الجزء العشرين
غرفة عزيز
الساعه 7 ونص مساءا
اليوم عندنا عرس محمد رفيجنا .. وديت دشداشتي وغترتي المصبغه وعلى ماخلصوا شربت لي نسكافيه لاني هالاسبوع كله احس بصداع مو طبيعي .. يمكن من التفكير .. راسي صدع .. والقهوة مو زينه لي ادري .. لان اللي ماتدرونه ان عندي صمام بالقلب فيه عيب خلقي .. يعني ضيق لسريان الدم ولمثل حالتي لازم يبتعدون عن المنبهات والاشيا اللي تتعب القلب .. لكن كنت محتاج اشرب هالقهوة لان الصداع مافج عني كلش .. من صارت الساعه 8 قمت لبست تي شيرت وجينز ورحت يبت دشداشتي .. ولبستها وانا مخي بعيييييد .. انتبهت ان زرار من الزراري طايح .. فصختها ويبت خيط وابره وقعدت اخيطه .. وانا احاول اركز بالابرة والخيط .. لكن بين كل ثانيه وثانيه .. صورة شيخوه وناصر ماتفارق خيالي .. حسيت اني ينيت .. اكييد ينيت .. ثلاث ايام وانا على هالحاله ..
كنت شاك من زمان فيهم بس كنت اعشم نفسي واقول يمكن تكون حركات نصور وشيوخ رابيه معاي واعرفها زيين .. طلعت اهي وياه واحد .. نسخه من بعض بالحقارة .. لكن هيين . والله اني راح ارد اعتباري .. معليه ياشيووخ
وعيت من افكاري على نغزة الابرة بابهامي . وبسرعه اكثر هديت الابرة ومسكت صبعي اللي دمر دشداشتي بقطرات الدم . . وانا مو حاس باي الم .. لان الجرح اللي فيني اكبر واكبر من أي جرح ثاني ..
هديت دشداشتي بملل وضيقه صدر وخذيت التلفون ودقيت على خلود
خالد : هلا عزوز .. دقايق وايي بس البس غترتي
عزوز : خلود .. لاتمرني ماني رايح !!
خالد : ليييش ان شالله !!
عزيز : كنت قاعد اخيط زرار طايح من دشداشتي وحشت صبعي وتوسخت .. يبيلها وقت الين ماتنظف خلاص انت روح
خالد : لا والله .. تدري لو ماييت حمود بيزعل عليك .. الحين اييبلك دشداشه من عندي .. تجهز يلله
عزيز : خلوود تكفى مالي خلق اروح
خالد : عزووووز عن الدلع يلله خلصني
عزيز : زين طليت على الشركه اليوم !
خالد : طليت .. واقولك كلشي بالسيارة
عزيز : وو قلت لشيخه عن موضوع السفر ؟
خالد بقلبه (( تبون الصج .. ماعرفت شقول .. حسيت لساني انربط . . ماودي اقوله اني قلت لشيخه وفضحتنا بالبيت صراخ وعناد وبجي ... عزوز حالته ماتسر .. ولا شيووخ .. هالاثنين مب مترقعين .. قلبي عورني يوم كان عزوز يقولي انه قاعد يخيط زرار .. تدرون .. عمري وحياتي ماخيطت زرار .. ولا شلت عود .. عزوز تعود على هالشي من صغره .. تعود يعتمد على نفسه وتحمل اشيا فوق طاقته وعمره .. في الفترة الاخيرة حسيت انه تعب .. خاصه بعد ماتوفت المرحومه .. حسيت انه محتاج لاحد يكون معاه .. يمكن هذا سبب ثاني يخلي عزوز يصر انه ياخذ شيوخ معاه .. لان محتاج لاحد يشيل الحمل معاه ويطبطب على جتفه .. وغير السبب الاول واللي اهو اقوى من أي شي ثاني .. الا وهو الغيرة .. اتوقع عزوز لو يشوف نصور الحين يدامه .. عادي يرتكب فيه جريمه .. ))
عزيز : خلووود .. جاوبني .. قلت لشيخه عن السفر ؟
خالد : عزوز حبيبي .. انت عارف الظروف اللي تمــ ــ ـ
عزيز : وانت عارف الموال اللي براس ناصر .. وانا الصراحه مستحيل اخلي شيوخ واسافر .. بترضى ولا لا .. اهي بتسافر معاي
خالد : مافي شي بالغصب عزوز .. ليش كل واحد فيكم شاد الحبل .. وكل واحد فيكم ماسك راسه ويعاند .. تناقشوا وكل شي بينحل .
