الصالون
كانت منور طالعه مثل الافلام .. ماشالله فستانها ومكياجها اللبناني .. وشعرها المرفوع ونعومتها .. اول مرة احس ان في احد احلى مني واهي اختي هههه .. لاتفهمونها غرور .. بس هذي ثقه
كنت اضحك واسولف .. ابي انسى الكلمة اللي قالها لي ناصر .. اللي كنت اتمنى انه يقولي ياها قبل ..
الحين ... !! .. الحين تمنيت اني ماسمعتها ..
حاولت اني اتناسى الموضوع .. واستانس بملجه اختي الحبيبه ..
طلعنا من الصالون وكان خالد اللي ياينا .. استغربت مهاوي لان خلود قال مايقدر .. وياينا بسيارة عزوز الرنج
مها : وين سيارتك ؟
خالد : قلت سيارتي ماتكفي الجيش اللي باخذه من الصالون .. خذيت سيارة عزوز اكبر
خالد بصوت يسمع منور : مبروووك منورة .. والله يوفقكم ياعرايس .. والفال حق زوااجي أأأأأأأأه
مهاوي تضحك : هههههههههه.. زين حطلنا شي فرفوش .. ترى احنا رايحين عرس ..
خالد : تبين تشحين حق الرقص هاا .. فديييييت هالويه انا
خالد يكلم حصه : حصوص . .ريلج خذا سيارتج ؟
حصه بضيقه : ايه
خالد : شفيج حصوص ؟
حصه : ولا شي .. بس مستانسه .. فيني بجيه
خالد : هههههههههه وليييييييين !!! .. انتو بالفرح تبجون وبالحزن تبجون .. شهالحاله
انا كنت على طريف .. بس ماسكه روحي .. ماكنت ابي اخرب فرحة منور وانا اشوفها خايفه ومرتبكه .. تضحك شوي ويضيق خلقها شوي ..
شيخه : ياماما اليوم عرس .. نبي هرنات اخوي العزيز .. سمعنا هالرنات السنعه .. خل الشارع كله يدري ان في السيارة عروسه حلوة .. واختها القمر
الجميع : ههههههههههههههههههههههه
__________________
نفس اللحظات
عزيز
صبرت بس ماقدرت اتحمل اكثر .. تحملتهم وهما يتغازلون يدامي في بيت خالد .. تحملت نظراته هالخايس وضحكاتج ياشيووخ معاه .. تحملت طلعتج معاه الصالون .. بس عاد كلشي له حد ..
يوم دقوا البنات على خالد وقالووله انهم خلصوا .. قالي بدق على صلاح ولا ناصر اذا فاضي ييبهم .. عصبت ومامسكت اعصابي
عزيز : انتا اللي بتيبهم .. قوم الحين خلود
خالد : زين ليش معصب بس
عزيز يداري الغضب بسرعه : مافيني شي .. بس يااخي هذول بنات بروحهم .. وطالعين من صالون .. روح انتا ييبهم
خالد : سيارتي ماتكفي ..صلوح يسوق سيارة السايق اكبر ..
طلعت مفتاح سيارتي من جيبي وحطيته بايده : هااك .. خذ سيارتي اشوف
خالد : ههههه زين ياعمي لاتكفخنا بس ..
طلع من عندي خلود وانا تميت في الدوانيه احوس .. واطق ايدي بالطوفه .. كنت بمووووت .. شسوت معاه بالسيارة .. شقالوا .. اكييد طول الوقت تضحك وهو متشقق .. اكيد حلالهم الجو ..
غمضت عيني وتذكرت كل كلمة قالها الحقير حق شيخوه ... كنت باكلهم بعيوني .. وانا اشوف الحيوان يقولها .. حني علي وقوليها .. يبيها تقوله حبيبي .. تقولها وليش ماتقولها هالـــ
والله .. والله ماخليهم .. هيين
طلعت بره وتميت واقف بره بيت خالد انطره بس يوصل .. ناصر كان توه ياي وصفط سيارته وتم قاعد فيها ماادري شكان يسوي .. وقفت بعيد علشان مايشوفني .. مالي خلقه .. هذا حسابه بعدين ..
