حياتي..ذكرياتي
ماتعز عليه
عضيدي..شنهو بيدي
حتى بيها أفديك
شخبرك،،تدري دهرك
بيه خان وبيك
يَ وسفه..لأنها توفى
عيني عن عينيك
حجر الأجل بآخر وگت شاهدته بدرك
وآخر عطر بآخر نفس شميته نحرك
مؤ هينه تاليها بحزن عالرمح نظرك
وبموضع المذبح أشم يا خويه عطرك
ياحسين.. اخوك آنه الحسن جيت على جنح البين
من جروحك،، احس دمي نزف ياحسين
الك حنيت،،اشوفك جيت
اشوفك جيت..الك حنيت
نحيبي..ياحبيبي
تحترگ هالروح
بچيتك..من لگيتك
بس جسد مطروح
وشاحك..من جراحك
دمك المسفوح
يَ ضامي..والمرامي
بچم جرح مفتوح
يا خويه لو عاد الزمن والماضي بيه
اجمع سهام الـ صابتك كلها بيديه
خلها على نعشي تنرمي وتهدف عليه
ولا منها سهمي الـ صوبك بالغاضرية
ياحسين.. اخوك آنه الحسن جيت على جنح البين
من جروحك،، احس دمي نزف ياحسين
الك حنيت،،اشوفك جيت
اشوفك جيت..الك حنيت
اريدك..من وريدك
تحچي يا مظلوم
تقّلي..شلون مثلي
من طحت مسموم
انشدك..وادري چبدك
بالسهم مفطوم
يواسي..بالمآسي
چبد أخوك اليوم
يَ بن امي والـ طشت الـ قلت ياخويه شيله
لا زينب تشوفه وتوّن ونّه ثجيله
يا وسفه بديار الغرب باچر مثيله
وتنظر الـ راسك بالطشت عين العقيله
ياحسين.. اخوك آنه الحسن جيت على جنح البين
من جروحك،، احس دمي نزف ياحسين
الك حنيت،،اشوفك جيت
اشوفك جيت..الك حنيت