[سكون الصمت]

اقتباس المشاركة الأصلية كتبت بواسطة قاهر المستحيل لازلنـا متـابعيـن ..

اشكرك لهذه المتابعه الطيبه ,,


انتظرني بعد قليل ,,








الجزء الثامن
اليوم الثاني
الصبح الساعه 10 ..
غرفة عزيز

فتحت عيوني شوي شوي .. حاولت اخذ تلفوني بشوف الساعه جم .. بس ماقدرت احس جسمي كله يعورني والحرارة تطلع منه مثل الدخان
عرفت اني مسخن والظاهر راحت علي نومه ومارحت الدوام ..
مسكت راسي بالم .. حسيته بينفجر .. بحاول ارفعه بس ماقدرت .. ولا بعد قدرت انادي أي احد .. تعرفون كنت ببجي كنت ابي امي .. ابوي أي احد ..
دقايق من الالم .. رن تلفوني .. وكنت عارف انه خلود يبي يعرف ليش ماداومت .. وبعد ثواني حاولت امسك التلفون لكنه سكت ..
حطيته على صدري اللي يزفر بقوة .. وغفت عيني


الجانب الثاني
الدوام ..
خالد : جسوم .. تعرف يعني صارلي 3 ساعات ادق عليه ولا يرد .. عزوز عمره ماسواها فيني
جاسم : والله ماادري خلود خوفتني .. يمكن راحت عليه نومه
خالد واللي خلاص ماقدر يصبر اكثر : انا باستأذن نص ساعه بشوفه عزيز وبيك ..
جاسم : اوكيه .. وطمني عليه الله يخليك


طلع خالد من الدوام وباله مشغول بعزوز .. ياترى هذا وينه .. معقوله فيه شي ..!! لا اسمله عليه الله لا يقول ان شالله
يمكن نايم .. اكيد نايم ..
وصلت بيت بو عزيز بعد ربع ساعه .. تدرون .. ولامرة دخلت هالبيت .. ادري انكم ماراح تصدقوني .. عزيز مايخليني ايي بيتهم الا نادرا .. واذا دخلت ادخل الديوانيه على طول ..
ماشفت ابوه من سنين طوويله .. من بعد ماتوفت المرحومه خالتي امينه .. كنت اعرف ان سبب منع عزيز لدخولي بيتهم .. اهوا ابوه .. مايبيني اشوف ابوه بحالة سكر .. هالشي بيخليه يصغر بعيني ويحس بالعار .. او يمكن يعتقد اني بتشمت فيه .. او بعيب عليه هالشي
مع اني مافكرت بهالطريقه كلش .. مرات احس ان عزيز في حياته اشيا وايد مااعرفها .. رغم انه حياته كلها معاي.. وطول وقتنا ضحك ووناسه . الا انه في جانب في هالولد مظلم من ينذكر له طاري اهله او طاري ابوه ..
سميت باسم لله ودخلت البيت .. طقيت الباب وافتحت لي الخدامه
خالد : بابا عزيز هني !!
الخدامه : نايم
خالد : زين منو اكو في البيت ؟
الخدامه : بابا كبير نايم .. وماما سارة اكو دوام
خالد : زين وين غرفه بابا عزيز ؟
صعدت مع الخدامه لغرفه عزوز .. الهدوء كان يعم البيت .. مالاحظت شي ابدا لان تركيزي كان منصب على عزوز .. واول ماوصلنا الغرفة طقت الخدامه الباب مرة ومرين وثلاث بس محد يرد عليها عقب قلتلها : وخري انا بطق الباب
صرت اطق بقوة اكبر .. واكثر .. حسيت ان الباب بينكسر من كثر ماطقيته .. معقوله كل هذا نايم .. مستحيل .. عزوز فيه شي
رجعت عن الباب شوي .. وبقوة حطيت جتفي عليه الين مانكسر القفل وانفتح الباب بقوة اكثر
ركضت صوب سرير عزوز اللي كان مدد عليه جنه ميت
صرت اناديه بصوت عالي بس مارد عليي .. كان يتأوه ويون بشكل يعور القلب
حطيت ايدي على راسه وحسيت بالحرارة راح تخترق ايدي .. كان يزفر بقوة اللي يخليه مب قادر يتكلم ..
وبسرعه اكثر شلته .. عزيز كان جثه ميته .. حسيت وجنه هالشخص ماله احد .. رغم وجوده بيته .. حسيت انه متشرد .. يتيم .. وحيد .. عورني هالشعور .. آلمتني وحده عزوز ..
طول الطريج كنت اسمع عزيز يأن .. قلبي يعورني اكثر واكثر على هالريال .. يارب هونها يارب

