : مايصير .. عالاقل انتي متعنيه لازم تشريبن شي ولا ترى محمد بيزعل
قال هالكلمه وابتسم ..
وانا سكت وقعدت بكرسي كان قريب مني ..
طلع صلاح .. وانا حسيت مكاني كان غلط .. لكن فضول ياني اسأله
سناء : شلونك الحين محمد ؟؟ احسن ؟
محمد بضحكه : هههه الحمدلله .. لاتخافين .. ازمه وتعدي ..
ازمه وتعدي !!!! >>> كل هذا وازمه وتعدي ...
محمد اللي كان يعدل سريره بجهد ومو قادر .. حسيت فيه وعلى طول ييت ..
سناء : اساعدك .. ؟؟
محمد : تسلمين يالشيخه .. بس نزليلي السرير شوي .. احس بدوار ..
قمت ونزلت السرير حقه ووقفت عقب وقلته ..
سناء : اييبلك شي ؟؟ ..
محمد بابتسامه وهو يهز راسه : لا والله .. سلامتج .. قعدي بس ..
رديت قعدت لكني ماقدرت اتم اكثر .. ماقدرت اشوفه بهالحاله .. شي مثل صراع في نفسي .. يعني اذا تميت اكثر يمكن انهار .. ماادري شصار فيني .. بس ماقدرت اتم وقلته

سناء : اسمحلي .. انا ازورك وقت ثاني ..
وطلعت .. حتى مانطرته يقولي شي .. طلعت وانا اركض وابجي واصيييييح .. مخنووقه وماقدرت اتم اكثر شكل محمد هزني .. هزني فوووق ماتتصورن ...

بعد ساعه
السكن
شهد وعليا

تيييييييين تووووون >>> صوت الجرس
شهد اللي كانت تكسر حب وتشوف فلم : عليو قومي فتحي الباب
عيااللي كانت تغسل الحمام : مابا .. قومي انتي ماتشوفيني مشغوله !!
شهد : حبيتبي انتي .. قومي قومي .. الفلم حلو مابيه يطوفني ..
عليا : سوري حبيبتي .. حركي ريولج شوي فديتج ..
شهد : اوووف .. زيين
قمت وفتحت الباب وانصدمت بسنوي . يات بحضني وقعدت تبجي منهارة .. عمري وحياتي ماشفت سنوي جذيه .. رفعت ويهها وانا اسألها ..
شهد : سنوي .. شفييج ؟؟ شصاير ؟؟
عليا اللي طلعت من الحمام وهي رافعه هدومها وبيدها المساحه : شووووو صاير ؟؟ بلاج سنوي ؟؟
سناء : ماقدرت اشوفه جذيه ..هزني منظرة ..وفوق كل اللي فيه .. كام يضحك ويبتسم وجنه مافيه شي ...
لميتها على صدري وانا اقول : ششش حبيبتي هدييي هديي .. تعالي ..
قعدنا بالصاله وسناء كانت تبجي بشكل فضييع .. وبعد ماهدت شوي كنت بونسها وقلت
شهد : تبين تضحكين .. شوفي شكل سنوي تكفين ؟؟ مو جنها خدامه مسترجعه ؟؟؟
رفعت راسها سناء وشافت عليا وفطست ضحك : هههههههههههههههههههههههههههههههههه
شهد : ضحكي ضحكي .. شوفي يازينج وانتي تضحكين ..
عليا : عاد مالقيتوا تضحكون الا علي انا هههه يله معليه
وقالت سناء بصدق وعفويه حسيت فيها بعيونها : تخيلوا .. كان يضحك ويبتسم ويسولف .. محمد ماراح يمشي مرة ثانيه ولا راح يقدر يكمل دراسته .. وكان حامد ربه وشاكره .. وهو في هالحاله .. وانا اللي كلشي عندي وبصحتي .. عمري وحياتي ماحمدت ربي على اللي انا فيه .. الله قادر انه يخليني بيوم وليله مثل حالة محمد واسوء..
حسيت روحي صغيره وتافهه وجاحده .. ماقدرت اتم اكثر .. طلعت حتى ماسلمت عليه ..
سكتا كلنا واحنا نسمع سنوي وهي تتحجى باندفاع .. كان كلامها بعيونها اكثر منه مجرد كلام .. حسيت فيها متأثرة .. ابتسمت من داخلي عشانها .. وحاولنا نهديها ونطمنها .. وقلنالها تنام عندنا الليله بس قالت ان يدتها وخالها وبنت خالها بيوصلون اليوم .. لازم تروح تستقبلهم ..
__________________