واول ماوصل خالد ودخل الكل .. شفت ناصر نزل من السيارة ومن غير مايحس خلود اللي دخل مع البنات .. سحب شيخه من ايدينها وهي كانت مغطيه وييها .. وبسحبته طاحت الشيله عن ويهها
ماكنت سامع شيقولون ولا ني شايف وييها .. بس اشوفها تتلفت وتحاول انها تمشي .. وهي ماكسها حيل
حسيت روحي بنفجر .. ييت صوبهم وانا كنت خلاص بايعها .. وناديت بحزم
عزوز : ناصر !!
ناصر التفت لي ببرود : نعم !
تميت اخزه .. شهالوقاحه ..
وقلتله ببرود يسبق عاصفه مثل مايقولون وانا اتعوذ من بليس : اترك ايديها
ناصر : انتا مالك شغل .. بنت خالتي وكيفي
قربت منه والنار شابه بعيوني .. ووخرت ايده من ايدها .. بعد ماخزييته خزة حسيتها يمكن تشب الدنيا كلها .. وركبت سيارة خلود اللي عندي مفاتيحها .. وطلعت طيرااان
شيخه
كنت ماشية وانا تقريبا يالله اشووف بسبب الغطوة اللي على ويهي .. تعرفون سوالف الخوان يعني .. خلود يسوي فيها حجر ومايرضى نتمكيج ونطلع يدام خلق الله .. مع انه احنا بالسيارة .. بس يله شنسوي .. احكام الشباب الشياب ههههه
كنت امشي اخر وحده لاني صج ماكنت اشوف الطريج عدل وخفت اطييح لكن انتهبت فجأة على ايد تمسكني وتسمحني بقوة
التفت وكان نصوور .. تخيليوووو ... هذا شيبي
شيخه : نصوووور .. شفيك !!
ناصر : وين رايحه ؟
كنت ابي اعدل شيلتي اللي طاحت من على ويهي بس موقادره بسبب مسكته القويه : بدش دداخل شفيك هدني !!
ناصر : زين تعالي قبل ماتدشين .. خل نقعد شوي بالسيارة
عصبت .. لا ماعصبت الا بغيت انفجر : انتا شفييييك ينيت !!
صرت اتلفت يمين ويسار خفت احد يشوفنا .. وهالحقير مو راضي يهد ايدي
شيخه : نااااصر هدني .. وخرررر عورتني
ناصر : مراح اهدج لما تيين معاأأأي
وقطع كلامه صوت رجولي خشن حسيت انه هزني قبل أي شي .. لاشعوريا خفت قبضة ناصر عن ايدي ورفعنا عينا احنا الاثنين صوب مصدر الصوت ..تدرون منو !!!!
عزوز ... ايييه عزوز .. كنت راضيه لو ابوي او احد من اخواني يشوفني .. بس مو عزوز ... الا عزوز
محد يعرفه كثري ..
تميت ساكته ماادري شنو قالوا لان عيوني طول الوقت كانت تشوف الارض وتنزل دموع .. ماكنت خايفه من نصور .. عاادي .. مابجيت من موقفه الخايس .. بس بجتني نظرة عزوز .. ونبرة صوته وعصبيته .. ماكنت قادرة ارفع عيوني من على الارض الا لما حسيت بايده تير ايدي من ايدين نصوور بقوة .. رفعت عيني المليانه دمووع بويهه .. شفت الغضب اللي ماعمري شفته بعيونه .. كان ينافخ ومسكر على ضروسه حييل وجنه يقولي ان بطلتي حلجج بييج طرااق .. نظرته كانت عتب ولوم وو .. استحقارر .. انا مالي شغل .. مسكت ايدي وصحت حييييييييل وركضت صوب المطبخ وسكرت الباب وراي وانا في حال مايعلم فيها الا الله
رحت صوب الثلاجه وقعدت على الارض وانا ابجي .. قهرووني .. شيووخ .. ليش تبجيين .. بالطقاق اللي يطقه .. محد قاله يتليقف وييي صوبنا .. مسوي فيها ريااال وشهم يعني ... بيني وبينكم لو مو عزوز كنت اخذت حقي بيديني وعرفت شلون اتفاهم من هالمينون نصور .. خله يفكر باللي يبيه .. اهم شي اني في عيوني وعيون اخواني واهلي اشرف منه .. يعني عباله اني بخااف منه !!