عزيز : انت تدري ان شيوخ ومو ويه نقاش .. وعارف اخرتها شبيصير .. اصلا اهي ماتحــ .. وسكت
بعد ماخذيت تفس عميق وجني ابي اتناسى هالحقيقه المرة اللي ترن في اذني ومخي وقلبي كل يوم وكل ليله وكل ساعه .. حقيقه ان شيوخ ماتحبني . . لا وتكرهني بعد ..
خالد : زين .. شرايك نروح انا ونت عقب العرس بيتنا .. ونتفاهم ومنها تقعد انت وشيخه وتتفاهمون على كل شي ..
كنت عارف شراح يكون مصير هالنقاش.. سواءا من ناحيتي اللي راح اكون متمسك براي ومااتنازل كلش ولا من ناحيه شيوخ اللي راكبه راسها .. لكن كنت ابي اشوفها عقب اللي صار .. اذا تقدر تحط عيونها بعيوني بعد كل شي .. ولا لا !!
عزيز : خلاص .. اوكيه .. صار
خالد : فدييييييييييييييييت الرايقين انا ههههه يله دقايق واكون عندك
عزيز : اوكيه .. يله باي
سكرت من خلود وانزرع في قلبي احساس يديد .. ماادري .. قبل شوي ماكان لي خلق اروح مكان .. بس هالحين السالفه فيها شوفه لشيوخ .. لازم اكون مستعد لها .. لا تفهموني غلط .. مو حبنا فيها .. بس ابي اكون مستعد للمواجهه بكل الحالات
نزلت تحت اقول لابوي اني بروح العرس .. لقيته نايم على الغنفه .. لحفته وصعدت غرفتي ولا الى تلفوني يرن
شفت الرقم وعرفت انه رقم .. عبير .. ايه عبير .. لحظة انا شلون حفظت اسمها .. !!! كان لي خاطر اسولف مع احد وافض فض له كل اللي بقلبي .. وهالشي اهوا اللي خلاني ارد على التلفون
عزيز : الو
عبير بصوت نااااااااااعم : الو .. مسا الخير
عزيز : مسا الخير .. هلا عبير
عبير بذهول مصحوب بصمت : ... تذكرتني !!
عزيز : ماادري ليش اسمج تم في بالي ..
عبير بفرحه : صج !! .. يعني .. اقدر اقول اني كنت في بالك ؟
عزيز : ممكن اسألج سؤال ؟
عبير : تفضل !
عزيز : شللي خليج تدقين علي .. بين فترة والثانيه مع اني يعني .. عفوا ماعطيتج ويه .. ولا بينتلج باي مكالمه اني مستعد اكلمج
عبير : اقولك الصج ؟
عزيز : تفضلي ؟
عبير : انا حبيتك .. من اول ماسمعت صوتك
عزيز : ههههههههههههههههههههههههههه
عبير : ليش تضحك !!!
عزيز : يعني حب من اول نظرة !!
عبير : ليش انتي ماتؤمن بالحب من اول نظرة ..
كان سؤالها في الصميم .. سكت شوي وانا اسند راسي على طرف السرير وبتعب
عزيز : انا اؤمن بان الحب يولد معانا .. ويعيش ويربى بقلوبنا .. ونسقيه كل هالسنين .. الين مايكبر ويكبر .. ويصير شي فينا ومنا .. مانقدر ننكره .. اؤمن بان الحب شي كبير .. اكبر من مجرد نظرة ولا صوت تلفون ... ولا حتى لقاء عابر
عبير : طيب .. وممكن هالاشيا اللي ذكرتها تؤدي في النهايه للحب !!
عزيز : كلشي يصير ..
عبير : تدري انك غير عن كل الشباب !!
عزيز : اللي كلمتيهم ؟
عبير : ها .. لا .. قصدي انت غير
عزيز : شدراج ؟
عبير : من اسلوبك .. كلامك .. منطقك !!
