[أول الغيث]

أشكر الأخت زهور الريف على هذه الفكرة وهذه الإستضافة الجميلة

و أبارك للجميع مولد الإمام الحسن ( ع )

و عساه يعود علينا و عليكم بالخير والبركة إن شاء الله


بسم الله .. نبدأ الإجابات

اقتباس 1 - كم كان عمرك أول ما قرقعت ؟ و متى توقفت عن القرقيعان ؟

قرقعت صح و آنا في ثالث ابتدائي يمكن ،، و ختمتها بسادس تقريباً ..

<<< ما قرقعت شي الله يخلف ..

اقتباس 2 - مع من كنت تقرقع ؟

أول شي نطلع آنا و اخواني ،، و بس نلتقي بالقروب ( عيال خوالي ) نكمل بقية اليوم معاهم ..

و لازم طبعاً يلتحق بنا بعض الربع من هنا و هناك ،،

اقتباس 3 - ما هي خطتك اللي كنت تتبعها في القرقيعان ،، من تطلع من البيت إلى أن ترجع ؟

نطلع من البيت الساعة 3 العصر أو قبل بعد .. ونقرقع بيت بيت إلى أن نوصل الراشدية و نحوسها حوس ،، و بعدين نتوجه جهة الديرة

لكن عادة يخلص اليوم قبل مانوصل ،، فنختم القرقيعان بالفريج ثم البيت ..

و اذكر أحلى شي لما تدخل حارة متروسة بيوت << تتفائل خير و تعرف أنك بتطلع بشي عدل ..

اقتباس 4 - هل كنت تلبس ملابس خاصة في القرقيعان ؟ و لاّ أي شي ؟

ثوب أبيض عادةً ..

بس مرة لبست شتوي ،، لأنه الوقت كان شتاء

لكن ذاك اليوم بالذات صار حررر ،،

اقتباس 5 - موقف صار لك في القرقيعان و لا يمكن أن تنساه ؟

مرة أذكر دخلنا بيت ،، و ما أمدانا دخلنا إلاّ و تقابلنا ذيك البنت اللي الله لايوريكم ،،، ( نسرة )

وتقوم تطردنا و تقول يلا انقلعوا ماعندنا قرقيعان لكم ،، لا وفوق هذا قاعدة تدزّزّ فينا و تصك الباب علينا ..

عاد ليومك مانسيت هالبيت ،، و لو الودّ ودّي انتقمت منهم

..<<< اشدعوة !! كله حقد ؟!

اقتباس 6 - ما هو القرقيعان المفضل بالنسبة لك ؟؟ ( ربيان ، بسكوت ، مكسرات ...إلخ ) ؟

كل شي ،، و أحب أكثر شيء الأصناف الجديدة و الغريبة علَي ..

و ما أحب الأشياء اللي ما تسمن و لا تغني من جوع ،، و مالها أي قيمة ..

اقتباس 7 - شنهي ردة فعلك لمّا تروح بيت ،، و ما يعطونك قرقيعان ؟

عادةً البيت اللي ما يعطينا ،، ماتشوف فيه أحد حولك ،،

يعني تدخل تقول : قرقيعان قرقيعان ،، لكن لا من مجيب ..

فتطلع و أنت تشعر بخيبة أمل نوعاً ما .. لكن البركة في البيوت الباقية ..


و لاتنسون طبعاً البيت اللي تكلمنا عنه فوق ،،

هذا يمكن البيت الوحيد للي سوّى فينا ذيك السواة ..

اقتباس 8 - شنو يوزعون بيتكم في القرقيعان عادةً ؟

أحياناً ربيان ،، و أحياناً بسكوت ،، و أحياناً ريالات ..

اقتباس 9 - الكثير من الأطفال كانوا يفطرون يوم القرقيعان بحجة التعب والعطش .. فهل سويتها ؟

لااا .. أستغفر الله ..

طبعاً خبركم السنين اللي راحت كان رمضان في الشتاء ،، فكان الوضع حلو و تمام بالنسبة لنا ...