لحظة انا ليش قاعده ابرر .. انا ماسوت شي غلط .. اوووووف
شفت ويهي باستيل الفرن شلون مكياج عيوني راح يخترب من الدموع .. قمت من مكاني .. وانا اتوعد هالاثنين .. مو اهما اللي يخربون علي فرحتي باختي ..
طلعت من المطبخ وانا امسح دموعي واحاول اكون طبيعيه واعدي هالليله على خير .. وبعدها يصير خير
الساعه 9 ونص
دخلت منور على اغنية الجسمي .. وكااانت واااااو .. طالعه صج كيووت وتييين .. مع فستانها الناعم وشعرها اللبناني ومكياجها السمبل .. كانت جنها مالوت الافلام .. حتى يوم سلمت على خلود وصلاح وابوي .. ماعرفوها من كثر مو طالعه جنااااان
رقصت مهاوي وحصوص والبنات شوي .. وليلوووو يااايه بعد .. كانت قاعده يم امها ولابسه مووف بس وووع ذوقها كان دفش .. وجنها اهي العروس مو منور .. انا ماعجبتني عكس حصوص ومهاوي اللي قالوا ان فستانها فناان وروعه .. يمكن كان حلو .. بس ياربي هالبنت شنو تلبس مااحبه عليها
ماكان لي خلق ارقص .. كنت منغثه من نصور ومن شوفه هالشيفه .. بس يوم شفتها رقصت على اغنية مشكلني وهي رافعه خشمها فوق وجنه الارض مو شايلتها .. تمشي جنها امييرة الحمدلله والشكر ..
عنادا فيها قلت للدي جي يحطلي اغنية عبدالمجيد عبدالله
تلفت الناس لامريت
تكسر رقاب خلق الله
الزين خذته ولا خليت .. حرام لا تاخذه كله
لباقي الناس وش بقيت .. يا اللّي لك أوصاف مكتملة
وتمر عادي ولا حسيت .. حسنك به الناس منذهلة
طلتك حلوة الى طليت .. يا حلوها جد من طله
الكل يصرخ الى من جيت .. هذا القمر وانقلب ظله
تخيلوا وبس انا اللي رقصت ... >> محد يغلبني بالغرور ..احم ههههه
تصدقون عاد .. بعد ماخلصت الاغنيه مهاوي قالتلي .. صكيتي عليها بل ...
حاشتني النشوه ... بس هذا اهم شي
بعد ساعتين تقريبا .. دش المعرس .. بس عاد شنو معرس ..
يحللها منور عرفت تختار .. طول وجمال وسكبه .. بس حرام كان مستحي شوي من الناس ..
