[تشي جيفارا]

تحية طيبة لكم جميعا
سلاما من الله عليكم ورحمة الله

ليلة البارحة كنت في جلسة سمر مع الأسرة الكريمة كنت جالسا متوسطا أمي الحنونة وخالي العزيز أول ما أقلبت عليهم بدأ خالي بالحديث قائلا .. أهلا وسهلا بالعريس تعال أحنا نبغى نزوجك طبعا مازحا وقال بس خلك رجال وأنا خالك .. عفوا ياخال "رجال" ..! يااا لا العجب !!! وأنت وش تشوف يا خال .. قال والنعم فيك هالحين ..! لكن .. بكره مع زوجتك مانعرف تكون رجال او ...... تكون عند قولك او تلعب فيك الحريم.. ومن هنا دخلنا بالحديث ...ودار الحوار بين (العولمة والثراث)

هااا ياخال وش اللي في راسك يعني وش ماخذ على بنات اليوم وحريم اليوم وزواج اليوم
قال الخال : يا ولدي البنات اليوم خرااابيييط مو مثل اول آه آه راحوا اللي يختشون مااات الحياء ياولدي أسئل أمك هذه جنبك وتعلمك

قلت له : يا خال شيء طبيعي الزمن يتغير ولكل زمن دولة ورجال .. عفوا وبنات
وهذه هي العولمة والحياة الجديدة والأنفتاح والحرية وحقوق المرأة وغيرها .. وينك وين يا خال

قال يا ولدي حياتكم وحريتكم هاذي مو دين ولا اسلام ولا قرآن ولا هذا اللي جاء به النبي (ص) بعد اقل من اسبوعين تقريبا شف العروووس وشوف بناتكم البنت منكم تروح بيت زوجها مغيره شخابيط وجهها عيونها خضراء وزرقاء وحمراء (برطمه) شفايفه نازله عند رجوووله خدها وااارم كأن ابوها او اخوها صاكها بوووكس شعرها واصل السقف وصاير كأنه شجرة سدره وماصخه والله لا يوريك من هالوجيه اللي تخررررع .. أعوذ بالله منهم

قلت له : يا خال طيب تبغى البنت اليوم مثل زمن اول يحطون هالسدر على راسها وحطوا الديرما على شفتها وهالكحل سكرو عيونه به وجرحو جسمها من هالخشف اللي يحك في بدنها من الصبح وزينو صدرها بالمشموم ويالله حق زوجك .. تغير هالزمن يا خال
هالحين لازم تروح تسوي صيانه عند الكوافير وتغير خلقة ماخلق الله وتحط لون احمر واصفر وازرق وردي واخضر وبنفسج منشان بس يشوفها زوجها يخر كل ماعنده .. مع الاسف بنات هاليومين مايعرفون ان الزوج يبغاها كما خلقها الله ولكن وش تسوي يا خال مع الموضة

قال الخال : يا ولدي تدخل على زوجتك وهي كافره وانت منافق
اووووف اووووف يا خال اشدعوه : كافره وانا منافق (الظاهر الخال يقلد محمد بن عبدالوهاب) قال ايوووه عشان شغل الكوافير يظل ليوم ثاني واذا البنت بدل ما تصلي لها ركعتين تشكر الله وتدعوه ان يوفقها هي وزوجها يكون لها يومين قبل الزواج ويومين بعد الزواج لا تصلي ولا تعرف الله لييييييييش يا ولدي بس عشان مايخترب (المكياج)

لا يا خاااال مش لهدرجة عااااد ... قال بكره أنت بتتزوج وبتشوف بعينك.. بس بذكرك..! وهذا أمك شاهد عيان عليك..