عزيز : مو يمكن اكون اقص عليج ؟
عبير : بس انا واثقه فيك !!
عزيز : ههههههههههههه .. انتي جم عمرج ؟
عبير : 22 سنه
عزيز : يعني مو صغيرة .. وتعرفين الصح من الغلط
عبير : ممكن اعرف اسمك ؟
عزيز : اسمي عبدالعزيز .. عبير .. انا مضطر امشي الحين
عبير : بتدق علي ؟؟
عزيز : الله اعلم .. يله باي
وسكرت التلفون .. ونزلت تحت بعد ماسمعت صوت هرن سيارة خلود
ركبنا وكانت سوالفنا اغلبها عن الشركه . .في نظام يديد نازل ومسوي ضجه بالسوق .. وحنا تونا طالبينه ويبيله اسبوع على مايوصل .. وكان خلود يتحجى عنه وعن نسبه الارباح اللي زادت هالشهر .. الشغل يطمن عن اوضاعنا .. وكلشي ماشي تمام . .الا حياتي .. مقلوبه فوق تحت .. رغم ان شيوخ صارت زوجتي الحين .. لكن عمري مافكرت اني اخذها بهالطريقه .. طول الدرب كنت افكر شلون بشوفها .. وشبقولها .. وشلون بطالعها عقب اللي صار ..
وللحظة بس .. تذكرت شيوخ الطفله .. وشيوخ المراهقه .. وشيوخ ام لسان .. تذكرت اول مرة شفتها بالدوانيه بعد ماكبرت .. تذكرت نعومتها وعيونها اللي تذبحني .. تذكرت شعرها اللي من اشوفه احس اني بعالم ثاني ..
ووعيت على اغنيه راشد الماجد وهو يقول >>> اختر الحل الصعب .. ياتفارق ياتحب ..!!
طردت هالذكريات اللي تعور قلبي من راسي وفي بالي موال يديد بقوله لها اليوم .. وانهي كلشي ..!!
الجانب الثاني
بيت بوخالد
مها
فكرنا نتيمع كلنا اليوم ونكسر الروتين شوي .. في بيت حصوص .. لكن شيوخ اصرت ان نتيمع هني .. وطبعا عذرها ان البيت بيتنا واللي مو عاجبه اهوا اللي يطلع .. تحاول ترد شوي من حقوقها اللي ضاعت من اسكنت سارة البيت .. لكن وين .. كلشي ضاع وانتهى مع وفاة المرحومه ..
كنا انا وحصوص واختي بدريه وشيخه قاعدين نسولف ونضحك .. ونشرب جاي .. بغرفة الاستقبال .. بعيدا عن اعين الحاسدين على قوله شيووخ هههه ..
ماادري ليش .. احس ان نفسيه شيوخ تحسنت بعد زواجها . .يمكن ماتصدقون لو قلت لكم .. ان شيوخ من داخلها مرتاح لكنها تكابر .. رغم لمحه الحزن اللي مافارقت عيونها .. والعناد العجييب اللي براسها .. بس فيه شي يدل على انها مرتاحه .. ولو كانت هالراحه وهميه من خيالي يعني .. بس قلبي يقولي انها بتحبه .. يارب تحبه
بعد نص ساعه .. دقت سويرة الباب وبحركاتها المعهوده .. وهي متخصره
سارة : مطوله قعدتكم ؟
شيخه : ليش قاعدين ببيتج وانا ماادري !!
سارة : محد كلمج ياام لسان
شيخه : شوفي احترمي نفسج وشيلي شلايلج وطلعي بره .. ترى نفسي واصله هني .. أي كلمه منج بخربها .. ترى انا طالعه طالعه .. واكثر من جذيه مراح يصير .. والله والله ياسويرة .. ان مافارجتي لاا اقلب الدنيا عليج ..
اووووووف بس لاتشوفون ويه ساروة شلون قلب اصفر واحمر .. شكلها صج خافت وقعدت تهدد وتسوي روحها معصبه وكفخت الباب وراها وذلفت ..
مها : هههههههههههههههههههههههههههههه
شيخه : وانتي شفيج تضحكين ان شالله !!
