الجزء الواحد والعشرين
لندن
غرفة صلاح
فتحت عيوني شوي شوي .. كنت احس النور يخترق عيوني .. حاولت ارفع راسي شوي بس ماقدرت .. كان الصداع ماخذ كل مأخذ مني .. كنت احس الدنيا تدور بعيني ..
قربت تلفوني وشفت الساعه كانت 2 ونص الظهر .. قمت بتثاقل مو طبيعي .. رحت صوب الدريشه وفتحت الشباك .. كنت احس اني ابي اشم هوا .. هوا نظيف بعيد عن الهوا المسموم اللي شميته امس .. احس اني مخنووق .. مخنوووووق
شفت روحي بالمنظرة .. والهالات السودا اللي تحاوط عيوني بسبب السهر والشرب .. وقله الايمان وهجر الصلاه
كنت اسحب ريولي سحب .. رحت المطبخ واخذتلي بندولتين .. وطليت على محمد لقيته نايم .. رحت فتحت التلفزيون بملل لكن مخي وتفكيري مشوش .. احس اني مخنوق احس الهوى كله اختفى .. قمت بضيق واخذت كوتي وطلعت بره الشقه .. اتنفس .. واتنفس بعييد ..
مريت صوب حديقة قريبه من بيتنا .. وحسيت ريولي تاخذني لها .. قعد على كرسي بعييد شوي .. كان المكان كله هدوء .. الا من غير اصوات العصافير والهوا اللي يحرك الاوراق والشير .. وصوت افكاري وحديث نفسي اللي يعذبني اكثر واكثر
وللحظة بس حسيت شريط ليلة امس كله مر يدامي كرهت روحي اكثر واكثر .. حسيت اني فاسق .. ان ذنوب الدنيا راكبتني من راسي الين ريولي ..
شنو الحل يا صلاح .. الين متى بتم جذيه .. ماتخاف تموت وانت بهالحاله ؟ وشنو بتقول لربك ؟؟ باي ويه بتقابله ..
صارت هالاسئلة تاخذني يمين ويسار .. شفت ساعتي وكان اذان العصر توه مأذن .. قمت ورحت المسيد اللي بانيته السفارة السعوديه .. قريب من شقتنا .. وصليت العصر .. ودعيت ربي انه يمدني بالقوة .. عشان اتخلص من اللي انا افيه ..
حسيت براحه مو طبيعيه بعد الصلاة .. يالله .. من طبيت هالديرة وانا كنت ناسي الصلاه ومن غيرها ماحسيت بطعم الراحه كلش .. مريت كوفي يمنا واخذتلي نسكافيه .. ولا يرن تلفوني وكان المتصل محمد ..
صلاح : هلا حمود .. قعدت ؟
محمد : اسكت صلوح .. احس راسي بينفجر .. وينك طالع من الصبح ؟
صلاح : أي صبح يامعود الساعه الحين 3 ونص العصر ..
محمد : اشوه ان الدكتور معطينا اوف هاليوم ولا شلون كنا بنقعد ..
صلاح : حموود .. الين متى واحنا جذي ؟؟
محمد : .......... تدري .. اول مرة احس بالضيق .. رغم ان كلشي عندنا .. بس احس اني مخنوق
صلاح : حموود .. والله هالطريج ماوراه غير البلاوي .. حتى الصلاة نسيناها .. واحنا اللي كنا احرص الناس على صلاتنا .. شوف الوضع اللي احنا فيه هالحين ..
محمد : هههه كل هذا خايف ؟
صلاح : من شنو ؟
محمد : عشان شهد شافتك وانت سكران امس ؟
صلاح بصدمه : شهد !!!!!!!!!!!!!!!!!
محمد : ايه انت كنت فاقد كلش .. ماتدري عن اللي حواليك ؟
صلاح : انت شتقول اهي شافتني ..!!! ؟؟؟؟
محمد : بس لاتخاف .. ماتوقع بتعلم اخوك ولا اهلك .. ماتتجرأ !
