السلام عليكم ورحمة الله وبركاته
اهنئكم بمولد سبط الرسول الأعظم محمد صلى الله عليه وآله وسلم .. الأمام الحسن عليه السلام .. ينعادعليكم بالصحة والعافية يارب .
بس الله الرحمن الرحيم
كم كان عمرك أول ما قرقعت ؟ و متى توقفت عن القرقيعان ؟
طبعا بديت تقريبا قبل اول ابتدائي بشي بسيط .. وتوقفت تقريبا يا صف سادس أو أول متوسط .
- مع من كنت تقرقع ؟
مع أخواني وأحيانا ينظم لنا بعض الأصدقاء.
- ما هي خطتك اللي كنت تتبعها في القرقيعان ،، من تطلع من البيت إلى أن ترجع ؟
نبدأ اولا في بيوت الجيران القريبة منا .. وبعدين نروح الراشديه ونقعد نحوس لحد ما نحس انا احنا مرينا معظم البيوت تقريبا ,, بعدين نتجه للديرة.
- هل كنت تلبس ملابس خاصة في القرقيعان ؟ و لاّ تلبس أي شي ؟
مش خاصه مررره . في العاده ثوب ابيض لكن احينا نرز روحنا يعن كشخه الحين .. نلبس شماغ وعاد اقعد عدل فيه طول الطريق
والله ايام حلوه راحت .
موقف صار لك في القرقيعان و لا يمكن أن تنساه ؟
أذكر موقفين ..
الأول ,, كنا نقرقع في الصباح ورحنا أحد البيوت وتوهقنا معاهم مسكونا أسرى عندهم موراضين يخلونا نطلع . ورشو أخوي بالماي والله ذاك بالكاد طلعنا
من عندهم واحنا صغار وميتين من الخوف ههههههههههههههههههههه .
الثاني ,, رحنا بيت مع مجموعة كبيره من الصغار فجأه ... شفناهم يصارخون ومنحاشين . بعدين اكتشفنا ان هذا البيت في بنت الله يشافيها انشاء الله
موصاحية شوي (الحمدلله على الصحة والعافية) وحنا بعد انحشنا وياهم.
ما هو القرقيعان المفضل بالنسبة لك ؟؟ ( ربيان ، بسكوت ، مكسرات ...إلخ ) ؟
اكثر شي احب البسكوت والربيان والبطاطس .. ومو ذاك الزود مع الحلويات.
شنهي ردة فعلك لمّا تروح بيت ،، و ما يعطونك قرقيعان ؟
والله أحس بنوع من الأحراج خصوصا اذا دخلنا مجموعة كبيره ولا احد حولنا.
شنو يوزعون بيتكم في القرقيعان عادةً ؟
بسكويت وربيان أو بطاطس.
الكثير من الأطفال كانوا يفطرون يوم القرقيعان بحجة التعب والعطش .. فهل سويتها ؟
الحمدلله ولا مره سويتها .. صحيح كنا ننتهي من التعب والجوع والعطش لكن .. ملنا الجرأه ان نفطر نحس انها قويه هالحركه هههههه ..
مع ان في واجد يفطرون قدامنا لكن نمسك انفسنا .
بعض اللي يقرقعون يروحون ويجوون على البيت الواحد أكثر من مرة ؟
فما رآيك في هذي الحركة ؟ و هل كنت تسويها ؟
بصراحه حركه بايخه ومو حلوه .. وانا ولا مره سويتها.
بعض اللي يقرقعون ،، يجيك و يقول عطوني قرقيعان لأخوي أو أختي ..
و لما تقول له وينه ؟ ليش ما يجي يقرقع معاك ؟
يقول لك : هو في البيت ،، ما يقدر يقرقع ،، أصلاً توّه صغير ما بعد حتى يمشي !!
فما رأيك في هذي الحركة ؟ و هل سويتها ؟
المشكلة احيانا بعضهم يكون صحيح صادق معك لكن للأسف واجد يبي يجمع اكثر وبس .. لكن ماوده احد يحرم الصغار من البركه ويقعد يدقق ..
سواها اخوي مره ولكن لأن اخوي الصغير قرقع شوي وتعب وديناه البيت وقرقعناله.
12 - كم كانت حصيلة القرقيعان اللي تجمعها عادةً ؟ و شنو تسوي فيها ؟
في الغالب كيس ونص الى كيستين .. واقعد آكل فيه على الراحه واذا شي ماعجبني يا ابادله او اوزعه.
هل يتعرض قرقيعانك لأي اعتداءات أو سرقات سواء في الخارج أو في المنزل ؟
الحمدلله ولا مره صارت لي لا في الشارع ولا في البيت.
هل تتمنى يرجع بك الزمن إلى الوراء ..عشان تقرقع ؟ .. وشنو اللي ودّك تسوّيه لو قرقعت ؟
ايه والله ياليت يرجع الزمن للوراء واقرقع من جديد ... ودي اقرقع على بيوت ماكانت اعرفها ذاك الوقت.
مالدور الذي تقوم به في القرقيعان حالياً ؟
انا وزعت مره وحده بس تقريبا .. والغالب احب اتفرج على الصغار وهم يقرقعون لأن اشكالهم مره حلوه خصوصا البنات مع البخنق يحليلهم.
هل تؤيد خروج البعض من الأولاد الكبار ،، أو البنات الكبيرات ،، للقرقيعان ؟
الأولاد لا ما أأيد نهائيا .. لكن البنات حتى لو كانوا كبار يهون شوي لأن معظم اللي يوزعون في البيوت بنات لأن البنت بتكون متغطيه.
هل ترى بأن هناك عادات جديدة دخلت في قرقيعان اليوم ..و هل هي إيجابية أم سلبية من وجهة نظرك ؟
عادات كثيره دخلت على القرقيعان لكن اشوف ان الأيجابيه أكثر مثلا ...
القرقيعان صار في الليل اريح حق الصغار..
صار في توزيع في الشوارع حتى الكبار صاروا يحسون بالفرحة في هالمناسبه..
في افكار جديده في اشكال القرقيعان حتى تفتح نفس الطفل ...
لكن في امور سلبيه بسيطه مثل كثره حركة السيارت اللي تربك حركة الأطفال.أخيرا اشكر زهور الريف على الفكرة اللي جدا رائعة .. وعلى استضافتي لأني استمتعت كثير.
تحية من القلب ... طرفاوي أصيل