بسم الله الرحمن الرحيم
اللهم صل على محمد وال محمد وعجل فرجهم واللعن اعدائهم اجمعين الى يوم الدين
سؤال جميل من اختي الساهرة
قبل الخوض به ..
جميع الا كسسوارات والتحف الموجوده في السعوديه من الصين
وايضا ..
اعطيكم هذه الحكايه اللطيفه
اكو واحد من الناس بنى فيلا وكان يبغى ياثثها من الصين وقال في داخل نفسه مو خسران شي لو رحت اسبوعين او ثلاثه اشوف الاثاث ولو ماعجبي شي اعتبرها تمشيه وارجع
هذا الواحد .. بعد ماشاف الاثاث والتحف وو و وو ( انهبل عليهم ) صار يشتري بدون حساب يعني الي يحتاج والي مايحتاج وبخاطره يقول لو ما احتجت الحين احتاج بعدين
مجموع الاثاث + التحف+ اكسسوارات + امور اخرى للمنزل +(ابواب وشبابيك) وماني عارف كل شي شراه لكن حسبها مع تكاليف الرحله والشحن (180 الف ريال ) الكلام هذا قبل( 3 -5 )سنوات تقريبا
لما ركب كل الاثاث في ( الفيلا ) طبعا اهو شاري كميات كثيره فوق حاجته ( الباقي من الاثاث وغيره ) باعهم علي معارفه ( 180 الف ريال ) يعني صار تاجر بعد هههه .. فطلع اثث الفيلا ببلاش
طبعاهذا قصه وقديمه وماهي مقياس لكن حبيت اقولها
الاثاث وكل الانواع متوفره في الصين وكل شي له سعر وارخص من السعودي فوق ماتتصورين
يعني الشي الي في السوديه (20 الف ريال ) في الصين تحصلينه (5 الاف ريال ) هذا من اول نظره بدون ماتدورين على المحلات تشوفين الارخص
و بتركب لك شغل عدل فخامه ومادري ايش بـ 5 الاف ريال والي بيشوفه يفكر من السعوديه بـ 20 الف واكثر
ويوجد مدينه خاصه بس حق الاثاث ( جميع الي يخطر بالك عن الاثاث موجود فيها ) محلات ومصانع ....والزبون يختار مع مين يتعامل
الجوده : هذي نقطه مهمه
الصناعه الصينيه فيها درجات وبغض النظر عن الاثاث كل الصناعه الصينيه لها درجات
لان عدد اسكان خيالي اهم مسوين درجات في الصناعه عشان كل فرد من افراد الصين يقدر يشتري على حسب مدخوله ومعيشته
في الصناعه الرديئه وهذا الي عادتا تشوفي في الاسواق السعوديه
يعني غرفة نوم صينيه تشتريها من السعوديه بعد شهر تقولين بغير مكانها من هذي الجهاالى جهه ثانيه ( خلاص عليها العوض ) مدام تحركت تفكك ابلوطها وخشبها تفتفت ومادري ايش
بالعربي اذا عندك نخل وديها النخل حق تسون فيها المندي
في جوده في الاثاث وكل شي لسعره ومتفاوته الدرجات يعني مو صنف او صنفين بالدرجات
في غرفة نوم تشترينها من الصين (50 الف ريال سعودي ) شوفي كم سعرها في السعوديه لو شفتيها ههه .. لكن هذي خشب خالص من النوع الثقيل جدا ومن نوع ممتاز من احد انواع الشجر
وفي اقل واقل واقل وقل ...الى ان تشوفين غرفة نوم ( 500 ريال ) مثل الي يبيعون في السعوديه ويضحكون على عقول المواطنين (والقهر يبيعها من 3000 ريال الى 5000 ريال وكأن متفضل عليك بالسعر الرخيص )
الاشكال : هذا نقطه لا تقل اهميه عن الجوده
سبحان الله في عقول الصينين
عندهم ذوق رهيب وهذا لان عددهم كثير تتعدد الافكار والاطروحات
في كل شي مو بس الاثاث كل فتره يبهرونا باشكال جديده ورهيبه خياليه ماتنوصف
انا اروح المعرض الدولي يقام مرتين بالسنه في الخريف وفي الربيع ولما اشوف التصاميم والابتكارت و و و
اقول وين عايشين احنا في التخلف وشاغلين روحنا فلان قال وفلان سوى ( واذا تكلم تقول اية الله دلدقني )
ومافي امل نقدر نتابهم بالنظر مو نفكر نلحقهم بالدرب
الاشكال رهيبه وخياليه وكل فتره تنزل اشكال احلى وافضل من سابقها يعني عندهم عجلة التجديد ماتوقف ابدا
لان المصانع كثيره والايدي العامله اكثر واكثر .. فيكون قسم خاص في كل مصنع بس حق التصاميم والابتكار
ومطلوب منه يعطيهم تصاميم جديده باستمرار عشان ما يقدر احد ينافسهم بالاسواق العالميه
اخيرا ..