بدريه : اسمله عليييييييييج شيوووخ .. والله عجبتنيي مو مثل اختج الخوافه
حصه : انا مااحب اكلم هالاشكال .. ودايما ازف شيوخ على هالاسلوب امي ماعلمتنا جذيه
شيخه : والله ياحصوص . هالاشكال يبيلها هالاسلوب ولا ماتخاف .. ماعليج منها .. الحين بس يي ابوي تفر مخه بكلمتين .. وتقط لها دمعتين .. وهذاك عاد يذووب ويني ركض .. يكفخني هههههههه
شيوخ قالتها وهي تضحك .. لكن كلنا سكتنا .. كانت ضحكتها مصحوبه بغصه وقهر ودموع ...
تخيلوا انها كانت تضحك وعيونها تذرف دموع .. مسحتهم بسرعه وهي تقول
شيخه : هاا .. شنو تبون تتعشوون ؟
حاولت اغير المود ولا اخلي شي يعكر مزاجنا :
مها : شيوووخ تذكرني المطعم الايراني اللي طلبنا منه مرة انا وياج يوم كنت نايمه ببيتكم
شيخه : شخبااااري .. ياماما .. سكروه وفتحوا محله مطعم هندي .. يسوي جباتي عجيييبه هههههه
مها : خخخخخخ حلفي .. والله كان رهيييب صج
بدريه : انا عندي لكم مطعم مكسكيكي بس شنو وااو ..
حصه : يله ترى حدييي يوعاانه .. وسلطان متحلف فيني مااتأخر .. اييه صح .. شيوخ .. سلطان عاازمج على فلم هندي
شيخه : حلفيييي .. متى ؟؟
حصه : اذا تبين .. الحين اقوله يحجز لنا حق بليل ..
شيخه : اييي واللي سلمج ..
مها : انا بروح بعد ..
شيخه : أيه حصوص .. حجزي حق مهاوي بعد وريلها الدعله
مها وهي تكفخ شيخه : مو دعله غيرج .. لاتغلطين على ريلي
شيخه : هههههه اقول من زيينه وايد خابه روحج عليه ترى
مها : احسن من بعض الناس ... احم ..
شيخه بنظرة ناريه على قولتهم خلتني انطم واسكت
بدريه : مهاوي . لاتخورينه بالحجي ترى الحين ييج صاروخ يفجر راسج
شيخه : سمعتي اختج شقالت .. صكي حلجج رجاءا ..
حصه : ها بدريه ماتيين ؟
بدريه : لا يبا ماكو شغل ههههه روحو انتوا .. انا ريلي بيمرني مبجر
حصه : خلاص اوكيه .. انتي دقي على المطعم خل يوصل الاكل بسرعه .. ومهاوي دقي على خلود شوفي اذا بيي معانا ولا لا .. علشان نحجز
مهاوي : زيين ..
اخذت التلفون ودقيت على خالد وبعد جم رنه رد علي
خالد : هلا والله
مهاوي : هلا خالد .. وينك فيه حبيبي ؟
حصه وشيخه يعيبون عليها >>> وينك فيه حبيبي ههههههههه
خالد : انا بالعرس .. بغيتي شي !!
مهاوي وهي تسكت البنات وفيها الضحكه : اييه .. حصوص وريلها وشيوخ بيحجزون حق فلم هندي شراليك نروح ؟
خالد : اول شي .. ماني بابو ولا كومار علشان اشوف فلم هندي وثاني شي ماكو روحه لا انتي ولا شيوخ .. وقول حق شيوخ بعد نص ساعه بيي مع عزيز يبي يكلمها ..
مهاوي : هااا !!!!!
خالد : شنو هاا ؟
مهاوي : مالي شغل انت قولها
خالد : مهاوي عن الدلع يله .. عندي ريايل يله باي
شيخه وهي تشوف عيوني وجنها تدري انه فيه شي ...
حصه : شفيه مارضى ؟
مهاوي وهي تخز شيوخ .. : لا .. بس يقول اهوا وعزيز بيون بعد نص ساعه لان عزوز يبي يكلم شيخه .. فقال ماكو روحه
شيخه وهي توقف بسرعه واتخصر : نعـــــــــــــــــــم !!!!!!!