محمد ماكان فاهمني .. انا ماهمني لو قالت لهم ولا لا .. انا كل الللي همني . . انها شافتني .. وانا اللي انقد عليها واعايرها .. شراح تقول عني ... شالصورة اللي بترسمها عني !!!
محمد : هههههههه شفيي هذا .. ماهقيتك خواف ..
صلاح : مو قصه خوف حمود .. الموضوع اكبر من جذيه ..
محمد : تحبها ؟
صلاح بصدمه اكبر : نعم !!! ؟؟؟ أي شي ؟؟ شكو ؟؟؟ ماكو شغل احبها .. ليش يعني
محمد : ههههههههههههههههههههه بس بس خلاص .. والله انك تحبها
صلاح : اقول استريح بس ... ماعندك سالفه
محمد : صلاح ...... امش خل نروح نصلي العصر ..
ماتدرون شكثر استانست يوم سمعت هالكلمه من حمود .. احس ردتلي الروح مرة ثانيه .. حسيت بسعاده ماتنوصف .. والله ماتنوصف . .
وقلتله بسرعه
صلاح : انا صليت بالمسيد اللي يمنا ..
محمد : يالخاين ليش ماتعزم ؟؟؟؟؟
صلاح : هههههههههههههههه زين انا برد البيت واييب لنا شي ناكله وانت روح صلي وتعال
محمد : نو نو .. انا عازمك اليوم .. انت رد البيت وانا بيب لنا الغدا واصلي وايك
صلاح : صار يالغالي .. انطرك ..
محمد : اوكيه ..
صلاح : يله باي ..
محمد : صلاح ؟؟
صلاح : هلا ؟
محمد : ........ حط بالك على روحك .. وادعيلي معاك
صلاح : ليش انت رايح حرب ؟
محمد : ههههههههههههههه
صلاح : محمد شفيك ؟
محمد : ماافيني شي .. يله رد البيت بلا هذرة ..
صلاح باستغراب : اوكيه ..
سكرت من حمود وانا مستغرب كلامه .. ليش يقول جذيه .. كنت خايف .. خايف بس ماادري ليش ..
خذيت قهوتي .. ورديت البيت انطره يي وافهم منه السالفه ..
>>>
نفس اليوم .. الخميس
الساعه 2 ونص الظهر
بيت حصه بالحديقه
شيخه
كنت قاعده اشبهه باللي بياخذونها اعدام بعد شوي .. قاعده على اعصابي .. وحصوص ومها كل شوي وحده تقوم .. وحده تدق تلفون .. يسولفون ويضحكون . .يبون يطلعوني من الجو المكهرب اللي انا فيه .. بس مو قادره
تخيلوا .. بعد شوي .. يمكن يدش خلود وعزوز .. وتنتي حياتي .. ياويلي .. مستحيل اروح معاه .. انا وعزوز بروحنا .. مستحيل .. لمنوا اشكي .. ابوي ومستحيل اكلمه او يكلمني .. خالد وسبق وسألني وانا سويت فيها شجاعه وقلت بطلع له عيونه وانتقم منه .. بس الظاهر اني انا غلطانه .. شكله اهوا اللي بيطلع عيوني .. حريمته والله حريمته ..
سلطان اللي توه داش : درب ..
لبست شيلتي اللي كانت على جتفي اصلا .. ومهاوي دخلت تلبس لانها كانت لابسه قصير .. وقعدت يم حصه بنفسيه .. مالي خلق اكلم احد ولا اشوف احد
التفت علي سلطان يبي يطفرني : ها العروس .. متى طيارتكم ؟
شيخه : ماادري ..
سلطان : ههههههه شنو بتسافرين ولا رايحين يذبحونج ؟؟
حصه : سلطان .. لاتأذيها بس الحين تطنقر عاد ..
سلطان : زين .. ترى الشباب ياين بالطريج .. يوسف والعيال وينهم ؟
حصه : يوسف نايم والعيال عند اختك نايمين من امس ..