بعد كل هذا السرد الطويل اعطيك الفائده وانهي المشاركه
1- يوجد مدينه خاص بالاثاث بها كل ماتحلمين به ومالم تحلمي به واسعارم رخيصه جدا .. وفي الغالي ولكن سعره فيه وارخص من السعوديه بشل غير متصور
2- يوجد مدينه خاص بالاضائه ( ثريات وليتات ولمبات وهالامور ) اشكال متنوعه ورهيبه واسعارهم رخيصه جدا مقارنه بالسعوديه
3- يوجد مدينه خاصه بالسراميك والرخام ( جميع انواع السرميك والرخام الطبيعي ) اشكال رهيبه جدا واستغرب عندما لا اجدها في السعوديه
بينما يوجد في السعوديه سراميك صيني من اردى الانواع ولااعلم لماذا لا يستورد الممتاز والفرق بالسعر قليل بين الرديئ والجيد
والرخام معروف اشكاله ولكن السعر مناسب طبعا
4-الابواب والشبابيك .. حقيقتا تصاميم من اروع ما رايت ( ولكن على من يفكر بشراء الابواب من الصين ) ان ياخذ مقاسات الابواب في بيته لان الصين مو مثلنا كل باب له مقاس ومافي بابين مثل بعض في المقاس ولازم نجار يضبطهم
لا .. الصين عندهم مقاسات موحده (باب درفتين له مقاس) ( باب درفه وحده له مقاس) ( باب حديد له مقاس ) لكن يصنعون لك الابواب على المقاس الي تبي لو ابوابك كحال كل سعودي مقاس عريض ومقاس طويل
ملاحظه مهمه ..
لو تعددت المقاسات وانت تبغى تشتري مثلا 30 باب لهذا الفلا او البيت من طابقين
3 ابواب بمقاس ..2 باب مقاس .. 4 باب مقاس ...........وهكذا يعني كل مجموعه لهم مقاس انت خسران في هالعمليه لان بيقول لك المصنع مو مشكله اسوي لك المقاسات لكن كل نوع له سعر وكل مقاس له كميه محدوده يعني مرايح اصنع باب مقاس واحد وارجع اسوي 3 باب مقاس ثاني وهكذا
فيضطر الزبون يشتري كميات فوق حاجته او انه يترك الشراء ..وطبعا مرايح يترك الشراء لان الاشكال رهيبه ومرايح يحصل مثلها في غير مكان
او ان صاحب الفيلا من الاساس يوحد الابواب على مقاسات وحده ومايخليالماول يلعب عليه ههههه
5- الاكسسوارات والتحف هذي حدث بلاحرج وباسعار زهيده وباشكال غريبه وجديده ومتنوعه وكل ماتقولين فيها منقصه بحقها
6- الشخن سعره مو ثابت ويتفاوت بين فتره وفتره لكن سعره معقول ( تقريبا 3000 ريال الى 5000 ريال) في اقل على حسب الحاويه
ان شاء الله مشاركتي الطويله تكون فيها فايده
انا انصح كل من خلص( بناء بيته عظم ) يزور الصين وياخذ كل الشغلات من الصين
يوفر مبالغ كبيره من التشطيب والتاثيت لو فرضنا التشطيب مع الاثاث ( 500 الف ) بدون مبالغه يوفر النص (250) هذا لو ماتعب نفسه بالبحث عن الاسعار واكتفى بالاشكال والجوده
فما بالك من يكلفه التشطيب ( 700 - 900 الف ريال ) انا اعتبره مجنون اذا ماياخذ من الصين ويوفر ( 350 الف - 450 الف ) لو نص المبلغ الي يوفره يعطيه الجمعيات الخيريه دفع بلاء عنه وعن عياله
وبالتوفيق