حصه : شيوووووخ ... قعدي اشوف
شيخه : ماابي .. ولا ابي اشوفه ولا تكلم معاه .. قولي حق ريلج يامها هالكلام ..
حصه : شيووخ .. مو انتي اللي رضيتي .. خلاص .. لاتصرفين مثل اليهال .. شوفي الريال شييبي .. حمدي ربج انه للحين مخليج على راحتج
شيخه : شفووا عاد ... انا مو ناقصتكم بعد .. شوفه ماني شايفته وقولي حق سلطان يحجز لنا حق الفلم لاني بروح
مها : شيوخ يالخبله .. انتي بجذيه بتثبتين له انج خايفه من مواجهته .. بالعكس .. شوفيه وقعدي ولاجنه فيه شي متغير عليج .. كسبي الموقف وخليه يكون اهوا الضعيف ..
>>> حاولت اقص على شيوخ هالكلام .. لاني ادري ان الزواج هذا معتبرته ذل بالنسبه لها .. وخضعون .. كنت ابيها تقعد باي طريقه .. ابيها تسمع عزيز .. وتشوفه وهو يكلمها يمكن تتغير نظرتها له ..
شيخه سكتت مع اني حست فيها شكثر مقهورة .. ويمكن هالموقف قطع أي علامه او دليل على قبولها لعزوز .. الله يعينكم على حياتكم انتوا الاثنين
__________________
بعد نص ساعه
سيارة خالد
عزيز
كنت قاعد بالسيت مثل اللي وراه امتحان وقاعد يتجهز له نفسيا وفكريا .. كنت بس قاعد اتخيل الموقف شلون بيكون . . اول مرة بواجه شيوخ من عقب يوم العزا .. ماصار بينا حديث من هذاك اليوم .. رغم انها ذكرى مو حلوة .. لكني كنت انطرها من زمان .. انطر الفرصه اللي اقعد معاها .. واستشف من عيونها أي شي .. حتى لو كان كره او نفور .. ابي اعرفه
كنت متمسك بامل ولو كان ضعيف ان نوصل لحل يرضيني ويرضيها .. ورغم اني اشك بهالشي لكني اتمناه .. والله كريم
وصلنا بيت بوخالد ودخلنا الدوانيه وناديت على البنات الين مايتني حصوص ..
حصه : هاا .. ييتوا ؟؟
خالد : وين شيخه ؟
حصه : خلود .. شوي شوي عليها .. حرام عليكم ماصدقنا البنت تضحك وتسولف خلوها على راحتها ..
خالد : ابشري .. بس اهي لاتعاند .. مهما يكون عزوز الحين ريلها .. واللي يقوله لازم على الاقل تسمعه ويتناقشونه يميع ..
حصه : زيين . .الحين بناديها ..
رحت وناديت شيوخ .. واللي صدمني انها راحت تلبس شيلتها .. مينونه هالبنت والله ميونه ..
نزلت وراحت صوب الدوانيه وهي مفووووله ومعصبه وما تكلم احد >>> مهاوي كانت تضحك وتحاول تطلعها من هالجو .. بس ابد .. تقولون جنه مودينها للاعدام
الجانب الثاني
الدوانيه
عزيز
كنت قاعد متوتر ... وانا اعدل شماغي .. فتحت زرار دشداشتي الاول لاني حسيت بضيق .. واول مادخلت شيخه .. نسيت كلشي .. كلشي ممكن تتصورونه .. حتى زعلي عليها .. حتى غيرتي .. حسيت روحي ياهل مايقدر يقاوم حضنها .. ماادري ليش .. ياني شعور الحب بقووووووة ماتتصورونها ..
استغربت انها لابسه شيلتها .. كنت مشتاق لشعرها .. كنت مشتاق اسرح فيه واضيييع بروحي .. حسيت ان البدايه ماتطمن ..
استأذنا خالد ومشى .. وانا قربت وقعدت قبالها ..
عزيز : شلونج شيخه ؟
شيخه : بخير ..
عزيز : كنت بخبرج اني بسافر الاسبوع الياي لندن .. عندي دروة هناك
شيخه : الله وياك ..
عزيز : لا حبيبتي .. انتي بتيين معاي ..
شيخه : وانا قلت لا ..
عزيز : بس انا قلت مو بكيفج .. !!