بس عيونه ماشالها عن منيييرة
الجانب الثاني
منيرة
اوووف ملييت من هالكرسي تعبت .. وتعبت بعد من كثر ماابتسم .. كل شوي تقولي هالمصورة .. ضحكي .. لفي .. رفعي ايدج .. نزلي ايدج
كنت ميييته تعب ويووع . .بس كلشي طار يوم يتني حصوص وقالتلي المعرس بيدش .. مسكت ايدها على طول وانا اقولها
منيرة : ابوي معاه ؟
حصه : لا خالد وصلاح معاه .. ابوي عند الريايل بالدوانيه
سكت وانا احاول اخفف رعشة ايديني ... فيصل .. لا .. انا مابيه . خلاص هونت .. شلون رضيت عليه .. يااربي
كنت مرتبكه .. وكنت اسمع حصوص ولا مهاوي ولا شيوخ كل شوي وحده تهديني .. الين ماحسيت بايد امي على جتفي .. وقتها بس راح كل الخوف والقلق .. رفعت راسي وانا ابتسم لها كانت تبجي وتمش دموعها .. كنت ماسكه روحي بالموووووت ... قربت مني وقالتلي
ام خالد : الله يوفقج .. انا جذي ارتحت وتطمنت عليج ..
وابتسمت ابتسامه اول مرة اشوفها على ويه امي .. جنها ابتسامه فرح ممزوجه بحزن .. ماادري
التفت صوب الباب بعد ماسعت دخل المعرس وصوت هب السعد يهز الارض ويهز قلبي معاه ..
نزلت عيوني وانا حدي مرتبكه .. وكانت حصوص ومهاوي يمي بشيالهم وعبيهم .. حسيت روحي غلط هههه لاتضحكون .. بس والله كنت احس بشي غريب .. شلون كاشخه يدام ريال مااعرفه ..
ياخبله هذاااا رييلج الحين ... !!!! ياويل حالج يامنور .. متى بتعودين
قرب خالد وحبني عى راسي واباركلي وصلاح نفس الشي ..
وعقب قرب مني فيصل وباسني على راسي وهمس لي بصوته
فيصل : ماادري اباركلج ولا ابارك لروحي .. انا محظوظ .. والله محظوظ
سكتت ولا رديت عليه .. كنت احس ان ايدي انصهرت من مسكته .. حسيت ان قلبي ذاب مابين ضلوعي
اعرفه زييييين صاحب كلام .. الله يستر بس ..
الجانب الثاني
فيصل
ماكنت مصدق عيوني يوم شفت منور .. اهي من الاول حلوة .. ومن اول يوم شفتها كانت عاجبتني .. بس اليوم كانت غير .. كانت ملاك .. لا كانت قمر .. احلى من القمر .. شنو القمر يم هالويه ..
كنت مبهور فيها . .لدرجه اني ماقدرت اشيل عيوني عن ويهها .. حسيت بالاحراج .. بس شسوي مو بيدي
قعدت يمها وعقب قربت منها شوي ومسكت ايدها وانا حاس فيها تكش .. كنت اضحك من داخلي .. عاجبني هالحيا .. قلتلها
فيصل : دوختيني على مارضيتي .. يرضيج تسوين فيني جذيه
منيرة بهمس : مب كل البنات مثل بعض
فيصل : ولا كل البنات مثل هالقمر اللي يمي .. بس صج لو كنتي رافضتني .. كنت يمكن اختطفتج
منيرة : ههههه لا والله
فيصل : اييه .. كيفي احبج
شفتها سكتت من قلتلها هالكلمة .. ماادري سمعتها ولا لا .. لان كنا نتهامس وسط هالازعاج
عقب يتنا بنت .. شكلها اخت منيرة الكبيرة
حصه : بالمبارك فيصل ..
فيصل : الله يبارك فيج .. تسملين
حصه : هذي الوالده تبي تسلم عليك
وقربت مني ام خالد اللي كان باين من ويهها انها طيبه ومرة زينه ... سولفتلي عمتي عنها وااايد .. وحبتها حييل
بستها على راسها وخذينا جم صورة .معاها ..
كانت كل شوي تشوف منور .. وتعدل فستانها . وتبوسها على خدها .. حسيت ان علاقتهم حييل قويه ..
حصه : منيرة حبيبتي شوفي الكاميرة عشان التصوير ..
الساعه 2 ونص
شيخه
توها حصوص تروح بيتها بعد هالتعب والربشه .. وخالد راح يوصل مهاوي بيتهم وبيرجع .. صلوح راح نام لان طيارته باجر مبجر ويبي يلحق ..