سلطان : مايبتيهم للحين ؟؟
حصه : خلهم نايمين .. عمتم تبيهم . وبعدين انا مرتبشه هاليومين ..
سلطان : انتوا قايلين لصلاح عن ملجه شيوخ وزواجها ؟
حصه : لا خالد قلنا لاتعلمونه اهوا بيقوله اليوم ..
سلطان : والله خالد مينون ..
حصه : بالعكس. .. جذيه احسن
والتفت حصه صوبي .. فهمت انهم مايبون يقولون لصلاح يعرفونه بيي وبيشوف السالفه ويمكن انا اسوي سالفه واربشه معاي
سلطان : زين يالشيخه .. زاهبه اغراضج
شيخه : حصوص شوفي ريلج عاد !!
سلطان : هههههههههه ... بل بل .. انا النفسيه زفت .. وهذاك بعد نفسيته زفت .. انتوا ليش تزوجتوا ماادري
حصه : سلطاان !!! .. قولها كلمه تطيب خاطرها .. هذا كلام ينقال
شيخه بنرفزة : انا بدش داخل ..
وانا قايمه ولافه ابي ادش داخل البيت .. سمعت صوت الباب .. حسيت كل عرج فيني نط .. كل قطرة دم في عروقي نشفت .. بس تصنعت عدم الاهتمام .. وكملت طريجي ولا يناديني خالد
خالد : شيخه .. !
التفت ببرود وعيوني كلش مايات صوب عزوز اللي واقف يمه
شيخه : هلا ؟
خالد : جاهزة ؟
اصعب كلمة بحياتي قلتها اهي هذي الكلمه : ......
اكتفيت بنظراتي البارده اللي تبين ان هالزواج كله مب معترفه فيه .. ورجعت لفيت بكمل طريجي ..
ولحقتني شييخه
داخل البيت
حصه : يله شيوخ لبسي .. بتمشون الحين بتسلمون على ابوي وبعدها بتروحون بيت ابوه ومن هناك بيوصلكم خالد المطار ..
مها : ليش احنا مراح نوصلها ؟
حصه : لا .. خلود قال احنا نتم هني ؟؟
التفت معصبه : ليش ان شالله !! .. ترى ان ماييتوا .. والله ماني مسافرة ..
حصه : شيووخ .. عقلي خلص ..
شيخه بانهيار : ماااااااااابي ... ليش كل شي على كيفهم !! .. مالي شغل .. !!
حصه : ششششش وطي صوتج يسمعونج الرياييل
شيخه بنبرة اعلى : مابي .. قولي لخالد تيون معاي المطار ولا ماني مسافرة
مها : شيووخ خلص خلص .. بكلم خلود .. بس سكتي ..
شيخه بنرفزة وهي تهز ريولها ..
حصه : قومي لبسي زين .. واحنا بنلبس .. يله
رغم الخوف اللي كنت احس فيه بس قمت ببرود ولبست عباتي .. اتصنع البرود .. وانا من داخل اشب ضو .. مووولعه
>>> مااخذت غير جنطة ايدي .. جنطه السفر ماادري عنها مهاوي وحصه اهما اللي يابوا اغراضي من بيت ابوي .. بس اللي تأكدت من وجوده .. اهوا دفتري ..
لبست شيلتي وجاكيت بيج طويل مبطن بربريز مع بنطلول بني غامج مع شال بربريز .. يابتهم لي حصه .. وانا لبستهم عشانها ..
وتوني كنت بطلع ولا تمسكني حصوووه
حصه : تعالي هني .. دش داخل اشوف
شيخه : شنو فيه بعد ؟
حصه وهي تطلع قلم كحل وروج وبوده وتقرب مني تبي تحطلي
شيخه : حصوووه مالي خلثج اللي فيني كافيني .. لاتقعدين تسوين سوالف !!
مها : هههههههههههههههه بسم الله انتي شوي وتنفجرين علينا ريلاكس ياماما
شيخه : اووو مهاوي سكتي ترى الحين اقعد ابجي ..
