منتديات الطرف - رساله من أم نويصر (الديواني)

هذه الرسالة باللهجة العاميه القصيميه تحتاج الى مترجم;)

بسم الله الرحمن الرحيم
أخيتي الغاليه أم دحيم
السلام عليكم ورحمة الله وبركاته ..وبعد
خطكم الشريف وصل وفرحنا به ...وكثر الله خيركم على المقطع والغدفه الي كزيتي لي وابشرك ان أخبارنا تسرك ، البقرة أضنت , والبيض فقش , والدجاجه الرقطا راجنه ، وان دحيم العلي أعرس , ونوير مخطوبه , وعويِش فطمناه من الرضاع , وسويره رفعناه من السقاط , وصويلح شرى له دنانه , وسليم ختم المصحف , وعزيز الصالح طاب من لطنان , وسند ولد مضيوي بدا يحبي , والحمد لله طاب الحجام اللي بعينه , وانتي صادقه حطينا عليه تبنه , وحصيصه طابت قطوفه اللي براسها , ومنير مشطناه بورده . وأم سويلم طلعت من الماجب وتممنا لسويلم والنعال الزنوبا اللي تخبرين عندنا هاك السنه رقعناه ومقطع الروز خبيناه , والدوشق غيرنا قطاعته والسفره الكبيره علقناه بالقبه , وحطينا بيت للرادو والمصحف حق عمي , والسراج زينا فتيلته . والزبيل مليناه حتات من نخلتنا وشرينا سحاره ولقينه منكسره . وابقولك اني مع هالحموله غاديه حوسه الطايه تخر , والمثعب منشق , والقوتاله منعلقه , وصاير باب الروشن منكسر والموقد مسني , والبريق منقشع والله يهديتس يخيتي يام دحيم البزار اللي كزيتيه شوي الكركم به , والمسمنه تقل رماد ما به ليمون , والفتيت مسري , والكليجا تقل عظامه . وان بغيتو تكزون شي كزوا شي يبل الريق ويواجه عند الحموله . معكم علم ان حمولتنا ناس نقاده . وخالتي شراهه , وعمتنا حقنه ميجوز لها شي مثل رقاص الساعه . وحريم عمومتنا صرت أثم لهن . وجذاعينهم شيبان كبري يترددون على هالجصه قضوا على النعمه الله يهديهم ونا ما ودي اطول عليك الحكي عسى ما يخلين منك , ولا من جناين قلبك وسلميلي على خاصة نفسك ومن يعز عليك أخص بالسلام القوي وحصوص وقوليلهم والله ما خلان أقصر عنوتي وأشوفكم الا اني عويجزه ولاصقه على ظهري وضليعاتي ومارخه كتوفي ورجيلاتي بالفقس .. ومعك علم هالريح يعودن بين حين اوحين يالله حسن الخاتمه والعمل الصالح وسلمي ونتي سالمه . ومع السلامه
أختك أم نويصر