القصيدة:ردتچ يايمه
الرادود:صلاح الرمضان
ردتچ يا يمه بكربله تشوفين حالي
تتحسسين آلام ما مرَّن خيالي
يمه يا يمه..يمه يا يمه
***
ردت عليها ام الحسن بالطف انا وياچ
كل المصايب يالعقيلة شفت عيناچ
باليسر ادعيلچ يا حرة الباري يرعاچ
لليوم لمصابچ يازينب دمعي هالي
يمه يا يمه..يمه يا يمه
***
ماشفتي حرمة مجبلة ومحني ظهرها
بيسراها غطت عينها ملطومة لأنها
تشهق وتوقع ويفت الصخر ونها
تنادي يايمة حسين ياوليدي يغالي
يمه يا يمه..يمه يا يمه
***
من طاح أخوچ إعلى الثرى قبلچ وصلته
لمن وصلتي بحيرتچ ضلعي لطمته
شفت الزعل بعيونچ وخدي خمشته
بهالحالة صحتي يمه يالزهرا تعالي
يمه يا يمه..يمه يا يمه
***
وياچ يضربني الشمر واشقف بالإيدين
چعب الرمح يابت علي هشَّم لي ضلعين
تالي شهر سيفه وصحت ويلي على حسين
وأغمى على يميني لحمته برمح عالي
يمه يا يمه..يمه يا يمه
***
من شفت يسبونچ يازينب هالقلب ذاب
فوق الهزل وياچ انادي داحي الباب
عتبي على العباس عافچ ويا الأغراب
لو ترجع رويحته ما انهضموا عيالي
يمه يا يمه..يمه يا يمه