شيخه وهي تفتح عيونها العسليه وتشوفني بانكار وغضب : نعم !!!
كنت احاول مااشوف عيونها .. لانها نقطه ضعفي .. وكنت اشتت نظراتي بعييد لاني مااتحمل جمالها .. وحاولت اكون اقوى
عزيز : ماسمعتي .. !! .. انا قلت مو بكيفج ؟
شيخه : ومنو انت علشان تغصبني ليكون صدقت روحك ؟
عزيز : انت ريلج غصبن عليج .. .تدرين كنت ياي بتفاهم على حل وسط يرضيني ويرضيج .. بس شكلج انتي ماتين الا بالزف .. قعده بروحج من غيري مافيه .. تحلمين .. تبين يخلالج الجو مع نصور هاا .. نجوم السما اقرب لج ..
خلي ببالج يوم السبت الياي بنسافر .. وبشوف شبتسوين !!
قمت وانا متنرفز لكن ردتني كلمه قالتها بصراااخ
شيخه : يالحقييييييييييييير ..... اكرهك
رجعت مرة ثانيه صوبها .. وبقرب وترني اكثر ماوترها .. وشلت شيلتها عن راسها ونظراتي بعيونها كلها تحدي وقوة مو طبيعيه ..
قطيت شيلتها بعييد .. وهي ساكته .. كانت خايفه .. متصورة اني بسوي فيها شي ..
لكني اكتفيت بهالكلمه : وانا اكرهج بعد .. ابتسمت بها باستحقار .. وطلعت ..
اليوم الثاني ..
خالد
دق علي صلوح وقالي انه بيي بعد يومين يزورنا .. وعلشان جذيه اضطريت اقوله عن زواج شيوخ .. المفاجئ وشلون صار .. وكل العاده .. عصب وحمق وتحلطم لكنه اقتنع انه كل شي صار بسرعه .. وانهم للحين مالجين .. والزواج بعد اسبوع ..
سكرته منه بعد ماتطمن على دراسته وانسدحت على فراشي ارتاح قبل لااروح الشركه ..
مها اللي كانت طالعه من الحمام
مها : خالد ... شنو نمت ؟؟!!
خالد : لا بس منسدح !!
مها قربت منه وقعدت يمه بالسرير : شفيك تعبان ؟
خالد بابتسامه : واللي يشوف ويهج ينسى التعب كله ..
مها : زين بسويلك عصير ليمون .. ويهك مرهق
وقامت بتمشي .. لكن ماحسيت الاوانا امسك ايدينها ..: تعالي
مها : هلا خالد ..
خالد : خلج يمي .. مابي عصير .. شوفتج دوا ماتدرين !!
مها بحيا : فدييتك .. ابيك تكون مرتاح
خالد : برتاح .. بس اطمن على شيخه ... للحين احاتيها ..
مها : دامها مع عزيز . .لاتحاتيها ..
خالد : الله كريم ..
تلفون خالد يرن ..
مها تشوف الرقم وكان خارجي .. وتوقعت انها منور .. وعلى طول شالته ..
مها : هلا منوووووووور
منيرة بضحكه : هلا مهاوي .. انتوا وينكم .. عيزت وانا ادق بيتنا محد يشيل !!
مها : هههههه تلقين شيوخ نايمه .. ومرت ابوج مو في الييت ..
منيرة : طمنوني شلونكم .. شمسوين ؟
مها : احنا بخير .. خلينا من اخبارنا .. انتي شلونج يالعرووووس ؟؟!!
منيرة : هههههه الحمدلله مستانسه .. خالد شلونه وشيوخ شلونها ؟
مها : خالد كاهو يمي منسدح .. تبين تكلمينه ؟
منيرة : لا خلص مابي ازعجه .. بس سلمي عليه .. طمني عن شيوخ ؟
مها : بتسافر مع عزيز بعد اسبوع .. !!
منيرة : هااا ؟؟؟؟
مها : سالفه طويله اقولها لج بعدين .. انتي متى بتيين ؟
منيرة : احنا .. مددنا اسبوع زياده .. شنو يعني مراح اشوف شيوخ ؟؟؟؟
مها : ويييي .. الظاهر جذيه .. عيل سمعي السالفه ..