حصه تنغز لمهاوي عشان تقنعها ..
مها : شيووخ يالخلبله .. ادري انتي شتفكرين فيه .. بس لازم تطلعين بصورة حلوة .. مو علشانه .. على شانج .. خليه يحترق ويحس انه اللي خذاها تسوى بنات الدنيا كلها .. ذبحييه من القهر . .
راقتلي الفكرة .. وراقلي كلام مها .. بس اخذت الكحل والروج من حصوص عشان انا اتمكيج ادري اهي بتثقلي وانا مابيه يسح اني متمكيجه .. علشان لايصدق روحه ..
تكحلت عالسريع وحطيت روج وخففته بالقلوس البيج الشفاف .. وبودره خفيفه .. كان كافي ليبرز ملامح ويهي الهاديه
طلعت من البيت وطبيعي اول ماتطلع .. رفعت عيوني بويه اللي قاعدين .. ولاشعوريا يت عيوني على عزوز ..
كان لابس جاكيت اسود طويل مع نظارة سودا .. ماكنت اشوف ملامحه .. ولا كنت اشوف أي تعابير بويه وهالشي ذبحني من القهر .. لأاني احس انه يكرهني زود ماانا اكره .. اوووف الله يعني عليك بالسفر ..
عزوز
كنا بنطلع بسيارتين .. سيارتي وسيارة خلود .. خلود بياخذ حصه ومها معاه .. وانا باخذ شيوخ معاي .. طبعا حطيت جنطتها بسيارتي .. ماادري جم كيلو هدوم حاطه فيها .. واللي قهرني .. جنطة لابتوبها معاها .. لهالدرجه ماتستغني عنه !!
سلمنا على سلطان اللي مراح يي معانا .. ركبت انا السيارة .. انطر شيوخ تركب .. لكن اللي قهرني يوم شفتها يايه وركبت مع البنات بسيارة خلود ..
رفعت عيني على المنظرة ... وشلت نظارتي السودا .. وشفتها بنظرة .. وابتسمت على سخافتها .. وسكرت الباب ..
بيني وبينكم كنت مفول منها ... اوووف .. مرات ترفع ضغطي بحركاتها الياهل .. بس انا اعرف شلون انرفزج .. فتحت الباب ونزلت وقربت من سيارة خلود .. وقلته بصوت يخليها تسمع
عزوز : اقول .. ليش ماتخلي حصه تسوق .. وانت تعال اركب معاي ؟
خالد : لا الحين شيوخ تركب معاك
وشفت خالد خز شيوخ بعينه بس انا سبقته وقلت
عزوز : لا لا .. تعال انت اركب معاي
قلت هالكلمه ابي احر قلبها اوبين لها اني مابيها تقعد معاي .. وعلى طول شفت النار تشب بعيونها وهي تقول
شيخه : ماني ميته على القعده معاك ترى !!
عزوز : ولا انا .. قعدي هني .. بس مردج بتين معاي .. اقول خلود قوم تعال يله.. انا انطرك ..
ومشيت ..
شيخه
اول مامشى عزوز انفجرت ..
شيخه : شفتووو .. شفتو شسوا .. عشتوو .. يعني انا اللي ميته اقعد معاه واسمع سوالفه البايخه .. مابي اسافر مااااابي .. فتحت الباب ابي اطلع .. وانا اشوف الكل انفجر ضحك .. خلود طلع ويه عندي وعيونه كلها دموع من الضحك .. مو قادر يتحجى
خالد : هههههههههههههه تكفين قعدي قعدي .. هههههههه والله انتو نكته
صرخت بويهه : شنو فيه يضحك !!!!! ؟
خالد اللي يحاول يمسك ضحكته : خلاص خلاص ههه .. مراح اضحك .. حصوص هاج السويج انتي سوقي وانا بركب مع عزوز .. شوي شوي على سيارتي مو تقحصين فيها ..