نفس اليوم
الجامعه
منيرة : شيوووووخ يالنحيسه .. اقعد ساعه كامله ما عندي محاضرة .. !!
شيخه : منور حرام عليج اتم ساعه ونص وارد مع باص الجامعه .. نطريني محاضرتي ماتطول ونرد البيت يميع مع السايق
منيرة : اوووف الحين شسوي .. كل البنات مو فاضين هالحزة
شيخه : اممم .. تعالي الكلية عندي عندي بحث طلعيلي ياه من المكتبه
منيرة : زين يله بعد ماكو حل ..
شيخه : يابعد عمري يااختي الله لايحرمني منج
منيرة : بس بس يالنصابه
شيخه : ههههه بتيين مع باص الجامعه؟
منيرة : اييه
شيخه : اوكيه يلا باي يه الدكتور
منيرة : باي

سكرت التلفون من شيوخ وانا صج زهقانه .. ساعه شسوي فيها !!
رحت صوب الباصات وركبت الباص اللي يودي لكليه شيوخ طبعا ماتبعد عني كليتي الا عشر دقايق
كان الباص فاضي .. قعدت يدام وحطيت كتبي يمي وفتحت تلفوني العب فيه .. رفعت راسي على صوت سمعته صوب الباب وكان مصدره ... فيصل
ارتبكت وانزعجت .. خذت كتبي كنت ناويه اقوم .. ماودي اقعد معاه بنفس المكان ويسوي لي حركاته السخيفه
وقفت عند الباب بس حط ايده على الباب يمنعني من الطلعه
فيصل : منيرة .. ابي اكلمج بمضوع
منيرة : وخر عن الباب .. بطلع
التفت على صوت واحد واقف يم الباص يقول للبنات اللي يبون يركبون الباص ان مليان
انا هني مت من الخوف .. عرفت ان هالشخص من طرف فيصل ..
فيصل وهو يكلم السايق : سكر الباب وحرك الباص يلا
السايق : مايصير بابا .. لازم باص يصير مليان
وطلع فيصل من بوكه عشر دنانير وعطاهم السايق اللي هز راسه وابتسم وحرك
وانا كنت اشوف كل هذا وماقدرت انطق بحرف .. يمكن صدمتي باللي صار خلتني اعجز عن الكلام .. يمكن الخوف .. ماادري .. ماقدرت اسوي شي .. مااقدرت الا اقعد بمكاني وكلشي فيني يرجف
فيصل قعد بالمقعد اللي وراي وراسه مقربه صوبي وهو يتكلم
فيصل : منيرة .. خلينا بالجد .. ممكن نتكلم مثل اثنين واعيين!!
منيرة واللي كانت تبجي من غير ماتحس وعيونها على الدريشه : مابي
فيصل : شوفي منيرة .. انا لو ااشر على أي بنت بالجامعه .. اقدر احصل عليها .. بس انا ابيج انتي .. مم خلينا نكون اصدقاء .. اذا تبين او حبايب بعد اذا تبين .. بس المهم نكون قراب
فيصل : منيرة .. بلييز خلينا نجرب
منيرة .. تدرون انا ماكنت اسمع ولا كلمه من اللي يقوله .. كانت عيوني على الطريج كنت ابي اتأكد اني مو رايحه مكان ثاني .. كنت ابي اتأكد ان هذا الطريج الصح بس
فيصل : انتظر منج جواب .. بس تأكدي انج محظوظه لاني اخترتج من بين الكل
منيرة .. لاشيخ .. سخيف ودمك ثقيل وفوق هذا مغرور بعد : .....
وقف الباص ونزل فيصل وانا تميت بمكاني .. منصدمه .. فيصل ليش يسوي فيني جذيه !! .. ليش انا .. طيب بنات وايد على قولته يبونه .. يروح لهم .. ويتركني بحالي
تبون الصج عكر مزاجي فوق ماهو متعكر .. نزلت من الباص .. ورحت صوب المكتبه ادور بحث شيوخ .. واقضي وقتي يمكن انسى هالفيصل اللي طالعلي بكل مكان