بعدين تعاااال بنت زمن اول تجلس البنت من الصبح وتنظف وتكنس وتغسل وتطبخ وشوف بناتكم هاليومين لا تعرف تغسل ولا تنظف ولا تطبخ وإذا أذن الظهر تووووها تفكر تجلس مو منشان تشوف واجباتها اليومية لا منشان تنقلب على الجنب الثاني وزوجها الله يكون في عون الشغاله واذا الشغالة حليوه بعد اووووووف

يا خااااال عاااد انت قدر الامور اليوم بناتنا عندهم التزام بالدراسه واذا موظفة عندها عمل لازم تقدر بعد هالوضع يااااخال واذا جات البيت تبغى تشوف واجباتها المدرسيه او الوظيفية مساكين ماعندهم وقت واذا صار عندهم وقت فراااغ التلفزيون يناديهم يبغون يوسعو صدرهم او الشارع او السوق او عند زميلاتهم

وهالحين طلعوا لنا بموضه جديدة البنت والزوج كل يوم حفله ولاتعرف حق اييييش بس حفلة فلان وفلانه يوم حق خطبة يوم حق ملكه يوم حق يلبسها وتلبسه يوم حق عيد ميلاد الست الاميرة يوم مرور شهر على خطبتهم يوم مرور يومين على زواجهم .. والخ وكل هالمصاريف على ظهر هالوووووح الزوج وهو في النهار يوزع ابتسامات حق اهل زوجتة وفي الليل يبكي من الآلم كيف يسدد الديون اللي على ظهره ...
والله ياااا خال في هذي معك حق صدقت أن أشوفها ترجع للزوج نفسه .. إذا كان رجال .. او .. لا على قولتك ياخال..

وبعدين تعال للطامه الكبرى ..!
تعال بنعلمك ياولدي بس لاتسوي شيء نخاف عليك مو انت قلبك خضر هاليومين
لا .. اشدعوه يااااخال شايفنا مراهقين أفااااا عليك بس احنا بنخااااف ربنا ... تخاف ربك طل بوجهك

ياولدي أنا شفت برنامج عن الزواج في أمريكا والله ياولدي وهذا شيبتي انهم استر من بناتنا في الزواج بنتهم تتزوج ولابسه لبس محتشم بحسب نظامهم وقانونهم يسمح لهم بالنسبة لهم لبس مستور ومحتشم ومرتب ومافيه عري بالشيء اللي نعرفه عنهم لكن تعال ... وشوف
عروستنا هاليومين ملابس والله يخجل منها الاموات قبل الاحياء ملابس يخجل منها رب العالمين ملابس تهتز لها الارض والسماء فكيف بشهوة بنت او شاب أمثالكم
عروستنا اليوم تلبس فستان لوووو تكون عارية أفضل وأحسن لها وللجميع على الاقل لو شفناها عارية يمكن نخجل ونستحي من أنفسانا ونغض البصر ولكن ..
فستان الصدر طالع وكأنه سجين ينتظر الفرج للخروج للحرية والبطن صحراء الربع الخالي تشوف لك سر كأنه بئر نفط ومن تحت حدث ولا حرج فستان ممزوق من بطنها وحتى اخمص قديميها والفخوذ والسيقان تقول (نوال المتوكل) عندها سباق 400 م
لا وطلعوا علينا هاليومين في حفل الزواج يعرضون (برجكتر) بالكمبيوتر صور العرووووس من يوم تطلع من بطن أمها الى يوم زواجها صورة مع ابوها صورة صورة وهي تآكل صورة وهي في الحديقة وصورة وهي منبطحه على سريرها وصورة وهي مع صديقتها وصورة وهي حاطه يدها على خدها مقابل النافذة وصورة والله خرااااابيط يا ولدي زمن تعيس علينا
والله ياااخااااال عنجد فيه كذا أجل وين أحنا خلونا نشوفه الزين ... (مسوي نفسه مايدري الولد)

والله يا خال صح كلامك ومابعرف وش أقولك بس أصابع يدك ليست زي بعض فيه هناك بنات والله تحطهم تاج على راسك وفيه بنات بايعينها بــ تبن الشكوى لله

ولكن ... نعم يا خااااال أنا معك..
أين هم الرجال في زمن لا رجال فيه ...!؟