شيخه : اوووووف ... خلاص مو متحمله .. ياربييييييي شسوي ياناس .. دمه ثقيل شلون بسافر معاه !!
مها : حصوص .. خالد كلم صلاح ؟؟
حصه وهي تشغل السييارة وتمشي ورى عزوز : قال بيكلمه بالسيارة ويقوله ينطرهم بالمطار !!
مها : هههه الله يعينكم عليه عاد الحين بيقعد يتحطلم ليش ماقلتولي من قبل ههههه
حصه : جذيه احسن .. صلوح واعرفه عدل
رن تلفوني واول ماشفت الرقم خارجي استبشرت انهها منور وشلته على طول ..
شيخه : الو ؟
منيرة : الووو .. شيوووخ .. شلوووووونج يالخايسه مشتاقتلج .. ليش ماتدقين هاا !!
تبون الصج .. يتني البجيه .. كنت راح ابجي اول ماسمعت صوت منور ...
شيخه : هلا .. منور. .. انتي وينج .. ليش ماييتي ؟
منيرة : فديتج .. كله من فيصل مدد لنا اسبوع .. ومادريت انكم بتسافرون بهالسرعه .. لاتزعلين ان شالله نحتفل فيج بس توصلون بالسلامه
أي احتفال واي بطيخ .. قولي بتقرون على روحي الفاتحه
شيخه : زين .. انتي شلونج .. وفيصل شلونه .. ان شالله مستانسين ؟
منيرة : أي والله مستانسين .. وان شالله انتوا بعد تستانسون ..
شيخه : الله كريم ..
منيرة : شيوخ .. لاتعاندين بالريال .. وشوي شوي .. راح تتعودين عليه
شيخه : منور ..سكري على هالموضوع .. يله لاتقاطيعين .. دقي كل وقت ..
منيرة : من عيوني .. تعالي اقولج .. ترى شهد هناك .. اذا تبين ادزلج رقمها الحين .. يمكن تلافينها
شيخه : أي والله ياليت .. عالاقل في احد اقعد معاه ..
منيرة : خلاص .. انا اخليها تكلمج ان شالله .. تامرين على شي ؟
شيخه اللي دموعها غرقتها : سلامتج ..
سكرت التلفون من منور .. وحسيت ان كل اللي صار بحياتي صار يمشي يدام عيوني مثل الشريط .. انا مينونه .. مينونه رسمي .. شلون رضيت فيه .. وللحظة بس . تذكرت ناصر .. ناصر كان يقدر يسعدني .. انا احبه .. ليش مارضيت عليه .. اوووف .. خلاص .. ماعاد للحجي أي معنى الحين ..
الحين بس .. بتبتدي حربي معاك ياعزوز .. وبنشوف منو الخسران انا ولا انت !!!!
>>
الجانب الثاني
سيارة عزوز
كان تلفوني يرن .. وكنت احطه صامت .. حسيت باستغراب خالد .. وحسيت انه شاك بشي !! .. سكت ماعرفت شقوله ..!! ..
ادري مراح يفهمني وبتظل هذي اخته يعني .. وانا صرت اكلم عبير لمجرد الكلام بس .. يعني اهي وحده فاضيه وتبي تتسلى .. وانا ابي احد احاجيه .. ادري هالكلام ماهو مبرر .. بس احساس فيني بالانتقام .. ودي احر قلب شيوخ .. ودي اشفي غليلي منها .. وكلامي مع عبير .. يحسسني بالانتصار .. صدقوني
خالد : منو هذي ؟
انصدمت .. توقعت ان خلود شاك بشي .. بس شدراه انها بتكون وحده !! .. وتعرفوني مااعرف اجذب على خلود فقلته على طول ..
عزوز : عبير .. اللي كلمتك عنها !!
خالد : وللحين تدق عليك ؟
عزوز : لي باجر ..