الساعه وحده ونص .
بيت بوخالد
ردينا البيت انا ومنيرة .. منور كانت طول الطريج هاديه وسرحانه.. ماادري شفيها مو عادتها سألتها كذا مرة وماردت علي
دشينا البيت كان هدووء مو العاده
شفنا صلاح ياي من صوب الديوانيه
صلاح : وصلتوا !!
شيخه : لا بعد عشر دقايق
صلاح : كعكعكعكع .. سخيفه
شيخه : ههاااي انتا اسخف .. وين امي
منيرة : انا بروح غرفتي
صلاح : امي بالديوانيه
شيخه باستغراب : ليش !! .. منو عندنا ؟
صلاح : الله يسلمج عزوز مريض ..
شيخه : و منو قاله ان بيتنا مستشفى ؟
صلاح : حرام شيوخ لو تشوفين شكله شلون .. خلود يقول الدكتور قاله حرارته وايد مرتفعه ويحتاج اسبوع راحه
شيخه : زين وابوي وينه !!
صلاح : ابوي راح المزرعه .. تدرين ابوي حياته كلها هناك
شيخه : وانتا شمقعدك .. يلا على غرفتك ادرس بتبدى الامتحانات
صلاح : بس بس لاتذكريني بروحي ابي انسى
شيخه : ممم صلووح .. وين ناوي تدش ؟
صلاح : ودي هندسه طيران .. بس عاد لازم اييب نسبه ادعيلي شيوخ بصلاتج
شيخه : مم افكر
صلاح : عاد الحين يقول شاقه السيادة من كثر ماتصلين
شيخه : جــــــــــب مالك شغل
صلاح : عيب عيب .. تسبين اخوج الطيار .. ماكو احترام بهالبيت
شيخه : صلوح .. مم شرايك توديني بيت خاتي ناديه ؟
صلاح : شعندج ؟
شيخه : موضوع مايخصك .. بلييييز
صلاح : مايخصني .. وقبل شوي تقوليلي جب .. انسي
شيخه : اووووف .. ياربي مااحب اذل روحي حقكم .. بدق على ابوي يوديني ولا منتك يالدب
صلاح : هههههههاي .. روحي قوليليه اشوف

صعدت غرفتي ودقيت على ابوي .. وبعد السلامات والمجاملات الحارة ..
شيخه : يبا متى بترد البيت ؟
ابو خالد : بعد صلاة المغرب ليش يبا ؟
شيخه : ممم بغيتك توديني بيت خالتي ناديه
ابوخالد : ليش وين اخوانج ؟
شيخه : خلود بيقعد مع عزوز لانه مريض وصلوح نحيس مايوديني
ابوخالد : حاضر جم شيوخ احنا عندنا .. اصلي المغرب واطلع من المزرعه يعني على الساعه 6 تكونين جاهزة زين
شيخه :يا بعد قلبي يبا .. مشكور ..
ابوخالد : يلا يبا .. تبين شي ؟
شيخه : لا سلامتك .. مع السلامه
ابو خالد : مع السلامه

