[SIZE="3"] السلام عليكم ورحمة الله وبركاته كيف حالكم حبايبي؟ أبارك لكم الشهر الفضيل كل عام وأنتم بخير وينعاد عليكم إن شاء الله ( اليوم اسمحوا لي أتكلم بالعامية ) عادة تبادل الأطباق: من يوم ما كنت صغير وفي كل سنة من يجي رمضان أشوف أمي تعطيني طبق أو طبقين وتقولي: وده بيت الجيران، بيت أم فلان، ولا بيت أم فلان . . مرة صحن هريس، ومرة طبق مكرونية، ومرة القيمات . . ومن هالأكلات الطيبة .. وأنا طبعا ما أصدق خبر<<< ( مسوي فيها مطيع ) أودي الصحن وأحس بحرارته، وايسيل لعابي من ريحته عاد تعرفون صايم، وأحسن شي لما تعطيني طبق الدونات ( أكلتي المفضلة في رمضان ) أستانس ومرات وأنا في الطريق تغلبني الريحة وأقوم ألتفت يمين ويسار ما فيه أحد و و و و . . . . ( عاد لا تلوموني كنت توني صغير والجوع ذابحني ) وكل يوم اودي فيه الصحن أسأل حالي <<< ( الأخ مجنون ) ليش إحنا نسوي كذا؟؟ وليش أمي كل ما يجي رمضان تسوي هالعادة؟؟ وليش في رمضان بالذات مو في غيره؟؟؟ ومن هالأسئلة اللي تدور براسي<<< ( ليش راسك دوّار ) وهذا حالتي كل ما يجي رمضان وسنة بعد سنة <<< ( الولد كبر ) اكتشفت السبب<<< ( اشدعوه مكتشف قانون الذرة ولا صانع طيارة) وهو أنه هذا الشي عادة من عادات أجدادنا تزيد من تواصلهم المهم ومن المواقف الطريفة اللي تصير: بعض الأحيان أكون أنا كالعادة أودي الطبق وبالصدفة في طريقي ألقى ولد جيرانا جايب بعد طبق بيوديه بيتنا فأقوم أنا بلقافتي آخذ الطبق اللي عنده وأعطيه اللي عندي وارجع البيت . . . تدرون وش المفاجأة؟؟ لما رجعت البيت لقيت إن نفس الطبق اللي إحنا مودينه لبيت الجيران اهم بعد جايبينه ههههههه بس تدرون أنا فرحان<<< ( مصدق روحه الولد ) إنه إحنا للحين ما قطعنا هالعادة، ما برحنا كل سنة أنتظر رمضان عشان هالعادة، بس طبعا مو أنا اللي أودي الطبق؛ لأني الحين كبرت، وصاروا الجيران يتغطون عني ههههه يمكن الموضوع مو حلو بس أنا متأكد بيصير حلو بتعليقاتكم بقلمي[/SIZE]