امي وابوي صعدوا غرفتهم .. لان امي كان باين عليها التعب مسكينه .. تيمنا انا والخدم نعدل ونشيل .. طبعا انا بس اعطي اوامر .. الله يذكرج بالخير يامنور .. .انتي كنتي شايله كل شي . شعرفني انا بهالسوالف
صح نسيت اقولكم .. منور طلعت مع ريلها يتعشون في فندق .. وعلى اساس انهم بيردون قبل الاثنعش .. ابوي قالي دقي على اختج لاتتأخر بره .. بس عاد هالشياب يحبون الحكرة .. خل البنت تستانس بيوم ملجتها شنو هالتخلف .. ماني داقه
كنت حدي تعباانه وبناام .. وتخيلوا للحين ادور بهدومي .. مابدلت ولاغسلت مكياجي .. بس يله مابقى شي واخلص
الجانب الثاني
السيارة
خالد : هلا عزوز هاا وينك انت .. دقيت عليك فوق الاربع مرات مارديت علي !!
عزيز : هلا خالد ... كنت ... بالبيت
خالد : شفيك ؟؟
عزيز : ولا شي .. اقولك .. مفتاح سيارتي عندك .. فيها اوراق ابيها ضوري .. بمرك الحين
خالد : زيين انت روح البيت وانا اييك الحين بوصل مها البيت .. عطني عشر دقايق بس
عزيز : اوكي .. لاتتأخر
خالد : اوكيه باي
عزيز : باي
سكرت من خلود وانا نفسيتي زفت اليوم .. اخذت سويج سيارة خلود وطلعت بدشداشه من غير غترة ..
تميت طول الطريج سرحان .. كنت اسمع شريط راشد وانا سرحان .. ونار بداخلي ماطفت .. تحسفت ليش ماذبحته .. ليش ماعطيته كف .. علشان مرة ثانيه يحرم يمس شعرة من شعر شيخه
شيخه ..!! ... هذي دواها بعدين ..
وصلت البيت ودخلت الدوانيه على طول وسكرت الباب وراي .. وانصدمت فيها
تدرون منوبعد !!! .. كانت شيخه .. اا
لا مستحيل هذا اهيا ... في بنت من جنس البشر بهالجمال !!
كنت مبحلق وناسي روحي ..ناسي اللي توني معصب منها وطفران من عمايلها .. ناسي انها اخت خلود .. وانها تحب ناصر .. وجنه شي يخليني مااوخر عيوني عنها .. وجنه جفوني يبست بعد ماشافت هالحسن كله .. تيبست بمكاني ماقدرت اتحرك .. يمكن من الصدمه او .. مادري
ماصحيت الا على نبرة صوتها اللي تينني الممزوج بخوفها
شيخه وهي تغطي ويهها بمخده : اطلع شوووي
ماادري ليش عصبت ... الحين تبيني اطلع والحقير كان ماسكها ولا قالت شي
قلت بلحظة غضب وانا اوخر عيوني عنها واطلع : لاتخافين .. انا مو ناصر .. ولا انا شخص قليل تربيه !!
طلعت ... حسيت ان هالكلمة ريحت قلبي من وايد اشياااا .. على الاقل طلعت غضبي كله .. ويمكن لاتميت اكثر .. راح اقط كلام اكبر ..
تميت واقف بره الدوانيه .. وانا انطر خلود الين مايه وخذيت سويج سيارتي وطلعت طيراااان على مخدتي بعد مااقنعت خلود اني مااقدر انام هني .. لان الدوانيه عفسه .. وانا حدي تعبان
شيخه
تدرون بعد ماسمعت هالكلمتين اللي مثل الجبل .. اخذت المخدات كلهم وصرت اقطهم على الباب اللي سكره .. شقصده .. ليش يقول جذيه .. وانا شعلييي .. اخاف عباله اني انا ابي نصور وميته عليييه !!