سكرت من ابوي وانا ابوس التلفون .. .امووووووت عليك يابوخالد .. دايم تعزني الله لا يحرمنا منك ياااارب
خذت التلفون ودقيت على مها
مها : هلا بالطيب الغالي
شيخه : وحشتيييييني موووووووووووت هههههههه
مها : ههههههه وانتي بعد وينج يالخايسه ليش ماتدقين
شيخه : اقولج باختصار .. دشي المطبخ وسويلي قهوة مضبوطه بعد صلاة المغرب بيي وبرز ويهي عندكم
مها : حلللللللللللللفي !!
شيخه : والله .. يله روحي لبسي وكشخي رجاءا .. لاتقعدين لي بالبجامه
مها : ههههههه زين يله لاتأخرين
شيخه : اوكي .. يله بيباي
مها : بيباي
دشيت الحمام وخذتلي دش سريع وصليت الظهر وعقب غيرت ملابسي ونزلت تحت
لقيت حصه وعيالها هني .. استانست لاني من زمان ماشفتها .. وحصوص طبعا صايرة جنها عيوز .. طول القعده تقولج اخبار العايله كلها .. يعني سوالف ووناسه ..
منورة مو طبيعيه .. يمكن متضايقه من مادة مو مسويه فيها زين .. مم لازم اشوفها اليوم بليل واقعد معاها
تغدينا يميع وعقب صليت العصر واخذتلي قيلوله صغيرة وبعدها قمت ونزلت المطبخ لان منور بتسويلي كيكه باخذها معاي بيت خالتي ناديه
شيخه : زيدي الكاكاو منور احلى
منيرة : زييين
حصه : منور .. سويلنا احنا بعد ..حدي مشتهيتها
منيرة : عاد احنا مانرد لج طلب .. اخاف يطلع في البيبي
حصه : ايييييييي ذكرتيني .. منور ..ابيج تين وياي .. بروح مع سلطان محل بجهز منه جم شغله بحتاجها ..
منيرة : ممم مالي خلق حصه اخذي شيخه
شيوخ اللي قاعده تلحس في ماعون الكيك : سوري .. مااقدر بروح بيت مهاوي
حصه : بتقولين لها عن موضوع خالد ؟
شيخه : يس يس ..
حصه : زين عطينا الاخبار اول باول
شيخه : افاااا عليج .. لاتوصين هههه
حصه : ماتدرون شصار على موضوع ناصر ؟
منيرة : شصار ؟
حصه : يوم الخميس الياي بييب زوجته الامريكيه
منيرة وشيخه : صج !!
حصه : اييه .. واليمعه زوارتنا ببيت خالتي فاطمه .. بنشوف اختيار هالناصر
شيخه : الله يعينهم على هالمصيبه

تمينا شوي على سوالف الين ماخلصت كيكتي صعدت الغرفه لبست وكشخت .. كنت ابي احر قلب ناصر باي شكل من الاشكال .. لبست تنورة ملونه شرايط مع توب اسود واكسسوارت .. تكحلت كحل خفيف مع غلوس .. ولبست شيلتي ..
كان ابوي ينطرني تحت .. ماطولنا شوي ومشينا على طول

الديوانيه
ام خالد : يما ياحبيبي بس هالشوربه اشربها كلها وان شالله بتصير احسن !
عزيز : مااقدر يما .. مالي نفس والله
ام خالد : لاتزعلني عااد .. انا مسويتها لك بيديني والله .. شوف خفيفه يله عشان ترد لك صحتك
خالد اللي ياي من برة : ها .. قعدت يادلوعه امك
عزيز : وين رحت انت !!
خالد : اييب ادويتك من الصيديليه
عزيز : احس اني دايخ .. على كثر مانمت والله
ام خالد : فديتك هذا من الصخونه وكلها يومين وتقوم بالسلامه ان شالله
عزيز : تعبتج معاي والله ..
ام خالد بابتسامه : تعبك راحه .. يلة لاتضيع السالفه بروح اسويلك شويه ليمون والقى صحن الشوربه هذا كله خالص
خالد : يه يه يه .. شتبي بعد اكثر من هالدلع يوم طحت بالمستشفى مادلعوني كثرك
عزيز : ههههه بل حتى بالمرض تغار !! لا لا لازم تعالج تفسك .. هذا يسمونه ادمان الغيرة
خالد : ههههههه منو فينا اللي بيعالج انا ولا انت . .شوف كلمه ثانيه ادويتك كلها بالزباله
عزيز : لا الله يخليك انا على الله وعلى هالادويه
خالد : زين انا بغير ملابسي واييك .. مو تنام
عزيز بابتسامه : اوكي روح بس وسكر الليت معاك
خالد : اسف عشان ماتنام
عزيز : زين اقلب ويهك
خالد : ههه اوكي
شوي ولا يرن تلفون عزيز وكانت المتصله سارة عمته
عزيز : هلا عمتي
سارة : وينك انت ؟
عزيز : ببيت خالد
سارة : ابوك يسأل عنك تقول الخدامه انك كنت تعبان
عزيز .. توه يذكر ابوي .. : لا مافيني شي ..
سارة : زين .. يله باي
وتسكر الخط .. يعني حتى ماكلفت روحا تسأل عني .. يارب معقوله هالناس ماعندها احاسيس ولله لو قطو جان حسوا فيني .. يله شنسوي بعد .. حظنا بهالدنيا