خالد : عزوز .. ماوصيك على شيخه .. صح اهي عنيده وراسها يابس .. بس رخوا الحبل شوي .. والله ان مافي منها لو كلمتها بعقل .. وبطلوا سوالف اليهال اللي مامنها فايده هذي
عزوز : اوووف خلود .. انت ماتعرف شيوخ كثري ..!! .. هالبنت أي شي اقوله ولو كان عاجبها لازم تناقضني .. اهي جذيه مخلوقه بالمقلوب .. انت ماعليك .. انا لو .... انا لو مااحبها .. ماتحملت عنادها .. وانت تدري شكثر اعزها .. ومن متى .. لاتوصيني على روحي خلود .. شيخه روحي ..
حسيت ان خالد ارتاح من الكلام اللي قلتله .. وانا بعد ارتحت .. مهما تسوي .. انا راضي .. صج مرات تنرفزني .. بس راضي .. والله راضي .. مو بيدي .. لو بيدي جان ماحبيتها .. ولاتعلقت فيها جذيه .. تدرون .. مشتاق لعيونها .. للحين ماشفت عيونها عدل .. عيونها هذي بس .. قصه ثانيه .. تخليني اسافر بعييد بعييييد .. اخخ ياشيخه .. ماادري متى بنرتاح ..
بعد ربع ساعه
وصلنا بيت ابوي .. سلمت عليه .. ووصيت خلود يطل عليه كل يوم .. وعطيت خط يديد للسايق اكلمه من هناك .. من يدري بعد شنو يصير ..
الكل كان ناطرني بالسيارة .. حركنا ورحنا بيت ابو ناصر لان الكل مجتمع هناك يبون يسلمون على شيخه .. وبما ان الخالات مايطبون بيت عمي بوخالد بسبب زواجه .. فتجمعوا كلهم هناك .. بس عاد دام السالفه فيها ناصر .. نزلت انا وخلود .. واول ماصلت حصه واصفطت .. قربت صوب السيارة ومن افتحت شيوخ الباب مسكتها من ايدها ..
شيخه بصوت واطي وهي ترص على ضروسها : هدني .. انت ماتستحي !!
عزوز : شششش ولا كلمه .. وامشي يدامي .. وخليني المح عيونج على نصور . .اشلعهم من مكانهم
تميت ماسك ايدها مثل الشرطي اللي ماسكله حرامي وخايف انه ينحاش منه .. كنت احس بالضيق لاني مااحب احسسها انا اغار عليها .. بس مو بيدي .. كان ودي اشلعها من هالمكان ونمشي .. كنت اشوف خلود يبتسم . . ماعلي من احد .. المهم احر قلبج ياشيخوه .. واقطع اخر امل يعلقج بناصر ..
دخلنا كلنا البيت .. والحمدلله ان الريايل كلهم كانوا بالدوانيه .. والحريم بالصاله .. هديت ايدها اول ماقالي خالد تعال الدوانيه .. كنت متردد اخاف نصور قاعد بالصاله .. مشيت وانا متاضيق واول ماشفته بالدوانيه ارتحت ..
تمينا شوي قريب عشر دقايق .. وقلت لخالد نمشي .. لان بنمر بيت ابوه ومايمدي .. الطيارة موعدها قرب ..
اول ماقمنا وسلمنا على الريايل شفت نصور قام وحتى ماسلم علينا جليل الحيا .. وللحظة فكرت انه يمكن يكون رايح لشيخه .. علشان جذيه عجلت بالسلام وبسرعه طلعت
خالد : شفيك عزوز .. بسم الله تقول مقروص !!.
عزوز : روح شوف شيخه وينها خلنا نمشي ؟
خالد : عزوز .. ينيت .. ماصارلنا عشر دقايق من قعدنا
عزوز : خلووود روح شوف شيخه .. ولا ادش عليهم الحين .. الحيوان نصور ماادري وين ذلف
استوعب خالد اللي افكر فيه ودخل الصاله .. وانا تميت بره والف فكره تحوس ببالي .. اكيييد كيييد شافها .. ومو غريبه يكون قعد معاها ولا قاعد يكلمها الحين .. والله والله لاذبحك بيدي هذي ..