حقيييير .. اكرهك .... تفهم
صعدت غرفتي وانا ميته قهر .. سكرت الباب وانا ابجي .. شنو هاليوم الكئيييب ... لمست ايدي وين ماكان اهوا ماسكني قبل ساعات .. حسيتها بتحترق من لمسة ايده .. وقلبي قاعد يحترق زوود من كلامه .. اكرهك
طلعت دفتري وكتبت فيه
اكرهك عزوز .. اكرهك
وسكرته وغيرت ملابسي ونزلت كمت شغلي وبعدين اخذتلي كوب حليب وقعدت بالصاله انطر منور تيي .. وبس ييت حتى ماسألتها شسوي رحت ادور الفراش .. كانت تخربط على راسي بس ماادري شتقول .. كنت دااايخه ومقفله صج
الساعه 3 ونص
غرفة عزوز
عبالكم اني قدرت انام .. اللي زاد الطين بله .. شوفتها .. ليتني ماشفتها عالاقل كنت اقدر انام ..
اوووف الين متى هالحاله ...
كنت منسدح على فراشي وافكر .. باجراليمعه وراي قعده من الصبح .. والاسبوع الياي محبوسين بالمعسكر .. قبل شوي مريت ابوي وشفته نايم .. مااطمنت عليه لان شكله كان تعبان .. فكرت اخذ اجازة واتم معاه بس مو راضين الدوام ..
حسيت بصداع راسي يردلي من يديد .. طلعت باكيت البندول واكلت حبه وحاولت اني اريح بالفراش شوي .. الين ماسمعت تلفوني يرن .. كان رقم غريب
شلته
عزيز : الو
عبير بصوت انثوي ناعم : هلا
عزيز : من معاي ؟
عبير : امم .. هذا من تلفون نورة ؟
عزيز : لاموتلفون نورة !
عبير : عيل تلفون منو ؟
استغربت شهالميانين تالي الليل ناقصج بعد : باي
وسكرت التلفون وعلى طول رن وكان خلود
عزيز : هلا خلوود .. شمقعدك ؟
خالد : ماادري .. مو يايني نوم
عزيز اللي كان مصدع وراسه يفتر بس مااحب انه يرد خلود يمكن بخاطره شي يبي يقوله
عزيز : تفكر !! ؟
خالد : عزوز .. لاتفهمني غلط .. بس ابي اقولك شي
عزيز : قول شصاير ؟
خالد : احس اني ... تسرعت بهالزواج !
قمت من سدحتي بسرعه : هااا !!
خالد : قلتلك لاتفهمني غلط
عزيز : عيل شلون تبيني افهمك ؟؟
خالد : اووف .. انا قصدي يعني العزوبيه .. تكون انت حر .. طليق .. الحين احس اني مرتبط .. ووراي مسؤليه
يمكن لو كنت ناطر شوي احسن !! ..
عزيز : خرعتني عبالي عندك سالفه
خالد : وهذي شي مو مهم يعني !
عزيز : شوف خلود .. كل واحد في بدايه زواجه يحس احساس غريب ويحن للوضع اللي كان فيه قبل الزواج .. لكن بعدين بتتعود .. ولو قلتلك الحين اترك مها .. مراح تقدر .. الموضوع طبيعي واحساسك بعد طبيعي بس المهم انه مايطول .. حاول انك تتأقلم مع الوضع اليديد .. بالعكس انا اشوف الزواج فيه حريه يمكن مو مثل العزوبيه .. لكن عالم احلى من العزوبيه بوايد
خالد : احلى احلى يابوسعود .. شهالحكم !!! .. اللي يسمع كلامك يقول الاخ متزوج وعنده درزن يهال
عزيز : ههههههههه اووو كل شوي هذا بيعايرنا انه متزوج ..يبا درينا انك متزوج
خالد : ههههههه لا ماعايرك .. اقولك شي صار اليوم بعد تستغرب منه
عزيز : قوول
خالد : ابوي بيسافر بعد يومين جذيه ..