غرفة خالد
سبحت عالسريع وغيرت ملابسي ونزلت قلت للخدامه تسويلنا جاي ورحت الديوانيه اخذت اغراض عزيز وحطيتهم بغرفة الضيوف لان امي حالفة مايطلع من عندنا الا واهوا متعافي ..
وعقب رحت اقعد مع عزوز شوي بالغرفه واونسه .. بس كان دايخ حييل فحبيت اخليه يرتاح وطلعت غرفتي
طلعتلي دشداشه يديده لبستها .. تعطرت لان الشباب بيون بعد شوي .. رن تلفوني وصدمني الرقم اللي طالع بالشاشه
هذا رقم اسما .. ترددت ارد ولا لا .. مااعرف شللي خلاني اخذ التلفون وارد ماكان شوق او حب لها .. يمكن فضول او ماادري
خالد : نعم !
اسما : الو .. خالد
خالد : خير !!
اسما : ماعرفتني
خالد : عرفتج .. خير !!
اسما : .... خالد .. خالد انا ماقدرت اعيش من غيرك
خالد : لا والله !!
اسما : بليز خالد افهمني .. انا احبك
خالد : وبعدين ؟
اسما : وماقدرت اعيش مع ريال ثاني غيرك !
خالد : اولا عيب عليج انتي وحده متزوجه تدقين على الريايل وثاني شي .. انتي ماتعرفين الحب .. شلون يايه الحين تقولين احبك ؟
اسما : خالد .. انا هالانسان ماقدر اعيش معاه .. شكاك . ذبحني تخيل بكل شي يشك فيني انا بطللق منه
خالد : تدرين احس اني اكرهج اكثر واكثر كلما تحجيتي .. باي
وسكرت الخط بويهاا ..
دقت مرة ثانيه بس مارديت عليها .. دزلت لي مسجات عتب وشوق وانا كنت اقرى واضحك من غير اهتمام
قعدت افكر ياربي انا هالبنت شلون حبيتها ... خذت تلفوني ونزلت الديوانيه وانا احمد ربي انها هي اللي قطعتني


بيت خالة ناديه
عند الباب وقفت سيارة ابوي الفورد
قربت من ابوي وبسته على خده .. هالعاده مااقطعها دايم ابوسه على خده وانا اضحك .. ابوي يستانس يوم ابوسه وامي دايم تزفني تقولي متى بتكبرين على هالحركات .. بس ياربي ابوي واحبه مايصير يعني !!
شيخه : مشكوووووور يبااااا ادق عليك لما اخلص
ابوخالد : ههه زين سلمي عليهم .. مااوصيج بالثقل بنت ابوج
شيخه : افاا عليك .. لاتوصيني .. اوامر تانيه يااستاذ بابا !!
ابو خالد : ههههه سلامتج يله مع السلامه
شيخه : ههههه مع السلامه