اقتباس 10 - بعض اللي يقرقعون يروحون ويجوون على البيت الواحد أكثر من مرة ؟ فما رآيك في هذي الحركة ؟

كلّش ما تعجبني .. خصوصاً إذا حاول الشخص التلصص و الدخول في الزحمة عشان ما ينتبه اللي يوزّع

أو إذا قلت له : توّك جاي !! ،، و قام يكذب عليك و يقول : لا ماجيت ..

اقتباس و هل كنت تسويها ؟

لا الحمد لله ما أسويها ..

اقتباس 11 - بعض اللي يقرقعون ،، يجيك و يقول عطوني قرقيعان لأخوي أو أختي .. و لما تقول له وينه ؟ ليش ما يجي يقرقع معاك ؟ يقول لك : هو في البيت ،، ما يقدر يقرقع ،، أصلاً توّه صغير ما بعد حتى يمشي !! فما رأيك في هذي الحركة ؟ و هل سويتها ؟

طبعاً في القرقيعان ما ودك تكسر بخاطر أحد ،، و ما تسوى هالفرحة تدقق و تحقق فيها

بس أشوف أن الصغير حيل ما يفهم هالأشياء ،، و لا راح يآكلها أو يسوي فيها شي ..

و أحياناً تمصخ السالفة لمّا يجيك بعضهم و يبيك تعطيه لبزران العايلة كلها !!

لكن في النهاية هي طبعاً فرحة ،، و ما ينردّ فيه أحد ..


من المواقف اللي صارت ،، واحد صغير قال لي : عندي اخوان اثنين صغار في البيت أبيك تعطيني لهم،، واحد اسمه أحمد ،، واحد اسمه حسن ،،

<<< يابو زغط يبي يقول لي تراني صريح معاك لأبعد الحدود ،، و ما أقص عليك ..

اقتباس 12 - كم كانت حصيلة القرقيعان اللي تجمعها عادةً ؟ و شنو تسوي فيها ؟

كيسة كبيرة ،، و ثانية وسط يعني ..

و عادة لما نخلص القرقيعان ،، كل واحد يآخذ له كرتون من كراتين الربيان اللي وزعنا منهم ،، و يحط قرقيعانه فيه

و كل ليلة يآكل شي منه ..لين يخلص بعد شهر أو شهرين ..

اقتباس 13 - هل يتعرض قرقيعانك لأي اعتداءات أو سرقات سواء في الخارج أو في المنزل ؟

لا والله ما قط صارت ،، بس أحياناً يصير تقايض و تبادل منفعة بين الإخوان ..

اقتباس 14 - هل تتمنى يرجع بك الزمن إلى الوراء ..عشان تقرقع ؟ ..

بما أني ماشبعت من القرقيعان أيام الطفولة ،، فأتمنى أعوّض اللي فاتني الحين

اقتباس وشنو اللي ودّك تسوّيه لو قرقعت ؟

بس يكفي أني أقرقع ،، و ودّي أحوس أكثر من قبل ..

اقتباس 15 - مالدور الذي تقوم به في القرقيعان حالياً ؟

أوزّع ..

اقتباس 16 - هل تؤيد خروج البعض من الأولاد الكبار ،، أو البنات الكبيرات ،، للقرقيعان ؟

الأولاد اللي يتغطون منهم الحريم ،، لا أؤيد أنهم يقرقعون ..

أما البنات فلا مانع إلى حدٍ ما .. بس إذا كانت كبيرة حيل ،، فلا أؤيد أنها تقرقع و تحوس في هالشوارع و البيوت ..

اقتباس 17 - هل ترى بأن هناك عادات جديدة دخلت في قرقيعان اليوم ..و هل هي إيجابية أم سلبية من وجهة نظرك ؟

فيه حركة جديدة اشوي ،، و أشوف أنها سلبية

و هي أن البعض يشيل له مجموعة أطفال و يحوس بهم بالسيارة ،،

لكن ما يخليهم ينزلون و يتمشون و يحسّون بمتعة القرقيعان حالهم حال غيرهم

لا و تعال أنت ياللي توزّع اطلع لهم و وزّع عليهم و هم في السيارة ..

ناهيك طبعاً عن أن كثرة السيارات تزيد من الزحمة ،، و تربك اللي يقرقعون و تعرضهم للخطر ..