عزيز : وشنو الغريب في الموضوع ؟
خالد : ابوي مايحب السفر .. وان سافر راح العمرة
عزيز : ليش وين ناوي يروح .. بانكوك ؟؟هههه
خالد : لا .. يقول بيروح الامارات .. عنده شغل
عزيز : وخله يروح .. مافهت سبب استنكارك ؟
خالد : ابوي الحليب اللي ينتجه من المزرعه يتصدر بالكويت .. هالمرة طاري عليه مصانع بالامارات يبي يصدر لها ويتعامل معاها ..
عزيز : اها .. بالعكس شي زيين والله ..
خالد : عزووز .. افهمني
عزيز : ههههههه والله انتا مو صاحي .. اقول روح ناام احسن
خالد : لحظة بعد فيه خبر طازج محد يدري فيه غيري انا وابوي
عزيز : شنو ؟
خالد : ناصر ولد خالتي ....
عزيز فز من مكانه وبهدوء مصطنع .. لكن اهتمامه كله بالكلام اللي بيقوله خالد بعد هالصمت : شفيه !!!!
خالد : خطب شيووخ اختي ..
مسكت تلفوني بقوة .. كان شوي بينكسر من مسكتي عقب ذيج الجمله اللي سمعتها من خلوود .. سكت .. تخيلوا .. ماقدرت انطق بحرف .. ولا حرف .. حسيت روحي ضعيف .. حسيت ان الناس يقدرون ياخذون مني قلبي وانا ساكت اطالعهم ..
خالد : الووووو !!!
عزيز : معاك
خالد : شرايك انت ؟
عزيز : انا مالي شغل .. كيفكم
خالد : والله ابوي احسه مو متشجع .. بس راي شيوخ اول ..
عزيز : مو .. جنها صغيرة شوي ؟؟
خالد : انا قلت جذيه .. بس عاد شياب ماعندهم صغيرة ولا كبيرة .. تعرف العقليات انتا
بعد سكت .. كنت اير الحروف والكلام من روحي يرر .. ماكنت عارف شقول .. وماكنت متوعق ان هالشي بيصير .. عالاقل مو بهالسرعه ..كنت اشوف الحلم يدام عيوني قاعد يروح .. ويروح بعييد ولاني قادر اسوي شي ..
خالد : الووو ..
عزيز : اقولك .. انا حدي دايييخ وماادري شقاعد تتقول .. اشوفك باجر ونتكلم
خالد : اوكي اوكي .. يله باي
عزيز : باي
واول ماسكرت التلفون من خلود .. قطيت روحي على الفراش وغمضت عيني ..احاول اني اتناسى الكلام اللي سمعته بس ماقدرت ..
اخذت سويجي وطلعت بره البيت .. وبره همومي ..
اليوم الثاني
الساعه 9 صباحا
شيخه
قمت وانا بالمووووت اير ريولي .. سبحت على السريييع وغيرت ملابسي ولبست دراعه فوشيا ولفيت شيلتي ونزلت تحت لقيت الكل قاعد .. طبعا مانسيتو ان اليوم بيسافر صلووح .. يمكن يرجع قبل الدوامات او يمكن لا .. لان مايسوى يرجع .. فقعدنا كلنا عشان نسلم عليه ..
في الصاله كان سلطان وحصه وعيالهم ومنيرة وابوي وامي وخالاتي وجاسم ولد خالتي وطبعا العله ناصر .. خالد كان توه ياي من بره
سلمت على الكل ورحت صوب حصوص ومهاوي ومنور
مهاوي : شيووووخ .. تعالي شربي جااي
شيخه : صبيلي يااختي .. عشان اصحح .. احس اني مسطله
منيرة : منو شنو حبيبتي .. نايمه لين ماشبعتي
شيخه : انيت اوووش لاتحجيين . .اصلا المفروض ماتنطقين بحرف .. امس كلشي على راسي .. جني خداامه اشيل واحط واخم ولا احد ساعدني .. ولا فوق هذا بعد نطروو منوور علشان افتح لها الباب ..