نزلت ودقيت على مها عشان يفتحولي الباب
وماطولت دقايق ولا هي ناطه من ورى الباب
مها : هلا هلا بالطش والرش .. حياج البيت بيتج
شيخه : ههههه ادري ماله داعي تقولين ..هلا فيج مهاوي هانم ..
دشينا وقعدنا بالصاله .. الصراحه كنت ابي اقعد معاها بغرفتها احسن .. تدرون مواضيع مثل هذي مااقدر اقولها وانا بالصاله
مها : شيووخ نطري اييب الجاي والقهوة وايج
شيخه : في احد ببيتكم ؟
مها : لا مافيه قطي عباتج
شيخه : زين نطريني بيي معاج المطبخ .. خالتي ناديه وينها ؟
مها : رايحه عند يارتنا
شيخه : اهاا .. يعني ماكو احد ببيتكم مهاوي !!
مها : ههه نو اخذي راحتج
قطيت عباتي وشيلتي وبعد المديح بلبسي وشكلي رحنا المطبخ نسوي جاي وقهوة .. وقعدنا نسولف باشيا مختلفه ..
كنت ناويه افتح لها موضوع خلود اخوي بس ماادري شلون .. الصراحه حسيتها اصعب من اللي تخيلته .. واخيرا قررت افتح الموضوع بشكل غير مباشر
شيخه : مهااوي .. ماقلتلج نبي نخطب لخلود اخوي
مها : ههه واخيييييييرااا
شيخه بنظرة : ليش قاعد على قلبج !!
مها : لا والله .. بس نبي عرس من زمان ماكشخنا ولبسنا ورقصنا
شيخه : واخوج نصور وين راح !!
مها : من صجج ناقصين الناس اتشمت فينا .. سكتي بس سكتي
شيخه : ممم اقولج شي
مها : قولي
شيخه : خلوود حاط في باله بنت معينه ..
مها : حلفي !! .. منو اعرفها ؟
شيخه : صج لاقالوا عنج ملقوفه مااجذبوا
مها : جب
شيخه : ههههه ماتعرفيها للاسف .. الصراحه انا ماشجعته عليها بس اهوا مصر وقال مابي اتزوج غيرها .. يااهيا ولا مابي أي بنت بالكويت
مها : ليش شفيها البنت !!!
شيخه : لسانها طويل وماتحترم احد .. يعني ماتنفع زواج .. بس شنسوي اهوا يبيها
مها : خالتي رضيه مو مجبورة تخطبها له .. خلود الف بنت تتمناه .. حرام تزوجونه بنت مثلها
شيخه : شنسوي يقول يحبها !!
مها : ماعليج الرياييل يحبون في اليوم اربعه وعشرين بنت
شيخه : مهاوي .. مو راضي يقتنع .. عاد اهوا قالي سألوها اول وعقب اذا وافقت بخطبها رسمي
مها : عشتو .. خايف ينرد .. احسن خل ترده يارب ترده
شيخه : هههههههههههه .. وانتي شفيج معصبه
مها قامت وهي تحط استكانته الجاي على الطاوله بقوة : وشكو اعصب
شيخه : الحين شقول لخلوود!!
مها باستغراب : عن شنو ؟
شيخه بابتسامه مكر : موافقه !
مها : مافهت .. على شنو ؟
شيخه : انتي تعيسه الحظ المقروده اللي مختارها خلوود
مها تمت تطالع فيني وهي ساكته .. تقولون احد معطيها كف .. فاتحه حلجها ومبلمه بويهي
قمت بايديني رفعت حنجها وانا ميته من الضحك : شفيج !! .. الله يخليج لايصير فيج شي تزوجي اخوي عقب كيفكم لاتبلشوني
مها امسكت الكوشايه اللي يمها وقعدت تكفخ فيني .. انا كنت ميته من الضحك . تبون الصج شكل مها كان نكته .. ويهها كااااان مولع مثل الاشارة .. تحاول تخفي هالاحراج اللي باين عليها بالطق ..
مها : يحمااااااااااارة .. مرة ثانيه تحجي عدل .. انا لساني طويل ومااحترم احد هااا
شيخه : آآآآآآآآآآآي بس خلاص اسفه مرت اخوي ....... بس عورتيني هههههههه
مها : لاتقولين مرت اخوج اوووف
شيخه : زيــــــ ـــ ــ
رفعت عيوني فجأة اول مادعمت بشي يدامي وانا اركض ومها كانت وراي ..
كان ناصر مبحلق فينا وهو مبتسم .. انا ماعرفت وين اروح .. خذت الكوشايه من مهاوي وغطيت فيها شعري ..
مها : نصووووور .. اطلع من الصاله البنت مو لابسه شيلتها
ناصر : شنو يعني .. عادي .. صح شيوخ !!
تبون الصج .. انا ولعت بغيت امووت .. شنو عادي !! .. ليش شنوشايفني ويا ويه !! اخاف ماعندي اهل ولا عباله اطلع يدام الريايل عادي مثل اللي ماخذها ماندري من وين يايبها
قلت بنبرة حاده : لا مو عادي .. مهاوي عطيني شيلتي
مها بدفعه قويه حق ناصر من ورى ظهره يطلع من الصاله : اطلللللللع يااخي خل البنت تلبس
ناصر : ههههه زين زيين .. والله دنيا شيوخ قامت تستحي
لاشعوريا بعدت الكوشايه عن ويهي وحذفتها صوبه .. ماادري ليش سويت جذي بس قهرني لو كان يدامي جان طقيته .. قليل الادب والحيا هذا
خذت شيلتي وطلعت فوق غرفة مها وانا كل مافيني متوتر متنرفز .. لو احد قالي همسه بس راح انفجر بويهه
مها : شيووخ تعرفين ملاقة نصور مالج شغل فيه
شيخه : ملاقته مو على شيخه .. قوليله هالحجي .. اخوج ليش صاير دمه ثقيل .. ماكان اول جذيه
مها : اووف خلينا من نصور .. بروح اييب قهوتنا ونقعد فوق
شيخه : زين
طلعت مها ودقايق يت معاها القهوة قعدنا نشرب ونسولف وكلما يبت لها طاري خلود سكتتني
شيخه : اووف .. الحين شقول للريال
مها : شيوخ لاتصيرين مليقة انتي الثانيه ..
شيخه : مهاوي .. انت ماتبين خلود ومستحيه تقوليلي !!
مها : ......
شيخه : خلص بقوله انج مو موافقه وانتهينا
مها بتردد : لا
شيخه : هههههههههههه ... جكيتج يالعيارة
مها : شيووخ .. اووف فهميني
شيخه بابتسامه : قولي محد بيفهمج غيري
مها : ماادري .. انا مااحمل مشاعر لخالد .. بس احس انه احسن من الريايل .. وخوش واحد بس مااحس اني احبه ولا اكرهه .. عادي يعني
شيخه : تبين تفكرين وتعطيني خبر بعد وقت !!
مها : انتي شرايج ؟
شيخه : انا براي .. فكري .. خالد ولد خالتج .. وصدقيني مو عشان انه اخوي .. خلود وايد زين وبيحبج ويحطج بعيونه .. شوفي مها .. خالد مااختارج انتي الا لانه يبيج .. وماحب يتحجى بالموضوع الا لما يسمع رايج انتي .. مايبي أي احد يضغط عليج او على رايج .. اخذي كل الوقت ومتى ماحستي انج تبين تردين علي .. قوليلي
مها : اوكي



