عزيزي ابن الطرف اسمح لي اضيف هالنقطه
مانتبهت ان اكو احد اشار اليها الا الان
بالنسبه للدراسه بالخارج لمرحلة البكالريوس مالها علاقه بالعمر ( سن الطالب )
يعني طالب تعب وتخرج من الثانوي بمعدل طيب وماحصل قبول بالجامعات السعوديه على حسب ميوله
يدرس تخصص ( اي كلام ) عشان سنه صغير !!
طبعا هذا الكلام غير مقبول بتاتا
وهو اذا يشوف عنده استطاعه وتحمل مسؤلية الغربه والاعتماد على النفس بالعكس شجعه
وعطه حافز , والاهم بين له من خبرتك وخله يعرف كل النقاط الي بيواجها بالغربه
عشان يصير على درايه تامه
..
اما الغربه او الدراسه بعيده عن الاهل هذي على حسب الشخص نفسه
في من يستطيع وفي من لا يستطيع
اذا كان الاهل زرعوا في الابن منذ الصغر الاعتماد على نفسه وتحمل مسؤليات الحياه
مايصير عنده مشكله بالسفر خارج الوطن
والامثله ( الاف المعتربين ) في جميع العالم الان
وفي طلاب كانت اعمارهم ( 19 سنه ) في عز الورد وسافر ورجع بشهاده
والعكس اذا كان الابن منذ نعومة اظافره تحت جناح الاهل
ومايخطو اي خطوه الا ( الوالد الله يحفظه معاه )
حتى اذا صادف موقف بسيط مايعرف يتصرف على سبيل المثال لو ( يبفى يجدد الاستماره للسياره او تجديد الرخصه )
قال ( يبا ) تعال معاي المرور عشان نسوي كيت وكيت
هذا وينه وين الغربه والدراسه بالخارج الله يستر عليه
عاد من المواقف الغبيه , ان واحد صادفه بنشر ( اتصل على اهله شسوي متوهق بنشر التاير ومو عارف اركب الاسبير )
بلاه عليكم هذا اذا مايعرف يتصرف بمثل هالموقف بيعرف يتصرف بالغربه بامور كبيره وخطيره
نقول مثال
اكو واحد من الاهل , عمره الان 27 سنه متخرج من الجامعه وقدم على الابتعاث يكمل ماستر وتم قبوله
3 مرات ياجل السفر
كل مارتب اوراقه وحجز تذاكر يوم الي بيسافر ماقدر يروح
هالمثال اوضح صوره للي , تحت جناح ابوه ومستحيل يقدر يعتمد على نفسه ويخطو هالخطوه
وهذا كبير وللماستر
وبعضهم مو للخارج , حتى للرياض مايقدر يروح ويعتبرها غربه من اصعب الامور الي يواجها فكيف بيعبر البحار والقارات
ويجلس سنه كامله مايشوف ( اهله )
اتذكر , عمي يقول قصته قبل 30 سنه
كان موظف ارامكو وقرر يكمل دراسته في امريكا على حساب ارامكو
يقول كل العايله وقفت ضد الفكره
لدرجة ان عمته ( كانت مربيته ) تسحب فيه لفتحة الباب تقول ارجع لا تروح
قال : سمحي لي عزيزه وغاليه لكن مستقبلي بالسفر ( وانا رجال اعرف ادبر نفسي )
اما واحد ماعنده ثقه بنفسه ما يحتاج احد يقول لا تسافر
لحاله يفكر بالغرفه ويصيح على نفسه ويطلع من الغرفه يقول ( ماني رايح )
والامثله كثيره جدا جدا وكلها واقعيه من المحيطين فينا
يعني مو منقوله على اللسن الناس
ويعطيكم العافيه