مها وحصوص : هههههههههههههههههههه
منيرة : انكرفي مرة وحده بحياتج .. عشان اختج حبيبتي .. عادي
ولزقت منور فيني .. تسوي حركاات وتحظني وانا اوخرها
شيخه : لاتحااولييين .. زعلانه
منيرة : تبين اطلبلج من برجر كنج
بغييت اقولها ايه .. بس تذكرت هديه عزوز .. سكت شوي .. وين عزوز ..!! توقعته يكون هني
منيرة : هاا شقلتي
شيخه : ارضى بشرط ؟
منيرة : هاا ؟
شيخه : تقوليلي شنو سويتي امس مع فصوول
منيرة : وييييييعه .. اصغر عيالج فصووول !!
حصه : هههههه انسي تعبنا فيها ولا قالت ولا كلمه .. تقول اسرار
مها : هههههههه اقول مالت علي .. شفيني انا خريت الاكو واللي ماكو من اول يوم ملجت فيه على اخوكم
شيخه وهي تشرب استكانتها : لانج خبله على اختج .. احم اللي اهي انا هههههه
مها : صدقتي ههههههههههههههه
ام خالد : خلود .. وين عزوز يما .. جني سمعت صوته
فز قلبي يوم صار الحديث عنه ولا شعوريا لفيت صوب خالد انتظر الاجابه
خالد : يقول مايبي يدش .. بيسلم على صلاح بره
انصدمت .. اول مرة عزوز يسويها ومايدش .. العاده يدرعم او يقول عالاقل ابي اسلم على خالتي .. ان شالله مايبي يدش عشاني انا موجوده .. ليش هالكثر يكرهني ليييش !!! ..
تدرون شلوون .. احسن .. يعلك ماحبيتني بيووم !!
انا شقاعده اخربط .. ايه قصدي يحبني مثل اخته .. مثل منور وحصه ..
زين ياعزوز .. انا اعرف شلون اغثك صج ..
بعد ماقعدنا شوي .. طلع صلاح جنطته وحطها بالسيارة وبدى يسلم على خالاتي وعلينا وعقب امي كانت بالغرفة الثانيه .. قعد يدورها صلاح الين ماحصلها ودخل عندها وماشفنا هالوداع المبكي
الغرفة
صلاح : يما ان بجيتي ترى صج ماني مسافر
ام خالد وهي تمش دموعها بملفعها : شوف صلاح .. بقولك جم كلمه .. خلها لك للزمن ولا تنساها بيوم .. سواء كنت عايشه ولا ميته .. ابيك تكون قريب من ربك حتى بديرة الغربه .. خل ربك يدام عيونك دايما .. وحافظ على صلاتك وعبادتك .. لاتخلي شي يأثر عليك .. لاتكون مثل غيرك ..
صلاح : من عيوني يالغاليه .. بعد آمري
ام خالد : مااوصبك على روحك ..
وتمت ساكته وهي تشوفني ودموعها تنزل مثل النهر .. كنت استغرب امي ليش تشوفني جذيه .. حسيت انها تبي تشبع من شوفتي .. في عيونها حزن لكن تحاول تخبيه .. ماادري بس ماقدرت امنع روحي من حظنها
لميتها حييل وانا ابجي .. واهي تبجي .. كنت احسها قاعده تودعني .. وجنها مراح تشوفني بعد
صلاح : يماا .. ترى كل عطله انا بكون منرز عندج .. لأما تملين مني
ام خالد : مايندرى نكون عايشين ياوليدي ولا لا ! ! . .
صلاح : لاتقولين جذي يماا .. الله يعطيج طولة العمر والصحه ياارب
ام خالد : حط باك على روحك .. فمان الله يالغالي ......