الساعه 10 ونص بليل
وصلت البيت .. لقيت امي وسلوم ومريوم قاعدين معاها ..
شيخه : مسا الخير ياام خالد
ام خالد : وصلتي يما .. تبين عشا ؟
قربت وانا اصبلي استكانه جاي : نو تعشيت بيت خالتي ناديه
ام خالد : جم مرة اقولج بطلي نو هذي .. قولي لا تحجي مثل البنات
شيخه : سوري يما .. مااقولها
ام خالد بنبرة : شيوووخ
شيخه : هههههههه .. يما شنسوي جذي صار حجينا كل البنات يتحجون .. يا يما ماعادوا بنات اول مثل الحين
ام خالد : الله على بنات اول .. حجيهم سنع ومسنع ..
قطيت عباني وشيلتي بعد ماخلصت استكانة الجاي وحطيت راسي على ريول امي : يما وين اهل الدار !!
ام خالد : منور راحت مع حصه يتشرون اغراض .. وصلاح عنده مدرس .. وخلود طرشته الجمعيه
نقزت مريوم على بطني : خالتي شيخه لعبينا لعبه !!
نقزت : آآآي عورتيني مريووم وخري
سلوم : الله يخليج خالتي شيخه .. نبي نلعب
الصراحه كنت زهقانه وحايشني الملل واهم بعد كسروا خاطري : يلا قوموا
ام خالد : خل اروح اصلي دامج ييتي .. شوف اليهال الين مايوون خواتج
مريووم وسلووم : هياااااااا
قمت اخذت شيلتي ولفيتها على عيوني : يله انحاشوا وانا بدوركم بعد من واحد الين العشرة اوكيييييييه !!
سلوم ومريووم : زيييييييييييييين
قعدت اعد وانا اضحك .. ياااي من زمان مالعبت غميضه .هاللعبه كانت المفضله عندي .. كنا دايم نلعبها انا وخلود وصلوح وعزوز ومنيرة .. ودايما عزوز كان يخسر لانه كان متين ومايقدر يركض بسرعه وينحاش .. صح بقولكم شي عني ماتعرفونه انا احب طفولتي واايد .. احب ايام ماكنا انا ومنور نخش مصروفنا عشان نشتري فيه بيت باربي الكبير .. احب ذكرياتنا واحنا نلعب بملافع يديتي وعباة امي .. الطفوله كانت غير بحياتي
صرخت بصوت عااااالي : خلااااااااص
مريوم وسلوم : اييييييييييييه
تحركت والشيلة مغطيه عيوني .. كنت اسمعهم يضحكون وينحاشون .. وكانت امشي ماادري وين اتجاهي

الطرف الثاني
غرفة عزوز في بيت ابوخالد
كنت قاعد عالسرير .. وحايشني الملل .. اووف خلود قال بعد عشر دقايق بيكون هني .. ابي اطلع بس امي مو مخليتني .. انا بعد مالي خلق اتحرك .. صج اني طفشت من نومه السرير .. بس احس جسمي مافي قوة اقوم واتحرك
قعدت عالسرير وفكرت لو اخذ لي دوش يصحصحني شوي .. وينشطني من هالكسل والخمول ..
دخلت الحمام وفتحت الماي وخليته ينزل على ويهي وشعري باستسلام .. كان الماي بارد بس من سخونه جسمي ماكنت احس برودته .. توضيت مرة وحده وطلعت
كنت حاط الفوطه على راسي انشف ويهي وشعري .. سمعت فجأة صوت الباب يندز بشويش ..
وبنت شوي شوي تقرب مني .. بسم الله .. اخاف هذا من الصخونه قمت اتخيل اشيا غريبة
شيخه وهي مغمضه عيونها للحين : سلووووم مريوووم وينكم !!
تبون الصج ماادري ان كان اللي كنت اشوفه صج ولا لا .. بس اتوقع لو فيني ذرة سخونه ولا انفنونزا اتوقع انها راحت مع طلة هالشيخه .. لاشعوريا اتسعت ابتسامتي .. وتنحنحت .. عشان تحس بوجودي ..شكلها تلعب مع اليهال .. الحمدلله الشكر اخاف عبالها للحينها شيخه الصغيرة الشيطانه .. هههه لا وعايشه الجو بعد ههههااااي

الجانب الثاني
كنت انادي بصوتي وانا اضحك : مريوووووم .. سلووم وينكم !!!
تعرفون حسيت روحي رديت صغيرة على هاللعبه .. كنت مستمتعه وانا العب والله ..
شيخه : ويييييييييينكم انتوا .. ترى تعبت !!
تقدمت خطوات بسيطه وانا اتحسس بيديني المكان .. فجأة سمعت صوت ريال .. قلت هذا اكيد خلود وصل خل استعبط عليه شوي
شيخه : ايوا ياخوخه .. انتا جيييييت !!!
عزوز بقلبه : ..... ينت البنت .. خوخه بعد ياسلام .. اخر عمرك ياخلود تصير خوخه
شيخه وهي ترفع الشيله عن عيونها : انتا متى يــ ــ ــ
شهقت بسرعه وانا مخترعه : بســـــــــــــم الله !!! انتا من وين طلعت
رديت غطيت عيوني بيديني .. وماعرفت شسوي ..
عزوز : انا .. اسف غلطتي الباب كان مردود وماسكرته
ركضت من غير لااحس وطلعت غرفتي .. ماادري سلوم ومريوم حتى وينهم .. دايما انحط بمواقف باخيه .. بس والله مو ذنبي . . ماادري من وين طلع هذا وشايبه غرفة الضيوف ..
اووووف .. بكل مكان طالعلي هالعزوز .. ولحظة بس . تذكرت شكله شلون كان .. شعره الاسود كان يقطر ماي ولحيته اللي طلعت شوي شكلها كان حلو .. عيونه النعسانه كان باين فيها شويه تعب .. ابتسامته .. لحظة شكله كان يضحك علي
قمت ووقفت عند المنظرة اشوف شكلي شلون كان ... امبيييي الكحل شويه سايح .. وشكلي حايس شوي
شيوووخ شفيج .. هذا عزوز .. لاتنسين .. ولايروح بالج بعيد
غيرت ملابسي ورنزلت تحت على اصوات منيرة وحصه اللي ردوا من السوق وينادون علي ..

الجانب الثاني
طلعت شيخه وانا غمضت عيني وطلعت مني زفرة قويه .. ماكنت ابيها تفارقني ولا لحظة ..تعرفون ماادري شنو افسر هالشعور .. مااعرف هالبنت شقاعده تسوي فيني وليش انا مهتم فيها .. تمنيت اني مااعرفتها بحياتي .. تمنيت ان احنا تمينا صغار وماكبرنا .. تشدني طفوليتها وعفويتها .. تشدني نظرتها احس اني انسى الحجي كله من نظرتها
عزوز ... عزوز شفيك .. اكيد هذا كله من السخونه .. شيخه اختك وبس .... لازم تفهم هالشي زيين .. مستحيل بتكون شي غير جذي .. لاتتعدى حدودك عشان ماتخسر العايلة اللي احتوتك من وانت صغير ..





اتمنى لكم متابعه ممتعه ,,


في انتظار توقعاتكم ,,


لكم خالص تحياتي ,,

اختكم في الله

سكـــــــــــــــــــــــــونه